”ფოლკსვაგენმა” მეორე თაობის ”ტუარეგი” გვაჩვენა

Second-Generation VW Touareg Unveiled

14 თებერვალი

”ფოლკსვაგენმა” თავისი პოპულარული უგზოობის მეორე თაობის ავტომობილის ფოტოები და მის შესახებ ზოგადი ინფორმაცია გამოაქვეყნა. ამ ავტომობილის მსოფლიო პრემიერა ჟენევის ავტო გამოფენაზე ჩატარდება, მისი გაყიდვები კი ზაფხულში დაიწყება.

ვოლფსბურგელების მიერ გამოქვეყნებული რელიზი გვამცნობს, რომ ახალი ”ტუარეგი” თავის წინამორბედზე 4 მილიმეტრით გრძელი (4758 მმ) და 20 მილიმეტრით დაბალია. იმავდროულად, ახალი ავტომობილი 208 კილოგრამით მსუბუქიცაა.

ევროპის ბაზარზე, ახალი ”ტუარეგი” ოთხი სხვადასხვა ძრავით იქნება ხელმისაწვდომი. ამათგან ორი საწვავად დიზელს იყენებს. მათი ლიტრაჟია 3.0 და 4.2 ლიტრი, სიმძლავრე კი, შესაბამისად 240 და 335 ცხენის ძალა. მესამე ძრავია ბენზინის 3.6-ლიტრიანი FSI, რომელიც 280 ცხენის ძალას და 360 ნიუტონმეტრს გამოიმუშავებს.

ძრავების გამაში ჰიბრიდული სისტემაც შედის, რომელშიც 3.3-ლიტრიან V6 ბენზინის ძრავთან, რომელსაც მექანიკური დამჭირხნი ემსახურება და რომლის სიმძლავრეც 333 ცხენის ძალას აღწევს, უნისონში 47-ცხენისძალიანი ელექტროძრავი მუსაობს. ჰიბრიდული დანადგარის ჯამური სიმძლავრე 380 ცხენის ძალას აღწევს. მისი მეშვეობით, ამ უზარმაზარ ავტომობილს ადგილიდან 100 კმ/სთ სიჩქარის ასაკრეფად 6.5 წამი ჰყოფნის. მარტო ელექთროძრავით, მას მაქსიმუმ 45 კმ/სთ სიჩქარით გადაადგილება შეუძლია.

ყველა ძრავთან შესაწყვილებლად განკუთვნილია 8-საფეხურიანი ავტომატური გადაცემათა კოლოფი. გარდა ამისა, ავტომობილი აღჭურვილია პნევმოსაკიდარით და სისტემა სტოპ-სტარტით, რომელიც ავტომობილის საწვავის ხარჯს ამცირებს. კვლავ ძველი კონსტრუქცია შეინარჩუნა სრულამძრავიანმა ტრანსმისიამ, რომელიც მაბრუნ მომენტს მუდმივად აწვდის ყველა ბორბალს. თუ შემკვეთი მოისურვებს, მის ავტომობილზე დამადაბლებელ საფეხურს და ცენტრალური და ღერძებსშორისი დიფერენციალის ბლოკირების კვანძებსაც დააყენებენ. ამ შემთხვევაში, 8-საფეხურიან კოლოფს 6-საფეხურიანი ცვლის.

”აუდი A1” კონკურენციას ”ბეემვეს” ”მინის” გაუწევს

Audi aims new A1 at BMW's Mini

13 თებერვალი

”აუდიმ” ინტერნეტით თავისი სრულიად ახალი ავტომობილის, კომპაქტურ ჰეჩბეკ A1-ის ფოტოები და ზოგადი ინფორმაცია გამოაქვეყნა და გამოაცხადა, რომ ამ ავტომობილით, კონკურენციას გაუწევს ისეთ სერიოზულსა და პოპულარულ მეტოქეს, როგორიც ”ბეემვეს” რეტრო-სტილის ”მინია”.

ახალი ავტომობილის გაყიდვები ევროპულ ბაზარზე მაისში დაიწყება, სადაც ის 16 000 ევროდ გაიყიდება. შედარებისთვის, ”მინის” ევროპული ფასი ოდნავ მაღალი - 16 600 ევროა. ეს გარემოება კი ინგოლშტადტელებს იმედს აძლევს, რომ მათი ახალი ავტომობილი ისეთივე პოპულარული გახდება, როგორიც ”მინია”.

”აუდი A1-ის” ძრავების გამაში ჯერჯერობით მხოლოდ ოთხი აგრეგატია - ორი ბენზინის და ამდენივე დიიზელის. ამასთან, ჰეჩბეკის საბაზო აღჭურვაში შედის საწვავის დამზოგავი სტოპ-სტარტ სისტემა და მუხრუჭების ენერგიის რეგენერაციის სისტემა.

ყველაზე ეკონომიური A1 აღჭურვილია 90-ცხენისძალიანი 1.6-ლიტრიანი დიზელით, რომელიც ”ფოლკსვაგენ გოლფზეც” გამოიყენება. ეს ძრავი, ყოველი კილომეტრის გავლისას, ატმოსფეროში მხოლოდ 99 გრამ CO2-ს გამოჰყოფს და 100 კილომეტრს სულ რაღაც 3.8 ლიტრი საწვავით გადის.

საბაზო ძრავი კი 1.2-ლიტრიანი ბენზინის აგრეგატია, რომლის სიმძლავრეც სულ რაღაც 86 ცხენის ძალას შეადგენს. ამ ძრავით აღჭურვილ ავტომობილს 100 კილომეტრის გასავლელად 5.1 ლიტრი ბენზინი ჰყოფნის, ყოველ კილომეტრზე კი ის გარემოს 119 გრამი ნახშირორჟანგით აბინძურებს. შედარებისთვის, ”მინის” მსგავსი მონაცემების მქონე აგრეგატი 1.6-ლიტრიანი ძრავია, რომლის სიმძლავრეც 98 ცხენის ძალაა. 100 კილომეტრზე მისი ხარჯი 5.4 ლიტრია, გამონაბოლქვში ნახშირორჟანგის შემცველობა კი კილომეტრზე 127 გრამს აღწევს.

”აუდი A1-ის” მსოფლიო დებიუტი ჟენევის საავტომობილო გამოფენაზე გაიმართება. ეს ავტომობილი ”ფოლკსვაგენის” სუბკომპაქტურ ჰეჩბეკ ”პოლოს” პლატფორმაზეა ბაზირებული და მას ”აუდის” ბრიუსელის (ბელგია) ქარხანა გამოუშვებს. დასაწყისში, ბაზარზე A1-ის სამკარიანი ვერსია გამოვა, მოგვიანებით კი მას ხუთკარიანი ვარიანტიც მოჰყვება.

ჰეჩბეკი A1 ”აუდის” იმ გეგმის ერთ-ერთი მთავარი პერსონაჟია, რომლის მიხედვითაც, ინგოლშტადტელებს გაყიდვების მოცულობით ორი მთავარი გერმანული კონკურენტის - ”ბეემვეს” და ”მერსედეს ბენცის” უკან ჩამოტოვება და პრემიუმ კლასში მსოფლიო ლიდერობა აქვთ განზრახული.

სამოდელო გამაში სუბკომპაქტური A1-ის და დიდი ზომის ოთხკარიან კუპე A7-ის დამატებით, ”აუდი” თავის წლიურ გაყიდვებს 2015 წელს 1.5 მილიონ ავტომობილამდე გაზრდის. შედარებისთვის, გერმანულმა კომპანიამ შარშან სულ 949 700 ავტომობილის გაყიდვა შეძლო.

”აუდი” იმედოვნებს, რომ წლიურად 80 000 A1-ის გაყიდვას შესძლებს. წინასწარი ვარაუდით, მყიდველთა უმეტესობა ქალაქში მცხოვრები ახალგაზრდობა (25-35 წლის) იქნება, რომლებიც ”მინის” რეტრო სტილზე მაღლა ”აუდის” სუბკომპაქტის თანამედროვე სტილს დააყენებენ.

”აუდის” ამ ეტაპზე A1-ის მხოლოდ ევროპის ბაზარზე გაყიდვა აქვს დაგეგმილი. ”აუდი ოფ ამერიკას” პრეზიდენტ იოჰან დე ნისხენს ნათქვამი აქვს, რომ მისი კომპანია მეორე თაობის A1-ს ამერიკაშიც გაჰყიდის, თუმცა ამ ავტომობილს გერმანული კომპანია უახლოესი რვა წლის განმავლობაში არ გამოუშვებს.

”ნისანი” ახალ ქროსოვერზე დიდ იმედებს ამყარებს

Nissan wants Juke to match success of Qashqai in Europe

13 თებერვალი

”ნისან მოტორი” იმედოვნებს, რომ მისი უახლესი კომპაქტური ქროსოვერი ”ჯუკი” ევროპაში ისეთივე პოპულარული იქნება, როგორიც მასზე ოდნავ დიდი ”ქაშკაია”. ”ჯუკის” მსოფლიო პრემიერა ჟენევის ავტო შოუზე გაიმართება, მის გაყიდვებს კი იაპონური კომპანია სექტემბრის ბოლოს დაიწყებს.

”ამ მანქანას ფართო სალონიც აქვს და იმევდროულად ის კომპაქტურია. ის ერთი შეხედვით ახოვანიც მოჩანს, თუმცა იმავდროულად, ძალიან დინამიურიცაა. პრაქტიკულიცაა და ახალგაზრდულიც. ეს ის თვისებებია, რომლებიც თითქოს, ერთმანეთს ეწინააღმდეგება, თუმცა ყველა ”ჯუკს” ახასიათებს და მთლიანობაში, რაღაც უნიკალურს ქმნის”, - თავისი კომპანიის სიახლე ასე უცნაურად დაახასიათა ”ნისან იუროპის” ვიცე პრეზიდენტმა პიერ ლოინგმა, ვინც პროდუქციის დაგეგმვაზეა პასუხისმგებელი.

”ჯუკი” იაპონური კომპანიის ევროპულ დიზაინ ცენტრის სპეციალისტებმა, ლონდონში შეიმუშავეს, ამ ავტომობილს კი ”ნისანის” ოპამას (იაპონია) და სანდერლენდის (ბრიტანეთი) ქარხნები გამოუშვებს. სხვათა შორის, ”ქაშკაისაც” სანდერლენდის საწარმო უშვებს, რომელსაც, ამ ქროსოვერზე არსებული მზარდი მოთხოვნის გამო, უკვე სამ ცვლაში ამუშავებენ.

ცნობისათვის, ბოლო წლებში, ”ნისანი” თავის ევროპულ ბიზნესში აქცენტს ქროსოვერებზე აკეთებს, რადგან ძველ კონტინენტზე მისი სედანები დიდი პოპულარობით ვერ სარგებლობს. სწორედ ქროსოვერების დამსახურებაა ის ფაქტი, რომ შარშან, როდესაც ევროპულ ბაზარზე გაყიდვების მოცულობა შემცირდა, იაპონურმა კომპანიამ წინა წელთან შედარებით, 9 პროცენტით მეტი, 366 711 ავტომობილი გაჰყიდა. ევროპაში ”ნისანის” ბესტსელერი სწორედ ქროსოვერი ”ქაშკაია”, რომელიც შარშან ძველ კონტინენტზე 181 711 ცალი გაიყიდა (წინა წელთან შედარებით, 25.4 პროცენტით მეტი).

”ნისანი” იმედოვნებს, რომ წელს მთელ მსოფლიოში 140 000-150 000 ცალ ”ჯუკს” გაჰყიდის. კომპანია აცხადებს, რომ ამ ავტომობილისთვის მთავარი ბაზარი ევროპა იქნება, რომელიც ამ ქროსოვერის წლიური გაყიდვების 60-70 პროცენტს აითვისებს. ”ნისანის” აღმასრულებელ ვიცე პრეზიდენტ კოლინ დოჯის თქმით, ”ჯუკის” მყიდველთა დიდი ნაწილი 30-40 წლის მამაკაცები იქნებიან.

რაოდენ გასაკვირიც უნდა იყოს, ”ნისანი” ჯერჯერობით ჩინეთში ”ჯუკის” გაყიდვას არ გეგმავს. ამას კი დოჯი შემდეგნაირად განმარტავს: ”ჩინეთის ბაზარი სულ რაღაც 5-8 წლისაა და არავინ იცის, ხვალ როგორ შეიცვლება იქაური მყიდველის გემოვნება. ახლანდელი ავტომფლობელების უმეტესობა, თავის შემდეგ ავტომობილს იმავე კლასიდან არ შეიძენს, რომელი კლასის მანქანაც პირველად შეიძინა. მაგრამ 4-5 წლის შემდეგ იქ სიტუაცია რადიკალურად შეიცვლება და ჩვენც საბაზრო სტრატეგიას აუცილებლად გადავხედავთ”.

ძნელია, დაეთანხმო მსოფლიოს ერთ-ერთი უდიდესი ავტომწარმოებლის გამოცდილი ფუნქციონერის ასეთ პასიურობას, მითუმეტეს, როცა იცი, რომ ”ჯენერალ მოტორსი” და ”ფოლკსვაგენი” ცისქვეშეთში გაყიდვებს თითქმის ყოველწლიურად აორმაგებენ.

რაც შეეხება ”ჯუკს”, იაპონური კომპანია თავის მყიდველს ამ ავტომობილს სრულამძრავიანი, ან წინა წამყვანბორბლიანი ტრანსმისიებით შესთავაზებს. სრულამძრავიანი ტრანსმისიის ელექტრონული სისტემა მაბრუნ მომენტს წინა და უკანა ღერძებს შორის სიტუაციის შესაბამისად, იმგვარად ანაწილებს, რომ მოხვევის დროს მოქნევის და მოცურების ალბათობა მაქსიმალურად გამოირიცხოს.

”ჯუკისთვის” ევროპულ ბაზარზე სულ სამი ძრავია გათვალისწინებული, რომელთაგან ერთი დიზელზე მუშაობს, ორი კი - ბენზინზე. ყველა მათგანი ევრო5 სტანდარტს აკმაყოფილებს.

”პორშემ” რბოლებისთვის ჰიბრიდული ავტომობილი მოამზადა

Porsche 911 GT3 R Hybrid

13 თებერვალი

”პორშემ” თავისი სარბოლი ავტომიბილის, 911 GT3 R-ის ჰიბრიდული ვერსიის ფოტოები გაავრცელა, რომლის პრემიერა ჟენევის საავტომობილო შოუზე გაიმართება, მაისში კი ის მონაწილეობას ნურბურგრინგის 24-საათიან რბოლაში მიიღებს.

ჰიბრიდული 911 GT3 R აღჭურვილია ჰიბრიდული სისტემით, რომელშიც შიდაწვის ძრავთან, ორი ელექტროძრავია შეწყვილებული. ბენზინის V6 აგრეგატი, რომლის სიმძლავრეც 480 ცხენის ძალაა, ჩვეულ ადგილზე - ავტომობილის უკანა ნაწილშია მოთავსებული და მოძრაობაში უკანა ბორბლები მოჰყავს. ელექტროძრავები კი წინა ბორბლებს ემსახურება.

გარდა ამისა, ჰიბრიდულ სისტემაში შედის კინეტიკური ენერგიის რეკუპერაციის სისტემა (კერს-ი), რომელიც ფორმულა 1-ის ინგლისური გუნდის, ”უილიამსის” სპეციალისტების მიერაა შემუშავებული და დამუხრუჭების დროს გამოყოფილ ენერგიას აგროვებს. ეს სისტემა ავტომობილის მარჯვენა ნაწილში, იმ ადგილზეა მოთავსებული, რომელიც ჩვეულებრივ ავტომობილებში მგზავრის სავარძელს უკავია ხოლმე. მასში, მქნევარა გენერატორთანაა დაკავშირებული, რომელიც გამომუშავებულ ენერგიას მცირე ზომის აკუმულატორში აგროვებს.

კერს-ის სიმძლავრის პიკი 120 კილოვატს, ანუ 160 ცხენის ძალას აღწევს. სისტემაში ენერგიის დამგროვებლის მოვალეობას თავისუფალი მქნევარა ასრულებს. მასში დაგროვილ ენერგიას კი პილოტი თავისი სურვილის შესაბამისად იყენებს. ის აწვება საჭის რგოლზე მოთავსებულ ღილაკს და მაშინვე, აკუმულატორებში დაგროვილი ენერგია ელექტროძრავებს მიეწოდება, რომლებიც თავიანთ მაბრუნ მომენტს წინა ბორბლებს მიაწვდიან. ამ სისტემას 78 წამის განმავლობაში შეუძლია მუშაობა, რის შემდეგაც აკუმულატორები განიმუხტება.

ჯერჯერობით, ”პორშეს” არ გამოუქვეყნებია ჰიბრიდული 911 GT3 R-ის დინამიკური მახასიათებლები. გერმანული კომპანია ამ ინფორმაციას ჟენევურ გამოფენაზე გაგვაცნობს.

სამაგიეროდ, ”პორშეს” შეფმა მიხაელ მახტმა განაცხადა, რომ მისი კომპანიის გუნდი, მსგავსი სისტემით აღჭურვილ ავტომობილს ლე მანის 24-საათიანი რბოლისთვისაც მოამზადებს.

”ოპელი” ჟენევაში ახალ ელექტრონულ კონცეპციას გვაჩვენებს

Opel Voltec Concept Teased

13 თებერვალი

”ჯენერალ მოტორსის” გერმანული შტო ”ოპელი” ჟენევის ავტო შოუზე თავის ახალ კონცეპტუალურ ნამუშევარს გამოიტანს, რომელსაც, გავრცელებული ინფორმაციით, ”ფლექსტრიმ GTE” ეწოდება. ამ კონცეპციაში ის ჰიბრიდული სისტემაა გამოყენებული, რომელიც ”გენერლებმა” ”შევროლე ვოლტისა” და ”ოპელ ამპერასთვის” შექმნეს.

”ოპელის” მიერ გამოქვეყნებული განცხადებით, კონცეპცია გვაჩვენებს, თუ რა მიმართულებით განვითარდება გერმანული კომპანიის ეკოლოგიურად სუფთა ტექნოლოგიები.

”ეს ავტომობილი იმის დადასტურებაა, რომ მანქანის გაბარიტები და კომფორტი არაა მისი ეკოლოგიური მაჩვენებლების გაუარესების მიზეზი”, - ნათქვამია ”ოპელის” მიერ გამოქვეყნებულ რელიზში.

როგორც სურათზე ჩანს, ”ფლექსტრიმ GTE-ზე” ”ოპელის” ემბლება აკუმულატორების დასამუხტ პორტადაა გამოყენებული და მას ორიგინალური დიზაინი აქვს. სურათზე ასევე ჩანს, რომ ლოგოს გარდა, ფსევდორადიატორის მარჯვენა მხარეს, წარწერა ”ვოლტეკია” მოთავსებული.

მიმომხილველები ვარაუდობენ, რომ აღნიშნულ კონცეპციას ”ჯენერალ მოტორსი” პირველად თავისი პრემიუმ ბრენდის, ”კადილაკის” ახალი მოდელებისთვის გამოიყენებს. უფრო კონკრეტულად კი, ”ვოლტეკის” პიონერი შეიძლება გახდეს სპორტული ”კადილაკ კონვერჯი”, რომლის პროექტიც, კრიზისის გამო, თაროზეა შემოდებული.

რამდენიმე დღის წინ, ”ოპელმა” თავისი ხუთწლიანი სამოქმედო გეგმა გამოაქვეყნა, რომელშიც წერია, რომ ამ პერიოდში, კომპანია თავის განვითარებას 11 მილიარდ ევროს მოახმარს. ამ თანხის დიდი ნაწილი ახალი მოდელების წარმოების დაწყებას მოხმარდება. ნაწილს კი კომპანია ახალი, ეკოლოგიური ტექნოლოგიების შემუშავებასა და წარმოებაში დანერგვას მოახმარს.

ფრენკ უილიამსი ახალ ბიზნესს იწყებს

Williams to Become Majority Stake Owner of Williams Hybrid Power

13 თებერვალი

ფორმულა 1-ის ერთ-ერთი ყველაზე წარმატებული გუნდის, ”უილიამსის” დამაარსებელი და თანამფლობელი ფრენკ უილიამსი (სურათზე) ახალ ბიზნესს იწყებს. ახლახანს მან თავისი გუნდის აქციების მცირე ნაწილი გაყიდა და მიღებული თანხით ბრიტანული კომპანიის, ”აუტომოტივ ჰაიბრიდ პაუას” აქციების საკონტროლო პაკეტი შეიძინა, რის შემდეგაც ამ კომპანიას ”უილიამს ჰაიბრიდ პაუა” ეწოდა.

ფრენკ უილიამსმა ამ კომპანიის აქციების 40 პროცენტი ორი წლის წინ შეიძინა და ის გროვში, თავისი გუნდის შტაბ ბინის სიახლოვეს გადაიტანა. მაშინ ამ კომპანიას კერს-ის (კინეტიკური ენერგიის რეკუპერაციის სისტემის) შემუშავება დაევალა, რომელსაც სხვა გუნდებისგან განსხვავებით, ენერგია მქნევარას მეშვეობით უნდა დაეგროვებინა.

მართალია, შარშან ”უილიამსს” ფორმულა 1-ში კერს-ი არ გამოუყენებია და გუნდებს შორის არსებული შეთანხმების შესაბამისად, არც ახალ სეზონში გამოიყენებს, მაგრამ ”უილიამს ჰაიბრიდ პაუა” თავისი სისტემის გამოყენებას საგზაო ავტომობილებისათვის აპირებს. კერძოდ, გავრცელებული ინფორმაციით, სწორედ ამ სისტემითაა აღჭურვილი ”პორშეს” ჰიბრიდული ავტომობილი 911 GT3 R, რომლის მსოფლიო პრემიერა ჟენევის ავტო შოუზე გაიმართება. გარდა ამისა, ამავე სისტემას, გერმანული კომპანია ნურბურგრინგის 24-საათიან რბოლაში, მოდელ 911-ზე გამოიყენებს.

ამასთან, ”უილიამს ჰაიბრიდ პაუა” მარტო ”პორშესთან” თანამშრომლობით არ შემოიფარგლება. მსგავს სისტემას ის ”იაგუარ ლენდ როვერისთვისაც” ამუშავებს, რომელიც ინდური ”ტატა მოტორსის” მფლობლობაში შედის. ავტომობილების გარდა, მქნევარიან კერს-ს ”უილიამს ჰაიბრიდ პაუა” ასევე მატარებლების, ავტობუსებისათვის, გემებისა და ქარის ელექტროგენერატორებისთვისაც კი შეიმუშავებს.

ბიზნესის განვითარების კვალობაზე, ფრენკ უილიამსი ”უილიამს ჰაიბრიდ პაუას” აქციების საკონტროლო პაკეტის დაუფლებას გეგმავს. ”უილიამსის” ფ1-ის გუნდის მთავარი აღმასრულებელი ედამ პერი იმედოვნებს, რომ ახალი ბიზნესი მისი გუნდისთვის დიდი მოგების მომტანი გახდება.

”კია” ”ტოიოტა პრიუსთან” კონკურენციისთვის ემზადება

Kia Ray Hybrid

10 თებერვალი

ჩიკაგოს ავტო შოუზე, კორეულმა კომპანია ”კიამ” პლაგ-ინ ჰიბრიდული სისტემით აღჭურვილი კონცეპტუალური მოდელი ”რეი” გამოფინა, რომლის ბაზაზეც, მალე სერიული ავტომობილის წარმოება დაიწყება. კონცეპტუალური ავტომობილი გადამუშავებადი, ძალიან მსუბუქი პლასტიკითაა დამზადებული, მის სახურავზე კი ფოტოელემენტებია მოთავსებული, რომლებიც აკუმულატორებისთვის მზისგან მიღებულ ენერგიას ელექტროენერგიად გადაამუშავებენ.

”კია რეის” ჰიბრიდულ სისტემაში შედის ბენზინის 1.4-ლიტრიანი ძრავი, რომლის სიმძლავრეც 153 ცხენის ძალაა და 75-კილოვატიანი ელექტროძრავი, რომელსაც ენერგიით ლითიუმ-იონური აკუმულატორების ბლოკი კვებავს. მხოლოდ ელექტროძრავის ხარჯზე, ავტომობილს დაახლოებით 80 კილომეტრის გავლა შეუძლია. და თუ საქმეში შიდაწვის ძრავი და მასთან დაკავშირებული გენერატორი ჩაერთვება, მაშინ სვლის სიშორე 1 200 კილომეტრამდე გაიზრდება. თანაც, ”რეი” ყოველ 100 კილომეტრზე მხოლოდ 1.2 ლიტრ ბენზინს დაწვავს.

”კია რეის” ეკოლოგიურ თემას მასში გამოყენებული აუდიოსისტემა ”ინფინიტი გრინეიჯიც” აგრძელებს, რომლის გამაძლიერებელი და დინამიკებიც, ჩვეულებრივ ანალოგებზე თითქმის ორჯერ ნაკლებ ენერგიას მოიხმარს. ენერგოდამზოგია ”მაიკროსოფტის” მიერ შემუშავებული მულტიმედიური სისტემა ”კია უვო-ც”.

”კიას” წარმომადგენელთა განცხადებით, ჩიკაგოში წარმოდგენილი კონცეპტუალური ”რეი” კორეული კომპანიის ახალი ქვებრენდის პირველი მერცხალია. ამ ბრენდის სახელწოდება ”კია ეკოდაინემიკსია”, ამ სახელით კი ეკონომიური და ეკოლოგიურად სუფთა ავტომობილების წარმოება იგეგმება.

რა თქმა უნდა, ამ ეტაპზე ჯერ ”კიაშიც” არ იციან, ”რეის” ბაზაზე დაიწყებენ თუ არა სერიული ავტომობილის წარმოებას.

უფრო მძლავრი და მსუბუქი ”მუსტანგ შელბი GT500”

Shelby GT500

10 თებერვალი

”ფორდის” განყოფილება ”სპეშლ ვიჰაიქლ ტიმმა” (SVT - სპეციალური მანქანების გუნდმა) პოპულარულ მასკლ ქარ ”მუსტანგ შელბი GT500-ის” მოდიფიცირებული ვერსია მოამზადა, რომელიც საბაზო ვერსიასთან შედარებით, უფრო მსუბუქი და მძლავრია. ამასთან, მოდიფიცირებულ ავტომობილს სამუხრუჭე სისტემის უფრო ეფექტური გაგრილების სისტემა და სატერფულების ახალი კვანძიც აქვს.

SVT-ს მიერ მოდიფიცირებული ”შელბი GT500” ალუმუნის V8 ძრავითაა აღჭურვილი, რომლის მუშა მოცულობა 5.4 ლიტრია, მაქსიმალური სიმძლავრე კი 550 ცხენის ძალა, საბაზო ვერსიაზე 10 ცხენის ძალით მეტია. ახალი ძრავი თავის წინამორბედზე 46.2 კილოგრამით მსუბუქია, რისი წყალობითაც, ავტომობილის საწვავის ხარჯიც შემცირდა და რაც არანაკლებ მნიშვნელოვანია, გაიზარდა ავტომობილის ძრავის სიმძლავრისა და წონის ფარდობა.

”ფორდის” მონაცემებით, ახალი ”მუსტანგი” ქალაქში გადაადგილებისას, 100 კილომეტრზე ”მხოლოდ” 15.6 ლიტრ ბენზინს მოიხმარს, რაც საბაზო ვერსიის ხარჯზე ერთი ლიტრით ნაკლებია. ტრასაზე მოძრაობისას, ხარჯი 10.2 ლიტრამდე (საბაზო ვერსიისაზე 0.4 ლიტრით ნაკლები) მცირდება.

ძრავის გარდა, მოდიფიცირებული ”შელბი GT500-სთვის”, SVT-ს სპეციალისტებმა სპეციალური სპორტ პაკეტი, ”SVT პერფორმენსიც” შეიმუშავეს, რომელშიც შედის მსუბუქი მეტალისგან დამზადებული 19-დუიმიანი წინა და 20-დუიმიანი უკანა ბორბლები, რომლებიც ”გუდიარის” წარმოების საბურავებით (იგლ F1 სუპერქარ G) არის შემოსილი. გაიზარდა ტრანსმისიის მთავარი წყვილის გადაცემის რიცხვი, საკიდარი კი უფრო ხისტი დრეკადი ელემენტებით აღიჭურვა.

”ფორდის” განცხადებით, ამ პაკეტის მეშვეობით, მოდიფიცირებული ”შელბი GT500” 2.3-მილიან (3.68 კმ) სატესტო ტრეკს, საბაზო ვერსიაზე თითქმის 3 წამით სწრაფად გადის.

ამერიკაში მოდიფიცირებული ”შელბი GT500-ის” გაყიდვა ზაფხულამდე დაიწყება, მისი საწყისი ფასი კი 49 495 დოლარი იქნება.

800-ცხენისძალიანი ”კადილაკი” ”ჰენესისგან”

Hennessey Cadillac CTS-V

10 თებერვალი

ამერიკულმა სატუნინგო კომპანია ”ჰენესი პერფორმენს ინჯინიარინგმა” ”კადილაკის” სედანი CTS-V დაამუშავა და მყიდველს მისი სამი ახალი ვარიანტი შესთავაზა, რომლებიც ერთმანეთისგან ძრავების სიმძლავრით განსხვავდება.

სტანდარტულ ძრავ LSA V8-გან, რომლის სიმძლავრეც 550 ცხენის ძალაა, ”ჰენესის” სპეციალისტებმა სამი მოდიფიკაცია დაამზადეს. მათგან პირველის მაქსიმალური სიმძლავრე 650 ცხენის ძალაა, მაქსიმალური მაბრუნი მომენტი კი - 870 ნიუტონმეტრი (3400 ბრ/წთ-ზე).

LSA V8-ის მეორე მოდიფიკაციის სიმძლავრე 700 ცხენის ძალამდე გაიზარდა, მაბრუნი მომენტი კი - 950 ნიუტონმეტრამდე (იმავე 3400 ბრ/წთ-ზე). ძრავის ამ ვერსიით აღჭურვილი CTS-V ადგილიდან 100 კმ/სთ სიჩქარის აკრეფას 3.2 წამში ახერხებს, მისი მაქსიმალური სიჩქარე კი 340 კმ/სთ-ს აღწევს.

ყველაზე მძლავრი ძრავის მესამე ვერსიაა, რომლის მაქსიმალური სიმძლავრეც 800 ცხენის ძალამდე არის გაზრდილი, მაბრუნი მომენტი კი - 1060 ნიუტონმეტრამდე. ოღონდ, ამის დინამიკური მონაცემები არ გამოქვეყნებულა. ჯერჯერობით, არც სედან CTS-V-ის ამ სამი ვერსიის ფასებია ცნობილი.

”ვოლვო” ჟენევაში განახლებულ სედან S60-ს გვიჩვენებს

Volvo S60

10 თებერვალი

შვედურმა კომპანია ”ვოლვომ” თავისი განახლებული სედანის, S60-ის შესახებ ოფიციალური ინფორმაცია, ამ ავტომობილის ჟენევურ მსოფლიო პრემიერამდე ერთი თვით ადრე გამოაქვეყნა. პრეს რელიზში ნათქვამია, რომ ეს ავტომობილი თავის კლასში საუკეთესო უნდა გახდეს.

ძნელი სათქმელია, აჯობებს თუ არა განახლებული S60 თავის გერმანელ მეტოქეებს, თუმცა ისიც უნდა ითქვას, რომ ”ვოლვომ” მისი წინამორბედი სულ მილიონი ცალი გაყიდა, რაც დიდი მიღწევა იყო. ჰოდა, შვედურ კომპანიაში იმედოვნებენ, რომ განახლებული სედანიც იმავე ტირჟით გაიყიდება. თუმცა, გაყიდვების დაწყებიდან პირველ წელს, სულ რაღაც 90 000 ცალი S60-ის გაყიდვა იგეგმება.

”ვოლვოს” მთავარ დიზაინერ პიტერ ჰორბერის განცხადებით, წინამორბედისგან განსხვავებით, ახალი S60 უფრო სადა სტილშია შესრულებული და რაც მთავარია, მის გარეგნობაში ”ვოლვოს” სტილი ადვილად გამოიცნობა. შვედურ კომპანიაში აცხადებენ, რომ შასისა და საკიდარის დახვეწის ხარჯზე, მათ კომპანიის ისტორიაში ყველაზე დინამიური ავტომობილი შექმნეს.

მყიდველისთვის ხელმისაწვდომი იქნება ორი კომპლექტაცია - ”კომფორტი” და ”დინამიკი”. ამათგან პირველს შედარებით რბილი საკიდარი ექნება, მეორეს კი - ხისტი. ახალი ავტომობილისთვის განკუთვნილია ბენზინის ორი (2.0 და 3.0-ლიტრიანი, შესაბამისად 203 და 304 ცხ.ძალით) და ამდენივე დიზელის (163 და 205 ცხ.ძალით) ძრავი. ცოტა ხანში მათ სიას კიდევ ოთხი ძრავი დაემატება.

ახალი S60 უსაფრთხოების უამრავი სისტემითაა აღჭურვილი, რომელთაგან ყველაზე მეტად ფეხით მოსიარულეთა დაცვის სისტემა გამოირჩევა, რომელიც საჭიროების შემთხვევაში, ავტომობილის სრულ გაჩერებას ავტომატურად უზრუნველყოფს. ოღონდ, საწყისი სიჩქარე 35 კმ/სთ-ზე მეტი არ უნდა იყოს.

ჯერჯერობით უცნობია ახალი S60-ის ფასი. ის ალბათ ავტომობილის გაყიდვამდე ცოტა ხნით ადრე გამოცხადდება, მისი გაყიდვები კი ზაფხულში დაიწყება.

შვეიცარული სპორტული ელექტრომობილი - LAMPO2

Protoscar LAMPO2 Details

10 თებერვალი

შვეიცარულ კომპანია ”პროტოსქარს” ჟენევის საავტომობილო შოუზე გამოსაფენად მომზადებული აქვს სპორტული ელექტრომობილი LAMPO2, რომელიც შარშან, ჟენევაში ნაჩვენებ კონცეპტუალურ მოდელ LAMPO-ს ლოგიკური გაგრძელებაა.

LAMPO2-ის ასაგებად, შვეიცარულმა კომპანიამ ”ჯენერალ მოტორსისეული” პლატფორმა ”კაპა” გამოიყენა, რომელსაც გენერლები სპორტული მოდელების - ”ოპელ GT-ს”, ”პონტიაკ სოლსტაისის” და ”სატურნ სკაის” წარმოებისთვის იყენებდნენ. ”პროტოსქარის” გადაწყვეტილებით, ელექტრომობილი კაბრიოლეტის ტიპის ძარით მზადდება და მას საკმაოდ უცნაური დიზაინი გამოარჩევს.

თუმცა მთავარი მისი ტექნიკური აღჭურვილობაა. ავტომობილს მამოძრავებელ ძალას ორი ელექტროძრავი ანიჭებს, რომელთა ჯამური სიმძლავრე 350 ცხენის ძალას, მაქსიმალური მაბრუნი მომენტი კი 600 ნიუტონმეტრს აღწევს. თითო ძრავი თითო ღერძს ემსახურება და გამოდის, რომ LAMPO2-ს ყველა ბორბალი წამყვანი აქვს. ძრავებს ლითიუმ იონური აკუმულატორების ბლოკი კვებავს, რომელთა ჯამური ტევადობა საათში 30 კილოვატია.

”პროტოსქარის” ელექტრომობილი ადგილიდან 100 კმ/სთ სიჩქარის აკრეფას 5 წამში ასწრებს, მისი მაქსიმალური სიჩქარე 200 კმ/სთ-ს აღწევს, სვლის სშორე კი 200 კილომეტრია. ამასთან, ელექტრომობილს აქვს აკუმულატორების სწრაფად დამუხტვის სისტემა, რომლითაც 10 წუთში მიღებული ენერგია საკმარისია იმისათვის, რომ ავტომობილმა 100 კილომეტრის გავლა შესძლოს.

”შევროლე კამარო” ევროპაშიც გაიყიდება

Chevrolet Camaro Comes to Europe

10 თებერვალი

”ჯენერალ მოტორსის” ყველაზე მასობრივი მარკა, ამერიკული ”შევროლე” ევროპაში ექსპანსიას იწყებს - ჟენევაში რამდენიმე ისეთ ავტომობილს გამოფენს, რომლებიც აქამდე ძველ კონტინენტზე არ იყიდებოდა. მათ შორისაა ამერიკაში საკულტო მოდელი ”შევროლე კამარო”, რომელიც ევროპელი პოტენციური მყიდველის წინაშე კუპესა და კაბრიოლეტის ძარაში გამოწყობილი წარსდგება.

”შევროლეს” ევროპული შტოს დირექტორ უეინ ბრენონის თქმით, ჟენევაში, ”კამაროს” გარდა, ამერიკული კომპანია მინივენ ”შევროლე ორლანდოს” (რომლის კონცეპტუალური ვერსია პირველად ორი წლის წინ, დეტროიტის ავტო შოუზე იყო წარმოდგენილი) და გასპორტულებულ ”ავეო RS-ს” წარადგენს. ეს უკანასკნელი, 1.4-ლიტრიანი ტურბოძრავ ”ეკოტექით” აღიჭურვება, რომელიც 138 ცხენის ძალას ავითარებს და რომელთანაც 6-საფეხურიანი კოლოფია დაკავშირებული. ”ავეო RS-ს” მყიდველს ჰეჩბეკისა და სედანის ძარით შესთავაზებენ.

ჯერჯერობით უცნობია ”შევროლე კამაროს” ევროპული ვერსიის სპეციფიკაციები. სავარაუდოდ, ის იმავე აგრეგატებით იქნება აღჭურვილი, როგორებითაც ამერიკაში იყიდება. ესაა 3.6-ლიტრიანი V6 და 6.2-ლიტრიანი V8, რომლებიც შესაბამისად, 304 და 426 ცხენის ძალას ავითარებენ.

”იაგუარი” შესაძლოა ელექტრომობილის შექმნაზე მუშაობდეს

All-Electric Jaguar XJ Developed?

10 თებერვალი

ბევრი სპეციალისტი თვლის, რომ ავტომწარმოებლებისთვის უმჯობესია, თუ ჯერ ჰიბრიდული მოდელების წარმოებას დაიწყებენ და მერე გადაერთვებიან ელექტრომობილებზე, რადგან ახალი ტექნოლოგიების ათვისება საკმაო ხარჯებთანაა დაკავშირებული და უკეთესი იქნება, თუ ეს პროცესი ეტაპობრივად განვითარდება.

მაგრამ ყველა ასე არ იქცევა და შესაძლოა, ამის ერთ-ერთი თვალსაჩინო მაგალითი ”იაგუარი” გახდეს - ინგლისურ ჟურნალ ”ავტოქარის” მიერ გავრცელებული ინფორმაცია გვამცნობს, რომ ინგლისური კომპანია შესაძლოა, ელექტრომობილის შექმნაზე მუშაობდეს და ამისათვის ბაზისად სედან XJ-ს გამოიყენებს.

”ავტოქარის” ჟურნალისტებმა დაადგინეს, რომ ელექტრომობილის შემუშავება პრაქტიკულად დასრულებულია და რომ მას უახლოეს მომავალში ვიხილავთ. იმავე წყაროს ინფორმაციით, ეს ავტომობილი მხოლოდ იმ ბაზრებისთვის იქნება განკუთვნილი, სადაც ბენზინზე და დიზელზე მომუშავე ავტომობილებს მაღალი გადასახადებით ბეგრავენ და შორს არც ის დროა, როდესაც იქ შიდაწვისძრავიან ავტომობილებს მალე ელექტრომობილები ჩაანაცვლებს. ასეთი ბაზარი კი დღეისათვის აშშ-ის, ეკოლოგიაზე ყველაზე მეტად მზრუნველი შტატი კალიფორნიაა.

”ავტოქარისვე” ინფორმაციით, ”იაგუარის” ელექტრომობილი ერთი, 145-კილოვატიანი (195-ცხენისძალიანი) ელექტროძრავით აღიჭურვება, რომელსაც ენერგიით ლითიუმ-იონური აკუმულატორების ბლოკი გამოკვებავს. იმისათვის, რომ ელექტრომობილის სვლის სიშორე გაიზარდოს, ის ასევე აღიჭურვება ინგლისური ”ლოტუსის” მიერ შემუშავებული, სამცილინდრიანი 1.2-ლიტრიანი შიდაწვის ძრავით, რომელიც მასთან დაკავშირებულ გენერატორს აამუშავებს, ეს კი გამომუშავებული ენერგიით აკუმულატორებს, ავტომობილის მოძრაობისას დამუხტავს. ამის წყალობით ელექტრომობილის სვლის სიშორე, აკუმულატორების ერთჯერადი დამუხტვით, 960 კილომეტრს მიაღწევს. ცნობისათვის, სვლის ასეთი სიშორით, ამჟამად გაყიდვაში არსებული ვერცერთი ჰიბრიდული და ელექტრული ავტომობილი ვერ დაიკვეხნის.

იმ შემთხვევაში, როდესაც საქმეში შიდაწვის ძრავი იქნება ჩართული, ”იაგუარის” ელექტრომობილს 100 კილომეტრის გასავლელად მხოლოდ 4.1 ლიტრი საწვავი დასჭირდება, რაც ლუქსის კლასის ავტომობილისთვის შესანიშნავი მაჩვენებელია. რა თქმა უნდა, მნიშვნელოვნად შემცირდება გამონაბოლქვში CO2-ის შემცველობა (120 გრ/კმ-ზე დაბლა).ელექტრომობილის მაქსიმალური სიჩქარე კი 180 კმ/სთ-ს მიაღწევს.

”იაგუარ ლენდ როვერს” ეს ინფორმაცია ჯერჯერობით არც დაუსასტურებია და არც უარუყვია. თუმცა მოსალოდნელია, რომ ჟენევის ავტო შოუზე, ამასთან დაკავშირებით, ბევრი რამ გაირკვევა.

”ცენვო ST1” – ”ბუგატი ვეირონის” კიდევ ერთი მეტოქე

Zenvo ST1

7 თებერვალი

სერიულ ავტომობილებს შორის, მაქსიმალური სიჩქარის რეკორდი რატომღაც ისევ ”ბუგატი ვეირონს” ეკუთვნის. მართალია, ეს რეკორდი (407.9 კმ/სთ) რამდენჯერმე გაუმჯობესდა, მაგრამ რამდენად გასაკვირიც უნდა იყოს, მიღწევა ისევ ლეგენდარული მარკის ავტომობილს რჩება. ალბათ იმიტომ, რომ მისი მჯობნი ავტომობილები მხოლოდ ერთჯერად გაელვებას ახერხებდნენ და სხვადასხვა მიზეზთა გამო, მათი თუნდაც მცირე რაოდენობით წარმოება ვერ ხერხდებოდა.

და აი, გამოჩნდა კიდევ ერთი ავტომობილი, რომელსაც ”ვეირონისთვის” რეკორდის ჩამორთმევა შეუძლია. ამჯერად ”მეფის ჩამოგდება” დანიურ მცირე კომპანია ”ცენვოს” შეუძლია, რომელმაც ”იერიშისათვის” სპორტული სუპერ ავტომობილი ST1 მოამზადა. ეს ავტომობილი ტექნიკური მონაცემებით ”ვეირონს” სჯობს, თუმცა ყოვლისმომცველი ტესტები ჯერ არ გაუვლია, რის გამოც, მის რეკორდს ჯერ მხოლოდ პოტენციურად ”ემუქრება”.

ორი სიტყვა ”ცენვო ST1-ის” გარეგნობაზე ვთქვათ: პირველ რიგში, აღნიშვნას მისი აგრესიული დიზაინი იმსახურებს. რადიატორის უზარმაზარი ბადე, მის ორივე კიდეში მოთავსებული ორი ლაყუჩი, რომლებიც გრილი ჰაერით სამუხრუჭე სისტემას ამარაგებს და ფარების ფოსოები, რომლებიც რადიატორის მსგავსი ბადითაა დაფარული - ყველაფერი ეს ავტომობილის მტაცებლურ ხასიათზე მეტყველებს.

იგივე თემა ძარის აბსოლუტურად ყველა ნაწილშია შესამჩნევი - პროფილირებული გვერდები და მათში ჩაყოლებული ”სასუნთქები”, რომლისთვისაც ადგილი ავტომობილის უკანა საყრდენშიც კი მოიძებნა (ეს ალბათ ტურბოკომპრესორისთვის). უკან კი სურათს დასრულებულ სახეს ისევ უცნაურ ბადეში ჩასმული მრგვალი სტოპ-ფარები, იმავე ბადეში მოთავსებული გამოსაბოლქვი მილები და დიდი ზომის ფსევდო დიფუზორი აბოლოვებს. ჰო, მართლა, ”ფერარის” სტილში, კაპოტის სივრცე გამჭვირვალე შუშითაა დაფარული. ასე რომ, ამ მონსტრის შიგნეულობის დათვალიერება გარედანვე შეიძლება.

მონსტრის თემას ამ ავტომობილის აღჭურვილობაც აგრძელებს - ”ცენვო ST1” მოძრაობაში 7.0-ლიტრიან V8 კონფიგურაციის აგრეგატს მოჰყავს, რომელსაც ერთდროულად, მექანიკური დამჭირხნიც ემსახურება და ტურბოკომპრესორიც. ასეთი გადაწყვეტის მიზანი ადვილი ასახსნელია - ტურბოკომპრესორს გაზზე დაგვიანებული რეაქცია ახასიათებს და მისი ”ჩავარდნების” გამოსასწორებლად, მექანიკური დამჭირხნი მუშაობს. ამგვარად, მაბრუნი მომენტის ზრდის მრუდი სასურველ ფორმას იძენს და ავტომობილიც ყოველგვარი მოულოდნელი ჩავარდნების გარეშე ახერხებს აჩქარებას.

ძრავის მაქსიმალური სიმძლავრე წარმოუდგენელ მაჩვენებელს - 1104 ცხენის ძალას აღწევს, მისი მაქსიმალური მაბრუნი მომენტი კი 1430 ნიუტონმეტრია. შედარებისთვის, ”ვეირონის” შესაბამისი მონაცემები ”მხოლოდ” 1001 ცხ.ძ და 1250 ნმ-ია. რა დრო დადგა, მილიარდერების საყვარელი სათამაშოს ათასცხენიანი რემა გვეცოტავება... რა თქმა უნდა, არ გვეცოტავება, მაგრამ სიმძლავრის მხრივ, ”ცენვომ” უკვე შეძლო ”ვეირონის” დაჩაგვრა.

საინტერესოა, რომ დანიური სუპერ ავტომობილის ძრავს არამარტო ბენზინზე, არამედ ბიოსაწვავზე მუშაობაც შეუძლია. თანაც ისეთზე, რომელშიც ბენზინის შემცველობა მინიმალურია. ესაა Е85, რომელიც 85 პროცენტ ეთანოლს და დანარჩენ ბენზინს შეიცავს. ჯერჯერობით უცნობია, თუ რა რაოდენობით საწვავი სჭირდება ამ მონსტრს 100 კილომეტრის გასავლელად.

ძრავთან შეწყვილებულია 6-საფეხურიანი მექანიკური გადაცემათა კოლოფი, რომელიც იმ გათვლითაა შემუშავებული, რომ ძრავის მიერ გამომუშავებული უზარმაზარი მაბრუნი მომენტი ეფექტურად აითვისოს და მათი გადამუშავებისას, არ დაიშალოს. ძრავისა და კოლოფის ამ ტანდემის მეშვეობით, ”ცენვო ST1-ს” ადგილიდან 100 კმ/სთ სიჩქარის აკრეფა 3 წამზე ნაკლებში შეუძლია. ეს კი იმას ნიშნავს, რომ ტემპერამენტით ის სუპერბაიკებსაც კი შეეჯიბრება.

გარეგნობიდან და მისი ტექნიკური მონაცემებიდან გამომდინარე, შეიძლება გვევარაუდა, რომ ”ცენვო ST1-ს” ინტერიერი სპარტანულად გაწყობილი უნდა იყოს. მაგრამ არა! დანიურ კომპანიაში ჩათვალეს, რომ ავტომობილის წონის შესამცირებლად, კომფორტზე უარის თქმა არ ღირს. ბოლოსდაბოლოს, ეს არც ”ბუგატიმ” გააკეთა! მათაც ავტომობილი არამარტო კონდიციონერით, არამედ მულტიმედიური სისტემითაც აღჭურვეს, რომლის მთავარი ნაწილიც ცენტრალური მონიტორია. ამ მონიტორზე შეიძლება იმ ვიდეოკამერიდან მიღებული გამოსახულების ნახვაც, რომელიც უკანა ხედვის სარკის მოვალეობას ასრულებს. ელექტრონიკით შეიძლება სპორტული სავარძლების და საჭის მექანუზმის დარეგულირება, ძრავის გაშვება კი საჭესთან არსებული ღილაკით ხდება.

სხვათა შორის, სალონში გამოყენებული ხელსაწყო მაჩვენებლები ძალიან ჰგავს ”პორშეს” შესაბამის ელემენტებს. თავად კომპანიის ემბლემა კი რაღაცით ”ლამბორგინისას” ჰგავს. თუმცა ეს წვრილმანებია, რომლებზეც ყურადღების გამახვილება არც ღირს. მთავარია, რომ ამ ავტომობილით, ”ცენვოს” თავისუფლად შეუძლია იამაყოს - ის ხომ მსოფლიოს უსწრაფეს ავტომობილთან შეძლებს გაჯიბრებას და მთავარი სწორედ ესაა. თანაც, ეს ხომ პირველი დანიური სუპერ ავტომობილია...

კომპანიის შტაბ-ბინა კოპენჰაგენის სიახლოვეს მდებარეობს. ”ცენვო აუტომოტივის” სპეციალისტებმა ST1-ზე მუშაობა ჯერ კიდევ 2004 წელს დაიწყეს და მართალია, მის დასრულებას დიდი დრო მოანდომეს, სამაგიეროდ, თავის კლიენტს სრულყოფილი ”მხეცი” მოუმზადეს, რომლის ყიდვისგან თავის შეკავებაც, ”რჩეულთა” ამა ქვეყნისათა ძალიან გაუჭირდებათ.

ჯერჯერობით, ამ ავტომობილს ყველა ტესტი გავლილი არ აქვს და ალბათ ესეცაა იმის მიზეზი, რომ მისი მაქსიმალური სიჩქარის შესახებ მონაცემები არ ქვეყნდება. რა ღირს ეს დანიური ქმნილება, ინფორმაცია ჯერჯერობით არც ამის შესახებ ვრცელდება. სამაგიეროდ, კომპანია აცხადებს, რომ მხოლოდ 15 ცალი ST1-ის დამზადებას აპირებს. თუმცა ვინ იცის, თუ მოთხოვნა იქნა, შესაძლოა, წარმოების მოცულობაც გაიზარდოს.

”ფერარის” ძველი ლეგენდა - ”250 GTO პინინფარინა კუპე”

Ferrari 250 GTO Pininfarina Coupe

7 თებერვალი

მსოფლიოში ყველაზე სასურველ და ფასეულ ავტომობილად, ”ფერარის” ლეგენდარული ქმნილება - 250 GTO ითვლება, რომლის შესახებაც, უამრავი მითი დადის. მაგალითად ის, რომელიც გვარწმუნებს, რომ ამ ავტომობილის ერთი ეგზემპლარი ახლახანს ვიღაც უცნობმა კოლექციონერმა 30 მილიონ დოლარად შეიძინა…

1962-1964 წლებში, მარანელოში სულ 36 ცალი ”ფერარი 250 GTO” დაამზადეს და როგორც საქმეში ჩახედული ხალხი ირწმუნება, ყველა მათგანი დღესაც შესანიშნავ მდგომარეობაშია. უფრო მეტიც, ყველა მათგანის ისტორია კარგადაა შემონახული. ცნობილია, როდის ვის მფლობელობაში იყვნენ ისინი, ვინ რა შეუცვალა და ასე შემდეგ.

1970-იანი წლების დასაწყისამდე, GTO მხოლოდ სარბოლად გამოიყენებოდა. მაგრამ გავიდა დრო და ახალ სარბოლ მანქანებთან შედარებით, მან კონკურენტუნარიანობა დაკარგა. სამაგიეროდ, მალე რარიტეტი გახდა და ახლა ძველი მანქანების დიდი რანდევუები მისი რომელიმე ეგზემპლარის გარეშე ძალიან იშვიათად თუ ჩაივლის. რა თქმა უნდა, მნიშვნელოვნად გაიზარდა მისი ფასიც.

არადა, ერთ-ერთი GTO თავის დროზე ახალბედა სტუდენტს ეკუთვნოდა, მეორეს კი, ტექსასში, ავტო მექანიკოსებისთვის მანქანის აგებულების სასწავლებლად იყენებდნენ. მაგრამ დღეს ყველა GTO სათუთი მოვლის საგანია, ბევრი მათგანი კი ძველი ავტომობილების რბოლებშიც მონაწილეობს.

”ფერარიმ” 250 GTO-ს წინაპარი, მოდელი ”250 GT ევროპა” პირველად 1954 წელს გამოუშვა. ეს იყო ავტომობილი, რომლითაც შეიძლებოდა სარბოლ ტრასაზე თავისი სვლით მისულიყავით და შემდეგ, რბოლებში მიგეღოთ მონაწილეობა. მოკლედ, ნამდვილი უნივერსალი.

ავტომობილი აღჭურვილი იყო ჯაჩინო კოლომბოს მიერ შექმნილი მოკლებლოკიანი V12 ძრავის 3.0-ლიტრიანი ვერსიით. ეს ძრავი მუდმივად გადიოდა მოდერნიზებას და არაერთი წლის განმავლობაში, მისი მეშვეობით, მარანელოელთა ავტომობილებს არაერთი რბოლა მოუგიათ. გარდა ამისა, ცხენის ძალებითა და მაბრუნი მომენტით ”ფერარის” საგზაო ავტომობილებსაც (მათ შორის, ლეგენდარულ ”ტესტა როსასაც”) სწორედ ის და მისი მოდიფიკაციები ამარაგებდა.

ავტომობილის შასის მზიდი ელემენტი საკმაოდ მარტივი, მაგრამ ძალიან მყარი და ხისტი კონსტრუქციით გამოირჩეოდა. ის ფოლადის მილებისგან იყო შეკრული. წინა საკიდარი ჩანგლისებრ საწევებზე იდგა, რხევების ჩაქრობას კი თითო ზამბარა (ორივე მხარეს) და ამორტიზატორი ემსახურებოდა. უკანა საკიდარი უფრო მარტივი იყო - ბორბალსა და ჩარჩოს შორის ”შუამავალი” ფოლადის მასიური და მყარი ღერძი იყო, რხევებს კი ამჯერადაც ზამბარისა და ამორტიზატორის წყვილი აქრობდა.

საერთო ჯამში, ”250 GT ევროპა” მეტად გამძლე ავტომობილი გამოდგა და ეს თვისება მას იმაში გამოადგა, რომ ხანგრძლივ რბოლებში ბადალი არ ჰყავდა. პირველი რამდენიმე ეგზემპლარის გამოშვების შემდეგ, ამ მანქანის სახელიდან ”ევროპა” გაქრა და მარტო 250 GT დარჩა. 1956 წელს ამ მანქანამ რალი ტურ დე ფრანსი მოიგო, რის შემდეგაც, მისი გრძელბაზიანი ვერსიის სახელში ”ტურ დე ფრანსი” გამოჩნდა. მომდევნო წლებში, ავტომობილმა ეს მეტსახელი სრულად გაამართლა - ფრანგული საავტომობილო ტური კიდევ ზედიზედ რვაჯერ მოიგო!

250 GT-ს წარმოების დასაწყისში, ”ფერარი” გრძელბაზიან (2 600 მმ) შასის იყენებდა. მაგრამ ინჟინრები მალე მიხვდნენ, რომ ბაზის დამოკლების შემთხვევაში, ავტომობილი საგრძნობლად შემსუბუქდებოდა და უფრო იოლად სამართავი გახდებოდა. 1959 წელს, ამ ავტომობილის პირველი მოკლებაზიანი ვერსიები დამზადდა. ყველაზე მნიშვნელოვანი სიახლე, რომელიც მოკლებაზიან შასიზე გადასვლის შემდეგ 250 GT-მ მიიღო, დისკოსებრი მუხრუჭები იყო, რომლებმაც დოლური შეცვალა. რა თქმა უნდა, ამით სამუხრუჭე სისტემის ეფექტურობა გაიზარდა.

მოკლებაზიანი 250 GT-ს სარბოლ ვერსიას ალუმინისგან დამზადებული, მსუბუქი ძარა ედგა, საგზაო ვერსიას (ლუსო) კი ისევ ფოლადის ძარა დაუტოვეს. სხვათა შორის, მარანელოში საგზაო ვერსიებს მხოლოდ იმის გამო აწარმოებდნენ, რომ FIA-ს მიერ გამოქვეყნებული რეგლამენტი შეესრულებინათ, რაც სარბოლი ავტომობილების მწარმოებლებს, ამ ავტომობილების საგზაო ვერსიების წარმოებასაც ავალებდა.

1960 და 1961 წლებში, დიდი ტურიზმის კლასში, მოკლებაზიან ”ფერარი 250 GT-ს” ბადალი არ ჰყავდა. ფრანგულ ტურზე გამარჯვებების გარდა, ამ ავტომობილმა სხვა არაერთი, მათ შორის, ლე მანის 24-საათიანი რბოლაც მოიგო.

მართალია, 250 GT რბოლებს ერთმანეთის მიყოლებით იგებდა, მაგრამ მას არაერთი პრობლემაც ჰქონდა, რის გამოც, მარანელოში მისი მოდერნიზება გადაწყვიტეს. 1962 წლის სეზონში, FIA-მ GT კლასში (დიდი ტურიზმის კლასში) მსოფლიო ჩემპიონატის ჩატარება გადაწყვიტა და ბუნებრივია, ”ფერარიც” ამისთვის სერიოზულად მოემზადა. მთავარი ყურადღება ამჯერად 250 GT-ს აეროდინამიკას მიაქციეს. მისი წინა მოდიფიკაციები მაღალ სიჩქარეზე შემხვედრი ჰაერის ნაკადს დიდ წინააღმდეგობას უქმნიდნენ, რაც სიჩქარის კლებას იწვევდა. ამის გამო, მათ ხშირად აგურებს ადარებდნენ.

ძარა ”პინინფარინამ” დაამზადა და თავის ახალ ვერსიას ”სუპერამერიკა” უწოდა. ძველი ძრავი კი ახალმა, მშრალკარტერიანმა შეცვალა. მიუხედავად იმისა, რომ ჰომოლოგაცია გავლილი არ ჰქონდა, ამ ექსპერიმენტულმა (სპერიმენტალე) 250 GT-მ ლე მანის 1961 წლის რბოლაში მონაწილეობა მაინც მიიღო. ის საკმაოდ სწრაფი გამოდგა, მაგრამ ფინიშს ვერ მიაღწია. ამის შემდეგ, ახალმა ვერსიამ რამდენიმე მოდიფიკაცია გაიარა და ჰომოლოგაციაც მიიღო, რაც იმას ნიშნავდა, რომ მსოფლიო ჩემპიონატზე დაიშვებოდა.

ზემოთ ”პინინფარინა” ვახსენეთ, თუმცა 250 GT-ს ძარის შექმნაში ”ფერარის” დიზაინერებიც მონაწილეობდნენ, მათ კი სახელოვანი ჯოტო ბიზარინი ხელმძღვანელობდა. ავტომობილის საგზაო ვერსიის ძარის საბოლოო დამუშავებაში მონაწილეობა კი ატელიე ”სკალიეტიმ” მიიღო. ასე რომ, ძარა რამდენიმე კომპანიის ერთობლივი გარჯის შედეგია.

250 GT-ს 1962 წლის ვერსია უმალ გაეხვა კონკურენტი კომპანიების და გუნდების კრიტიკის ცეცხლში. მეტოქეები თვლიდნენ, რომ ეს სრულიად ახალი ავტომობილი იყო, რის გამოც, ჰომოლოგაცია თავიდან უნდა გაევლო. ბევრი მას სახურავიან ”ტესტა როსასაც” უწოდებდა, თუმცა მარანელოელები იხტიბარს არ იტეხდნენ. მართლაც, ავტომობილმა ბევრი სიახლე ერთბაშად კი არა, თანდათან, დროთა განმავლობაში მიიღო, რაც იმას ნიშნავდა, რომ მან წინა მოდელისგან ევოლუციური გზა გაიარა. ჰომოლოგაციის მიღება კი უბრალო ფორმალობა გახდა. არადა, ახალი ავტომობილი მისი წინა ვერსიისგან მართლაც ძლიერ განსხვავდებოდა.

ახალ ავტომობილს ფურცელზე ”ფერარი 250 GT Comp/62” ერქვა, თუმცა მალე, ეს სახელი 250 GTO-თი შეიცვალა, სადაც ასო ”O” იტალიურ ”ომოლოგატოს” (ჰომოლოგირებულს) ნიშნავდა. საინტერესოა, რომ ახალი სახელით, ეს ავტომობილი პირველად ინგლისურ პრესაში მოიხსენიეს და მერე ის იტალიელებმაც აიტაცეს. სახელი GTO მალე დამკვიდრდა და იმდენად პოპულარული გახდა, რომ ”ჯენერალ მოტორსის” კომპანია ”პონტიაკმა” ის თავისი პოპულარული მასკლ ქარის სახელადაც კი გამოიყენა.

მოკლედ, 250 GTO ძალიან ძვირფასი ავტომობილია და ეს 36-ვე ეგზემპლარის მფლობელებმა კარგად იციან. მაგრამ მათი უმეტესობა ამ ძვირფასი ნივთით ისტორიული მანქანების რბოლებში ახლაც მონაწილეობს. კითხვაზე, რატომ რისკავს ამ ავტომობილით ასპარეზობას, ერთ-ერთი 250 GTO-ს მფლობელმა უპასუხა, რომ ”მისი ფასეულობის გამო, 250 GTO-ის სრულად ჩამოწერა შეუძლებელია”.