ელექტრომობილი მალე ჩვენი ცხოვრების განუყოფელი ნაწილი გახდება

18 იანვარი

შევროლე ვოლტი

..............................

მსოფლიო საავტომობილო ბაზარს ელექტრომობილების ბუმი უახლოვდება. თუმცა არსებობს რამდენიმე პრობლემა, რომელთა მოგვარების გარეშე, მოლოდინი მოლოდინადვე დარჩება.

ჯერ ერთი, თანამედროვე ელექტრომობილები სიძვირით გამოირჩევა, რასაც ლითიუმ-იონური აკუმულატორების მაღალი ფასი განაპირობებს. თავის მხრივ, ასეთ აკუმულატორებს დღეს კონკურენტი არ მოეპოვება. მეორეც, პრობლემაა სვლის სიშორე - მართალია, ავტომფლობელთა ყოველდღიურ მოთხოვნებს თანამედროვე ელექრტომობილები თავისუფლად აკმაყოფილებს, მაგრამ როგორც ჩანს, ეს საკმარისი არაა.

შევროლე ვოლტის პლატფორმა

..............................

და მესამე: ჯერჯერობით, ელექტრომობილების ნორმალური ექსპლუატაციისთვის საჭირო ინფრასტრუქტურა, მსოფლიოს არცერთ ქვეყანაში არ არსებობს. ამ ინფრასტრუქტურიდან ყველაზე მთავარი დასამუხტი წერტილებია, მის განვითარებას კი დრო და უზარმაზარი ინვესტიციები დასჭირდება.

შევროლე ვოლტი დამუხტვისას

..............................

1. ფასის ფაქტორი მართლაც მნიშვნელოვანია, რადგან ლითიუმ-იონური აკუმულატორების „წყალობით“, თანამედროვე ელექრტომობილების ფასი, შესაბამისი კლასის შიდაწვისძრავიან ავტომობილებზე 2-2.5-ჯერ ძვირია. თავად განსაჯეთ, კომპაქტური შევროლე ვოლტის საბაზო ღირებულება 42 ათასი დოლარია, იმავე კლასის ნისან ლიფი კი 35 ათასი ღირს. მათი ღირებულების ნახევარზე მეტს, სწორედ აკუმულატორები განაპირობებს.

სიძვირესთან ერთად, ასეთ აკუმულატორებს შეზღუდული სამუშაო რესურსიც აქვს. კერძოდ, მაქსიმუმ 1 000 დამუხტვა-განმუხტვას უძლებს (ჩინური BYD უფრო მეტს გვპირდება), რის შემდეგაც ისინი შესაცვლელია. ესე იგი, დამატებით ხარჯს მოითხოვს. სამაგიეროდ, ჯენერალ მოტორსმა გამოიკვლია და დაადგინა, რომ თუ შევროლე ვოლტით დღეში საშუალოდ 60 კილომეტრს გადიხართ, წლიურად დაახლოებით 1 700 ლიტრ ბენზინს დაზოგავთ. და თუ დღიური გარბენი 100 კილომეტრია, მაშინ საწვავის დანაზოგი 2 200 ლიტრს მიაღწევს. გარდა ამისა, ამერიკული კომპანიის ევროპული შტოს, ოპელის მარკეტოლოგებმა გამოითვალეს, რომ ელექტრომობილით კილომეტრის გავლა დაახლოებით 0.02 ევროცენტი ჯდება, როცა შიდაწვისძრავიანი ავტომობილის შესაბამისი მაჩვენებელი ევრო 0.09 ცენტია (ეს იმ შემთხვევაში, როდესაც ლიტრი ბენზინი 1.16 ევრო ღირს).

ნისან ლიფი დამუხტვისას

..............................

მოკლედ, საექსპლუატაციო ხარჯის სიმცირე ნაწილობრივ აბალანსებს აკუმულატორების მაღალ ფასს. ამასთან, ელექტრომობილების მასობრივად წარმოება, აკუმულატორების ფასის შემცირებას განაპირობებს. ესეც რომ არა, ამჟამად ავტომწარმობლები და ელექტრონიკის სფეროში მომუშავე კომპანიები, საავტომობილო აკუმულატორების ფასის შემცირების და მახასიათებლების გაუმჯობესების გზებს ინტენსიურად ეძებენ და ამ პროცესის შედეგიც, აკუმულატორების ფასის შემცირება იქნება.

კანკუნში (მექსიკა), გაერთიანებული ერების კლიმატთან დაკავშირებულ სამიტზე, რომელიც დეკემბერში ჩატარდა და რომელსაც საქართველოს პრეზიდენტი მიხეილ სააკაშვილი დაესწრო, აშშ-ის ენერგეტიკის დეპარტამენტის მდივანმა სტივენ ჩუმ განაცხადა, რომ ფასის მხრივ, ელექტრომობილი შიდაწვისძრავიან ავტომობილს, რეალურ კონკურენციას ხუთ წელიწადში გაუწევს.

ნისან ლიფი

..............................

2. სვლის სიშორის მაჩვენებლით, სუფთა ელექტრომობილი დღეს შიდაწვისძრავიან ავტომობილს ვერანაირ კონკურენციას ვერ გაუწევს. თუმცა ისიც ფაქტია, რომ ამერიკაშიც კი, სადაც საშუალოსტატისტიკური ავტომფლობელი დღეში 60-100 კილომეტრს გადის, ელექტრომობილი მათს მოთხოვნილებებს სრულად დააკმაყოფილებს.

სვლის სიშორის გასაზრდელად, აკუმულატორების ტევადობის გაზრდაა საჭირო, რაც ამ ეტაპზე, მხოლოდ ბლოკში ელემენტების დამატებით შეიძლება. ეს კი ავტომობილს გააძვირებს. არსებობს მეორე გზაც, რომელიც ჯენერალ მოტორსმა შევროლე ვოლტისთვის გამოიყენა - ძალურ დანადგარს მცირელიტრაჟიანი შიდაწვის ძრავი დაამატა, რომლის დანიშნულებაც მხოლოდ გენერატორის ამუშავებაა. მათი ტანდემი დენს მხოლოდ იმ შემთხვევაში გამოიმუშავებს, როდესაც ელექტრონიკა დაადგენს, რომ აკუმულატორებში დაგროვილი ენერგია გამოლევაზეა.

რა თქმა უნდა, დამატებითი აგრეგატები ავტომობილს აძვირებს, მაგრამ ფასის მატება უფრო მცირეა, ვიდრე აკუმულატორების დამატების შემთხვევაში იქნებოდა. სამაგიეროდ, (შევროლე ვოლტის) სვლის სიშორე 500 კილომეტრამდე გაიზარდა. მართალია, ამის გამო, ვოლტი ლიფზე 7 000 დოლარით ძვირია, მაგრამ ამერიკაში ჩატარებული გამოკითხვები ცხადყოფს, რომ იქაური მყიდველი უპირატესობას უფრო ძვირ ვოლტს ანიჭებს. და აქ ამერიკელების პატრიოტიზმის ფაქტორი არაფერ შუაშია...

3. რაც შეეხება ინფრასტრუქტურას, აქ ერთი საინტერესო ფაქტის მოყვანა შეიძლება - ელექტრომობილის მფლობელს შეუძლია, რომ აკუმულატორები შინ, იმ დროს დამუხტოს, სანამ მანქანა ფარეხში დგას. ჩვეულებრივი საყოფაცხოვრებო შტეპსელით დამუხტვას 6-8 საათი სჭირდება, რაც იმას ნიშნავს, რომ ღამის განმავლობაში, აკუმულატორები სულად შეივსება. თუ სწრაფი დამუხტვაა საჭირო, არც ესაა პრობლემა - სპეციალური მწყობილობით, აკუმულატორები ნახევარ საათში, დაახლოებით 80 პროცენტით ივსება.

დაბოლოს, იმის შესახებ, რომ საქართველოს მთავრობას თავისი ავტოპარკის ელეტრომობილებით შეცვლა აქვს გადაწყვეტილი. „ნიუ იორკ ტაიმსში“ გამოქვეყნებული ინფორმაციით, 4 000 ცალი შევროლე ვოლტი (სწორედ ამდენი ელექტრომობილის შეძენას ვაპირებთ) 164 მილიონი დოლარი დაჯდება, ამდენივე ნისან ლიფი კი - 128 მილიონი. თუ ჩვენი მთავრობა ცოტას მოიცდის და ამ განზრახვას სისრულეში ორი წლის შემდეგ მოიყვანს, ფასები აუცილებლად, მნიშვნელოვნად დაიწევს.

აქ ისიც უნდა გავითვალისწინოთ, რომ ჯენერალ მოტორსის მიერ ჩატარებული გამოკვლევის მიხედვით, რომელზეც ზემოთ ითქვა, 4 000 შევროლე ვოლტი ჩვენს მთავრობას წლიურად 6.8-8.8 მილიონ ლიტრ ბენზინს დააზოგვინებს.

სხვათა შორის, მალე ელექტრომობილების ბაზარზე კიდევ რამდენიმე ახალი ავტომობილი გამოჩნდება, რომლებსაც ვოლტსა და ლიფზე უკეთესი საფასო მაჩვენებლები ექნებათ. იმ დროისთვის კი, როცა ახლა შეძენილი ელექტრომობილების აკუმულატორები შესაცვლელი გახდება, ლითიუმ-იონური ელემენტების ფასიც საგრძნობლად (2-3-ჯერ) შემცირებული იქნება და ელექტრომობილების ექსპლუატაციაც, მთავრობის პარკში არსებულ შიდაწვისძრავიან ავტომობილებზე გაცილებით იაფი დაჯდება.

ჰო, მართლა, ნისან ლიფი ახლახანს ევროპის 2011 წლის საუკეთესო ავტომობილად დაასახელეს, შევროლე ვოლტმა კი საუკეთესოს წოდება ჩრდილოეთ ამერიკაში დაიმსახურა...

დეტროიტის ავტო შოუ

16 იანვარი

მინი

ინგლისური კომპანია, რომელიც გერმანული ”ბეემვეს” ჯგუფში შედის, მალე თავის საწარმოო პროგრამას კიდევ ერთი შეანიშნავი ავტომობილით გააფართოებს, რომელიც უკვე პოპულარულ ქროსოვერ ”ქანთრიმენის” ბაზაზე შეიქმნა. ესაა სამკარიანი კუპე-ქროსოვერი ”პეისმენი”, რომლის წყალობითაც, ”მინის” სამოდელო გამა შვიდამდე გაიზრდება.

დერტოიტის გამოფენაზე ჩატარებულ პრეზენტავიაზე, ”ბეემვეს” გაყიდვების და მარკეტინგის მენეჯერ იან რობერტსონს არ დაუზუსტებია, თუ როდის დაიწყება ”პეისმენის” სერიული წარმოება. სავარაუდოდ, ეს მას შემდეგ მოხდება, რაც ”მინი” კუპესა და როდსტერის წარმოებას (შესაბამისად, წელს და მერმისს) დაიწყებს.

არსებობს ვარაუდი იმისა, რომ ”პეისმენი” ინგლისური კომპანიის ოჯახში ყველაზე ძვირადღირებული ავტომობილი გახდება. რაც უნდა იყოს, დეტროიტში წარმოდგენილი კონცეპტუალური ავტომობილი ”მინი ჯონ კუპერ უორკსისგან” აღებული, ბენზინის 1.6-ლიტრიანი ტურბო ძრავითაა აღჭურვილი, რომელიც 211 ცხენის ძალას იძლევა.

დეტროიტშივე ბავარიელებმა გამოაცხადეს, რომ არ აპირებენ ”მონის” ბაზაზე დამზადებული ელექტრომობილის სერიულ წარმოებას. მისი ტესტირება კიდევ ერთ წელს გასტანს, რის შემდეგაც, პროგრამა შეჩერდება. ”ბეემვეს” განმარტებით, ასეთი ელექტრომობილის წარმოება არც იგეგმებოდა. რაც შეეხება იმას, რომ რამდენიმე ათეული ასეთი მანქანა დამზადდა, მათ განმარტეს, რომ ამ პროგრამის მიზანი პროექტ ”მეგასიტის” მარკეტინგული გამოკვლევის ჩატარება იყო და სხვა არაფერი.

მერსედეს-ბენცი

შტუტგარტულმა კომპანიამ გადაწყვიტა, რომ ელექტრომობილების ბაზარზე პირველად სუპერ ავტომობილით შეაბიჯოს და ალბათ არ ცდება - დღევანდელი ელექტრომობილები სიძვირით გამოირჩევა და თუ საშუალო და კომპაქტური ავტომობილებისთვის ეს სიძვირი თვალში საცემია, სუპერ ავტომობილისთვის ადვილად ასატანია.

SLS AMG E-Cell-ს კიდევ ერთი მისია აკისრია - მან ელექტრომობილებისადმი საზოგადოების წარმოდგენა უნდა შეცვალოს. ჯერჯერობით ელექტრომობილები ტემპერამენტით არ გამოირჩევიან, რასავ ვერ ვიტყვით სამქიმიანების ქმნილებაზე. ეს ავტომობილი ოთხი ელექტროძრავითაა აღჭურვილი (თითო ყოველ ბორბალზე), რომელთა ჯამური სიმძლავრეც 525 ცხენის ძალას, მაბრუნი მომენტი კი 800 ნიუტონმეტრს შეადგენს.

ამ აგრეგატების დახმარებით, ავტომობილს ადგილიდან 100 კმ/სთ-მდე აჩქარება 4 წამში შეუძლია, რაც დაახლოებით 0.2 წამით მეტია ამავე ავტომობილის ბენზინისძრავიანი ვერსიის (570 ცხ.ძ) აჩქარებაზე. ელექტროძრავებს ენერგიით ლითიუმ-იონური აკუმულატორების ნლოკი ამარაგებს, რომელთა შევსებაც ნაწილობრივ მუხრუჭების ენერგიის რეკუპერაციის სისტემითაც ხდება. ჯერჯერობით, შტუტგარტელები თავიანთი სუპერ ელექტრომობილის სვლის სიშორის მონაცემებს არ ამხელენ.

დეტროიტის ავტო შოუ

16 იანვარი

ტრადიციისამებრ, წლის პირველ დიდ საავტომობილო შოუს დეტროიტის საგამოფენო კომპლექსი ”კობო სენტერი” მასპინძლობს, სადაც აწ უკვე მსოფლიოს მეორე უდიდეს საავტომობილო ბაზარზე წილის გაზრდის მოსურნე კომპანიები, თავიანთი სიახლეებით იწონებენ თავს.

დიდი კრიზისი დეტროიტულ გამოფენას განსაკუთრებით შარშან დაეტყო, თუმცა კრიზისმა ძალა დაკარგა და ეს უმალ აისახა ავტომწარმოებელთა აქტივობაზე - მათ გამოფენაზე 27 მსოფლიო პრემიერა მოაწყეს. აქედან 14 კონცეპტუალურია, 13 კი - წარმოებისთვის მომზადებული ავტომობილი. გარდა ამისა, ჩატარდა ჩრდილოამერიკული ბაზრის 6 პრემიერა და წარმოადგინეს 4 კონცეპცია.

გამოფენაზე აკრედიტაცია ამერიკის 39 შტატის და მსოფლიოს 63 ქვეყნის ჟურნალისტებმა გაიარეს. რა თქმა უნდა, უფრო დიდი ინტერესი ამერიკელების მხრიდანაა - უცხოელ ჟურნალისტებზე დარეგისტრირებულთა მხოლოდ 27 პროცენტი მოდის.

გამოფენას თავისი გამორჩეული ვარსკვლავებიც ჰყავს: რომელია მათგან ყველაზე კაშკაშა - ”პორშეს” სარბოლი 918 RSR, ”ფორდის” კონცეპტუალური ”ვერტრეკი”, ”მინის” სპორტული ქროსოვერი ”პეისმენი”, თუ ”ჰიუნდაის” უგზოობის კონცეპტუალური ”ქარბი”? ან იქნებ, ”მერსედესის” ყვითელი ფოსფორის ფერში გამოწყობილი სუპერ ელექტრომობილი SLS AMG E-Cell?

პორშე

”პორშეთი” დავიწყოთ, რადგან გერმანული კომპანია ბოლო ოთხ წელიწადში პირველად ეწვია ”კობო სენტერს” და დაბრუნება შესანიშნავი ავტომობილით აღნიშნა. გამოფენამდე ერთი თვით ადრე, შტუტგარტუი კომპანიის ხელმძღვანელობა გვპირდებოდა, რომ დეტროიტში რაღაც განსაკუთრებულს გვიჩვენებდა, მაგრამ კონკრეტულად რას, ამაზე კრინტიც არ დაუძრავს.

და მაინც, მაშინვე გაჟონა ინფორმაციამ იმის შესახებ, რომ ეს ”რაღაც განსაკუთრებული”, ჟენევის შარშანდელ გამოფენაზე წარმოდგენილი ”918 სპაიდერის” დახურული ვერსია იქნებოდა. ასეც მოხდა, შტუტგარტელთა სტენდზე დადგა ერთადგილიანი ავტომობილი, რომელიც რბოლებისთვისაა მომზადებული და გამოფენაზეც შესაბამისად გაფორმებული წარსდგა.

ამ ავტომობილს სამი ძრავი ემსახურება, რომელთაგან ერთი შიდაწვისაა, ორი კი - ელექტრონული. პირველი აგრეგატი არის 3.4-ლიტრიანი V8 და ის 563 ცხენის ძალას იძლევა (10 300 ბრ/წთ-ზე). დანარჩენი ორი კი ელექტროძრავია, თითოეული 102 ცხენის ძალით.

შიდაწვის ძრავი მაბრუნი მომენტით უკანა ბორბლებს ამარაგებს, ელექტროძრავები კი წინა ბორბლებს ემსახურება. ავტომობილი ორადგილიანი შეიძლებოდა ყოფილიყო, რომ არა ერთი გარემოება - მეორე სავარძლის ადგილი ენერგიის რეკუპერაციის სისტემას უკავია, რომელიც ელექტროძრავებისთვის ენერგიას მუხრუჭებიდან გამოიმუშავებს. საერთოდ, რეკუპერაციის სისტემებით მიღებული ენერგია აკუმულატორებში გროვდება ხოლმე. მაგრამ ”პორშემ” სხვა გზა აირჩია და ენერგიის დაგროვების საშუალებად მქნევარა გამოიყენა. სხვათა შორის, ეს სისტემა ფორმულა 1-ის ინგლისურმა გუნდმა ”უილიამსმა” შეიმუშავა და მართალია, რბოლებში არ გამოუყენებია, მაგრამ ”პორშემ” მისი გამოყენება მაინც ისურვა.

ფორდი

”ფორდის” პავილიონის მთავარი პერსონაჟები, პოპულარულ კომპაქტვენ ”C-მაქსის” ჰიბრიდული ვერსიები - ენერჯი და ჰიბრიდი, ასევე კონცეპტუალური ქროსოვერების, ”კუგას” და ”ისკეიპის” ახალი ვერსიაა, სახელად ”ვერტრეკი”, რომელიც მალე გამოჩნდება ამერიკული კომპანიის დილერების შოურუმებში.

”C-მაქსის” ორივე ჰიბრუდულ ვერსიაში ამძრავ ძალას ელექტროძრავები გამოიმუშავებს. ოღონდ, ენერჯიში, რომელიც პლაგ-ინ ჰიბრიდების კლასს განეკუთვნება, ავტომობილის მოძრაობას მხოლოდ ელექტროძრავი უზრუნველყოფს, შიდაწვისას კი მხოლოდ მეორეხარისხოვანი როლი აქვს (გენერატორს აბრუნებს). რაც შეეხება ვერსია ჰიბრიდს, მასშიც ძირითადი ელექტროძრავია, თუმცა მასთან ერთად, ავტომობილს მბიძგველ ძალას შიდაწვის აგრეგატიც ანიჭებს, რომელიც იმავდროულად, გენერატორსაც ატრიალებს.

ენერჯის სვლის სიშორე 800 კილომეტრს აღწევს და ეს იმის ხარჯზე, რომ როცა აკუმულატორები განიმუხტება, საქმეში შიდაწვის ძრავის და გენერატორის ტანდემი ერთვება და ელექტროძრავებისთვის საჭირო ენერგიას ისინი გამომუშავებენ. ამ მაჩვენებლით, ”C-მაქს ენერჯის” გაცილებით უკეთესი მაჩვენებელი აქვს, ვიდრე ”შევროლე ვოლტს”, რომელიც დეტროიტის გამოფენაზე, ჩრდილოეთ ამერიკის ბაზრის წლის საუკეთესო ავტომობილად დასახელდა.

რაც შეეხება ”ვერტრეკს”, ის ახალი ”ფოკუსის” პლატფორმაზეა ბაზირებული და სერია ”ეკობუსტის” ბენზინის ძრავითაა აღჭურვილი. ეკონომიურობის გასაუმჯობესებლად, ავტომობილს ასევე სისტემა სტოპ-სტარტი გააჩნია. ისე კი, უნდა ითქვას, რომ ამ ავტომობილისთვის ეკონომიური ძრავების მთელი გამაა გათვალისწინებული. მისი სერიული ვერსიის პრემიერა ფრანკფურტის წლევანდელ გამოფენაზე იგეგმება და იქვე ”ფორდი” მის შესახებ უფრო დაწვრილებით ინფორმაციასაც გაავრცელებს. დეტროიტში კი დირბორნელებმა გვიჩვენეს, თუ როგორი იქნება ახალი ”კუგა/ისკეიპი”.

”ფორდი” ევროპაში მეორე ადგილს ინარჩუნებს

Ford, Still Number 2 in Europe

13 იანვარი

ბოლო წლებში, ”ფორდმა” რამდენიმე შესანიშნავი ავტომობილის წარმოება დაიწყო და კიდევ უკეთესები, პრემიერამდე კარგა ხნით ადრე გააცნო საზოგადოებას, ეს ყველაფერი კი მის გაყიდვებზე პირდაპირ აისახება. მართალია, ამის მიუხედავად, ამერიკული კომპანია ევროპის ბაზარზე ახლოსაც ვერ მიდის ლიდერ ”ფოლკსვაგენთან”, მაგრამ სამი წელია, ძველ კონტინენტზე მეორე ადგილს არავის უთმობს და ამით საფუძვლიანადაც ამაყობს.

2009 წელს, როცა მსოფლიო ავტოინდუსტრია ღრმა კრიზისმა მოიცვა, ”ფორდი” იმ იშვიათ მწარმოებელთაგანი იყო, რომელიც პოზიციების შენარჩუნებას ახერხებდა, რაშიც ხელი სხვადასხვა გარემოებამ შეუწყო. და ისე გამოვიდა, რომ 2009 წელს უფრო მეტი ავტომობილი გაჰყიდა, ვიდრე შარშან. თუმცა, შარშანაც შეინარჩუნა ევროპის მეორე უდიდესი მწარმოებლის წოდება.

კერძოდ, შარშან ცისფერმა ოვალმა ძველ კონტინენტზე 1 279 000 ავტომობილის გაყიდვა მოახერხა. ევროპის 19 ქვეყნის ბაზრებზე, ამერიკული კომპანიის საერთო წილი 0.7 პროცენტით დაეცა და 8.4 პროცენტი შეადგინა. სხვათა შორის, ყველაზე ძნელი დეკემბერი გამოდგა, რომლის განმავლობაშიც, გაყიდვები 20 პროცენტზე მეტით შემცირდა. თუმცა, გაყიდვების კლების მიუხედავად, ”ფორდმა” ევროპაში მეორე ადგილი მაინც შეინარჩუნა და როგორც მისი მარკეტოლოგები ვარაუდობენ, წელს გაყიდვების ზრდაა მოსალოდნელი.

”ევროპული ავტო ინდუსტრიისთვის, გასული წელი გამოწვევებით იყო აღსავსე. ადვილი ცხოვრება არც ჩვენ გვქონია. წინასწარ ვიცოდით, რომ გაყიდვები შეგვიმცირდებოდა და ბაზრის მცირე წილს დავკარგავდით, რასაც ობიექტური მიზეზები ჰქონდა. ამის ძირითადი მიზეზი კი ის იყო, რომ წინა წელს, ”ფიესტას” და ”კა-ს” გაყიდვების ზრდას, შეღავათებმა შეუწყო ხელი”, - ამბობს ”ფორდის” ევროპული შტოს მთავარი აღმასრულებელი სტივენ ოდელი.

ყველაფრის მიუხედავად, ცისფერ ოვალში წელს გაყიდვების ზრდას ელიან. ამის მიზეზი კი ისაა, რომ მალე ბაზარზე რამდენიმე ახალი მოდელი გამოჩნდება. მათ შორის, ახალი ”ფოკუსი” და ”C-მაქსი”. უფრო მეტიც, მომდევნო წლებში კომპანია 20 ახალი და განახლებული მოდელის წარმოებას დაიწყებს, რამაც გაყიდვები კიდევ უფრო უნდა გაზარდოს.

ამერიკის წლის საუკეთესო ავტომობილები

Volt, Explorer nab North American car, truck of year honors

12 იანვარი

ავტომობილებზე მწერალი ჟურნალისტებისგან შემდგარმა ჟიურიმ, ამერიკის წლის საუკეთესო ავტომობილებად ელექტრული ჰიბრიდი ”შევროლე ვოლტი” და ქროსოვერი ”ფორდ ექსპლორერი” დაასახელა.

მსუბუქი ავტომობილების კლასში, ”შევროლე ვოლტს” ფინალურ ეტაპზე კონკურენციას ”ნისანის” ელექტრომობილი ”ლიფი” (რომელიც ევროპის წლის საუკეთესო ავტომობილად დაასახელეს) და ”ჰიუნდაის” ჰიბრიდული ”სონატა” უწევდა. უგზოობის ავტომობილების და პიკაპების კლასებში კი ”ფორდ ექსპლორერის” მეტოქეები ”ჯიპ გრანდ ჩეროკი” და ”დოჯ დურანგო” იყო.

”ჯენერალ მოტორსის” ვიცე თავმჯდომარე ტომ სტივენსმა განაცხადა, რომ ”შევროლე ვოლტის” გამარჯვება შემობრუნების დასაწყისია მისი კომპანიისთვის, რომელმაც 2009 წელს, რამდენიმე თვე გაკოტრების რეჟიმში იმუშავა. ამ რეჟიმსაც თავი სახელმწიფოსგან მრავალმილიარდიანი დახმარების (შეღავათიანი კრედიტის) წყალობით დააღწია.

”დღეს ”ვოლტი” ახალი ”ჯენერალ მოტორსის” ახალ სულისკვეთებას გამოხატავს. ჩვენი კომპანიის ხედვა მსოფლიოში საუკეთესო ავტომობილების შემუშავება, წარმოება და გაყიდვაა. შემიძლია თამამად განვაცხადო, რომ ”შევროლე ვოლტი” ამ ახალი ხედვის თვალსაჩინო ნიმუშია”, - დეტროიტის ავტო შოუზე გამართულ დაჯილდოების ცერემონიაზე განაცხადა სტივენსმა.

”ვოლტის” გამარჯვება ასევე იმ ტენდენციის გამოხატულებაა, რომელიც თანამედროვე ავტოინდუსტრიაში შეინიშნება. ეს ტენდენცია ეკოლოგიურად სუფთა ავტომობილების, კერძოდ კი, ელექტრომობილების წარმოების დაწყებაა, რასაც ახლა ყველა დიდი კომპანია ეშურება.

”შევროლე ვოლტი” ეგრეთ წოდებული პლაგ-ინ ჰიბრიდია, რომელშიც ავტომობილის მამოძრავებელ ძალას ელექტროძრავი გამოიმუშავებს, მცირელიტრაჟიანი შიდაწვის ძრავს კი დამხმარე როლი აკისრია და ის გენერატორს ამოძრავებს, რომელიც ელექტროენერგიით აკუმულატორების ბლოკს და ელექტროძრავს ამარაგებს.

”ჯენერალ მოტორსმა” ამ ელექტრომობილის გაყიდვა შარშან დაიწყო. მის მსგავსად, ელექტრომობილის გაყიდვები შარშან ”ნისანმაც” დაიწყო. ოღონდ, ”ვოლტისგან” განსხვავებით, მისი ”ლიფი” სუფთა ელექტრომობილია - მასში არანაირი შიდაწვის ძრავი არ მუშაობს. ”გენერლები” აცხადებენ, რომ პირველ ერთ თვეში, 326 ”ვოლტი” გაყიდეს, ”ნისანის” შედეგი კი გაცილებით მოკრძალებულია. თუმცა, ეს მხოლოდ იმითაა განპირობებული, რომ წარმოება ვერ ესწრება. არადა, იაპონურ კომპანიას ”ლიფზე” უკვე 20 000-ზე მეტი შეკვეთა აქვს მიღებული.

”შემიძლია განვაცხადო, რომ ელექტრომობილების ბაზარი მხოლოდ განვითარდება და მას არანაირი ფიასკო არ ელის. ასეთი ავტომობილები სულ უფრო მეტ ადგილს დაიკავებს მსოფლიო გაყიდვებში და მიხარია, რომ ჩვენ ამ საქმის პიონერები ვართ. ”ვოლტი” ერთგვარი მეცნიერული ექსპერიმენტია, რომელიც მალე მასობრივ წარმოებაში გადაიზრდება და ჩვენ მზად ვართ იმისათვის, რომ მსგავსი ტექნოლოგიით აღჭურვილი ავტომობილები მყიდველს დროულად მივაწოდოთ”, - დასძენს სტივენსი.

რაც შეეხება უგზოობის მოდელების და პიკაპების კლასს, უკვე სამი წელია, აქ პირველობას არავის უთმობს ”ფორდი”. შარშან ამ კლასში ”ფორდ ტრანზიტ კონექტმა” გაიმარჯვა, უფრო ადრე კი საუკეთესოს წოდება, ამერიკაში ყველაზე პოპულარულ F-150-ს ხვდა. სულ კი, ”ფორდს” უგზოობის მოდელების და პიკაპების კლასში საუკეთესოს წოდება 18-ჯერ აქვს მიღებული.

კონკურსის ჟიურიში აშშ-ის და კანადის საავტომობილო ჟურნალ-გაზეთების, ინტერნეტ საიტების, ტელევიზიისა და რადიოს 49 ჟურნალისტი შედიოდა. შეფასებისას, ჟიურის წევრები ავტომობილების ინოვაციურობას, დიზაინს, უსაფრთხოებას, მართვადობას, მძღოლის კმაყოფილებას და ღირებულებას აქცევენ ყურადღებას.

კუპე ”ველოსტერით” ”ჰიუნდაი” ექსპანსიას აძლიერებს

Hyundai adds flair with sporty Veloster coupe

12 იანვარი

ძლიერი კრიზისის მიუხედავად, ”ჰიუნდაი” მსოფლიო ბაზარზე წინსვლას აგრძელებს. კორეული კომპანია ლამის ერთადერთი დიდი ავტომწარმოებელია, რომელსაც ამ კრიზისის დროს, გაყიდვები კი არ შეუმცირდა, საგრძნობლად გაეზარდა და სიდიდით მეხუთე ავტო კომპანია გახდა.

მაგრამ ამას არ სჯერდება და ბაზარზე ექსპანსიას ზრდის, რაშიც ახლახანს, დეტროიტის საავტომობილო შოუზე გამოფენილი სამკარიანი სპორტული კუპე ”ველოსტერი” უნდა დაეხმაროს. ეს ავტომობილი ამერიკის და ევროპის ბაზრებზე გაზაფხულიდან გამოჩნდება და კორეელები მასზე სოლიდურ მოთხოვნას ელიან.

”გვჯერამ რომ ”ველოსტერი” ჩვენს სამოდელო გამას გაახალისებს და ახალი მყტიდველების მოზიდვაში დაგვეხმარება”, - ავტო შოუზე მოწყობილ პრეზენტაციაზე განაცხადა ”ჰიუნდაის” ევროპული შტოს უფროსმა მმართველმა ოპერატორმა ალან რაშფორტმა.

პირველი 11 თვის მონაცემებით, ევროპაში ”ჰიუნდაის” გაყიდვები ოდნავ - დაახლოებით 4 პროცენტით, 330 612 ავტომობილამდე გაიზარდა. ევროპის ავტომწარმოებელთა ასოციაციის (ACEA) მონაცემებით, კორეულმა კომპანიამ ევროპული ბაზრის 2.6 პროცენტი დაიკავა (შედარებისთვის, შარშან მას 2.4 პროცენტი ეკუთვნოდა).

”მინი ქლაბმენის” მსგავსად, ”ველოსტერს” მძღოლის მხარეს ერთი კარი აქვს, მგზავრების მხარეს კი - ორი. კორეული კომპანია აცხადებს, რომ ასეთი კონფიგურაციის წყალობით, ავტომობილი უფრო პრაქტიკულია, ვიდრე ანაოგიური კლასის ორკარიანი კონკურენტები.

სერიული ”ველოსტერი” იმ კონცეპტუალური მოდელის შესაბამისად აიგო, რომელიც ”ჰიუნდაიმ” პირველად სამი წლის წინ, სეულის ავტო შოუზე წარმოადგინა. წინა წამყვანბორბლიან კუპეს დინამიური პროფილი აქვს და სრულად შეესაბამება დიზაინის ეგრეთ წოდებული ”თხიერი სკულპტურის” კორპორატიულ სტილს.

”ველოსტერის” საბაზო ვერსია ბენზინის 1.6-ლიტრიანი ოთხცილინდრიანი, 138-ცხენისძალიანი ძრავითაა აღჭურვილი, რომელთანაც ორმაგი ქუროს მეშვეობით, 6-საფეხურიანი რობოტიზებული კოლოფია დაკავშირებული. სხვათა შორის, ეს ”ჰიუნდაის” პირველი ავტომობილია, რომელიც ასეთი კოლოფით აღიჭურვა.

რაშფორტი გვპირდება, რომ ”ველოსტერის” ევროპული ვერსიის მახასიათებლებს ჟენევის ავტო შოუზე გაგვაცნობს. ისე კი, ახლავე შეიძლება იმის თქმა, რომ ამ ავტომობილით, კორეული კომპანია კონკურენციას ”ფოლკსვაგენ სიროკოს” გაუწევს. გერმანიაში ”ველოსტერის” სასტარტო ფასი 20 000 ევრო იქნება (შედარებისთვის, სიროკოს ფასი 22 500 ევროდან იწყება).

პორშე დეტროიტში სარბოლი ჰიბრიდით დაბრუნდა

Porsche 918 RSR Coupe Concept at Detroit Show

10 იანვარი

ოთხი წელია, დეტროიტის ჩრდილოამერიკული საერთაშორისო საავტომობილო შოუ პორშეს გარეშე ტარდებოდა და აი, გერმანული კომპანია კობო სენტერის საგამოფენო კომპლექსს დაუბრუნდა. ექსპონატი კი, რომლითაც შტუტგარტელები თავს იწონებენ, რბოლებისთვის მომზადებული კონცეპტუალური ჰიბრიდული კუპე 918 RSR-ია, ავტომობილი, რომელიც ჟენევის შარშანდელ გამოფენაზე წარმოდგენილი კონცეპტუალური როდსტერის დახურული ვარიანტია.

”ფორდის” ელექტრული ფოკუსი წარმოებისთვის მზადაა

Ford Focus Electric Details and Photos

9 იანვარი

სუფთა ელექტრომობილების ბაზარზე, რომლის პიონერიც (სერიული ავტომობილები იგულისხმება) ”ნისან ლიფია”, მალე მეორე მოთამაშე გამოჩნდება - წარმოებისთვის პრაქტიკულად მზადაა ”ფორდის” პოპულარულ ჰეჩბეკ ”ფოკუსის” ბაზაზე შექმნილი ელექტრომობილი, რომელიც მწარმოებელმა ახლახანს ლას ვეგასში გმოფინა, სადაც სამომხმარებლო ელექტრონიკის შოუ ტარდება.
ავტომობილი აღჭურვილია ლითიუმ-იონური აკუმულატორების ბლოკით, რომელიც ”ფორდმა” კორეულ კომპანია ”LG ქემთან” (რომელიც ასეთივე აკუმულატორებს ”შევროლე ვოლტისთვისაც” ამზადებს) ერთად შეიმუშავა. ავტომობილი ჩვეულებრივი ”ფოკუსის” ბაზაზეა შექმნილი და მას მამოძრავებელ ძალას 124-ცხენისძალიანი ელექტროძრავითაა აღჭურვილი, რომალსაც ერთსაფეხურიანი ტრანსმისია ემსახურება.

”ფორდი” აცხადებს, რომ აკუმულატორები 240-ვოლტიანი შტეპსელიდან 3-4 საათში სრულად იმუხტება, ეს კი ორჯერ მცირე დროა, ვიდრე ელექტრული ფოკუსის მთავარი კონკურენტის, ”ნისან ლიფის” აკუმულატორების დასამუხტადაა საჭირო. ისე კი, ავტომობილის სტანდარტულ აღჭურვაში 120-ვოლტიანი დასამუხტი სისტემა შედის, რომლით დამუხტვასაც მეტი დრო სჭირდება.

ელექტრული ”ფორდის” სვლის სიშორე (არაოფიციალური მონაცემებით) 160 კილომეტრია, მისი მაქსიმალური სიჩქარე კი 136 კმ/სთ-ს აღწევს და ამ მაჩვენებლებით, ის თითქმის არ განსხვავდება ”ნისან ლიფისგან”, რომელმაც ახლახანს, ევროპის წლის საუკეთესო ავტომობილის წოდება მოიპოვა.

ავტომობილი არაერთი ელექტრული მოწყობილობითაა აღჭურვილი, რომლებიც ”ფორდმა” სპეციალურად, ელექტრომობილებისთვის შეიმუშავა და ამ საქმეში მას პარტნიორობას ”მაიკროსოფტი” უწევდა. მათ შორისაა სისტემა ”მაიფორდ მობაილი”, რომელიც მფლობელს, ამ ელექტრომობილის შორიდან კონტროლის საშუალებას აძლევს.

ელექტრული ”ფოკუსის” წარმოებისთვის, ”ფორდმა” თავისი მიჩიგანის (ქალაქ უეინში) ამწყობი ქარხანა მოამზადა, სადაც მომავალში სხვა ელექტრომობილებსაც გამოუშვებენ. აქ წარმოებულ ავტომობილებს, ამერიკელი მყიდველი წელსვე მიიღებს, მოგვიანებით კი ეს ავტომობილი ევროპაშიც გაიყიდება. თავიდან ევროპელებს ამერიკაში აწყობილი მანქანების ყიდვის საშუალება ექნებათ, მოგვიანებით კი იგივე ელექტრომობილს ”ფორდი” ევროპაშიც გამოუშვებს. თუ სად, ეს ჯერ გადაწყვეტილი არაა.

თვალწარმტაცი არარეალური კონცეპცია ”როლს როის აპარიშნ”

Rolls-Royce Apparition Concept Is Eye-Catching

7 იანვარი

ავტოინდუსტრიას არაერთი შესანიშნავი დიზაინერი ჰყავს, რომლებიც ხშირად ისეთ არარეალურ მოდელებს ხატავენ, მათ ნამუშევარს რომ ნახავთ, იფიქრებთ, რომ ის 12 წლის ბავშვმა შექმნა. თუმცა, მათგან ზოგიერთი ისეთია, რომელიც ნახატის ბაზაზე რეალური ავტომობილის შექმნის სურვილს აღგიძრავთ. მაგალითად, ასეთია ტექსასელ დიზაინერ ჯერემი ვესტერლუნდის ექსპერიმენტული ნამუშევარი, რომელიც მან ”ბეემვეს” ამერიკულ სტუდიაში სტაჟირებისას შეიმუშავა.

ამ კონცეპტუალურ ავტომობილს, სახელად ”აპარიშნ”, რომელიც მხოლოდ 1:4 მასშტაბური მოდელის სახით არსებობს, ბევრი ისეთი დეტალი აქვს, რომელთა მსგავსიც თანამედროვე ავტოინდუსტრიაში არც გვხვდება და ალბათ არც არასდროს შეგვხვდება.

თუნდაც მისი გაბარიტები ავიღოთ - მასშტაბური მოდელის სიგრძე 1.8 მეტრია, რეალურ ზომებში კი მისი სიგრძე 7.24 მეტრი იქნებოდა. ამ პოტენციური მონსტრის სიგანეზე არაფერია ცნობილი. სამაგიეროდ, მისი სიმაღლე 1.5 მეტრი, ბაზა კი 4.5 მეტრი უნდა იყოს. ამ ზომებით თვით ”როლს როისის” რეალური ”ფანტომიც” კი დაიკვეხნიდა...

იდეაში, ამ გიგანტის მოძრაობა 800-ცხენისძალიანმა V16 ძრავმა უნდა უზრუნველყოს, რომლის მუშა მოცულობა 6.6 ლიტრი, მაქსიმალური მაბრუნი მომენტი კი 765 ნიუტონმეტრი უნდა იყოს. ძრავის მონაცემები სრულიად რეალურია. სამაგიეროდ, მსუბუქი ავტომობილებისთვის 9-საფეხურიან ავტომატურ კოლოფებს დღეს არავინ აწარმოებს. ვესტერლუნდის კონცეპტუალური ავტომობილი კი სწორედ ასეთი ტრანსმისიით უნდა იყოს აღჭურვილი, რომელიც გადამუშავებულ მაბრუნ მომენტს 24-დუიმიან ბორბლებს მიაწვდის.
მაგრამ ამ კონცეპციაში მთავარი ეს არაა. ფოტოდანაც ჩანს, რომ მთავარი ავტომობილის გარეგნობაა. რა თქმა უნდა, მას რადიატორის უზარმაზარი ბადე აქვს, რომელიც ”აპარიშნს” გრანდიოზულ იერს სძენს. სახურავი პრაქტიკულად კაპოტის გაგრძელებაა და მის არსებობას მხოლოდ პროფილში შესამჩნევი გვერდითი შუშები და მცირე რკალი მიგვანიშნებს. მაგრამ თურმე ის არც ისე პატარაა - მის ქვეშ მოთავსებული სალონი ოთხ ადამიანს იტევს. თანაც ისე, რომ ისინი კომფორტის უმაღლესი დონით არიან უზრუნველყოფილები. რაც შეეხება მძღოლს, რატომღაც მისთვის პროექტის ავტორმა რატომღაც ღია ადგილი გამოჰყო. და როგორც ჩანს, არც უამინდობაში მისი კოკპიტის დახურვის შესაძლებლობა გაითვალისწინა.

საინტერესოა, ეს ბრონტოზავრი რომელიმე პატარა ფირმამ რომ დაამზადოს, რა ფასს დაადებს მას. თუმცა, ფასს ამ შემთხვევაში დიდი მნიშვნელობა არ ექნება, რადგან აუცილებლად გამოჩნდება ერთი-ორი კოლექციონერი, ვინც ამ უცნაური ქმნილების თავის ფარეხში დასაყენებლად ნებისმიერ თანხას გაიღებს...

”ოპელი” სააქციო საზოგადოება გახდა

Opel Is Now Stock Corporation

7 იანვარი

ბოლო ორი წელია, ”ოპელი” გაურკვევლობაში იყო - ”ჯენერალ მოტორსი” ჯერ მის გაყიდვას დიდი მონდომებით ცდილობდა, მაგრამ მას შემდეგ, რაც თითქოს, გერმანულ კომპანიას ახალი მფლობელი გამოუჩნდა, ამერიკულმა ავტოგიგანტმა გადაწყვეტილება შეცვალა და ის თავის ჯგუფში დატოვა. ახალი წლის პირველივე დღეებში კი, ისევე როგორც ცოტა ხნის წინ, თავად ”ჯენერალ მოტორსი”, ”ოპელიც” სააქციო საზოგადოებად ჩამოყალიბდა.

”ჩვენი კომპანიისთვის, ეს ახალი წლის შესანიშნავი დასაწყისია. ”ოპელმა” თავისი გეგმების განხორციელებისკენ კიდევ ერთი ნაბიჯი გადადგა. ჩვენ მთელს ევროპაში 40 000 თანამშრომელი გვყავს და სააქციო საზოგადოებად გადაკეთებით, ამ რესურსის უკეთ გამოყენებას შევძლებთ. ამიერიდან, ”ოპელსაც” ზუსტად ისეთივე მმართველობა ეყოლება, როორიც ”ჯენერალ მოტორსს” ჰყავს”, - განაცხადა ”ოპელის” მთავარმა აღმასრულებელმა ნიკ რილიმ.

”ოპელმა” ჯერ კიდევ სამი თვის წინ გამოაცხადა, რომ სააქციო საზოგადოებად გარდაქმნას აპირებდა და რომ ეს თუ ერთადერთი არა, ერთ-ერთი საუკეთესო გამოსავალია მის მდგომარეობაში მყოფი კომპანიისთვის, რომელსაც რესტრუქტურიზაცია ესაჭიროება. ”ოპელი” სააქციო საზოგადოებად დარმშტადტის კომერციულ რეგისტრში გატარდა. რილიმ განაცხადა, რომ რესტრუქტურიზაციის მიუხედავად, კომპანიას ახლანდელი მმართველი სტრუქტურა შეუნარჩუნდება.

”სააქციო საზოგადოებად გარდაქმნით, ჩვენი კომპანია ახალ ცხოვრებას იწყებს. ამასთან, ეს საბაზისო მოთხოვნა იყო იმისათვის, რომ ჩვენთან დასაქმებულები რესტრუქტურიზაციის გეგმას დათანხმებოდნენ. ამიერიდან, ჩვენს თანამშრომლებს, მმართველ საბჭოში თავიანთი წარმომადგენლის შეყვანის უფლება და ამგვარად, ”ოპელის” საქმიანობაში მონაწილეობის მიღების საშუალება ექნებათ”, - დასძენს რილი.

”აუდი” კუპეს ტიპის სედანის გამოშვებას აპირებს

Audi Could Build the A9 on a Platform Shared with the Estoque

6 იანვარი

”აუდის” ხელმძღვანელობა ახალი, სამოდელო გამის დამაგვირგვინებელი მოდელის გამოშვების შესაძლებლობას განიხილავს. გავრცელებული ინფორმაციით, ახალი ავტომობილი კუპეს ტიპის, ახლანდელ ფლაგმან A8-ზე დიდი სედანი იქნება და ის პლატფორმას ”ლამბორგინის” ანალოგიური კლასის ”ესტოკეს” გაუზიარებს. ამ ავტომობილით, ინგოლშტადტელები კონკურენციას ”მერსედეს ბენცის” CL-ს და ”ბეემვეს” დიდი ზომის კუპეს გაუწევენ, რომელიც ბაზარზე მერმისს უნდა გამოჩნდეს.

ბრიტანულ გამოცემა ”აუტოქართან” საუბრისას, ”აუდის” წარმომადგენელმა, ვინც ინკოგნიტოდ დარჩენა ისურვა, განაცხადა, რომ A9-ს წარმოება ჯერ გადაწყვეტილი არაა. თუმცა, პროექტის საქმიანი პაკეტის მომზადება დაწყებულია, რასაც კონცეპტუალური მოდელის დამზადება და რომელიმე დიდ გამოფენაზე გამოტანა უნდა მოჰყვეს.

უნდა ითქვას, რომ ”აუდის” და ”ლამბორგინის” (რომლებიც ფოლკსვაგენის დიდ ოჯახში არიან გაერთიანებული) პლატფორმის გაზიარების გამოცდილება უკვე აქვთ - ”ლამბორგინი გალიარდო” ”აუდი R8-ს” პლატფორმაზეა აგებული, რიტაც ორივე კომპანიამ მნიშვნელოვანი ფულადი სახსრები დაზოგა. იმავდროულად, ეს ორი ავტომობილი გარეგნობით საერთოდ არ გავს ერთმანეთს.

ორი ახალი ავტომობილისთვის A8-ს ახალ პლატფორმას (MLB - მოდულარული გრძივად ცვალებადი არქტექტურა) გამოიყენებენ, რომელსაც მოდერნიზაცია ჩაუტარდება - დაგრძელდება. ეს პლატფორმა ალუმინის და კომპოზიტებისგან დამზადდება და მსუბუქი იქნება. ამასთან, პნევმატურ საკიდარს დაეყრდნობა. რაც შეეხება ძრავებს, საბაზო იქნება V8 აგრეტაგი, ტოპ ვერსიას კი 6.3-ლიტრიანი W12 მონსტრით აღჭურვავენ.

”აუდის” ჯერ A9-ს შესაბამისი კონცეპტუალური მოდელიც კი არ შეუქმნიათ. სამაგიეროდ, 2008 წელს, ”ლამბორგინიმ” პარიზის ავტო შოუზე, ოთხკარიანი კუპე ”ესტოკე” გვიჩვენა, რომელიც სავარაუდოდ, მალე მის სამოდელო გამას დაემატება. მოკლედ, თუ ”აუდი” A9-ს წარმოებას გადაწყეტს, მას ნეკარსულმის ქარხანაში გამოუშვებს.

”მერსედეს ბენცი” ”ბეემვე მეგასიტის” კონკურენტს ამზადებს

Merc plans BMW Mega City rival

5 იანვარი

”მერსედეს ბენცმა” წამოიწყო პროექტი, რომელსაც ”ბეემვეს” ანალოგიური პროექტის მსგავსად, ”მეგა სიტი მობაილიტი” უწოდა და რომლის მიზანიც, კომპაქტური ავტომობილის რამდენიმე კონცეპტუალური მოდელის შემუშავებაა. ამ მოდელის ბაზაზე კი შეიქმნება ეკოლოგიურად სუფთა ავტომობილების ოჯახი, რომლებიც კონკურენციას იმავე ”ბეემვეს” ”მეგასიტის” და ”ფოლკსვაგენ Up-ის” ბაზაზე დამზადებულ ”აუდის” გაუწევენ.

რაოდენ გასაკვირიც უნდა იყოს, ახალი პროექტის შემუშავება ”დაიმლერის” იოკოჰამას (იაპონია) სრუდიას დაევალა, რომელსაც ჰოლგერ ჰუტცენლაუბი ხელმძღვანელობს. ეს ინფორმაცია ინგლისურმა გამოცემა ”აუტოქარმა” გაავრცელა, რომლის ფოტორეპორტიორსაც, სტუდიაში შესვლის და რამდენიმე მასშტაბური მოდელის გადაღების უფლებაც მისცეს.

ჰუტცენლაუბის განმარტებით, პროექტის დამუშავება იაპონიაში იმის გამო გადაწყდა, რომ ამ ქვეყანაში, მცირეგაბარიტიანი ტრანსპორტის შექმნის დიდი გამოცდილება აქვთ. ”ჩვენ მარტო საავტომობილო ინდუსტრიაში დაგროვილი გამოცდილება არ გვაინტერესებს. ამ პროექტისთვის, ქალაქის მინი სახლების შექმნის ტექნოლოგიასაც გამოვიყენებთ, რაც მცირეგაბარიტიანი ავტომობილის შეზღუდული სივრცის რაციონალურად გამოყენებაში დაგვეხმარება”, - ამბობს პროექტის ხელმძღვანელი.

ის არ აკონკრეტებს ”მეგა სიტი მობაილიტის” დეტალურ ინფორმაციას, თუმცა იმას კი ადასტურებს, რომ პროექტის პირველი სერიული პროდუქტი ელექტრული სკუტერი იქნება, რომელიც ბაზარზე ”სმარტის” ბრენდით გაიყიდება. შესაძლოა, სწორედ ამ სკუტერის წინამორბედი პროტოტიპი იყო ის ეგზემპლარი, რომელიც პირველად პარიზის შარშანდელ ავტო შოუზე გამოჩნდა.

სკუტერის პარიზული პროტოტიპი ალუმინისა და ფოლადისგან შეკრულ ჩარჩოზეა ბაზირებული და მას მბიძგველ ძალას 4-კილოვატიანი ელექტროძრავი ანიჭებს, რომელიც ენერგიას ლითიუმ-იონური აკუმულატორებისგან ღებულობს. შტუტგარტელები ირწმუნებიან, რომ ამ აკუმულატორის ტევადობა სკუტერს ერთი სრული დამუხტვით, 96 კილომეტრს გაატარებს. მაქსიმალური სიძქარე კი მხოლოდ 45 კმ/სთ იქნება.

”სუბარუ” ელექტრომობილ ”სტელას” წარმოებას შეწყვეტს

Subaru to Kill Stella Electric in 2012

5 იანვარი

სხვადასხვა მონაცემებით, ”სუბარუ სტელა” მსოფლიოში ერთ-ერთი პირველი სერიული ელექტრომობილია, თუმცა მალე მისი წარმოება შეწყდება. ამის მიზეზი ის სულაც არაა, რომ იაპონურ კომპანიას ელექტრომობილების წარმოება აღარ სურს. უბრალოდ, ”სუბარუს” ხელმძღვანელობა სუბკომპაქტური ავტომობილების სეგმენტის დატოვებას განიხილავს.

”ჯაპან ტაიმსი” წერს, რომ ჯერ კომპანიას არ გადაუწყვეტია, თუ როდის შეწყდება სუბკომპაქტური ავტომობილების წარმოება. თუმცა, შესაბამისი გადაწყვეტილების მიღების შემთხვევაში, კონვეიერიდან ”სუბარუს” ბოლო მცირეგაბარიტიანი ავტომობილი მერმისს ჩამოვა. ”სტელას” წარმოება 2009 წელს დაიწყო. მაშინ იაპონურ კომპანიას გეგმაში ჰქონდა, რომ 2011 წლამდე 400 ცალი ელექტრომობილი უნდა გამოეშვა.

ელექტრული ”სტელა” 63-ცხენისძალიანი ელექტრო ძრავითაა აღჭურვილი, რომელიც 170 ნიუტონმეტრ მაბრუნ მომენტსაც იძლევა. სწრაფად დამმუხტავის მეშვეობით, ”სტელას” ლითიუმ-იონური აკუმულატორები 80 პროცენტით 15 წუთში ივსება, 200-ვოლტიანი შტეპსელიდან სრულად დასამუხტად კი 5 საათია საჭირო.

”სუბარუ” არ განმარტავს, თუ რატომ წყვეტს ”სტელას” წარმოებას. აშკარაა, რომ მის სანაცვლოდ, წარმოებისთვის ახალი ელექტრომობილის მომზადება მოუწევს, რაშიც მას ალბათ ”ტოიოტა” დაეხმარება. მცირეგაბარიტიანი ავტომობილების წარმოების შეწყვეტა კი ცოტა გასაკვირიც კია, რადგან ამჟამად, მსოფლიო ავტობაზარზე, სწორედ ამ კლასის ავტომობილების პოპულარობის ზრდის აშკარა ტენდენცია შეინიშნება.

”ლამბორგინიმ” არარსებული მოდელის გაყიდვა დაიწყო

Lamborghini Aventador for Sale

4 იანვარი

”ლამბორგინის” ჯერ ტავისი უახლესი სუპერ ავტომობილის, ”ავენტადორის” ფოტოც კი არ გამოუქვეყნებია, თუმცა ამის მიუხედავად, თავის გერმანელ დილერს - ”აუტო სალონ ზინგენს” (რომელიც სხვადასხვა მარკის ეგზოტიკური ავტომობილების გაყიდვაზეა სპეციალიზებული) მასზე შეკვეთების მიღების დაწყება დაავალა. ამასთან, ახალი ავტომობილის შესახებ ყველანაირი ტექნიკური ინფორმაციის გავრცელების უფლებაც მისცა.

ამგვარად, ”ავენტადორი” მეორე ავტომობილი, რომელზეც შეკვეთების მიღებასაც, იტალიურმა კომპანიამ, მისი წარმოების დაწყებამდე შეუდგა. პირველი ”სესტო ელემენტო” იყო, რომელმაც პარიზის საავტომობილო გამოფენაზე ყველა პირღია დატოვა და რომელსაც სანტ’აგატა ბოლონეზელები მხოლოდ 10 ცალს დაამზადებენ.

”ავენტადორი”, რომელმაც ”ლამბოს” საწარმოო პროგრამაში, მეტად წარმატებული ”მურსიელაგოს” ადგილი უნდა დაიკავოს, გერმანიაში 260 420 ევრო ეღირება. ოღონდ, ამ ფასში არ შედის საგადასახადო მოსაკრებლები, რომელთა დამატების შემდეგაც, ის 309 900 ევრომდე გაიზრდება.

ფასის გარდა, გამოქვეყნდა ავტომობილის ტექნიკური მახასიათებლები და სტანდარტულ ეკიპირებაში შესულ სისტემათა ჩამონათვალი. კერძოდ, როგორც ადრე გაჟონილი ინფორმაციით იყო ცნობილი, ”ავენტადორი” აღჭურვილია 6.5-ლიტრიანი V12 ძრავით, 8 250 ბრ/წთ-ზე 700 ცხენის ძალას იძლევა და რომლის მაბრუნი მომენტიც 690 ნიუტონმეტრს აღწევს. ამ მონსტრის წყალობით, ავტომობილის მაქსიმალური სიჩქარე 350 ცხენის ძალას აღწევს, ადგილიდან 100 კმ/სთ-მდე აჩქარება კი 2.9 წამში შეუძლია.

ამასთან, ”ავენტადორი” აღიჭურვება: ჰაერის კონდიცირების სისტემით, ნავიგაციით, ABS-ბლოკირების საწინააღმდეგო სისტემით, თავის, წინა და გვერდითა აირბალიშებით, სტაბილურობის ელექტრული კონტროლით, ტრექშნ კონტროლით, კომპიუტერით, ნამწვის კატალიზატორით, რომლის წყალობითაც, ავტომობილი გამონაბოლქვზე ევრო5 სტანდარტს დააკმაყოფილებს, ქსენონის ფარებით, ავტომატური კოლოფით, ძრავის უგასაღებო გამშვებით, კერამიკული მუხრუჭებით, წვიმის სენსორით, ამწევი სისტემით და აიპოდ-ინტერფეისით.

”ბუგატი” სედანს ”აუდის” პლატფორმაზე ააგებს

Bugatti Sedan to Use Audi A8 Platform

3 იანვარი

”ფოლკსვაგენს” თავის ჯგუფში რამდენიმე საავტომობილო კომპანია ჰყავს გაერთიანებული და მათი შესაძლებლობების მაქსიმალურად გამოყენებას ცდილობს იმისათვის, რომ დასახულ მიზანს მიაღწიოს და წარმოებული ავტომობილების რაოდენობის მხრივ, 2018 წელს, მსოფლიოს უდიდესი ავტომწარმოებლის საპატიო სტატუსს დაეუფლოს.

თქმა არ უნდა, ამ მიზნის მიღწევაში, უმნიშვნელო როლი ენიჭება ექსკლუზიური ავტომობილების მწარმოებელ ისეთ მარკებს, როგორებიც ”ბუგატი”, ”ლამბორგინი” და ”ბენტლია”, თუმცა ვოლფსბურგელები მათს განვითარებაზეც ისევე ზრუნავენ, როგორც ძირითად მარკებზე.

ცოტა ხნის წინ გადაწყდა, რომ ”პორშეს” უგზოობის ავტომობილებს (კაიენს და ახალ ავტომობილს, რომელიც პორშეს გამას მალე შეავსებს) ამიერიდან ”აუდი” გამოუშვებს. მაგრამ ”ფოლკსვაგენის” ხელმძღვანელობა ამას არ სჯერდება. მალე დაიწყება ”ბუგატის” განახლება და როგორც ჩანს, ეს მარკა თანდათან გაზრდის წარმოების მოცულობას. ამისათვის კი მას საწარმოო ხარჯების შემცირება დასჭირდება, რისთვისაც მისწრება სხვა კომპანიების პლატფორმების გამოყენება იქნებოდა.

ჰოდა, როგორც გერმანული გამოცემა ”შპიგელი” გვატყობინებს, ვოლფსბურგელებმა გადაწყვიტეს, რომ ”ბუგატის” დონორად ”აუდი” ეყოლება. მალე სუპერ კუპე ”ვეირონი” ისტორიას ჩაბარდება, ”ბუგატი” კი ლუქს სედანების წარმოებაზე გადავა. რა თქმა უნდა, ამის შემდეგაც, ”ბუგატის” ავტომობილების შეძენის საშუალება მხოლოდ შეზღუდული რაოდენობის მყიდველს ექნება, მაგრამ ამის მიუხედავად, ამ მარკის საქმიანობა გერმანულ ჯგუფს მაინც მოგებას პირდება.

ავტომოყვარულებს უთუოდ ემახსოვრებათ კონცეპტუალური სუპერ სედანი ”გალიბიერი”, რომელიც ”ბუგატიმ” საზოგადოებას პირველად წელიწადნახევრის წინ უჩვენა. ამ ავტომობილის სერიული ვერსიისთვის, ”აუდის” ფლაგმან A8-ს ახალი თაობის სედანის პლატფორმას გამოიყენებენ. ამით, საწარმოო ხარჯები მნიშვნელოვნად შემცირდება, თუმცა ეს მაინც არ აისახება ავტომობილის ფასზე და ამის მიზეზი ისაა, რომ ”ბუგატი” ტრადიციას შეინარჩუნებს და ისევე როგორც ”ვეირონს”, ”გალიბიერსაც” მხოლოდ 300 ცალს დაამზადებს.