შემდეგი „ფორდ GT40“ ჰიბრიდული იქნება

Next Ford GT Comes With 600 hp Hybrid Powerplant

5 თებერვალი

„ფორდის“ ისტორიაში ერთ-ერთი ყველაზე გამორჩეული და ალბათ ყველაზე ტემპერამენტიანი ავტომობილი, სუპერქარი GT-ა, რომელიც სულ ორჯერ ფიგურირებდა ცისფერი ოვალის საწარმოო პროგრამაში, თუმცა ავტოინდუსტრიის და ავტოსპორტის ისტორიაში წარუშლელი კვალი დატოვა.

დღეს GT კვლავ მიძინებულია, თუმცა ინტერნეტში გავრცელებული ცნობები იმის იმედს იძლევა, რომ ამ შესანიშნავ ავტომობილს, ბაზარი კვლავ იხილავს. ოღონდ, ამჯერად ის ეკოლოგიაზე მზრუნველის „სამოსში“ გამოწყობილი, ჰიბრიდის სახით მოგვევლინება.

უფრო მეტიც, მას ოთხივე ბორბალი წამყვანი ექნება. ამასთან, უკანა ბორბლებს ისევ შიდაწვის ძრავი დაატრიალებს, წინებს კი - ელექტროძრავები მოემსახურება. ამგვარად, ჰიბრიდული სისტემა დაახლოებით იმ კონფიგურაციისა იქნება, როგორიც „პორშეს“ კონცეპტუალურ „918 სპაიდერსა“ და „911 GT3 R ჰიბრიდს“ აქვს.

ისევ ვარაუდის დონეზე შეიძლება იმის თქმაც, რომ ახალი GT-ს მექანიკურ დამჭირხნიანი შიდაწვის 5.4-ლიტრიანი V8 იქნება, რომელიც 500 ცხენის ძალის ფარგლებში გამოიმუშავებს. მასთან უნისონში კი ელექტროძრავები (ან ელექტროძრავი) იმუშავებს, რომელთა ჯამური სიმძლავრეც 100 ცხენის ძალა უნდა იყოს. ახალი ავტომობილი თავის წინამორბედზე დაახლოებით 200 კილოგრამით მსუბუქი - 1400 კილოგრამი იქნება. ამგვარად, სიმძლავრისა და წონის ფარდობა, ყოველ ტონაზე 430 ცხ.ძ-ს მიაღწევს. ჰიბრიდული GT-ს მაქსიმალური სიჩქარე 320 კმ/სთ-ს მიაღწევს, ადგილიდან ასამდე აჩქარებას კი ის თითქმის სამ წამში მოასწრებს.

თუ მეორე თაობის GT ძლიერ ჰგავდა პირველს, მოსალოდნელია, რომ ახალი მოდელი სრულიად განსხვავებული იქნება, თუმცა თავისი დინამიური გარეგნობით, ის წინამორბედებზე არაფრით ნაკლები არ უნდა იყოს. ის რადიატორის უფრო დიდ ჰაერის ამღებს, დაკუთხვილ ფარებს მიიღებს, კაპოტსა და უკანა ფრთებზე კი „სასუნთქ“ ნასვრეტებს დაუტოვებენ. საერთო ჯამში, ახალი „გრანტურიზმო“ წინამორბედების პროპორციებს შეინარჩუნებს.

სხვათა შორის, ახალი GT-სთვის, ცისფერ ოვალს სრულიად ახალი პლატფორმის შემუშავება მოუწევს, რომელსაც სხვა მოდელებზე ვერ გამოიყენებს. ამიტომ, ეს პროექტი ძალიან ძვირი დაჯდება. თუმცა, რამდენადაც ეს საიმიჯო ავტომობილია, განახლების და აღმავლობის გზაზე შემდგარ „ფორდს“ ის აუცილებლად დასჭირდება. მოგვიანებით, ამავე პლატფორმაზე დირბორნელები ელექტრომობილსაც გამოუშვებენ.

ცნობისათვის, მეორე თაობის GT-ს პრემიერა 2003 წელს შედგა. თავიდან „ფორდი“ ამ ავტომობილის შეზღუდული რაოდენობით წარმოებას გეგმავდა, მაგრამ მასზე მოთხოვნამ ყოველგვარ მოლოდინს გადააჭარბა და ამერიკულმა კომპანიამაც, ორ წელიწადში 1302 ცალი GT დაამზადა. კიდევ ორი წლის შემდეგ, მყიდველთა რაოდენობამ 3.5 ათასს მიაღწია. თუმცა, 2007 წელს, მისი წარმოება შეწყდა, რისი მიზეზიც ის გარემოება გახდა, რომ „ფორდმა“ რესტრუქტურიზაცია და მასთან ერთად, ქარხნების პერსონალის შემცირება დაიწყო...

ნულოვანი განვადება ბანკი „რესპუბლიკასა“ და „ჰიუნდაისგან“

6 თებერვალი

„ჰიუნდაი ავტო საქართველომ“ და ბანკმა „რესპუბლიკამ“, კორეული ავტომობილების პოტენციურ მყიდველს ახალი აქცია შესთავაზეს, რომლის მოქმედების პერიოდშიც, „ჰიუნდაის“ ავტომობილების პირდაპირ შოურუმიდან, მაქსიმალურად შეღავათიანი პირობებით შეძენაა შესაძლებელი.

„მაქსიმალურად შეღავათიანი“, მყიდველისთვის არნახულად დაბალ პროცენტში, ავტომობილის განვადებით გამოყვანას გულისხმობს. ამასთან, არსებობს პირობები, რომელთა დაკმაყოფილების შემთხვევაშიც, განვადების პროცენტული მაჩვენებელი ნულია.

აქციის პერიოდში, სესხის მაქსიმალური ვადა 5 წელს შეადგენს. ნულპროცენტიანი განვადებით კი მყიდველი იმ შემთხვევაში ისარგებლებს, თუ ის პირველი შესატანის სახით, ავტომობილის ღირებულების 30 პროცენტს გადაიხდის, დანარჩენი თანხის გადახდას კი შემდეგ 11 თვეზე გაწერს.

მყიდველის მიერ გადახდის ნებისმიერი სხვა კომბინაციის შემთხვევაში, როცა დარჩენილი თანხის გადახდის ვადა 1 წელზე მეტი არაა, მაქსიმალური საპროცენტო განაკვეთი 4 პროცენტს აღწევს, თუ განვადების ვადა 2 წელია, საპროცენტო განაკვეთი 9-მდე იზრდება, ყველაზე გრძელვადიან, ხუთწლიან განვადებაზე კი საპროცენტო განაკვეთი 12-ს აღწევს.

სხვათა შორის, ბანკმა „რესპუბლიკამ“ შეისწავლა „ჰიუნდაის“ ავტომობილების მყიდველთა მიერ ადრე გაფორმებული განვადების პირობები და დაადგინა, რომ მყიდველთა დაახლოებით 40 პროცენტი, განვადების მაქსიმუმ ერთწლიან პერიოდს ირჩევს. ასე რომ, ამ კატეგორიის მყიდველებს, ახალი აქციის პირობებით, ნულოვანი განვადებით სარგებლობის საშუალება მიეცემათ.

აქციაში, „ჰიუნდაი ავტო საქართველოსა“ და ბანკი „რესპუბლიკას“ გარდა, ბანკის პარტნიორი სადაზღვევო კომპანია „იმედი ელიც“ ჩაერთო, რომელიც აქციით მოსარგებლე მყიდველს, სადაზღვევო პაკეტზე 20-პროცენტიან ფასდაკლებას სთავაზობს. გარდა ამისა, „ჰიუნდაის“ მყიდველს, ფასდაკლების ბარათებს, აქციის მონაწილე სხვა კომპანიები - „ევროტექნიკსი“, „სმაილი“ და „მაგელანი“ შესთავაზებენ.

დაბოლოს, „ჰიუნდაის“ ავტომობილებზე შეღავათიანი განვადების აქცია 1 აპრილამდე გაგრძელდება. თუმცა, ბანკი „რესპუბლიკა“ გვპირდება, რომ წლის განმავლობაში, საზოგადოებას კიდევ არაერთ საინტერესო და ხელსაყრელ აქციას შესთავაზებს.

„ჰიუნდაი“ კუპე „ველოსტერს“ რალისთვისაც ამზადებს

Hyundai Veloster Rally Car

5 თებერვალი

„ჰიუნდაი“ თავის უახლეს მოდელზე, კუპე „ველოსტერზე“ დიდ იმედებს ამყარებს და ბუნებრივია, მის რეკლამირებაზეც ფულს არ იშურებს. „ველოსტერმა“ კორეულ კომპანიას ხარისხიანი და ტემპერამენტიანი ავტომობილების მწარმოებლის იმიჯი უნდა გაუმყაროს. ამიტომ, სპორტში მისი გამოსვლა აუცილებელია.

ჯერ ერთი თვეც არ გასულა მას შემდეგ, რაც დეტროიტის ავტო შოუზე, წარმოებისთვის მომზადებული „ველოსტერი“ ვიხილეთ და აი, კორეული კომპანია ინტერნეტით, რალისთვის მომზადებული ამავე მოდელის ფოტოსაც ავრცელებს. ავტომობილი არც შენიღბულია და როგორც ჩანს, სრულფასოვან ტესტურებას გადის ექსტრემალურ პირობებში. დაკიდევ, ფოტოზე აშკარად ჩანს მანქანის გვერდზე დატანილი „რედ ბულის“ ლოგო - სარქენად გამზადებული წითელი ხარი.

ჯერჯერობით, მხოლოდ ეს ერთი ფოტო გავრცელდა, ინფორმაციას კი კორეული კომპანია საიდუმლოდ ინახავს. ოღონდ, ამ საიდუმლოსაც მალე - ჩიკაგოს ავტო შოუზე გაგვიმხელს, რომელიც 9 თებერვალს გაიხსნება. იქ „ჰიუნდაის“ სტენდზე, „ველოსტერის“ გარდა, სხვა მოდელების ნახვაც იქნება შესაძლებელი. და, როგორც ინტერნეტ გამოცემა „ავტოივოლუშნ“ გვატყობინებს, სარბოლ „ველოსტერსაც“ ვნახავთ.

ჰო მართლა, „ველოსტერი“ მალე ჟენევურ გამოფენაზე, კორეული კომპანიის სტენდის ვარსკვლავიც გახდება. იქვე კიდევ რამდენიმე სიახლის ხილვაც იქნება შესაძლებელი, მათ შორის, ახალი i40-ისაც. რალისთვის მომზადებული „ველსტერის“ შესახებ ჯერ ინფორმაცია არ ვრცელდება, მაგრამ ზედმეტი არ იქნება იმის შეხსენება, რომ ამ პატარა კუპეს სამოქალაქო ვერსია სერია „გამას“ 1.6-ლიტრიანი ოთხცილინდრიანი ძრავითაა აღჭურვილი, რომელიც 138 ცხენის ძალას და 166 ნიუტონმეტრს გამოიმუშავებს. საბაზო შესრულებით, ავტომობილი 17-დუიმიან ბორბლებზე დგას, რომლებიც ყველა სეზონის 215/45 რეზინითაა შემოსილი. გარდა ამისა, შეკვეთით შესაძლებელია 215/45 ზომის სპორტულ საბურავებგადაკრული 18-დუიმიანი ბორბლების დაყენება.

„ბეემვე“ პრემიერისთვის პროექტ „მეგასიტის“ ამზადებს

BMW may lease, not sell, its Megacity EV

4 თებერვალი

მალე გერმანული კომპანია პროექტ „მეგასიტის“ მიხედვით შექმნილ პირველ ავტომობილს გვაჩვენებს, თუმცა მსოფლიო პრემიერამდე ცოტა ხნით ადრე, ბავარიელებმა თავიანთი ელექტრონული სიახლის შესახებ, ზოგიერთი საინტერესო ინფორმაცია უკვე გაავრცელეს.

მაგალითად ის, რომ პატარა საქალაქო ელექტრომობილს ორი ძირითადი - ქვედა და ზედა მოდულისგან შედგენილი ტანი ექნება. „ბეემვეს“ განვითარების განყოფილების შეფი კლაუს დრეგერი ამბობს, ქვედა მოდულის ძირითადი ელემენტი ალუმინისგან შეკრული ჩარჩოა, რომელზეც საკიდარი, სამუხრუჭე სისტემა, ელექტროძრავები და ენერგიით მათი მკვებავი ლითიუმ-იონური აკუმულატორების ბლოკი მაგრდება. ქვედა მოდულზე კი ხისტად მაგრდება ზედა, რომელიც კარბონის კომპოზიტისგან დამზადებულ ჩარჩოს წარმოადგენს. ძარა არ იღებება, ფერი კი მას პანელების ფორმირებისას, კომპოზიტის შემავსებელში ერევა.

გერმანულ გამოცემა „აუტომობილვოხესთან“ საუბრისას, დრეგერი ამბობს, რომ პროექტი „მეგასიტი“ ექვსი წლის წინ დაიწყო და მისი მსვლელობისას, ბევრი რამ შეიცვალა და დაიხვეწა. თან: ეს ჩვეულებრივი პროექტი არაა ჩვეულებრივი ამოცანებით. მისი განხორციელებისას, სულ ახალ-ახალ ინფორმაციას ვღებულობთ და ახალ ტექნოლოგიებსაც ვამუშავებთო.

მიუხედავად იმისა, რომ პრემიერა მოახლოვდა, ბავარიელები ავტომობილის ფოტოების გამოქვეყნებას არ ჩქარობენ და მის სახელზე ამბობენ რამეს. სამაგიეროდ ცნობილია, რომ გერმანულმა კომპანიამ გერმანიაში აბრევიატურები - i1, i2, i3, i4, i5, i6, i7, i8 და i9 დააპატენტა, რაც იმას ნიშნავს, რომ მათ აუცილებლად (სავარაუდოდ, მეგასიტის მოდელებისთვის) გამოიყენებს.

„ბეემვეს“ გაყიდვების შეფი იან რობერტსონი ამბობს, რომ მისი კომპანია „მეგასიტის“ ფარგლებში წარმოებული ავტომობილების ლიზინგით გაყიდვის მიზანშეწონილობას განიხილავს. მისი თქმით, დიდ ქალაქებში სულ უფრო მეტ ადამიანს სურს ავტომობილის მფლობელობის სხვა, ალტერნატიული სახეობით სარგებლობა და ასეთ ალტერნატივებს შორის, ლიზინგი ყველაზე ხელსაყრელია. ლიზინგი მფლობელს იმ შეზღუდვების დიდ ნაწილს აარიდებს, რომლებიც დიდ ქალაქებში, ავტომოილების ფლობაზეა შემოღებული.

ლიზინგი იმითაცაა ხელაყრელი, რომ მყიდველს არ უწევს ელექტრომობილში დიდი თანხის გადახდა. კრედიტის მსგავსად, დილერთან გაფორმებული ხელშეკრულების საფუძველზე, ის თანხას გარკვეული დოზებით, პერიოდულად იხდის. გაყიდვის ასეთ ფორმას, უკვე იყენებს „დაიმლერი“ ულმსა (გერმანია) და ოსტინში (ტექსასი, აშშ). მსგავს ექსპერიმენტს „ბეემვე“ თავისი X1-ის ბაზაზე შექმნილ ავტომობილებზე გამოსცდის.

H-1 - „ჰიუნდაის“ ახალი MPV ევროპელებისთვის

Hyundai Launches 2011 H-1 in Europe

4 თებერვალი

„ჰიუნდაიმ“ თავისი ევროპელი მყიდველისთვის, კომერციული მოდელი, მრავალმხრივი გამოყენების ავტომობილი (MPV - მულტი პურპოუს ვიიქლ) H-1 განაახლა. ახალი მოდელი შეცვლილი გარეგნობით და ეკოლოგიურად მეგობრული ძრავით გამოირჩევა. და, რა თქმა უნდა, თავის მგზავებს მაღალი დონის კომფორტს სთავაზობს.

ევროპულ ბაზარზე შესაძლოა ამ ტიპის უფრო ლამაზი ავტომობილებიც იყიდება, მაგრამ „ჰიუნდაის“ ახალ ავტომობილს სხვა ღირსებები გამოარჩევს - ის შესანიშნავი სატრანსპორტო საშუალებაა დიდი ოჯახებისთვის, რომლებსაც უქმეებზე ქალაქგარეთ ერთად დროის გატარება უყვართ. H-1 შესაშურ კომფორტსაც გთავაზობთ და დიდ საბარგულსაც. მის ტოპ ვერსიას რვა ადამიანის და მათი ბარგის კომფორტულად და უსაფრთხოდ გადაყვანა შეუძლია.

ავტომობილი 2.5-ლიტრიანი CRDi დიზელითაა აღჭურვილი, რომელიც გამონაბოლქვზე ევრო5 სტანდარტს შეესაბამება. აგრეგატი 136 ცხენის ძალას და 353 ნიუტონმეტრს გამოიმუშავებს.

განახლებული H-1 მყიდველს სამი კონფიგურაციის სახით მიეწოდება. ესენია 3-ადგილიანი ვენი, 6-ადგილიანი ვენი და 8-ადგილიანი ვეგონი. პირველის გარდა, დანარჩენ ორზე, კორეული კომპანია მყიდველს სტანდარტულ აირბალიშებს, 6-საფეხურიან მექანიკურ კოლოფს, მუხრუჭების ბლოკირების საწინააღმდეგო სისტემას (ABS), ტრექშნ კონტროლის სისტემას (TCS), სტაბილურობის ელექტრონულ კონტროლის სისტემას (ESP) და საჭის რეგულირებად რგოლს სტანდარტული ეკიპირებით შესთავაზებს. საშუალო დონის აღჭურვილობაში (კლასიკ) შედის მგზავრების აირბალიშები, შუშის ელექტრონული ამწევი, კრუიზ კონტროლი, ჰაერის მართვადი კონდიცირება, შეზღუდული მოხურების დიფერენციალი, ნისლსაწინააღმდეგო ფარები და ელექტრონიკით მართვადი სარკეები.

H-1-ის ტოპ-კონფიგურაციას, სახელწოდებით „კომფორტ“, მხოლოდ 8-ადგილიანი ვეგონის მყიდველს (ზემოთ ჩამოთვლილის გარდა) ასევე სთავაზობენ: 16-დუიმიან ალუმინის ბორბლებს, CD/MP3 აუდიო სისტემას, რომლის მართვის ღილაკებიც საჭის რგოლზეა მოთავსებული, ცენტრალურ ჩამკეტს, ორსეგმენტიან ხელით მართვად კონდიციონერს,პარკირების სამ სენსორს, მრავალბერკეტიან სუკანა საკიდარს და ტყავგადაკრულ საჭის რგოლს.

ევროპაში განახლებული H-1-ის ფასი, აღჭურვის დონის შესაბამისად, 23 990-27 990 ევროა. ამ თანხაში, ისევე როგორც „ჰიუნდაის“ სხვა ავტომობილებზე, ხუთწლიანი საგარანტიო (კილომეტრაჟის შეუზღუდავად) მომსახურებაც გათვალისწინებულია.

”დაჩია” ორ ახალ მოდელს გამოუშვებს

Dacia to Launch Two New Models in 2012

3 თებერვალი

იყო დრო, როცა რუმინული საავტომობილო ქარხანა, სახელად ”დაჩია”, ყოვლად უვარგის ავტომობილებს უშვებდა, რომლებსაც მხოლოდ სოციალისტური ბანაკის ქვეყნებში ყიდულობდნენ. მაგრამ მას შემდეგ, რაც ეს ქარხანა ფრანგულმა ”რენომ” შეიძინა, იქ იაფფასიან მოდელ ”ლოგანის” წარმოება დაიწყეს და სახელი ”დაჩიაც” მთელს მსოფლიოში (არამარტო განვითარებად ქვეყნებში, რომლებისთვისაც ეს მოდელი თავდაპირველად იყო განკუთვნილი, არამედ განვითარებულ ქვეყნებშიც) ცნობადი მარკა გახდა.

მაგრამ დღეისათვის მის საწარმოო პროგრამაში მხოლოდ ორი მოდელი - სედანი ”ლოგანი” და უგზოობის ”დასტერი” ფიგურირებს. მეორე ახლახანს კონკურს ევროპის წლის საუკეთესო ავტომობილის ფინალშიც კი გავიდა. მაგრამ ეს აშკარად არაა საკმარისი, რაც ”რენოს” მესვეურებსაც კარგად ესმით. და ამიტომ, ”დაჩიას” სამოდელო გამის გაფართოებაზე ზრუნავენ.

ინტერნეტით გავრცელდა ცნობა იმის შესახებ, რომ მალე ”დაჩიას” სამოდელო გამა კიდევ ორი ახალი ავტომობილით შეივსება. თუმცა მათ რუმინული ქარხანა ვერ გამოუშვებს, რადგან მისი საწარმოო სიმძლავრე უკვე ათვისებულია. ახალი ავტომობილებისთვის ”რენოს” ტანჟერის (მაროკო) ქარხანა აქვს შერჩეული, რომლის წლიური წარმადობაც 350 000 ავტომობილია.

”რენოს” დაბალი რანგის მოდელების განყოფილების და სტრატეგიის შეფი ჟერარ დეტურბე ამბობს, რომ ტანჟერის ქარხანაში რამდენიმე ახალი მოდელის წარმოება იგეგმება და მათ შორის, ”დაჩიას” ორი ახალი მოდელიცაა. მათგან ერთი პატარა საოჯახო ავტომობილია, მეორე კი - კომერციული ფურგონი, რომელიც ზომით ახლოს იქნება ანალოგიური ტიპის ”კანგუსთან”. რაც მთავარია, ორივე ახალი მოდელი ”ლოგანის” პლატფორმაზე აიგება.

დაკიდევ, უახლოეს სამ წელიწადში, ფრანგული კომპანია, მნიშვნელოვან გაფართოებას აპირებს, რისთვისაც 5.7 მილიარდი ევროს ინვესტირებას გეგმავს. ამ გეგმაში კი ”დაჩიას” განვითარებაც შედის.

”მახ 7 ფალკონი” - ახალი ამერიკული სუპერავტომობილი

Mach 7 Falcon, the New American Supercar

2 თებერვალი

დღეს, როდესაც ”კრაისლერს” ლეგენდარული ”დოჯ ვაიპერის” წარმოება შეწყვეტილი აქვს, ”ჯენერალ მოტორსი” კი ”შევროლე კორვეტის” მხოლოდ კოსმეტიკურ ცვლილებებს სჯერდება, ამერიკაში ადგილობრივი სუპერავტომობილების ნიშა პრაქტიკულად ცარიელია. ამ სიცარიელის შევსებას კი პატარა კომპანიები, თავიანთი შესაძლებლობების კვალობაზე ცდილობენ.

ასეთთა შორისაა ”მახ 7 მოტორსპორტსი”, რომელმაც დეტროიტის წლევანდელ შოუზე, საკუთარი კონსტრუქციის სუპერავტომობილი - ”ფალკონი” წარმოადგინა და ბევრის მოწონებაც დაიმსახურა. აღსანიშნავია, რომ ადრე ”მახ 7 მოტორსპორტსი” სწორედ ”დოჯ ვაიპერის” ტუნინგით იყო დაკავებული, მაგრამ საქმე რომ შემოაკლდა, საკუთარი ავტომობილების წარმოება გადაწყვიტა.

”ვაიპერის” ყოფილი ტუნერი კია, მაგრამ ამერიკულმა კომპანიამ თავისი ”შევარდნისთვის” (ფალკონი სწორედ შევარდენს ნიშნავს) ”ჯენერალ მოტორსის” წარმოების, LS9 სერიის, 6.2-ლიტრიანი V8 აგრეგატი გამოიყენა, რომლითაც ამ უკანასკნელის ”შევროლე კორვეტ ZR1-ია” აღჭურვილი. მექანიკური დამჭირხნის დახმარებით, ძრავი 640 ცხენის ძალას ავითარებს. რამდენია მისი მაქსიმალური მომენტი, ამაზე მწარმოებელი სდუმს. ამ ძრავით ”ფალკონის” ტოპ ვერსია აღიჭურვება. ისე კი, საბაზო ვერსია LS3 V8 აგრეგატს მიიღებს, რომლის სიმძლავრეც ”მხოლოდ” 500 ცხენის ძალაა.

ავტომობილი ალუმინისგან ფორმირებულ შასის ეყრდნობა, მისი ძარა კი კარბონის კომპოზიტისგანაა დამზადებული, რისი წყალობითაც, ”ფალკონი” 1293 კილოგრამს იწონის. ორადგილიანი ავტომობილი 20-დუიმიანი ბორბლებითაა აღჭურვილი, რომლებიც ”მიშლენის” საბურავებით შეიმოსა.

რამდენადაც ”ფალკონი” ჯერაც პროტოტიპის დონეზეა და საგზაო ტესტები ჯერ არ გაუვლია, მისი დინამიკური მონაცემები ჯერ არ გამოქვეყნებულა. თუმცა ”მახ 7-ის” ხელმძღვანელობა აცხადებს, რომ მის ”შევარდენს” ”დოჯ ვაიპერზე” უარესი მონაცემები არ ექნება. ეს კი ნიშნავს, რომ ადგილიდან 100 კმ/სთ-მდე აჩქარებას 3.5 წამზე მეტი არ უნდა მოანდომოს, მაქსიმალური სიჩქარე კი 320 კმ/სთ-ის ფარგლებში უნდა იყოს.

”მახ 7 მოტორსპორტსი” ჯერჯერობით არაფერს ამბობს იმაზე, თუ როდის დაიწყებს თავისი ”შევარდნის” წარმოებას. ინტერნეტით გავრცელებული ინფორმაცია კი გვატყობინებს, რომ კომპანია წლიურად მხოლოდ მხოლოდ 14 ცალ ავტომობილს გამოუშვებს, თითოეულის ღირებულება კი 200 000 დოლარი იქნება.

ჰეჩბეკი ”შევროლე კრუზი” ევროპული დებიუტისთვის ემზადება

Cruze hatchback underlines Chevrolet's European growth ambitions

2 თებერვალი

”ჯენერალ მოტორსის” ყველაზე პოპულარულ ბრენდ ”შევროლეს”, ევროპულ ბაზარზე ამბიციური გეგმები აქვს და ძველ კონტინენტზე თავისი პოზიციების გასამყარებლად, იქ თავისი ახალი მასობრივი პროდუქტის, ხუთკარიან ჰეჩბეკ ”კრუზის” შეტანას აპირებს. ამ ავტომობილის პრემიერას კი მარტში, ჟენევის საავტომობილო შოუზე გამართავს.

”შევროლე იუროპის” მმართველი დირექტორი უეინ ბრენონი ამბობს, რომ ჰეჩბეკ ”კრუზის” დახმარებით, მისი ბრენდი, ევროპის ბაზრის ძირითად მოთამაშეებს შორის დაიმკვიდრებს ადგილს. ცნობისათვის, ძარის ტიპი ჰეჩბეკი ყველაზე პოპულარულია ევროპაში, სადაც გაყიდვების დაახლოებით 65 პროცენტი სწორედ ამ ტიპის ძარიან ავტომობილებზე მოდის. ევროპის ყველაზე გაყიდვადი ჰეჩბეკი კი წლების განმავლობაში, ”ფოლკსვაგენ გოლფია”.

ჰეჩბეკ ”შევროლე კრუზის” სერიული ვერსია პრაქტიკულად ისეთივე იქნება, როგორიც მისი კონცეპტუალური ვერსიაა, რომლის მსოფლიო პრემიერაც შარშან, პარიზის ავტო შოუზე შედგა. რაც შეეხება მის სედანისძარიან ვერსიას, ბაზარზე ის 2009 წელს განოჩნდა და შარშან გაყიდვების მოცულობით, ისეთ პოპულარულ ავტომობილსაც კი გადაასწრო, როგორიც სუბკომპაქტური ”შევროლე ავეოა”. ცნობისათვის, მანამდე ”ავეო” ”შევროლეს” ყველაზე გაყიდვადი გლობალური ავტომობილი იყო.

ამერიკული კომპანია აცხადებს, რომ ჰეჩბეკი ”კრუზი’ იმ საფასო სეგმენტში ჩაჯდება, რომელიც ”შევროლეს” შეესაბამება. ეს ნიშნავს, რომ მას ხელმისაწვდომი ფასი ექნება. ამ ავტომობილის ფასი ჟენევური პრემიერის შემდეგ გამოცხადდება. გენერლები იმედოვნებენ, რომ მალე ”შევროლეს” ევროპული გაყიდვები გაორმაგდება, რაშიც ”კრუზის” გარდა დიდ როლს ქროსოვერის ტიპის მინივენი ”შევროლე ორლანდოც” ითამაშებს. თუმცა, ისიც აღსანიშნავია, რომ მას შემდეგ, რაც ევროპულმა ქვეყნებმა საკრიზისო შეღავათები გააუქმეს, ამერიკული ბრენდის ორი პოპულარული მინი მოდელის - ”ავეოსა” და ”სპარკის” გაყიდვები შემცირდა.

”შევროლე კრუზი” ”ჯენერალ მოტორსის” ლამბდა პლატფორმაზეა აგებული, რომელზეც ასევე ”ოპელ ასტრაცაა” ბაზირებული. ავტომობილს მშვილდის მოყვანილობის სახურავი აქვს, რაც მას დინამიურ იერს ანიჭებს. ძარის მზიდი სისტემის კონსტრუქციის (BFI ბოდი ფრეიმ ინტეგრალ - სივრცული ინტეგრალური აგებულება/ჩარჩო) წყალობით, ის ისეთივე ხისტია, როგორიც ოთხკარიანი სედანი ”კრუზი”. ავტომობილს საკმაოდ დიდი საბარგული აქვს, რომლის მოცულობაც 400 ლიტრია. უკანა სავარძლების დაკეცვის (სამიდან ორი იკეცება) შემთხვევაში კი მოცულობა უფრო იზრდება.

ჰეჩბეკ ”შევროლე კრუზისთვის” ძრავების ფართო გამაა გათვალისწინებული. მასში შევა ბენზინის 1.6 (113 ცხ.ძ და 153 ნმ) და 1.8-ლიტრიანი (141 ცხ.ძ და 176 ნმ) ოთხცილინდრიანი აგრეგატები. ტოპ ვერსია კი 2.0-ლიტრიანი დიზელით აღიჭურვება, რომელიც 150 ცხენის ძალას და 320 ნიუტონმეტრს იძლევა. ძრავთან 6-საფეხურიანი მექანიკური კოლოფია შეწყვილებული.

”ალფა რომეო” ხელმისაწვდომ კუპეს ჟენევაში გვიჩვენებს

Alfa Romeo plans an 'affordable' halo car

2 თებერვალი

ალფა 4C GTA გარეგნულად შეიძლება კონცეპტუალურ ალფა დუეტოტანტას დაემსგავსოს, რომელიც მილანელებმა ჟენევაში შარშან გვიჩვენეს

..............................

”ალფა რომეო” ახალი საიმიჯო ავტომობილის წარმოებას გეგმავს. კრიზისში მყოფი იტალიური კომპანია იმედოვნებს, რომ შესაბამისი კონცეპტუაური მოდელის ჟენევის ავტო შოუსთვის მომზადებას მოასწრებს. წინასწარი ვარაუდით, ახალი ავტომობილის (4C GTA) საბაზო ღირებულება 40 000 ევრო უნდა იყოს.

”ალფა რომეო” ხელმისაწვდომ, უკანაძრავიან ავტომობილს, სახელად ”დუეტო სპაიდერს”, ადრეც უშვებდა, მაგრამ მისი წარმოება 1994 წელს შეწყვიტა. არადა, ასეთ ავტომობილზე მოთხოვნა ყოველთვის არსებობდა და მილანური მარკის ენთუზიასტები დიდხანს ელოდნენ ძველი მოდელის შემცვლელს.

ალფა 8C კომპეტიციონე

..............................

2007 წელს, მილანელებმა კუპე ”8C კომპეტიციონეს” წარმოება დაიწყეს, მაგრამ ის მეტისმეტად ძვირი ღირდა და მცირე რაოდენობითაც დამზადდა. მაგალითად, მისი ღია ვერსია 213 000 ევრო ღირდა და მხოლოდ 1 000 ცალი დამზადდა. ბუნებრივია, ამ მიზეზების გამო, ის საიმიჯო ავტომობილად ვერ გამოდგა. არადა, შესანიშნავი დიზაინით კი გამოირჩეოდა.

4C GTA-ს წარმოების დაწყებას ”ალფა რომეო” მერმისს აპირებს, რისთვისაც ”ფიატ-ის” რომელიმე ქარხანას გამოიყენებს. მილანური კომპანიის ორმა წარმომადგენელმა, რომელთაც ვინაობის გამხელა არ ისურვეს, გამოცემა ”აუტომოტივ ნიუს იუროპთან” საუბრისას განაცხადა, რომ ხუთ წელიწადში სულ 20-25 ათასი ცალი 4C GTA-ს წარმოება იგეგმება.

”ფიატ-ის” ასევე ინკოგნიტო წარმომადგენელის თქმით, პატარა კუპე ამერიკის ბაზარზეც შეიძლება გაიყიდოს, თუმცა ამის თაობაზე, ჯერ გადაწყვეტილება მიღებული არაა. იგივე წყარო ადასტურებს, რომ ”ალფა რომეო” აღნიშნულ კუპეზე მუშაობს, თუმცა არც ის გამორიცხა, რომ ჟენევისთვის შეიძლება კონცეპტუალური ვერსიის დასრულება ვერ მოესწროს. ამ შემთხვევაში, მისი პრემიერა ფრანკფურტის შოუსთვის გადაიწევს.

KTM X-ბოუ

..............................

4C GTA ”ფიატ-ის” ტურინულ სტილის ცენტრში მუშავდება. ”აუტომოტივ ნიუს იუროპის” მიერ მოპოვებული ინფორმაციით, კონცეპტუალური კუპე სწრაფმავალი, ძალიან კომპაქტური, ორადგილიანი ავტომობილი იქნება და პოტენციურ მყიდველს დახვეწილი, აგრესიული გარეგნობითაც მიიზიდავს. სხვათა შორის, ”ალფა რომეოს” ენთუზიასტი ბლოგების მიერ, ადრე გავრცელდა მცდარი ინფორმაცია, რომ თითქოს, ამ ავტომობილის დიზაინს ”ალფა რომეოსთვის” ატელიე ”პინინფარინა” ამუშავებდა.

უნდა ითქვას, რომ იტალიური კომპანიისთვის, 2012 წელი მეტად მნიშვნელოვანი იქნება - საშუალო ზომის მოძველებულ სედან 159-ს ახალი ”ჯულია” შეცვლის. დაიწყება 4C GTA-ს და მილანური კომპანიის ისტორიაში პირველი უგზოობის ავტომობილის წარმოება, რომელიც შემდეგი თაობის ”ჯიპ კომპას/პეტრიოტის” ბაზაზე აიგება.

კომპაქტურ კუპე 4C GTA-ს მთავარი დანიშნულება ისაა, რომ ”ალფა რომეოს” შოურუმებში მყიდველი მიიზიდოს, რომელიც იქ ”ჯულიას” და უგზოობის მოდელის ყიდვას გადაწყვეტს. სხვათა შორის, ამ ორ მოდელზე ”ფიატ-ის” საავტომობილო ჯგუფის მთავარი აღმასრულებელი სერჯო მარკიონე დიდ მნიშვნელობას ანიჭებს და იმედოვნებს, რომ სწორედ ამ ორი ავტომობილის წყალობით, ”ალფა რომეოს” გაყიდვები მალე ნახევარ მილიონამდე გაიზრდება. ცნობისათვის, შარშან ”ალფას” გაყიდვები 10.2 პროცენტით, 112 000 ავტომობილამდე გაიზარდა, რასაც ხელი ჰეჩბეკ ”ჯულიას” გაყიდვების დაწყებამ შეუწყო.

კუპე 4C GTA-ს წარმოებისთვის, ”ალფა რომეო” ახალ ტექნოლოგიებს გამოიყენებს. შასი და ძარა კარბონის კომპოზიტისა და ალუმინისგან დამზადდება. იტალიური კომპანია იმედოვნებს, რომ ავტომობილი 850 კილოგრამზე მძიმე არ გამოვა. ამასთან მისი წონისა სიმძლავრის ფარდობა დაახლოებით 3.5 კგ/ცხ.ძ-ზე უნდა იყოს. არადა, მას მბიძგველ ძალას 1.8-ლიტრიანი ოთხცილინდრიანი აგრეგატი მიანიჭებს, რომლის სიმძლავრეც 250 ცხენის ძალა იქნება. შედარებისთვის, ”პორშე კაიმანი” 1 275 კილოგრამს იწონის, მისი ძრავის სიმძლავრე კი 320 ცხენის ძალაა. შესაბამისად, წონის და სიმძლავრის ფარდობა ამ შემთხვევაში 3.98 კგ/ცხ.ძ-ია.

შასის წარმოებაში, ”ალფა რომეოს” სარბოლი ტექნიკის მწარმოებელი იტალიური კომპანია ”დალარა” ეხმარება. 4C GTA-ს პლატფორმა, მოტოციკლების მწარმოებელ ავსტრიულ კომპანია KTM-ის ექსტრემალურ ორადგილიან ”X-ბოუს” პლატფორმის მოდერნიზებული ვარიანტია. შასის მთავარი მზიდი ნაწილი კარბონის კომპოზიტისგან დამზადებული ორადგილიანი კოკპიტია, რომელსაც წინ და უკან, ალუმინისგან დამზადებული სუბ-ჩარჩოები აქვს მიერთებული. მათზე საკიდარი და ძრავი მაგრდება. ამასთან, ამ სუბ-ჩარჩოებს, შეჯახების შემთხვევაში, დარტყმის ენერგიის ნაწილობრივ შთანთქმაც ევალება.

დაბოლოს, აბრევიატურა GTA ”გრან ტურიზმო ალეჯერიტას” ნიშნავს, რაც ჩვენებურად დიდი ტურიზმის შემსუბუქებულ ვარიანტია. იტალიურმა კომპანიამ ეს აბრევიატურა ბოლოს კომპაქტურ ჰეჩბეკ 147-ის შემსუბუქებული ვერსიისთვის გამოიყენა.

”აუდის” უახლოესი გეგმები

Audi Design Chief Targets New Models

2 თებერვალი

ამერიკულ ინტერნეტ გამოცემა ”ინსაიდ ლაინთან” საუბრისას, ”აუდის” დიზაინის შეფმა ვოლფგანგ ეგერმა, თავისი კომპანიის სამომავლო გეგმების შესახებ ისაუბრა. მან განაცხადა, რომ გერმანულმა კომპანიამ ჯერჯერობით შეაჩერა მოდელ A2-ის შემცვლელზე მუშაობა. ამ ავტომობილის დიზაინი შემუშავებულია, მაგრამ მისთვის საჭირო პლატფორმა არც თავად ”აუდის” და არც ”ფოლკსვაგენის” ჯგუფში შემავალი კომპანიების საწარმოო პროგრამაში არ ფიგურირებს. ამიტომ, პროექტი შეჩერებულია.

სამაგიეროდ გადაწყდა, რომ A2-ის ნაცვლად, ”აუდი” მთელ თავის შესაძლებლობებს ჰეჩბეკ A1-ის ბაზაზე, ახალი ავტომობილების გამოშვებას მოახმარს. ეგერის თქმით, მალე ამ ჰეჩბეკის ხუთკარიანი ვერსიის წარმოება დაიწყება, შემდეგ კი კაბრიოლეტის და ტემპერამენტიანი ვერსიის (S1) ჯერი დადგება, რომელიც სრულამძრავიანი ვერსიით აღიჭურვება. ამ უკანასკნელის კონცეპტუალური ვერსიის პრემიერა ჟენევის ავტო შოუზე გაიმართება.

გარდა ამისა, ”აუდის” ხელმძღვნელობა, ”ბეემვეს” სპორტულ ქროსოვერ X6-ის კონკურენტი მოდელის წარმოების მიზანშეწონილობას განიხილავს. ეგერის თქმით, ბავარიულ ავტომობილზე განსაკუთრებით დიდი მოთხოვნა ჩინეთში დაფიქსირდა, სადაც ის განსაკუთრებით პოპულარული სუსტი სქესის მყიდველთა შორისაა. ეგერის თქმით, ”ბეემვესთან” კონკურენციისთვის ”აუდის” მალე შესანიშნავი იარაღი გამოუჩნდება უგზოობის Q3-ის სახით. ამასთან, სამოდელო გამის ექსპანსია კვლავაც გაგრძელდება და ინგოლშტადტელები ყველა იმ ნიშას შეავსებენ, რომლებშიც ბავარიელები მოღვაწეობენ.

ეგერი დასძენს, რომ ჩინეთში გაყიდვების სწრაფი ტემპით ზრდის გამო, ”აუდის” დიზაინერებს, ახალი მოდელების სტილის შემუშავებისას, მეტწილად სწორედ ამ ქვეყნის მომხმარებელთა გემოვნების გათვალისწინება უწევთ. მას მაგალითიც მოჰყავს და ამბობს, რომ ფლაგმან სედან A8-ს რადიატორის ქრომირებული ბადე სწორედ ჩინელთა გემოვნების შესაბამისად გაუკეთეს.

ცნობისათვის, შარშან ”აუდიმ” ცისქვეშეთში 228 000 ავტომობილი გაჰყიდა, რაც შეერთებულ შტატებში რეალიზებული ავტომობილების რაოდენობაზე თითქმის ორჯერ მეტია. ამასთან, გაყიდვების ზრდის ტემპი კვლავ შენარჩუნდება და ”აუდის” მარკეტოლოგების ვარაუდით, მალე ჩინეთი გერმანული კომპანიისთვის ყველაზე დიდი ბაზარი გახდება.

ჯერჯერობით გაურკვეველია კონცეპტუალურ სპორტულ მოდელ ”კვატროს” (ფოტოზე) მომავალი. ამ ავტომობილის პრემიერა შარშან, პარიზის საავტომობილო შოუზე ჩატარდა და მას საუკეთესო გამოხმაურება ჰქონდა. მაგრამ წარმოების გადაწყვეტილება ჯერ მიღებული არაა. სამაგიეროდ, მისმა გამოჩენამ დადებითად იმოქმედა სედან A6-ის იმიჯზე, რომლის გაყიდვებიც მთელს მსოფლიოში იზრდება. ამასთან, ეგერი იმედოვნებს, რომ ”კვატრო” ასევე დადებითად იმოქმედებს ”აუდის” მომავალი ელექტრომობილების იმიჯზეც, რომლებსაც გერმანული კომპანია შეზღუდული ტირაჟით გამოუშვებს.

”ჰიუნდაის” შეიძლება ”ელანტრას” ამერიკაში ექსპორტი დასჭირდეს
Hyundai may need to source Elantra from Korea to meet demand
31 იანვარი

ბოლო წლებში, ”ჰიუნდაის” გაყიდვები მთელს მსოფლიოში დიდი ტემპით იზრდება. განსაკუთრებით სწრაფი ზრდა კი ამერიკის ბაზარზე შეინიშნება, სადაც კორეულმა კომპანიამ, ნახევარმილიონიანი ზღვარი უკვე გადალახა. და, ამით დაკმაყოფილებას არ აპირებს, რის საფუძველსაც ახალი მოდელები აძლევს.

”ჰიუნდაი” წელს ამერიკაში გაყიდვების 10-პროცენტიან ზრდას ვარაუდობს და ეს უპირველეს ყოვლისა, კომპაქტურ სედან ”ელანტრას” პოპულარობის წყალობით უნდა მოხდეს. თუ პროგნოზი გამართლდა, მაშინ კორეელების გაყიდვები 590 000 ცალს მიაღწევს და მათ იქ ”ელანტრას” კორეიდან შეტანა მოუწევთ.

ახალი ელანტრა, რომელიც ბაზარზე დეკემბერში გამოჩნდა, პირველი ავტომობილია, რომლის ამერიკული ვერსიაც შეიქმნა. ”ჰიუნდაი” მას ამერიკაშივე, მონტგომერის (შტატი ალაბამა) ქარხანაში უშვებს, იქ სადაც ასევე ბიზნეს კლასის სედან ”სონატას” აწარმოებს. მაგრამ კორეული კომპანია უკვე ”ელანტრას” დამატებით კორეიდან შეტანის შესაძლებლობასაც განიხილავს.

აღნიშნული ქარხნის წლიური წარმადობა 330 000 ავტომობილია. შარშან იქ 196 000 ”სონატა” და 132 246 ცალი ძველი ”ელანტრა” დამზადდა. მაგრამ როგორც კი კომპანიამ ახალი ”ელანტრა” წარადგინა, მაშინვე მასზე მოთხოვნა გაორმაგდა. უფრო კონკრეტულად კი, დეკემბერში, როცა ახალი ”ელანტრას” წარმოება დაიწყო, ეს ავტომობილი 13 096 ცალი გაიყიდა. შედარებისთვის, წინა წლის იმავე პერიოდში, სულ 5 763 ცალი (ძველი) ”ელანტრა” გაიყიდა.

”თუ ”ელანტრა” იმ ტემპით გაიყიდება, რასაც ჩვენ ვვარაუდობთ, ჩვენ კორეიდან მისი ექსპორტირება მოგვიწევს. ფასიდან და მასზე მიღებული გამოხმაურებებიდან გამომდინარე, ჩვენ მასზე სოლიდურ მოთხოვნას ველით”, - ამბობს ”ჰიუნდაის” პრესმდივანი ფრენკ არენსი.

”მერსედეს ბენცი” კომპაქტური ავტომობილების ოჯახს გამოუშვებს

Mercedes-Benz Readying Baby CLS and Small SUV

31 იანვარი

იმისათვის, რომ ახალგაზრდა მყიდველი მიიზიდოს, ”მერსედეს ბენცი” ახალ კომპაქტურ პლატფორმას (MFA - მერსედეს ფრონტ-უილ-დრაიბ არქიტექჩა, ანუ მერსედესის წინაამძრავიანი არქიტექტურა) ქმნის, რომელზეც კომპაქტური ავტომობილების მთელს ოჯახს დააფუძნებს. ეს ავტომობილები კი კონკურენციას პირველ რიგში, ”ბეემვეს” შესაბამისი კლასის მანქანებს გაუწევენ.

გამოცემა ”აუტომოტივ ნიუს იუროპის” ინფორმაციით, ამჟამად შტუტგარტელები ოთხკარიან კუპე CLS-ის მომცრო ვერსიაზე მუშაობენ, რის შემდეგაც თავიანთ ძალისხმევას იმავე პლატფორმაზე, უგზოობის მცირე მოდელის შესამუშავებლად მიმართავენ, მას კი მოგვიანებით, კაბრიოლეტი და სპორტული ქროსოვერიც მოჰყვება.

წინასწარი ვარაუდით, სამქიმიანები ამ ავტომობილებს მთელი მსოფლიოს მასშტაბით გაჰყიდიან. თუმცა, პირველ რიგში, ამ სიახლეებს ევროპელებს შესთავაზებენ. ამერიკაში მათ რამდენიმე თვის დაგვიანებით შეიტანენ.

კომპანიაში ახალ ოთხკარიან კუპეს ”ბეიბი CLS-ს” უწოდებენ და ეს არც უნდა იყოს გასაკვირი, თუ მხედველობაში მივიღებთ იმ ფაქტს, რომ ახალი პატარა ავტომობილი გარეგნულად და პროპორციებით CLS-ის მსგავსი იქნება. მისი დებიუტი 2013 წელს იგეგმება. ერთი წლის შემდეგ კი ბაზარზე ”ბეემვეს” X1-ის კონკურენტი გამოვა. ამ ავტომობილების ევროპაში გამოჩენიდან ნახევარ წელიწადში, მათ ამერიკის ბაზარზეც შეიტანენ.

ახალ პლატფორმაზე ასევე დაემყნობა ახალი ჰეჩბეკები, რომელმაც ორი, A და B კლასის მოდელები უნდა ჩაანაცვლოს. ამათგან პირველის დებიუტი 2012 წელსაა მოსალოდნელი. ჯერჯერობით ცნობილია, რომ ”მერსედეს ბენცი” ამ ავტომობილების ამერიკაში შეტანას არ აპირებს, თუმცა შესაბამისი მოთხოვნის შემთხვევაში, კომპანიის ხელმძღვანელობა სწრაფად რეაგირებას და მ ომხმარებლის ინტერესის დაკმაყოფილებას აპირებს.

დაკიდევ, ახალი MFA პლატფორმას, ”მერსედესის” გარდა, მისი ფრანგი და იაპონელი პარტნიორები - ”რენო” და ”ნისანიც” გამოიყენებენ, რომლებიც მის შემუშავებაში ჩართულნი არიან. ”მერსედესის” გლობალური გაყიდვების შეფი იოახიმ შმიდტი ამბობს, რომ ”რენო-ნისანი” ახალ პლატფორმას ”ინფინიტის” მარკით ახალი კომპაქტური ოჯახის შესაქმნელად გამოიყენებს. ამასთან, იმავე ბაზაზე, ახალი ”რენო ტვინგო” და ”ნისან მიკრა” დამზადდება.

”მერსედეს ბენცმა” F-სელის მსოფლიო გარბენი დაიწყო

Mercedes-Benz F-CELL World Drive Begins

30 იანვარი

29 იანვარს 125 წელი შესრულდა მას შემდეგ, რაც კარლ ბენცმა კაცობრიობის ისტორიაში პირველი ავტომობილი დააპატენტა. რა ტქმა უნდა, ამ მოვლენას ”მერსედეს ბენცი” სათანადოდ აღნიშნავს და ამ თარიღისადმი მიძღვნილი ღონისძიება, რომელიც 125 დღეს გასტანს და მსოფლიოს ბევრ ქვეყანას მოივლის, სამქიმიანებმა სწორედ 29 იანვარს წამოიწყეს.

გარბენში შტუტგარტული კომპანიის ჰეჩბეკ B-კლასის ბაზაზე შექმნილი, ფიჭური ელემენტებით აღჭურვილი ელექტრომობილები (მერსედეს ბენც F-სელ) მონაწილეობს. ღონისძიების მიზანი ორია. ჯერ ერთი, ამით ”მერსედესი” ღირსშესანიშნავ მოვლენას აღნიშნავს და მასთან უამრავ ადამიანს აზიარებს. მეორეც, სამქიმიანები საქმესაც არ ავიწყებენ და ასე ორიგინალურად, თავიანთი ახალი ტექნოლოგიების დემონსტრირებას ახდენენ.

გარბენის სტარტი საზეიმო ვითარებაში ჩატარდა და მას არაერთი საპატიო სტუმარი ჰყავდა. გარბენის მონაწილეებს სიტყვით ”დაიმლერის” თავმჯდომარე დიტერ ცეტშემ მიმართა, სასტარტო გასროლის პატივი კი გერმანიის კანცლერ ანგელა მერკელს ერგო.

”125 წელი გავიდა ავტომობილის გამოგონებიდან და ამ თარიღისთვის ჩვენ მოვამზადეთ ტექნოლოგია,რომელიც თავისუფლად შეიძლება ჩაითვალოს, როგორც ავტომობილის ახლიდან გამოგონება. ეს გარბენი კიდევ ერთხელ დაამტკიცებს, რომ ინოვაციების დანერგვის მხრივ, ჩვენ ენთუზიაზმი არ დაგვიკარგავს და მინიმუმ კიდევ 125 წელი გავაგრძელებთ ამ საქმეში მოწინავეობას”, - განაცხადა ცეტშემ.

გარბენში სულ სამი ავტომობილი მონაწილეობს, რომლებიც 14 ქვეყანას, ყველანაირ კლიმატურ ზონას გაივლიან და რაც მთავარია, ერთხელაც არ გაჩერდებიან (ამას როგორ მოახერხებენ, ძნელი წარმოსადგენია). და, კომპანიაში იმედოვნებენ, რომ ამ გარბენის დროს, ეკონომიურობის არაერთი რეკორდი გაუმჯობესდება.

”მერსედეს ბენც F-სელი” საწვავად წყალბადს იყენებს. წყალბადის მეშვეობით, სპეციალურ ფიჭურ ელემენტებში, ელექტროენერგია გამომუშავდება, რომლითაც ელექტროძრავი მარაგდება. ძრავის სიმძლავრე 136 ცხენის ძალაა, მაბრუნი მომენტი კი - 290 ნიუტონმეტრი. ფიჭური ელემენტების ტევადობა საკმარისია იმისათვის, რომ ავტომობილმა ერთი სრული გაწყობით, 400 კილომეტრი გაიაროს.

დეროიტის ავტო შოუს დასწრება გაიზარდა
Visitor Attendance to 2011 Detroit Auto Show Grew 3%
30 იანვარიდეროიტის წლევანდელი ავტო შოუ ერთ-ერთი საუკეთესოა მათ შორის, რომლებისთვისაც ამ ქალაქის საგამოფენო კომპლექს ”კობო სენტერს” ბოლო წლებში უმასპინძლია. გამოფენაზე პრაქტიკულად ყველა დიდი ავტომწარმოებელი იყო წარმოდგენილი, რომლებსაც ამერიკის ბაზარზე ინტერესი აქვთ. ამასთან, შოუს შარშანდელზე მეტი დამთვალიერებელიც ჰყავდა.
სულ დეროიტის წლევანდელი ავტო შოუ 735 370-მა ადამიანმა მოინახულა, რაც შარშანდელი შოუს დამსწრეთა რაოდენობაზე დაახლოებით 3 პროცენტით მეტია. უფრო ზუსტად, შარშან გამოფენას 714 137 ადამიანი დაესწრო. რეკორდი დამყარდა ერთ დღეს დამსწრეთა რაოდენობის მხრივ - გახსნის დღეს, ”კობო სენტერში” შოუს დათვალიერება 75 327-მა ადამიანმა ინება. ცნობისათვის, ამ მხრივ, ძველი რეკორდული მაჩვენებელი 1993 წელს დაფიქსირდა, როცა გახსნის დღეს, გამოფენას 74 900 ადამიანი დაესწრო.
”წინა წლებში მიცემული პირობა შევასრულეთ. მართლაც ძალიან საინტერესო გამოფენა გამოგვივიდა, რაც ექსპონატების სიმრავლემ და მრავალფეროვნებამ განაპირობა. ჩვენ წარმატებით გადავლახეთ ყველანაირი კრიზისი, რაც იმას ნიშნავს, რომ ადგილობრივი და მსოფლიო ეკონომიკები აღმავლობის გზაზეა”, - განაცხადა შოუს თავმჯდომარე ბარონ მიდიმ.
გამოფენას 60 ქვეყნის 5 000-მდე ჟურნალისტი აშუქებდა, რომლებიც ძირითადად გამოფენის პირველ სამ დღეს - პრესის დღეებს დაესწრნენ და რეპორტაჟებიც სწორედ მაშინ მოამზადეს. მწარმოებლებმა სულ 55 ახალი პროდუქტი წარმოადგინეს, მათ შორის, ”ფორდმა” თავისი ელექტრონული ”ფოკუსი”, ”პორშემ” კი ჰიბრიდული სპორტქარი. სხვათა შორის, გერმანული კომპანია დეტროიტში ოთხწლიანი პაუზის შემდეგ დაბრუნდა.
დაკიდევ, ანალიტიკოსების მიერ ჩატარებული გამოთვლების შესაბამისად, შტატ მიჩიგანის სამხრეთ ამოსავლეთ ნაწილის ბიუჯეტმა გამოფენის წყალობით, 350 მილიონზე მეტი დოლარი მიიღო. ამ თანხაში, გამოფენაზე შესასვლელი ბილეთების გარდა, სასტუმროსა და გამოფენის პერიოდში, ქალაქში ცხოვრებაზე გაწეული ხარჯიც იგულისხმება.

”ნისან ლიფზე” მოთხოვნილება იზრდება

Nissan to reach full Leaf EV output speed by March

26 იანვარი

”ნისან მოტორი” აცხადებს, რომ თავის იაპონურ ქარხანას, რომელიც ელექტრომობილ ”ნისან ლიფს” უშვებს, საქმიანი წლის ბოლომდე (მარტამდე) სრული დატვირთვით აამუშავებს, რათა ამ ავტომობილზე მოთხოვნის დაკმაყოფილება შეძლოს. სიდიდით მეორე იაპონურმა კომპანიამ ”ლიფის” წარმოება შარშან ოქტომბერში დაიწყო და მას აქეთ, სულ 3 000 ცალი აქვს გამოშვებული. მარტიდან კი ამ ელექტრომოვილის წარმოება მნიშვნელოვნად გაიზრდება - ტოკიოს სამხრეთში მდებარე ოპამას კონვეიერს თვეში 4 000 ”ლიფი” დატოვებს.

”ბაზრის მოთხოვნა რომ დავაკმაყოფილოთ, ”ლიფის” წარმოება უნდა გავზარდოთ, რისთვისაც დამატებითი სამუშაო საათების შემოღება და შვებულებების გაუქმებაც კი მოგვიწევს, რადგან ამავე ქარხანაში, ჩვენ სხვა ავტომობილებსაც ვაწარმოებთ”, - ამბობს ოპამას ქარხნის შეფი სეიძი ჰონდა. სამუშაო დღეებზე საათების დამატება იმისთვისაა საჭირო, რომ როგორც წესი, იაპონიაში მარტში ავტომობილებზე მოთხოვნა იზრდება.

”ნისანს” და მის ევროპელ პარტნიორ ”რენოს” ელექტრომობილების ბაზარზე ლიდერობა სურთ. ისინი ერთობლივად რამდენიმე მოდელს ამუშავებენ, რომელთაგან ბაზარზე გამოსვლა ყველას ”ლიფმა” დაასწრო. ეს ავტომობილი უკვე იყიდება იაპონიასა და აშშ-ში. მისი მიწოდება ევროპაშიც დაწყებულია, სადაც მას წლის საუკეთესო ავტომობილის წოდება მიენიჭა.

”ნისანი” თავისი პირველი ელექტრომობილის წარმოებას ამერიკასა (შტატი ტენესი, 2012 წლიდან) და ბრიტანეთშიც (სანდერლენდი, 2013 წლიდან) აპირებს. მანამდე კი ყველა ბაზარი ”ლიფს” ოპამადან მიიღებს. ცნობისათვის, ოპამას ქარხნის წლიური სიმძლავრე 430 000 ავტომობილია. ”ლიფის” გარდა, ის ისეთ მოდელებსაც უშვებს, როგორებიცაა ”ჯუკი”, ”კუბი” და ”ნოუტი”.

ოპამას ქარხანაში ელექტრომობილის აწყობაც იმავე კონვეიერზე ხდება, რომელზეც მინივენ ”კუბს” და ქროსოვერ ”ჯუკს” აწარმოებენ. ”ლიფის” შასი კონვეიერით გადაადგილდება, რა დროსაც მას ელექტროძრავს და ელემენტების ბლოკს უდგამენ. აკუმულატორების ბლოკს და ელექტრომობილისთვის სპეციფიკურ ნაწილებს, იმავე ქარხანაში, ცალკე ხაზზე აწყობენ. საერთო ჯამში, ოპამას ქარხანაში გამოშვებული ყოველი შვიდი ავტომობილიდან, ერთი ”ლიფია” და მისი წილი თანდათან გაიზრდება.

”ნისანს” აქამდე ელექტრომობილ ”ლიფზე” იაპონიაში 6 000, ამერიკაში კი 20 000 შეკვეთა აქვს მიღებული. და სანამ მათ დააკმაყოფილებდეს, წინასწარი შეკვეთების მიღება დროებით გააჩერა. ”ნისან ამერიკას” შეფი კარლოს ტავარესი ამბობს, რომ ემრიკაში მიღებული შეკვეთები სექტემბრამდე დაკმაყოფილდება.

პარალელურად, ”ნისანი” და ”რენო” მტელ მსოფლიოში ქარხნებს ამზადებენ, რომლებმაც წლიურად, ლითიუმ-იონური აკუმულატორების 500 000 ცალი ბლოკის წარმოება უნდა უზრუნველყონ. ორივე კომპანიის საერთო მთავარი აღმასრულებელი კარლოს გონი ვარაუდობს, რომ მალე (2020 წლისთვის) მთელს მსოფლიოში გაყიდული ავტომობილების დაახლოებით მეათედი ელექტრომობილი იქნება. და მას სურს, რომ მისმა კომპანიებმა ამ სეგმენტის მნიშვნელოვანი წილი მოიპოვონ, როგორც ეს ”ტოიოტამ” ჰიბრიდულ სეგმენტზე შეძლო.