”ბეემვე” პირველ ელექტრომობილს 2013 წელს გამოუშვებს

BMW to Launch All-Electric Megacity Vehicle in 2013

26 აპრილი

სააგენტო დოუ ჯონსთან საუბრისას, ”ბეემვეს” მთავარმა აღმასრულებელმა ნორბერტ რაიტჰოფერმა განაცხადა, რომ მისი კომპანია თავის პირველ ელექტრომობილს, რომელიც ამჟამად ”მეგასიტის” სახელითაა ცნობილი, 2013 წელს გამოუშვებს. ამასთან, ეს ავტომობილი სრულიად ახალი მარკით გაიყიდება, რომლის სახელსაც ბავარიელები ჯერჯერობით საიდუმლოდ ინახავენ.

რაიტჰოფერი ამბობს, რომ ”მეგასიტი” თავის კლასში სრულიად ახალ სტანდარტებს დაუდებს სათავეს, რომლებიც მისი კონკურენტებისთვის სამაგალითო იქნება. მისი მთავარი თვისება კი სიმსუბუქე გახდება. ელექტრომობილის კონსტრუქციაში მრავლად გამოიყენებენ მსუბუქ მასალებს, როგორიცაა ნახშირბადოვანი კომპოზიტი.

კომპოზიტური დეტალების წარმოებაში, ”ბეემვეს” პარტნიორობას გერმანული კომპანია ”SGL Group კარბონი” გაუწევს. მალე ისინი ერთობლივ საწარმოებს აშს-სა და გერმანიაში ააგებენ.

ბავარიელებს პარტნიორები ეყოლებათ ლითიუმ-იონური აკუმულატორების წარმოებაშიც - ”ბეემვეს” ელექტრომობილებისთვის, აკუმულატორების ბლოკებს ”ბოშთან” და ”სამსუნგთან” ერთად შექმნილი ერთობლივი საწარმო გამოუშვებს.

პარალელურად, ”ბეემვე” სრულიად ახალ ელექტრომობილს თავის ჩინელ პარტნიორთან, ”ბრილიანს ავტომოტივთან” ერთადაც შექმნის და ეს ავტომობილი, უპირველესად ჩინური ბაზრისთვის იქნება განკუთვნილი

ცნობისათვის, ელექტრომობილი ”მეგასიტი” პროექტ ”პროჯექტ i-ს” ფარგლებში მუშავდება. ამ პროექტს დასაბამი შარშან დაედო და ის ახალი ბრენდით, ეკოლოგიურად სუფთა სატრანსპორტო საშუალებათა შემუშავებას და ბაზარზე დამკვიდრებას ითვალისწინებს.

”ნისანი” ელექტრომობილ ”ლიფზე” შეკვეთებს ვერ აუდის

Nissan takes reservations for 6,635 Leafs in 3 days

26 აპრილი

სამ დღეში მას შემდეგ, რაც თავის პირველ ელექტრომობილ ”ლიფზე” შეკვეთების მიღება დაიწყო, ”ნისანის” ჩრდილოამერიკულ შტოს, მასზე ინტერნეტით 6 635 მოთხოვნა შეუვიდა. და ეს მაშინ, როდესაც ეს ავტომობილი ამერიკელ დილერთა შოურუმებში მხოლოდ დეკემბერში გამოჩნდება.
იაპონურმა კომპანიამ თავისი ამერიკული შტოს საიტზე შეკვეთების მიღება 20 აპრილს დაიწყო. მყიდველს საშუალება აქვს, ამ საიტზე განაცხადი შეიტანოს და ის სიმბოლური გადასახადით - 99 დოლარით გაამყაროს. კომპანიის პრესმდივანმა კეტრინ ზახარიმ განაცხადა, რომ სამ დღეში შემკვეთტა რაოდენობამ 6 635-ს მიაღწია. მისივე თქმით, შეკვეთების ინტერნეტით მიღება ოთხი კვირა გაგრძელდება. ”ნისანის” ხელმძღვანელობა იმედოვნებს, რომ სანამ ”ლიფს” დილერები მიიღებენ, მასზე 25 000 შეკვეთის მიღება მოესწრება.
მალე ”ნისანი” ქალაქ სმირნაში (შტატი ტენესი) ახალი ქარხნის მშენებლობას დაიწყებს, რაშიც 1.8 მილიარდი დოლარის ინვესტიციას გაიღებს. ეს თანხა, მშენებლობის გარდა, ქარხნის აღჭურვასაც მოხმარდება. მისი საწარმოო სიმძლავრე კი წლიურად 150 000 ცალი ელექტრომობილი ”ლიფი” და აკუმულატორების 200 000 ბლოკი იქნება.
”ნისან ლიფის” ამერიკული ვერსიის ღირებულება 32 780 დოლარია. მაგრამ ელექტრომობილი 7 500-დოლარიანი საგადასახადო შეღავათით ისარგებლებს, რისი წყალობითაც, მისი ღირებულება 25 280 დოლარამდე შემცირდება. ეს კი თითქმის ჰიბრიდული ”ტოიოტა პრიუსისა” და ”ჰონდა ინსაითის” ფასის ტოლფასია. თუმცა, ამ ფასში ტრანსპორტირების ხარჯები არ შედის.

”ნისანი” თავისი ელექტრომობილების შეძენის მსურველებს ერთ აუცილებელ პირობას უყენებს - ”ლიფის” შეძენა შესაძლებელია მხოლოდ იმ შემთხვევაში, თუ მყიდველს შინ აკუმულატორების დამმუხტავი საშუალება ექნება დამონტაჟებული. კომპანიაში ვარაუდობენ, რომ ყველა შემკვეთი, რომელმაც საიტზე წინასწარი თანხა უკვე შეიტანა, სასურველი ავტომობილის მიღებამდე, სახლში დამმუხტავ მოწყობილობას აუცილებლად დაამონტაჟებს. ”ნისანისვე” ინფორმაციით, თითოეული ასეთი მოწყობილობა, დამონტაჟების ხარჯთან ერთად, 2 200 დოლარი დაჯდება.

გარდა ამისა, ყველა შემკვეთი გაივლის ტესტირებას, რომლის დროსაც, ”ნისანის” სპეციალისტები შეაფასებენ, რამდენად შეესაბამება მყიდველის მართვის მანერა ელექტრომობილის შესაბამის კრიტერიუმებს. არაა გამორიცხული, რომ კომპანიამ ზოგიერთი მყიდველი დაიწუნოს. ამ შემთხვევაში, ასეთ შემკვეთებს, ასევე იმათ, ვისაც სახლში აკუმულატორების დამმუხტავი დამონტაჟებული არ ექნება, წინასწარ გადახდილი თანხა დაუბრუნდებათ.

დაკიდევ, პირველ ხანებში, ”ნისანი” თავის ელექტრომობილს იმ ქალაქებში გაყიდის, სადაც ელექტრომობილების დამუხტვისთვის საჭირო ინფრასტრუქტურა არსებობს. სხვათა შორის, ამერიკის ზოგიერთმა ქალაქმა, რეგიონმა და შტატმა (სან დიეგო, ჰიუსტონი, ფინიწსი-ტუსანის კორიდორი, შტატი ტენესი და შტატი ორეგონი) უკვე დაიწყო შესაბამისი ინფრასტრუქტურის განვითარება.

”ფერარი 599XX-მა” ნურბურგრინგის რეკორდი გააუმჯობესა

Ferrari 599XX

26 აპრილი

ბრიტანულ გამოცემა ”ქარ-ის” ცნობით, ”ფერარი 599XX” გერმანულ ავტოდრომ ნურბურგრინგის ჩრდილოური მარყუჟის ახალი რეკორდსმენი გახდა სერიულ ავტომობილებს შორის. ამ მანქანამ ნორდშლაიფი (ჩრდილოური მარყუჟი) 6 წუთსა და 58.16 წამში გაიარა და თითქმის 13 წამით გააუმჯობესა წინა რეკორდი, რომელიც გერმანულ სუპერ ავტომობილ ”გუმპერტ აპოლოს” ეკუთვნოდა.

ამაზე სწრაფად ნორდშლაიფ სარბოლი ავტომობილები გადიან, რომელთა შორისაც, საუკეთესო შედეგი დღეისათვის ბრიტანულ ”რადიკალ SR8-ს” ეკუთვნის, რომელსაც ერთი წრე 6 წუთსა და 48 წამში აქვს გავლილი. მართალია, ”ფერარი 599XX” სპეციალურად, ტრასის დღეებისთვის შექმნილი ავტომობილია და საერთო სარგებლობის გზებისთვის არაა შექმნილი, მაგრამ სარბოლთა კლასს არ განეკუთვნება. ”რადიკალი” კი სარბოლი ავტომობილის ბაზაზეა აგებული.

”ფერარი 599XX” პირველად შარშან, ჟენევის საავტომობილო შიუზე გამოჩნდა. ის კუპე ”599 GTB ფიორანოსგან” აღებული V12 ძრავითაა აღჭურვილი, რომლის სიმძლავრემაც, მოდიფიკაციის შემდეგ, 730 ცხენის ძალას მიაღწია. ძრავის ბრუნთა მაქსიმალური რიცხვი 9 000-ს აღწევს. დინამიკური მახასიათებლების გასაუმჯობესებლად, ”ფერარი 599XX” სისტემა ”ექტივფლოუთია” აღჭურვილი, რომელიც ავტომობილის აეროდინამიკურ მახასიათებლებს, მისი სიჩქარის შესაბამისად ცვლის და ამგვარად, გზასთან ოპტიმალურ ჩაჭიდებას უზრუნველყოფს. მაგალითად, 300 კმ/სთ სიჩქარეზე, აეროდინამიკური დატვირთვა 630 კილოგრამს აღწევს.

”ფერარი” ამ სატრეკო ავტომობილს მხოლოდ 29 ცალს დაამზადებს, თითოეულის ფასი კი 1.3 მილიონი ევრო იქნება.

”ფიატ 500-ის” ბაზაზე მინივენს დაამზადებენ

Fiat 500

26 აპრილი

დღიდან ბაზარზე მისი დაბრუნებისა, ”ფიატ 500” დიდი პოპულარობით სარგებლობს, საავტომობილო მედიამ მას წლის საუკეთესო ავტომობილის წოდებაც არგუნა. ბუნებრივია, ყოველივემ ტურინული კომპანიის მარკეტოლოგები ამ ავტომობილის ბაზაზე სხვა მოდელების წარმოების შესაძლებლობაზეც დააფიქრა.

ინტერნეტ გამოცემა ”ავტომოტივ ნიუსი” იუწყება, რომ თავიდან, ახალი ავტომობილი მხოლოდ ევროპული ბაზრისთვის იქნება განკუთვნილი. შემდეგ კი მას ამერიკაშიც შეიტანენ. ოღონდ, როდის მოხდება ეს, ჯერ დადგენილი არაა. სამაგიეროდ, გამოცემის სამი სხვადასხვა წყარო იუწყება, რომ ”ჩინკვეჩენტოს” ბაზაზე მინივენის წარმოება ”ფიატს” გადაწყვეტილი აქვს.

მინივენი რეალურად, ”ფიატ 500-ის” ოთხკარიანი ვერსია იქნება და მათ დიზაინში მცირე დეტალები განასხვავებს. შემუშავების პროცესში მყოფი ავტომობილის შიდაკორპორატიული კოდური სახელწოდება L0-ია. ის ”ჩინკვეჩენტოს” დაგრძელებულ პლატფორმას დაეფუძნება.

ახალ ავტომობილს კონცერნის ტურინული ქარხანა გამოუშვებს, ამერიკის ბაზრისთვის განკუთვნილ ვერსიას კი ”კრაისლერის” მექსიკურ ქარხანაში დაამზადებენ. სხვათა შორის, ეს ქარხანა ჩვეულებრივი 500-ის წარმოებასაც მალე დაიწყებს.

ამგვარად, მინივენი გახდება მეოთხე მოდელი, რომელსაც ”ფიატი” ამ პოპულარული ავტომობილის ბაზაზე გამოუშვებს. პირველი სამია: ჰეჩბეკი, კაბრიოლეტი და სპორტული ”აბარტი”.

ცოტა ხნის წინ, პრესაში გავრცელდა ინფორმაცია იმის შესახებაც, რომ ”ფიატი” 500-ის ბაზაზე მინი ქროსოვერის წარმოებასაც აპირებს. მაგრამ ჯერჯერობით, ეს ინფორმაცია არ დასტურდება.

აღსანიშნავია, რომ მალე ”კრაისლერი” ამერიკაში, ”ფიატის” მიერ წარმოებული ავტომობილის - სუბკომპაქტური სედანის თავისი ბრენდით გაყიდვას დაიწყებს. ამ ავტომობილს ”ფიატის” სერბული საწარმო გამოუშვებს. ეს ქარხანა ადრე სერბულ კომპანია ”ზასტავას” ეკუთვნოდა და რომლის აქციების 67 პროცენტიც ტურინელებმა შარშან გამოისყიდეს.

”ნისანი” ქალაქის ჯუჯას გამოუშვებს

Nissan Nuvu

26 აპრილი

იაპონური კომპანია ”ნისანი” მალე ბაზარზე ევროპაში პოპულარულ ჯუჯა ”ტოიოტა iQ-ს” კონკურენტს გამოუშვებს. ”ნისანისეული” ჯუჯა კონცეპტუალური ”ნუვუს” ბაზაზე შეიქმნება, რომელიც მან ორი წლის წინ, პარიზის საავრომობილო შოუზე წარადგინა.

ამ კონცეპტუალურ ავტომობილს ერთმოცულობიანი ძარა აქვს, თუმცა უფრო ჰეჩბეკს მოგვაგონებს. ზომით ის თითქმის iQ-ს ტოლია და მასავით, სალონში მხოლოდ სამი სავარძელი აქვს. ამასთან, წინა მგზავრის ადგილი საკმაოდ წინაა წაწეული.

არაა გამორიცხული, რომ ”ნისანის” ჯუჯას სპეციალური იაფფასიანი ვერსიაც ექნება, რომელიც პირველ რიგში, ინდური ბაზრისთვის იქნება განკუთვნილი. ამ ვერსიის ღირებულება 3 000 დოლარის ფარგლებში მოექცევა და ამგვარად, ის კონკურენციას გაუწევს ”ტატა ნანოს”, რომელიც დღეისათვის მსოფლიოს უიაფესი ავტომობილია. თუმცა, ვრცელდება ინფორმაცია, რომ ”ტატა ნანო” მალე გაძვირდება. ამგვარად, ”ნისანის” ჯუჯას სახით, მას მეტად სერიოზული კონკურენტი გამოუჩნდება.

”ნისანის” ჯუჯას ევროპული და ინდური ვერსიების გაყიდვები თითქმის ერთდროულად, 2012 წელს დაიწყება.

”შევროლე ვოლტი” მინივენის ფორმაში

Chevrolet Volt MPV5

23 აპრილი

”ჯენერალ მოტორსს” ჯერ თავისი ფართოდ რეკლამირებული ჰიბრიდული ”შევროლე ვოლტის” წარმოება არ დაუწყია, თუმცა მის პლატფორმაზე ახალი ავტომობილების შემუშავებას უკვე შეუდგა. ამ ახალთაგან პირველი კი არის - ”შევროლე ვოლტ MPV5”, რომელიც ერთდროულად კომპაქტვენიცაა და ქროსოვერიც და რომელიც შარშან, პარიზის საავტომობილო შოუზე ნაჩვენებ ”შევროლე ორლანდოს” ბაზაზეა შექმნილი.
”შევი ვოლტთან” შედარებით, ”ვოლტ MPV5-ზე” მსხვილგაბარიტიანია. მას 15 სანტიმეტრით გრძელი ბაზა აქვს. ამასთან, ”ვოლტზე” 18 სანტიმეტრით გრძელი, ამდენივეთი მაღალი და 7 სანტიმეტრით განიერია. კომპაქტვენ-ქროსოვერის საბარგულის მოცულობა 863 ლიტრია და თუ უკანა სავარძლებსაც დავკეცავთ, ის 1764 ლიტრამდე იზრდება.

”ვოლტ MPV5-ის” ჰიბრიდული დანადგარი თითქმის ისეთივეა, როგორიც ”ვოლტზე”. გაიზარდა მხოლოდ აკუმულატორების ტევადობა და გენერატორის სიმძლავრე. მარტო ელექტროძრავით ამ ავტომობილს 50 კილომეტრის გავლა შეუძლია. როცა აკუმულატორებში დაგროვილი ენერგია ამოიწურება, მაშინ საქმეში ბენზინის 1.4-ლიტრიანი ძრავი ერთვება, რომელიც გენერატორს ამუშავებს, ეს კი აკუმულატორებსაც მუხტავს და ენერგიით ელექტროძრავსაც ამარაგებს. შედეგად, ავტომობილის სვლის სიშორე 482 კილომეტრამდე იზრდება.

კონცეპტუალური ”ორლანდსგან” ”ვოლტ MPV5-ს” წინა ნაწილის სხვანაირი (ვოლტის მსგავსი) დიზაინი და სალონი განასხვავებს, რომელიც ასევე ”ვოლტის” სტილშია შესრულებული.

მაინც, რა სახელით გამოჩნდება ეს ავტომობილი ბაზარზე? გენერლები ამაზე ჯერჯერობით სდუმან. თუმცა, დიდია ალბათობა იმისა, რომ ისინი ”ვოლტის” ბაზაზე ცალკე სუბ-ბრენდს ქმნიან, როგორც ამას ”აუდი” ”e-ტრონთან” დაკავშირებით აკეთებს. თუ ასე მოხდა, მაშინ ”ვოლტ MPV5-ს” ეს სახელი შეუნარჩუნდება. მის შიდაწვისძრავიან ვერსიას კი ”ორლანდოს” სახელით გავიცნობთ.

”სიტროენ მეტროპოლისი” - კონცეპცია ჩინური დიზაინით

Citroen Reveals Chinese Designed Metropolis Concept

22 აპრილი

პეკინის საავტომობილო გამოფენაზე. ფრანგულმა კომპანია ”სიტროენმა” კონცეპტუალური ლიმუზინი ”მეტროპოლისი” წარადგინა, რომელიც ”PSA პეჟო-სიტროენის” საერთაშორისო ჯგუფის მიერ, შანჰაის დიზაინ-სტუდიაშია შექმნილი, რომლისთვისაც ეს პირველი ნამუშევარია.

”სიტროენ მეტროპოლისი” უფრო დიდია, ვიდრე ”მერსედეს-ბენცის” S-კლასის გრძელბაზიანი ვერსია. მისი სიგრძე 5.3 მეტრს აღწევს, სიგანეში კი (2.0 მეტრი) ”მაიბახ 62-ს” უტოლდება. მისი წარმოების დაწყების შემთხვევაში, ”სიტროენი” მისთვის ჯერაც უცხო ბაზარზე შეაბიჯებს.

”მეტროპოლისის” გარეგნობაში, კონცეპტუალურ მოდელ ”სიტროენ ჰიპნოსის” დიზაინთან მსგავსება შეინიშნება. მაგალითად, მათ ერთნაირი აქვთ კომპანიის ლოგო, რომელიც რადიატორის ზედა ნაწილშია მოთავსებული. მათ ასევე ერთნაირი აქვთ წინა ბამპერის კიდეებში განთავსებული ჰაერის ამღებები და უკანა ხედვის სარკეები. კონცეპტუალური ავტომობილი 21-დუიმიან, ორიგინალური დიზაინის მქონე ბორბლებზე დგას, რომლებიც 265/35 ზომის საბურავებითაა შემოსილი.

”მეტროპოლისი” აგებულია იმ პლატფორმის მოდიფიცირებულ ვერსიაზე, რომელსაც ”PSA პეჟო-სიტროენი” ორ მოდელზე - ”პეჟო 407-სა” და ”სიტროენ C6-ზე” იყენებს. ავტომობილი ჰიბრიდული ძალური დანადგარით და სრულამძრავიანი ტრანსმისიითაა აღჭურვილი, რომელშიც შედის გადაბმის ორდისკოიანი ქურო და 7-საფეხურიანი რობოტიზებული კოლოფი.

ჰიბრიდული დანადგარის ჯამური სიმძლავრე 460 ცხენის ძალაა, მაქსიმალური მაბრუნი მომენტი კი - 429 ნიუტონმეტრი. ჰიბრიდის მთავარი ნაწილია ბენზინის 2.0-ლიტრიანი V6 ძრავი, რომელთანაც შეწყვილებულია ელექტროძრავი. ამ უკანასკნელის ნომინალური სიმძლავრე 55 ცხენის ძალაა, თუმცა მცირე ხნით, მაქსიმუმმა შეიძლება 95 ცხენის ძალასაც კი მიაღწიოს.

კომპანიის განცხადებით, ”მეტროპოლისის” ჰიბრიდული დანადგარის მონაცემები, ბენზინზე მომუშავე 4.0-ლიტრიანი V8 ძრავისას შეესაბამება. სამაგიეროდ, ყოველი კილომეტრის გავლისას, ის ატმოსფეროს მხოლოდ 70 გრამი ნახშირორჟანგით აბინძურებს.

რა თქმა უნდა, ფრანგული კომპანია ჯერჯერობით არაფერს ამბობს იმაზე, აპირებს თუ არა ”მეტროპოლისის” ბაზაზე სერიული ავტომობილის შექმნას და წარმოებას. ინგლისური ჟურნალი ”ავტოქარი” კი აზუსტებს, რომ მისი წარმოების შემთხვევაში, ”მეტროპოლისი” ”ორმაგი შევრონის” სამოდელო გამაში ჯერ არარსებულ, უმაღლეს ნიშას დაიკავებს.

ცნობისათვის, დღეისათვის ”სიტროენისთვის” ჩინეთი მსოფლიოში მეორე უდიდესი ბაზარია. ამიტომ, გასაკვირი არ უნდა იყოს, რომ ასეთი მნიშვნელოვანი სიახლე პირველად სწორედ ჩინურ გამოფენაზე წარსდგა.

გინესის რეკორდსმენი ”დაიჰაცუ”

Daihatsu Mira EV

22 აპრილი

ელექტრომობილმა ”მირა EV-მ”, რომელიც ელექტრომობილების იაპონური კლუბის (JEVC - ჯაპან ელექტრო ვიჰაიქლ კლაბ) წევრებმა ”დაიჰაცუ მირას” ბაზაზე დაამზადეს, სვლის სიშორის მსოფლიო რეკორდი დაამყარა. მიღწევა ასევე ოფიციალურად დააფიქსირა გინესის რეკორდების წიგნმა.

ავტომობილმა, რომელიც კომპანია ”სანიოს” წარმოების აკუმულატორებითაა აღჭურვილი, სვლის სიშორის რეკორდი ჯერ კიდევ ნოემბერში დაამყარა, როდესაც აკუმულატორების ერთი დამუხტვით, 555.6 კილომეტრი გაიარა. მაგრამ მაშინ მიღწევა ოფიციალურად არ დაფიქსირებულა, რადგან გარბენს დამკვირვებლები არ დასწრებიან.

”მირა EV” მოძრაობაში 14-კილოვატიან ელექტროძრავს მოჰყავს, რომელიც ენერგიას ”სანიოს” წარმოების 8 320 ცალი ლითიუმ-იონური აკუმულატორისგან ღებულობს. ისინი ავტომობილის ძირზეა განლაგებული. სვლის სიშორის გასაზრდელად, ავტომობილი მაქსიმალურად შეამსუბუქეს და ”ტოიოტას” წარმოების საბურავებით აღჭურვეს, რომელსაც რხევისადმი შემცირებული წინააღმდეგობა აქვს. ავტომობილის შესამსუბუქებლად, მისი უკანა შუშა პლექსიგლასით შეცვალეს და სალონიდან უკანა სავარძლები ამოიღეს.

აღსანიშნავია, რომ ელექტრომობილებისთვის პირველი მსოფლიო რეკორდი ჯერ კიდევ 1899 წელს დაფიქსირდა, როდესაც ელექტროძრავით აღჭურვილმა მანქანამ 106 კმ/სთ სიჩქარე განავითარა. 100 წლის შემდეგ მორიგი რეკორდი დამყარდა - ამერიკულმა ”უაით ლაითნინგმა” 394 კმ/სთ სიჩქარე აკრიფა. 2007 წელს კი, ჩვეულებრივი ელემენტებით აღჭურვილი ავტომობილის სიჩქარემ 120 კმ/სთ-ს მიაღწია.

”ფორდ სტარტი” – ”ფიატ 500-ს” ახალი მეტოქე გამოუჩნდა

Ford Start Concept

22 აპრილი

პეკინის საერთაშორისო საავტომობილო შოუზე, ”ფორდმა” კონცეპტუალური ავტომობილი ”სტარტი” წარმოადგინა. როგორც კომპანიის რელიზში სწერია, ეს ავტომობილი სპეციალურად შეიქმნა იმისათვის, რომ მასთან ერთად, ”ფორდს” ტავისი ახალი ძრავი, სერია ”ეკობუსტის” 1.0-ლიტრიანი სამცილინდრიანი ძრავი წარმოედგინა.
აღსანიშნავია, რომ ბოლო სამ წელიწადში, ეს ”ფორდის” მიერ შექმნილი პირველი კონცეპტუალური მოდელია. ამასთან, ამერიკულმა კომპანიამ თავისი კონცეპტუალური ნამუშევარი ჩინეთში პირველად გამოფინა. როგორც დირბორნელთა მთავარი დიზაინერი ჯეი მეისი ამბობს, ამ კონცეპციაზე მუშაობისას, ”ფორდის” სტრატეგიული კონცეპციების სტუდიის (რომელიც შტატ კალიფორნიის ქალაქ ირვინში მდებარეობს) სპეციალისტების მიზანი არ ყოფილა აეროდინამიკურად დახვეწილი ავტომობილის შექმნა. ”სტარტის” მთავარი დანიშნულება, თავისი გარეგნობით შოუს დამთვალიერებელთა ყურადღების მიქცევაა. სტენდთან მისული დამთვალიერებელი კი ამ კონცეპციის მთავარი დეტალის - 1.0-ლიტრიანი ძრავის შესახებ ინფორმაციასაც გაეცნობა.

ამ აგრეგატის ტექნიკური მონაცემები ჯერ არ ქვეყნდება. სამაგიეროდ ცნობილია, რომ 6-საფეხურიანი მექანიკური კოლოფი შეუწყვილდება. აგრეგატი წარმოებისთვის თითქმის მზადაა. ამასთან, მას ისეთივე მონაცემები უნდა ჰქონდეს, როგორიც 1.6-ლიტრიან ოთხცილინდრიან აგრეგატებს აქვს. ინტერნეტში გავრცელებული ინფორმაციით, ახალი აგრეგატის სიმძლავრე 89-108 ცხენის ძალა იქნება. რაც მთავარია, მის მიერ გამობოლქვილ აირში, ნახშირორჟანგის შემცველობა კილომეტრზე 100 გრამიც არ იქნება.

კონცეპტუალური ავტომობილი ფოლადისა და ალუმინისგან შეკრულ შასიზეა აგებული. ”სტარტის” ძარა გადამუშავებადი კომპოზიტისგანაა დამზადებული, რომელიც ფორმირების წინ იღებება. ამ მასალების გამოყენებით, ”ფორდის” ინჟინრებმა ავტომობილის წონის შემცირებას მიაღწიეს, რაც საბოლოო ჯამში, მის ეკონომიურობასა და ეკოლოგიურობაზე დადებითად აისახება.

”ფორდი” აცხადებს, რომ ”სტარტის” წარმოება არ იგეგმება. თუმცა, პრესაში უკვე გაჩნდა ვარაუდები, რომ ”სტარტის” სახით, ”ფორდმა” თავის პოპულარულ საქალაქო მოდელ ”კა-ს” ახალი ვერსია გვიჩვენა. სავარაუდოდ, თუ ბაზარზე გამოსვლა ეღირსა, ის კონკურენციას ”ფიატ 500-ს” გაუწევს.

”ბენტლიმ” ჩინელებისთვის სპეციალური მოდელები შექმნა

Two Bentley Continental Exclusively for China

22 აპრილი

ბრიტანულმა კომპანია ”ბენტლიმ”, ჩინური ბაზრისთვის სპეციალურად მოამზადა თავისი ორი მოდელის - ”კონტინენტალ GT-ს” და ”კონტინენტალ ფლაინგ სპურ სპიდის” მოდიფიკაციები, რომლებიც მხოლოდ ჩინურ ბაზარზე გაიყიდება. ორივე ავტომობილის პრემიერა ”ბენტლიმ” პეკინის საერთაშორისო საავტომობილო გამოფენას დაამთხვია.
კომპანიის მიერ გამოფენისთვის მომზადებულ რელიზში წერია, რომ ჩინეთის ბაზარი ”ბენტლისთვის” მესამე უმსხვილესია - შარშან იქ ამ კომპანიამ 421 ავტომობილის რეალიზება შეძლო. სწორედ ამის გამო გადაწყდა, რომ კომპანიის ორი ყველაზე პოპულარული ავტომობილის მოდიფიცირება ჩინური ბაზრის მოთხოვნების შესაბამისად ჩატარებულიყო.

ორივე ავტომობილი უმნიშვნელოდაა შეცვლილი და თანაც, ორივე შემთხვევაში, ცვლილება მხოლოდ კოსმეტიკურია. ამასთან, ორივე ავტომობილი ისევ იმ აგრეგატებითაა აღჭურვილი, რომლებითაც მათი საბაზო ვერსიები. ძრავი 6.0-ლიტრიანია, V12 კონფიგურაციით. ”კონტინენტალ GT-ს” შემთხვევაში, მისი სიმძლავრე 560 ცხენის ძალაა, ”კონტინენტალ ფლაინგ სპურ სპიდის” შემთხვევაში კი - 610 ცხენის ძალა. ორივე ავტომობილზე, ძრავთან 6-საფეხურიანი ავტომატური კოლოფია შეწყვილებული.

რაც შეეხება გარეგნულ ცვლილებებს, ”კონტინენტალ GT-ს” სახელწოდებაში დაემატება ”დიზაინ სერის ჩაინა”. ამ ავტომობილის სალონი ორი ფერის ტყავით და შავი, ”როიალ” ფერის ლაკით შეღებილი ხის დეტალებითაა გაწყობილი. სალონში, ცენტრალურ კონსოლზე, წინა ფრთებსა და ზღურბლებზე გამოჩნდება წარწერა ”დიზაინ სერის ჩაინა”.

უფრო მეტი ცვლილებაა ”კონტინენტალ ფლაინგ სპურ სპიდის” შემთხვევაში. ზემოთ ჩამოთვლილი სიახლეების გარდა, ეს ავტომობილი ასევე მიიღებს უფრო კომფორტულ საკიდარს და 20-დუიმიან ბორბლებს. შეცვლილია გამოსაბოლქვი სისტემა, რისი მიზანიც, ავტომობილის ხმაურის შემცირება იყო.

”ფიატი” რეორგანიზაციას იწყებს

Fiat Separates its Auto Operations from Truck and Tractor Divisions

22 აპრილი

მარცხნიდან: მარკიონე, დი მონტეძემოლო და ელკანი

.................................................................

”ფიატ S.p.A.-ს” მთავარმა აღმასრულებელმა სერჯო მარკიონემ გამოაქვეყნა იტალიური კომპანიის ხუთწლიანი სამოქმედო ფეფმა, რომლის მიხედვითაც, მისი საავტომობილო შტო სატვირთო ავტომობილებისა (ივეკო) და ტრაქტორების მწარმოებელ (ქეის ნიუ ჰოლანდი) შტოებს დაშორდება. ამ ორის საფუძველზე კი სრულიად ახალი კომპანია, სახელად ”ფიატ ინდასტრიალ S.p.A.”.

მარკიონემ ასევე გამოაცხადა, რომ ავტომობილების მწარმოებელი ბრენდები, როგორებიცაა ”ფიატი”, ”ალფა რომეო”, ”ლანჩა”, ”ფერარი” და ”მაზერატი”, ჰოლდინგ ”ფიატ S.p.A.-ს” შემადგენლობაში დარჩებიან. ამავე ჰოლდინგში დარჩება ძრავებისა და ტრანსმისიების მწარმოებელი შტო ”ფიატ პაუერტრაინ ტექნოლოჯიზი”.

მარკიონე დასძენს, რომ ზემოთ აღნიშნული კომპანიების დაშორების პროცესი ამ წლის ბოლომდე დასრულდება. მისი აზრით, ჰოლდინგში საავტომობილო ჯგუფის დატოვება ხელს შეუწყობს ”ფიატის” და ”კრაისლერის” ჯგუფის სწრაფ და მყარ ინტეგრაციას. პარალელურად, ტურინელები ამერიკულ კომპანიაში თავის წილს, მალე 20-დან 35 პროცენტამდე გაზრდიან.

”ფიატის” ხუთწლიანი გეგმის ძირითადი გეგმა ითვალისწინებს, რომ ”ფიატის” ჯგუფში შემავალმა საავტომობილო კომპანიებმა და ”კრაიელსრის” კომპანიებმა (კრაისლერი, დოჯი, ჯიპი) ერთად განახორციელონ შესყიდვები, საინჟინრო სამუშაოები, ერთმანეთს მაკომპლექტებლები გაუზიარონ და განვითარების ერთობლივი გეგმები დასახონ.

”ჩვენი გეგმა ითვალისწინებს, რომ 2010-დან 2014 წლამდე პერიოდში, ჩვენი კომპანია, ”კრაისლერთან” ერთად, რეალურად გახდეს გლობალური ბაზრის მოთამაშე. ”კრაისლერის” გარეშე, ”ფიატი” მთელი არსებობის განმავლობაში, დიდი ბაზრიდან გარიყული კომპანიის როლში ყოფნისთვის იქნებოდა განწირული”, - ”ფაინენშლ ტაიმსთან” საუბრისას განაცხადა მარკიონემ.

ორი კომპანიის შეფი დასძენს, რომ ”ფიატი” და ”კრაისლერი” ერთმანეთს ზოგიერთ მოდელს გაუცვლიან, შემდგომში კი, ახალ მოდელებს ერთობლივად შეიმუშავებენ. იტალიური კომპანია, ამერიკელი პარტნიორისგან უგზოობის მოდელებისა და მინივენების წარმოების გამოცდილებას გაიზიარებს, თავად კი მას კი მინი, სუბკომპაქტურ და კომპაქტურ პლატფორმებს შესთავაზებს. ამგვარად, ორივე კომპანიას, მათთვის ახალ სეგმენტებში შეღწევის რეალური საშუალება მიეცემა.

ამგვარი პარტნიორობა ყველაზე ინტენსიურად ”ლანჩასა” და ”კრაისლერს” შორის განხორციელდება. კერძოდ, იტალიური მარკის მართვას ”კრაისლერი” განახორციელებს. უფრო მეტიც, ”ლანჩას” უკლებლივ ყველა მოდელის შემუშავებაში, ”კრაისლერის” სპეციალისტები მიიღებენ მონაწილეობას და მათ ამერიკული კომპანია თავისი მარკითაც გამოუშვებს.

იმავდროულად, გამოცხადდა, რომ ”ფიატის” ჯგუფის აღმასრულებლის პოსტს დატოვებს ლუკა კორდერო დი მონტეძემოლო, ვინც ტურინული კონცერნის დირექტორთა საბჭოში დარჩება და პარალელურად, ”ფერარის” აღმასრულებელიც იქნება.

”ლუკა კორდერო დი მონტეძემოლომ ეს გადაწყვეტილება თავად მიიღო და ის იმ გარემოებით ახსნა, რომ შესრულებულია ყველა ის მიზანი, რომლებსაც მას აკისრებდნენ, როდესაც ამ თანამდებობაზე 2004 წელს დანიშნეს”, - ნათქვამია ”ფიატის” მიერ გამოქვეყნებულ რელიზში. ამ განცხადების გამოქვეყნებამდე, ინტერნეტით გავრცელდა ცნობები იმის შესახებ, რომ თითქოს, მონტეძემოლო არ ეთანხმება იმ ხუთწლიან გეგმას, რომელიც მარკიონემ შეიმუშავა და სწორედ ამის გამო გადაწყვიტა თანამდებობის დატოვება. სხვა ვერსიით, ის პოლიტიკაში წასვლას აპირებს.

მონტეძემოლოს ადგილს დაიკავებს ”ფიატის” ვიცე აღმასრულებელი ჯონ ელკანი, ვინც ტურინული კონცერნის ყოფილი აღმასრულებლის, ჯოვანი ანიელის შვილიშვილია. სიკვდიამდე ცოტა ხნით ადრე, ანიელის ნათქვამი აქვს, რომ ჯონი მომავალში ”ფიატის” აღმასრულებელი უნდა გახდეს. სხვათა შორის, ელკანი ანიელის ოჯახის მფლობელობაში არსებულ კომპანია ”ექსორ S.p.A.-ს” აღმასრულებელია, კომპანიისა, რომელიც ”ფიატის” აქციების 30 პროცენტს აკონტროლებს და მისი უმსხვილესი აქციონერია. თავის დროზე, სწორედ ელკანის დამსახურება იყო ის, რომ ადვოკატი მარკიონე ”ფიატის” მთავარი აღმასრულებელი გახდა.

ჰიბრიდული ტექნოლოგია ”ჰონდას” სპორტული ავტომობილისთვის

Honda CR-Z

20 აპრილი

80-იან წლებში, იაპონური კომპანია ”ჰონდა” კომპაქტურ სპორტულ ჰეჩბეკ CR-X-ს უშვებდა, რომელიც ახლაც კი პოპულარულია სიჩქარის მოყვარულ ახალგაზრდებს შორის (მათ შორის, საქართველოშიც). მაგრამ ამ მოდელის წარმოების შეწყვეტიდან (1991 წლი) თითქმის ორი ათეული წელი ისე გავიდა, რომ მისი ადგილი ცარიელი დარჩა. რამდენიმე წლის წინ, იაპონურმა კომპანიამ გამოაცხადა, რომ 21-ე საუკუნის პირველი დეკადის მიწურულს, ბაზარზე CR-X-ის შემცვლელს გამოუშვებდა. ეს შარშან უნდა მომხდარიყო, მაგრამ ეკონომიკური კრიზისის გამო, მისმა პრემიერამ ერთი წლით დაიგვიანა.
ახალ სპორტულ ჰეჩბეკს, სახელად ”ჰონდა CR-Z”, სახელი ოდნავ შეცვლილი აქვს - ექსტრემალური ხასიათის აღმნიშვნელი X-ის ადგილი Z-მა დაიკავა. ოღონდ, ამჯერად ეს ავტომობილი უბრალო სპორტქარი არაა - იაპონურმა კომპანიამ ის ჰიბრიდული სისტემით აღჭურვა და რაც მთავარია, სპორტული თვისებები შეუნარჩუნა. ასე განსაჯეთ, ახალი მოდელის გარეგნობაშიც ადვილად ამოიცნობთ მისი წინამორბედის სტილს.
CR-X-ის მსგავსად, CR-Z-იც სპორტული, დინამიური გარეგნობით გამოირჩევა. თუმცა, ”ჰონდას” დიზაინერებმა მასში პოპულარულ ჰიბრიდულ მოდელ ”ინსაითის” დიზაინის ელემენტებიც ჩააქსოვეს. მაგალითად, ორშუშიანი უკანა კარი. უფრო სწორედ, კარი, რომელსაც ქვედა ნაწილი გამჭვირვალე აქვს. სხვათა შორის, დიზაინის ეს ელემენტი CR-X-საც ახასიათებდა და როგორც ჩანს, ”ჰონდაში” ჩათვალეს, რომ ამ პოპულარულ ავტომობილთან მსგავსება, კომპანიის სხვა მოდელებსაც გამოადგება.
CR-Z-ს ინდივიდუალობას მისი უზარმაზარი რადიატორიც ანიჭებს, რომელიც საკმაოდ დაბლაა დაწეული. საქარე მინა იმდენადაა დახრილი, რომ თავისუფლად შეიძლება კაპოტის გაგრძელებად ჩაითვალოს. იგივე ითქმის სახურავსა და უკანა კარზე - სად მთავრდება პირველი და იწყება მეორე, ამის თქმა ალბათ თვით ”ჰონდას” დიზაინერებსაც გაუჭირდებათ. ავტომობილის დინამიურობაზე, მის გვერდებზე დატანილი პროფილირებული ზოლიც მიგანიშნებთ, რომელიც წინ, ბორბლის თაღთან იწყება და უკანა საყრდენის შემდეგ იკარგება.

აეროდინამიკის გასაუმჯობესებლად, განსაკუთრებული ყურადღებით მისი უკანა ნაწილის დამუშავებას მიექცა. რა თქმა უნდა, ავტომობილის არაერთმა პროტოტიპმა, აეროდინამიკურ მილში მრავალი საათი გაატარა. ამის შედეგია ის, რომ ავტომობილის უკანა ფრთების ზედა ნაწილები შიგნითაა გადახრილი. ასე ისინი ჰაერის მეტ ნაკადს ატარებენ კუდისკენ და ავტომობილს უფრო გარსშემოდენილს ხდიან, რაც მაღალ სიჩქარეზე მას უფრო მდგრადს ხდის.

სპორტული სტილი CR-Z-ის ინტერიერშიც ხაზგასმულია. ჯერ ერთი, სალონი გადატვირთული არაა სხვადასხვა დამხმარე მოწყობილობების პანელებით. მეორეც, სავარძლები სპორტულ სტილშია შესრულებული - მათ გვერდითა საყრდენები აქვთ, რომლებიც მაღალი სიჩქარით მოძრაობისას, მძღოლის ადგილზე უკეთ დაფიქსირებისთვისაა მოწოდებული.

მართალია, სალონში დამხმარე და გასართობ მოწყობილობათა მართვის საშუალებები თვალში არ გვხვდება, მაგრამ ეს არ ნიშნავს, რომ ავტომობილს ისინი არ აქვს. მაგალითად, საბაზო კომპლექტაციაში შედის კლიმატ კონტროლის და აუდიო სისტემები, ასევე გასაღების გარეშე ძრავის დაქოქვის სისტემა. დამატებითი თანხის გადახდის შემთხვევაში კი, შესაძლებელი იქნება სალონის ტყავით გაწყობა, გამჭვირვალე სახურავის, შუქდიოდური ფარების და უფრო მძლავრი აუდიო სისტემის დაყენება.

რა თქმა უნდა, ახალ ავტომობილში მთავარი ჰიბრიდული ძალური დანადგარია. მისი მთავარი ელემენტია სერია i-VTEC-ის 1.5-ლიტრიანი ძრავი (ბენზინის), რომელიც 114 ცხენის ძალას იძლევა. ელექტროძრავის სიმძლავრე მხოლოდ 14 ცხენის ძალაა. წესით, ჰიბრიდული სისტემის ჯამური სიმძლავრე 128 ცხენის ძალა უნდა ყოფილიყო, თუმცა სტენდზე ტესტირებისას, დინამომეტრმა მხოლოდ 124 ცხენის ძალა დააფიქსირა, მაბრუნმა მომენტმა კი 174 ნიუტონმეტრს მიაღწია. ”ჰონდას” მონაცემებით, ამ აგრეგატით, CR-Z-ს 100 კილომეტრის გასავლელად, 5.0 ლიტრი ბენზინი ეყოფა.

იაპონური კომპანია აცხადებს, რომ ახალი ავტომობილის შექმნისას, დიდი დრო დაეთმო მისი გამოსაბოლქვი სისტემის დამუშავებას. ჯერ ერთი, ამით შესაძლებელი გახდა გამონაბოლქვ აირში მავნე მინარევების შემცველობის შემცირება. მეორეც, ”ჰონდას” სპეციალისტებმა შესძლეს, რომ CR-Z-ს სპორტული ავტომობილებისთვის დამახასიათებელი ბოხი ხმა ჰქონოდა.

CR-Z-ის ჰიბრიდული სისტემა სამ რეჟიმში მუშაობს. ესენია სპორტული, ეკონომიური და სტანდარტული რეჟიმები. მათი მეშვეობით, მძღოლს შეუძლია ავტომობილი სპორტულ, ან ეკონომიურ სტილში მართოს. ან, ეს ორი თვისება ერთმანეთს შეუხამოს. მანქანას აქვს ასევე ფუნქცია ”ეკო სქორ”, რომელიც მართვის ეკოლოგიურობასა და ეკონომიურობას აფასებს. მაგალითად, მოძრაობის დასრულების შემდეგ, მონიტორზე გამოისახება მონაცემები, თუ გარკვეულ მონაკვეთზე მოძრაობისას, ძრავმა რამდენი საწვავი მოიხმარა და რა რაოდენობით ნახშირორჟანგი გამოყო. შესაბამისად, კომპიუტერი მართვის შეფასებას იძლევა. შეფასება მწვანე ფოთლებით ხდება. რაც მეტია ფოთოლი, მით მაღალია მართვის შეფასება.

სხვათა შორის, ”ჰონდა CR-Z” პირველი ჰიბრიდული ავტომობილია, რომელშიც ძრავთან 6-საფეხურიანი მექანიკური კოლოფია შეწყვილებული. ეს კი მას შემდეგ გადაწყდა, რაც მარჯეტოლოგების მიერ ჩატარებულმა კვლევამ აჩვენა, რომ ასეთი კოლოფით, ავტომობილი ევროპულ ბაზარზე უფრო პოპულარული იქნება. საინტერესოა ისიც, რომ ავტომობილი მეტწილად (92%) განახლებადი მასალებითაა დამზადებული. ესე იგი, ”ჰონდა CR-Z” თითქმის მთლიანად, მეორად გადამუშავებას ექვემდებარება.

იაპონური კომპანია იმედოვნებს, რომ ”ჰონდა CR-Z” ისეთივე პოპულარული გახდება, როგორიც თავის დროზე CR-X იყო. ეს ავტომობილი უკვე იყიდება იაპონიაში, მალე კი მისი შეძენის საშუალება ევროპელებსაც მიეცემათ. მოგვიანებითვე გამოცხადდება მისი ფასი.

შემდეგ ევროპულ ალიანსში ”პეჟო-სიტროენი” შევა

Fiat Chairman Says Next European Car Alliance May Involve PSA

19 აპრილი

ასე ფიქრობს ”ფიატისა” და ”კრაისლერის” მთავარი აღმასრულებელი სერჯო მარკიონე. ”ახლა ალბათ ”PSA პეჟო-სიტროენის” ჯერია. მათ უკვე სცადეს ”მიცუბიში მოტორსთან” ალიანსის შექმნა, მაგრამ არაფერი გამოუვიდათ, თუმცა ამაზე კი ალბათ არ გაჩერდებიან”, - ამბობს მარკიონე.

”PSA პეჟო-სიტროენის” ევროპაში სიდიდით მეორე უდიდესი (ფოლკსვაგენის შემდეგ) ავტომწარმოებელია. მისი და ”მიცუბიში მოტორსის” ხელმძღვანელობა მოლაპარაკებას აწარმოებდა აქციების პაკეტების გაცვლის თაობაზე, თუმცა ეს მოლაპარაკება უშედეგოდ დასრულდა. არადა, ფრანგულ და იაპონურ კომპანიებს არაერთი ერთობლივი პროექტი აქვთ განხორციელებული და რამდენიმეზე ერთობლივად მუშაობენ.

მართალია, მხარეებს შორის შეთანხმება ვერ შედგა, თუმცა მათ მოილაპარაკეს, რომ მომავალში კიდევ უფრო გააღრმავებენ პარტნიორულ ურთიერთობებს. სხვათა შორის, სანამ ”ფიატი” ”კრაისლერის” აქციების 20 პროცენტს გამოისყიდდა, მარკიონე აცხადებდა, რომ ”PSA პეჟო-სიტროენთან” ალიანსის შექმნა ორივე კომპანიისთვის მისწრება იქნებოდა.

მარკიონეს არაერთხელ უთქვამს, რომ თანამედროვე კონკურენციის პირობებში, დამოუკიდებლობას მხოლოდ ის კომპანიები შეინარჩუნებენ, რომელთა წლიური წარმოება 5 მილიონზე ნაკლები არაა. თუ გავითვალისწინებთ, რომ შარშან ”ფიატმა” დაახლოებით 2 მილიონი ავტომობილი გამოუშვა, ”კრაისლერმა” კი 1.3 მილიონი, შეიძლება ვივარაუდოთ, რომ ”ფიატის” შეფს ალიანსში კიდევ ერთი მსხვილი ავტომწარმოებლის დამატება სურს.

შედარებისთვის, ”PSA პეჟო-სიტროენმა” შარშან 3.2 მილიონი ავტომობილის რეალიზება შეძლო. ესე იგი, თუ ”ფიატ-კრაისლერი” და ფრანგული კომპანია გაერთიანდება, მათი ჯამური წლიური გაყიდვები მარკიონესეულ კრიტიკულ ზღვარს გასცდება.

”ფერარი 599 GTO-ს” მთელი ტირაჟი უკვე გაყიდულია

Ferrari's 599 GTO Already Sold Out

19 აპრილი

ინტერნეტში გავრცელდა ინფორმაცია იმის შესახებ, რომ ”ფერარიმ” თავის უახლეს ავტომობილ 599 GTO-ზე შეკვეთების სრული პაკეტი მიიღო. იტალიურმა კომპანიამ თავის ისტორიაში ყველაზე სწრაფი საგზაო ავტომობილის პრეზენტაცია 16 აპრილს, ქალაქ მოდენას საჰერცოგო სასახლე ”პალაცო დუკალეში” ჩატარდა, სადაც ამჟამად სამხედრო აკადემია მდებარეობს. სხვათა შორის, ამავე სასახლეში, სამი წლის წინ, ”მაზერატიმ” თავისი ”კვატროპორტე ავტომატიკის” პრეზენტაცია ჩაატარა.

”ფერარი 599 GTO-ს” პრეზენტაციას კომპანიის უმაღლესი ხელმძღვანელობაც - დირექტორთა საბჭოს თავმჯდომარე ლუკა დი მონტეძემოლო, მთავარი აღმასრულებელი ამადეო ფელისა და ვიცე აღმასრულებელი პიერო ფერარი (ენცო ფერარის შვილი) დაესწრო. ცერემონიაში მონაწილეობა ”ფერარის” ტესტ პილოტებმა და აკადემიის კადეტებმა, ასევე ”ფერარის” 500-მა კლიენტმა მიიღო.

”ფერარი” სულ 599 ცალი ”599 GTO-ს” წარმოებას აპირებს და გავრცელებული ინფორმაციით, ყველა მათგანზე შეკვეთები უკვე მიღებული აქვს. ამ დღეებში, ავტომობილის მსოფლიო პრემიერა პეკინში, საერთაშორისო საავტომობილო გამოფენაზე ჩატარდება და წარმოიდგინეთ ჩინელების გაოცება, როდესაც ისინი დაიგებენ, რომ ამ ავტომობილით მხოლოდ ვიზუალურად ტკბობას შეძლებენ, რადგან მისი ყიდვის საშუალება უკვე აღარ მიეცემათ. რა თქმა უნდა, გამორიცხული არაა, რომ 599 შემკვეთს შორის ჩინელებიც იყვნენ. ცნობისათვის, ”ფერარი 599 GTO-ს” ღირებულება 350 000 ევროა.

”ფერარის” ისტორიაში ყველაზე სწრაფი სერიული ავტომობილი 6.0-ლიტრიანი V12 ძრავითაა აღჭურვილი, რომლის პირვანდელი ვარიანტიც ლეგენდარულ ”ფერარი ენცოზე” გამოიყენებოდა. ეს აგრეგატი 661 ცხენის ძალას ავითარებს, 41-ით მეტს, ვიდრე სტანდარტული 599 GTB. მისი მაქსიმალური მაბრუნი მომენტი კი 619 ნიუტონმეტრს აღწევს. ავტომობილი 1495 კილოგრამს იწონის, რაც 195 კილოგრამით ნაკლებია 599 GTB-ს წონაზე.

ავტომობილი ადგილიდან 100 კმ/სთ სიჩქარის აკრეფას 3.35 წამში ახერხებს, მისი მაქსიმალური სიჩქარე კი 335 კმ/სთ-ს აღწევს.

მეტოქეობა პარტნიორებს შორის

battle brews between new partners Daimler and Renault

19 აპრილი

კარლოს გონი (მარცხნივ) და დიტერ ცეტშე (მარჯვნივ) ალიანსის შექმნის ცერემონიაზე

..............................................................................

”დაიმლერმა” და ”რენო-ნისანმა” ალიანსი ახლახანს ჩამოაყალიბეს, მაგრამ არსებობს მათი საქმიანობის სფეროები, რომლებშიც ისინი კონკურენტებად დარჩებიან. ესაა ელექტრომობილებისთვის საჭირო აკუმულატორების წარმოება.

”დაიმლერის” მთავარი აღმასრულებელი დიტერ ცეტშე ამბობს, რომ მისი კომპანია, ელექტრომობილებისთვის განკუთვნილი აკუმულატორების წარმოების მხრივ, მსოფლიო ლიდერი გახდება. მაგრამ პრობლემა ისაა, რომ იგივე მიზანი ”რენო-ნისანის” შეფ კარლოს გონსაც ამოძრავებს.

კარლოს გონი ”ნისან ლიფის” პრეზენტაციაზე

........................................................

ორივე კომპანია ელექტრომობილების შესაქმნელად ერთობლივად მუშაობას აპირებს, მაგრამ აკუმულატორები ის სფეროა, რომელშიც ისინი მეტოქეობას გააგრძელებენ. და არაა გამორიცხული, რომ საბოლოო ჯამში, ამ მეტოქეობამ ალიანსის მომავალზეც (რა თქმა უნდა, უარყოფითად) იმოქმედოს.

ერთი კვირის წინ, როდესაც ალიანსის შექმნის თაობაზე, ოფიციალურ საბუთებს ხელი მოაწერეს, ცეტშემ და გონმა ცარიელი დატოვეს ის გრაფები, სადაც აკუმულატორების წარმოების თანამშრომლობაზე იყო ლაპარაკი. ამავე ხელშეკრულების ძალით, ისინი ერთობლივად შემუშავებულ მოდელებზე თავ-თავის აკუმულატორებს გამოიყენებენ. მაგალითად, მომავალ ”სმარტს” და ”ტვინგოს” ისინი ერთიანი ძალისხმევით შექმნიან. მაგრამ თუ ”სმარტი” ”დაიმლერის” აკუმულატორებს მიიღებს, ტვინგოს ”რენოს” წარმოების აკუმულატორები ექნება.

”ადრეც და ახლაც, ”დაიმლერი” იყო და არის იმ ტიპის კომპანია, რომელიც განსაკუთრებული გულმოდგინებით უფრთხილდება საკუთარ ინოვაციურ ტექნოლოგიებს და მათ არავის უნაწილებს. რამდენადაც ”დაიმლერის” აკუმულატორები მახასიათებლებით შეიძლება საუკეთესო იყოს, იმდენად ”რენოს” აკუმულატორებს ფასის მხრივ ექნება უპირატესობა და შესაძლოა, უფრო კონკურენტუნარიანი იყოს”, - ამბობს საავტომობილო ბაზრის კვლევების გაერთიანება ”ფროსტ ენდ სალივანის” დირექტორი ანილ ვალსანი.

”დაიმლერი” მსოფლიოში ლუქსის კლასის ავტომობილების მეორე უდიდესი მწარმოებელია. ”რენო” კი მეორე უდიდესი ფრანგული კომპანიაა. ორივე კომპანიაში მიაჩნიათ, რომ ელექტრომობილების წარმოების სფეროში ყველაზე მნიშვნელოვანი, ენერგიის შენახვის ტექნოლოგიებია. უფრო მეტიც, გერმანული კომპანიის განვითარების განყოფილების შეფი თომას ვებერი ამბობს, რომ თუ თანამედროვე ავტომობილების გულად ძრავია მიჩნეული, ელექტრომობილებში ამ ”პოზიციას” აკუმულატორებს მიანიჭებენ.

”რენოსა” და ”ნისანის” გარდა, ”დაიმლერი” ელექტრომობილების შემუშავების სფეროში, ასევე ჩინურ BYD-თან ითანამშრომლებს, რომელიც ლითიუმ-იონური აკუმულატორების (რომლებიც კომპიუტერებსა და ტელეფონებში გამოიყენება) წარმოების მხრივ, მსოფლიოს ერთ-ერთი ლიდერია. ჩინურ კომპანიასთან კოოპერაციით შექმნილი ელექტრომობილი პირველ რიგში, ჩინური ბაზრისთვის იქნება განკუთვნილი.

”ჩვენი მიზანი არის და იქნება ის, რომ ელექტრომობილების წარმოების სფეროში მსოფლიო პიონერი გახდეს. მალე ელექტრომობილების წარმოება მასობრივ ხასიათს მიიღებს და ჩვენ ამ სფეროშიც, კონკურენტუნარიანები ვიქნებით”, - ამბობს ცეტშე.

პარალელურად, ნულოვანი გამონაბოლქვის მქონე ავტომობილების წარმოების სფეროში, ლიდერობას ”რენოსა” და ”ნისანს” მათი მთავარი აღმასრულებელი კარლოს გონი უწინასწარმეტყველებს. ამ მხრივ, ეს ორი კომპანია პირველ დიდ ნაბიჯს ამ წლის მიწურულს გადადგამს, როდესაც ევროპულ ბაზარზე ელექტრომობილი ”ნისან ლიფი” გამოჩნდება. მალე კი მას ”რენოს” ოთხი ელექტრომობილი მოჰყვება, რომელთა წინასერიული პროტოტიპების ხილვაც, ფრანკფურტის შარშანდელ საავტომობილო შოუზე იყო შესაძლებელი.