„ნისანი“ ელექტრულ „ლიფზე“ შეკვეთებს ვერ აუდის

Nissan Swamped, Leaf Production at Full Throttle

21 თებერვალი

„ნისან ლიფი“ პირველი მასობრივი ელექტრომობილია მსოფლიო ბაზარზე და მიუხედავად იმისა, რომ ევროპაში წლის საუკეთესო ავტომობილის ტიტულს დაეუფლა, მაინც სპეციალისტთა არაერთგვაროვან შეფასებას იმსახურებს. თუმცა მთავარი ისაა, რომ ყველაზე მეტს, ამჟამად სწორედ ამ ავტომობილზე ლაპარაკობენ.

სულ ახლახანს, ინტერნეტით გავრცელდა ინფორმაცია იმის შესახებ, რომ ამ ელექტრომობილზე წინასწარი შეკვეთების დაახლოებით 40 პროცენტი გაუქმებულია. მაგრამ მალე ამას მოჰყვა ინფორმაცია იმის შესახებ, რომ იაპონური კომპანია „ლიფზე“ შეკვეთებს ვერ აუდის.

გამოცემა „ავტონიუსის“ მიერ გავრცელებული ინფორმაციით, „ნისანს“ ელექტრომობილზე უკვე 27 000 შეკვეთა აქვს მიღებული. შესანიშნავია, იტყვიან ანალიტიკოსები და მარკეტოლოგები. საშინელებაა, იტყვიან მყიდველები. და ორივე მხარე მართალი იქნება. პირველები იმის გამო, რომ ბუმი კომპანიისათვის მოგების მომტანია. მეორენი იმიტომ, რომ 31 მარტამდე მხოლოდ 10 000 შეკვეთის დაკმაყოფილება თუ მოხერხდება.

როგორც ჩანს, მოვლენათა ამგვარი განვითარებისთვის, „ნისანი“ მზად არ იყო, რადგან იაპონურმა კომპანიამ „ლიფზე“ შეკვეთების მიღება შეაჩერა. და გამოაცხადა, რომ ამ პროცესს მხოლოდ მას შემდგ გააგრძელებს, რაც პირველი ლოტით მიღებული შეკვეთების „გარკვეულ რაოდენობას“ დააკმაყოფილებს. რამდენია ეს „გარკვეული რაოდენობა“ და როდის მოხერხდება მათი დაკმაყოფილება, თვითონ „ნისანშიც“ ჯერ არ იციან...

ისე, თუ ზემოთ ნახსენები ინფორმაცია, რომლის თანახმადაც, წინასწარი შეკვეთების 40 პროცენტი გაუქმებულია, მართალია, „ნისანი“ უკმაყოფილო არც ამით უნდა იყოს. ეს გაუქმებები რომ არა, „ლიფზე“ შეკვეთებს რა დააკმაყოფილებდა - ამ ელექტრომობილის წარმოება ხომ, მიუხედავად იმისა, რომ ოპამას (იაპონია) ქარხანა სამ ცვლაში მუაობს, მაინც შეზღუდულია...

„ბეემვე i-მ“ სტარტი აიღო

გერმანული კომპანიისთვის ახალი ეპოქა იწყება

BMW Launches i

21 თებერვალი

21 თებერვალი ბავარიული კომპანიისთვის ისტორიული დღე გახდა - „ბეემვემ“ ოფიციალურად გაგვაცნო თავისი ახალი სუბ-ბრენდი, რომელსაც უბრალოდ, i უწოდა. ამ აბრევიატურით, ის მალე ელექტრომობილების და ჰიბრიდული ავტომობილების წარმოებას დაიწყებს. პრეზენტაციაზევე გამოცხადდა, რომ პირველი ორი ავტომობილი, რომლებიც ბაზარზე ამ მარკით გამოჩნდება, არის i3 და i8. პირველს აქამდ პროექტ „მეგასიტის“ სახელით ვიცნობდით, მეორე კი კონცეპტუალური „ვიჟნ ეფიშნტდაინემიქსის“ ბაზაზე დამზადდება.

„დღეს შეგვიძლია განვაცხადოთ, რომ „ბეემვე i“ პრემიუმ გადაადგილების მიმართულებით გადადგმული ახალი ნაბიჯია. ამ ახალი სუბ-ბრენდის დაფუძნებით, ჩვენ კიდევ ერთხელ ვამტკიცებთ, რომ პრემიუმ სეგმენტს მწარმოებლებს შორის, სიახლეების დანერგვაში ლიდერები ვართ“, - ამბობს „ბეემვეს“ დირექტორთა საბჭოს წევრი იან რობერტსონი, ვინც კომპანიის გაყიდვებსა და მარკეტინგს განაგებს.

„დღეს ჩვენს ინდუსტრიაში ახალი ერა იწყება, ინდივიდუალური გადაადგილების ახალი ერა. ეს კი არის „ბეემვე i“, ახალი ეპოქის პიონერი, დაბადებული ელექტრობა“, - დასძენს რობერტსონი.

ახალი სუბ-ბრენდის ჩამოყალიბებასთან ერთად, ბავარიულმა კომპანიამ ასევე ამერიკაში დააფუძნა ერთობლივი საწარმო სახელწოდებით „ბეემვე i ვენჩარზ“, რომელსაც შტაბ-ბინა ნიუ იორკში ექნება. ამ კომპანიის საწესდებო კაპიტალი 100 მილიონი დოლარია. მისი მთავარი დანიშნულება ისაა, რომ „ბეემვე i-ს“ ავტომობილების ექსპანსიას და უმაღლეს დონეზე მომსახურებას შეუწყოს ხელი.

ახალი მარკის პირველი ორი ავტომობილი ეგრეთ წოდებულ „ლაიფდრაივ“ არქიტექტურას დაეყრდნობა. არ არქიტექტურის საფუძველს წარმოადგენს ალუმინის შასი და ძარის კარკასი, რომელიც ნახშირბადის ბოჭკოთი არმირებული პოლიეთერული ფისის კომპოზიციური მასალითაა დამზადებული. თვითონ ძარაც ასეთივე კომპოზიტით დამზადდება. ეს მასალა ბავარიელებმა ამერიკელ პარტნიორთან, „SG კარბონთან“ ერთად შეიმუშავეს.

i3 კომპაქტური ჰეჩბეკია, რომელსაც აქამდე პროექტი „მეგასიტი“ ეწოდებოდა. მასში ჩასაჯდომი კონფიგურაციაა 2+2. ავტომობილი აღჭურვილია ელექტროძრავით, რომლის სიმძლავრეც 170 ცხენის ძალაა, მაქსიმალური მაბრუნი მომენტი კი - 250 ნიუტონმეტრი. ძრავი ენერგიას ლითიუმ-იონური აკუმულატორებისგან ღებულობს, რომლებსაც წყლით გაგრილების სისტემა ემსახურება. აკუმულატორებში დაგროვილი ენერგია, ავტომობილს მინიმუმ 160 კილომეტრს გაატარებს.

ამავე ავტომობილის ბაზაზე, უკვე მუშავდება მისი ჰიბრიდული ვერსია, რომლის სვლის სიშორის გასაზრდელადაც, კონსტრუქციას შიდაწვის ძრავისა და გენერატორის ტანდემი დაემატება. შიდაწვის ძრავი მცირელიტრაჟიანი იქნება და ის i-ს ჰიბრიდული ავტომობილებისთვის სპეციალურად მუშავდება.

რაც შეეხება i8-ს, მისი წინამორბედი - კონცეპტუალური „ვიჟნ ეფიშნტდაინემიქსი“ ბავარიელებმა პირველად 2009 წელს, ფრანკფურტის ავტო შოუზე გვიჩვენს, მისი წარმოების გადაწყვეტილება კი ახლახანს გაახმოვანეს. ავტომობილის დასახელებაში რიცხვი 8 მისი სპორტულობის მიმანიშნებელია. სახელით M8, „ბეემვე“ სპორტული სუპერ ავტომობილის წარმოებას გეგმავდა, თუმცა ეკონომიკური კრიზისის გამო, ამ განზრახვაზე ხელი აიღო.

მოდელი i8 ჰიბრიდული დანადგარით აღიჭურვება, რომელშიც ბენზინის სამცილინდრიანი 1.5-ლიტრიანი ძრავი და იგივე ელექტროძრავი შევა, რომელიც i3-ის აღწერისას ვახსენეთ. აქაც შიდაწვის ძრავს მხოლოდ ელექტროენერგიის გამომუშავების დანიშნულება აქვს. ბავარიელთა ინფორმაციით, i8-ს მაქსიმალური სიჩქარე 250 კმ/სთ იქნბა, ადგილიდან 100 კმ/სთ-მდე მის აჩქარებას კი 4.8 წამი ეყოფა.

უკვე ცნბილია ისიც, რომ ამ ორ ავტომობილს „ბეემვეს“ ლაიპციგის ქარხანა გამოუშვებს, რომლის მოდერნიზაციაზეც 400 მილიონი ევროა ინვესტირებული. ორივე ავტომობილის წარმოება 2013 წელს დაიწყება.

„ჰიუნდაი“ საბურავების წნევის საკონტროლო სისტემას ქმნის

Hyundai Develops New Tire Pressure Monitoring System

21 თებერვალი

„ჰიუნდაი“ და მისი შვილობილი კომპანია „მობის“, რომელიც საავტომობილო ნაწილების და კომპონენტების წარმოებაზეა სპეციალიზებული, საბურავებში წნევის მაკონტროლებელ სისტემას (TMPS - ტაიარ პრეშა მონიტორინგ სისტემ) ქმნიან, რომელსაც კორეული კომპანია თავის ავტომობილებზეც გამოიყენებს და კონკურენტებსაც მიჰყიდის.

მსგავს სისტემებს სხვა კომპანიებიც აწარმოებენ, თუმცა „მობისი“ გვპირდება, რომ მისი სისტემა ამჟამად არსებულ ყველა ანალოგზე უკეთესი და მსუბუქი იქნება. არადა, ეს პირველი შემთხვევაა, როდესაც სამხრეთკორეული კომპანია ასეთ მოწყობილობას გამოუშვებს.

„მობისის“ განცხადებით, მისი სისტემა ძალიან ადვილად გამოსაყენებელი იქნება, რადგან ის საბურავის სარქველზე დგება და ადვილად მისაწვდომია. ამასთან, ის კონკურენტების სისტემებზე დაახლოებით 10 პროცენტით მსუბუქია, რასაც ის ფაქტორი განაპირობებს, რომ მასში მცირე ზომის ელემენტია ჩადგმული. სიმსუბუქის გარდა, მცირე ელემენტის უპირატესობა ისიცაა, რომ ის დაახლოებით 30 პროცენტით ნაკლებ ენერგიას მოიხმარს. სიმსუბუქე კი იმიტაცაა მნიშვნელოვანი, რომ ბორბლის ბალანსს ოდნავ ცვლის და მის საპირწონედ ნაკლები ბალასტის გამოყენებაა საჭირო.

საბურავებში წნევის მაკონტროლებელ სისტემის წარმოების დაწყება დროულია, რადგან 2013 წელს ძალაში შევა ახალი მოთხოვნა, რომლის შესაბამისადაც, ყველა ავტომობილზე, რომელიც 3.5 ტონაზე ნაკლებს იწონის, მსგავსი სისტემების დაყენება სავალდებულო გახდება. ასე რომ, ჯერ ერთი, „ჰიუნდაის“ საკუთარი სისტემა ექნება. მეორეც, ამავე სისტემაზე მოთხოვნა სხვა კომპანიებისგანაც იარსებებს.

სუპერ ეკონომიური „ნისან მიკრა“

Nissan Launches Super Clean Micra DIG-S Turbo

19 თებერვალი

„ნისანმა“ თავის პოპულარულ სუბკომპაქტურ ჰეჩბეკ „მიკრას“ ახალი, სუპერ ეკონომიური ვერსია DIG-S (დირექტ ინჯექშნ გაზოლინ-სუპერჩერჯერ) შექმნა, რომელიც გარემოს ნახშირორჟანგით მინიმალურად აბინძურებს.

ავტომობილი ბენზინის სამცილინდრიანი 1.2-ლიტრიანი ძრავითაა აღჭურვილი, რომელსაც საწვავის უშუალოდ წვის კამერაში შეფრქვევის სისტემა და მექანიკური დამჭირხნი ემსახურება. გარდა ამისა, ავტომობილის ეკონომიურობის გაუმჯობესებას სისტემა სტოპ-სტარტიც უზრუნველყოფს.

ძრავი 98 ცხენის ძალას და 142 ნიუტონმეტრს გამოიმუშავებს და რაც მთავარია, ავტომობილის მიერ ყოველი კილომეტრის გავლისას, ატმოსფეროში მხოლოდ 95 გრამ CO2-ს გამოჰყოფს. ოღონდ, ეს მაჩვენებელი მაშინ მიიღწევა, როდესაც ძრავთან მექანიკური კოლოფია შეწყვილებული. ავტომატური კოლოფის შემთხვევაში კი გამონაბოლქვში ნახშირორჟანგის შემცველობა 115 გრამია.

ზემოთ ხსენებული სისტემების გარდა, ძრავის ეკონომიურობას ის გარემოებაც განაპირობებს, რომ ის ეგრეთ წოდებული მილერის ციკლით მუშაობს. ასეთი ძრავების თავისებურება ისაა, რომ შეშვების და გამოშვების ტაქტები სხვადასხვა ხანგრძლივობისაა. კერძოდ, შემშვები სარქველი ჩვეულებრივზე გვიან იხურება. ის შეკუმშვის ტაქტის დასაწყისშიც კი ღიად რჩება. სხვათა შორის, ფაზების ასეთ გადაფარვას ძრავების ფორსირებისას იყენებენ. 13:1-მდე გაიზარდა ძრავის კუმშვის ხარისხი, რამაც ასევე ძრავის ეფექტურობის გაუმჯობესება განაპირობა. საბოლოოდ, აგრეგატის მახასიათებლები 1.5-ლიტრიანი ოთხცილინდრიანი აგრეგატისას გაუთანაბრდა.

მექანიკურ კოლოფთან შეწყვილებული ასეთი ძრავით აღჭურვილი „მიკრას“ მაქსიმალური სიჩქარე 180 კმ/სთ-ია, 100 კილომეტრის გასავლელად კი, შერეული ციკლით მოძრაობისას, მას სულ რაღაც, 4.1 ლიტრი ბენზინი ჰყოფნის. „მიკრას“ ეკონომიურობა ოდნავ უარესდება, როცა ძრავი ავტომატურ კოლოფთან ერთად მუშაობს.

გარდა იმისა, რომ ტემპერატურული რეჟიმის შემსუბუქებით (მილერის ციკლის გამოყენების წყალობით), ხახუნის შემცირებითა (მოძრავი დეტალების რაოდენობის შემცირების წყალობით) და საწვავის შეფრქვევის სისტემის დახვეწით, ძრავის ეფექტურობა გაზარდეს, „ნისანის“ ინჟინრებმა „მიკრას“ ეკონომიურობის გაუმჯობესებას იმითაც მიაღწიეს, რომ სამცილინდრიანი ძრავი, ოთხცილინდრიანთან შედარებით, ნაკლებს იწონის. ასევე შეცვლილია ძრავის მართვის სისტემაც.

სუპერ ეკონომიური „ნისან მიკრას“ პრემიერა მარტში, ჟენევის ავტო შოუზე გაიმართება, მისი გაყიდვები კი ევროპის ბაზარზე ზაფხულში დაიწყება.

„კრაისლერთან“ ალიანსი „ფიატ-ისთვის“ მნიშვნელოვანია

Marchionne says Chrysler alliance is crucial

19 თებერვალი

ფიატ-ის მთავარი აღმასრულებელი სერჯო მარკიონე (ფოტოზე) აცხადებს, რომ „კრაისლერთან“ ალიანსს, იტალიური საავტომობილო ჯგუფისთვის დიდი მნიშვნელობა აქვს და დასძინა, რომ ტურინული კომპანია თავისი ბიზნესის იტალიაშივე განვითარებას აპირებს, რისთვისაც მილიარდობით დოლარის ინვესტირება იგეგმება.

„არამარტო ისაა სიმართლე, რომ „ფიატ-მა“ „კრაისლერი“ გადაარჩინა, არამედ ისიც, რომ „კრაისლერს“ ჩვენი ჯგუფის წარმატებული მომავლისთვის დიდი მნიშვნელობა ენიჭება. მათთან ერთად, ჩვენ საწარმოო პროგრამას ვამრავალფეროვნებთ და დიდი ერთობლივი გეგმები გვაქვს“, - ამბობს მარკიონე, ვინც იმავდროულად, ამერიკული კომპანიის მთავარი აღმასრულებელიცაა.

მარკიონემ ცოტა ხნის წინ განაცხადა, რომ „კრაისლერთან“ გაერთიანების შემდეგ, „ფიატ-ის“ შტაბ-ბინა შესაძლოა, ამერიკაში გადავიდეს, რამაც იტალიის მთავრობის დიდი უკმაყოფილება გამოიწვია. ამის გამო, მას სასწრაფოდ შეხვდა იტალიის პრემიერ მინისტრი სილვიო ბერლუსკონი, შემდეგ კი მარკიონე საპარლამენტო მოსმენაზეც დაიბარეს.

მარკიონემ, ვინც წარმოშობით იტალიელ-კანადელია, ბერლუსკონი დაარწმუნა იმაში, რომ „ფიატი“ საინვესტიციო პროგრამას, რომლის ფარგლებშიც, 27 მილიარდი დოლარის ინვესტირებას გეგმავს, მეტწილად იტალიაში განახორციელებს. მაგრამ საპარლამენტო მოსმენისას ისიც განაცხადა, რომ „კრაისლერთან“ გაერთიანების და ამ უკანასკნელის აქციონირების შემდეგ, ორი კომპანიის იტალიიდან მართვა პრობლემური გახდება.

„ჩვენ ვიმედოვნებთ, რომ მალე „კრაისლერის“ აქციებს ბირჟაზე გამოვიტანთ. ორი აქციონირებული კომპანიის სხვადასხვა შტაბ-ბინიდან მართვა კი პრობლემებს წარმოქმნის. თუმცა, ამასთან დაკავშირებით, ჯერ საბოლოო გადაწყვეტილება მიღებული არ გვაქვს“, - ამბობს მარკიონე.

„ფიატ-ს“, რომელიც იტალიის უდიდსი ინდუსტრიული ჯგუფია, „კრაისლერთან“ შერწყმა აქვს გადაწყვეტილი და ამ პროცესის დასრულებას, ორ-სდამ წელიწადში აპირებს. თუმცა, მანამდე ორივე კომპანიაში ძირეული რესტრუქტურიზაციის ჩატარება მოუწევს, რაც უზარმაზარ ხარჯებთან იქნება დაკავშირებული.

2009 წელს, მას შემდეგ, რაც „კრაისლერმა“ მართვადი გაკოტრების რეჟიმში გააგრძელა არსებობა, მისი აქციების 20 პროცენტი „ფიატ-მა“ გამოისყიდა. ამ წლის დასაწყისში კი იტალიურმა კომპანიამ „კრაისლერში“ თავისი წილი 25 პროცენტამდე გაზარდა.

მარკიონე ამბობს, რომ „ფიატ-ის“ იტალიაში დატოვება სურს, თუმცა ისიც დასძინა, რომ ამის გაკეთება გაუჭირდება, თუ პროფკავშირებისგან მხარდაჭერა არ ექნება: „ჩვენ არსად წასვლის სურვილია რ გვაქვს. „ფიატ-ი“ ამ ქვეყნის ნაწილია და იტალიის დატოვების სურვილი არ აქვს“.

საინვესტიციო გეგმა, სახელად „ფაბრიკა იტალია“, 20 მილიარდი ევროს ინვესტირებას ითვალისწინებს და ამ თანხის უმეტესი ნაწილი იტალიაში მოქმედ ხუთ ქარხანას მოხმარდება, რომლებიც ამჟამად წაგებაზე მუშაობს. რაც შეეხება პროფკავშირებს, მათ უკვე „ფიატ-ის“ ორ - მირაფიორის (ტურინის მახლობლად) და პომილიანოს (ნაპოლის მახლობლად) ქარხანასთან გააფორმეს ხელშეკრულებები.

მეცხრე თაობის „ჰონდა სივიკი“

Honda Civic Revealed, Gets More Efficient

19 თებერვალი

ჰონდამ თავისი ერთ-ერთი ყველაზე პოპულარული ავტომობილის, სივიკის მეცხრე თაობის მოდელის ფოტოები და ტექნიკური მონაცემები გამოაქვეყნა. ეს ავტომობილი ორი ძარით (სედანი და კუპე) და ხუთი ვერსიის სახით გაიყიდება. კომპანიის განცხადებით, ახალი სივიკის შემუშავებისას, ინჟინრებს მთავარი ყურადღება საწვავის ეკონომიურობაზე ჰქონდათ გადატანილი.

პირველი ვერსია ჩვეულებრივი ძრავებით აღჭურვილ სედანებს და კუპეებს მოიცავს. მეორე ეკონომიური ვერსია HF-ია, მესამე - სპორტული Si, მეოთხე ჰიბრიდული, მეხუთე კი გაზზე მომუშავე აგრეგატითაა აღჭურვილი. ამ ხუთიდან ყველაზე ეკონომიური HF და ჰიბრიდული ვერსიებია, რომელთა ხარჯიც 100 კილომეტრზე (ქალაქგარეთ მოძრაობისას) შესაბამისად, 5.7 და 5.2 ლიტრია.

სივიკ HF ბენზინის 1.8-ლიტრიანი ოთხცილინდრიანი i-VTEC ძრავითაა აღჭურვილი, რომელიც 140 ცხენის ძალას გამოიმუშავებს და რომელთანაც 5-საფეხურიანი ავტომატური გადაცემათა კოლოფია შეწყვილებული. სხვათა შორის, ეს ძრავი ახალი არაა და მას წინა თაობის სივიკზეც იყენებდნენ. გაზრდილი ეკონომიურობა კი იმის შედეგია, რომ ავტომობილი აეროდინამიკური ელემენტებით და სისტემა „ეკო ესისტით“ აღიჭურვა. სხვათა შორის, ამ სისტემას ჰონდა ადრე მხოლოდ ჰიბრიდულ მოდელებზე - CR-Z-სა და ინსაითზე იყენებდა. ყოველივეს შედეგად, წინა თაობის სივიკთან შედარებით, ახალი დაახლოებით 0.5 ლიტრით ნაკლებ ბენზინს მოიხმარს.

რაც შეეხება ჰიბრიდულ სივიკს, მის ძალურ დანადგარში, 1.5-ლიტრიანი ბენზინის აგრეგატი, პატარა ელექტროძრავი, უსაფეხურო ვარიატორი და ლითიუმ-იონური ელემენტების ბლოკი შედის. სხვათა შორის, ელექტროენერგიის დაგროვების საშუალებად, ჰონდა ასეთ აკუმულატორებს პირველად იყენებს.

სპორტული სივიკი კი 2.4-ლიტრიანი ძრავითაა აღჭურვილი, რომელიც 200 ცხენის ძალას გამოიმუშავებს. ამ აგრეგატმა 2.0-ლიტრიანი შეცვალა, რომლის მაქსიმალური სიმძლავრეც 197ცხენის ძალა იყო. ძრავის მიერ გამომუშავებულ მაბრუნ მომენტს (230 ნმ, რაც წინამორბედის ანალოგიურ მაჩვენებელზე დაახლოებით 22%-ით მეტია) 6-საფეხურიანი მექანიკური კოლოფი გადაამუშავებს და წინა წამყვან ბორბლებს აწვდის. სპორტული სივიკის დინამიკური მახასიათებლების გამოქვეყნებისგან, ჰონდა ჯერჯერობით თავს იკავებს.

„დღეისათვის ავტობაზარზე სივიკი ერთადერთი მოდელია, რომელიც მყიდველის ყველანაირ მოთხოვნას აკმაყოფილებს - არის ეკონომიური, სპორტული, ოპტიმალურად აღჭურვილი, ალტერნატიულ საწვავზე მომუშავეც და რაც მთავარია, დიდხანს ინარჩუნებს თავის ღირებულებას“, - ამბობს ჰონდას ამერიკული შტოს აღმასრულებელი ვიცე პრეზიდენტი ჯონ მენდელი.

მეცხრე თაობის სივიკის გაყიდვას ჰონდა პირველ რიგში ამერიკაში დაიწყებს, შემდეგ კი მას ევროპასა და სხვა ბაზრებზეც შეიტანს.

„ფორდმა“ კიოლნში ელექტრული ფურგონის ტესტირება დაიწყო

First Ford Transit Connect Electric charged for German field test

18 თებერვალი

საავტომობილო ბაზრის ელექტრომობილების სეგმენტში „ფორდმაც“ შეაბიჯა - ამერიკულმა კომპანიამ და გერმანიის ქალაქ კიოლნში მოქმედმა პროექტმა „E-მობილმა“, გერმანიის ჩრდილოეთ რაინ-ვესტფალიის მიწის ეკონომიკის სამინისტროს მხარდაჭერით, ელექტრომობილების ტესტირება დაიწყეს.

ამერიკულმა კომპანიამ ამ ტესტირებისთვის თავისი პირველი სერიული ელექტრომობილი - „ტრანზიტ კონექტ ელექტრიკი“ მოამზადა. სულ ტესტირების პროცესს ათი ასეთი ავტომობილი გაივლის. სხვათა შორის, კიოლნშივე უკვე რამდენიმე თვეა, ტესტირებას ათი ცალი საშუალო ზომის არასერიული კომერციული ელექტრული ფურგონი „ტრანზიტ BEV“ (BEV - ბატერი ელექტრიკ ვიიქლ, ანუ აკუმულატორიანი ელექტრული მანქანა) გადის.

პროექტში, „ფორდის“ გარდა, კიოლნის ხელისუფლება, ენერგომიმწოდებელი კომპანია „რაინენერჯი“ და დუისბურგ-ესენის უნივერსიტეტი მონაწილეობენ. პროექტის მიზანია, შეისწავლოს ქალაქის პირობებში ელექტრული ფურგონის ყოველდღიური ექსპლუატაციის თავისებურებანი.

ელექტრული „ფორდ ტრანზიტ კონექტი“ ჩვეულებრივი შიდაწვისძრავიანი ფურგონისთვის დამახასიათებელი დინამიკით, ტევადობით და ექსპლუატაციის სიმარტივით გამოირჩევა, რის გამოვ, ის შესანიშნავი არჩევანია, როდესაც საქმე ქალაქში მცირე ტვირთების გადაზიდვებს ეხება. ლითიუმ-იონური ელემენტევის ბლოკი ავტომობილის ძირზეა მოთავსებული, რისი წყალობითაც, მისი საბარგულის მოცულობა არ შემცირებულა.

ავტომობილი გერმანულ კომპანია „სიმენსის“ წარმოების ელექტროძრავითაა აღჭურვილი, რომელიც 78 ცხენის ძალას და 235 ნიუტონმეტრს იძლევა. მასთან ამერიკულ კომპანია „ბორგ უორნერის“ წარმოების ერთსაფეხურიანი ტრანსმისიაა დაკავშირბული, რომლის ერთადერთი საფეხურის გადაცემის რიცხციც 8.5:1-ზეა. აკუმულატოების ბლოკის ენერგოტევადობა 28 კილოვატსაათია. სეგმენტი, სადაც ელემენტების ბლოკია გამაგრებული, ავტომობილის ძარის სტრუქტურის სიხისტის გაზრდასაც უზრუნველყოფს. სამაგიეროდ, აკუმულატორების წონა დაახლოებით 453 კილოგრამია და ავტომობილის ტვირთამწეობაც ამდენივეთია შემცირებული.

240-ვოლტიანი შტეპსელიდან დამუხტვისას, „ფორდ ტრანზიტ კონექტის“ აკუმულატორები (რომლებსაც თხევადი გაგრილების სისტემა ემსახურება) სრულად 8 საათში ივსება, 120-ვოლტიანი შტეპსელის გამოყენების შემთხვევაში კი, დამუხტვის დრო 27 საათამდე იზრდება. სრულად შევსებული აკუმულატორებით, ელექტული სატვირთოს სვლის სიშორე 130 კილომეტრს აღწევს.

ტესტირების პროცესში, ელექტრულ ფურგონებს „რაინენერჯის“ მიერ მოწყობილი დასამუხტი სადგურები მოემსახურება. სხვათა შორის, ტესტირების დროს, ასეთი სადგურების ეფექტურობაც შემოწმდება. მთავარი კი ისაა, თუ რამდენად გამძლეა ელექტრომობილის ელექტრული სისტემები და დამუხტვა-განმუხტვის რამდენ ციკლს უძლებს აკუმულატორების ბლოკი.

B99 - პატარა „იაგუარის“ კონცეპცია „ბერტონესგან“

Bertone's Baby-Jaguar B99 Concept

18 თებერვალი

იტალიურმა სადიზაინერო სახლმა „ბერტონემ“, ჟენევის ავტო შოუსთვის, კონცეპტუალური ავტომობილი მაომზადა, რომელსაც „იაგუარ B99“ უწოდა. ჯერჯერობით უცნობია, ეს ინგლისური მარკის ახალი პატარა სედანია, თუ უბრალოდ, „ბერტონეს“ საჩვენებელი ავტომობილი, რომლითაც იტალიური ატელიე თავს გვახსენებს.
კონცეპტუალურ ავტომობილს „იაგუარი“ კი ეწოდება, თუმცა აბრევიატურა დიზაინ ატელიესგან აქვს მიღებული - B სწორედ „ბერტონეს“ ნიშნავს, რიცხვი კი - ამ ატელიეს არსებობის B99 წელს. ინტერნეტით გავრცელებული ინფორმაცია გვამცნობს, რომ ეს ავტომობილი მალე ინგლისური მარკის ყველაზე პატარა მოდელ X-ტაიპს შეცვლის.
კონცეპტუალური ავტომობილი კომპაქტურ სედანად კი ითვლება, მაგრამ თუ მის გაბარიტებს გადავხედავთ, კომპაქტურობისას ვერაფერს შევატყობთ: სიგრძე 4.5 მეტრი, სიგანე 1.95 მეტრი, სიმაღლე კი 1.35 მეტრი. თავისი გარეგნობით, ის კლასიკურ XJ-ს მოგვაგონებს. ავტომობილს არ აქვს შუა საყრდენი, მისი კარებები კი ერთმანეთის საპირისპირო მიმართულებით იღება. B99-ს ოთხი კარი კი აქვს, მაგრამ მათგან სრულფასოვანი მხოლოდ წინა კარებებია, უკანებს კი წინების ნახევარი სიგრძე აქვს. სავარაუდოდ, თუ ეს ავტომობილი კონვეიერზე დადგა, მწარმოებელი სტანდარტულ კარებებზე შეაჩერებს არჩევანს.

ავტომობილის გარეგნობას ერთი საინტერესო თვისება აქვს - მისი წინა და უკანა ნაწილები ძლიერ ჰგავს ერთმანეთს. კერძოდ, მთავარი ფარები და გაბარიტული ფარები წვრილი, წაგრძელებული და თითქმის ერთნაირი მოყვანილობისაა. მათ შორისაც ერთმანეთის მსგავსი, ოვალური მოყვანილობის სეგმენტებია ჩაყოლებული. წინ ეს სეგმენტი რადიატორის ბადითაა შევსებული, უკან კი მასში სანომრე დაფა მოუთავსებიათ.

ჯერ „იაგუარ B99-ის“ ინტერიერის ფოტოები არ გავრცელებულა, თუმცა ეჭვის შეტანაც არ ღირს იმაში, რომ კონცეპტუალური ავტომობილი, ინგლისური მარკისთვის შესაფერისად, მდიდრულად გამოეწყობა. სალონის გაფორმებისას ძვირფას ტყავს, ალუმინისა და აფრიკული კაკლის ხის დეტალებს გამოიყენებენ.

ჯერჯერობით არც ამ ავტომობილის აღჭურვილობაზე გავრცელებულა ინფორმაცია. ამ მხრივ, მხოლოდ ისაა ცნობილი, რომ ის ჰიბრიდული (კერძოდ რა ტიპის, ესეც უცნობია) დანადგარით აღიჭურვება. ამასთან, „ბერტონე“ ირწმუნება, რომ ავტომობილს სვლის დიდი მარაგი ექნება.

გაიცანით ჟენევურ პრემიერამდე - „ჰიუნდაი i40“

Hyundai Reveals New i40 Ahead of Geneva Debut

17 თებერვალი

„ჰიუნდაიმ“ თავისი ახალი ავტომობილის, ევროპული კლასიფიკაციით D სეგმენტის უნივერსალ i40-ის ორი ფოტო გაავრცელა. ეს ავტომობილი ევროპულ ბაზარზე წინა თაობის „სონატას“ შეცხლი, მისი მსოფლიო პრემიერა კი ჟენევის ავტო შოუზე გაიმართება. კორეული კომპანიის ევროპული შტოს აღმასრულებელი დირექტორი ალან რაშფორტი ამბობს, რომ ამ ავტომობილის სედანისძარიანი ვერსია ბაზარზე მერმისს გამოჩნდება და ის კონკურენციას „ფოლკსვაგენ პასატ-ს“, „ფორდ მონდეოს“, „მზადა6-ს“ და „პეჟო 508-ს“ გაუწევს.

ახალ ავტომობილთან ერთად, „ჰიუნდაი“ ჟენევაში თავის ახალ დევიზს - „ნიუ თინქინგ. ნიუ პოსიბილიტის“ (ახლებური აზროვნება. ახალი შესაძლებლობები ) წარადგენს, რომელიც „დრაივ იორ უეი-ს“ (იარე შენი გზით) შეცვლის. ახალი დევიზით, კორეული კომპანია განახლებული დიზაინისა და ახალი ტექნოლოგიებისადმი თავის დამოკიდებულებას გამოხატავს.

„ჰიუნდაის“ მიერ გამოქვეყნებულ პრეს რელიზში წერია, რომ ეს ავტომობილი სპეციალურად ევროპული ბაზრისთვისაა შექმნილი. მის აღჭურვაში შესულია ის ძრავები და ტექნოლოგიები, რომლებიც ევროპელი ავტო მოყვარულის გემოვნებას აკმაყოფილებს. ამასთან, ეს „ჰიუნდაისთვის“ D სეგმენტის პირველი ავტომობილია და ის კომპანიის ევროპული კვლევითი ცენტრის (რომელიც გერმანიის ქალაქ რუსელსჰაიმში მდებარეობს) სპეციალისტების მიერაა შემუშავებული.

ახალი ავტომობილი კომპანიის კორპორატიულ სტილშია შესრულებული, რომელსაც „ჰიუნდაი“ „თხევად სკულპტურად“ მოიხსენიებს. გარეგნულად ის უფრო ამერიკული ბაზრისთვის განკუთვნილ „ელანტრას“ მოგაგონებთ, ვიდრე წინა თაობის „სონატას“ რომელსაც ცვლის. ძარა უნივერსალის ტიპისაა, მაგრამ სხვა უნივერსალებისგან განსხვავებით, სიმძიმის შთაბეჭდილებას მაინც არ ტოვებს და ეს დიზაინერების დამსახურებაა. შეიძლება ითქვას, რომ ის უფრო წაგრძელებული ჰეჩბეკია, ვიდრე კლასიკური უნივერსალი. სხვათა შორის, ავტომობილს არც ისე დიდი საბარგული აქვს - მისი მოცულობა მხოლოდ 553 ლიტრია, მაგრამ თუ უკანა სავარძლებს დაკეცავთ, სდაბარგულის მოცულობა 1790 ლიტრამდე იზრდება.

საშუალო ზომის ავტომობილი ბენზინის და დიზელის ძრავების ფართო გამით აღიჭურვება. მათ შორის უახლესია 1.7-ლიტრიანი ტურბო დიზელის აგრეგატი, რომელიც ყოველ კილომეტრზე მხოლოდ 113 გრამ ნახშირორჟანგს გამოჰყოფს. ჯერჯერობით არაოფიციალურადაა ცნობილი, რომ ეს ძრავი ორი ვერსიის სახით არსებობს, რომელთა სიმძლავრეც 115 და 136 ცხენის ძალაა. ძრავს ორდისკოიანი ქუროს მეშვეობით, რობოტიზებული კოლოფი შეუწყვილდება.

„მყიდველს შევთავაზოთ მეტი უფრო ნაკლებ ფასში - ეს ჩვენი ფუნდამენტური პრინციპია და ახლა მას, ახალი დევიზით - „ახლებური აზროვნება. ახალი შესაძლებლობები“, უფრო ვავითარებთ. i40 არის ნიმუში იმისა, როგორ ვთავაზობთ მყიდველს უკეთესს და ამასთან, ჩვენი პროდუქციის ხელმისაწვდომობას ვინარჩუნებთ. მომხიბლავი დიზაინით დაწყებული, შესაშური მახასიათებლებით და უახლესი ტექნოლოგიებით გაგრძელებული, i40 თავისი კონკურენტებისგან აშკარად გამორჩეული ავტომობილია“, - ამბობს რაშფორტი.

„ტოიოტა“ აზიისთვის დაბალფასიან ავტომობილს გამოუშვებს

Toyota to Build Low-Budget Model for Asia

16 თებერვალი

„რენოს“ მაგალითი გადამდებია - ფრანგულ-რუმინული „ლოგანი“ არამარტო აღმოსავლეთ ევროპასა და განვითარებად ქვეყნებშია პოპულარული, არამედ მასზე დასავლეთ ევროპაშიც დიდი მოთხოვნილებაა. ამიტომ, ამ სეგმენტში შეღწევას ახლა სხვა კომპანიებიც ცდილობენ და მათ შორის მსოფლიოს უდიდესი მწარმოებელი - „ტოიოტაცაა“.

იაპონური გამოცემა ნიკეი იუწყება, რომ „ტოიოტა“ და მისი პარტნიორი „დაიჰაცუ“ ერთობლივად ამუშავებენ ახალ პროექტს, რომლის შედეგადაც აზიის ქვეყნების, პირველ რიგში კი ინდონეზიის ბაზარს, ახალი იაფფასიანი ავტომობილი მოევლინება, რომელიც მოგვიანებით, რეგიონის სხვა ქვეყნებშიც გაიყიდება.

ნიკეისავე ინფორმაციით, ახალი ავტომობილი უფრო პატარა იქნება, ვიდრე მოდელი „ეტიოსი“, რომელიც იაპონურმა კომპანიამ სპეციალურად, ინდური ბაზრისთვის შეიმუშავა. ახალი ავტომობილის სავარაუდო ღირებულება 9 500 დოლარი იქნება. ფასი მხოლოდ აღჭურვის დონის შესაბამისად შეიცვლება.

ახალ ავტომობილს „დაიჰაცუს“ სპეციალისტები შეიმუშავებენ და ამავე კომპანიის ქარხანა გამოუშვებს, თუმცა წარმოებული ავტომობილების 70 პროცენტი „ტოიოტას“ ლოგოთი გაიყიდება. ახალი მოდელისთვის ქარხანაც ახალი აშენდება. მასში „დაიჰაცუ“ 20 მილიარდ იენს დააბანდებს. ქარხანა პირველ ავტომობილებს

ორ წელიწადში გამოუშვებს. მისი წლიური წარმოება 100 000 ავტომობილი იქნება, თუმცა პირველ წელს, მხოლოდ ამის ნახევარს დაამზადებს.

გარდა ამისა, „ტოიოტა“ ასევე მუშაობს ელექტრომობილზე, რომელიც უპირველესად, ჩინური ბაზრისთვის იქნება განკუთვნილი. ამ შემთხვევაში, მას პარტნიორობას ჩინური ჯგუფი FAW უწევს. ელექტრომობილი კომპაქტურ მოდელ „ვიოს-ის“ ბაზაზე შეიქმნება, რომელსაც იაპონური კომპანია წელს გამოუშვებს. მას FAW-ის კუთვნილებაში მყოფ კომპანია „ტიანძინის“ წარმოების ელექტროძრავით აღჭურვავენ. ამ ავტომობილის წარმოება მერმისს უნდა დაიწყოს და მის შესახებ „ტოიოტა“ ჯერჯერობით არანაირ ინფორმაციას არ ავრცელებს.

„დე ტომაზო“ განახლებას იწყებს

De Tomaso Revival Unveiled

16 თებერვალი

ლეგენდარული იტალიური ბრენდი „დე ტომაზო“ აღორძინების გზას ადგას და ამ საქმეს სათავეში იტალიელი ბიზნესმენი ჯან მარიო როსინიოლო უდგას. პირველი ავტომობილი იმ სამიდან, რომელთა წარმოებასაც ეს კაცი ამ მარკით აპირებს, არის ქროსოვერი, რომელსაც კონცეპტუალური SLC-ს სახით, ჟენევის ავტო შოუზე ვიხილავთ. თუმცა, ამ მანქანის პირველი ჩვენება უკვე შედგა და მას რომმა უმასპინძლა.

სხვათა შორის, „დე ტომაზოს“ ადრე ქროსოვერი არასდროს გაუკეთებია. უფრო მეტიც, ეს კომპანია მხოლოდ სპორტული სუპერ ავტომობილების წარმოებაზე იყო სპეციალიზებული. მაგრამ დიდი ხნის წინ, ჩაილურის წყალი დალია და ბევრს დაავიწყდა კიდეც. მაგრამ როსინიოლოს არ დავიწყებია და ხელსაყრელი მომენტი შეარჩია თუ არა, მისი გაცოცხლება გადაწყვიტა.

როსინიოლო ადრე ისეთ კომპანიებს ხელმძღვანელობდა, როგორებიც „ლანჩა“, „ტელეკომ იტალია“ და „ზანუსია“. ცოტა ხნის წინ, მან იჯარით აიღო „ფიატის“ გრულიასკოს (ტურინის მახლობლად მდებარეობს) ქარხანა, რომელიც ტურინულმა კომპანიამ არარენტაბელობის გამო გააჩერა. როსინიოლომ ამ ქარხნის გადაიარაღებისა და „დე ტომაზოს“ აღსადგენად, 116 მილიონი ევრო გამოჰყო.

„დე ტომაზოს“ ქროსოვერის ძირითად ძრავად ბენზინის 524-ცხენისძალიანი V8 შეირჩა, თუმცა როცა ამ ავტომობილის წარმოება დაიწყება, ის დიზელის 247-ცხენისძალიანი V6 აგრეგატითაც აღიჭურვება. რაც მთავარია, ავტომობილის დიზაინი ამ საქმის მაესტრომ, ატელიე „პინინფარინამ“ შეიმუშავა. ჯერჯერობით, ამაზე მეტი ინფორმაცია არ ვრცელდება.

როსინიოლო წლიურად მხოლოდ 3 000 ცალი ქროსოვერის წარმოებას აპირებს. ავტომობილის სავარაუდო ღირებულება კი 115 000 დოლარი იქნება. „დე ტომაზო“ მის წარმოებას მერმისს დაიწყებს. როდის დაიწყება დანარჩენი ორი მოდელის (სედანის და კუპესი) წარმოება, ჯერჯერობით არ დაკონკრეტებულა. თუმცა, როსინიოლო ამბობს, რომ ისინი უკვე შემუშავების სტადიაშია.

„პორშეს“ ჟენევური სიახლე - ჰიბრიდული „პანამერა“

Porsche Panamera S Hybrid Achieves 6.8 l/100km

16 თებერვალი

ჟენევის ავტო შოუსთვის, „პორშეს“ რამდენიმე სიახლე აქვს მომზადებული, რომელთაგან ერთ-ერთი ჰიბრიდული აგრეგატით აღჭურვილი ოთხკარიანი კუპე „პანამერაა“. მართალია ამ მანქანის პრემიერა ჟენევაში ჩატარდება, თუმცა შტუტგარტულმა კომპანიამ მისი მონაცემები გამოფენამდე ორი კვირით ადრე გამოაქვეყნა.

ავტომობილის სრული სახელწოდებაა „პორშე პანამერა S ჰიბრიდ“. მისი შექმნისას, „პორშეს“ ინჟინრების მიზანს, ავტომობილის სპორტულობის შენარჩუნება და ეკონომიურობის მნიშვნელოვნად გაუმჯობესება იყო. უნდა ითქვას, რომ მათ ამოცანას საკმაოდ იოლად გაართვეს თავი, რაშიც უგზოობის ჰიბრიდული „კაიენის“ აღჭურვილობა გამოადგათ.

„პორშემ“ გამოაცხადა, რომ „პანამერა S ჰიბრიდი“ მის ისტორიაში ყველაზე ეკონომიური ავტომობილია. როცა „მიშლენის“ დაბალი წინააღმდეგობის მქონე საბურავებზე დგას, ჰიბრიდული პანამერა 100 კილომეტრის გავლას სულ რაღაც, 6.8 ლიტრი ბენზინით ახერხებს. ყოველ კილომეტრზე კი ატმოსფეროში 159 გრამ ნახშირორჟანგს გამოჰყოფს. აღნიშნული საბურავები სპეციალურად ჰიბრიდული „პანამერასთვის“ შეიქმნა. მათ გარეშე კი ავტომობილს ოდნავ უარესი მაჩვენებლები აქვს. კერძოდ, 100 კილომეტრს 7.1 ლიტრი საწვავით გადის, ყოველ კილომეტრზე კი 167 გრამ CO2-ს გამოჰყოფს.

ავტომობილის ჰიბრიდულ სისტემაში ბენზინის ტურბოკომპრესორიანი 3.0-ლიტრიანი V6 ძრავი და ელექტროძრავი შედის. პირველი 333 ცხენის ძალას იძლევა, მეორე კი - 47 ცხენის ძალას. შიდაწვის ძრავთან 8-საფეხურიანი ავტომატური კოლოფია შეწყვილებული, ელექტროძრავებს კი ენერგიით ნიკელ-მეტალჰიდრიდული ელემენტების ბლოკი ამარაგებს.

„პორშეს“ მონაცემებით, ჰიბრიდული „პანამერა“ ადგილიდან 100 კმ/სთ აიჩქარეს 6.0 წამში ავითარებს, მისი მაქსიმალური სიჩქარე კი 270 კმ/სთ-ია. ამასთან, ავტომობილს მხოლოდ ელექტროძრავით გადაადგილებაც შეუძლია, თუმცა აკუმულატორებში დაგროვილი ენერგია მხოლოდ 2 კილომეტრის გასავლელად ჰყოფნის. თანაც, ამ დროს მისი მაქსიმალური სიჩქარე მხოლოდ 85 კმ/სთ-ია.

„პორშე პანამერა S ჰიბრიდის“ გაყიდვები ივნისში დაიწყება, მისი საბაზო ვერსია კი გერმანიაში 106 185 ევრო ეღირება.

„პორშემ“ მოდელ „ბოქსსტერისგან“ ელექტრომობილი შექმნა

Porsche Unwraps Boxster E Electric Prototype

15 თებერვალი

ჟენევის ავტო შოუზე, „პორშეს“ ერთ-ერთი ექსპონატი, მოდელ „ბოქსსტერის“ ბაზაზე შექმნილი ელექტრომობილი იქნება, რომელიც გერმანული კომპანიისთვის მოძრავი ლაბორატორიის მოვალეობას შეასრულებს, მომავალში კი მასზე გამოყენებულ ტექნოლოგიებს, ცუფენჰაუზენელები თავიანთ სერიულ მოდელებზე დანერგავენ.

„ელექტრული ძალით გადაადგილება უახლოესი მომავლის გამოწვევაა და ჩვენი ინჟინრების მიზანია, ამ გამოწვევას ჩვეული ენთუზიაზმით შევხვდეთ. „ბოქსსტერ E“ ჩვენთვის მოძრავი ლაბორატორია გახდება, რომელსაც ელექტრომობილებისთვის დამახასიათებელი პრობლემების გადასაჭრელად გამოვიყენებთ, რათა მომხმარებლის მოთხოვნები მაქსიმალურად დავაკმაყოფილოთ“, - ამბობს „პორშეს“ მთავარი აღმასრულებელი მათიას მიულერი.

„ბოქსსტერ E“ ორი ელექტროძრავითაა აღჭურვილი, რომელთა ჯამური სიმძლავრეც 241 ცხენის ძალაა, რითაც ის შიდაწვისძრავიანი „ბოქსსტერის“ საბაზო ვერსიის სიმძლავრესთან ახლოსაა. ძრავებს ელექტროენერგიით ლითიუმ-იონურ აკუმულატორების ბლოკი ამარაგებს, რომლის ტევადობაც 29 კილოვატსაათია.

გერმანულ კომპანიას ჯერ „ბოქსსტერ E-ს“ ტექნიკური მონაცემები არ გამოუქვეყნებია, თუმცა ცნობილია, რომ ისინი დაახლოებით შიდაწვისძრავიანი მოდელის მსგავსი იქნება. ცნობისათვის, „ბოქსსტერ S“ 3.4-ლიტრიანი, 6-ცილინდრიანი ძრავითაა აღჭურვილი, რომელიც 310 ცხენის ძალას იძლევა, მისი დახმარებით კი ავტომობილი 0-დან 100 კმ/სთ სიჩქარეს 5.3 წამში ავითარებს.

„პორშემ“ ელექტრომობილების წარმოების გეგმა ჯერ კიდევ 2009 წელს გამოაქვეყნა. მაშინ კომპანიას სათავეში მიხაელ მახტი ედგა, რომელიც ამჟამად „ფოლკსვაგენის“ წარმოების დირექტორია. ელექტრომობილების გარდა, ცუფენჰაუზენელები თავიანთი ავტომობილების ჰიბრიდული ვერსიების წარმოებასაც გეგმავენ. ამჟამად კომპანიის საწარმოო პროგრამაში, ჰიბრიდული სისტემით აღჭურვილი მხოლოდ ერთი ავტომობილი - „კაიენი“ შედის. მალე ბაზარზე ანალოგიური სისტემით აღჭურვილი „პანამერა“ და კონცეპტუალური „918 სპაიდერის“ ბაზაზე შექმნილი მოდელი გამოჩნდება.

ელექტრული „ტოიოტა iQ EV“ ჟენევური დებიუტისთვის მზადაა

Geneva to Mark European Debut of Toyota iQ EV Prototype

15 თებერვალი

„ტოიოტამ“ გამოაცხადა, რომ ჟენევის ავტო შოუზე, თავისი ჯუჯა ჰეჩბეკის, iQ-ს ბაზაზე დამზადებულ ელექტრომობილს გამოფენს. ამ ელექტრომობილს ევროპულ გზებზე ტესტირების სრული ციკლი უკვე გავლილი აქვს და ის ძველი კონტინენტის ბაზარზე მერმისს გამოჩნდება. თუმცა, მხოლოდ ლიზინგით გაიყიდება. იგივე ელექტრომობილი აშშ-ის ბაზარზეც შევა, ოღონდ ის იქ მხოლოდ „სციონის“ მარკით გაიყიდება.

„ტოიოტას“ ინჟინრებმა წარმატებით გაართვეს თავი რთულ ამოცანას, რომელიც მათგან სრულიად ელექტრული აღჭურვილობის ამ პატარა მანქანაში განლაგებას მოითხოვდა. ამასთან, ეს მათ ისე მოახერხეს, რომ პრაქტიკულად უცვლელი დარჩა როგორც სალონის, ისე საბარგულის მოცულობაც.

ჯუჯა ჰეჩბეკს მამოძრავებელ ძალას პატარა ელექტროძრავი ანიჭებს, რომელიც ენერგიით ლითიუმ-იონური აკუმულატორებისგან იკვებება. აკუმულატორების ბლოკი მანქანის ძირში, იმ ადგილას განთავსდა, სადაც შიდაწვისძრავიან ავტომობილში საწვავის ავზია. აკუმულატორების ტევადობა არ დაკონკრეტებულა, თუმცა იაპონური კომპანია აცხადებს, რომ მათში დაგროვილი ენერგია საკმარისია იმისათვის, რომ ჯუჯამ 105 კილომეტრი გაიაროს. ასევე უცნობია, თუ აკუმულატორების სრული დამუხტვისთვის რა დროა საჭირო.

ცნობისათვის, ელექტრომობილების წარმოებაში, „ტოიოტას“ პარტნიორობას ამერიკული „ტესლა მოტორსი“ უწევს, რომელიც იაპონური კომპანიისთვის აკუმულატორებს, ელექტროძრავსა და ელექტრომობილისთვის საჭირო სახვადასხვა კომპონენტს ამზადებს. ამ ორი კომპანიის პარტნიორობის შედეგები ბაზარზე მერმისს გამოვა. მათგან ერთია iQ, მეორე კი უგზოობის მოდელ RAV4-ის ელექტრული ვერსია, რომელიც პირველად საზოგადოებას დეტროიტის შოუზე ეჩვენა. ამ ავტომობილს აკუმულატორების ტევადობა 240 კილომეტრზე ჰყოფნის, მისი საბაზო ღირებულება კი 40 000 დოლარი იქნება.

ღია ბენტლი ყინულზე სიჩქარის რეკორდსმენი გახდა

Extreme Bentley Supersports Convertible Takes Speed Record on Sheet Ice

15 თებერვალი

დიდი ხანია, რალიში მსოფლიოს ოთხგზის ჩემპიონმა, ფინელმა იუჰა კანკუნენმა თავისი შლემი ლურსმანზე დაკიდა, მაგრამ დროდადრო რბოლებისკენ მაინც გაურბის გული და არც მათში მონაწილეობაზე ამბობს უარს. ახლახანს კი სიჩქარის რბოლის მსოფლიო რეკორდი გააუმჯობესა, რომელიც თავადვე ეკუთვნოდა.

52 წლის იუჰამ „ბენტლი კონტინენტალ სუპერსპორტით“ ყინულზე 330.695 კმ/სთ სიჩქარე განავითარა და მის მიერვე ოთხი წლის წინ დამყარებული რეკორდი თითქმის 9 კმ/სთ-ით გააუმჯობესა. სხვათა შორის, წინა რეკორდიც მან ინგლისური კომპანიის ავტომობილით, ოღონდ „ბენტლი კონტინენტალ GT-ით“ დაამყარა.

იუჰა კანკუნენი

..............................

რა თქმა უნდა, ავტომობილი, რომელიც კანკუნენმა რეკორდის გასაუმჯობესებლად გამოიყენა, მნიშვნელოვნადაა მოდიფიცირებული. უპირველეს ყოვლისა, ავტომობილი დამცავი კარკასითაა აღჭურვილი, რომელიც მის სალონში მყოფთ დაჯახების და გადაყირავების შემთხვევაში იცავს. ავტომობილის ძარას დამატებული აქვს წინა და უკანა სპოილერები, რომლებიც მაღალი სიჩქარით მოძრაობისას, მის სტაბილურობას უზრუნველყოფს. გარდა ამისა, ავტომობილი 20-დუიმიან ბორბლებზე დგას, რომლებიც „პირელის“ წარმოების საბურავებითაა (სოტოზერო II, 275/40R20) შემოსილი.

სპეციალური საფენით დაიფარა წინა ფარები, ჰაერის ამღებები და რადიატორის ბადე. მოლიპულ გზაზე ავტომობილის გასაჩერებლად, მანქანას უკანა ნაწილში სპეციალური სამუხრუჭე პარაშუტი დაუყენეს, როგორსაც სამხედრო თვითმფრინავებზე იყენებენ ხოლმე.

„წინა ცდაზე, როდესაც რეკორდი კონტინენტალ GT-ით გავაუმჯობესე, მაგიურ 200 მლ/სთ-მდე ძალიან ცოტა დამაკლდა. ახლა კი, როდესაც გავიგე, რომ ბენტლის ბიჭები „სუპერსპორტსს“ ამზადებდნენ, მის საჭესთან დაჯდომა მომინდა. ამჯერად ჩემს განკარგულებაში 600 ცხენის ძალაზე მეტი, სწრაფად გადამრთველი კოლოფი და სრულამძრავიანი ტრანსმისია იყო. მოკლედ, ღია „სუპერსპორტსი“ რეკორდის დასამხობად საუკეთესო იარაღი იყო“, - განაცხადა კანკუნენმა.

რეკორდი ფინეთში, 30-გრადუსიან ყინვაში, 1000-მეტრიან გზაზე დამყარდა. გარბენს ფინეთის საგზაო პოლიციის წარმომადგენლები დაესწრნენ. რბოლას ასევე გინესის რეკორდების წიგნის წარმომადგენლები დაესწრნენ, რომლებმაც რეკორდი ოფიციალურად დააფიქსირეს. როგორც რეკორდების დამყარებისასაა დამკვიდრებული, საბოლოო შედეგი ორი გარბენის დროის საშუალო არითმეტიკულით გამოვლინდა. ამასთან, ორივე გარბენი ერთიმეორის საპირისპირო მიმართულებით შესრულდა.