„ჰიუნდაის“ აღმაშენებელი გადადგა

Hyundai R&D head Lee steps down

17 მარტი

„ჰიუნდაის“ წარმატებების ერთ-ერთი მთავარი შემოქმედი, კორეული კომპანიის კვლევისა და განვითარების განყოფილების შეფი ლი ჰიუნ-სუნი თანამდებობიდან გადადგა. მან „ჰიუნდაი“ აქ მუშაობის 27 წლის შემდეგ დატოვა.

ის ერთ-ერთი იმ ადამიანთაგანია, რომელმაც ამ კომპანიის სტაბილურ განვითარებაში დიდი როლი შეასრულა. სწორედ მისი დიდი დამსახურებაა ის, რომ კორეულ კომპანიას დღეს მოწინავე ტექნოლოგიების დამნერგავის სახელი აქვს და რომ მის პროდუქციას მომხმარებელი უმეტეს შემთხვევაში ენდობა.

ლი „ჰიუნდაიში“ იმ დროიდან მუშაობდა, როცა კორეულმა კომპანიამ თავისი პირველი ძრავი (სერია ალფა) შეიმუშავა. ეს 1991 წელს მოხდა, მანამდე კი „ჰიუნდაი“ „მიცუბიშის“ აგრეგატებზე იყო დამოკიდებული. შემდეგ კი, ლის ხელმძღვანელობით, „ჰიუნდაი“ თანდათან ნერგავდა საწვავის შეფრქვევის, ჰიბრიდულ და სხვა მოწინავე ტექნოლოგიებს. ჰიბრიდული აგრეგატი ახლახანს „სონატას“ კაპოტქვეშ აღმოჩნდა, რომელსაც მალე მიიღებს ამერიკელი მყიდველი.

„ჰიუნდაის“ კვლევისა და განვითარების განყოფილების ხელმძღვანელის თანამდებობაზე, ლის იანგ ვუნ-ჩული შეცვლის, ვინც ადრე კომპანიის კვლევისა და განვითარების კორეული ცენტრის პრეზიდენტი იყო.

„ტატა მოტორსი“ ევროპისთვის ელექტრომობილსაც გამოუშვებს

Tata Motors to Launch Electric Car in Europe

16 მარტი

„ნისანი“ პირველი დიდი კომპანიაა, რომელმაც ელექტრომობილების მასობრივი წარმოება დაიწყო. ეს შარშან მოხდა და ელექტრომობილმა, სახელად „ნისან ლიფ“, მაშინვე წლის საუკეთესო ავტომობილის წოდება მოიპოვა. მას შემდეგ კი მასზე დიდი მოთხოვნაა. იმდენად დიდი, რომ იაპონური კომპანია მიღებული შეკვეთების შესრულებას ვერ აუდის.

მალე ბაზარზე რამდენიმე ახალი ელექტრომობილის გამოჩენაა მოსალოდნელი და ერთ-ერთი პირველი, რომელიც ევროპაში „ლიფს“ კონკურენტს მოუვლენს, ინდური „ტატა მოტორსი“ გახდება, კომპანია, რომელიც ჯერჯერობით მხოლოდ მსოფლიოს უიაფესი ავტომობილის - „ნანოს“ წარმოებითაა ცნობილი.

ინდური კომპანია ელექტრომობილს, სახელად „ინდიკა ვიტა EV“, მალე წარადგენს ევროპაში. პირველი ქვეყნები, სადაც ეს ელექტრომობილი გაიყიდება, დანია, ნორვეგია და ბრიტანეთია. პირველ რიგში, ამ ქვეყნების გზებზე სატესტო ეგზემპლარები დაიწყებს მოძრაობას. ბრიტანეთში ის ზაფხულში გამოჩნდება. სხვათა შორის, ალბიონის მთავრობამ, ამ ავტომობილისთვის სპეციალური შეღავათი დააწესა 5 000 გირვანქა სტერლინგის სახით.

„ტატა მოტორსის“ მიერ გავრცელებული ინფორმაციით, „ინდიკა ვიტა EV“ აკუმულატორების ერთი სრული დამუხტვით დაახლოებით 170 კილომეტრის გავლას შეძლებს, მისი აკუმულატორების დასამუხტად 8 საათია საჭირო. ავტომობილის მაქსიმალური სიჩქარე კი მხოლოდ 114 კმ/სთ-ია.

„პორშე კაიუნს“ ლაიპციგის ქარხანა გამოუშვებს

Leipzig Confirmed as Porsche Cajun Production Site

16 მარტი

„პორშე“ ისევ „სუფთა“ გერმანულ კომპანიად დარჩება - თავის ავტომობილებს კვლავაც მხოლოდ გერმანიაში გამოუშვებს. გერმანული კომპანიის ხელმძღვანელობამ გადაწყვიტა, რომ კომპაქტური ქროსოვერი „კაიუნი“ ლაიპციგში აწარმოოს, რისთვისაც აღმოსავლეთ გერმანიის ამ ქალაქში მდებარე ქარხანას მნიშვნელოვანი მოდიფიკაცია ჩაუტარდება.

შტუტგარტული კომპანია ქარხანას (ფოტოზე) 400 ჰექტარით გააფართოებს. ახალი ხაზები მთლიანად კომპანიის მეხუთე მოდელის წარმოებით იქნება დაკავებული. ახალ ფართობზე ასევე განთავსდება სამღებრო და ამწყობი სექციები. ამასთან, იქ სამუშაოდ, „პორშე“ 1 000 ახალ თანამშრომელს აიყვანს. ჯერ უცნობია, რამდენი სამუშაო ადგილი დაემატება ცუფენჰაუზენისა და ვაიზახის საწარმოებში, რომლებიც ასევე დაკავშირებული იქნება „კაიუნის“ წარმოებასთან.

„პორშეს“ შეფი მათიას მიულერი ლაიპციგის ქარხანას ქებით მოიხსენიებს და ამბობს, რომ იქ „კაიენისა“ და „პანამერას“ წარმოებამ დაამტკიცა, რომ ამ ქარხანას უმაღლესი ხარისხის პრემიუმ ავტომობილების წარმოება შეუძლია. „ჩვენი გადაწყვეტილება, ახალი ავტომობილიც ამავე ქარხანაში ვაწარმოოთ, იმის დასტურია, რომ ჩვენ ლაიპციგური საწარმოს შესაძლებლობებს ვენდობით“, - დასძენს მიულერი.

ახალი ავტომობილების შესახებ, სხვა ინფორმაცია პრაქტიკულად არ ვრცელდება. უფრო მეტიც, „კაიუნზე“ ჯერ ჭორებსაც ვერ გაიგებთ, რაც იმის ნიშანია, რომ მისი წარმოების დაწყებამდე სამი წელი მაინც რჩება. ერთადერთი ცნობა, რაც მწარმოებელმა მედიისთვის გაიმეტა ისაა, რომ ამ ავტომობილით, „პორშე“ ახალგაზრდა მყიდველის მიზიდვას იმედოვნებს.

„პინინფარინა“ ელექტრომობილ „ბლიუქარს“ გამოუშვებს

Pininfarina to Produce Bluecar

16 მარტი

ჟენევის ორი წლის წინანდელის საავტომობილო შოუს ერთ-ერთ ვარსკვლავს - იტალიურ სადიზაინერო კომპანია „პინინფარინას“ კონცეპტუალურ მინი ელექტრომობილ „ბლიუქარს“ მწვანე შუქი აუნთეს. და ეს მას შემდეგ გახდა შესაძლებელი, რაც „პინინფარინამ“ კონტრაქტები გააფორმა თავის პარტნიორებთან - ფრანგულ საინვესტიციო და ინდუსტრიულ კომპანია „ბოლორესთან“ და ელექტრონიკის მწარმოებელ იტალიურ „ჩეკომპთან“.

პირველ რიგში, 4 000 ცალი ელექტრომობილის წარმოება იგეგმება და ყველა მათგანს ერთადერთი მყიდველი ეყოლება ფრანგულ კომპანია „ავტოლიბის“ სახით. ეს უკანასკნელი პარიზის მერიის მიერაა შექმნილი და მისი დანიშნულება, პარიზში ელექტრომობილების გაქირავება და გამქირავებელი ფართო ქსელის შექმნაა. მომავალში, „ავტოლიბი“ ევროპის კიდევ 40 დიდ ქალაქში დაიწყებს მუშაობას და ბუნებრივია, ახალი ელექტრომობილებიც დასჭირდება.

ჯერჯერობით, „ბლიუქარის“ შესახებ, დაწვრილებითი ინფორმაცია არ ვრცელდება. თუმცა სავარაუდოდ, ჟენევაში ნაჩვენები კონცეპტუალური ავტომობილი დიდად არც შეიცვლება. ის კი ელექტროძრავით (მისი მონაცემები უცნობია) და ლითიუმ მეტალ პოლიმერული ელემენტების ბლოკითაა აღჭურვილი, რომელში დაგროვილი ენერგიითაც, „ბლიუქარს“ 250 კილომეტრის გავლა შეუძლია. ამ ელემენტების ქმედუნარიანობა 200 000 კილომეტრზეა გათვლილი და ამ პერიოდში, მას განსაკუთრებული მოვლა არ ესაჭიროება. ასეთი ელემენტების ბლოკი ენერგიას ჩვეულებრივი საყოფაცხოვრებო ქსელიდან ივსებს და სრული დამუხტვისთვის რამდენიმე საათია საჭირო. ავტომობილს 100 კმ/სთ-მდე აჩქარება 6.3 წამში შეუძლია, მისი მაქსიმალური სიჩქარე კი ხელოვნურად, 130 კმ/სთ-ის ნიშნულითაა შეზღუდული.

„პინინფარინა“ და მისი პარტნიორები „ბლიუქარის“ წარმოებას წელსვე შეუდგებიან და 2017 წლამდე გააგრძელებენ. „ავტოლიბის“ უკვე განსაზღვრული აქვს გაქირავების ტარიფეიც. კერძოდ, მათ, ვისაც ამ ავტომობილებით მუდმივად სარგებლობის სურვილი ექნებათ, თვეში 12 ევვროს გადახდა მოუწევთ. შემდეგ კი, დაქირავებისას, ყოველ ნახევარ საათში, 5-6 ევროს გადახდა მოუწევთ.

„სააბი“ ახალ მოდულურ პლატფორმას შექმნის

Saab's hi-tech modular chassis

16 მარტი

შვედურმა საავტომობილო კომპანია „სააბმა“ მკვეთრად შეცვალა სამომავლო გეგმები და იმის ნაცვლად, რომ ახლანდელ მოდელ 9-3-ის პლატფორმა გადაეკეთებინა და ის ახალი მოდელებისთვის გამოეყენებინა, სრულიად ახალი, უნივერსალური პლატფორმის შექმნა გადაწყვიტა, პლატფორმისა, რომელსაც სხვადასხვა კლასის ავტომობილებზე გამოიყენებს.

ახალ, მოდულურ პლატფორმაზე შესაძლებელი იქნება როგორც კომპაქტური 9-2-ის, ასევე ფლაგმან 9-7-ის დამყნობა. შედარებისთვის, პირველის საორიენტაციო სიგრძე 4.2 მეტრი, მეორისა კი 5.5 მეტრი იქნება. ახალ პლატფორმას პირველ რიგში, ახალი 9-3-ის, ასევე 9-5-ის და 9-4X-ისთვის გამოიყენებენ.

ბრიტანული გამოცემა „ავტოქარი“, შვედური კომპანიის ინკოგნიტო თანამშრომლების მიერ მიწოდებული ინფორმაციის შესაბამისად გვამცნობს, რომ „სააბი“ ასევე განიხილავს „მინის“ კონკურენტი 9-1-ის წარმოების დაწყების მიზანშეწონილობას, რომლის წარმოებაც თუ გადაწყდა, მისთვის სულ სხვა პლატფორმა იქნება შესამუშავებელი.

შვედური კომპანია ახალი პლატფორმის წინა საკიდარს მაკფერსონის სისტემით აღჭურვავს, უკან კი ხუთბერკეტიან სისტემას გამოიყენებს. ამ სისტემებს „სააბს“ კომპანია ZF დაუმზადებს. ამასთან, მოდელ 9-5-სთვის, წინა საკიდარს შეცვლიან და ის განსხვავებული მობრუნებადი „მუშტებით“ აღიჭურვება, რომლებიც აჩქარებისას, მოხვევის ეფექტს გაანეიტრალებს.

რაც მთავარია, ახალი პლატფორმა ისეთი იქნება, რომ მასზე ცალკეული კვანძების და ნაწილების გამოცვლა ზედმეტი დანახარჯების გარეშე იყოს შესაძლებელი. ამის წყალობით, კომპანია ახალი მოდელის სწრაფად და იაფად შემუშავებას მოახერხებს. რამდენიმე მოდელისთვის ერთი, უნივერსალური პლატფორმის გამოყენებაც, ხარჯების და ახალი მოდელების შემუშავებისთვის საჭირო დროის შემცირებას გამოიწვევს. შედეგად, ისინი უფრო კონკურენტუნარიანები იქნება.

სხვათა შორის, ახალი პლატფორმის კონცეპტუალური ვარიანტი „სააბმა“ თავის კონცეპტუალურ მოდელ „ფინიქსზე“ უკვე გამოიყენა, ავტომობილზე, რომელიც პირველად ახლახანს, ჟენევის ავტო შოუზე წარმოადგინა. ამასთან, იმავე მოდელით გვიჩვენა, თუ რა მიმართულებით ავითარებს კორპორატიულ სტილს.

„ფინიქსი“ ჰიბრიდული აგრეგატითაა აღჭურვილი, რომლის ძირითადი აგრეგატიცაა „ბეემვეს“ წარმოების 1.6-ლიტრიანი ტურბოძრავი, რომელიც 200 ცხენის ძალას იძლევა. ეს აგრეგატი თავის მომენტს, ექვსსაფეხურიანი კოლოფის გავლით, წინა ბორბლებს აწვდის. უკანა ბორბლებს კი ელექტროძრავი ემსახურება, როლის სიმძლავრეც მხოლოდ 33 ცხენის ძალაა და რომელსაც ენერგიით ლითიუმ-იონური აკუმულატორების ბლოკი კვებავს.

უარი ავტომობილზე ამერიკელებს წლიურად 10 000 დოლარს დააზოგვინებს

Rapidly Rising Gas Prices Give Public Transit Riders Highest Savings in Two Years

15 მარტი

ამერიკის საზოგადოებრივი ტრანსპორტის ასოციაციის სპეციალისტებმა ჩაატარეს გამოკვლევა, რომლის ანალიზმაც აჩვენა, რომ თუ საშუალო ამერიკელი მოსახლე უარს იტყვის ინდივიდუალურ ტრანსპორტზე და სამუშაოზე ყოველდღიურად საზოგადოებრივი ტრანსპორტით ივლის, მაშინ თვეში საშუალოდ 825 დოლარს, წლიურად კი 9 904 დოლარს დაზოგავს. სწორედ ამდენით მეტი ჯდება საკუთარი ავტომობილის ექსკლუატაცია და შენახვა, საზოგადოებრივი ტრანსპორტით სარგებლობაზე.

კვლევის მონაცემებით, ავტომფლობელთა ხარჯებში შევიდა საწვავზე გაწეული დანახარჯები, მიმდინარე რემონტი, ზეთის და საბურავების გამოცვლა. ხარჯებში ასევე შევიდა დაზღვევის საფასური, პარკირების გადასახადები და სხვადასხვა ხარჯები. ყველა ამ ხარჯის დაანგარიშება, საშუალო ზომის ავტომობილებისათვის სრულდებოდა. ასეთი ავტომობილის ხარჯი 100 კილომეტრზე საშუალოდ 10 ლიტრი უნდა ყოფილიყო. ამასთან, წინასწარ განსაზღვრული პირობით, ავტომობილით ოჯახის ორი წევრი სარგებლობს და წლიურად ავტომობილი 15 000 კილომეტრს გადის.

ამ თანხას, ოჯახის ამ ორ წევრზე, ავტობუსით მგზავრობის ხარჯები აკლდებოდა. ამასთან, მხედველობაში მიიღეს ის ფაქტორიც, რომ სხვადასხვა ქალაქში, ავტობუსით და მეტროთი მგზავრობა სხვადასხვა ფასი ღირს. გამოკვლევამ აჩვენა, რომ ამ ფაქტორების გათვალისწინებით, ავტომობილზე უარის თქმის შემთხვევაში, ყველაზე მეტ თანხას ნიუ იორკის მცხოვრებლები ზოგავენ. საზოგადოებრივი ტრანსპორტით სარგებლობის შემთხვევაში, საშუალო ნიუ იორკელი თვეში თითქმის 1 200 დოლარს, წელიწადში კი დაახლოებით 14 400 დოლარს დაზოგავს.

ბოსტონში თვიური დანაზოგი 1099, წლიური კი 13 200 დოლარია, სან ფრანცისკოში 1088 და 13 100, ჩიკაგოში 991 და 11 900, სიეტლში 973 და 11 680, ფილადელფიაში 957 და 11 490, ჰონოლულუში (ჰავაი) 932 და 11 180, ლოს ანჯელესში 894 და 10 730, მინაპოლისში 876 და 10 510, სან დიეგოში 866 და 10 400 და ასე შემდეგ.

ასოციაციის სპეციალისტები თვლიან, რომ მათ მიერ ჩატარებული კვლევის შედეგების გაცნობის შემდეგ, ამერიკის დიდი ქალაქების ბევრი მაცხოვრებელი საზოგადოებრივ ტრანსპორტს უფრო ხშირად გამოიყენებს, ვიდრე ახლა.

„ჰიუნდაი ელანტრა“ ყველაზე ეკონომიური ავტომობილების ათეულში

Hyundai Elantra Top Ten Most Fuel-Efficient Car

15 მარტი

საავტომობილო ბიზნესის კვლევებსა და ანალიტიკურ შეფასებებზე სპეციალიზებულ კორპორაცია “თრუქარ-ის” ვებგვერდ თრუქარ.კომ-ის (truecar.com) მიერ ჩატარებულმა გამოკითხვამ, მსოფლიოს ათი ყველაზე ეკონომიური ავტომობილის სია გამოაქვეყნა, რომელშიც ერთის გარდა, ყველა ადგილი ჰიბრიდულმა ავტომობილებმა დაიკავეს.

ეს ერთი კი უახლესი „ჰიუნდაი ელანტრაა“, ავტომობილი, რომელიც ბაზარზე შარშან, წლის მიწურულს გამოჩნდა და მაშინვე, არაერთი საავტომობილო გამოცემის და ვებ-გვერდის რჩეული გახდა.

“თრუქარ-ის” რეიტინგი ავტომობილების საწვავის ეკონომიურ მოხმარებასა და 15 000 მილის (დაახლოებით 24 000 კმ) გავლისას, საწვავზე დახარჯული თანხის შესაბამისად შედგა. რეიტინგში არ შეიყვანეს ელექტრომობილები, რადგან ისინი საწვავს არ მოიხმარენ.

რეიტინგში მოწინავე ადგილი „ტოიოტას“ ჰიბრიდულმა „პრიუსმა“ დაიკავა. ეს ავტომობილი 22 235 დოლარი ღირს (საბაზო ფასი), მისი საწვავის ხარჯი კი 1 064 დოლარია (იმის გათვალისწინებით, რომ წლიურად 15 000 მილს გადის და გალონი (3.785 ლიტრი) საწვავი 3.52 (პირობითად) დოლარი ღირს.

„ჰიუნდაი ელანტრას“ საბაზო ფასი 15 052 დოლარია, ანუ „პრიუსზე“ დაახლოებით 32 პროცენტით იაფი. სამაგიეროდ, საწვავზე მისი წლიური ხარჯი, „პრიუსისაზე“ 531 დოლარით მეტია (1595 დოლარი). საერთო ჯამში, „ელანტრას“ რეიტინგში მეცხრე ადგილი ერგო. მასზე ერთი საფეხურით წინაა „ჰონდას“ ჰიბრიდული CR-Z, კვალში კი ასევე ჰიბრიდული „ტოიოტა ქამრი“ უდგას.

„როდესაც საწვავის ეკონომიურად მხარჯველ ავტომობილს ყიდულობს, მომხმარებელმა ორი ფაქტორი უნდა გაითვალისწინოს - მანქანის ფასი და მისთვის წლიურად საჭირო საწვავის ღირებულება. თუ ყველაზე ეკონომიურ ავტომობილს ეძებთ, ასეთად „ტოიოტა პრიუსს“ გირჩევთ, თუ იაფი მანქანა გინდათ, რომელიც ცოტასაც ხარჯავს, მაშინ „ჰიუნდაი ელანტრა“ საუკეთესო არჩევანია“, - ამბობს “თრუქარ-ის” ინდუსტრიული ტრენდების განყოფილების ვიცე პრეზიდენტი ჯესი ტოპრაკი.

დაბოლოს, „ტოიოტა პრიუსის“ გარდა, რეიტინგში ასევე მოხვდნენ (დაკავებული ადგილების შესაბამისად): ჰიბრიდული „ლექსუს CT 200h“, ჰიბრიდული „ჰონდა ინსაითი“, ჰიბრიდული „ჰონდა სივიკი“, ჰიბრიდული „ლინკოლნ MKZ“, პლაგ-ინ ჰიბრიდული „შევროლე ვოლტი“, ჰიბრიდული „ლექსუს HS 250h“, ჰიბრიდული „ჰონდა CR-Z“ და ჰიბრიდული „ტოიოტა ქამრი“.

„პორშე“ „ალფა რომეოს“ ოპოზიტურ ძრავს სთავაზობს

Porsche Has an Engine Ready for Alfa Romeo

15 მარტი

მართალია, „ფიატის“ მთავარმა აღმასრულებელმა სერჯო მარკიონემ „ფოლკსვაგენის“ დირექტორთა საბჭოს თავმჯდომარე ფერდინანდ პიხს ურჩია, „ალფა რომეოზე“ ხელის ფათურს გირჩევნია, კრახის პირას მისულ „სეატს“ მიხედეო, მაგრამ ამით, დიდი ფერდინანდ პორშეს შთამომავალს მილანური კომპანიის ხელში ჩაგდების წყურვილი მაინც ვერ დაუცხრო.

უფრო მეტიც, „ფოლკსვაგენი“ და მის ჯგუფში ახლახანს შესული „პორშე“ ხმამაღლა აცხადებენ, რომ მათს განკარგულებაში მალე იქნება სეულიად ახალი ოთხცილინდრიანი ძრავი, რომელსაც ცილინდრების ორი, ერთმანეთის მიმართ საპირისპიროდ განლაგებული რიგი (ოპოზიტური ძრავი) აქვს. ეს ძრავი კი, საკუთრივ „პორშეს“ გარდა, „ალფა რომეოსაც“ ძალიან გამოადგება. მითუმეტეს, მილანური კომპანია ერთ დროს ოპოზიტურ ძრავებს თავადაც აწარმოებდა და მათ თავის მოდელებზე - „ალფასუდსა“ და 33-ზე იყენებდა.

თავად „პორშე“ ახალ ძრავს თავისი პატარა მოდელისთვის გამოიყენებს, რომელიც შემუშავების სტადიაშია და რომლის შექმნაშიც, მას „ფოლკსვაგენი“ ეხმარება. იგივე ძრავს ვოლფსბურგული გიგანტიც გამოიყენებს როგორც საკუთარი, ასევე მის ჯგუფში შემავალი ბრენდების (შკოდა, აუდი, სეატი) მოდელებისთვის. თუ იტალიური კომპანია ამ აგრეგატით დაინტერესდა, „პორშე“ ამით მხოლოდ მოგებული დარჩება, რადგან ძრავების წარმოების გაზრდა მოუწევს, რაც მათს თვითღირებულებას შეამცირებს.

უნდა ითქვას, რომ „პორშეს“ ახალი ოპოზიტური ძრავი მისწრება იქნებოდა „ალფა რომეოს“ ახალი, კომპაქტური კუპესთვის (4C), რომლის კონცეპტუალური ვერსიის დებიუტიც ახლახანს, ჟენევის ავტო შოუზე შედგა. მაგრამ რამდენადაც, მარკიონე „ფოლკსვაგენისთვის“ მილანური ბრენდის მიყიდვას არ აპირებს, ამდენად, „ალფა4C-ზე“ (ფოტოზე) ოპოზიტის დაყენება ჯერჯერობით გამორიცხულია.

„ჩვენ მათ (ფოლკსვაგენს) კარი ცხვირწინ მივუზურეთ, მაგრამ ახლა ისინი ფანჯრიდან შემოსვლას ცდილობენ“, - ასე განმარტა გერმანული გიგანტის შეთავაზება „ფიატის“ ჯგუფის პრესმდივანმა. მართალია, პიხმა ჟენევაში დაიქადნა, რომ ხუთ წელიწადში, „ალფა რომეოს“ გაყიდვების მოცულობას გააოთხმაგებს, მაგრამ მარკიონესგან ისევ უარი (ხელები შორს ალფასგან) მიიღო. და მაინც, პიხი ამბობს: „ფოლკსვაგენს არსად ეჩქარება“...

„შკოდამ“ დაადასტურა, რომ ორ ახალ მოდელზე მუშაობს

Skoda Plans New Models

15 მარტი

ჟენევის საავტომობილო შოუს დასრულებისთანავე, „შკოდამ“ მისთვის ტრადიციული, ყოველწლიური მუშაობის შედეგები შეაჯამა, რასთან დაკავშირებიტაც გამართულ პრესონფერენციაზე გამოცხადდა, რომ ჩეხური კომპანია მალე თავის სამოდელო გამას ორი ახალი ავტომობილით შეავსებს.

ამგვარად, „შკოდა“ ტავის წვლილს შეიტანს „ფოლკსვაგენის“ მიზნის მიღწევაში, რომლის შესაბამისადაც, გერმანული კომპანია 2018 წელს მსოფლიო ლიდერობას გეგმავს. შეგახსენებთ, რომ ვლოფსბურგელთა დიდ საავტომობილო ოჯახში, საკუთრივ „ფოლკსვაგენის“ და „შკოდას“ გარდა, „აუდი“, „სეატი“, „ბენტლი“, „ლაბმორგინი“, „ბუგატი“ და (უკვე) „პორშეც“ შედის.

„შკოდამ“ გასული წელი გაყიდვების მნიშვნელოვანი ზრდით დაასრულა და ამ წლის პირველი ორი თვის შედეგებიტაც, გაყიდვები 20 პროცენტზე მეტით აქვს გაზრდილი. ჩეხურ კომპანიას, „ფოლკსვაგენის“ ჯგუფში შემავალ კომპანიებს შორის, გაყიდული ავტომობილების მოცულობის მიხედვით, მესამე ადგილი უკავია (ფოლკსვაგენის და აუდის შემდეგ).

„ფოლკსვაგენის“ მიერ განსაზღვრული სამოქმედო გეგმის შესაბამისად, გაყიდვების ზრდა, ახალი ბაზრების ათვისებით და ახალი მოდელების წარმოების დაწყებითაა მიღწევადი. ბუნებრივია, ამ გეგმას „შკოდაც“ მიჰყვება, რომელმაც ახლახანს დაადასტურა, რომ მერმისიდან ორი ახალი ავტომობილის წარმოებას დაიწყებს.

პირველი იქნება კომპაქტური სედანი, რომელმაც „შკოდას“ გამაში, სუბკომპაქტურ „ფაბიასა“ და D სეგმენტის „ოქტავიას“ შორის უნდა დაიკავოს ადგილი. ჯერჯერობით, ამ ავტომობილის შესახებ დეტალები დაფარულია, თუმცა მოსალოდნელია, რომ ჩეხური კომპანია მათ ფრანკფურტის ავტო შოუზე გამოაქვეყნებს.

მეორე ავტომობილის კონცეპტუალური ვერსიის პრემიერა ჟენევის ავტო შოუზე გაიმართა, სადაც ის „ვიჟნD-ს“ სახელით წარსდგა. ესაა ეგრეთ წოდებული საქალაქო სუბკომპაქტური ავტომობილი, რომელმაც პირველ რიგში, ახალგაზრდა თაობის მყიდველი უნდა მიიზიდოს. გავრცელებული ინფორმაციით, ეს „ფოლკსვაგენის“ კონცეპტუალურ მოდელ Up!-ის ჩეხური ვერსია იქნება და ის გერმანული კომპანიის წარმოების მცირელიტრაჟიანი ძრავებით აღიჭურვება, მომავალში კი ბაზარზე მისი ელექტრული ვერსიაც გამოვა. ეს ძრავებია 1.2-ლიტრიანი დიზელი, რომელიც 75 ცხენის ძალას იძლევა, მეორე ძრავი ბენზინზე მუშაობს და ისიც 1.2-ლიტრიანია, ოღონდ 86 ცხენის ძალას იძლევა. რაც შეეხება ელექტროძრავს, მისი სავარაუდო სიმძლავრე 82 ცხენის ძალა იქნება.

„ალფა რომეო 4C“ - პატარა შუაძრავიანი სუპერ ავტომობილი

Alfa Romeo 4C Coupe Concept with Mid-Mounted 1.75-Liter Turbo Engine and RWD

14 მარტი

ჟენევის საავტომობილო გამოფენას არაერთი ახალი სუპერ ავტომობილი ამშვენებდა, თუმცა მათ ფონზეც, ერთ-ერთი გამორჩეული ექსპონატი „ალფა რომეოს“ კომპაქტური და ხელმისაწვდომი „სუპერ ავტომობილი“, კონცეპტუალური 4C იყო.

მომცრო ზომები რომ არა, ამ ავტომობილს მართლა შეიძლება სუპერ ავტომობილი უწოდო, რადგან სწორედ ამ კლასის სპორტსმენების სტილშია შესრულებული: ორადგილიანი სალონი, ბაზაში მოთავსებული ძრავი, რომელიც მაბრუნ მომენტს უკანა ბორბლებს აწვდის. და, რა თქმა უნდა, აგრესიული - ყველაფერი ეს სწორედ სუპერების კლასს შეეფერება.

მილანური კომპანიის სიტყვებით რომ ვთქვათ, „4C ბრენდის ფასეულობებს სრულად გამოხატავს. ესაა იტალიური სტილი, ტემპერამენტი და დახვეწილი ტექნიკური აღჭურვილობა, რომელიც მოწოდებულია იმისათვის, რომ უსაფრთხოება და მართვით სიამოვნების მიღება უზრუნველყოს“.

სახელიდანაც ჩანს, რომ ეს ავტომობილი წარმატებულ კუპე „8C კომპეტიციონეს“ მომცრო ვერსიაა - ისინი გარეგნობითაც ძლიერ ჰგვანან ერთმანეთს. კონცეპტუალური „ალფა რომეო 4C-ს“ სიგრძე 4.00 მეტრი, ბაზა კი 2.4 მეტრია. კომპაქტური გაბარიტების მიუხედავად, ის სუპერ ავტომობილის შთაბეჭდილებას ტოვებს, როგორც, მაგალითად „ლოტუს ელისი“.

„ალფას“ ორი კუპე ერთმანეთს მარტო გარეგნობით როდი ჰგავს. „ალფა რომეო 4C-ზე“ ზოგიერთი ის ტექნოლოგია და მასალებია გამოყენებული, რომლებიც „8C კომპეტიციონემ“ თავის მხრივ, „ფერარისგან“ მიიღო. ესაა უკანა წამყვანი ბორბლების სისტემა, კარბონის კომპოზიტი და ალუმინის დეტალები. სამაგიეროდ, მის კაპოტქვეშ V8 ძრავის ჩადგმაზე არავის უფიქრია.
ამ პატარა სუპერს მბიძგველ ძალას, მისთვის შესაფერისი ზომის აგრეგატი - ბენზინის ოთხცილინდრიანი 1.75-ლიტრიანი ტურბოძრავი ანიჭებს, რომელიც „ჯულიეტა კვადრიფოლიო ვერდესგანაა“ ნასესხები. ეს აგრეგატი 200 ცხენის ძალას იძლევა, მასთან კი წყვილდისკოიანი ქუროს მეშვეობით, უახლეს ავტომატურ ტრანსმისიაა (ალფა TCT) დაკავშირებული.

შესაძლოა, 200 ცხენის ძალა გეცოტაოთ, მაგრამ თუ გაითვალისწინებთ, რომ „ალფა რომეო 4C“ მხოლოდ 850 კილოგრამს იწონის, სიმძლავრესაც „ფასი მოემატება“. უფრო კონკრეტულად კი, მისი წონისა და სიმძლავრის ფარდობა დაახლოებით 4-ის როლია, რაც შესანიშნავი მაჩვენებელია. სიმსუბუქე იმან განაპირობა, რომ ავტომობილის ტანი მთლიანად კარბონის კომპოზიტისგანაა დამზადებული. მისი შეჯახების და ძრავის საყრდენი სტრუქტურები კი ალუმინის შენადნობისგანაა აწყობილი.

მცირე წონა „ალფა რომეო 4C-ის“ შეანიშნავ დინამიკურ მახასიათებლებს განაპირობებს: მაქსიმალური სიჩქარე 250 კმ/სთ-ია, ადგილიდან ასამდე აჩქარებას კი 5 წამზე ნაკლები ჰყოფნის.

ევროპელი დილერების შოურუმებში, „ალფა რომეო 4C“ მერმისს გამოჩნდება.

ევროპა „ტატა ნანოს“ ნაცვლად „ტატა პიქსელს“ მიიღებს

Tata’s plans for Euro market

14 მარტი

ორ წელიწადზე მეტია, ინდური კომპანია „ტატა“ მსოფლიოში ყველაზე იაფფასიან ავტომობილს - მინი ჰეჩბეკ „ნანოს“ უშვებს. ამავე პერიოდის განმავლობაში, პერიოდულად ჩნდება ცნობები იმის შესახებ, რომ „ტატა“ „ნანოს“ ევროპის ბაზრისთვისაც ამზადებს, რომელიც მის ინდურ ვერსიაზე ძვირი ეღირება.

მაგრამ ჟენევის ავტო გამოფენაზე, ინდურმა კომპანიამ სულ სხვა კონცეპტუალური ავტომობილი წარმოადგინა, სახელად „პიქსელი“, გამოფენის შემდეგ კი, ბრიტანულმა გამოცემა „ავტოქარმა“ გაავრცელა ინფორმაცია იმის შესახებ, რომ „ნანოს“ ნაცვლად, ევროპელებს „ტატა“ სწორედ „პიქსელს“, ან მის ბაზაზე შექმნილ სხვა ავტომობილს შესთავაზებს.

„პიქსელი“ სამკარიანი ჰეჩბეკია, რომელიც „ნანოზე“ 25 სანტიმეტრით მოკლეა. მისი სიგრძე სამ მეტრზე მეტი არ იქნება, წონა კი მაქსიმუმ 750 კილოგრამი უნდა იყოს. ინდური კომპანიის მფლობელი და შეფი რატან ტატა ამბობს, რომ სამკარიან ჰეჩბეკს მალე მის ხუთკარიან ვერსიასაც მოაყოლებს. მართალია, „პიქსელის“ საფუძვლად „ნანოს“ პლატფორმას გამოიყენებენ, თუმცა მას მოდერნიზაცია ჩაუტარდება, რათა ავტომობილის მართვადობა გაუმჯობესდეს და ის ნაკლებად ხმაურიანი იყოს.

რაც შეეხება „პიქსელის“ აღჭურვილობას, სავარაუდოდ, ის ისეთივე იქნება, როგორიც ჟენევაში ნაჩვენებ კონცეპტუალურ მოდელს აქვს. კერძოდ: ეს ავტომობილი აღჭურვილია სამცილინდრიანი, 1.2-ლიტრიანი ძრავით, რომელიც 60 ცხენის ძალას ავითარებს. ძრავთან შეწყვილებულია ვარიატორი და სისტემა სტოპ-სტარტი, ავტომობილი კი შემცირებული წინაღობის მქონე საბურავებზე დგას.

ინდური კომპანიის მიერ გავრცელებულ რელიზში წერია, რომ ამ აგრეგატებით აღჭურვილი „პიქსელი“, შერეული ციკლით გადაადგილებისას, 100 კილომეტრს 3.4 ლიტრი საწვავით გადის, ყოველ კილომტრზე კი ატმოსფეროი მხოლოდ 89 გრამ ნახშირორჟანგს გამოჰყოფს. ეს კი ევრო6 სტანდარტს, რომელიც ჯერ არ ამოქმედებულა, სრულად შეესაბამება.

კონცეპტუალური პიქსელი ასევე აღჭურვილია სისტემით, რომელიც მოსახვევში უკანა ბორბლებს ერთმანეთის საპირისპიროდ აბრუნებს. კერძოდ, შეზღუდულ სივრცეში მოხვევისას, ან პარკირებისას, გარე ბორბალი მოძრაობის მიმართულებით ბრუნავს, შიდა კი - საპირისპირო მიმართულებით. ამის წყალობით, ავტომობილის მოხვევის რადიუსი სულ რაღაც, 2.6 მეტრია. თუმცა, დიდი ალბათობით შეიძლება იმის ვარაუდი, რომ ამგვარ სისტემას სერიულ ავტომობილზე არ დააყენებენ, რადგან ის მის გაძვირებას და დამძიმებას გამოიწვევს.

„ტატა“ ევროპის ბაზარზე თავისი ახალი ავტომობილის შეტანას მერმისს აპირებს. რაც შეეხება „ნანოს“, ინდური კომპანია მას თვეში 9 000-ს აწარმოებს და იმედოვნებს, რომ წლიურ წარმოებას მალე 200 000-მდე აიყვანს. არც ისაა გამორიცხული, რომ „პიქსელის“ პარალელურად, ძველი კონტინენტის ბაზარზე, ცოტა მოგვიანებით „ნანოს“ მოდიფიზირებული და გაძვირებული ვერსიაც გამოჩნდეს.

„მაგნა შტეირის“ ჟენევური კონცეპცია - „მილა აეროლაითი“

Geneva 2011: Magna MILA Aerolight Concept

13 მარტი

კანადურ-ავსტრიული „მაგნა შტეირი“ ერთ-ერთი საავტომობილო კომპანიაა მათ შორის, რომლებიც საკუთარ ავტომობილებს არ აწარმოებენ და სხვების შეკვეთებით მუშაობენ. პარალელურად კი, საკუთარ პროექტებსაც ქმნიან, რომლებსაც ასევე სხვა კომპანიებს სთავაზობენ.

ცოტა ხნის წინ, „მაგნას“ და მის რუს პარტნიორებს, გასაჭირში მყოფი „ჯენერალ მოტორსისგან“ გერმანული „ოპელის“ გამოსყიდვა ნებავდათ, მაგრამ ამერიკულმა კომპანიამ არ დაუშვა, რომ მისი მოწინავე ტექნოლოგიები რუსებს ჩავარდნოდათ ხელში. და „მაგნამაც“ თავისი ძველი საქმიანობა გააგრძელა.

ერთ-ერთი პირველი პროექტი, რომელიც კანადურ-ავსტრიულმა გიგანტმა შექმნა, არის კონცეპტუალური კომპაქტური ჰეჩბეკი „მილა აეროლაითი“, ავტომობილი, რომლითაც მისი ავტორი თავისი შესაძლებლობების დემონსტრირებას ცდილობს. ეს არის მსუბუქი, ეკონომიური და ეკოლოგიურად სუფთა ავტომობილი. მისთვის ამ თვისებების მინიჭებაში, „მაგნას“ ინჟინრებს თანამედროვე, მსუბუქი და მტკიცე მასალების გამოყენება დაეხმარა.

ყოველივეს შედეგი კი ისაა, რომ კონცეპტუალური ავტომობილი მხოლოდ 700 კილოგრამს იწონის. ამასთან, ის საწვავად ბუნებრივ აირს მოიხმარს, რაც გამონაბოლქვში მავნე აირების მცირე შემცველობას განაპირობებს. ავტომობილის მზიდი ელემენტი ფოლადის სტრუქტურას წარმოადგენს, რომელიც პოლიმერული და სხვადასხვა ტიპის ბოჭკოთი (მათ შორის, კარბონის და კევლარის) არმირებული მასალებითაა გამაგრებული. ამის წყალობით, სიმსუბუქის გარდა, სტრუქტურა გრეხვითი დატვირთვებისადმი გაზრდილი მედგობიტაც გამოირჩევა.

„მილა აეროლაითი“ ორცილინდრიანი ძრავითაა აღჭურვილი, რომელიც საწვავად შეკუმშულ ბუნებრივ აირს იყენებს (სახელი აეროლაით ავტომობილის სიმსუბუქესა და იმ ფაქტზე მიგვანიშნრბს, რომ ის აირზე მუშაობს). კონცეპციის ავტორი ამ აგრეგატის მახასიათებლებს არ აქვეყნებს, თუმცა გვამცნობს, რომ საწვავი აირის შესანახად გამოყენებულია 55-ლიტრიანი მაღალი წნევის ავზი, რომელიც მხოლოდ 8 კილოგრამს იწონის. მისი ტევადობა კი საკმარისია იმსიათვის, რომ ავტომობილმა დაახლოებით 400 კილომეტრის გავლა შეძლოს. ამასთან, ძრავისა და საწვავის ეს კომბინაცია სუფთა გამონაბოლქვითაც გამოირჩევა - ყოველი კილომეტრის გავლისას, ატმოსფერო მხოლოდ 55 გრამი ნახშირორჟანგით ბინძურდება.

სხვათა შორის, სახელწოდება „მილა“ (მაგნას ინოვაციური მსუბუქი ავტომობილი) „მაგნამ“ პირველად ორი წლის წინ, კონცეპტუალური ელექტრომობილისთვის გამოიყენა.

„მერსედეს ბენცმა“ A კლასის ჰეჩბეკის კონცეპციის ესკიზი გამოაქვეყნა

Mercedes Benz A-Klasse Concept First Pic

12 მარტი

შარშან „მერსედეს ბენცმა“ გამოაცხადა, რომ მისი ორი ნაკლებად პოპულარული მოდელი - A და B კლასის ჰეჩბეკები, მალე მისი მომავალი საწარმოო პროგრამის ძირითადი შემადგენელი ნაწილები გახდება. ამ ორი ავტომობილით, სამქიმიანები თავიანთი ბრენდთ ახალგაზრდა მყიდველის მიზიდვას აპირებენ.

გერმანული კომპანია ახალი A კლასის ჰეჩბეკის კონცეპციის პრემიერას შანჰაის ავტო შოუზე აპირებს, მანამდე კი ამ ავტომობილის ფოტო ტიზერების გავრცელება და ასე მისადმი ყურადღების მიქცევა დაიწყო. პირველი ტიზერი ახალი ავტომობილის ესკიზია, რომლითაც მასზე გარკვეული შთაბეჭდილების მიღება შეიძლება.

ამ ესკიზის მიხედვით შეიძლება ითქვას, რომ ახალი A კლასს წინმორბედთან შედარებით, ახალგაზრდა მყიდველისთვის მისაღები, აგრესიული გარეგნობა აქვს. ეს ესკიზი რაღაცით კონცეპტუალურ F800-საც მოგვაგონებს, რომლის პრემიერაც ჟენევის შარშანდელ ავტო შოუზე შედგა და რომელიც ფაქტობრივად, სამქიმიანების ახალი სტილის მაჩვენებელი პირველი მერცხალია.

ამ ეტაპზე უცნობია, რა აგრეგატებით აღიჭურვება ახალი ავტომობილი. არაა გამორიცხული, რომ გამოფენაზე ის ჰიბრიდული აგრეგატით, ან სულაც ელექტრომობილად წარსდგეს. რა ტქმა უნდა, მისი სერიული ვერსია შიდაწვის ძრავებით აღიჭურვება, თუმცა შტუტგარტელები არ მალავენ, რომ A და B კლასის ჰეჩბეკებს წყალბადის ფიჭურ ელემენტებზე მომუშავე ელექტროაგრეგატებიტაც აღჭურვავენ.

შესაბამისი აგრეგატები ამერიკაში უკვე გადის ტესტირებას. ისინი B კლასის სამ ავტომობილზეა დამონტაჟებული, ეს ავტომობილები კი აშშ-ის გარშემო მოგზაურობენ. ამ გარბენს ტესტების გარდა, სარეკლამო დანიშნულებაც აქვს. რაც შეეხება შიდაწვის ძრავებს, მათ შორის აღარ იქნება 1.5-ლიტრიანი და მეტი მუშა მოცულობის მქონე აგრეგატები. მათ უფრო მცირე, კომპაქტური და რა თქმა უნდა, ეკონომიური ძრავებით შეცვლიან, რომლებსაც „მერსედეს ბენცი“ „რენო-ნისანის“ ალიანსთან კოოპერაციით შექმნის.

როგორც ჩანს, ეს ესკიზი ერთადერთი ტიზერი არ იქნება. შანჰაის შოუმდე, შტუტგარტელები თავიანთი სიახლის შესახებ, ინფორმაციის მორიგ დოზებს გამოაქვეყნებენ და მათ ჩვენი მკითხველიც აუცილებლად შეიტყობს...

„ფორდის“ შეფს „ფიატ 500-ის“ ამერიკული წარმატების არ სჯერა

Ford CEO Alan Mulally Believes Fiat 500 Won’t Succeed in the USA

12 მარტი

მალე „ფიატი“ თავის პოპულარულ რეტრო ჰეჩბეკ 500-ს ამერიკაში შეიტანს და ასე დაბრუნდება ატლანტიკის მეორე მხარეს. ავტო სამყაროს ბევრი ანალიტიკოსი ამ ავტომობილს შტატებში დიდ წარმატებას უწინასწარმეტყველებს. თუმცა არიან ისეთებიც, ვინც საწინააღმდეგოს ფიქრობს და მათ შორის, ერთ-ერთი გამორჩეულია „ფორდის“ მთავარი აღმასრულებელი ალან მიულალი (ზედა ფოტოზე).

იტალიურ ჟურნალ „პანორამასთან“ საუბრისას, მიულალიმ განაცხადა: „არა მგონია, ამერიკაში „ფიესტაზე“ პატარა ავტომობილებისთვის დიდი ბაზარი იყოს. მათ, ვინც ასეთი ავტომობილების შემოტანა სცადეს, არაფერი გამოუვიდათ“. მიულალის არ დაუზუსტებია, ვინ იგულისხმა „მათში“, თუმცა აშკარაა, რომ ეს „დაიმლერის“ ჯუჯა ავტომობილების მწარმოებელი „სმარტია“, რომელმაც 2008 წელს 24 624 ავტომობილი გაჰყიდა, თუმცა შარშან გაყიდვები 5 927-მდე შეუმცირდა.

რამდნიმე დღის წინ, „კრაისლერის“ მექსიკურმა ქარხანამ, რომელიც ქალაქ ტოლუკაში მდებარეობს, „ფიატ 500-ის“ წარმოება დაიწყო. ამ ქარხნის მოდერნიზაციისთვის, „კრაისლერმა“ და „ფიატმა“ 550 მილიონი დოლარის ინვესტიცია გაიღეს. ამ თანხის ნაწილი მათ მექსიკის მთავრობისგან სესხად აიღეს.

„კრაისლერის“ და „ფიატის“ მთავარმა აღმასრულებელმა სერჯო მარკიონემ განაცხადა, რომ ტოლუკას ქარხანა წლიურად 120 000 „ფიატ 500-ს“ გამოუშვებს და ეს ავტომობილები, მექსიკის გარდა, აშშ-ში, კანადასა და სამხრეთ ამერიკაში, ასევე ჩინეთში გაიყიდბა. სხვათა შორის, ტოლუკას ქარხანა ასევე უშვებს საშუალო ზომის ქროსოვერ „დოჯ ჯურნის“, ასევე მის ტყუპისცალ „ფიატ ფრიმონტს“, რომელთაგან პირველი ამერიკაში იყიდება, მეორეს კი მალე შეიტანენ ევროპის ბაზარზე.

„ფოლკსვაგენი“ ახალ კომპაქტვენს გამოუშვებს

VW to Build New Microbus Using Bulli Concept

12 მარტი

უკვე რამდენიმე თვეა, საავტომობილო გამოცემებში გამოითქმება ვარაუდები იმის შესახებ, რომ „ფოლკსვაგენი“ მიკროვენის წარმოებას აპირებს. ჟენევის საავტომობილო შოუზე კი, კონცეპტუალური „ბულის“ სახით, ამის დასტური (თუნდაც არაპირდაპირი) გამოჩნდა.

ჟენევაშივე, გერმანული კომპანიის კვლევისა და განვითარების შეფმა ულრიხ ჰაკენბერგმა დაადასტურა, რომ მისი კომპანია მზადაა, ექვსადგილიანი მრავალმხრივი დანიშნულების ავტომობილი გამოუშვას, რომელსაც მოდულარულ პლატფორმა MDS-ს გამოიყენებს.

ეს პლატფორმა უნივერსალურია და მისი რამდენიმე კლასის ავტომობილისთვის გამოყენებაა შესაძლებელი. „ფოლკსვაგენი“ მას თავისი რამდენიმე ახალი ავტომობილის საფუძვლად გამოიყენებს, რომელთა შორისაც, პირველი ახალი „აუდი A3“ იქნება. ამ პლატფორმის ძირითადი თვისება ისაა, რომ დიდი დანახარჯების გარეშე, მისი გაბარიტები და ძირითადი პარამეტრები ადვილად იცვლება და ამის წყალობით, სხვადასხვა ზომის და კლასის ავტომობილებისთვის მისი გამოყენება არანაირ სირთულეს არ წარმოადგენს. ასე კი უზარმაზარი თანხები დაიზოგება.

ბრიტანულ გამოცემა „ავტოქარის“ ინფორმაციით, ახალ მიკრობუსს ჩატანუგას (შტატი ტენესი) ქარხანაში არ გამოუშვებენ. ამ ქარხნის დანიშნულება კვლავაც მხოლოდ საშუალო ზომის სედან „პასატის“ წარმოება იქნება. ყველაზე რეალურია, რომ მიკროვენის საწარმოებლად, ვოლფსბურგელებმა თავიანთი პუებლას (მექსიკა) ქარხანა გამოიყენონ, რომელიც ახალ „ხოჭოს“ უშვებს.

კონცეპტუალური მიკროვენი „ბული“, რომლის მსოფლიო პრემიერასაც ჟენევის საავტომობილო შოუმ უმასპინძლა, ელექტრომობილია. ის ელექტროძრავითაა აღჭურვილი, რომელიც 85 კილოვატს იძლევა. ენერგიით მას ლითიუმ-იონური აკუმულატორების ბლოკი კვებას, რომლის ტევადობაც 40 კილოვატსაათია. გერმანული კომპანიის მონაცემებით, ეს ენერგია საკმარისია იმისათვის, რომ ავტომობილმა ერთი სრული დამუხტვით დაახლოებით 300 კილომეტრი გაიაროს. ამასთან, სპეციალური მოწყობილობის დახმარებით, აკუმულატორის სრული დამუხტვა ერთ საათში ესწრება.

ჰაკენბერგს არ დაუკონკრეტებია, თუ როდის დაიწყება ახალი მიკროვენის წარმოება და რა ერქმევა მას. შესაძლოა, ამ ავტომობილს კონცეპტუალურის სახელი შეუნარჩუნდეს, ან „კამპერი“ დაერქვას, როგორც ეს ცოტა ხნის წინ, „ფოლკსვაგენის“ მთავარმა დიზაინერმა კლაუს ბიშოფმა განაცხადა. სხვათა შორის, ამ სახელით, ვოლფსბურგელები თავიანთი პოპულარული „მიკრობუსის“ ტურისტულ ვერსიას უშვებდნენ.