”ბერტონე პანდიონი” - კონცეპტი ”ალფა რომეოსთვის”

Bertone Alfa Romeo Pandion Concept

18 თებერვალი

იტალიურმა სადიზაინერო ატელიე ”ბერტონემ” თავისი ახალი კონცეპტუალური კუპეს ფოტოები გაავრცელა. ეს ავტომობილი ”ალფა რომეოს” შეკვეთითაა დამზადებული და მას სახელად ”პანდიონი” შეარქვეს. გავრცელებული ინფორმაციით, ამ ავტომობილის გარეგნობაში შეიძლება ”ალფა რომეოს” სედან 159-ის ორკარიანი ვერსიის მომავალი სახე.
იტალიურ საიტ ”უნიკა-სტრადას” მიერ გავრცელებული ინფორმაციით, ”პანდიონის” სიგრძე 4.82 მეტრია. ის მილანელთა სპორტულ მოდელ ”ალფა 8C კომპეტიციონეს” პლატფორმაზეა შექმნილი და აღჭურვილია მისივე 4.7-ლიტრიანი V8 ძრავით, რომელიც 450 ცხენის ძალას იძლევა.
”პანდიონში” ჩასაჯდომი ფორმულაა 2+2, რაც იმას ნიშნავს, რომ უკანა სავარძლები ზრდასრულებისთვის მეტად მოუხერხებელი უნდა იყოს. ავტომობილი ზუსტად 1000 კილოგრამს იწონის. ჯერჯერობით სულ ეს ინფორმაციაა, რაც ”ბერტონემ” ამ კონცეპტუალური მოდელის მსოფლიო პრემიერამდე გაიმეტა. პრემიერა კი მარტის დასაწყისში, ჟენევის საავტომობილო შოუზე გაიმართება.

სხვათა შორის, იმავე 159-ის თემაზე, ”ალფა რომეოს” დავალებით, კონცეპტუალური მოდელები კიდევ ორმა იტალიურმა ატელიემ - ”იტალდიზაინ ჯუჯარომ” და ”პინინფარინამ” მოამზადა და ისინიც თავიანთ ნამუშევრებს ჟენევაში გვაჩვენებენ. ოღონდ, ”ჯუჯაროს” ავტომობილს სედანის ძარა ექნება, ”პინინფარინასას” კი - როდსტერისა. თანაც, ეს უკანასკნელიც ”ალფა 8C კომპეტიციონეს” პლატფორმაზეა დამზადებული.

რაც შეეხება ”ალფა რომეო 159-ის” შემცვლელს, გავრცელებული ინფორმაციით, ის ”კრაისლერის” რომელიმე მოდელის პლატფორმაზე დამზადდება და ის ევროპულ ბაზარზე წელსვე გამოჩნდება.

”ოპეკმა” ახალი ჰიბრიდული კონცეპტუალური ავტომობილი გაგვაცნო

Opel Flextreme GT/E Concept to Debut in Geneva

18 თებერვალი

”ოპელმა” გამოაქვეყნა თავისი ახალი კონცეპტუალური ავტომობილის, ჰიბრიდული ”ფლექსტრიმ GT/E-ს” შესახებ პირველი ოფიციალური ინფორმაცია და ფოტოები გაავრცელა. გერმანულმა კომპანიამ გამოაცხადა, რომ ეს ავტომობილი გვიჩვენებს, თუ რა მიმართულება აქვს ”ოპელს” არჩეული ეკოლოგიისადმი მეგობრული ავტომობილების წარმოების საქმეში.
”ფლექსტრიმ GT/E-ს” სირგძე სედან ”ოპელ ინსინიასაზე” 7 სანტიმეტრით მოკლე (4.7 მეტრი), ბაზა კი 16.5 სანტიმეტრით (2.9) გრძელია. კონცეპტუალური ავტომობილის ძარა კარბონის, შუშის და პოლიკარბონატის კომპოზიტებისგან, მზიდი ელემენტის ზოგიერთი ნაწილი კი - ალუმინის მსუბუქი შენადნობებისგანაა დამზადებული, რისი წყალობითაც, ის შესაბამისი კლასის სხვა ავტომობილებზე დაახლოებით 40 პროცენტით მსუბუქი გამოვიდა.

”ოპელის” მიერ გამოქვეყნებულ პრეს რელიზში აღნიშნულია, რომ კონცეპტუალური ავტომობილის აეროდინამიკური წინააღმდეგობის კოეფიციენტი სულ რაღაც 0,22-ია, რაც შესანიშნავი მაჩვენებელია, რასაც ძარის სპეციალური, აქტიური ნაწილები განაპირობებს. მათი მეშვეობით, ჰაერის შემხვედრი ნაკადის წინააღმდეგობაც მცირდება და ის ძარას უფრო ეფექტურადაც უვლის გარს.

მაგალითად, როდესაც ავტომობილის სიჩქარე 50 კმ/სთ-ზე მაღლა ადის, უკანა ბორბლის უკანა ნაწილში არსებული ღრიჭოდან, გარეთ გამოდის ვერტიკალური ფირფიტა-სპოილერები, რომელთა სიგრძე სულ რაღაც 35 სანტიმეტრი კია, მაგრამ ისინი ჰაერის ნაკადს სწორ მიმართულებას აძლევენ.

”ფლექსტრიმ GT/E-ს” მთავარი მამოძრავებელი აგრეგატი 150-ცხენისძალიანი ელექტროძრავია, რომელსაც ენერგიით, ავტომობილის ძირსა და უკანა სავარძლების ძირზე მოთავსებული ლითიუმ-იონური აკუმულატორების ბლოკი კვებავს. მათში დაგროვილი ენერგია კი საკმარისია იმისათვის, რომ ავტომობილმა 60 კილომეტრის გავლა შესძლოს.

თუმცა, ამ ავტომობილისთვის, ეს სვლის სიშორე მაქსიმალური არაა. აკუმულატორების სრულად განმუხტვის შემდეგ, საქმეში ბენზინზე მომუშავე 1.4-ლიტრიანი ძრავი და მასთან დაკავშირებული გენერატორი ერთვება, რომელიც გამომუშავებულ ენერგიას აკუმულატორებს მოძრაობის დროს აწვდის. ამ ტანდემის მეშვეობით, სვლის სიშორე 500 კილომეტრამდე იზრდება.

”ოპელის” მონაცემებით, მის ახალ კონცეპტუალურ ავტომობილს ადგილიდან 100 კმ/სთ სიჩქარის აკრეფა 9 წამში შეუძლია, მისი მაქსიმალური სიჩქარე კი 200 კმ.სთ-ს აღწევს.

”ფლექსტრიმ GT/E-ს” მსოფლიო პრემიერა ჟენევის საავტომობილო შოუზე გაიმართება.

”ბენტლიმ” მსოფლიოში უსწრაფესი კაბრიოლეტი შექმნა

Bentley Continental Supersports Convertible Previewed

18 თებერვალი

ინგლისურმა კომპანია ”ბენტლიმ”, რომელიც გერმანული ”ფოლკსვაგენის” ჯგუფში შედის, წარმოებისთვის თავისი კუპეს, ”კონტინენტალ სუპერსპორტის” ღია ვარიანტი - ”კონტინენტალ სუპერსპორტს კონვერტაილი” მოამზადა, რომელიც, ”ბენტლის” ხელმძღვანელთა განცხადებით, მსოფლიოს უსწრაფესი კაბრიოლეტია.

ახალი ავტომობილი აღჭურვილია წყილტურბოკომპრესორიანი W12 ძრავით, რომელიც 6000 ბრ/წთ-ზე 630 ცხენის ძალას, 2000-4500 ბრ/წთ-ს დიაპაზონში კი 800 ნიუტონმეტრ მაბრუნ მომენტს ავითარებს. საინტერესოა, რომ ეს ძრავი მუშაობს როგორც სუფთა ბენზინზე, ასევე ბიოსაწვავ E85-ზეც, რომელშიც 85 პროცენტი ეთანოლია.

ძრავთან შეწყვილებულია რობოტიზებული გადაცემათა კოლოფი ZF 6HP26, რომელიც გადაცემის საფეხურებს, ჩვეულებრივ კოლოფებზე ორჯერ სწრაფად ცვლის. ავტომობილი სრულამძრავიანია.

მწარმოებლის მიერ გავრცელებული ინფორმაციით, ”კონტინენტალ სუპერსპორტს კონვერტაილს” ადგილიდან 100 კმ/სთ სიჩქარის აკრეფა 4.2 წამში შეუძლია, 160 კმ/სთ სიჩქარეს 9.5 წამში კრეფს, მისი მაქსიმალური სიჩქარე კი 325 კმ/სთ-ს აღწევს.

ახალი ავტომობილის ოფიციალური პრემიერა ჟენევის საავტომობილო შოეზე გაიმართება, მის გაყიდვას კი ”ბენტლი” შემოდგომიდან დაიწყებს.

”დოჯმა” ახალი კომპაქტური ჰეჩბეკის ესკიზები გამოაქვეყნა

New Dodge Compact Previewed

17 თებერვალი

ჩიკაგოს საავტომობილო გამოფენაზე, ამერიკულ კომპანია ”დოჯის” გენერალურმა დირექტორმა რალფ ჟილმა საზოგადოებას წარუდგინა B კლასის ჰეჩბეკის ესკიზი. ეს ავტომობილი, რომელსაც ჯერ სახელიც არ აქვს, ”ფიატის” და ”კრაისლერის” (დოჯი კრაისლერის ჯგუფში შედის) ერთობლივი მუშაობის პირველი პროდუქტი გახდება.

ესკიზიდან ჩანს, რომ ახალი ავტომობილი ”დოჯ კალიბერის” სტილშია შესრულებული, თუმცა ის უფრო კომპაქტური და სპორტული გარეგნობისაც იქნება. ჰეჩბეკის ბაზისად კი ”ფიატის” შესაბამისი მოდელის (პუნტოს) დაგრძელებულ პლატფორმას გამოიყენებენ, რომელიც, მასში ჭარბად გამოყენებული ალუმინის ხარჯზე, იტალიურ პლატფორმაზე მსუბუქი იქნება.

”დოჯის” ჰეჩბეკი აღიჭურვება ახალი ძრავებით, რომელსაც ”ფიატის” მიერ შემუშავებული გაზმაგამანიწებელი სისტემა ”მულტიეარი” მოემსახურება. ამ სისტემის მეშვეობით, ძრავი ეკონომიურიც იქნება და გარემოსაც ნაკლებად დააბინძურებს.

მოსალოდნელია, რომ ”დოჯის” ახალი ჰეჩბეკი ამერიკის ბაზარზე პირველად 2012 წელს გამოჩნდება. ამასთან, მისი ანალოგი ევროპაში ”ალფა რომეოს” და ”ფიატის” ლოგოებით, იტალიური კომპანიების კორპორატიულ სტილში შესრულებული ძარებით გაიყიდება.

”ლოტუსმა” ”ელიზი” განაახლა

Lotus Elise Facelift Presented

17 თებერვალი

გარდა იმისა, რომ ფორმულა 1-ს დაუბრუნდა, ”ლოტუსი” თავისი სამოდელო გამის გაფართოებაზეც ზრუნავს - კომპანიამ ახლახანს თავის ძირითად მოდელ ”ელიზს” მოდერნიზაცია ჩაუტარა და მის შესახებ ინფორმაცია ინტერნეტით გაავრცელა.

ახალ ”ელიხა” შეცვლილი აქვს წინა ნაწილი. გაიზარდა რადიატორის ფართობი, შეიცვალა წინა მუხრუჭების ჰაერის ამღებთა მოყვანილობა და წინა ფარების დიზაინი. მათში კი დღის სინათლის შუქდიოდები ჩამონტაჟდა. ავტომობილის უკანა ნაწილში შეიცვალა ბამპერი და ძრავის ხუფის ფორმა.

განახლებულ ავტომობილს საბაზო ძრავიც ახალი აქვს - ესაა ”ტოიოტას” წარმოების 1.6-ლიტრიანი აგრეგატი, რომელიც საწვავის შეშვების სისტემის (ვალვმატიკ) შეცვლილი კონსტრუქციით გამოირჩევა. ეს სისტემა გაზგამანაწილებელი მექანიზმის ფაზების შეცვლას აკონტროლებს. ამასთან, ის მუშაობის პროცესში ცვლის შემშვები სარქველების გახსნის სიგრძეს. ახალი ძრავის მაქსიმალური სიმძლავრე 136 ცხენის ძალას შეადგენს.

ძრავთან შეწყვილებულია 6-საფეხურიანი მექანიკური გადაცემათა კოლოფი, რომელშიც ყველა საფეხური ერთმანეთთანაა დაახლოებული. ამის მეშვეობით, ავტომობილი სწრაფად აჩქარებას ახერხებს და ის განსაკუთრებით მანევრული მოსახვევებიან გზაზეა. სხვათა შორის, მანევრულობა ყოველთვის იყო ”ლოტუს ელიზის” მთავარი თვისება.

ცნობისათვის, აქამდე ”ელიზის” საბაზო აგრეგატი ”ტოიოტასვე” წარმოების 1.8-ლიტრიანი ძრავი იყო, რომელიც 134 ცხენის ძალას ავითარებს. ამ ძრავთან კი 5-საფეხურიანი მექანიკური კოლოფი იყო შეწყვილებული. ახალი საბაზო აგრეგატი ატმოსფეროში ყოველ კილომეტრზე 155 გრამ ნახშირორჟანგს გამოჰყოფს, რაც ძველის ანალოგიურ მაჩვენებელზე 13 პროცენტით ნაკლებია.

ახალი ”ელიზის” ძრავების გამაში კიდევ ორი 1.8-ლიტრიანი ოთხცილინდრიანი აგრეგატი შედის, რომელთაგან ერთი, ნაკლებად ფორსირებული (R) 192 ცხენის ძალას გამოიმუშავებს, მეორე, რომელსაც მექანიკური დამჭირხნი ემსახურება - 217 ცხენის ძალას. ამასთან, მათ გამონაბოლქვში CO2-ის შემცველობა, შესაბამისად 196 და 199 გრამია კილომეტრზე.

”ლოტუსის” ბრიტანული დილერების შოურუმებში ახალი ”ელიზი” აპრილში გამოჩნდება და მისი ფასიც მაშინ გამოცხადდება.

”რინსპიდმა” ჟენევისთვის ელექტრონული კონცეპცია მოამზადა

Rinspeed UC? Concept

16 თებერვალი

შვეიცარულმა სადიზაინერო ატელიე ”რინსპიდმა” ჟენევის საავტომობილო გამოფენისთვის ელექტრონული კონცეპტუალური მოდელი მოამზადა უცნაური სახელით - UC?. ეს ატელიე ყოველთვის გამოირჩეოდა იმით, რომ ჟენევაში ყველას უცნაური კონცეპციებით აკვირვებდა.

მაგალითად ერთხელ მის სტენდზე ავტომობილი-ამფიბიას ნახვა შეიძლებოდა, ერთხელ უხილავი ავტომობილი შეაგება დამთვალიერებლებს, ერთხელაც - მფრინავი ავტომობილი. ჩამონათვალი ბევრია და ყველა მათგანს რაღაც ორიგინალური თვისება აქვს.

მაგრამ როგორც ჩანს, ”რინსპიდში” ჩათვალეს, რომ უცნაურობათა დრო დასრულდა და იმ დროს, როდესაც ავტოინდუსტრია მასობრივ ელექტრიფიკაციას იწყებს, უმჯობესი იქნება, თუ ისინიც ამ ტენდენციას ფეხს აუბამენ. შედეგად, იშვა საქალაქო ჯუჯა ელექტრომობილი ”რინსპიდ UC?”, რომელსაც, თუ მის შემქმნელებს დავუჯერებთ, სერიულად გამოუშვებენ.

ჯერჯერობით, ამ ჯუჯა ელექტრომობილის შესახებ დაწვრილებითი ინფორმაცია არ ვრცელდება. სამაგიეროდ, ცნობილია, რომ მისი მაქსიმალური სიჩქარე 105 კმ/სთ-ს მიაღწევს, აკუმულატორების ერთი სრულფასოვანი დამუხტვით კი 113 კილომეტრის გავლა იქნება შესაძლებელი.

სხვათა შორის, თავისი მომავალი სერიული ავტომობილის პოპულარიზაციისა და მომსახურების გასაადვილებლად, ”რინსპიდი” ელექტრომობილების სწრაფი დამუხტვის პორტატული სადგურის პროექტსაც დაამუშავებს. რაც შეეხება ”რინსპიდ UC?-ს”, ის საჭის რგოლისნაცვლად, ჯოისტიკით იმართება, რაც სტელიეს ინჟინრების თქმით, უკეთეს მართვადობას განაპირობებს.

”რინსპიდის” შეფმა ფრანკ რინდერკნეხტმა განაცხადა, რომ UC?-ს ყველა შანსი აქვს იმისა, რომ ლეგენდარული სახალხო ავტომობილის - ”ფოლკსვაგენის” ხოჭოს თანამედროვე ინტერპრეტაცია გახდეს. მანვე დასძინა, რომ მიმდინარეობს მოლაპარაკება დიდ ავტომწარმოებლებთან, რისი მიზანიც, ამ კონცეპტუალური ჯუჯას ბაზაზე სერიული ავტომობილის წარმოებაა.

”ფოლკსვაგენი” ყველაზე სწრაფ ”გოლფს” გამოუშვებს

VW Golf R

15 თებერვალი

კომპაქტური კლასის ავტომწარმოებლებს ერთგვარი ტრადიცია ჩამოუყალიბდათ - ისინი მყიდველს თავიანთი საწარმოო პროგრამის ყველაზე გაყიდვადი ავტომობილის სპორტულ ვერსიებს სთავაზობენ და ამით ხაზს უსვამენ, რომ ევროპული კლასიფიკაციით C კლასად მონათლული ავტომობილები მოსაწყენნი არ არიან და მათგან საკმაოდ, ზოგჯერ კი მეტისმეტად ტემპერამენტიანი ”სადოღე ცხენის” მიღებაც შეიძლება.

ამ საქმეში ერთმანეთს ტოლს არ უდებენ ”ფორდი”, ”რენო”, ”პეჟო”, ”ოპელი” და სხვები. ამ ჩამონათვალში განგებ არ მოვიხსენიეთ ”ფოლკსვაგენი”, რადგან სახალხო ავტომობილების მწარმოებელი ეს გერმანული კომპანია აქაც მოწინავეთა შორისაა და როგორც კი მყიდველს ”გოლფის” ახალი თაობის ავტომობილს წარუდგენს, მას მაშინვე მოაყოლებს ხოლმე ”დამუხტულ” ვერსიებს. დღეს სწორედ ასეთ ავტომობილზე გვექნება საუბარი.

ამ ტრადიციის ჩამოყალიბების დასაწყისში, ”გოლფს” საშუალოდ ფორსირებული სპორტსმენი - GTI მოჰყვებოდა ხოლმე. შემდეგ, ვოლფსბურგელებმა ესეც არ იკმარეს და მყიდველს უფრო მეტად გასპორტულებული Golf R32 შესთავაზეს. დღემდე სწორედ ეს იყო ”გოლფის” ყველაზე ძლიერი, ტოპ ვერსია.

რა თქმა უნდა, მოსალოდნელი იყო, რომ ბაზარზე მეექვსე თაობის ”გოლფის” გამოყვანის შემდეგ, ”ფოლკსვაგენი” ამ ჰეჩბეკის მორიგ სპორტულ ვარიანტსაც დაამზადებდა. მოლოდინი დიდხანს არ გაგრძელებულა - ევროპის უდიდესმა ავტომწარმოებელმა სწრაფი ”გოლფების” მოყვარულთ ახალი სადოღე კვიცი შესთავაზა, ოონდ მას უბრალოდ, ინდექსი R დაუმატა - სწორედ ასე უწოდეს ”ფოლკსვაგენის” ახალ შტოს, რომელიც საბაზო მოდელების გასპორტულებაზე იქნება მომართული. და ამიერიდან, ”გოლფის” ყველაზე მძლავრი და სწრაფი ვერსიის სრული სახელწოდება ”ფოლკსვაგენ გოლფ R” იქნება.

ახალ ავტომობილს ერთი შეხედვითვე ეტყობა, რომ ის ჩვეულებრივი ”გოლფი” არაა. ამას დიდი ზომის რადიატორის და მის გვერდებზე მუხრუჭების ”სასუნთქი” ლაყუჩების დანახვაზევე მიხვდებით. თუმცა ისიც ფაქტია, რომ ეს მანქანა სპორტული ექსტრავაგანტურობით არ გამოირჩევა. რასაც ვერ ვიტყვით მის ბორბლებზე, რომელთა დიზაინსაც ”ტალადეგა” ჰქვია. საბაზო კომპლექტაციაში მათი დიამეტრი 18-დუიმია, ოპციის სახით კი შესაძლებელია 19-დუიმიან ბორბლებზე მდგარი ”გოლფ R-ის” შეძენა. უკნიდან ამ ავტომობილის სპორტულობის მანიშნებელი ფსევდო დიფუზორია, რომლის ცენტრიდანაც წყვილი გამოსაბოლქვი მილი გვიმზერს.

მაგრამ ”გოლფ R-ში” გარეგნობა მთავარი არცაა. მთავარი მის კაპოტქვეშაა მოთავსებული! პირველ რიგში უნდა აღინიშნოს, რომ ”გოლფ R32-ისგან” განსხვავებით, რომელიც 3.2-ლიტრიანი V6 ძრავითაა აღჭურვილი, ”გოლფ R-ს” 2.0-ლიტრიანი ოთხცილინდრიანი ტურბოაგრეგატი ჩაუდგეს, რომელსაც საწვავი უშუალოდ წვის კამერაში მიეწოდება. ანალოგიური ძრავი GTI-ზეც გვხვდება, მაგრამ R-ისთვის ის უფრო დახვეწეს. ამგვარად, ავტომობილი შემსუბუქდა, გაძლიერდა და უფრო ეკონომიურიც გახდა.

მას შემდეგ, რაც ვოლფსბურგელებმა ”სიროკო R-ის” წარმოება დაიწყეს, რომელსაც წინა წამყვანი ბორბლები აქვს და ანალოგიური ძრავითაა აღჭურვილი, ბევრმა ჩათვალა, რომ ”გოლფ R-საც” წამყვანი მხოლოდ წინა ღერძი ექნებოდა. მაგრამ ასე არ მოხდა - R32-ის მსგავსად, ისიც სრულამძრავიანია! ამასთან, მოდიფიკაცია ჩაუტარდა ტრანსმისიას (4 მოუშნ), რომელიც ახლა უფრო უკეთ და სწრაფად რეაგირებს საგზაო პირებების შეცვლაზე და საჭიროების შემთხვევაში, უკანა ღერძს მაბრუნი მომენტის 100 პროცენტს აწვდის.

მოდიფიცირებული ძრავის სიმძლავრე 265 ცხენის ძალაა, რაც R32-ის აგრეგატის სიმძლავრეზე 8 პროცენტით მეტია. რაც შეეხება მაქსიმალურ მაბრუნ მომენტს, ის 350 ნიუტონმეტრამდე გაიზარდა. აგრეგატს უწყვილდება ან 6-საფეხურიანი მექანიკური, ან რობოტიზებული კოლოფი (DSG), რომელსაც ძრავთან ორდისკოიანი ქურო აკავშირებს. ამ ორიდან, მეორეს გამოყენების შემთხვევაში, ავტომობილი ატმოსფეროში 22 პროცენტით ნაკლებ (R32-თან შედარებით) მავნე ნივთიერებებს გამოყოფს. ”გოლფ R” ყოველ 100 კილომეტრზე მხოლოდ 8.5 ლიტრ საწვავს მოიხმარს, როცა R32-ის შესაბამისი მაჩვენებელი10. 7 ლიტრია.

ახალ ავტომობილს, მის წინამორბედზე უკეთესი დინამიკური მახასიათებლებიც აქვს. მექანიკური კოლოფით, ”გოლფ R-ს” 0-100 კმ/სთ აჩქარება 5.7 წამში შეუძლია, რობოტიზებული კოლოფის შემთხვევაში კი აჩქარების დრო მხოლოდ 5.5 წამია. შედარებისთვის, R32-ის შესაბამისი მაჩვენებელი 6.5 წამია. რაც შეეხება მაქსიმალურ სიჩქარეს, ამ შემთხვევაშიც ვოლფსბურგელებმა ლიმიტი (250 კმ/სთ) გამოიყენეს.

შეიცვალა სტანდარტული ”გოლფის” საკიდარიც, რაც იმაში გამოიხატა, რომ ავტომობილის სიმაღლე 25 მილიმეტრითაა შემცირებული. დანარჩენი კი ყველაფერი სტანდარტულია - წინ გამოყენებულია მაკფერსონის, უკან კი - მრავალბერკეტიანი სისტემა. თუმცა, მათში ზამბარებიც და ამორტიზატორებიც სტანდარტულზე ხისტია.

როდის დაიწყება ”გოლფ R-ის” წარმოება, ამაზე ლაპარაკი ჯერ ნაადრევია. თუმცა იმის თქმა ახლავე შეიძლება, რომ ”გოლფის” ეს ვერსია, თავის კლასში ერთ-ერთი ყველაზე პოპულარული იქნება. ასეთი დინამიკური მახასიათებლებით ხომ ის უფრო მაღალი კლასის ავტომობილებსაც ადვილად გაუწევს კონკურენციას...

”ნისანმა” თავისი ახალი სუბკომპაქტური ქროსოვერი გაგვაცნო

Nissan Juke Crossover Breaks Cover!

15 თებერვალი

”ნისანმა” თავისი ახალი ავტომობილის, სუბკომპაქტურ ქროსოვერ ”ჯუკის” ფოტოები და ზოგადი მონაცემები გამოაქვეყნა. ევროპის ბაზრისთვის, ამ ავტომობილს იაპონური კომპანიის ბრიტანული (სანდერლენდი) ქარხანა გამოუშვებს, მისი გაყიდვები კი სექტემბერში, პარიზის საავტომობილო შოუს შემდეგ დაიწყება.
”ნისან ჯუკი” ამავე კომპანიის შემდეგი თაობის სუბკომპაქტურ ჰეჩბეკ ”მიკრას” დაგრძელებულ პლატფორმაზეა ბაზირებული, რომელსაც ასევე ”რენო” თავისი პოპულარული მოდელის, ”კლიოსთვის” იყენებს. ”ჯუკის” სიგრძე 4.00 მეტრი, სიგანე 1.77 მეტრი, სიმაღლე 1.57 მეტრი, ბაზა 2.53 მეტრია. მისი საბარგულის მოცულობა კი 251 ლიტრს აღწევს, რაც В კლასის ჰეჩბეკების საბარგულის ტოლფასია.

”ჯუკისთვის” სულ სამი ძრავია გათვალისწინებული. მათგან ორი საწვავად ბენზინს იყენებს. ორივეს მუშა მოცულობა 1.6 ლიტრია. მათგან ატმოსფერული 115 ცხენის ძალას ავითარებს, მეორე კი, რომელსაც ტურბოკომპრესორი ემსახურება, 187 ცხენის ძალას. მესამე ძრავია 1.5-ლიტრიანი ტურბოდიზელი, რომლის მაქსიმალური სიმძლავრეც 109 ცხენის ძალას აღწევს.

”ნისან ჯუკი” იქნება როგორც წინა წამყვანბორბლიანი, ასევე სრულამძრავიანი. ამაასთან, სრულამძრავიან ვარიანტს, უკანა ბორბლებს შორის მომენტის ავტომატურად გამანაწილებელი სისტემაც ემსახურება. ძრავიდან წამოსულ მაბრუნ მომენტს ან 6-საფეხურიანი მექანიკური კოლოფი გადაამუშავებს, ან უსაფეხურო ავტომატი.

”ნისან ჯუკის” საბაზო ვერსიის საორიენტაციო ფასი 15-16 ათასი ევროა. დილერები მყიდველს ოპციის სახით შესთავაზებენ უკანა ხედვის კამერას, ძრავის ძირის დამცავ დაფას და სისტემას, რომლის მეშვეობითაც, ავტომობილის უგასაღებოდ გაღება შეიძლება.

ცნობისათვის, ”ნისანს” წელს 10 ახალი ავტომობილის წარმოების დაწყება აქვს დაგეგმილი.

”ფოლკსვაგენმა” მეორე თაობის ”ტუარეგი” გვაჩვენა

Second-Generation VW Touareg Unveiled

14 თებერვალი

”ფოლკსვაგენმა” თავისი პოპულარული უგზოობის მეორე თაობის ავტომობილის ფოტოები და მის შესახებ ზოგადი ინფორმაცია გამოაქვეყნა. ამ ავტომობილის მსოფლიო პრემიერა ჟენევის ავტო გამოფენაზე ჩატარდება, მისი გაყიდვები კი ზაფხულში დაიწყება.

ვოლფსბურგელების მიერ გამოქვეყნებული რელიზი გვამცნობს, რომ ახალი ”ტუარეგი” თავის წინამორბედზე 4 მილიმეტრით გრძელი (4758 მმ) და 20 მილიმეტრით დაბალია. იმავდროულად, ახალი ავტომობილი 208 კილოგრამით მსუბუქიცაა.

ევროპის ბაზარზე, ახალი ”ტუარეგი” ოთხი სხვადასხვა ძრავით იქნება ხელმისაწვდომი. ამათგან ორი საწვავად დიზელს იყენებს. მათი ლიტრაჟია 3.0 და 4.2 ლიტრი, სიმძლავრე კი, შესაბამისად 240 და 335 ცხენის ძალა. მესამე ძრავია ბენზინის 3.6-ლიტრიანი FSI, რომელიც 280 ცხენის ძალას და 360 ნიუტონმეტრს გამოიმუშავებს.

ძრავების გამაში ჰიბრიდული სისტემაც შედის, რომელშიც 3.3-ლიტრიან V6 ბენზინის ძრავთან, რომელსაც მექანიკური დამჭირხნი ემსახურება და რომლის სიმძლავრეც 333 ცხენის ძალას აღწევს, უნისონში 47-ცხენისძალიანი ელექტროძრავი მუსაობს. ჰიბრიდული დანადგარის ჯამური სიმძლავრე 380 ცხენის ძალას აღწევს. მისი მეშვეობით, ამ უზარმაზარ ავტომობილს ადგილიდან 100 კმ/სთ სიჩქარის ასაკრეფად 6.5 წამი ჰყოფნის. მარტო ელექთროძრავით, მას მაქსიმუმ 45 კმ/სთ სიჩქარით გადაადგილება შეუძლია.

ყველა ძრავთან შესაწყვილებლად განკუთვნილია 8-საფეხურიანი ავტომატური გადაცემათა კოლოფი. გარდა ამისა, ავტომობილი აღჭურვილია პნევმოსაკიდარით და სისტემა სტოპ-სტარტით, რომელიც ავტომობილის საწვავის ხარჯს ამცირებს. კვლავ ძველი კონსტრუქცია შეინარჩუნა სრულამძრავიანმა ტრანსმისიამ, რომელიც მაბრუნ მომენტს მუდმივად აწვდის ყველა ბორბალს. თუ შემკვეთი მოისურვებს, მის ავტომობილზე დამადაბლებელ საფეხურს და ცენტრალური და ღერძებსშორისი დიფერენციალის ბლოკირების კვანძებსაც დააყენებენ. ამ შემთხვევაში, 8-საფეხურიან კოლოფს 6-საფეხურიანი ცვლის.

”აუდი A1” კონკურენციას ”ბეემვეს” ”მინის” გაუწევს

Audi aims new A1 at BMW's Mini

13 თებერვალი

”აუდიმ” ინტერნეტით თავისი სრულიად ახალი ავტომობილის, კომპაქტურ ჰეჩბეკ A1-ის ფოტოები და ზოგადი ინფორმაცია გამოაქვეყნა და გამოაცხადა, რომ ამ ავტომობილით, კონკურენციას გაუწევს ისეთ სერიოზულსა და პოპულარულ მეტოქეს, როგორიც ”ბეემვეს” რეტრო-სტილის ”მინია”.

ახალი ავტომობილის გაყიდვები ევროპულ ბაზარზე მაისში დაიწყება, სადაც ის 16 000 ევროდ გაიყიდება. შედარებისთვის, ”მინის” ევროპული ფასი ოდნავ მაღალი - 16 600 ევროა. ეს გარემოება კი ინგოლშტადტელებს იმედს აძლევს, რომ მათი ახალი ავტომობილი ისეთივე პოპულარული გახდება, როგორიც ”მინია”.

”აუდი A1-ის” ძრავების გამაში ჯერჯერობით მხოლოდ ოთხი აგრეგატია - ორი ბენზინის და ამდენივე დიიზელის. ამასთან, ჰეჩბეკის საბაზო აღჭურვაში შედის საწვავის დამზოგავი სტოპ-სტარტ სისტემა და მუხრუჭების ენერგიის რეგენერაციის სისტემა.

ყველაზე ეკონომიური A1 აღჭურვილია 90-ცხენისძალიანი 1.6-ლიტრიანი დიზელით, რომელიც ”ფოლკსვაგენ გოლფზეც” გამოიყენება. ეს ძრავი, ყოველი კილომეტრის გავლისას, ატმოსფეროში მხოლოდ 99 გრამ CO2-ს გამოჰყოფს და 100 კილომეტრს სულ რაღაც 3.8 ლიტრი საწვავით გადის.

საბაზო ძრავი კი 1.2-ლიტრიანი ბენზინის აგრეგატია, რომლის სიმძლავრეც სულ რაღაც 86 ცხენის ძალას შეადგენს. ამ ძრავით აღჭურვილ ავტომობილს 100 კილომეტრის გასავლელად 5.1 ლიტრი ბენზინი ჰყოფნის, ყოველ კილომეტრზე კი ის გარემოს 119 გრამი ნახშირორჟანგით აბინძურებს. შედარებისთვის, ”მინის” მსგავსი მონაცემების მქონე აგრეგატი 1.6-ლიტრიანი ძრავია, რომლის სიმძლავრეც 98 ცხენის ძალაა. 100 კილომეტრზე მისი ხარჯი 5.4 ლიტრია, გამონაბოლქვში ნახშირორჟანგის შემცველობა კი კილომეტრზე 127 გრამს აღწევს.

”აუდი A1-ის” მსოფლიო დებიუტი ჟენევის საავტომობილო გამოფენაზე გაიმართება. ეს ავტომობილი ”ფოლკსვაგენის” სუბკომპაქტურ ჰეჩბეკ ”პოლოს” პლატფორმაზეა ბაზირებული და მას ”აუდის” ბრიუსელის (ბელგია) ქარხანა გამოუშვებს. დასაწყისში, ბაზარზე A1-ის სამკარიანი ვერსია გამოვა, მოგვიანებით კი მას ხუთკარიანი ვარიანტიც მოჰყვება.

ჰეჩბეკი A1 ”აუდის” იმ გეგმის ერთ-ერთი მთავარი პერსონაჟია, რომლის მიხედვითაც, ინგოლშტადტელებს გაყიდვების მოცულობით ორი მთავარი გერმანული კონკურენტის - ”ბეემვეს” და ”მერსედეს ბენცის” უკან ჩამოტოვება და პრემიუმ კლასში მსოფლიო ლიდერობა აქვთ განზრახული.

სამოდელო გამაში სუბკომპაქტური A1-ის და დიდი ზომის ოთხკარიან კუპე A7-ის დამატებით, ”აუდი” თავის წლიურ გაყიდვებს 2015 წელს 1.5 მილიონ ავტომობილამდე გაზრდის. შედარებისთვის, გერმანულმა კომპანიამ შარშან სულ 949 700 ავტომობილის გაყიდვა შეძლო.

”აუდი” იმედოვნებს, რომ წლიურად 80 000 A1-ის გაყიდვას შესძლებს. წინასწარი ვარაუდით, მყიდველთა უმეტესობა ქალაქში მცხოვრები ახალგაზრდობა (25-35 წლის) იქნება, რომლებიც ”მინის” რეტრო სტილზე მაღლა ”აუდის” სუბკომპაქტის თანამედროვე სტილს დააყენებენ.

”აუდის” ამ ეტაპზე A1-ის მხოლოდ ევროპის ბაზარზე გაყიდვა აქვს დაგეგმილი. ”აუდი ოფ ამერიკას” პრეზიდენტ იოჰან დე ნისხენს ნათქვამი აქვს, რომ მისი კომპანია მეორე თაობის A1-ს ამერიკაშიც გაჰყიდის, თუმცა ამ ავტომობილს გერმანული კომპანია უახლოესი რვა წლის განმავლობაში არ გამოუშვებს.

”ნისანი” ახალ ქროსოვერზე დიდ იმედებს ამყარებს

Nissan wants Juke to match success of Qashqai in Europe

13 თებერვალი

”ნისან მოტორი” იმედოვნებს, რომ მისი უახლესი კომპაქტური ქროსოვერი ”ჯუკი” ევროპაში ისეთივე პოპულარული იქნება, როგორიც მასზე ოდნავ დიდი ”ქაშკაია”. ”ჯუკის” მსოფლიო პრემიერა ჟენევის ავტო შოუზე გაიმართება, მის გაყიდვებს კი იაპონური კომპანია სექტემბრის ბოლოს დაიწყებს.

”ამ მანქანას ფართო სალონიც აქვს და იმევდროულად ის კომპაქტურია. ის ერთი შეხედვით ახოვანიც მოჩანს, თუმცა იმავდროულად, ძალიან დინამიურიცაა. პრაქტიკულიცაა და ახალგაზრდულიც. ეს ის თვისებებია, რომლებიც თითქოს, ერთმანეთს ეწინააღმდეგება, თუმცა ყველა ”ჯუკს” ახასიათებს და მთლიანობაში, რაღაც უნიკალურს ქმნის”, - თავისი კომპანიის სიახლე ასე უცნაურად დაახასიათა ”ნისან იუროპის” ვიცე პრეზიდენტმა პიერ ლოინგმა, ვინც პროდუქციის დაგეგმვაზეა პასუხისმგებელი.

”ჯუკი” იაპონური კომპანიის ევროპულ დიზაინ ცენტრის სპეციალისტებმა, ლონდონში შეიმუშავეს, ამ ავტომობილს კი ”ნისანის” ოპამას (იაპონია) და სანდერლენდის (ბრიტანეთი) ქარხნები გამოუშვებს. სხვათა შორის, ”ქაშკაისაც” სანდერლენდის საწარმო უშვებს, რომელსაც, ამ ქროსოვერზე არსებული მზარდი მოთხოვნის გამო, უკვე სამ ცვლაში ამუშავებენ.

ცნობისათვის, ბოლო წლებში, ”ნისანი” თავის ევროპულ ბიზნესში აქცენტს ქროსოვერებზე აკეთებს, რადგან ძველ კონტინენტზე მისი სედანები დიდი პოპულარობით ვერ სარგებლობს. სწორედ ქროსოვერების დამსახურებაა ის ფაქტი, რომ შარშან, როდესაც ევროპულ ბაზარზე გაყიდვების მოცულობა შემცირდა, იაპონურმა კომპანიამ წინა წელთან შედარებით, 9 პროცენტით მეტი, 366 711 ავტომობილი გაჰყიდა. ევროპაში ”ნისანის” ბესტსელერი სწორედ ქროსოვერი ”ქაშკაია”, რომელიც შარშან ძველ კონტინენტზე 181 711 ცალი გაიყიდა (წინა წელთან შედარებით, 25.4 პროცენტით მეტი).

”ნისანი” იმედოვნებს, რომ წელს მთელ მსოფლიოში 140 000-150 000 ცალ ”ჯუკს” გაჰყიდის. კომპანია აცხადებს, რომ ამ ავტომობილისთვის მთავარი ბაზარი ევროპა იქნება, რომელიც ამ ქროსოვერის წლიური გაყიდვების 60-70 პროცენტს აითვისებს. ”ნისანის” აღმასრულებელ ვიცე პრეზიდენტ კოლინ დოჯის თქმით, ”ჯუკის” მყიდველთა დიდი ნაწილი 30-40 წლის მამაკაცები იქნებიან.

რაოდენ გასაკვირიც უნდა იყოს, ”ნისანი” ჯერჯერობით ჩინეთში ”ჯუკის” გაყიდვას არ გეგმავს. ამას კი დოჯი შემდეგნაირად განმარტავს: ”ჩინეთის ბაზარი სულ რაღაც 5-8 წლისაა და არავინ იცის, ხვალ როგორ შეიცვლება იქაური მყიდველის გემოვნება. ახლანდელი ავტომფლობელების უმეტესობა, თავის შემდეგ ავტომობილს იმავე კლასიდან არ შეიძენს, რომელი კლასის მანქანაც პირველად შეიძინა. მაგრამ 4-5 წლის შემდეგ იქ სიტუაცია რადიკალურად შეიცვლება და ჩვენც საბაზრო სტრატეგიას აუცილებლად გადავხედავთ”.

ძნელია, დაეთანხმო მსოფლიოს ერთ-ერთი უდიდესი ავტომწარმოებლის გამოცდილი ფუნქციონერის ასეთ პასიურობას, მითუმეტეს, როცა იცი, რომ ”ჯენერალ მოტორსი” და ”ფოლკსვაგენი” ცისქვეშეთში გაყიდვებს თითქმის ყოველწლიურად აორმაგებენ.

რაც შეეხება ”ჯუკს”, იაპონური კომპანია თავის მყიდველს ამ ავტომობილს სრულამძრავიანი, ან წინა წამყვანბორბლიანი ტრანსმისიებით შესთავაზებს. სრულამძრავიანი ტრანსმისიის ელექტრონული სისტემა მაბრუნ მომენტს წინა და უკანა ღერძებს შორის სიტუაციის შესაბამისად, იმგვარად ანაწილებს, რომ მოხვევის დროს მოქნევის და მოცურების ალბათობა მაქსიმალურად გამოირიცხოს.

”ჯუკისთვის” ევროპულ ბაზარზე სულ სამი ძრავია გათვალისწინებული, რომელთაგან ერთი დიზელზე მუშაობს, ორი კი - ბენზინზე. ყველა მათგანი ევრო5 სტანდარტს აკმაყოფილებს.

”პორშემ” რბოლებისთვის ჰიბრიდული ავტომობილი მოამზადა

Porsche 911 GT3 R Hybrid

13 თებერვალი

”პორშემ” თავისი სარბოლი ავტომიბილის, 911 GT3 R-ის ჰიბრიდული ვერსიის ფოტოები გაავრცელა, რომლის პრემიერა ჟენევის საავტომობილო შოუზე გაიმართება, მაისში კი ის მონაწილეობას ნურბურგრინგის 24-საათიან რბოლაში მიიღებს.

ჰიბრიდული 911 GT3 R აღჭურვილია ჰიბრიდული სისტემით, რომელშიც შიდაწვის ძრავთან, ორი ელექტროძრავია შეწყვილებული. ბენზინის V6 აგრეგატი, რომლის სიმძლავრეც 480 ცხენის ძალაა, ჩვეულ ადგილზე - ავტომობილის უკანა ნაწილშია მოთავსებული და მოძრაობაში უკანა ბორბლები მოჰყავს. ელექტროძრავები კი წინა ბორბლებს ემსახურება.

გარდა ამისა, ჰიბრიდულ სისტემაში შედის კინეტიკური ენერგიის რეკუპერაციის სისტემა (კერს-ი), რომელიც ფორმულა 1-ის ინგლისური გუნდის, ”უილიამსის” სპეციალისტების მიერაა შემუშავებული და დამუხრუჭების დროს გამოყოფილ ენერგიას აგროვებს. ეს სისტემა ავტომობილის მარჯვენა ნაწილში, იმ ადგილზეა მოთავსებული, რომელიც ჩვეულებრივ ავტომობილებში მგზავრის სავარძელს უკავია ხოლმე. მასში, მქნევარა გენერატორთანაა დაკავშირებული, რომელიც გამომუშავებულ ენერგიას მცირე ზომის აკუმულატორში აგროვებს.

კერს-ის სიმძლავრის პიკი 120 კილოვატს, ანუ 160 ცხენის ძალას აღწევს. სისტემაში ენერგიის დამგროვებლის მოვალეობას თავისუფალი მქნევარა ასრულებს. მასში დაგროვილ ენერგიას კი პილოტი თავისი სურვილის შესაბამისად იყენებს. ის აწვება საჭის რგოლზე მოთავსებულ ღილაკს და მაშინვე, აკუმულატორებში დაგროვილი ენერგია ელექტროძრავებს მიეწოდება, რომლებიც თავიანთ მაბრუნ მომენტს წინა ბორბლებს მიაწვდიან. ამ სისტემას 78 წამის განმავლობაში შეუძლია მუშაობა, რის შემდეგაც აკუმულატორები განიმუხტება.

ჯერჯერობით, ”პორშეს” არ გამოუქვეყნებია ჰიბრიდული 911 GT3 R-ის დინამიკური მახასიათებლები. გერმანული კომპანია ამ ინფორმაციას ჟენევურ გამოფენაზე გაგვაცნობს.

სამაგიეროდ, ”პორშეს” შეფმა მიხაელ მახტმა განაცხადა, რომ მისი კომპანიის გუნდი, მსგავსი სისტემით აღჭურვილ ავტომობილს ლე მანის 24-საათიანი რბოლისთვისაც მოამზადებს.

”ოპელი” ჟენევაში ახალ ელექტრონულ კონცეპციას გვაჩვენებს

Opel Voltec Concept Teased

13 თებერვალი

”ჯენერალ მოტორსის” გერმანული შტო ”ოპელი” ჟენევის ავტო შოუზე თავის ახალ კონცეპტუალურ ნამუშევარს გამოიტანს, რომელსაც, გავრცელებული ინფორმაციით, ”ფლექსტრიმ GTE” ეწოდება. ამ კონცეპციაში ის ჰიბრიდული სისტემაა გამოყენებული, რომელიც ”გენერლებმა” ”შევროლე ვოლტისა” და ”ოპელ ამპერასთვის” შექმნეს.

”ოპელის” მიერ გამოქვეყნებული განცხადებით, კონცეპცია გვაჩვენებს, თუ რა მიმართულებით განვითარდება გერმანული კომპანიის ეკოლოგიურად სუფთა ტექნოლოგიები.

”ეს ავტომობილი იმის დადასტურებაა, რომ მანქანის გაბარიტები და კომფორტი არაა მისი ეკოლოგიური მაჩვენებლების გაუარესების მიზეზი”, - ნათქვამია ”ოპელის” მიერ გამოქვეყნებულ რელიზში.

როგორც სურათზე ჩანს, ”ფლექსტრიმ GTE-ზე” ”ოპელის” ემბლება აკუმულატორების დასამუხტ პორტადაა გამოყენებული და მას ორიგინალური დიზაინი აქვს. სურათზე ასევე ჩანს, რომ ლოგოს გარდა, ფსევდორადიატორის მარჯვენა მხარეს, წარწერა ”ვოლტეკია” მოთავსებული.

მიმომხილველები ვარაუდობენ, რომ აღნიშნულ კონცეპციას ”ჯენერალ მოტორსი” პირველად თავისი პრემიუმ ბრენდის, ”კადილაკის” ახალი მოდელებისთვის გამოიყენებს. უფრო კონკრეტულად კი, ”ვოლტეკის” პიონერი შეიძლება გახდეს სპორტული ”კადილაკ კონვერჯი”, რომლის პროექტიც, კრიზისის გამო, თაროზეა შემოდებული.

რამდენიმე დღის წინ, ”ოპელმა” თავისი ხუთწლიანი სამოქმედო გეგმა გამოაქვეყნა, რომელშიც წერია, რომ ამ პერიოდში, კომპანია თავის განვითარებას 11 მილიარდ ევროს მოახმარს. ამ თანხის დიდი ნაწილი ახალი მოდელების წარმოების დაწყებას მოხმარდება. ნაწილს კი კომპანია ახალი, ეკოლოგიური ტექნოლოგიების შემუშავებასა და წარმოებაში დანერგვას მოახმარს.

ფრენკ უილიამსი ახალ ბიზნესს იწყებს

Williams to Become Majority Stake Owner of Williams Hybrid Power

13 თებერვალი

ფორმულა 1-ის ერთ-ერთი ყველაზე წარმატებული გუნდის, ”უილიამსის” დამაარსებელი და თანამფლობელი ფრენკ უილიამსი (სურათზე) ახალ ბიზნესს იწყებს. ახლახანს მან თავისი გუნდის აქციების მცირე ნაწილი გაყიდა და მიღებული თანხით ბრიტანული კომპანიის, ”აუტომოტივ ჰაიბრიდ პაუას” აქციების საკონტროლო პაკეტი შეიძინა, რის შემდეგაც ამ კომპანიას ”უილიამს ჰაიბრიდ პაუა” ეწოდა.

ფრენკ უილიამსმა ამ კომპანიის აქციების 40 პროცენტი ორი წლის წინ შეიძინა და ის გროვში, თავისი გუნდის შტაბ ბინის სიახლოვეს გადაიტანა. მაშინ ამ კომპანიას კერს-ის (კინეტიკური ენერგიის რეკუპერაციის სისტემის) შემუშავება დაევალა, რომელსაც სხვა გუნდებისგან განსხვავებით, ენერგია მქნევარას მეშვეობით უნდა დაეგროვებინა.

მართალია, შარშან ”უილიამსს” ფორმულა 1-ში კერს-ი არ გამოუყენებია და გუნდებს შორის არსებული შეთანხმების შესაბამისად, არც ახალ სეზონში გამოიყენებს, მაგრამ ”უილიამს ჰაიბრიდ პაუა” თავისი სისტემის გამოყენებას საგზაო ავტომობილებისათვის აპირებს. კერძოდ, გავრცელებული ინფორმაციით, სწორედ ამ სისტემითაა აღჭურვილი ”პორშეს” ჰიბრიდული ავტომობილი 911 GT3 R, რომლის მსოფლიო პრემიერა ჟენევის ავტო შოუზე გაიმართება. გარდა ამისა, ამავე სისტემას, გერმანული კომპანია ნურბურგრინგის 24-საათიან რბოლაში, მოდელ 911-ზე გამოიყენებს.

ამასთან, ”უილიამს ჰაიბრიდ პაუა” მარტო ”პორშესთან” თანამშრომლობით არ შემოიფარგლება. მსგავს სისტემას ის ”იაგუარ ლენდ როვერისთვისაც” ამუშავებს, რომელიც ინდური ”ტატა მოტორსის” მფლობლობაში შედის. ავტომობილების გარდა, მქნევარიან კერს-ს ”უილიამს ჰაიბრიდ პაუა” ასევე მატარებლების, ავტობუსებისათვის, გემებისა და ქარის ელექტროგენერატორებისთვისაც კი შეიმუშავებს.

ბიზნესის განვითარების კვალობაზე, ფრენკ უილიამსი ”უილიამს ჰაიბრიდ პაუას” აქციების საკონტროლო პაკეტის დაუფლებას გეგმავს. ”უილიამსის” ფ1-ის გუნდის მთავარი აღმასრულებელი ედამ პერი იმედოვნებს, რომ ახალი ბიზნესი მისი გუნდისთვის დიდი მოგების მომტანი გახდება.

”კია” ”ტოიოტა პრიუსთან” კონკურენციისთვის ემზადება

Kia Ray Hybrid

10 თებერვალი

ჩიკაგოს ავტო შოუზე, კორეულმა კომპანია ”კიამ” პლაგ-ინ ჰიბრიდული სისტემით აღჭურვილი კონცეპტუალური მოდელი ”რეი” გამოფინა, რომლის ბაზაზეც, მალე სერიული ავტომობილის წარმოება დაიწყება. კონცეპტუალური ავტომობილი გადამუშავებადი, ძალიან მსუბუქი პლასტიკითაა დამზადებული, მის სახურავზე კი ფოტოელემენტებია მოთავსებული, რომლებიც აკუმულატორებისთვის მზისგან მიღებულ ენერგიას ელექტროენერგიად გადაამუშავებენ.

”კია რეის” ჰიბრიდულ სისტემაში შედის ბენზინის 1.4-ლიტრიანი ძრავი, რომლის სიმძლავრეც 153 ცხენის ძალაა და 75-კილოვატიანი ელექტროძრავი, რომელსაც ენერგიით ლითიუმ-იონური აკუმულატორების ბლოკი კვებავს. მხოლოდ ელექტროძრავის ხარჯზე, ავტომობილს დაახლოებით 80 კილომეტრის გავლა შეუძლია. და თუ საქმეში შიდაწვის ძრავი და მასთან დაკავშირებული გენერატორი ჩაერთვება, მაშინ სვლის სიშორე 1 200 კილომეტრამდე გაიზრდება. თანაც, ”რეი” ყოველ 100 კილომეტრზე მხოლოდ 1.2 ლიტრ ბენზინს დაწვავს.

”კია რეის” ეკოლოგიურ თემას მასში გამოყენებული აუდიოსისტემა ”ინფინიტი გრინეიჯიც” აგრძელებს, რომლის გამაძლიერებელი და დინამიკებიც, ჩვეულებრივ ანალოგებზე თითქმის ორჯერ ნაკლებ ენერგიას მოიხმარს. ენერგოდამზოგია ”მაიკროსოფტის” მიერ შემუშავებული მულტიმედიური სისტემა ”კია უვო-ც”.

”კიას” წარმომადგენელთა განცხადებით, ჩიკაგოში წარმოდგენილი კონცეპტუალური ”რეი” კორეული კომპანიის ახალი ქვებრენდის პირველი მერცხალია. ამ ბრენდის სახელწოდება ”კია ეკოდაინემიკსია”, ამ სახელით კი ეკონომიური და ეკოლოგიურად სუფთა ავტომობილების წარმოება იგეგმება.

რა თქმა უნდა, ამ ეტაპზე ჯერ ”კიაშიც” არ იციან, ”რეის” ბაზაზე დაიწყებენ თუ არა სერიული ავტომობილის წარმოებას.