”ფერარი” ოთხკარიანი ავტომობილების წარმოებას არ აპირებს

Ferrari rules out 4dr saloon

7 მაისი

ბრიტანულ ჟურნალ ”ავტოქართან” საუბრისას, ”ფერარის” შეფმა ამადეო ფელისამ განაცხადა, რომ მისი კომპანია არასდროს გამოუშვებს ოთხკარიან ავტომობილებს, რადგან თავის დროზე, მისმა დამაარსებელმა ენცო ფერარიმ განაცხადა, რომ ”ფერარი” ოთხკარიანი ავტომობილების წარმოებისთვის არ შეუქმნია.

”ჯერ კიდევ ენცო ფერარი ამბობდა, რომ ჩვენ არასდროს გავაკეთებთ ავტომობილებს, რომლებსაც ოთხი კარი აქვთ. და ჩვენ ამ ტრადიციას აუცილებლად შევინარჩუნებთ”, - ამბობს ფელისა და დასძენს, რომ ”ფერარის” ავტომობილებზე გარემოსადმი მეგობრული ტექნოლოგიების გამოყენება დროის და ბაზრის მიერ ნაკარნახები აუცილებლობაა.

”მაგრამ ვერანაირი მოთხოვნა ვერ გვაიძულებს იმას, რომ ოთხკარიანი ავტომობილები ვაწარმოოთ. თუ ვინმეს ოთხკარიანი ”ფერარის” შეძენა სურს, მაშინ ”მაზერატის” გირჩევთ - ისიც ჩვენი კომპანიაა. იმის თქმას არ ვაპირებ, რომ ოთხკარიანი ავტომობილები ”ფერარის” იმიჯისთვის შეუფერებელია. მაგრამ ასეთი ავტომობილები არასდროს ყოფილა ჩვენი კომპანიის 60-წლიანი ისტორიის ნაწილი”, - დასძენს ფელისა.

როგორც ცნობილია, ოთხკარიანი კუპეების ბაზარი შედარებით ახალი გახსნილია და ამ სეგმენტის ავტომობილები მზარდი პოპულარობით სარგებლობენ. ასე განსაჯეთ, ასეთი ავტომობილის (რეპიდი) წარმოება ”ასტონ მარტინმაც” კი დაიწყო. აღარავის უკვირს ის, რომ ამ ტიპის ავტომობილს (ამ კლასს ხშირად სპორტულ სედანებსაც უწოდებენ) ”პორშეც” (პანამერა) უშვებს, ორი წლის წინ კი, ოთხკარიანი კონცეპტუალური ავტომობილი ”ლამბორგინიმაც” გვიჩვენა. თუმცა, არავინ იცის, აპირებენ თუ არა ”ხარები” (ლამბორგინის ემბლემა ხარია) ამ ავტომობილის წარმოებას.

”ჯილი” მსოფლიოს უიაფეს ავტომობილს გამოუშვებს

Geely's £1500 Nano rival

6 მაისი

ჩინური საავტომობილო კომპანია ”ჯილი”, რომელმაც ახლახანს ”ფორდისგან” შვედური ”ვოლვო” გამოისყიდა, მალე ახალი სუბკომპაქტური ჰეჩბეკის წარმოებას დაიწყებს, რომელიც, კომპანიის ხელმძღვანელთა განცხადებით, მსოფლიოს უიაფესი ავტომობილის წოდებას ”ტატა ნანოს” ჩამოართმევს.

წინასწარი ინფორმაციით, ახალი ავტომობილის ფასი 1760-2350 ევროს ფარგლებში მოექცევა. შედარებისთვის, ინდური კომპანიის უიაფესი ავტომობილი - ”ტატა ნანო” უკვე დაახლოებით 2900 ევრო ღირს. მისი წარმოების დასაწყისში, ამ ავტომობილის ღირებულება 2500 დოლარი იყო.

”ჯილის” წარმომადგენელთა განცხადებით, გარეგნულად ახალი ჰეჩბეკი კონცეპტუალურ ჰიბრიდულ მოდელ IG-ს დაემსგავსება, რომლის პრემიერაც ახლახანს, პეკინის საავტომობილო შოუზე გაიმართა.

ამ კონცეპტუალურ ავტომობილს თოლიას ფრთის ტიპის კარები გამოარჩევს, თუმცა მისი წარმოების თვითღირებულების შესამცირებლად, სერიულ ვერსიაზე ჩვეულებრივ კარებებს დააყენებენ. ავტომობილს ორი სრულფასოვანი და ორიც ფსევდო ადგილი ექნება. შესაბამისად, მისი ჩასაჯდომი ფორმულაა 2+2.

კონცეპტუალური IG-ს გაბარიტები სერიულ მოდელზეც უცვლელად დარჩება. მისი სიგრძე 3.085 მეტრი, ბორბლებს შორის ბაზა კი 2.100 მეტრია. ეს კი ”ტოიოტას” ჯუჯა iQ-ს შესაბამის პარამეტრებზე, 0.185 და 0.100 მეტრით მეტია.

ჩინურ კომპანიაში აცხადებენ, რომ მათი ჰეჩბეკის ხარისხი გაცილებით მაღალი იქნება ”ტატა ნანოსაზე”. ამასთან, მის კაპოტქვეშ განთავსდება ბენზინის ძრავი, რომლის მუშა მოცულობა 0.988 ლიტრი, მაქსიმალური სიმძლავრე კი 69 ცხენის ძალაა. ამ აგრეგატს კი უსაფეხურო ვარიატორი შეუწყვილდება.

სავარაუდოდ, ”ტატა ნანოს” ჩინური კონკურენტის წარმოება 2012 წელს დაიწყება. უფრო მოგვიანებით კი, ”ჯილი” მის ბაზაზე ელექტრომობილს მოამზადებს, რომელიც 80-ცხენისძალიანი ელექტროძრავით და ლითიუმ-იონური აკუმულატორების ბლოკით აღიჭურვება. მათი მეშვეობით, ელექტრომობილი შეუჩერებლად 150 კილომეტრის გავლას შეძლებს.

მარკიონე კარლოს გონის წარმატების გამეორებას ცდილობს

Marchionne faces tough challenge to match Ghosn's success

6 მაისი

ოთხი თვით ადრე, სანამ ”ფიატი” ”კრაისლერის” ჯგუფის საკონტროლო პაკეტს დაეუფლებოდა, იტალიური კონცერნის მთავარი აღმასრულებელი სერჯო მარკიონე არ მალავდა, რომ მას ”ფიატის” ბაზაზე, ახალი კონგლომერატის ჩამოყალიბება სურდა, რომელიც მსოფლიოს უდიდეს ავტო მწარმოებელთა მოწინავე ხუთეულში შევიდოდა.

2008 წლის 11 დეკემბერს, როდესაც ტურინში, ”ფიატის” შტაბ-ბინაში, 1 500 ადამიანის წინაშე საუბრობდა, მან განაცხადა, რომ ბაზარზე ადგილის დიდი ხნით შესანარჩუნებლად, ”ფიატს” სხვა კომპანიებთან ალიანსის ჩამოყალიბება სჭირდება. მაშინვე მას კრიზისში მყოფი რამდენიმე კომპანია ჰქონდა შეგულებული. მაგრამ თითქმის ყველასთან დაახლოება ჩაეშალა.

სერჯო მარკიონე

........................................

არადა, თავიდან თითქოს, ”ჯენერალ მოტორსი” თანახმა იყო, რომ ”ფიატისთვის” თავისი ორი ევროპული შტო - გერმანულ-ბრიტანული ”ოპელ-ვოქსჰოლი” და შვედური ”სააბი” მიეყიდა. გარდა ამისა, ტურინელებს კრიზისში მყოფი ამერიკული გიგანტის სამხრეთამერიკული ბიზნესის დაუფლებაც სურდათ. მაგრამ მალე ”გენერლებისგან” ყველა ვარიანტზე უარი მიიღეს.

”მარკიონეს სურდა, რომ დიდი საავტომობილო ჯგუფი შეექმნა, რომელიც ”ფიატის” ქოლგის ქვეშ გაერთიანდებოდა. მაგრამ ამ მიზნის მიღწევა ახლა გაცილებით ძნელი იქნება”, - ამბობს ”ფიატის” ექსპერტი და მილანის ბოჩონის უნივერსიტეტის ბიზნესის ფაკულტეტის პროფესორი ჯუზეპე ბერტა.

მარკიონე ცდილობს, გაიმეოროს კარლოს გონის წარმატება, რომელმაც ორი კომპანია - ფრანგული ”რენო” და იაპონური ”ნისანი” გააერთიანა და ახლა ორივეს სათავეში უდგას. თან, საკმაოდ წარმატებითაც. უკვე 11 წელია, რაც ამ ორმა კომპანიამ ალიანსი ჩამოაყალიბა და ამ პერიოდში, ის ავტოინდუსტრიის ისტორიაში ყველაზე წარმატებულ გაერთიანებად იქცა.

კარლოს გონი

...................................

მარკიონეს კი, გონთან გატოლებაში ბევრი გარემოება უშლის ხელს, რომლებსაც სულ ახლახანს კიდევ ერთი სერიოზული ფაქტორი დაემატა - ”რენოსა” და ”ნისანის” ტანდემმა ახალი ალიანსი ჩამოაყალიბა. ამჯერად მას ”დაიმლერი” შეუერთდა (პარიტეტულ საწყისებზე), რომელსაც უზარმაზარი შესაძლებლობები გააჩნია.

21 აპრილს, ტურინში ჩატარებულ პრესკონფერენციაზე, მარკიონემ ”ფიატ-კრაისლერის” ურთიერთობის მისეული ხედვა წარმოადგინა. მისი გეგმის მიხედვით, ორმა კომპანიამ მჭიდროდ უნდა ითანამშრომლოს ახალი პროდუქციის შემუშავებისა და დისტრიბუციის საქმეში. გარდა ამისა, მათ ახალი პარტნიორები სჭირდებათ ჩინეთში. ამ გეგმის განხორციელება წარმატებულად ჩაითვლება, თუ 2014 წელს ალიანსის გაყიდვების მოცულობა 6 მილიონ ავტომობილს მიაღწევს. ამჟამად, ორივე კომპანიის ჯამური გაყიდვები მხოლოდ 3.3 მილიონს შეადგენს. მოკლედ, თავისი გეგმის შესასრულებლად, მარკიონეს წარმოების თითქმის გაორმაგება მოუწევს, რაც აშკარად არ იქნება იოლი საქმე.

მარკიონე არ მალავს, რომ ”კრაისლერის” მიერთებისას, ”ფიატის” მთავარი მიზანი ჩრდილოეთ ამერიკის რეგიონის (კანადა, აშშ და მექსიკა) ბაზარზე შეღწევა იყო. დღეს ეს მიზანი მიღწეულია და ახლა მარკიონე ამ ალიანსიდან მაქსიმალური ხეირის გამოწურვას ეცდება. სხვათა შორის, ანალიტიკოსები მოელიან, რომ ”კრაისლერი” პირველ კვარტალს მოგებით დაასრულებს.

2009 წლის მარტიდან, 2010 წლის მარტამდე, ”კრაისლერის” წილი აშშ-ის ბაზარზე 2 პროცენტული მაჩვენებლით, 9.2 პროცენტამდე შემცირდა. ეს იმ დროს, როდესაც ”ფორდის” წილი 14.7-დან 17.4 პროცენტამდე გაიზარდა, ”ჯენერალ მოტორსისა” კი - 18.6-დან 18.6 პროცენტამდე. ავტო ინდუსტრიის დამოუკიდებელი ანალიტიკოსი მარიან კელერი ვარაუდობს, რომ 57 წლის მარკიონეს მიზანი, მისმა ალიანსმა აშშ-ში წელს 1.1 მილიონი ავტომობილი გაჰყიდოს, მიუწვდომელია.

გონმა, ვინც ამჟამად 56 წლისაა, ალიანსის ჩამოყალიბებიდან სულ რაღაც 17 თვეში, ”ნისანი” მომგებიან კომპანიად აქცია. იაპონური კომპანიის შემოსავალმა მაშინ 66 მილიარდ დოლარს, სუფთა მოგებამ კი რეკორდულ 3.6 მილიარდს მიაღწია. ამ მიღწევით, ის ავტოკომპანიების გარდაქმნის საქმის ეტალონად იქცა.

ორივე კომპანიაში მისვლისთანავე, გონმა უმალ მოიპოვა ავტორიტეტი როგორც თანამშრომლებს შორის, ასევე მთლიანად ავტო ინდუსტრიაში. ორივე შემთხვევაში, მან მოკლევადიანი მიზნები დაისახა და პირობა დადო, რომ მათი მიუღწევლობის შემთხვევაში, თანამდებობას დატოვებდა.

1999 წლის ოქტომბერში, მან ”ნისანის” გადარჩენის გეგმა შეიმუშავა და პირობა დადო, რომ იაპონურ კომპანიის ბიზნესს 2001 წელს მომგებიანად აქცევდა, კიდევ ორ წელიწადში კი საოპერაციო მარჟას 4.5 პროცენტამდე გაზრდიდა. გონის ხელმძღვანელობით, ორივე მიზანს კომპანიამ ერთი წლით ადრე მიაღწია.

გონისგან განსხვავებით, მარკიონე ალიანსის შექმნისთანავე პრობლემებს წააწყდა. ოღონდ, სანამ ეს მოხდებოდა, მან სხვა დიდი პრობლემები გადაიტანა. ის დიდი მონდომებით ცდილობდა ”ჯენერალ მოტორსის” ბიზნესის ნაწილის ”ფიატთან” შეერთებას. თითქოს, თავიდან ამერიკულ კომპანიას ამის საწინააღმდეგო არაფერი ჰქონდა, მაგრამ შემდეგ ყველაფერი აირია. ”ფიატის” ნაცვლად, ”ოპელის” მყიდველად არჩევანი თავიდან კანადურ ”მაგნაზე” შეჩერდა, შემდეგ კი გერმანული კომპანია საერთოდაც დაიტოვა, რისთვისაც ”ოპელის” მთავარი აღმასრულებლის, ფრიც ჰენდერსონის მიერ ხელმოწერილი წინასწარი შეთანხმებებიც კი დაარღვია.

მარკიონეს კი ისღა დარჩენოდა, ორ ვარიანტს შორის უარესზე - ”კრაისლერზე” შეეჩერებინა თავისი არჩევანი, რომელიც ორიოდე წლით ადრე, სრულიად გამოფიტული, ”დაიმლერმა” მიაგდო (ამ სიტყვის სრული მნიშვნელობით). ტურინელებმა ამერიკული კომპანიის 20 პროცენტი მიიღეს, თავად კი ”კრაისლერსთვის” თავიანთი ტექნოლოგიები ხელმისაწვდომი გახადეს. ცნობისათვის, ”კრაისლერის” აქციების 67.7 პროცენტი კომპანიის პენსიონერთა ჯანმრთელობის დაცვის ფონდის ხელშია, დარჩენილ წილს კი აშშ-ის და კანადის მთავრობები აკონტროლებენ.

მარკიონეს მომხრეები ამბობენ, რომ ჯერ ადრეა მისი შესაძლებლობების შეფასება, რადგან ჯერ მხოლოდ 10 თვეა, რაც ის ”კრაისლერს” ხელმძღვანელობს. ანალიტიკურ კომპანია ”ელიქს პარტნერზის” თანა-პრეზიდენტი სტეფანო ავერსა, ვინც ”ფიატსა” და ”ჯენერალ მოტორსს” შორის მოლაპარაკებებში მონაწილეობდა, ამბობს, რომ მარკიონეს მუშაობის შედეგი მხოლოდ მას შემდეგ გამოჩნდება, რაც ამერიკული კომპანია ”ჯიპ გრანდ ჩეროკისა” და ”კრაისლერ 300-ის” ახალი ვერსიების გაყიდვას დაიწყებს და სამოდელო გამასაც თანდათან გაამრავალფეროვნებს.

არსებობს სხვა ფაქტორებიც, რომლებიც მარკიონეს მდგომარეობას ართულებს. მაგალითად, დღეს ბაზარი კრიზისის შედეგებს იმკის და გაყიდვები უაღრესად გართულებულია. გონმა კი, ”ნისანი” როცა ჩაიბარა, მაშინ ამერიკის ბაზარზე გაყიდვების ბუმი იყო. გარდა ამისა, დღეს საერთაშორისო ავტო ბაზარზე გაცილებით ძლიერი კონკურენციაა, ვიდრე 11 წლის წინ. კერძოდ, დღეს მთელს მსოფლიოში მოქმედ ავტომწარმოებლებს 90 მილიარდი ავტომობილის წარმოება შეუძლიათ, რაც დაახლოებით 30 მილიარდით მეტია გლობალური ბაზრის მოთხოვნაზე.

გაგრძელება იქნება

“პირელი” მალე საზრიანი საბურავების გაყიდვას დაიწყებს

'Intelligent tyres' by 2013

3 მაისი

ჩიპი საბურავის შიგნით

.......................................................................

სამი წელი და ევროპის ბაზარზე ეგრეთ წოდებული ”ინტელექტუალური” საბურავების გაყიდვა დაიწყება. პრინციპში, აქ გამოთქმა ეგრეთ წოდებული უადგილოა, რადგან საბურავებს, რომლებსაც წარმოებისთვის იტალიური კომპანია ”პირელი” ამზადებს, ინტელექტი აქვს. ინტელექტის წყაროს კი - მიკროჩიპს, ინგლისური კომპანია ”შრადერ ელექტრონიკსი” ამზადებს.

მიკროჩიპი

................................

მიკროჩიპი საბურავის გარსის შიგნით თავსდება და ავტომობილის შესაბამის მაკონტროლებელ სისტემას უმავთულოდ უკავშირდება. ჩიპი ადგენს პროტექტორის ცვეთის ხარისხს, საბურავის შიდა წნევასა და ტემპერატურას, გზის საფართან ჩაჭიდების ხარისხს. მასვე შეუძლია იმის დადგენაც, გზა სველია, თუ მშრალი, დათოვლილი, თუ მოყინული. მთელი ეს ინფორმაცია ავტომობილის მთავარ კომპიუტერს გადაეცემა, რომელიც მიღებულ ინფორმაციას გადაამუშავებს და საკიდარს, სამუხრუჭე, სტაბილიზაციის და ბლოკირების საწინააღმდეგო სისტემებს, შესაბამისად მომართავს.

ჭკვიან საბურავებს ”საიბერ ტაია ლინ” უწოდეს. ამ საბურავის პირველი საცდელი და სადემონსტრაციო ეგზემპლარები ევროპაში წელსვე გამოჩნდება, მის სერიულ წარმოებას კი (სახელწოდებით საიბერ ტაია) ”პირელი” 2013 წელს დაიწყებს.

სხვათა შორის, პირველმა ინტელექტუალური საბურავები უტალიურმა სადიზაინერო სტუდია ”ფიორავანტიმ” 2006 წელს შეიმუშავა და თავის გამოგონებაზე პატენტიც აიღო. მაგრამ მაშინვე ეს პატენტი მისგან ”პირელიმ” გამოისყიდა და ტექნოლოგიის დანერგვაზე ზრუნვას შეუდგა.

”ფოლკსვაგენი” ”ახალი ხოჭოს” წარმოებას აჩერებს

VW to Stop New Beetle's Production

3 მაისი

”ფოლკსვაგენი” ადასტურებს, რომ მალე გააჩერებს ”ახალი ხოჭოს” (სურათზე) წარმოებას. წლის ბოლოს კი, ლოს ანჯელესის საავტომობილო გამოფენაზე, მეორე თაობის ”ახალ ხოჭოს” გვიჩვენებს. იმავდროულად, გერმანული კომპანია აცხადებს, რომ ”ახალი ხოჭოს” მარაგი ჯერაც არსებობს და რომ მასზე შეკვეთების მიღება კვლავაც გაგრძელდება.

”დილერების სადგომებზე ჯერაც საკმაოდ ბევრი”ახალი ხოჭოა” შემორჩენილი. ასე რომ, ამ მარაგების ამოწურვამდე, მსურველებს მისი შეძენის საშუალება ექნებათ”, - ამბობს ”ფოლკსვაგენის” ავსტრალიური შტოს წარმომადგენელი. ვოლფსბურგული გიგანტის ამერიკული შტოს შეფი სტეფან ჯეკობი კი დასძენს, რომ მეორე თაობის ”ახალი ხოჭო” ბაზარზე 2012 წელს გამოჩნდება.

ამერიკულ გამოცემა ”აუტოუიკის” ინფორმაციით, შემდეგი თაობის ”ახალი ხოჭო” ”ფოლკსვაგენის” ბენზინის 2.0-ლიტრიანი (ოთხცილინდრიანი) და 2.5-ლიტრიანი (ხუთცილინდრიანი - ეს ამერიკული ბაზრისთვის) ძრავებით აღიჭურვება. გარდა ამისა, ახალი ავტომობილისთვის ჰიბრიდული სისტემაც შემუშავდება, რომლის მთავარი აგრეგატიც 1.4-ლიტრიანი ბენზინის აგრეგატი იქნება.

შემდეგი თაობის ”ახალი ხოჭო” იმავე პლატფორმაზე აიგება, რომელსაც ვოლფსბურგელები ახალი ”ჯეტასთვის” ამზადებენ. ამ ავტომობილის მსოფლიო პრემიერა პარიზის ავტო შოუზეა მოსალოდნელი. ახალი, დიდი პლატფორმა იმის მაუწყებელია, რომ ახალი ”ხოჭო” გაბარიტებშიც გაიზრდება და მისი დინამიკური მახასიათებლებიც გაუმჯობესდება.

ცნობისათვის, პირველი თაობის ”ახალი ხოჭო” ბაზარზე 1998 წელს გამოჩნდა და ის მეოთხე თაობის ”გოლფის” პლატფორმაზეა აგებული, რომელსაც ასევე ”აუდი” თავისი TT-სთვის იყენებს. მოსალოდნელია, რომ ახალ ავტომობილს ევოლუციური დიზაინი ექნება, თუმცა ის ასევე რეტრო სტილსაც შეინარჩუნებს და ნაკლებად ”ქალური” გახდება. გავრცელებული ინფორმაციით, ის 2005 წლის კონცეპტუალურ ”რაგსტერს” დაემსგავსება.

გორდონ მარიმ ჯუჯა T25-ის გამოცდა დაიწყო

Murray T25

3 მაისი

ფორმულა 1-ში სახელმოხვეჭილ ბრიტანელ ინჟინერ გორდონ მარის ინჟინირინგულმა კომპანია ”გორდონ მარი დიზაინმა”, თავისი რევოლუციური ავტომობილის, სამადგილიან ჯუჯა T25-ის საგზაო გამოცდები დაიწყო. ავტომობილი, რომელიც ”სმარტზე” გაცილებით პატარაა, ტესტირებას სარეის საგრაფოში, კომპანიის შტაბ-ბინის სიახლოვეს გადის. ტესტირების დროს, მისთვის გადაღებული პირველი ფოტო ხელში ინგლისურმა ჟურნალმა ”ავტოქარმა” ჩაიგდო.

ცნობისათვის, გორდონ მარის ფორმულა 1-ში რამდენიმე საინტერესო პროექტი აქვს შესრულებული. მანვე დააპროექტა ”მაკლარენის” ლეგენდარული სუპერ ავტომობილი F1, რომელსაც დინამიკური მახასიათებლებით ბევრი ახლაც ვერ შეედრება. ის ამჟამად საქალაქო ულტრაკომპაქტური ავტომობილის შესაქმნელად მუშაობს, რომლის წარმოების ლიცენზიასაც რომელიმე დიდ კიმპანიას მიჰყიდის. გარდა ამისა, მას წარმოების ახალი სტილი აქვს შემუშავებული, რომლითაც საწარმოო და ენერგიის ხარჯების მნიშვნელოვნად შემცირებაა შესაძლებელი.

სამადგილიანი T25-ის ბაზა ”სმარტ ფორთუსა” და ”ტოიოტა iQ-საზე” მოკლეა. სამაგიეროდ, მის სალონში მეტი ადგილია. აქ მძღოლს ცენტრალური ადგილი უკავია, ორი მგზავრი კი მის გვერდებზე და ოდნავ უკან თავსდება (როგორცF1-ში). საკმაოდ მოზრდილია საბარგულის ადგილი, სადაც რამდენიმე მოზრდილი ჩანთის მოთავსება შეიძლება. ამასთან, თუ სავარძლები დაიკეცება, საბარგულის მოცულობა კიდევ უფრო გაიზრდება.

ჯუჯა ავტომობილი სულ რაღაც 650 კილოგრამს იწონის. ბენზინის ძრავი, რომლის მუშა მოცულობაც 660 კუბური სანტიმეტრია, უკანა ნაწილში თავსდება და უკანა ბორბლებს ამუშავებს. ძრავის მაბრუნ მომენტს 6-საფეხურიანი გადაცემათა კოლოფი გადაამუშავებს.

შიდაწვისძრავიანი ავტომობილის გარდა, მარის კომპანია T25-ის ელექტრულ ვერსიასაც (T27-ს) ამზადებს, რომლის ტესტირებასაც წელსვე დაიწყებს. ამ ავტომობილზე ლითიუმ-იონურ აკუმულატორების ბლოკს გამოიყენებენ, რომლის ტევადობაც საკმარისი იქნება იმისათვის, რომ T27-მა ერთი სრული დამუხტვით 100 კილომეტრის გავლა შესძლოს. აკუმულატორების სრულ დამუხტვას კი 4 საათი დასჭირდება.

ამ ორი ავტომობილის ტესტირებისთვის 14 თვეა გამოყოფილი, მათი სერიული წარმოება კი ორი წლის შემდეგ დაიწყება.

”პუ-პა” - მომავლის ელექტრომობილი იაპონიიდან

Teijin Electric Vehicle Concept Presented in Japan

3 მაისი

ელექტრომობილების თემა მსოფლიო ავტოინდუსტრიაში სულ უფრო პოპულარული ხდება. მართალია, მათი წარმოება ჯერ არავის დაუწყია, მაგრამ ამ მიმართულებით კვლევების ჩატარებას ხელს არაფერი უშლის. და იქმნება უამრავი კონცეპცია, რომელთა დიდი ნაწილი კონვეიერზე ალბათ ვერასდროს მოხვდება, ზოგში გამოყენებულ იდეებს კი ალბათ მალე სერიულ ავტომობილებზე ვიხილავთ.

ერთ-ერთი ასეთი ქმნილება ახლახანს საზოგადოებას იაპონურმა კომპანია ”ტეიძინმა” წარუდგინა. კონცეპტუალურ ავტომობილს სახელად ”პუ-პა EV” (ელექტრომობილი პუპა) უწოდეს. მისი დამზადებისას, ინჟინრებმა ფართოდ გამოიყენეს ისეთი მსუბუქი მასალები, როგორებიცაა ნახშირბადის კომპოზიტი, პოლიკარბონატული ფისები და ბიო-ნედლეულიდან მიღებული პოლიესტერი. ყოველივეს შედეგი კი ისაა, რომ ”პუპა” მხოლოდ 437 კილოგრამს იწონის.

ეს კონცეპტუალური ელექტრომობილი მხოლოდ იმის სადემონსტრაციოდ შეიქმნა, რომ დაგვენახა, როგორი შეიძლება იყოს მომავლის ელექტრომობილები. ”პუპა” გვიჩვენებს, რომ ელექტრომობილებისადმი მთავარი მოთხოვნა კომპაქტურობა და სიმსუბუქე იქნება. რა თქმა უნდა, დიდი ყურადღება დაეთმობა იმას, რომ წარმოებისას გადამუშავებადი მასალები გამოიყენონ.

”პუპა-ს” მაქსიმალური სიჩქარე სულ რაღაც 60 კმ/სთ-ია (ურბანულ ელექტრომობილს მეტი არც სჭირდება), მისი სვლის სიშორე კი 100 კმ - ქალაქში გამოყენებისთვის მეტი საჭირო არცაა. მისი მზიდი ტანი და ძარა კარბონის კომპოზიტისგანაა დამზადებული, ფანჯრებისთვის კი შუშის ნაცვლად, პოლიკარბონატული ფისი გამოიყენეს. შედეგად, ფანჯრების წონა განახევრდა.

ავტომობილის დამზადებისას, ბევრი ეკოლოგიურად სუფთა მასალაც გამოიყენეს. მაგალითად, ინტერიერში ბევრი ისეთი დეტალი შეგხვდებათ, რომლებიც ბიოლოგიურად სუფთა ნედლეულისგანაა ნაწარმოები. ასეთ მასალებს შორის კი ყველაზე უნივერსალური პოლიესტერია, რომლისგანაც სავარძლები, სახურავის საიზოლაციო შრე და სხვა ნაწილები დაამზადეს.

”ტეიძინმა” კონცეპტუალური ელექტრომობილი ტოკიოში, თავისი შტაბ-ბინის სიახლოვეს მდებარე საკუთარივე სტუდიის შოურუმში გამოფინა, რომელსაც იაპონური კომპანია თავისი ინოვაციური ტექნოლოგიების საჩვენებლად იყენებს ხოლმე.

ცნობისათვის, ”ტეიძინის” ჯგუფის საქმიანობა ინდუსტრიის ოთხ სფეროს მოიცავს. ესენია: ავტომობილები და თვითმფრინავები, ინფორმატიკა და ელექტრონიკა, მედიცინა და ეკოლოგიური ტექნოლოგიები.

”მერსედესი” SLS AMG-ს ელექტრულ ვერსიასაც გამოუშვებს

Mercedes SLS AMG Electric Drive, Presented This Year

2 მაისი

ინტერნეტით გავრცელდა ინფორმაცია იმის შესახებ, რომ ”მერსედეს ბენცი” თავის სუპერ ავტომობილ SLS AMG-ს ბაზაზე ელექტრომობილს ამზადებს და მის წინასერიულ ვერსიას საზოგადოებას ამ წლის მიწურულს უჩვენებს.

კომპანია AMG-ს მმართველი დირექტორი ფოლკერ მორნინვეგი ამბობს, რომ ამ ელექტრომობილის წარმოების დაწყება 2013 წელს იგეგმება. სხვათა შორის, AMG უკვე მუშაობს SLS AMG-ს ელექტრულ ვერსიაზე და რამდენიმე პროტოტიპი დაამზადა კიდეც, რომელთაგან ერთ-ერთი, მორნინვეგმა პირადად გამოსცადა.

”შემიძლია განვაცხადო, რომ ამ ავტომობილის მართვა საკმაოდ სასიამოვნოა. მისი შემუშავებისას, ჩვენი ერთ-ერთი მთავარი ამოცანა ისაა, რომ მისი მართვისას მძღოლმა ისეთივე შეგრძნებები გამოსცადოს, რომლებსაც შიდაწვისძრავიანი სუპერ ავტომობილის მართვისას ღებულობს. ერთ-ერთი ასეთი შეგრძნება კი ძრავის ბოხი ხმაა”, - ამბობს მორნინვეგი.

SLS AMG-ს ელექტრული ვერსია ოთხი ელექტროძრავით აღიჭურვება, რომელთა ჯამური მაქსიმალური სიმძლავრე 525 ცხენის ძალას, მაქსიმალური მაბრუნი მომენტი კი 880 ნუტონმეტრს მიაღწევს. ელექტრომობილის სვლის სიშორე კი 180 კილომეტრი იქნება. ეს ავტომობილი, ელექტრომობილებისადმი ავტომოყვარულების დამოკიდებულებას რადიკალურად შეცვლის.

ელექტროძრავები ბორბლების სიახლოვეს განლაგდება, რითაც შემცირდება (იმ ავტომობილებთან შედარებით, რომლებსაც ელექტროძრავები ბორბლებში აქვთ განთავსებული) ავტომობილის ეგრეთ წოდებული დაურესორებელი წონა. ძრავები ენერგიას ლითიუმ-იონური აკუმულატორების ბლოკისგან მიიღებენ, რომლის გაგრილებასაც თხევადტანიანი სისტემა უზრუნველყოფს. აკუმულატორები ნაწილობრივ ავტომობილის მოძრაობისას, სისტემა კერსით (კინეტიკური ენერგიის რეკუპერაციის სისტემა) დაიმუხტება. ისე კი, ის შევსებას საყოფაცხოვრებო ელექტროქსელიდან მიიღებს.

მორნინვეგი ამბობს, რომ ელექტრომობილის შესაქმნელად, AMG-მ არჩევანი SLS AMG-ზე მხოლოდ იმიტომ შეაჩერა, რომ ეს ავტომობილი ელექტრომობილად ადვილად გადაკეთებადია. ”ამ მანქანას მოხსნით შიდაწვის ძრავს და ტრანსმისიას და ის პრაქტიკულად მზადაა იმისათვის, რომ ელექტრომობილად გარდაქმნათ. ამას ბევრი ინვესტიცია არ სჭირდება”, - ამბობს მორნინვეგი.

”ფოლკსვაგენმა” ახალი 3-ცილინდრიანი დიზელის ძრავი წარმოადგინა

Volkswagen Presents New 3-Cylinder Diesel Engine

2 მაისი

ვენაში ჩატარებულ 31-ე საერთაშორისო მოტორ სიმპოზიუმზე, ”ფოლკსვაგენმა” TDI სერიის ახალი დიზელის ძრავი წარადგინა, რომლის მუშა მოცულობა 1.2 ლიტრია, ცილინდრების რაოდენობა კი - 3. ვოლფსბურგელებმა პრეზენტაციაზე ხაზი ამ ძრავის ეკონომიურობასა და გარემოსადმი მეგობრულობას გაუსვეს.

”ფოლკსვაგენის” ჯგუფის მომავლის ტექნოლოგიების განყოფილების ხელმძღვანელი, პროფესორი ვოლფგანგ შტაიგერი ამბობს, რომ თანამედროვე ინდუსტრიაში ელექტრომობილებისა და ჰიბრიდული ავტომობილების წილის ზრდის მიუხედავად, შიდაწვის ძრავებს კვლავაც აქვს მომავალი. სწორედ ამიტომ, ვოლფსბურგელები ასეთი ძრავების დახვეწაზე მუშაობის გაგრძელებას კვლავაც აპირებენ.

შტაიგერის თქმით, გარემოზე ზრუნვა და ეკონომიკური კრიზისი, კომპანიებს ახალი ძრავების შემუშავებისკენ უბიძგებს და ამას ხელს პოლიტიკოსებიც უწყობენ, რომელთათვისაც ძალიან მნიშვნელოვანია გარემოსადმი ზრუნვა. თუმცა, ხშირად საქმე მაშინ ფერხდება, როდესაც საქმე ელექტრომობილებისა და ჰიბრიდული ავტომობილების რეკლამას ეხება. ამიტომ, შიდაწვის ძრავებს ჯერაც რჩებათ განვითარების პერსპექტივა.

მისი აზრით, შიდაწვის ძრავები აქტუალობას განსაკუთრებით სატვირთო ავტომობილებსა და შორეული რეისების ავტობუსებში შეინარჩუნებენ, ამის მიზეზი კი აკუმულატორების ტევადობის შედარებით მცირე რესურსი და მათი სწრაფად დამუხტვის პრობლემურობაა.

რაც შეეხება ახალ ძრავს, მიუხედავად მისი კომპაქტურობისა და მცირე მუშა მოცულობისა, ის 75 ცხენის ძალას და 180 ნიუტონმეტრს (2 000 ბრ/წთ-ზე) იძლევა. ამ ძრავით, პირველ რიგში, სუბკომპაქტურ ჰეჩბეკ ”პოლოს” ეკონომიური ვერსია ”ბლუმოუშნი” აღიჭურვება.

პოლიგონზე ჩატარებული ტესტების დროს გამოვლინდა, რომ ”პოლო 1.2 TDI ბლუმოუშნი” 100 კილომეტრს 3.3 ლიტრი საწვავით გადის, ყოველი კილომეტრის გავლისას კი ატმოსფეროს მხოლოდ 87 გრამი CO2-ით აბინძურებს. ამასთან, ავტომობილს ადგილიდან 100 კმ/სთ სიჩქარის აკრეფა 12 წამში შეუძლია.

”პოლო 1.2 TDI ბლუმოუშნის” გაყიდვები მაისში დაიწყება.

”ბეემვემ” შეიძლება მოდელი X4-იც გამოუშვას

BMW Might Build an X4

1 მაისი

”ბეემვეს” ხელმძღვანელობა სრულიად ახალი მოდელის, სპორტულ ქროსოვერ X4-ის წარმოების მიზანშეწონილობას განიხილავს. ამ საკითხის აქტუალობა კი ბაზარზე უფრო დიდი ზომის სპორტული ქროსოვერის, X6-ის პოპულარობამ განაპირობა. ეს ავტომობილი პირველად საზოგადოებამ 2008 წელს იხილა და მას შემდეგ, ის მთელს მსოფლიოში 80 000 ცალი გაიყიდა. არადა, ბავარიული კომპანიის მარკეტოლოგები მხოლოდ ამის ნახევარის გაყიდვას გეგმავდნენ.

ეს ინფორმაცია ინგლისურ ჟურნალ ”ავტოქარს” ”ბეემვეს” წარმომადგენელმა, მიაწოდა, რომელმაც ვინაობის გამხელა არ ისურვა. მისი თქმით, ახალი სპორტული ქროსოვერის წარმოების საკითხი ჯერ გადაწყვეტილი არაა და მას რა თქმა უნდა, არც სახელი აქვს, თუმცა სავარაუდოდ, X4-ს დაარქმევენ. ”ჯერ გადაწყვეტილება მიღებული არაა, თუმცა X6-ის წარმატება იმის მანიშნებელია, რომ ბაზარზე სპორტულ ქროსოვერებზე მოთხოვნა არსებობს”, - ამბობს ”ავტოქარის” ინკოგნიტო წყარო.

თუ ამ ავტომობილის წარმოება გადაწყდა, ის ალბათ უგზოობის X3-ის პლატფორმას დაეყრდნობა, ისევე როგორც X6-ისთვის X5-ის პლატფორმა გამოიყენეს. X3-ის ძრავების გამაში ექვსი ძრავი შედის, რომელთაგან სამი ბენზინისაა და ამდენივე - დიზელისა. სავარაუდოდ, ახალი ავტომობილიც ამავე ძრავებით აღიჭურვება.

”ტესლა” ელექტრულ ქროსოვერსაც გამოუშვებს

Tesla Electric CUV Coming in 2013

1 მაისი

ელექტრომობილების მწარმოებელი ამერიკული კომპანია ”ტესლა” თავისი საწარმოო პროგრამის გაფართოებას გეგმავს - მალე ის სედანისა და ქროსოვერის გამოშვებას დაიწყებს. ამასთან, თუ სედანთან დაკავშირებული გეგმები მისმა ხელმძვანელობამ ადრევე გამოაქვეყნა, ქროსოვერის შესახებ კომპანიის შეფმა ელონ მასკმა ახლახანს განაცხადა.

ამ ეტაპზე, ”ტესლა” მხოლოდ ელექტრო როდსტერს აწარმოებს, რომელიც 1000 ცალზე მეტი გაჰყიდა. შემდეგი ავტომობილი, რომლის წარმოებასაც ეს კომპანია აითვისებს, სედანია, რომელიც ამ ეტაპზე, ”მოდელ S-ის” (S ერთსაფეხურიან გადაცემათა კოლოფს აღნიშნავს) სახელითაა ცნობილი. თუმცა, ეს მხოლოდ როდსტერის წარმოების დასრულების შემდეგ, მერმისს მოხდება.

როდსტერისა და სედანის გარდა, ”ტესლა” სპორტული კუპეს წარმოებასაც აპირებს, რომლითაც ”პორშეს” 911 ტურბოს გაუწევს კონკურენციას. გეგმაშია ასევე კომპაქტური სედანის წარმოებაც, რომელიც დაახლოებით ”ბეემვეს” მე-3 სერიის სედანის ზომისა იქნება.

რაც შეეხება ქროსოვერს, ამერიკულ გამოცემა ”ავტოუიკის” ინფორმაციით, ამ ავტომობილის წარმოება 2013 წელს დაიწყება. მის შესახებ არანაირი ინფორმაცია ჯერ არ ვრცელდება, თუმცა ვარაუდები არსებობს. კერძოდ, ჟენევის წლევანდელ ავტო შოუზე, იტალიაში მოქმედმა ევროპის დიზაინის ინსტიტუტმა (IED) კონცეპტუალური ელექტრო ქროსოვერი ”აი” წარმოადგინა.

ეს კონცეპცია ინსტიტუტის სტუდენტების მიერაა შექმნილი. მისი გაბარიტებია: სიგრძე 4.3 მეტრი, სიგანე 1.4 მეტრი, სიმაღლე კი - 1.8 მეტრი. რაც მთავარია, კონცეპციის შემუშავებაში მონაწილეობა ”ტესლას” სპეციალისტებმაც” მიიღეს, რომლებიც სტუდენტებს კონსულტაციებს უწევდნენ. ამასთან, მოდელი გამოფენაზეც ამერიკული კომპანიის ემბლემით წარსდგა.

”ტესლა” იმედოვნებს, რომ ახალი მოდელების გამოშვების წყალობით, თავის წარმოების წლიურ მოცულობას 200 000 ცალამდე გაზრდის, რისთვისაც დაახლოებით 500 მილიონი დოლარის ინვესტიცია დასჭირდება.

”ატომიკ 500” - ჯუჯა ელექტრომობილი 300 ცხენის ძალით

Atomik 500, Buzzing with 300 HP

1 მაისი

”ფიატი” თავისი პოპულარული მოდელის, ”ჩინკვეჩენტოს” ბაზაზე ელექტრომობილის წარმოებას ჯერ არ აპირებს. ტურინში ჯერჯერობით ვერ გადაუწყვეტიათ, საერთოდ აპირებენ თუ არა ასეთი ავტომობილის წარმოებას. და სანამ ისინი ორჭოფობენ, პარიზულმა კომპანია ”ატომიკ ქარზმა”, რომელიც ახალი დაარსებულია, ავტოსამყაროს ელექტრომობილ 500-ის მისეული ვერსია, სახელად ”ატომიკ 500” შესთავაზა.

ეს ელექტრომობილი სპორტულ ”ფიატ 500 აბარტის” ბაზაზეა შექმნილი. ოღონდ, მის ძარას რამდენიმე ელემენტი შეეცვალა. მაგალითად, მნიშვნელოვნად გაფართოვდა საბორბლე თაღები, რადიატორის ჰაერის ამღები კი დაიხშო. სამაგიეროდ, მცირე ზომის ჰაერის ამღები ”ლაყუჩები” ბორბლების თაღების წინა ნაწილში გამოჩნდა.

ელექტრომობილი ოთხი ელექტროძრავითაა აღჭურვილი. თითო ბორბალს თითო ძრავი ემსახურება, რომელთა ჯამური სიმძლავრეც 300 ცხენის ძალას, ჯამური მაბრუნი მომენტი კი 2550 ნიუტონმეტრს (აქედან 840 ნმ წინა ღერძზე მოდის, 1710 ნმ კი - უკანაზე) შეადგენს. ”ატომიკის” მონაცემებით, ამ ძრავების მეშვეობით, ადგილიდან 100 კმ/სთ-მდე აჩქარებას 5.6 წამში მოასწრებს, ადგილიდან 400 მეტრის გასავლელად 14 წამი, 1000 მეტრის გასავლელად კი 26 წამი დასჭირდება. შედარებისთვის, სერიულ ”ფიატ 500 აბარტს” 0-დან 100 კმ/სთ-მდე ასაჩქარებლად 7.4 წამი სჭირდება. ”ატომიკ 500-ის” მაქსიმალური სიჩქარე 200 კმ/სთ-ია, მისი სვლის მაქსიმალური სიშორე კი - 200 კილომეტრი.

რამდენადაც ყოველ ბორბალზე თითო ძრავი მოდის, ესე იგი, ”ატომიკ 500” სრულამძრავიანია. ელექტროძრავებს ენერგიით ლითიუმ-რკინის ფოსფატის აკუმულატორების ბლოკი ამარაგებს, რომლის გაგრილებაზეც კერამიკული სისტემა და ეგრეთ წოდებული პელტიეს მოდული უზრუნველყოფს.

სხვათა შორის, ამ ტიპის აკუმულატორები ელექტრომობილებში ჯერ არავის გამოუყენებია. ლითიუმ-რკინის ფოსფატის აკუმულატორების მთავარი დადებითი თვისება ისაა, რომ მათ დამუხტვა-განმუხტვის ყველაზე მეტი ციკლის გაძლება შეუძლიათ და ლითიუმ-იონურსა და ლითიუმ-პოლიმერულ აკუმულატორებთან შედარებით, მაღალ ტემპერატურასაც უძლებენ. კერძოდ, ლითიუმ-რკინის ფოსფატის აკუმულატორებს არ აშინებს 300-500 გრადუსამდე გადახურება. უფრო მეტიც, ასეთი აკუმულატორები მყისიერად 700 გრადუსამდე გადახურებასაც იტანს. და, რაც ყველაზე მთავარია, ასეთი აკუმულატორები, სხვებთან შედარებით, სწრაფადაც იმუხტება.

”ატომიკ 500” ჰეჩბეკ 500-ის ბაზაზე შექმნილი მეორე ელექტრომობილია, რომელიც ”ფიატისგან” დამოუკიდებლად შეიმუშავეს. პირველი შარშან შვედურმა კომპანია ”ავტოადაპტმა” წარმოადგინა და მის მანქანას ”ფიატ 500 EV ადაპტი” ერქვა. წელს კი, დეტროიტის ავტო შოუზე, თავად ”ფიატმა” გაგვაცნო ელექტრული ”ჩინკვეჩენტოს” მისეული კონცეპტუალური ხედვა, სახელად ”ფიატ 500 BEV”.

მაგრამ დტროიტში ტურინელებმა გამოაცხადეს, რომ 500 BEV-ის წარმოების გეგმა ჯერჯერობით არ აქვთ. ეს კონცეპცია მხოლოდ საცდელია და მხოლოდ საზოგადოებრივი აზრის შესასწავლად დამზადდა. თუმცა, გამორიცხული არაა, რომ ოდესღაც მისი სერიული ვერსიაც ვიხილოთ. ”ატომიკი” კი თავისი ელექტრომობილის წარმოებას აპირებს. თუმცა, მხოლოდ 50 ცალი ”ატომიკ 500-ის” დამზადებას გეგმავს...

მოტოკომბინეზონი უსაფრთხოების ბალიშებით

Alpinestars' airbag riding suit

30 აპრილი

ამერიკულმა კომპანია ”ალპინსტარზმა”, რომელიც სპორტული ავტო და მოტოეკიპირების წარმოებაზეა სპეციალიზებული, დაამზადა მოტოსპორტული კომბინეზონი ”ტექ ეარ რეის”, რომელშიც უსაფრთხოების ბალიშებია ჩამონტაჟებული და მოტოციკლისტებს ავარიის დროს მძიმე ტრავმებისგან იცავს. უსაფრთხოების ბალიშების გარდა, კომბინეზონს ჩაკერებული აქვს სპეციალური მოწყობილობა, რომელიც სამაშველო სამსახურებს ინციდენტის ზუსტ კოორდინატებს აწვდის.

უსაფრთხოების სისტემა სამართავი მოდულის, შვიდი სენსორის, ორი ტუმბოსა და მცირე აკუმულატორებისგან შედგება, რომლებიც მთელი ამ სისტემის მუშაობას უზრუნველყოფს. სენსორები მოტოციკლისტის მოძრაობას აკონტროლებენ, ტომბობი კი საჭიროების შემთხვევაში, ბალიშებს აზოტით ტუმბავენ. ჩამონათვალი საკმაოდ დიდია, თუმცა მთლიანობაში უსაფრთხოების მთელი სისტემა მხოლოდ ნახევარ კილოგრამს იწონის.

”ალპინსტარზის” მიერ გამოქვეყნებულ რელიზში აღნიშნულია, რომ უსაფრთხოების სისტემის ტვინისთვის შემუშავდა მუშაობის სპეციალური ალგორითმული სისტემა, რომელიც ბალიშებს თვითნებურად დაბერვის საშუალებას არ აძლევს. რაც მთავარია, ის ავარიის გარდუვალობას 8 მილიწამით ადრე ხვდება.

კომბინიზონის შესაქმნელად მუშაობისას, ”ალპინსტარზის” სპეციალისტებმა ბევრი საგზაო შემთხვევა შეისწავლეს და დაადგინეს, რომ ავარიების შედეგად, მოტოციკლისტებს ყველაზე ხშირად ხელები და მხრები უზიანდებათ. ამიტომ, მათ პიტვრლ რიგში, სწორედ სხეულის ამ ნაწილების დაცვაზე იზრუნეს. მაგრამ კომპანიის წარმომადგენლები ირწმუნებიან, რომ ბალიშების რაოდენობის გაზრდა პრობლემას არ წარმოადგენს და რომ მთელი სხეულის თანაბრად დაცვაც შესაძლებელია.

კომბინეზონის უსაფრთხოების ბალიშები ავარიაზე 50 მილიწამში რეგულირებს. ამასთან, ისინი მაქსიმალურ წნევის 5 წამის განმავლობაში ინარჩუნებენ. ბალიშების სრული ჩაფუშვა კი გაბერვიდან 20 წამის შემდეგ ხდება. სხვათა შორის, სპეციალური სერვისის გარეშე, უსაფრთხოების სისტემა ორ ავარიაზე მუშაობს. პირველი ავარიის შემდეგ, სისტემას დამუხტვა სჭირდება, მეორის შემდეგ კი შესაცვლელი ხდება.

”ალპინსტარზი” თავისი კომბინეზონების გაყიდვას ამერიკაში მერმისს ზაფხულში დაიწყებს. მისი სავარაუდო ღირებულება კი 2 500 დოლარი იქნება.

”ჰიუნდაის” ზედიზედ მეორე მსოფლიო პრემიერა

World Premiere of the All-New Hyundai Elantra/Avante

30 აპრილი

ბუსანში მიმდინარე საავტომობილო შოუზე, სამხრეთკორეულმა ავტოგიგანტმა ”ჰიუნდაიმ” თავისი ყველაზე პოპულარული მოდელის, ”ელანტრას” (კორეაში ამ ავტომობილს ”ავანტეს” სახელით იცნობენ) მეხუთე თაობის მსოფლიო პრემიერა ჩაატარა. ამ სახელით, კომპაქტური ავტომობილის წარმოება ”ჰიუნდაიმ” 1990 წელს დაიწყო და მას შემდეგ, მთელს მსოფლიოში 6 მილიონზე მეტი ”ელანტრა” გაჰყიდა.

ახალი ”ელანტრა” ძირეულადაა შეცვლილი, მისი დიზაინი კი ”ჰიუნდაის” ახალ კორპორატიულ სტილშია შესრულებული, რომელიც უკვე ახალ ”სონატასა” და ”აქცენტზე” (ერთი კვირით ადრე, პეკინის ავტო შოუზე) ვიხილეთ. და უნდა ითქვას, რომ ეს ახალი სტილი ყველაზე მეტად სწორედ ”ელანტრას” მოუხდა. კორეული კომპანიის განმარტებით, ახალ ”ელანტრას” ”თხიერი სკულპტურა” გამოარჩევს, რაც საუკეთესოდ მიესადაგა ოთხკარიანი კუპეს სტილს და რთული ფორმის, დიდრონ ფარებს.

გამოფენაზე სალონის ყველა შუშა გაუმჭვირვალე იყო - ”ჰიუნდაი” ჯერ მზად არაა იმისათვის, რომ ახალი ავტომობილის ინტერიერი გვიჩვენოს. თუმცა, გამოქვეყნებულ პრეს რელიზში აღნიშნულია, რომ ”ახალი ”ელანტრას” სალონში ისეთ რამეებს ვნახავთ, რაც ამავე კლასის სხვა კომპაქტურ ავტომობილებში ჯერ არავის გამოუყენებია”. გავრცელებული ინფორმაციით, სალონის სიახლეებს შორის იქნება უკანა სავარძლების გამათბობლები და ცენტრალურ პანელზე მოთავსებული ფერადი საინფორმაციო მონიტორი, რომელზეც უამრავი ინფორმაციის გამოტანა იქნება შესაძლებელი.

ბუსანში წარმოდგენილი ”ელანტრა” აღჭურვილია სერია ”გამა GDI-ს” (GDI - გაზოლინ დირექტ ინჯექშნ - ბენზინის უშუალო შეფრქვევა) 1.6-ლიტრიანი ძრავით, რომელიც მაქსიმუმ 140 ცხენის ძალასა და 167 ნიუტონმეტრს გამოიმუშავებს. ძრავთან შეწყვილებულია 6-საფეხურიანი ავტომატური კოლოფი. ”ჰიუნდაის რელიზში მითითებულია, რომ კორეაში ეს პირველი შემთხვევა იქნება, როდესაც კომპაქტურ ავტომობილზე, GDI ტექნოლოგიის ძრავს 6-საფეხურიანი ავტომატს შეუწყვილდება. იმავე რელიზის მიხედვით, ეს ტანდემი ავტომობილს, მის ყველაზე ეკონომიურ კონკურენტებზე 10 პროცენტით ეკონომიურს ხდის.

”ახალი ”ავანტე” (ელანტრა) კიდევ ერთხელ წარმოაჩენს ”ჰიუნდაის” ამბიციას, რომ კომპაქტურ კლასში საუკეთესო სტილისა და დინამიკის მქონე ავტომობილებს აწარმოებდეს. დარწმუნებული ვართ, რომ ამ ავტომობილით, მთელი მსოფლიოს მასშტაბით, კომპაქტურ კლასში ახალ სტანდარტს დავამკვიდრებთ”, - პრეზენტაციის დროს განაცხადა ”ჰიუნდაის” გლობალური ბიზნესის დივიზიონის პრეზიდენტმა და მთავარმა აღმასრულებელმა სტივ იანგმა.

კორეაში ახალი ავტომობილი ”ავანტეს” სახელით გაიყიდება, ევროპაში კი სახელად შესაძლოა ისევ ”ელანტრა” დაუტოვონ. თუმცა, გამორიცხული არაა, რომ სახელი ინდექს i-თ შეუცვალონ. ოღონდ, ინდექსს რა რიცხვი მოჰყვება (35, ან 40), ეს ჯერ უცნობია. კორეაში ახალი ”ავანტეს” გაყიდვას ”ჰიუნდაი” ზაფხულის შემდეგ დაიწყებს, ევროპასა და სხვა ბაზრებზე ის მოგვიანებით გამოჩნდება. საქართველოს ბაზარს კი ალბათ მომავალი წლის დასაწყისში ეწვევა.

”კრაისლერმა” ”სებრინგს” სახელს გამოუცვლის

Nassau will be Chrysler's replacement for Sebring

29 აპრილი

კრაისლერ 200C

.............................................

სააგენტო დეტროიტ ფრი ნიუსის ცნობით, ამ წლის ბოლოს, ”კრაისლერი” საშუალო ზომის სედანს, უკვე ძალიან დაძველებულსა და მობეზრებულ ”სებრინგს” ახალი მოდელით ჩაანაცვლებს და მას სახელსაც შეუცვლის. ახალი ავტომობილის სავარაუდო სახელი კი ”ნასაუ” გახდება.

პირველად სახელი ”ნასაუ” ამერიკულმა კომპანიამ სამი წლის წინ, დეტროიტის საავტომობილო შოუზე ნაჩვენები კონცეპტუალური მოდელისთვის გამოიყენა, რომელსაც ეგრეთ წოდებული ”შუტინგ ბრეიკ” ტიპის ძარა ჰქონდა, რომელიც ევროპული კლასიფიკაციით ჰეჩბეკის ტიპის ძარას ჰგავს. ეს სახელი ”კრაისლერმა” სპეციალურად, კონცეპტუალური მოდელისთვის დაარეგისტრირა და ანალიტიკოსების ინფორმაციით, ამჟამადაც მას ეკუთვნის. ა,იტომ, სრულიად ლოგიკურია, რომ ამერიკული კომპანია სწორედ მას გამოიყენებს.

კრაისლერ ნასაუ

..........................................

მართალია, ახალი ავტომობილი სახელს სამი წლის წინანდელი პროტოტიპისგან მიიღებს, თუმცა ამ ორ ავტომობილს საერთო არაფერი ექნება. სამაგიეროდ, გარეგნულად ის კომპანიის კიდევ ერთ კონცეპტუალურ ავტომობილს, დეტროიტში შარშან ნაჩვენებ 200С-ს დაემსგავსება.

ამ ავტომობილის დიზაინმა დეტროიტში სპეციალისტებიც და დამთვალიერებლებიც მოხიბლა. თავისი გაბარიტებით ის ახლოსაა ”ბეემვეს” მე-5 სერიის სედანთან. წამყვანი ბორბლებიც მასაც უკანა აქვს. კონცეპტუალური ავტომობილი ჰიბრიდული სისტემით იყო აღჭურვილი, რომლის ჯამური სიმძლავრეც 268 ცხენის ძალას აღწევდა.

”სებრინგის” შემცვლელის წარმოებაში ფართოდ გამოიყენებენ ”ფიატის” ტექნოლოგიებს. კერძოდ, იტალიური იქნება ავტომობილის პლატფორმა, რომელსაც ”ალფა რომეოს” დიდი ზომის სედანისგან აიღებენ. მყიდველს ორი ტიპის, 4 და 6-ცილინდრიანი ბენზინის ძრავებით აღჭურვილ ავტომობილს შესთავაზებენ. ამასთან, ძრავების გამას შემდგომში დიზელის აგრეგატებიც დაემატება.

”სებრინგის” შემცვლელი, ”კრაისლერის” მარკით მხოლოდ აშშ-ში გაიყიდება. ანალოგიურ ავტომობილს ევროპელი მყიდველი ”ლანჩას” მარკით მიიღებს და შესაბამისად, ის იტალიური კომპანიის (რომელიც ფიატ-ის ჯგუფში შედის) კორპორატიული სტილის შესაბამის დიზაინს მიიღებს.

სავარაუდოდ, ახალი ავტომობილი ”კრაისლერის” დილერთა შოურუმებში მერმისს გამოჩნდება.