ჩემს ბლოგს ვირთხა შემოეჩვია!

აქედან პოსტებს იწერს. ზოგ პირდაპირ, ზოგსაც ნაწილობრივ. ერთ-ერთი ბოლო გადაწერილი ვნახე, განსხვავება მხოლოდ ოთხი სიტყვა იყო. კვალს "რადიო პალიტრასა" და www.ambebi.ge-სკენ მივყავარ... ამჯერად ვირთხის სახელს არ ვიტყვი. ამ პოსტს თვითონაც ნახავს და თუ ნამუსი შერჩენია, ბაცაცობას შეეშვას. თუ არ შეეშვება, საქვეყნოდ გავაბანძებ!!!

„ჰიუნდაი“ „ელანტრას“ ბაზაზე კუპესაც გამოუშვებს

Hyundai to Show Elantra Coupe at LA Auto Show

10 ივნისი

მიღწეული წარმატებების მიუხედავად, „ჰიუნდაი“ ყურადრებას არ ადუნებს და მყიდველს სულ ახალ-ახალ ავტომობილებს სთავაზობს. კორეულმა კომპანიამ საინტერნეტო გამოცემა „ინსაიდ ლაინს“ აცნობა, რომ ლოს ანჯელესის ავტო შოუს დამთვალიერებელს, „ელანტრას“ ბაზაზე დამზადებულ კუპეს წარუდგენს, ავტომობილს, რომელმაც კონკურენცია თვით „ჰონდა სივიკს“ უნდა გაუწიოს.

„ჯენერალ მოტორსი“ „ოპელის“ გაყიდვას არ აპირებს

GM Denies Reports Claiming Plans to Sell its Opel Brand

9 ივნისი

„ჯენერალ მოტორსმა“ უარყო გერმანულ პრესაში გავრცელებული ხმები, რომელთა თანახმადაც, ის თავისი გერმანული შტოს - „ოპელის“ გაყიდვას მაინც აპირებს. ეს ინფორმაცია „დერ შპიგელმა“ და „ავტო ბილდმა“ გაავრცელეს. მათ მიერ „მოპოვებული ინფორმაციით“, ამერიკულ კომპანიას აღარ სჭირდება ის გამოცდილება, რომელიც „ოპელს“ კომპაქტური ავტომობილების და ეკონომიური ძრავების წარმოებაში გააჩნია.

იმავე გამოცემების ინფორმაციით, გენერლები გერმანული ბრენდს თავისი კორეული შტოთი ჩანაცვლებას აპირებენ, რომელიც ადრე „დეუს“ სახელით იყო ცნობილი. ამასთან, „ოპელის“ შესაძლო მყიდველებად, მათ „რომელიმე ჩინური კომპანია“ და „ფოლკსვაგენიც“ კი დაასახელეს. ამასთან, ვოლფსბურგული გიგანტის დაინტერესება იმით ახსნეს, რომ ამით ის სწრაფად განვითარებადი ჩინური (რა მნიშვნელობა აქვს, რომელი იქნება) კომპანიის გაძლიერებას შეუშლიდა ხელს. თანაც, თავის გეგმასაც - გახდეს მსოფლიოს უდიდესი ავტომწარმოებელი, უფრო მალე შეასრულებდა.

მაგრამ დეტროიტულმა გიგანტმა ამ რეპორტაჟებს მტკნარი გამონაგონი და უსაფუძვლო უწოდა. სხვათა შორის, სმ ჭორების გავრცელებამდე ცოტა ხნით ადრე, „ჯენერალ მოტორსის“ მთავარმა აღმასრულებელმა ხაზგასმით განაცხადა, რომ მისი კომპანიის ევროპული საქმიანობის მთავარი ლოკომოტივი ისევ „ოპელი“ იქნება. ამასთან, გერმანულ კომპანიას მსოფლიო ბაზარზე ექსპანსიის უფლებაც მიეცა, რაც მის ფუნანსურ მდგომარეობას სტაბილურსა და მყარს გახდის.

გამოცემა „ავტონიუსი“ დაუკავშირდა „ოპელის“ წარმომადგენლობას, რომლისგანაც ამ საკითხთან დაკავშირებით შემდეგი პასუხი მიიღო: „ეს წმინდა წყლის სპეკულაციაა, გამონაგონი, რომელსაც საფუძველი არ აქვს. ჩვენ კი სპეკულაციებზე კომენტარებს არ ვაკეთებთ“. დაახლოებით ასეთივე იყო გერმანიის თურინგიის მიწის (ამ მიწის ქალაქ აიზენახში ოპელს ქარხანა აქვს) მთავრობის პასუხიც: „ჩვენს ხელთ არსებული ინფორმაციით, ეს ნონსენსია“.

ცნობისათვის: მართალია, „ოპელის“ გაყიდვები განუხრელად იზრდება, თუმცა კომპანია მაინც წაგებაზე მუშაობს. და მაინც, „ოპელის“ მთავარი აღმასრულებელი კარლ-ფრიდრიხ შტრაკე ამბობს, რომ მისი კომპანია დასახული გეგმის შესაბამისად ვითარდება და რომ მალე მისი ბიზნესი მომგებიანი გახდება.

ამერიკის მთავრობა ელექტრომობილებს ყიდულობს

US to Buy Transit Connect Electric

8 ივნისი

ობამას ადმინისტრაციას გადაწყვეტილი აქვს, რომ აშშ-ის მტავრობის საავტომობილო ფარეხი, რაც შეიძლება, მეტი „მწვანე“ ავტომობილით შეავსოს. ამიტომ, „სერვისის გენერალური ადმინისტრაცია“, რომელსაც სამთავრობო ავტოპარკი აბარია, თუ სადმე ჰიბრიდულ და ელექტრულ ავტომობილებს წააწყდება, მაშინვე შეკვეთების გამოწერაზე ზრუნავს.

ახლახანს, აღნიშნულმა ადმინისტრაციამ, „ფორდს“ ელექტულ ფურგონ „ტრანზიტ კონექტის“ მსხვილი პარტია შეუკვეთა - ოთხწლიანი კონტრაქტი გააფორმა „ფორდის“ პარტნიორ კომპანია „აზურ დაინემიქსთან“, რომელიც ჩვეულებრივი „ტრანზიტ კონექტის“ ბაზაზე, ამ ფურგონის ელექტრულ ვერსიებს ამზადებს. ამ კონტრაქტის მიხედვით, „აზურ დაინემიქსი“ სამთავრობო ფარეხებს 112 მილიონი დოლარის ღირებულების ელექტრომობილებს მიაწვდის.

„ძალიან გახარებულები ვართ, რომ ადმინისტრაცია ჩვენი ავტომობილებით დაინტერესდა. მათ შესაბამისად შეაფასეს ეს ინოვაციური ელექტრომობილი და სწორედ ამის შედეგია ესოდენ მსხვილი კონტრაქტი. იმ დროს, როდესაც საწვავზე ფასები განუხრელად იზრდება და რეკორდულ ნიშნულს უახლოვდება, ფედერალური მთავრობა სწორ ნაბიჯს დგამს, როდესაც ალტერნატიულ წყაროზე მომუშავე ავტომობილების შეძენას ცდილობს. ეს ის ნაბიჯია, რომელიც მთავრობას დასახული მიზნის შესრულებაში დაეხმარება, რაც იმას გულისხმობს, რომ ამერიკის გზებზე 2015 წელს მილიონი ელექტრომობილი უნდა დადიოდეს“, - ამბობს „აზურ დაინემიქსის“ მტავარი აღმასრულებელი სკოტ ჰარისონი.

აშშ-ის მთავრობის კიდევ ერთი მწვან გადაწყვეტილება ისაა, რომ ამიერიდან, მისი საავტომობილო პარკი, მხოლოდ ჰიბრიდულ, ელექტრულ, ან სხვა ტიპის ალტერნატიულ წყაროზე მომუშავე ძალური დანადგარებით უნდა იყოს აღჭურვილი. „სერვისის გენერალურ ადმინისტრაციას“ ამ გადაწყვეტილების შესრულება უკვე დაწყებული აქვს და ამით პირველმა „ჯენერალ მოტორსმა“ იხეირა, რომლის ელექტრულ ჰიბრიდ „შევროლე ვოლტზეც“ მსხვილი კონტრაქტი გაფორმდა. გარდა ამისა, ამერიკის მთავრობამ პატარა ფინურ კომპანია „თინკს“ მინი ელექტრომობილები შეუკვეთა.

„კადილაკი“ გლობალური ბრენდი ხდება

GM Wants to Start Building Cadillacs Abroad by the End of 2012

8 ივნისი

„ჯენერალ მოტორსის“ მთავარმა აღმასრულებელმა დენ აკერსონმა განაცხადა, რომ მისი კომპანია ლუქსის კლასის ავტომობილების მწარმოებელი „კადილაკის“ გლობალურ ბრენდად გადაქცევას აპირებს და ამ გეგმის შესასრულებლად, მისი ავტომობილების ამერიკის საზღვრებს გარეთ წარმოებას დაიწყებს.

„კადილაკი“ უცხოეთში წარმოებას 2012 წლის ბოლომდე დაიწყებს. აკერსონის თქმით, უცხოეთში ავტომობილების წარმოების წყალობით, „კადილაკისთვის“ სავალუტო წყვილების კურსების ხშირი რყევა, ნაკლებად მტკივნეული იქნება. ამასთან, „გენერლები“ უკეთ შეძლებენ მაკომპლექტებლების მიწოდების ორგანიზებას.

დღეისათვის, გარდა ამერიკისა, „კადილაკს“ წარმოება ჩინეთშიც აქვს, სადაც მოდელ SLS-ს (ფოტოზე) უშვებს. ესაა ამერიკული STS-ის დაგრძელებული ვერსია, რომელიც სპეციალურად, ჩინური ბაზრისთვის შეიქმნა. თუმცა არაა გამორიცხული, რომ ის სხვაგანაც გაიტანონ.

აკერსონი ჯერჯერობით არ აზუსტებს, თუ რომელი ქვეყანა იქნება მეორე, სადაც „კადილაკი“ წარმოებას გაშლის. ამასთან, ამერიკული კომპანიის შეფი აზუსტებს, რომ „კადილაკის“ გლობალიზაციით, ეს მარკა უფრო ცნობადი გახდება და ის უფრო სერიოზულ კონკურენციას გაუწევს გერმანულ ბრენდებს - „მერსედეს ბენცსა“ და „ბეემვეს“.

„ჩვენ ცოტათი განსხვავებული ტიპის საბრენდო და პროდუქციის სტრატეგიას ვაყალიბებთ, რომლის მიხედვითაც, „კადილაკი“ გლობალური პრემიუმ, შევროლე კი გლობალური მასობრივი ბრენდი უნდა გახდეს“, - „ჯენერალ მოტორსის“ აქციონერებთან შეხვედრისას განაცხადა აკერსონმა.

მანვე დასძინა, რომ ახალი სტრატეგია „ტოიოტასას“ ჰგავს, რომელსაც ორი ძირითადი ბრენდ - მასობრივი „ტოიოტა“ და პრემიუმ სეგმენტის „ლექსუსი“ აქვს და ესეც საკმარისია იმისათვის, რომ გაყიდვების მოცულობით, მსოფლიო ლიდერი იყოს. ამ ორი ბრენდის გარდა, მსოფლიო ბაზარზე გენერლების წილის გასაზრდელად, კიდევ ორი კომპანია იმუშავებს. მათგან „ოპელი“ ევროპაში და „ბიუკი“ კი ჩინეთსა და ჩრდილოეთ ამერიკაში.

იმისათვის, რომ გლობალურ კომპანიად ჩამოყალიბდეს, „კადილაკი“ ყველა წამყვან ბაზარზე უნდა დამკვიდრდეს და ცნობადი გახდეს. ეს კი, თუ იმავე „ლექსუსის“ დამკვიდრების ისტორიას გავიხსენებთ, საკმაოდ ძნელია და წლებს საჭიროებს...

„ტოიოტა“ ლეგენდარულ სპორტქარ „სელიკას“ დააბრუნებს

Toyota Celica is Coming Back

6 ივნისი

რამდენიმე წლის წინ, „ტოიოტამ“ თავის პოპულარულ სპორტულ მოდელ „სელიკას“ წარმოება შეწყვიტა. დღეს კი იაპონურ კომპანია „სუბარუსთან“ ერთად, ახალ სპორტულ ავტომობილს ქმნის, რომელსაც ჯერჯერობით, სახელად FT-86 ჰქვია, თუმცა „ტოიოტა“ უკვე აღარ უარყოფს იმას, რომ ეს ავტომობილი ბაზარზე „სელიკას“ სახელით გამოვა.

თუმცა, ამ სახელით ის მხოლოდ ევროპასა და იაპონიაში გაიყიდება, ამერიკაში კი იაპონური კომპანია, ამავე მოდელს თავის ბრენდ „სციონის“ მეშვეობით გაჰყიდის და სავარაუდოდ, მისთვის სხვა სახელს მოიგონებს. ან FT-86-ს დატოვებს. ამავე ავტომობილს თავისი მარკით „სუბარუც“ გამოუშვებს, რომლისთვისაც ეს სრულიად ახალი ავტომობილი იქნება, რომლის მსგავსს ადრე არ აწარმოებდა.

პარტნიორები სპორტული ავტომობილის თავ–თავიანთ ვერსიებს ერთსადაიმავე პლატფორმაზე ააგებენ. მართალია, ამ ავტომობილებზე ინტერნეტსა და პრესაში უკვე დიდი ხანია მიდის ლაპარაკი, მაგრამ ის ჯერ უცხოს არავის უნახავს. „ტოიოტამ“ რამდენჯერმე მხოლოდ კონცეპტუალური ავტომობილის ფოტოები გაავრცელა, რომელსაც შუშებიც კი არ ჰქონდა. არადა, პრემიერა ახლოვდება - სიახლეს პირველები ტოკიოს ავტო შოუს დამთვალიერებლები, წლის ბოლოს იხილავენ.

ამ ფოტოების მიხედვით შეიძლება იმის თქმა, რომ ძველი „სელიკას“ სისადავისგან აღარაფერი რჩება. განსაკუთრებულ ყურადღებას განიერი საბორბლე თაღები, დიდი სპოილერები და რთული ფორმის მქონე უკანა დიფუზორი იქცევს.

ახალი ავტომობილის მზიდ ელემენტს მონოკოკური კაპსულა წარმოადგენს, როგორებსაც ჩვეულებრივ, ალუმინის, ან კარბონის კომპოზიტისგან ქმნიან ხოლმე, თუმცა „ტოიოტამ“ და „სუბარუმ“ რატომღაც არჩევანი ფოლადს მონოკოკზე შეაჩერეს. კონსტრუქცია მტკიცე და მსუბუქი გამოვიდა, დაახლოებით 200 კილოგრამით მსუბუქი, ვიდრე მისი კლასის ავტომობილებია.

ავტომობილი „სუბარუს“ წარმოების 2.0-ლიტრიანი ოპოზიტური ძრავით აღიჭურვება, რომლის ტექნიკურ მახასიათებლებსაც იაპონური კომპანიები ჯერჯერობით არ ამხელენ. ძრავის მაბრუნ მომენტს კი 6-საფეხურიანი მექანიკური კოლოფი გადაამუშავებს. ამასთან, მყიდველის სურვილის შემთხვევაში, შესაძლებელია 6-საფეხურიანი ნახევრად ავტომატური კოლოფის დაყენება.

ტურბო ძრავის სავარაუდ სიმძლავრე 260 ცხენის ძალაა, მისი ამძრავი ძალა კი უკანა წამყვან ბორბლებს მიეწოდება. არადა, ჩვეულებრივ „სელიკას“ წამყვანი წინა ბორბლები ჰქონდა, ის მონსტრი კი, რომელიც რალის მსოფლიო ჩემპიონი ოთხჯერ გახდა (ორჯერ კარლოს საინსთან, თითოჯერ კი იუჰა კანკუნენთან და დიდიე ორიოლთან ერთად), სრულამძრავიანი ტრანსმისიით იყო აღჭურვილი. სხვათა შორის, თუ რალისთვის მომზადებულ ვერსიებს არ ჩავთვლით, ძველი „სელიკას“ ძრავის სიმძლავრე მხოლოდ 190 ცხენის ძალას აღწევდა.

ახალი ავტომობილის გაყიდვები, მისი პრემიერიდან რამდენიმე კვირაში დაიწყება. ჯერჯერობით უცნობია მისი ფასი, თუმცა ახლავე შეიძლება იმის თქმა, რომ ხელმისაწვდომი „სელიკა“ წარსულს ჩაბარდა...

ელექტრული „როლს როისი“ მოიცდის

Phantom 102EX to Spawn No Electric Rolls Royce Yet

5 ივნისი

„როლს როისმა“ რომ ჟენევის წლევანდელ ავტო შოუზე, სედან „ფანტომის“ ბაზაზე დამზადებული ელექტრომობილი (102EX) გვიჩვენა, ბევრმა ჩათვალა, რომ თანამედროვე ავტოინდუსტრიის ტრენდს მალე ლიმუზინების მწარმოებლებიც შეუერთდებოდნენ, თუმცა მაშინვე კომპანიამ გამოაცხადა, რომ ეს მხოლოდ მას შემდეგ მოხდება, რაც მარკეტოლოგები ამ სიახლისთვის ბაზრის მზადყოფნას გამოიკვლევდნენ.

მაგრამ ახლახანს, ინგლისური კომპანიის მთავარმა აღმასრულებელმა ტორსტენ მიულერ-ოეტვომ განაცხადა, რომ ბაზარი „როლს როისის“ ელექტრომობილისთვის ჯერ მზად არაა და რომ ჟენევაში წარმოდგენილი პროექტი ცოტა ხნით, შეჩერდება. და ამის მიზეზი სულაც არაა ის, რომ მყიდველი ამ ავტომობილისთვის მზად არაა. უბრალოდ, გუდვუდში გადაწყვიტეს, რომ ასეთი მანქანის გამოშვებას ჯერ აზრი არ აქვს, რადგან კომპანიას ის ხარჯის მეტს არაფერს მოუტანს.

კომპანიის შეფმა, ხელმძღვანელობის გადაწყვეტილება შემდეგი არგუმენტით ახსნა: „როლს როისის“ მყიდველთა უმეტესობა, ქალაქიდან შორს ცხოვრობს, რაც სერიოზული პრობლემაა, თუ გავითვალისწინებთ იმ ფაქტს, რომ თანამედროვე აკუმულატორები დიდი ტევადობით არ გამოირჩევა და მანქანას ერთი დამუხტვით, მცირე მანძილის გავლის საშუალებას აძლევს. ამიტომ, ელექტრული „როლსი“ მყიდველს ნაკლებად მიიზიდავს.

„როლს როის 102EX-ის“ შესახებ: ის ორი ელექტროძრავითაა აღჭურვილი, რომლებთანაც თითოსაფეხურიანი ტრანსმისიაა დაკავშირებული. ძრავების ჯამური სიმძლავრე 389 ცხენის ძალა, მაქსიმალური მაბრუნი მომენტი კი 800 ნიუტონმეტრია. ნიკელ კობალტ მანგანუმის აკუმულატორების წონა 640 კილოგრამს აღწევს, მათი ტევადობა კი 200 კილომეტრის გავლის საშუალებას იძლევა. სწრაფად დამმუხტავის გამოყენებით, აკუმულატორების სრულად შევსებას 8 საათი სჭირდება, ნელი დამმუხტავით იგივე ოპერაცია კი 20 საათში სრულდება. ამ აგრეგატებით აღჭურვილი ელექტრული გიგანტი ადგილიდან 100 კმ/სთ-ს 8 წამში ავითარებს, მისი მაქსიმალური სიჩქარე კი 201 კმ/სთ-ია.

დაბოლოს, მიულერ-ოეტვოს თქმით, აკუმულატორების ფაქტორის გათვალისწინებით, ამ ეტაპზე უმჯობესია, თუ „როლსი“ ჰიბრიდულ ავტომობილს დაამზადებს, რომელშიც ამძრავ ძალას ავტომობილს ისევ ელექტროძრავი მიანიჭებს, სვლის სიშორის გასაზრდელად კი ავტომობილი შიდაწვის ძრავისა და გენერატორის ტანდემით აღიჭურვება, რომელიც ელექტროენერგიას, ავტომობილის მოძრაობისას გამოიმუშავებს.

ლიმუზინი, კაბრიოლეტი და იახტა ერთდროულად...

This is what Happens when a Limousine, Convertible and Yacht Meet

5 ივნისი

თანამედროვე, უაღრესად გადატვირთულ საავტომობილო ბაზარზე, აუთვისებელი სეგმენტები პრაქტიკულად აღარ დარჩა. თუმცა, დიზაინერების ფანტაზიას საზღვრები არ აქვს. კონცეპტუალურ დონეზე ისინი არაერთ ისეთ ავტომობილს ქმნიან, რომელთა მსგავსსაც ქვეყნად არსად არავინ უშვებს.

ასეთი დიზაინერები მუშაობენ შვედურ ატელიე „გრეი დიზაინში“, რომელიც სულ ახლახანს, საავტომობილო სამყარომ, „სააბის“ კონცეპტუალური სუპერ ავტომობილის საშუალებით გაიცნო. და შვეიცარიულ „სბაროში“, რომლის დიზაინერებსაც ფანტაზია არ ელევათ და თითქმის ყოველწლიურად, უჩვეულო კონცეპტუალურ ავტომობილებს ამზადებენ.

მდიდრული იახტების მწარმოებელმა შვედურმა კომპანია „სტრანდ კრაფტმა“ ახლახანს თავისი ახალი ქმნილების - „ლიმუზინ ბიჩ კრუიზერის“ შესახებ ინფორმაცია და ფოტოები გაავრცელა. ეს არის მანქანა, რომელიც რაღაც შუალედურია ლიმუზინს, კაბრიოლეტსა და იახტას შორის. „სტრანდ კრაფტი“ ხომ იახტების წარმოებაზეა დახელოვნებული და თავისი გაწაფულობა ამ მანქანაშიც ჩააქსოვა.

„სტრანდ კრაფტის“ რელიზში წერია, რომ ეს ავტომობილი ლუქსის კლასის სასტუმროებისთვისაა განკუთვნილი, რომლებიც თავის კლიენტს უმაღლესი დონის მომსახურებას სთავაზობენ. უფრო კონკრეტულად, ამ სანაპირო შატლით, 6 ადამიანის უახლოეს პლაჟზე სწრაფად და მაქსიმალურად კომფორტულად გადაყვანაა შესაძლებელი.

თუ ამ საგზაო იახტის ფოტოებს დავაკვირდებით, ადვილად მივხვდებით, რომ ის მხოლოდ იმ მზიან მხარეებში ექსპლუატაციისთვისაა განკუთვნილი. უკანა საყრდენი და სახურავი, რომელიც მგზავრთა სურვილის შემთხვევაში იხსნება, სწორედ „ლიმუზინ ბიჩ კრუიზერის“ და იახტის ნათესაობაზე მიუთითებს. სავარძლების მესამე რიგი, მოძრაობის საწინააღმდეგო მიმართულებას გასცქერის. მეორე და მესამე რიგებს შორის კი პატარა ადგილია, სადაც ხელბარგის მოთავსება შეიძლება. სალონში ძვირფასი ტყავი დომინირებს, საშუალო და მცირე ზომის დეტალები ალუმინისაა და ქრომითაა გაწყობილი, მაჩვენებლების დაფაზე, საათების მწარმოებელ შვეიცარიულ კომპანია „ბრეიტლინგის“ მიერაა დამზადებული, მათში კი „სვაროვსკის“ კრისტალებია გამოყენებული.

რა თქმა უნდა, სანამ სასტუმროდან პლაჟს მიაღწევენ, მგზავრებს გართობაც დასჭირდებათ. ამ საქმეს კი „ნაიმის“ წარმოების 15-სპიკერიანი საუნდ სისტემა და 1 100-ვატიანი აუდიოსისტემა ემსახურება. მთელი ეს ავლა-დიდება, როცა რბილი სახურავი გახსნილია, ისეთ ეფექტს ქმნის (რატომ არ უნდა ვენდოთ მწარმოებელს?), თავი ღია საკონცერტო დარბაზში გეგონებათ...

დაბოლოს, ავტომობილი „შევროლეს“ წარმოების 6.0-ლიტრიანი V8 ძრავითაა აღჭურვილი, რომელიც 400 ცხენის ძალას გამოიმუშავებს. ძრავთან დაკავშირებულია „ჰალდექსის“ წარმოების სრულამძრავიანი ტრანსმისია. ამ ტანდემის დახმარებით, საგზაო იახტა მაქსიმუმ 220 კმ/სთ სიჩქარეს ავითარებს.

ზემოთ ახალი ნიშა ვახსენეთ - „ლიმუზინ ბიჩ კრუიზერი“ სწორედ ახალი ნიშის პიონერად შეიძლება ჩავთვალოთ, ნიშისა, რომელშიც ავტომობილები მხოლოდ იმ მყიდველებისთვისაა განკუთვნილი, რომლებსაც მდიდრული სასტუმრო(ები) ეკუთვნით. შესაბამისად, ეს ნიშაც შედარებით მცირეა, თუმცა ძალიან მდიდარი ადამიანებისთვის განკუთვნილი. და რა დაუჯდებათ მათ „ლიმუზინ ბიჩ კრუიზერის“ შეძენა? ამაზე შვედური კომპანია არაფერს ამბობს - ეს ინფორმაცია მაინც ჩვენთვის არაა განკუთვნილი...

„მინი“ „ბენტლის“ სტილის ინტერიერით

MINI Goes All Bentley in Vilner's Latest Tuning Project

4 ივნისი

სად „მინი“ და სად „ბენტლი“? ეს ორი ავტომობილი ზომითაც და დანიშნულებითაც ძლიერ განსხვავდება ერთმანეთისგან. მართალია, „ბეემვეს“ წყალობით, „მინი“ დღეს პრემიუმ ბრენდად მოიაზრება, მაგრამ უზარმაზარ, ლუქსის კლასის „ბენტლისთან“ საერთო მაინც არაფერი აქვს. ყოველ შემთხვევაში, მანამ არ ჰქონდა, სანამ ბულგარულმა სატუნინგო კომპანია „ვილნერ სტუდიომ“ ყველაფრის თავდაყირა დაყენება მოისურვა.
„ვილნერმა“ თავის შედევრს „დი იტალიან ჯობ“ დაარქვა. ეს სახელი გეცნობათ? ასე ამერიკულ სათავგადასავლო ფილმს ეწოდება, რომელიც ჩვენთან ცნობილია, როგორც „ძარცვა იტალიურად“. ლოგიკურად, ბულგარელებს თავიანთი ნამუშევრისთვის, სახელად „მინი ინსპაირდ ბაი ქრიუ“ უნდა დაერქმიათ, როგორც ეს „ბეემვემ“ გააკეთა, როცა „მინი კუპერის“ სალონი „როლს როისის“ სტილში მოაწყო და იმ მანქანას „მინი ინსპაირდ ბაი გუდვუდ“ უწოდა (ქრიუ ბენტლის ქალაქია, გუდვუდი კი - როლსისა). მაგრამ „მინი“ და „როლს როისი“ ბავარიელთა ჯგუფში შედის, „ბენტლი“ კი, რომელიც ერთ დროს „როლს როისის“ ნათესავი იყო, ახლა „ფოლკსვაგენის“ დიდი ოჯახის წევრია.

„ვილნერის“ ნამუშევრის მთავარი თავისებურება, პატარა ავტომობილის „ბენტლის“ სტილში, მდიდრულად გაწყობაა. ინტერიერში გამოყენებულია ყავისფერი და შავი ძვირფასი ტყავი ნაპა, რომელსაც „ბენტლი“ თავისი ავტომობილებისთვის იყენებს. ასე განსაჯეთ, სავარძლებზე, კარის შიდა მხარეზე და ჭერზე გადაკრული ყავისფერი ტყავი ისეა დალიანდაგებული, რომ რომბულ ფიგურებს ქმნის, რაც ასევე „ბენტლის“ სტილია.

ტყავის გარდა, უხვადაა გამოყენებული ალკანტრა, რომელიც ჭერის ნაწილს, მაჩვენებლების დაფასა და სავარძლებს შორის გვირაბს ფარავს, ძირზე კი ფაფუკი ქეჩაა დაგებული. მხოლოდ ალაგ-ალაგ თუ ამოიცნობთ პლასტიკური მასისგან დამზადებულ პატარა დეტალებს. თუმცა, ამოცნობას ის გარემოება ართულებს, რომ ეს დეტალები ქრომირებულია.

ავტომობილის ძარა, ღია რუხი მქრქალი საღებავითაა შეღებილი, სახურავი კი შავი მქრქალია. შავადვეა შეღებილი ავტომობილის ზოგიერთი დეტალიც, მათ შორის ბორბლები. შავი ორი ზოლი ავტომობილის კაპოტსა და საბარგულსაც გასდევს, რაც მას სპორტულ იერს ანიჭებს.

და რა ღირს „იტალიან ჯობ“, რომელიც გარედან თითქოს ჩვეულებრივი „მინია“, შიგნიდან კი „ბენტლისგან“ ვერაფრით განასხვავებთ? ამის თაობაზე ჯერჯერობით ბულგარული ატელიე სდუმს. იქნებ, ეს ერთჯერადი გასართობი იყო და მისი წარმოება არც იგეგმებოდა...

„მერსედესმა“ წყალბადოვანი B-კლასის მსოფლიო გარბენი დაასრულა

Mercedes-Benz F-Cell World Drive successfully completed

4 ივნისი

„მერსედეს ბენცმა“ წყალბადის ფიჭური ელემენტებით აღჭურვილი B-კლასის ჰეჩბეკებით (B-კლას F-სელ) მსოფლიოს გარშემო მოგზაურობა დაასრულა. ავტომობილებმა სტარტი ქალაქ შტუტგარტში აიღეს და ოთხი კონტინენტის 14 ქვეყანაში იმოგზაურეს. საერთო ჯამში, მათ საკუთარი სვლით 30 000 კილომეტრზე მეტი განვლეს და უჩვეულო მოგზაურობა შტუტგარტშივე, „მერსედეს ბენცის“ მუზეუმის მახლობლად დაასრულეს.

მოგზაურობის დასაწყისში, წყალბადოვანმა ქარავანმა, რომელშიც სულ სამი ექსპერიმენტული ავტომობილი შედიოდა, გეზი სამხრეთისკენ აიღეს და პარიზი, ბარსელონა, მადრიდი და ლისაბონი გაიარეს. შემდეგ კი მანქანები თვითმფრინავით ჩრდილოეთ ამერიკაში გადაიტანეს, სადაც აშშ-ის და კანადის მოვლის შემდეგ, ისევ თვითმფრინავით, ისინი ავსტრალიას ეწვივნენ. მწვანე კონტინენტის შემდეგ ჩინეთის, ყაზახეთის და რუსეთის, ბოლოს კი ისევ ევროპის ჯერ დადგა.

წყალბადის ქარავანს ყაზახეთში ინციდენტიც შეემთხვა - ალმა-ატიდან ბალხაშისკენ მოძრაობისას, მესამე ავტომობილს მანქანა შეეჯახა. ინციდენტის დროს, „მერსედესს“ უკანა საკიდარი დაუზიანდა. უახლოეს ტექმომსახურების ცენტრამდე ის დამხმარე ტექნიკური მანქანის დახმარებით მიიყვანეს, რემონტი კი საკმაოდ სწრაფად შესრულდა და მანქანამ გზა გააგრძელა.

იმის გამო, რომ წყალბადის გასამართი სადგურები იშვიათობაა, გერმანული კომპანიის ექსპედიციას მობილური გასამართი სადგური დაჰყვებოდა, რომელმაც თავისი მოვალეობა 130-ჯერ შეასრულა.

ავტომობილები, რომლებიც გარბენში მონაწილეობდნენ, მამოძრავებელ ძალას ელექტროძრავებისგან ღებულობენ, რომლებსაც ენერგიით აკუმულატორები და წყალბადის ფიჭური ელემენტები ამარაგებს. ამ უკანასკნელში ელექტროენერგიის გამომუშავება, ქიმიური პროცესის დროს ხდება და ამ პროცესში, ენერგომატარებელი წყალბადია, რომელიც რეაქციაში ჟანგბადთან შედის.

მსოფლიოს გარშემო მოგზაურობა პროპაგანდის დანიშნულება ჰქონდა. ამით, სამქიმიანებს წყალბადის ელემენტებით აღჭურვილი ავტომობილების საიმედობისა და უსაფრთხოების დემონსტრირება სურდათ. გარბენმა შტუტგარტელთა მიერ დასახული მისია შესანიშნავად შეასრულა.

„ფოლკსვაგენის“ ჯგუფი სამ როდსტერს გამოუშვებს

Volkswagen Group's roadster program coming into focus

2 ივნისი

დღეს, გამკაცრებული კონკურენციის პირობებში, ისეთი გიგანტური საავტომობილო კომპანიაც კი, როგორიც „ფოლკსვაგენია“, ასჯერ იფიქრებს, სანამ სრულიად ახალი პლატფორმის რენტაბელობაში დარწმუნდება და მის შემუშავებას გადაწყვეტს. არადა, ჯგუფში რამდენიმე ბრენდი შედის, რომელთა წყალობითაც, ნებისმიერ ახალ პლატფორმას რენტაბელურობის სოლიდური შანსი აქვს.

მაგალითები გნებავთ? ერთ პლატფორმაზეა აგებული „ფოლკსვაგენ პოლო“, „აუდი A1“, „შკოდა ფაბია“ და „სეატ იბიცა“. ასევე პლატფორმით ნათესავები არიან „ფოლკსვაგენ ტუარეგი“, „აუდი Q7“ და „პორშე კაიენი“. ახლა კი ჯერი კიდევ ერთ მულტიბრენდულ პლატფორმაზე მიდგა, რომელიც შუაძრავიანი უნდა იყოს და რომელზეც მინიმუმ, სამი როდსტერი დაემყნობა.

რამდენიმე წელია, ვოლფსბურგელები ამ პლატფორმის შემუშავებაზე ორჭოფობდნენ. რა თქმა უნდა, მთავარი კითხვა მის რენტაბელობას შეეხებოდა. მაგრამ საბოლოოდ პროექტს, რომელიც პირველად ორი წლის წინ, კონცეპტუალურ როდსტერ „ფოლკსვაგენ ბლიუსპორტის“ სახით გაგვეცნო, მწვანე შუქი აუნთეს. ბრიტანული გამოცემა „აუტოქარი“ პროექტის შესახებ, მისთვის ხელმისაწვდმ ინფორმაციას გვაცნობს:

სამივე ავტომობილი ერთ პლატფორმას და ელექტრონიკას მიიღებს. სხვა მხრივ კი ისინი განსხვავებული იქნება. განსხვავება იქნება ექსტერიერსა და ინტერიერში, ასევე აღჭურვილობაშიც. გარეგნულ განსხვავებებს რაც შეეხება, „აუდის“ როდსტერი, ამ კომპანიის ახალ, ტექნო სტილში შესრულდება, როგორის პიონერიც კონცეპტუალური სპაიდერი e-ტრონია. ამ სტილში გაფორმდება შემდეგი თაობის R8-ც. „პორშეს“ დიზაინერები, შთაგონებას ამავე კომპანიის „550 სპაიდერისგან“ (1953 წელს გამოუშვეს) მიიღებენ. რაც შეეხება „ფოლკსვაგენის“ როდსტერს, ის „ბლიუსპორტის“ სტილში შესრულდება.

მთავარი განსხვავება კი ავტომობილების ბაზაში მოთავსდება. რა თქმა უნდა, ეს ძრავია. „აუდის“ შემთხვევაში ეს ტურბოკომპრესორიანი 2.0-ლიტრიანი ოთხცილინდრიანი და 2.5-ლიტრიანი ხუთცილინდრიანი აგრეგატები იქნება. „პორშეს“ ძრავიც ტურბინიანია, მასაც ოთხი ცილინდრი აქვს და მისი მუშა მოცულობაც 2.0 ლიტრია. ამ ძრავს, „პორშეს“ ვაიზენახის კვლევისა და განვითარების ცენტრის სპეციალისტები ქმნიან.

„აუტოქარის“ მიერ გავრცელებული ინფორმაციით, „პორშეს“ აგრეგატი რამდენიმე ვერსიის სახით შეიქმნება და მათგან ყველაზე მძლავრი, რომელიც წყვილი ტურბოკომპრწესორით აღიჭურვება, 380 ცხენის ძალას გამოიმუშავებს. რაც შეეხება „ფოლკსვაგენს“, მისი ძრავი ყველაზე მცირელიტრაჟიანი და ეკონომიური უნდა იყოს. ეს იქნება 1.4-ლიტრიანი ოთხცილინდრიანი ტურბოაგრეგატი, რომლის მაქსიმალური სიმძლავრეც 170 ცხენის ძალას მიაღწევს.

დაბოლოს, ფასები და მარკეტინგული პოზიციონირება: რა თქმა უნდა, ფასები დიფერენცირებული იქნება. რა თქმა უნდა, კონკრეტული ფასები არ ქვეყნდება. სამაგიეროდ ცნობილია, რომ „ფოლკსვაგენის“ როდსტერი კონკურენციას „მაზდას“ პოპულარულ MX-5-ს გაუწევს, „აუდის“ სამიზნეში ის სეგმენტი მოექცევა, სადაც ერთ დროს „ბეემვეს“ Z3 ფიგურირებდა. რაც შეეხება „პორშეს“ როდსტერს, ის „ლოტუს ელისის“ კონკურენტი უნდა გახდეს, გერმანული კომპანიის გამაში კი „ბოქსტერის“ დაბლა არსებულ ნიშას შეავსებს.

„ფორდი“ სამცილინდრიან 1.0-ლიტრიან ეკობუსტ ძრავზე მუშაობს

Ford confirms 1.0L EcoBoost three-cylinder

2 ივნისი

სანამ ელექტრომობილი ბაზარზე ფეხს მოიკიდებს, შიდაწვისძრავიანი ავტომობილებით გადაადგილება გვიწევს. თუმცა, საწვავის გაძვირების გამო, სულ უფრო მეტი მყიდველი, ამერიკელებიც კი, ეკონომიურ ავტომობილზე აკეთებს არჩევანს. ბუნებრივია, მწარმოებლებს ამის გათვალისწინება უწევთ და მათ შორისაა „ფორდიც“, რომელსაც ეკონომიურობის შესანიშნავი „წამალი“ აქვს ძრავების სერია „ეკობუსტის“ სახით.

„ფორდის“ ჯგუფის ვიცე პრეზიდენტმა დერიკ კიუზაკმა, ვინც გლობალური პროდუქციის განვითარების შტოს კურირებს, განაცხადა, რომ მალე მისი კომპანიის მიერ გაყიდული ავტომობილების 90 პროცენტი სერია „ეკობუსტის“ ძრავებით იქნება აღჭურვილი.

სერიის 3.5-ლიტრიანი V6 ძრავით პირველად სედანი „ტაურასი“, გიგანტური ქროსოვერი „ფლექსი“ და პიკაპი F-150, ასევე „ლინკოლნის“ MKS და MKT აღიჭურვა. შემდეგ ძრავების გამა 2.0-ლიტრიანი ოთხცილინდრიანი აგრეგატით შეივსო, რომლითაც „ეჯი“ და „ექსპლორერი“ აღჭურვეს. ახლა კი1.0-ლიტრიანი სამცილინდრიანი ძრავის ჯერ დადგა...

ეს „ფორდის“ პორტფოლიოში ყველაზე მცირელიტრაჟიანი ძრავი იქნება და მისით ის ავტომობილები აღიჭურვება, რომლებიც მთელს მსოფლიოში გაიყიდება. რა თქმა უნდა, ამ ძრავის კონკრეტული მახასიათებლები ჯერ არ ქვეყნდება, თუმცა „ფორდის“ კიდევ ერთი ვიცე პრეზიდენტი ჯოი ბაკაჟი, ვინც ძრავების ინჟინერიის გლობალურ განყოფილებას კურირებს, ამბობს რომ ამ ძრავს დაახლოებით ისეთივე სიმძლავრე ექნება, რამდენიც „ფორდისვე“ 1.6-ლიტრიან ატმოსფერულ აგრეგატს აქვს და რაც მთავარია, უფრო ეკონომიურიც იქნება. ეკონომიურობასთან დაკავშირებით, ბაკაჟი ამბობს, რომ გაუმჯობესება დაახლოებით იმავე ხარისხით მოხდება, რამდენადაც 3.5-ლიტრიანი V6 ეკობუსტი, V8 ძრავზე ნაკლებ ხარჯიანია.

„ფორდი“ აცხადებს, რომ ახალი ძრავის შესახებ, ინფორმაციას ფრანკფურტის საავტომობილო შოუზე გამოაქვეყნებს, რომელიც სექტემბერში გაიმართება. ასევე დაკონკრეტდება, თუ რომელი ავტომობილები აღიჭურვება ამ აგრეგატით. ამ ავტომობილებს შორის კი უეჭველად იქნება „ფიესტა“, რამდენადაც ამერიკული კომპანია, ახალ ძრავს იმ 1.6-ლიტრიანს ადრის, რომლითაც ეს ჰეჩბეკია აღჭურვილი.

გარდა ამისა, „ცისფერი ოვალი“ ადასტურებს, რომ შემუშავების სტადიაშია სრულიად ახალი, 8-საფეხურიანი ავტომატური გადაცემათა კოლოფი, „ფორდის“ ინჟინრები შექმნიან და „ფორდის“ საწარმოები გამოუშვებენ. ბაკაჟი ირწმუნება, რომ ეს კოლოფი საუკეთესო იქნება მსგავს აგრეგატებს შორის.

მსოფლიო რეკორდი ავტომობილით სიგრძეზე ხტომაში

Tanner Foust completes record-setting Team Hot Wheels jump at Indy 500

1 ივნისი

წელს ასი წელი გავიდა მას შემდეგ, რაც პირველად ჩატარდა ლეგენდარული რბოლა - ინდიანაპოლისის 500 მილი. ამასთან დაკავშირებით, რბოლის წინ, არაერთი საინტერესო სანახაობა გაიმართა, რომელთაგან ყველაზე შთამბეჭდავი, სათამაშო ავტომობილების მწარმოებელ კომპანია „ჰოტ უილზის“ მიერ ორგანიზებული შოუ გამოდგა, რომლის დროსაც, სატელევიზიო გადაცემა „ტოპ გიარ-ის“ ამერიკული ვერსიის ერთ-ერთმა წამყვანმა ტენერ ფაუსტმა, ავტომობილით სიგრძეზე სარეკორდო ნახტომი შეასრულა.

შოუსთვის, მისმა ორგანიზატორებმა სპეციალური, 27 მეტრი სიმაღლის ნაგებობა (რომელსაც კარის ფორმა აქვს) მოაწყვეს, რომლიდანაც ავტომობილმა სტარტი აიღო. დაშვების შემდეგ, ავტომობილს ჰორიზონტალურ მონაკვეთზე კიდევ რამდენიმე ათეული მეტრი უნდა გაევლო, რის შემდეგაც მცირე ტრამპლინზე აიჭრებოდა და ნახტომს შეასრულებდა. სპეციალური საავტომობილო ბილიკის მოწყობას, რომელიც ინდიანაპოლისის ოვალის შიგნით მოეწყო, ორგანიზატორებმა რამდენიმე კვირა მოანდომეს.

ნახტომისთვის სპეციალურად მომზადდა პიკაპის ტიპის ავტომობილი, რომელიც მძლავრი ძრავით და მსუბუქი ძარით აღჭურვეს. ნახტომი დიდი რბოლის დაწყებამდე რამდნიმე საათით ადრე შესრულდა. ფაუსტის მანქანამ 101.2 მეტრი იფრინა, რაც წინა რეკორდზე 9.45 მეტრით მეტია.

ცნობისათვის, ტენერ ფაუსტი ექსტრემალურ სპორტში „შინაური“ კაცია. ის ამერიკული X-თამაშების სამგზის ჩემპიონი და ფორმულა დრიფტის ჩემპიონატის ორგზის გამარჯვებულია. გარდა ამისა, ის ტრიუკებს ასრულებდა ისეთ ცნობილ ფილმებში, როგორებიცაა „ბორნის ულტიმატუმი“, „სამმაგი ფორსაჟი: ტოკიოს დრიფტი“ და „ჰაზარდელი ჩლუნგები“.

ფორმულა სტუდენტი - ძლიერი ინჟინრების სამჭედლო

Biggest Formula Student Yet, This Summer at Silverstone

1 ივნისი

მსოფლიო ავტოინდუსტრიაში არის ერთი ახალი მოძრაობა - ფორმულა სტუდნტი, რომელიც ყოველწლიურად სულ უფრო მეტ მონაწილეს იზიდავს. მის პროგრამაში ერთადგილიანი, ფორმულას ტიპის მინი ავტომობილების დამზადება, ტექნოლოგიური და კონცეპტუალური აღწერის შემუშავება, სპონსორების მოძიება, პროექტის წარდგენა და რბოლებში მონაწილეობა შედის. რაც მთავარია, მასში მხოლოდ სტუდენტები მონაწილეობენ.

უფრო მთავარი კი ისაა, რომ ფორუმს დიდი ავტომწარმოებლების და ფორმულა ერთის გუნდების მენჯერები, ინჟინრები და პილოტები ესწრებიან. და ხშირია შემთხვევები, რომ პირდაპირ სამუშაოსაც აძლევენ. მოკლედ, ფორმულა სტუდენტი ახალი, ნიჭიერი ინჟინრების სამჭედლო, საერთაშორისო უნივერსიტეტია. თანაც მას მსოფლიოს წამყვანი ჟურნალ-გაზეთები აშუქებენ...

გამოცემა „ტეკეგრაფის“ ინფორმაციით, წლევანდელ ფორმულა სტუდენტში მონაწილეობაზე განაცხადი 131 გუნდს აქვს შეტანილი. მათ შორის, პალესტინელი და ნიგერიელი სტუდენტებიც არიან. ყველა გუნდისთვის პირველი გამოწვევა, მათი განაცხადის მიღებაა. ამ ეტაპის გასავლელად საკმარისია, რომ გუნდმა ერთადგილიანი ავტომობილი წარადგინოს. შემდეგ ხდება ნამუშევრის ტექნიკური მხარის, დიზაინის, ავტომობილის დინამიკური მახასიათებლების (მთავარი სიჩქარეა), გამძლეობის და ეკოლოგიურობის შეფასება. პროექტებს ყველა კატეგორიაში ეწერება ქულები და ვლინდება გამარჯვებულები.

წლევანდელ ტურნირს სილვერსტოუნის ავტოდრომი, 14-17 ივლისს უმასპინძლებს, ანუ ფორმულა 1-ის ბრიტანული დიდი პრიზიდან ერთი კვირის შემდეგ. ამასთან დაკავშირებით, ფორუმზე ფორმულა 1-ის ერთ-ერთი გამორჩეული ინჟინერია მიწვეული. კონკრეტულად ვინ, ამას ორგანიზატორები ჯერ არ ამხელენ. ისე კი, წინა წლებში ფორუმს ისეთი ცნობილი ინჟინრები ესწრებოდნენ, როგორებიც არიან ედრიან ნიუი (რედ ბული), როს ბრაუნი (მერსედესი) და მაიკ გასკოინი (ლოტუსი).

„ლამბორგინი ავენტადორი“ პოლიციის ფორმაში

Lamborghini Aventador Polizia Concept Rendered

1 ივნისი

ოღონდ, 2008 წლისგან განსხვავებით, როდესაც იტალიურმა კომპანიამ მძარცველთა გულის გასახეთქად, პოლიციას თავისი სუპერ ავტომობილი „გალიარდო LP560-4 პოლიცია“ აჩუქა, ამჯერად, რასაც ფოტოზე ხედავთ, მხოლოდ კონცეპტუალური ხედვაა იმისა, თუ როგორ შეიძლება გამოიყურებოდეს „გამძვინვარებული ხარების“ (ლამბოს ემბლემა) უახლესი სუპერ ავტომობილი - „ავენტადორი“.

ორი ატელიეს - „მილანო არტვორკსის“ და „კარერადიზაინის“ სპეციალისტებმა საპოლიციო „ავენტადორის“ გაფორმების რამდენიმე ვერსია შეიმუშავეს. ყველა მათგანზე, ავტომობილი თეთრ და ლურჯ ფერებშია შეღებილი. გაფორმება დაახლოებით ისეთივეა, როგორც საპოლიციო „გალიარდოს“ შემთხვევაში.

დიზაინერთა კონცეპციები ასევე გულისხმობს, რომ ავტომობილები დეფიბრილატორითა და მაცივარ-კონტეინერით იყოს აღჭურვილი. პირველი ისეთი შემთხვევებისთვის, როცა შემთხვევის ადგილზე სასწრაფო დახმარების ბრიგადის მისვლა გვიანდება (ლამბოს ვინ მიასწრებს), მეორე კი უფრო იშვიათ შემთხვევებს გულისხმობს, როცა სატრანსპლანტაციო ორგანოს გადატანაა საჭირო.

მნიშვნელოვანი დეტალი: საპოლიციო ციმციმა შუქურებს სახურავზე ვერ ნახავთ - ამ უზარმაზარი დეტალის იქ განლაგება, ავტომობილის აეროდინამიკურ მახასიათებლებს გააუარესებს. შუქურებმა მათთვის უჩვეულო ადგილები დაიკავა ჰაერის ამღებებსა და სალონში, მაჩვენებლების დაფის წინა ნაწილში.

სხვათა შორის, საპოლიციო „გალიარდზე“ ციმციმა შუქურა ავტომობილის სახურავზე მოთავსდა და ამისათვის, მის კორპუსს აეროდნმიკური ფორმა მისცეს. გარდა ამისა, მინი-მოციმციმე შუქურები ავტომობილის ოთხივე კიდეშიც მოტავსდა. თანაც, მათი კორპუსები ალუმინისგან დამზადდა, რათა მისგან არეკლილს შუქს მეტი ეფექტი ჰქონოდა.

შეგახსენებთ, რომ „ავენტადორი“ 6.5-ლიტრიანი V12 ძრავითაა აღჭურვილი, რომელიც 700 ცხენის ძალას და 690 ნიუტონმეტრს იძლევა. ძრავთან შეწყვილებულია კომპანია „გრაცანოს“ წარმოების 7-საფეხურიანი ავტომატური გადაცემათა კოლოფი. ამ ტანდემით, ავტომობილს ნულიდან ასის აკრეფა 2.9 წამში შეუძლია, მისი მაქსიმალური სიჩქარე კი 350 კმ/სთ-ს აღწევს.

ევროპაში „ავენტადორი“ 255 000 ევრო ღირს, ამერიკაში კი - 380 000 დოლარი.