”ჰიუნდაი ველოსტერი” პარიზული დებიუტისთვის ემზადება

Hyundai Veloster

12 ივნისი

კორეული კომპანია ”ჰიუნდაი” წარმოებისთვის სრულიად ახალ მოდელს, სპორტულ ”ველოსტერს” ამზადებს. ავტომობილი ამჟამად საგზაო გამოცდებს გადის და ის პაპარაცებმა სწორედ ტესტირების დროს, კამუფლირებულ ფორმაში დააფიქსირეს. მართალია, ავტომობილი გარეგნულად შენიღბულია, მაგრამ ასეც ადვილად ჩანს, რომ გარეგნულად ის იმ კონცეპტუალურ ავტომობილს დაემსგავსება, რომელიც ”ჰიუნდაიმ” ოთხი წლის წინ, სეულის საავტომობილო შოუზე გამოფინა.

კონცეპტუალური მოდელი კი ელეგანტური დიზაინით გამოირჩევა. მას მხოლოდ ორი კარი აქვს, ძარა კი ეგრეთ წოდებული ფასტ ბეკის ტიპისაა. მისი სახურავი ოდნავაა დახრილი და ძრავის მაღალ კაპოტში გადადის. წინიდან და უკნიდან, ავტომობილი დიდრონი ფარებით გამოირჩევა. ამ მანქანით, ”ჰიუნდაი” თავის პოპულარულ სპორტულ მოდელ ”კუპეს” (ზოგიერთ ბაზარზე ის ტიბურონის სახელითაა ცნობილი) შეცვლის.

”ჰიუნდაი ველოსტერი” ბენზინის 1.6-ლიტრიანი ძრავით აღიჭურვება, რომელიც 121 ცხენის ძალას და 155 ნიუტონმეტრს გამოიმუშავებს. მოგვიანებით, ამავე ავტომობილზე, იგივე ლიტრაჟის ტურბოძრავსაც დააყენებენ, რომლის სიმძლავრეც, მინიმუმ 175 ცხენის ძალა იქნება.

ამ ავტომობილის შესახებ დაწვრილებით ინფორმაციას კორეული კომპანია პარიზულ დებიუტამდე რამდენიმე დღით ადრე გამოაქვეყნებს.

”სუზუკი სვიფტი” ზომებში გაიზარდა

Suzuki Swift

11 ივნისი

ოაპონურმა კომპანია ”სუზუკიმ” ინტერნეტით თავის პოპულარულ კომპაქტურ ჰეჩბეკ ”სვიფტის” ფოტოები და ტექნიკური მონაცემები გაავრცელა. ახალი ავტომობილი მის წინამორბედზე გრძელი, ფართე და იმავდროულად, მსუბუქიცაა. ახლის პლატფორა და ბაზა ძველისაზე სესაბამისად, 0.09 და 0.05 მეტრით გრძელია.

ახალი ”სვიფტი” სრულიად ახალ, ბენზინის 1.2-ლიტრიან ძრავს მიიღებს, რომლის სიმძლავრეც 92 ცხენის ძალა, მაქსიმალური მაბრუნი მომენტი კი 120 ნიუტონმეტრია. ძრავთან შესაწყვილებლად განკუთვნილია როგორც მექანიკური, ასევე ავტომატური კოლოფი. კომპანიის მიერ გავრცელებული ინფორმაციის შესაბამისად, ძრავის ხარჯი 100 კილომეტრზე 4.2 ლიტრს შეადგენს, ყოველ კილომეტრზე კი ის ატმოსფეროში 116 გრამ CO2-ს გამოჰყოფს.

ცოტა ხანში კი, ახალი ”სვიფტისთვის” კომპანია 1.3-ლიტრიან დზელის ძრავის მოდიფიცირებას დაასრულებს, რომლის საწვავის ხარჯიც სულ რაღაც 3.5 ლიტრი (100 კმ-ზე), გამონაბოლქვში CO2-ის შემცველობა კი 109 გრამია (ყოველ კილომეტრზე). გარდა ამისა, 2011 წელს კომპანია სპორტულ ”სვიფტსაც” გამოუშვებს, რომელიც 1.6-ლიტრიანი ძრავით აღიჭურვება.

ახალი ”სვიფტის” წარმოებას ”სუზუკი” პარიზული ავტოგამოფენის შემდეგ დაიწყებს და ფასსაც მაშინ დაასახელებს. სავარაუდოდ, ჰეჩბეკის საბაზო, ყველაზე იაფი ვერსია 13 000 ევრო ეღირება.

”მინი” შვიდადგილიან ”ქანთრიმენზე” მუშაობს

MINI Countryman

11 ივნისი

პოპულარულ რეტრო ჰეჩბეკების მწარმოებელმა ბრიტანულმა კომპანია ”მინიმ” ქროსოვერ ”ქანთრიმენის” დაგრძელებული ვერსიის წარმოება გადაწყვიტა, ავტომობილისა, რომელსაც შვიდი ადგილი (მათ შორის, მძღოლისაც) ექნება. ეს ქროსოვერი ”მინის” სამოდელო გამაში ისედაც ყველაზე ტევადი ავტომობილია და ამიერიდან, ის კიდევ უფრო გაიზრდება, სახელში კი ”პლუს” დაემატება.

”მინის” მთავარ ბრენდ მენეჯერის, დოქტორ ვოლფგანგ არმბრეხტის განცხადებით, ”ქანთრიმენის” ბორბლებს შორის ბაზა 2.591 მეტრია, ”ქანთრიმენ პლუსისთვის” კი ის 2.713 მეტრამდე გაიზრდება. შესაბამისად, გაიზრდება ავტომობილის სიგრძეც.

ამგვარად, ”მინი” თანდათან ცდილობს თავისი ავტომობილების გაბარიტების გაზრდას. სხვათა შორის, ინტერნეტით ვრცელდება ინფორმაცია იმის შესახებ, რომ შემდეგ საბაზო ჰეჩბეკიც ზომებში მოიმატებს.

რაც შეეხება შვიდადგილიან ”ქანთრიმენ პლუსს”, სავარაუდოდ ბაზარზე ის კონკურენციას ისეთ პოპულარულ ავტომობილებს გაუწევს, როგოებიცაა ”ტოიორას” RAV4 და ”ჰონდას” CR-V.

”რენო ლატიტუდი” - ბიზნეს კლასის სედანი

Renault Latitud

11 ივნისი

”რენო” წარმოებისთვის ამზადებს ბიზნეს კლასის სედან ”ლატიტუდს”, რომლის მსოფლიო პრემიერაც, რატომღაც პარიზის საავტომობილო შოუმდე რამდენიმე დღით ადრე, მოსკოვის ავტო შოუზე შედგება.

ახალი სედანის გაბარიტებია: სიგრძე 4.89 მეტრი, სიგანე 1.83 მეტრი, სიმაღლე კი - 1.49 მეტრი. ის ”რენოს” ”სამხრეთკორეული შტოს, ”სამსუნგის” უახლეს ბიზნეს სედან SM5-ის ბაზაზეა შექმნილი, რომლის გაყიდვებიც კორეაში ახლახანს დაიწყო.

ჯერჯერობით, ფრანგული კომპანია სედან ”ლატიტუდის” ტექნიკურ მონაცემებს არ აქვეყნებს. სამაგიეროდ ცნობილია, რომ დამატებითი მოწყობილობები, პირველ რიგში, ავტომობილის კომფორტის გაზრდისთვისაა მოწოდებული. ასეთ მოწყობილობათა შორისაა ჰაერის ორრეჟიმიანი იონიზატორი, რომელსაც ორმაგი არომატიზატორი აქვს, მძღოლის სავარძელი, რომელსაც მასაჟის ფუნქციაც გააჩნია, სამზონიანი კლიმატ კონტროლი, კომპანია ”ბოსეს” აუდიოსისტემა და ავტომობილში შეღწევის უკონტაქტო სისტემა.

საერთაშორისო ბაზარზე, სედანი ”ლატიტუდი” ფრანგული კომპანიის ფლაგმანი გახდება. პარიზული გამოფენის შემდეგ, ის ერთდროულად ევროპის, აზიის, მექსიკის, აფრიკისა და ავსტრალიის ბაზრებზე გამოჩნდება.

”ფიატი” ახალ, ზეეკონომიურ ჰიბრიდულ აგრეგატს ქმნის

Fiat’s 80g/km baby hybrid

11 ივნისი

”ფიატი” თავისი კომპაქტური ავტომობილებისთვის სრულიად ახალ, კომპაქტურსა და მეტად ეკონომიურ ჰიბრიდულ დანადგარს ქმნის. ბრიტანულ გამოცემა ”ავტოქარის” მიერ გავრცელებული ინფორმაციით, ჰიბრიდულ სისტემაში შევა სერია ”ტვინ ეარის” ორცილინდრიანი ბენზინის ძრავი (მუშა მოცულობა 0.9 ლიტრი), ელექტროძრავი და გადაცემათა კოლოფი, რომელსაც ძრავთან ორდისკოიანი ქურო დააკავშირებს.

იმისათვის, რომ დანადგარის კომპაქტურობა უზრუნველყონ, ”ფიატის” იჟინრებმა გადაწყვიტეს, რომ ელექტროძრავი, რომელიც ავტომობილის მცირე სიჩქარით მოძრაობას უზრუნველყოფს, გადაცემათა კოლოფის კორპუსში შეეტანათ. ჯერჯერობით, ჰიბრიდული სისტემის სიმძლავრე არ გამოქვეყნებულა. სამაგიეროდ, ”ავტოქარი” გვაუწყებს, რომ ეს აგრეგატი ყოველ კილომეტრზე გარემოს მხოლოდ 80 გრამი СО2-ით აბინძურებს.

არაოფიციალური მონაცემებით, ამ ძრავის ყოველმხრივი ტესტირების შემდეგ, ტურინში მწვანე შუქს აუნთებენ პროექტ ”ფიატ ტოპოლინოს” (ტოპოლინო იტალიურად პატარას ნიშნავს), რომელიც ორი წლის წინ შემუშავდა, მაგრამ ჯერაც თაროზეა შემოდებული.

”ფიატს” ჯუჯა მოდელ ”ტოპოლინოს” წარმოება წელს უნდა დაეწყო, მაგრამ ეკონომიკური კრიზისის გამო, პროექტის განხორციელება გაურკვეველი დროით გადაისო. არაა გამორიცხული, რომ ახალი, კომპაქტური ჰიბრიდული სისტემით პირველად სწორედ ”ტოპოლინო” აღიჭურვოს, რომლის სავარაუდო სიგრძე 3.2 მეტრია. ”ტოპოლინოს” გარდა, იგივე სისტემას ჰეჩბეკ 500-ზე, ”პანდასა” და ახალ ”პუნტოზეც” გამოიყენებენ.

”აუდიმ” ელექტრული e-ტრონის ტესტირება დაიწყო

Audi e-tron

10 ივნისი

”აუდი” უკვე შეუდგა სპორტულ ელექტრომობილ e-ტრონის საგზაო ტესტირებას, ავტომობილისა, რომლის კონცეპტუალური ვერსიაც შარშან, ფრანკფურტის საავტომობილო გამოფენაზე გვიჩვენა.

ელექტრომობილი სუპერ ავტომობილ R8-ს პლატფორმაზეა ბაზირებული და მისი მცირესერიული წარმოების დაწყებას გერმანული კომპანია 2012 წელს დაიწყებს. სავარაუდოდ, სერიული ავტომობილი იმავე აგრეგატებით აღიჭურვება, რომლითაც შედგა კონცეპტუალური მოდელის დებიუტი.

კონცეპტუალური e-ტრონი კი ოთხი ელექტროძრავითაა აღჭურვილი, რომლებიც თითო ბორბალს ემსახურება. მათი ჯამური სიმძლავრე კი 313 ცხენის ძალას აღწევს. ძრავებს ელექტროენერგიით ლითიუმ-იონური აკუმულატორების ბლოკი ამარაგებს, რომელთა ტევადობაც, ავტომობილს 248 კილომეტრის გასავლელად ჰყოფნის.

e-ტრონს ნულიდან 100 კმ/სთ-მდე აჩქარება 4.8 წამში შეუძლია, მისი მაქსიმალური სიჩქარე კი 200 კმ/სთ სიჩქარითაა შეზღუდული. ესეც მხოლოდ იმიტომ, რომ უფრო მაღალ სიჩქარეზე, ავტომობილის ენერგიის ხარჯი მნიშვნელოვნად იზრდება. აკუმულატორების დამუხტვა საყოფაცხოვრებო ელექტროქსელიდან შეიძლება, მათს სრულ დამუხტვას კი 8 საათი სჭირდება.

”აუდის” ექსტერიერების მთავარ დიზაინერ იოახიმ ბედშტაბნერს ნათქვამი აქვს, რომ გერმანული კომპანია სულ 1000 ცალი e-ტრონის წარმოებას გეგმავს. ამასთან, თითოეული მათგანი სუპერ ავტომობილ R8-ზე გაცილებით ძვირი ეღირება. თუმცა, ამის მიუხედავადაც, ”აუდის” მარკეტოლოგები იმედოვნებენ, რომ 1000 ცალი ელექტრომობილის გაყიდვა არ გაუჭირდებათ, რადგან მათს კომპანიას მთელს მსოფლიოში დაახლოებით 5000 დილერი ჰყავს.

და მაინც, ინგოლშტადტელები არ გამორიცხავენ, რომ მათს ელექტრომობილზე მიწოდება შეიძლება შეთავაზებაზე მეტი აღმოჩნდეს. ამ შემთხვევაში, ტირაჟი ოპერატიულად შეიკვეცება.

”პეინოს აბრუცი სპირიტ ოფ ლე მანს”

Panoz Abruzzi Spirit of Le Mans

10 ივნისი

ამერიკელი ბიზნესმენი დონალდ პეინოსი (რამდენადაც ის იტალიური წარმოშობისაა, მისი გვარი უნდა გამოითქმებოდეს, როგორც პანოცი) ცნობილია იმით, რომ ამერიკული ლე მანის სერიის ერთ-ერთი დამაარსებელი და საკუთარი სარბოლი გუნდის მფლობელია, რომელიც მუდმივად მონაწილეობს ლე მანის რბოლებში. მაგრამ აქამდე ის მხოლოდ სარბოლ ავტომობილებზე მუშაობდა და შეხება არ ჰქონია საგზაო ავტომობილებთან.

ახლა კი, ”პეინოს მოტორსპორტმა” დიდ ავტოინდუსტრიაშიც გადადგა პირველი ნაბიჯი - ლე მანის 24-საათიანი რბოლის სტარტამდე რამდენიმე დღით ადრე, საზოგადოებას თავისი პირველი საგზაო ავტომობილი - ”პეინოს აბრუცი სპირიტ ოფ ლე მანს” წარუდგინა.

ეს ავტომობილი ხელნაკეთია და ისევე როგორც ”პანოც-ის” სარბოლ ბოლიდებს, მასაც ძრავი წინ აქვს მოთავსებული, წონის ოპტიმალურად გასანაწილებლად კი, რადიატორი და განივი განლაგების გადაცემათა კოლოფი კი მანქანის უკანა ნაწილში მოთავსდა.

დონ პეინოსს თავისი პირველი საგზაო ავტომობილის დაწვრილებითი დახასიათება არ გამოუქვეყნებია, თუმცა, ჟურნალისტებს განუცხადა, რომ ”პეინოს აბრუცი სპირიტ ოფ ლე მანსი” 600-ცხენისძლიანი ძრავითაა აღჭურვილი, რომლის მაქსიმალური მაბრუნი მომენტიც 800 ნიუტონმეტრს აღწევს. დადასტურებული არაა, თუმცა ამ მწირი მახასიათებლების მიხედვით შეიძლება ვარაუდი, რომ ძრავს დამჭირხნი ემსახურება. რომელი ტიპის - ტურბო, თუ მექანიკური, ეს უცნობია.

ამ ავტომობილის შექმნისას, დონ პეინოსმა, უფრო სწორედ კი, მისმა ინჟინრებმა, გარემოს დაცვაზეც იზრუნეს. კერძოდ, ავტომობილის მზიდი სტრუქტურა ინოვაციური მასალებითაა შექმნილი და მას ავტორებმა REAMS (რისაიქლეიბლ ენერჯი აბსორბინგ მატრიც სისტემ - განახლებადი, ენერგიის შთანმთქმელი მატრიცული სისტემა) უწოდეს. როგორც სახელიდანაც ჩანს, საჭიროების შემთხვევაში, ეს სტრუქტურა თავის თავზე ღებულობს შეჯახების დროს გამოყოფილ ენერგიას და ამით, სლონში მყოფთ ტრავმებისგან იცავს.

სტრუქტურა მრავალშრიანი კომპოზიტია, რომელიც ისეთივე ხისტია, როგორც კარბონის კომპოზიტი, თუმცა მასზე მსუბუქიცაა. ამასთან, ის სრულიად განახლებადი მასალებისგან მზადდება, წარმოებისას და ექსპლუატაციისას, არ აქვს ამობურცვისადმი მიდრეკილება და არც მტვრევადია.

”პეინოს აბრუცი სპირიტ ოფ ლე მანს” ასევე გამოირჩევა გაგრილების სრულიად ახლებული, სამსაფეხურიანი სისტემით, რომელსაც კომპანიაში ”ტრიფექტაქულინგი” უწოდეს. ეს სისტემა სტანდარტულ რადიატორს იყენებს, მაგრამ მეორე და მესამე საფეხურების წყალობით, გამაგრილებელი სითხის ტემპერატურას დაბლა სწევს როგორც რადიატორის გამომშვებ, ასევე შემშვებ წერტილებში.

”პეინოს აბრუცი სპირიტ ოფ ლე მანსს” კომპანიის კორპორატიული სტილი აქვს შენარჩუნებული. კონკრეტულად კი, ის არამარტო თავისი შეთანწყობით ჰგავს სარბოლ ”პეინოსს”, არამედ დიზაინითაც. მსგავსება განსაკუთრებით თვალში საცემი კი ორივე ავტომობილის წინა ნაწილშია. საქმე უზარმაზარ ეხება ჰაერის ამღებს, რომელსაც ”ცხვირი” და ფრთა ოთხ ნაწილად ჰყოფს და ოთხი რადიატორის ეფექტს ქმნის.

დონ პეინოსი მხოლოდ 81 ცალი ”პეინოს აბრუცი სპირიტ ოფ ლე მანსის” დამზადებას აპირებს. ყველა ავტომობილი ექსკლუზიური, ერთმანეთისგან ძლიერ განსხვავებული იქნება, რადგან მათი დამზადებისას, მწარმოებელი შემკვეთის სურვილებს დააკმაყოფილებს. რატომ 81 და არა ერთით მეტი, ან ნაკლები? საქმე ისაა, რომ ამ ავტომობილის წარმოებას ”პეინოსი” 2013 წელს შეწყვეტს. და იმ დროისთვის, ლე მანის 24-საათიანი რბოლა 81-ედ ჩატარდება.

ფასი არ გამოცხადებულა. ისიც ალბათ ინდივიდუალური იქნება. სამაგიეროდ, მყიდველი თავის ავტომობილს საზეიმო ვითარებაში, სარტეს ლეგენდარულ ავტოდრომზე მიიღებს, სადაც ლე მანის რბოლა ტარდება ხოლმე. ამავე ტრასაზე, ”ბუგატის” სახელობის სეგმენტზე, სუპერ ავტომობილის მყიდველებს მართვის სპეციალური გაკვეთილები ჩაუტარდებათ. გარდა ამისა, ყველა მყიდველს საპატიო სტუმრის სტატუსით მიიწვევენ ლე მანის რბოლაზე. და თუ მათი სურვილი იქნება, ისინი რბოლის წინა ერთწრიან აღლუმშიც მიიღებენ მონაწილეობას.

”ასტონ მარტინს” სხვებმაც რომ მიბაძონ...

Fantasia: Bugatti EB1.2 TSI and Bentley Continental Super Mini

8 ივნისი

შარშან ”ასტონ მარტინმა” ყველა გაოცებული დატოვა, როდესაც საზოგადოებას თავისი ახალი გეგმის შესახებ ამცნო. გეგმა ”ტოიოტას” ჯუჯა ჰეჩბეკ iQ-ს ბაზაზე, პატარა ასტონის, სახელად ”სიგნიტ”, შექმნას ითვალისწინებდა. ეს განცხადება პირველ აპრილს არ გამოქვეყნებულა, მაგრამ ალბათ ბევრმა არ დაიჯერა, რომ ამგვარი რამ შესაძლებელი იყო.

მაგრამ ფრანკფურტის საავტომობილო შოუზე, საავტომობილო სამყარო რეალური ”სიგნიტის” კონცეპტუალური ვერსიის პრემიერის მომსწრე გახდა და რა თქმა უნდა, ამჯერად გამოქვეყნებულ რელიზებსაც და საკუთარ თვალებსაც ყველამ დაუჯერა.

რისთვის სჭირდება ”ასტონ მარტინს” ასეთი სათამაშოს, თუნდაც ძალიან მიმზიდველისა და სასურველის, გამოშვება? ვითომ იმისათვის, რომ თავისი პროდუქცია იმ ადამიანებისთვისაც ხელმისაწვდომი გახადოს, ვისაც ჩვეულებრივი (უფრო სწორედ, არაჩვეულებრივი) ასტონების შეძენა არ შეუძლია? მაგრამ ამ კითხვაზე პასუხი თავად ინგლისურმა კომპანიამ ფრანკფურტშივე გასცა, როდესაც გამოაცხადა, რომ ”სიგნიტს” პირველ რიგში, სხვა, ძვირადღირებული ”ასტონ მარტინების” მყიდველები შეიძენენ, რომლებისთვისაც, სუპერავტომობილებით ქალაქის ქუჩებში მოძრაობა პრობლემურია.

”სიგნიტის” წარმოების დაწყების აუცილებლობის მეორე ვარაუდი გაცილებით პრაგმატულია და ამის მთავარი მიზეზი ისაა, რომ მალე ავტომწარმოებლებს ევროპის ბაზარზე გამონაბოლქვთან დაკავშირებით, უმკაცრეს სტანდარტებს დაუწესებენ. და ვინც ამ სტანდარტებში ვერ ჩაეტევა, მის მიერ წარმოებულ ავტომობილებზე საჯარიმო გადასახადების გადახდა მოუწევს. ეს კი მათს პროდუქციას გააძვირებს.

”სიგნიტს” კი ”ასტონ მარტინის” მიერ წარმოებული ავტომობილების გამონაბოლქვში ნახშირორჟანგის შემცველობის საშუალო მაჩვენებლის მნიშვნელოვნად შემცირება შეუძლია. ასე კი, სუპერ ავტომობილების ფასების მწვერვალებისკენ გაქცევა აღიკვეთება.

ჰოდა, თუ ასეა, რატომ არ უნდა მიბაძონ ”ასტონ მარტინს” იმ კომპანიებმაც, რომლებიც სუპერ ავტომობილების სეგმენტში მუშაობენ? ამისათვის ხომ ”ფერარის” შესანიშნავი ბაზა გააჩნია ”ფიატის” სახით. ხომ შეიძლება, პოპულარულ ”ჩინკვეჩენტოს” ტიუნინგი მარანელოში ჩაუტარდეს და ”აბარტის” მორიელის ნაცვლად, ყალყზე შემდგარი კვიცით დამშვენდეს?

არავინ იცის, ეს მოხდება, თუ არა. სამაგიეროდ, ჰოლანდიურ საავტომობილო ბლოგ ”ავტობლოგის” ერთ-ერთმა მკითხველმა იასპერ ფან დერ ჰაიდენმა საინტერესო სამუშაო შეასრულა და ამავე ბლოგს მის მიერ შესრულებული ორი ესკიზი გაუგზავნა. ამ ესკიზებზე კი ”ბუგატის” და ”ბენტლის” მინი ჰეჩბეკებია გამოსახული.

თუ ნახატებზე გამოსახული ავტომობილების პროპორციების მიხედვით ვიმსჯელებთ, ორივე ”ფოლკსვაგენ პოლოს” (იგივე სეატ იბისას, ან შკოდა ფაბიას) ბაზაზე შექმნას ითვალისწინებს. მოკლედ, ჰოლანდიელი დიზაინერის ვერსიით, მინი ”ბუგატიც” და ”ბენტლიც” ”ასტონის” ”სიგნიტზე” დიდები იქნება.

ნეტავ, ფან დერ ჰაიდენის ეს საინტერესო ესკიზები ვოლფსბურგული საავტომობილო დიდი ოჯახის (რომლის წევრებიც არიან ბუგატი და ბენტლი) მესვეურებს თუ დააინტერესებს?

შენიშვნა: წყარო საიტი http://carscoop.blogspot.com

http://carscoop.blogspot.com/2010/06/fantasia-bugatti-eb12-tsi-and-bentley.html

”პოლო სედანი” – ”ფოლკსვაგენის” მომავალი ბესტსელერი

VW Polo Sedan

7 ივნისი

უკვე რამდენიმე წელია, რაც ”რენომ” იაფფასიან მოდელ ”ლოგანის” წარმოება დაიწყო და ეს ექსპერიმენტი იმდენად წარმატებული გამოდგა, რომ მის მიბაძვას უკვე თითქმის ყველა დიდი და ამბიციური ავტომწარმოებელი ცდილობს. რა თქმა უნდა, ასეთებს შორისაა ”ფოლკსვაგენიც”, რომელმაც ახლახანს, მოსკოვში თავისი ახალი ავტომობილის, იაფფასიან ”პოლო სედანის” პრეზენტაცია მოაწყო.

მისი დაარსების დღიდან, ვოლფსბურგული გიგანტი ”სახალხო ავტომობილის” მწარმოებლადაა მიჩნეული. ჯერ ერთი, მას ასეც ჰქვია - ფოლკს სახალხოს ნიშნავს, ვაგენი კი ავტომობილია. მეორეც, ”ფოლკსვაგენები” ყოველთვის ხელმისაწვდომი ფასით გამოირჩეოდნენ. მაგრამ დრომ თავისი მოიტანა - ვოლფსბურგელთა ყველაზე პოპულარული ავტომობილები თანდათან ზომებშიც გაიზარდნენ და თვისობრივადაც პრემიუმ კლასს მიუახლოვდნენ. მართალია, ”ფოლკსვაგენი” ჯერაც არაა ავტო ინდუსტრიის ელიტის წევრი. მაგრამ მისი პროდუქცია ამ კასტას აშკარად შეესაბამება, ამის პირდაპირი შედეგი კი ფასების განუხრელი ზრდა და ამ მხრივაც, შედეგი პრემიუმ კლასთან მიახლოებაა. შესაბამისად, ფასები კიდევ უფრო ზევით მიიწევს...

ამ ტრენდის შეცვლის, ან ყოველ შემთხვევაში, ”სახალხოს” იმიჯის შენარჩუნების, ან თუ გნებავთ, ”რენოს” მიერ დაწყებული ახალი ტრენდისთვის ფეხის აყოლების ვოლფსბურგულ ვერსიას კი ”ფოლკსვაგენ პოლო სედანი” ეწოდა.

თავიდანვე უნდა ითქვას, რომ ეს გლობალური მოდელია. ანუ, ვოლფსურგელები მის მთელს მსოფლიოში, პირველ რიგში კი სწრაფად განვითარებადი ქვეყნების ბაზრებზე გაყიდვას აპირებენ. რა თქმა უნდა, მათთვის ყველაზე მნიშვნელოვანი ამ მხრივ, ჩინური ბაზარია, მაგრამ რატომღაც ისე მოხდა, რომ მისი წარმოება პირველად ”ფოლკსვაგენმა” რუსეთში დაიწყო. ალბათ ამის გამო იყო, რომ იქაურმა ჟურნალისტებმა ავტომობილს ”რუსული ფოლკსვაგენი” უწოდეს.

აქვე ისიც უნდა ითქვას, რომ თუ ევროპაში ”ფოლკსვაგენის” ავტომობილები თანდათან ძვირდება, ლათინური ამერიკის ქვეყნებში ის კვლავაც ჰყიდის იაფფასიან მოდელებს - ”ფოქსს”, ”გოლსა” და ”ვოიაჯერს”. მაგრამ რატომღაც, ეს ავტომობილები სხვა ბაზრებზე არ გააქვს და თუ გააქვს კიდეც, ისინი სხვაგან ფეხს ვერ იკიდებენ. ჰოდა, ”პოლო სედანს” სწორედ ის მისია აკისრია, რომ მსოფლიოს ყველა მნიშვნელოვან ბაზარს ერთნაირი წარმატებით მოერგოს.

გერმანული კომპანიის განცხადებით, ”პოლო სედანი” სამოდელო გამაში, ორი პოპულარული სედანის - ”პასატისა” და ”ჯეტას” დაბლა არსებულ ნიშას დაიკავებს. ამგვარად, როგორც სახელიდანაც შეიძლება ვივარაუდოთ, ის ჰეჩბეკ ”პოლოს” შესაბამისი სედანია, თუმცა ამ ავტომობილზე დიდი გაბარიტებით გამოირჩევა. მისი სიგრძე 4.384 მეტრია, უფრო მეტი, ვიდრე მეოთხე თაობის ”გოლფის” ბაზაზე შექმნილ ”ბორას” (იგივე ჯეტას) ჰქონდა. სიგანე 1.699 მეტრამდე გაიზარდა (ჰეჩბეკ პოლოსი - 1.682 მეტრია), ბაზა - 2.552 მეტრამდე (ჰეჩბეკისა - 2.470 მეტრია). ”პოლო სედანის” სიმაღლე 1.463 მეტრია, საბარგულის მოცულობა კი - 460 ლიტრი.

რა თქმა უნდა, ახალი ავტომობილის გარეგნობაზე მუშაობას, სახელოვანი დიზაინერი ვალტერ დე სილვა უძღვებოდა. მისი დამსახურებაა ის, რომ ”პოლო სედანს” სადა და, შეიძლება ითქვას, დაუწუნარი გარეგნობა აქვს. ის აშკარად არ გამოირჩევა ექსტრავაგანტურობით, თუმცა ეს არც მოეთხოვება. სამაგიეროდ, თავისუფლად აკმაყოფილებს კორპორატიული სტილის მოთხოვნებს - ემბლემის გარეშეც, მასში ადვილად ამოიცნობთ ვოლფსბურგული ოთხბორბლიანების ოჯახისადმი კუთვნილებას.

”პოლო სედანის” ინტერიერიც მისი გარეგნობის მსგავსად, უბრალო და კოხტაა. რაც მთავარია, ის ”ფოლკსვაგენის” სტილშია შესრულებული. აქ ვერც კონდიციონერს ნახავთ, ვერც მაგნიტოლას და კომფორტისთვის საჭირო სხვა რამეებს - ესენი ხომ ავტომობილს ძალიან გააძვირებენ. სამაგიეროდ, მსურველს მათი დამატებითი ოპციის სახით შეკვეთით შეძენა შეუძლია. მთავარია, რომ ასე ვოლფსბურგელები საბაზო ფასის 10 000 ევროს სიახლოვეს შენარჩუნებას ახერხებენ. და თუ ვინმეს მეტი მოუნდება, თავის სურვილს ჩვეულებრივი შეკვეთით დაიკმაყოფილებს და მეტსაც გადაიხდის.

ჯერჯერობით, ”პოლო სედანისთვის” მხოლოდ ერთი, ბენზინის 1.6-ლიტრიანი ძრავია გათვალისწინებული, რომელიც სულ რაღაც, 105 ცხენის ძალას გამოიმუშავებს. მყიდველის სურვილის შესაბამისად, მას ან 5-საფეხურიანი მექანიკური, ან 6-საფეხურიანი ავტომატური კოლოფი შეუწყვილდება. რა თქმა უნდა, ძრავი საკმაოდ სუსტია და აქედან გამომდინარე, ავტომობილი ტემპერამენტულობით ვერ დაიკვეხნის - ადგილიდან 100 კმ/სთ სიჩქარის ასაკრეფად, მას 10.5 წამი სჭირდება. სამაგიეროდ, ის ეკონომიურია - შერეული ციკლით მოძრაობისას, 100 კილომეტრის გასავლელად, 6.5 ლიტრი ბენზინი ჰყოფნის. თუ გავითვალისწინებთ, რომ ”პოლო სედანის” საწვავის ავზის მოცულობა 55 ლიტრია, გამოდის რომ, მისი ერთი სრული გაწყობით, 700 კილომეტრზე მეტის გავლაა შესაძლებელი.

10 000 ევროს საფასურად, ”პოლო სედანის” საბაზო ვერსიას (ტრენდლაინ) შეიძენთ, რომლის კომპლექტაციაშიც შედის: ორი ცალი უსაფრთხოების ბალიში, შუშის ელექტროამწევები და საბორტო კომპიუტერი. სამაგიეროდ, კონდიციონერის გარდა, აქ ვერც ბლოკირების საწინააღმდეგო სისტემას ნახავთ. თუმცა, ჩამოთვლილთაგან ზოგიერთი მოწყობილობა ”პოლო სედანის” კომპლექტაცია ”კომფორტლაინის” პაკეტში შევა. კიდევ უფრო მდიდრული აღჭურვილობით და რა თქმა უნდა, გაზრდილი ფასით, კომპლექტაცია ”ჰაილაინი” გამოირჩევა. სხვათა შორის, მისი ფასი იმდენად მაღალია, რომ ”გოლფის” კლასის ავტომობილებისას უახლოვდება.

სამწუხაროდ, საქართველოს ბაზარზე ”პოლო სედანის” შემოყვანას, ”ფოლკსვაგენის” დისტრიბუტორი, კომპანია ”კრეს ავტოჰაუსი” ჯერჯერობით არ გეგმავს.

”აუდის” დიზელისძრავიანი ბოლიდი ლე მანის რბოლისთვის მზადაა

Audi R15 TDI plus Le Mans Racer

6 ივნისი

”აუდის” ლე მანის 24-საათიანი რბოლისადმი განსაკუთრებული დამოკიდებულება აქვს. უკვე დიდი ხანია, გერმანული კომპანიის სარბოლი პროტოტიპები ლეგენდარულ რბოლაში პირველობას არავის უთმობენ. უფრო მეტიც, 2006 წლიდან მოყოლებული, ”ოთხრგოლიანები” რბოლებს დიზელისძრავიანი მანქანებით იგებენ და ამ სეზონშიც იგივეს აპირებენ.

წლევანდელი რბოლისთვის ”აუდიმ” თავის სარბოლ პროტოტიპ R15 TDI-ის ახალი ვერსია მოამზადა, რომელიც წინამორბედისგან არამარტო გარეგნობით, სხვა უამრავი კონსტრუქციული ნაწილითაც განსხვავდება. მოდერნიზაციის მთავარი მიზანი, ავტომობილის გამძლეობის და ეფექტურობის გაუმჯობესება იყო.

ახალ ავტომობილს ”აუდი R15 TDI პლუს” ეწოდა. ის კვლავ 5.5-ლიტრიანი V12 დიზელითაა აღჭურვილი, რომელიც 620-ზე მეტ ცხენის ძალას იძლევა. არადა, ტექნიკური რეგლამენტი, რბოლის მონაწილეებს, ძრავებთან დაკავშირებით, ბევრ შეზღუდვას უწესებს.

პირველ რიგში, შეიცვალა ავტომობილის აეროდინამიკა, რომელიც მაღალი სიჩქარით მოძრაობისას, მის უფრო ეფექტურ მდგრადობას უზრუნველყოფს. შეიცვალა რადიატორის განლაგება, კოკპიტი კი უფრო ერგონომიული გახდა. შეიცვალა ავტომობილის განათების სისტემა, რომელშიც ახლა მტავარ როლს LED-ელემენტები ასრულებს. ამის წყალობით, ღამით რბოლისას, განათება გაცილებით ეფექტურია.

”აუდი R15 TDI პლუსს” ინტენსიური ტესტები ჩაუტარდა, რომელთა განმავლობაშიც, მანქანამ 40 000 კილომეტრი გაიარა და ფაქტობრივად, ჩვენს პლანეტას ეკვატორულ სარტყელში, გარს შემოუარა (ვირტუალურად). გამოცდების დროს, მანქანამ გამძლეობაზე ორი სრულფასოვანი ტესტი ჩააბარა, რომელთა დროსაც, 30-30 საათი სარბოლ რეჟიმში იმუშავა. გარდა ამისა, მას აეროსნმიკური ტესტები ჩაუტარდა როგორც ტრასაზე, რბოლისას, ასევე სპეციალურ აეროდინამიკურ მილში. შემოწმება გაიარა ავტომობილის ძრავის გაგრილების სისტემამაც. ამისთვის, სპეციალურად დაბინძურებული გზის საფარი იქნა შერჩეული, რათა დადგენილიყო, რამდენად გამართულად მუშაობს რადიატორი და მისი ბადე, როდესაც ხანგრძლივი რბოლისას, მათი ზედაპირი მტვრით და ჭუჭყით იფარება. გარდა ამისა, ავტომობილმა ორ რბოლაშიც (საფრანგეთის ლე კასტელეში და ბელგიის სპა ფრანკორშანზე) მიიღო მონაწილეობა, რაც ასევე მისი ტესტირებისთვის იქნა გამოყენებული.

გერმანულ კომპანიაში იმედოვნებენ, რომ ესოდენ ძვირადღირებული სატესტო პროგრამა, მათ ლე მანზე კიდევ ერთი დიდი გამარჯვების მოპოვებაში დაეხმარება.

გორდონ მარიმ ელექტრომობილ T.27-ს მონაცემები გამოაქვეყნა

Gordon Murray Releases T.27 EV Full Specifications

6 ივნისი

ცნობილმა ბრიტანელმა ინჟინერმა გორდონ მარიმ, ვისაც ერთ დროს ფორმულა 1-ში არაერთი საინტერესო პროექტი აქვს შექმნილი, შემდეგ კი, ”მაკლარენის” ლეგენდარულ სუპერ ავტომობილ F1-ის შექმნას ხელმძღვანელობდა, თავისი ახალი პროექტის, ჯუჯა ელექტრომობილ T.27-ის შესახებ ინფორმაცია გამოაქვეყნა და პირობა დადო, რომ ეს მანქანა მსოფლიოში ყველაზე ეფექტური ელექტრომობილის წოდებას მოიპოვებს.

ელექტრომობილ T.27-ის შემუშავებაში, მარის ინგლისური კომპანია ”ციტეკ ავტომოტივი” ეხმარება, რომელიც ავტომობილისთვის ელექტრულ ძალურ სისტემას - ძრავს და მის მკვებავ სისტემას ამუშავებს. პროექტი 9 მილიონ გირვანქა სტერლინგადაა შეფასებული. ამ თანხის ნახევარი მისთვის ბრიტანეთის მთავრობის ტექნოლოგიური სტრატეგიის საბჭომ გაიღო. მარიმ პროექტზე მუშაობა 16 თვის წინ დაიწყო და აცხადებს, რომ პირველი სრულფასოვანი პროტოტიპი მზად 2011 წლის აპრილში იქნება.

ჯუჯა ავტომობილს, რომელიც გაბარიტებით ”სმარტზე” პატარა იქნება, მამოძრავებელ ძალას 34-ცხენისძალიანი ელექტროძრავი მიანიჭებს, რომელსაც ენერგიით 12 კილოვატსაათი ტევადობის მქონე ლითიუმ-იონური აკუმულატორების ბლოკი მოამარაგებს.

T.27-ის სიგრძე 2.5 მეტრი, სიგანე 1.3 მეტრი, სიმაღლე 1.6 მეტრი, ბორბლებს შორის ბაზა კი 1.78 მეტრია. ავტომობილის წონა 680 კილოგრამი უნდა იყოს. ჯუჯა ელექტრომობილის სიჩქარე 100 კმ/სთ-ს 15 წამში მიაღწევს, მისი მაქსიმალური სიჩქარე კი სულ რაღაც 105 კმ/სთ იქნება. ავტომობილი აკუმულატორების ერთი სრული დამუხტვით 160 კილომეტრის გავლას შეძლებს.

მართალია, T.27 ატმოსფეროს ნახშირორჟანგით უშუალოდ არ დააბინძურებს, მაგრამ ის ელექტროენერგია, რომელიც მას ქალაქში სამოძრაოდ დასჭირდება, კილომეტრზე 48 გრამი CO2-ის, შერეული ციკლით მოძრაობისას კი 28 გრამის ექვივალნტური იქნება. მარის განცხადებით, თავისი ექსპლუატაციის განმავლობაში, T.27 დაახლოებით 42 პროცენტით ნაკლებად დააბინძურებს გარემოს, ვიდრე ბრიტანეთში მოძრავი ავტომობილების შესაბამისი საშუალო მაჩვენებელია.

ცნობისათვის, მარი და მისმა დიზაინერულმა კომპანიამ უფრო ადრე, მუშაობა პროექტ T.25-ზე დაიწყეს, რომელიც საქალაქო ჯუჯა ავტომობილის წარმოებას ითვალისწინებს. ამ ავტომობილის ბაზაზე მუშავდება ელექტრომობილი T.27. ორივესთვის კი მარის კიდევ ერთი, წარმოების ახლებური ტექნოლოგია ”აისტრიმი” აქვს შემუშავებული, რომლის წყალობითაც, ავტომობილის წარმოების დასაწყებად საჭირო ინვესტიციის და წარმოების დროს აუცილებელი ენერგიის მოცულობის მნიშვნელოვნად შემცირებაა შესაძლებელი.

და, რაც მთავარია: ამ ავტომობილების წარმოებას თავად მარის კომპანია არ გეგმავს. ის მხოლოდ შესაბამისი ტექნოლოგიების გაყიდვითაა დაინტერესებული. მარი ამბობს, რომ ამ ეტაპზე, მოლაპარაკებას ორი კომპანია აწარმოებს, რომლებიც ჯუჯა ავტომობილების ბრიტანეთში წარმოებას გეგმავენ. თუ ორივე საწადელს მიაღწევს, ისინი დამატებით 6 000 სამუშაო ადგილს შექმნიან.

რაიკონენმა მოტოციკლისტს აჯობა

Kimi versus Taddy

6 ივნისი

ავსტრიის ერცბერგში ტრადიციული მოტო როდეო ჩატარდა, რომელშიც 1500-ზე მეტმა ავტო და მოტომრბოლმა მიიღო მონაწილეობა. მათ შორის ყველაზე საინტერესო კი ფორმულა 1-ში მსოფლიოს 2007 წლის ჩემპიონის, ფინელი კიმი რაიკონენისა და მოტო ტრაიალში მსოფლიოს სამგზის ჩემპიონის, პოლონელი ტედი ბლაზუსიაკის დუელი იყო.

ასპარეზობას 30 000-ზე მეტი მაყურებელი დაესწრო. რაიკონენმა როდეოზე მონაწილეობა თავისი ”სიტროენ C4 WRC-ით” იასპარეზა, რომლიტაც ამ სეზონში, რალის მსოფლიო ჩემპიონატზე გამოდის. ბლაზუსიაკმა კი თავისი ორბორბლიანი ”საბრძოლო ცხენით”, ავსტრიულ კომპანია KTM-ის საქროსო მოტოციკლით იასპარეზა. როდეოს ტრადიციისამებრ, დუელში წაგებულს, გამარჯვებულისთვის მანქანა უნდა გაერეცხა...

კიმი რაიკონენი და ტედი ბლაზუსიაკი (მარჯვნივ)

..........................................

როგორც მოსალოდნელი იყო, შეჯიბრმა დიდი ინტერესი გამოიწვია, მისი კულმინაცია კი ავტომრბოლისა და მოტომრბოლის გახდა. რბოლის 13-კილომეტრიანი დისტანცია, რომლის განმავლობაშიც, მის მონაწილეებს არაერთი უძნელესი მოსახვევის გავლა მოუხდათ, რაიკონენმა მეტოქეზე 25 წამით სწრაფად გაიარა.

”ამგვარ შეჯიბრში მონაწილეობა პირველად მივიღე და მისგან დიდი სიამოვნება მივიღე. დაძაბული ბრძოლა გვქონდა, თუმცა დისტანციის მიწურულს, მე უფრო სწრაფი ვიყავი. მე ის ფაქტორი დამეხმარა, რომ რალის სარბოლ ავტომობილს ქროსის მოტოციკლზე გაცილებით მეტი სიჩქარე აქვს, რთულ მოსახვევებს კი ჩვენ დაახლოებით ერთნაირად გავდიოდით. საერთოდ, მოტოციკლები ძალიან მომწონს და მიხარია, რომ ტედისთან ურთიერთობის საშუალება მომეცა”, - ფინიშის შემდეგ განაცხადა რაიკონენმა.

შეგახსენებთ, რომ ფინელმა პილოტმა გასული სეზონის შემდეგ, ”ფერარი” დატოვა და სხვა გუნდებთან წარმოებული უშედეგო მოლაპარაკებების შემდეგ, რალის მსოფლიო ჩემპიონატზე გადაინაცვლა, სადაც ჯერჯერობით, მხოლოდ რამდენიმე ქულის მოპოვება შეძლო.

კარგა ხანს, ფორმულა 1-ის პადოკში ლაპარაკობდნენ იმაზე, რომ მომავალ სეზონში, რაიკონენი ”რედ ბულში” ავსტრალიელ მარკ უებერს შეცვლიდა, თუმცა ბოლო ინფორმაციით, ენერგეტიკული სასმელების მწარმოებელი ავსტრიული კომპანიის (რედ ბულის) გუნდს უებერთან კონტრაქტის გაგრძელება სურს...

როსიმ ფეხი მოიტეხა და ორ თვეს გამოტოვებს

Rossi breaks shin, faces two months out

5 ივნისი

როსი ტრასის მედცენტრში საკაცით გადაჰყავთ

..............................

მსოფლიოს ცხრაგზის ჩემპიონმა წრიულ მოტორბოლებში, იტალიელმა ვალენტინო როსიმ ფეხი მოიტეხა და მინიმუმ, ორი თვე ვერ შეძლებს რბოლებში მონაწილეობას. საბედისწერო ინციდენტი მას მუჯელოს ავტოდრომზე, იტალიის დიდი პრიზის თავისუფალი ვარჯიშის დროს შეემთხვა.

პრაქტიკის დასრულებამდე 15 წუთით ადრე, ”იამაჰას” 31 წლის იტალიელი მრბოლი მესამე უსწრაფესი იყო. მაგრამ ერთ-ერთ მოსახვევში შესვლისას, მოტოციკლი ვერ დაიმორჩილა და დაეცა. როსის წამოდგომა გაუჭირდა და იქვე ჩაიკეცა. მას სასწრაფოდ აღმოუჩინეს პირველი დახმარება და ადგილობრივ სამედიცინო ცენტრში გადაიყვანეს, სადაც დადგინდა, რომ მოტომრბოლს მარჯვენა წვივის ორივე ძვლის მოტეხილობა აქვს. ამასთან, მცირე ძვალზე ღია მოტეხილობა დაფიქსირდა მოტეხილმა ძვალმა კი რბილი ქსოვილი დააზიანა.

როსის ავარია

..............................

პირველი გასინჯვის შემდეგ, როსი ქალაქ მუჯელოს ჰოსპიტალში გადაიყვანეს, სადაც ოპერაცია გაუკეთეს, რომლის დროსაც, მოტეხილი ძვლები დაფიქსირდა. ექიმებმა განაცხადეს, რომ მოტეხილობისა და რბილი ქსოვილის შესახორცებლად, დაახლოებით ორი თვე იქნება საჭირო. თუმცა ეს არ ნიშნავს, რომ როსი სარბოლ ტრასას ამ ვადაში დაუბრუნდება. შეხორცების შემდეგ, მას სარეაბილიტაციო კურსის გავლა მოუწევს, რის გამოც, შესაძლოა მან ამ სეზონში დაბრუნებაც კი ვერ შეძლოს.

”სრულიად მშვიდად ვარ. ექიმები თავის საქმეს გააკეთებენ და მერე ვნახოთ”, - განაცხადა როსიმ, ვინც იტალიური რბოლის წინ, ეგრეთ წოდებული მოჰიკანური (ინდიელთა ტომია ამერიკაში) ვარცხნილობით გააკვირვა თავისი მრავალრიცხოვანი ქომაგი.

აღსანიშნავია, რომ ტრავმის გამო, როსის მსოფლიო ჩემპიონატის რბოლების გამოტოვება პირველად მოუწევს. ამ ეტაპზე, დანამდვილებით შეიძლება იმის თქმა, რომ როსი ბრიტანეთის, ჰოლანდიის, კატალონიისა და აშშ-ის დიდ პრიზებს გამოტოვებს. ეს კი იმას ნიშნავს, რომ ის უკვე ვერ შეძლებს შარშან მოპოვებული მეცხრე ტიტულის (პირველი სამი 125, 250 და 500 კლასებში აქვს მოგებული) დაცვას.

მიმდინარე ჩემპიონატში, პირველი სამი ეტაპის შემდეგ, იტალიურ ეტაპამდე, როსი მეორე ადგილზე იმყოფებოდა და თავის ლიდერ თანაგუნდელს, ესპანელ ხორხე ლორენსოს 9 ქულით ჩამორჩებოდა.

სხვათა შორის, ამ სეზონში როსისთვის ეს პირველი ტრავმა არაა. უფრო ადრე, მან მხრის ტრავმა მიიღო, რომლის გამოც, რბოლებში თავის შესაძლებლობათა სრულად გამოვლენას ვერ ახერხებდა. როგორც ჩანს, სწორედ ეს იყო იმის მიზეზი, რომ როსის მდევრის როლში ყოფნა უწევდა.

”სიტროენმა” ახალი C4 პარიზამდე გაგვაცნო

New Citroën C4 Breaks Cover

2 ივნისი

”სიტროენმა” ინტერნეტით თავისი სრულიად განახლებული ჰეჩბეკის, C4-ის შესახებ მწირი ინფორმაცია და ფოტოები გაავრცელა. მსოფლიო პრემიერა ავტომობილისა, რომლითაც ფრანგულმა კომპანიამ კონკურენცია ”ფოლკსვაგენ გოლფს”, ”ფორდ ფოკუსს”, ”ოპელ ასტრას” და ”რენო მეგანს” უნდა გაუწიოს, პარიზის საავტომობილო შოუზე, სექტემბერში ჩატარდება.

შესაძლოა, ახალი ავტომობილის ფოტოებზე ეს ნაკლებად შეინიშნება, მაგრამ კომპანია აცხადებს, რომ ახალი C4, ჟენევის წლევანდელ ავტო შოუზე ნაჩვენები კონცეპტუალური ”DS ჰაი რადერის” ხუთკარიანი ვერსიაა. ”სიტროენი” სახელ C4-ს მხოლოდ ხუთკარიანი ჰეჩბეკისთვის გამოიყენებს, მის სამკარიან ვერსიას კი რომლის დებიუტიც მერმისს გაიმართება, DS4-ს დაარქმევს.

ეს ორი ავტომობილი წინა ნაწილით ძლიერ ჰგავს ერთმანეთს. სამაგიეროდ, წინა საყრდენის უკან, მათ განსხვავებული ფორმები აქვთ. ამასთან, C4 უფრო კონსერვატიული ფორმებით გამოირჩევა, DS4 კი ნამდვილი სპორტსმენია. სალონში ამ ორ ავტომობილს შორის გაცილებით მეტი მსგავსებაა. გაწყობის დონით და ფორმებით კი, მათი ინტერიერი უფრო მაღალი კლასის C5-საც მოგაგონებთ.

წინამორბედთან შედარებით, ახალი C4 ოდნავ გაზრდილია. კერძოდ, მატება სიგრძეში 55 მილიმეტრი, სიგანეში 17 მილიმეტრი და სიმაღლეში 32 მილიმეტრია. სამაგიეროდ, პრაქტიკულად არ შეცვლილა ავტომობილის პლატფორმა. საბარგულის მოცულობა 408 ლიტრია, 82 ლიტრით მეტი, ვიდრე ახლანდელი C4-ისა.

სამაგიეროდ, წინა თაობის C4-დან ახალზე უცვლელად გადავა ძრავების გამა. ესენია ბენზინის 1.6-ლიტრიანი ატმოსფერული და ტურბოიანი აგრეგატები, ასევე ამავე ლიტრაჟის მქონე დიზელი. ასევე მოსალოდნელია, რომ ამ ავტომობილსვე ”PSA პეჟო სიტროენის” მიერ შემუშავებული, დიზელ-ელექტრული ჰიბრუდული სისტემით აღჭურვავენ. თავიდან, ამ ჰიბრიდული სისტემის გამონაბოლქვში CO2-ის შემცველობა 109 გრამი იქნება (ყოველ კილომეტრზე), დახვეწის შემდეგ კი ეს მაჩვენებელი 99 გრამამდე შემცირდება.

დაკიდევ, C4-ის მყიდველს ფრანგული კომპანია ”მიშლენის” წარმოების უახლეს, ეკონომიურ საბურავებს შესთავაზებს, რომლებსაც ყოველ 100 კილომეტრზე 0.2 ლიტრი საწვავის დაზოგვა შეუძლიათ, თავიანთი ექსპლუატაციის პერიოდში კი ავტომობილის მფლობელს დაახლოებით 90 ლიტრ საწვავს დააზოგინებენ.

ევროპის ქვეყნებში ახალი C4-ის გაყიდვები პარიზის ავტო შოუს დასრულებისთანავე დაიწყება.

”სუბარუ იმპრეზა” ”კოსუორტისგან”

Subaru Cosworth Impreza STI CS400

2 ივნისი

ინგლისურმა კომპანია ”კოსუორტმა”, რომელიც წელს ფორმულა 1-ის მსოფლიო ჩემპიონატს დაუბრუნდა, ”სუბარუს” პოპულარულ სპორტულ ჰეჩბეკ ”იმპრეზა WRX STI-ს” კიდევ უფრო ტემპერამენტიანი ვერსია შექმნა, რომელსაც ძალიან შეზღუდული რაოდენობით - მხოლოდ 75 ცალს დაამზადებს. როგორც ”კოსუორტში” იქადნიან, მძღოლები ”კოსუორტ იმპრეზა STI CS400-ით” ისეთივე სიამოვნებას მიიღებენ, როგორსაც მათ სუპერ ავტომობილი მიანიჭებს.

რა თქმა უნდა, პირველ რიგში, ”კოსუორტის” ინჟინრების ხელი ძრავს შეეხო. მათ 2.5-ლიტრიან ოპოზიტურ აგრეგატს დგუშები, ბარბაცები, ცილინდრების ბლოკის თავაკი და მისი შუასადები, ასევე საკისრები შეუცვალეს. მოდერნიზაცია ასევე ჩაუტარდა ძრავის მართვის ელექტრონულ სისტემას, შეზეთვის სისტემას, გამოიცვალა ტურბოკომპრესორი.

ძრავის ასეთი საფუძვლიანი მოდერნიზაციის შედეგი კი ისაა, რომ მისი სიმძლავრე 400 ცხენის ძალამდე (5 750 ბრ/წთ-ზე), მაქსიმალური მაბრუნი მომენტი კი 540 ნიუტონმეტრამდე გაიზარდა. ასეთი აგრეგატით, ”კოსუორტის” ”იმპრეზა” ადგილიდან 100 კმ/სთ სიჩქარეს სულ რაღაც 3.7 წამში აკრეფს. შედარებისთვის, 300-ცხენისძალიან ”იმპრეზა WRX STI-ს” იგივე აჩქარებისთვის 5.2 წამი სჭირდება.

ძრავის გარდა, მოდერნიზაცია ავტომობილის სხვა ნაწილებსაც ჩაუტარდა. კერძოდ, შეიცვალა საკიდარი, რომელსაც უფრო ხისტი და 10 მილიმეტრით დაბალი ზამბარა-ამორტიზატორის წყვილები დაუყენეს. შეიცვალა მუხრუჭების სისტემა - მანქანის შენელება ამიერიდან ”AP რეისინგის” წარმოების მუხრუჭებს ევალება, რომლებშიც ჭარბი ძალის მოთოკვას 6-ცილინდრიანი სუპორტები და 355-მილიმეტრიანი დისკოები ემსახურება.

რაც შეეხება ავტომობილის გარეგნობას, აქ თვალშის საცემია შეცვლილი წინა ბამპერი, რომელთანაც ინტეგრირებულია ქვედა სპოილერი და რადიატორის ბადე, ”კოსუორტის” ლოგოები, შეცვლილი უკანა სპოილერი და სპეციალურად ამ ავტომობილისთვის შექმნილი 18-დუიმიანი ბორბლები. სალონში კი ჩვეულებრივის ნაცვლად, ”რეკაროს” სპორტულ სავარძლებს ნახავთ.

ბრიტანეთში ”კოსუორტ იმპრეზა STI CS400” 49 995 გირვანქა სტერლინგი ეღირება.