”პეჟო RC-Z” ფრანკფურტამდე გაგვეცნო

Peugeot RC-Z

18 აგვისტო

”პეჟომ” წარმოებისთვის სპორტული კუპე RC-Z მოამზადა, რომლის შესახებაც, ინფორმაცია ფრანკფურტის მოტორ შოუს დაწყებამდე ერთი თვით ადრე გამოაქვეყნა.

ავტომობილი, რომელიც პოპულარულ ჰეჩბეკ 308-ს ბაზაზეა დამზადებული, ორი წლის წინ, ფრანკფურტში ნაჩვენები კონცეპტუალური მოდელის სერიული ვერსიაა. მას 308-ზე განიერი კვალი აქვს. მისი კლირენსი 20 მილიმეტრით დაბალია, სიმძიმის ცენტრი კი 40 მილიმეტრით დაბლა მდებარეობს.

ავტომობილში ჩასაჯდომი ფორმულაა 2+2 და გარეგნულად ის თითქმის არ განსხვავდება ორი წლის წინანდელი კონცეპტუალური RC-Z-გან. ასე განსაჯეთ, ფრანგულმა კომპანიამ პრაქტიკულად ხელუხლებლად დატოვა კონცეპტუალური მოდელის პანორამული სახურავი, რომელსაც რთული ფორმა აქვს და რომლის წარმოებაც ტექნოლოგიურ სირთულეებთან დაკავშირებული. ისევე როგორც კონცეპტუალურ მოდელზე, სალონი მკვეთრად წინ წაწეული, საბორბლე თაღები კი ძლიერ გამობერილია, რაც ავტომობილის აგრესიულ ხასიათზე მიგვანიშნებს.

”პეჟო RCZ-ის” ტოპ ვერსია აღჭურვილია 1.6-ლიტრიანი ტურბოძრავით, რომელიც 200 ცხენის ძალას ავითარებს. ძრავთან კი 6-საფეხურიანი მექანიკური გადაცემათა კოლოფია დაკავშირებული. ამ აგრეგატით, ავტომობილის 0-100 კმ/სთ-მდე აჩქარება 7.6 წამში ხდება, მისი მაქსიმალური სიჩქარე კი 225 კმ/სთ-ს აღწევს. ამ ძრავით აღჭურვილ RCZ-ს 100 კილომეტრის შერეული ციკლით გასავლელად, 7.1 ლიტრი ბენზინი სჭირდება, ყოველი კილომეტრის გავლისას კი ის ატმოსფეროში 165 გრამ CO2-ს გამოჰყოფს.

გარდა ამისა, ”ფრანგული ლომების” ახალი სპორტული ავტომობილისთვის 1.6-ლიტრიანი, ასევე ტურბო და 2.0-ლიტრიანი ტურბო დიზელია განკუთვნილი. პირველის სიმძლავრე 156 (საწვავის ხარჯი 6.9 ლ/100 კმ-ზე), მეორისა კი 163 ცხენის ძალას (საწვავის ხარჯი 5.4 ლ/100 კმ-ზე, გამონაბოლქვი 139 გ CO2 ყოველ კილომეტრზე) აღწევს. ორივე ძრავს 6-საფეხურიანი მექანიკური, ან ავტომატური კოლოფი უკავშირდება.

ჯერჯერობით არ გამოცხადებულა ”პეჟო RCZ-ის” ფასი, სამაგიეროდ ცნობილია, რომ მის წარმოებას კანადურ-ავსტრიული კომპანია ”მაგნა შტეირი” თავის ავსტრიულ ქარხანაში მერმის დაიწყებს.

ჩინური ალიანსი ჰიბრიდული ავტომობილებისთვის

BYD – SAIC

18 აგვისტო

ორმა ჩინურმა საავტომობილო კომპანიამ - BYD-მა და SAIC-მა გააფორმეს თანმშრომლობის ხელშეკრულება, რომლის მიხედვითაც, პირველი მეორეს ჰიბრიდული ავტომობილებისთვის ლითიუმ-იონურ აკუმულატორებს მიაწვდის. რამდენიმე თვის წინ, BYD-მა მსოფლიო გააკვირვა, როდესაც გამოაცხადა, რომ შექმან აკუმულატორები, რომლებითაც ავტომობილი 600 000 კილომეტრის გავლას შესძლებს. ეს კი იმას ნიშნავს, რომ ასეთი აკუმულატორების დამუხტვა, მათი ექსპლუატაციის განმავლობაში, დაახლოებით 2 000-ჯერაა შესაძლებელი.

გაზეთ ”ბეიძინ ნიუსის” ცნობით, მერმის SAIC-ი ჰიბრიდული ავტომობილების წარმოების დაწყებას აპირებს, რომლებიც შესაბამის შიდაწვისძრავიან მოდელებთან შედარებით, 20 პროცენტით ნაკლებ საწვავს მოიხმარენ. გაზეთის მონაცემებით, შანჰაის ავტოკომპანია (SAIC - შანჰაი აუტომოტივ ინდასტრი კორპორეიშნ) ჰიბრიდული დანადგარით თავის პოპულარულ სედან ”როევე 750-ს” (სურათზე) აღჭურვავს.

საერთოდ, BYD-ი (ბილდ იორ დრიმს) ლითიუმ-იონური აკუმულატორების წარმოებითაა ცნობილი. ამ კომპანიამ თავიდან სწორედ ამ პროფილით დაიწყო და შემდეგ, საკუთარი ბიზნესი ავტომობილების წარმოებითაც გააფართოვა. დღეს კი, გარდა იმისა, რომ წარმოებისთვის საკუთარი კონსტრუქციის ჰიბრიდებსა და ელექტრომობილს ამზადებს, თანამშრომლობას სხვა კომპანიებთანაც აპირებს. მათგან კი ერთ-ერთი პირველი SAIC-ია.

”კან ამ M1C” - ლეგენდარული ”მაკლარენ M1C-ის” რეპლიკა

CAN AM M1C

18 აგვისტო

”მაკლარენი” სახელგანთქმული ბრენდია ავტოსპორტის სამყაროში, სადაც განსაკუთრებული მიღწევები ფორმულა 1-ის მსოფლიო ჩემპიონატებზე აქვს. დღეს კომპანია მხოლოდ ფ1-ის რბოლებში მონაწილეობს, თუმცა იყო დრო, როცა მისი ბოლიდები კანადა ამერიკის (კან-ამ) თასსა და ინდი 500-ზეც გამოდიოდნენ.

”მაკლარენის” სარბოლი ავტომობილებიდან კი ყველაზე მეტად, კომპანიის ერთ-ერთი პირველი ქმნილება - M1C გამოირჩეოდა. თავისი 500-ცხენისძალიანი ძრავის წყალობით, მან კან-ამის რბოლებში არაერთი გამარჯვება მოიპოვა. მაგრამ სამწუხაროდ, ახალზელანდიელმა მრბოლებმა - ფ1-ის მსოფლიო ჩემპიონმა დენის ჰალმმა და ბრიუს მაკლარენმა მხოლოდ 25 ცალი M1C დაამზადეს და ყველა სარბოლი ტრასების გზას გაუყენეს. ამიტომ, სიჩქარის არასპორტსმენ მოყვარულებს, მისი შეძენის საშუალება არ მისცემიათ.

ამ ავტომობილის კონსტრუქცია იმდენად მარტივი და წარმატებული გამოდგა, რომ მის მიხედვით, ენთუზიასტები და პატარა ფირმები დღესაც აწარმოებენ ავტომობილებს და საკმაოდ წარმატებითაც. თუმცა, ისინი უფრო ხშირად, შასიზე საკუთარი დიზაინის ძარას დგამენ ხოლმე.

მაგრამ გამონაკლისიც გამოჩნდა - პატარა გერმანულმა ფირმა ”LMP ინჯინირინგმა” ლეგენდარული ავტომობილის სრულფასოვანი ასლების წარმოება გადაწყვიტა. ფირმამ თავის შედევრს ”კან ამ M1C” (Can Am M1C) უწოდა. კომპანიის ინჟინრებმა სასურველი ავტომობილის ასლის დასამზადბლად ულტრათანამედროვე კომპიუტერული პროგრამები გამოიყენეს, რათა სრულფასოვანი ასლი მიეღოთ და არა უბრალო რეპლიკა, როგორებსაც ბევრი სხვა ფირმაც აწარმოებს.

ისევე როგორც ორიგინალი, ”კან ამ M1C-ს” შასიც ფოლადის მილებისგან შეკრულ ჩარჩოზეა აგებული, რომელსაც კარბონის კომპოზიტისგან დამზადებული ძარა (კოკი) ფარავს. შასიზე ”შევროლეს” მცირებლოკიანი V8 ძრავი (მონაცემები არ ქვეყნდება) დაიდგა, რომელსაც საწვავი ნარევით ზუსტად ისეთი 4 კარბურეტორი (48 IDA) ამარაგებს, როგორიც ორიგინალურ ავტომობილზე იდგა. ძრავს კი ინგლისური ”ჰიულენდის” წარმოების სარბოლი გადაცემათა კოლოფი (DG 300) შეუწყვილდა, რომელსაც 5 საფეხური აქვს. ამ ავტომობილისთვის მუხრუჭები სპეციალურად კომპანია ”AP რეისინგის” სპეციალისტებმა დაამზადეს.

”LMP ინჯინირინგმა” ჯერჯერობით მხოლოდ ერთი ცალი ”კან ამ M1C” დაამზადა, რომელიც უკვე გაყიდულია. კომპანია აცხადებს, რომ შეკვეთის შემთხვევაში, ასეთ ავტომობილებს კიდევ გამოუშვებს, თუმცა რა დაუჯდება მსურველს ლეგენდარული ავტომობილის ასლის შეძენა, ამაზე გერმანული ფირმა არაფერს ამბობს.

ისე, ძნელი მისახვედრი არ უნდა იყოს, რომ ის ძალიან ძვირი ეღირება...

”ჯენერალ მოტორსი” 4 000-დოლარიან ავტომობილს გამოუშვებს

GM Working on $4 000 Car

18 აგვისტო

”გენერლებმა” თავიანთი ულტრა იაფფასიანი ავტოს ბაზისად შეიძლება კონცეპტუალური ”შევროლე ტრექსი” (ზედა სურათზე), ან ”შევროლე გრუვი” (ქვედა) გამოიყენონ

”უოლ სტრიტ ჯორნელის” ცნობით, ”ჯენერალ მოტორსი” ადასტურებს, რომ ულტრა დაბალფასიანი ავტომობილის წარმოებას აპირებს, რომლითაც კონკურენციას ინდური ”ტატას” უიაფეს ”ნანოს” გაუწევს. მაგრამ ამერიკული კომპანიის უაიფესი ავტომობილი თავის კონკურენტთან შედარებით, მაინც თითქმის ორჯერ ძვირი ეღირება. ამასთან, ის მხოლოდ აზიის განვითარებად ქვეყნებში გაიყიდება.

”როცა ”ტატა მოტორსმა” 2 500-დოლარიანი ”ნანოს” გამოშვება დაიწყო, ამით ბევრი ავტომწარმოებლის დაინტერესება გამოიწვია. მაგრამ ჩვენ ესოდენ იაფი ავტომობილის წარმოებას არ ვგეგმავთ, რადგან ის სპეციფიკური ბაზრებისთვისაა განკუთვნილი, სადაც გამონაბოლქვზე ამერიკისა და ბრაზილიის ბაზრებისგან განსხვავებული სტანდარტები მოქმედებს. მოკლედ, ჩვენ იაფი ავტომობილის გამოშვებას ვგეგმავთ, მაგრამ ჯერ არ გადაგვიწყვეტია, სად დავიწყებთ მის წარმოებას და რომელ ბაზრებზე გავყიდით”, - ამბობს ”ჯენერალ მოტორსის” საერთაშორისო ოპერაციების ხელმძღვანელი და კომპანიის აღმასრულებელი ვიცე პრეზიდენტი ნიკ რილი.

რილის თქმით, მისი კომპანია ყველაზე იაფ ავტომობილს აუცილებლად აზიაში (ჩინეთში, ან ინდოეთში) გამოუშვებს. ამასთან, ”გენერლები” ამ პროექტთან დაკავშირებით, სხვა ავტომწარმოებელთან თანამშრომლობას არ გეგმავენ. ”ჯენერალ მოტორსის” იაფფასიანი ავტომობილის ღირებულება 4 000-5 000 დოლარის ფარგლებში იქნება.

ცნობისათვის, ულტრა იაფფასიანი ავტომობილების წარმოებას ასევე გეგმავენ ”ფიატი” და ”რენო-ნისანის” ალიანსი.

”ჯენერალ მოტორსმა” ”სააბი” გაჰყიდა

Saab

18 აგვისტო

”ჯენერალ მოტორსმა” და შვედურმა კომპანია ”კენიგსეგმა” გააფორმეს ხელშეკრულება, რომლის ძალითაც, კიდევ ერთი შვედური ავტომწარმოებელი ”სააბი”, ამიერიდან სუპერავტომობილების მწარმოებელი ”კენიგსეგის” ხელში გადადის. ახლა ისღა დარჩა, რომ შვედეთის მთავრობამ ეს შეთანხმება დაამტკიცოს, რის შემდეგაც, ფინანსურ კრიზისში მყოფი ”სააბის” ანგარიშზე, კრედიტის სახით 4.3 მილიარდ შვედურ კრონს (დაახლოებით 417 მილიონ ევროს) გადარიცხავს.

სააგენტო როიტერის ინფორმაციით, ამერიკული კომპანია ”სააბს” ძალიან დაბალ ფასად ჰყიდის, თუმცა რამდენია ეს ”ძალიან დაბალი ფასი”, არ კონკრეტდება. სამაგიეროდ, ”ჯენერალ მოტორსის” ევროპული შტოს პრეზიდენტი კარლ-პეტერ ფორსტერი აცხადებს, რომ გაყიდვის შემდეგაც, მისი კომპანია ”სააბთან” ტექნოლოგიურ თანამშრომლობას გააგრძელებს.

”კენიგსეგის” გარდა, ”სააბის” გამოსყიდვაში ასევე მონაწილეობენ ნორვეგიული საინვესტიციო კომპანია ”ბაარდ ეკერი” და მისი პარტნიორი, ამერიკელი ბიზნესმენი ოგი ფაბელა. ”ჯენერალ მოტორსთან” დადებული გარიგების თანახმად, ამიერიდან ”სააბის” 23.4 პროცენტი ”კენიგსეგის” დამაარსებლის, კრისტიან ფონ კენიგსეგის ხელში გადადის. 42.6 პროცენტს მისი კიდევ ერთი კომპანია, ”აპლააცი” მიიღებს, 11.8 პროცენტი ”ბაარდ ეკერისა” გახდება, დარჩენილი 22 პროცენტი კი იმ უცნობი ინვესტორის ხელში დარჩება, რომელმაც ეს წილი ცოტა ხნის წინათ, ბიზნესმენ მარკ ბიშოპისგან გამოისყიდა.

გაყიდვის მიუხედავად, ”ჯენერალ მოტორსი” შვედური კომპანიის ტექნოლოგიურ მხარდაჭერას გააგრძელებს. ამერიკული კომპანიის მხარდაჭერით, მალე ”საბი” სამი ახალი მოდელის - 9-3X-ის, 9-4X-ის და 9-5-ის გამოშვებას დაიწყებს. ცნობისათვის, წინა წელთან შედარებით, შარშან ”სააბმა” 25.5%-ით ნაკლები, 93 338 ავტომობილი გაჰყიდა, წელს კი ეს მაჩვენებელი კიდევ უფრო შემცირდება.

რაც შეეხება ”კენიგსეგს”, ამ კომპანიის ერთადერთ საწარმოში მხოლოდ 50 ადამიანია დასაქმებული, რომლებიც წლიურად მხოლოდ რამდენიმე ავტომობილს (თითოეულის ფასი მილიონი დოლარია) აწარმოებენ.

”ლექსუსის” პირველი ჰეჩბეკი

Lexus Premium Compact Concept

17 აგვისტო

”ტოიოტას” ლუქსის კლასის ავტომობილების მწარმოებელმა შტო ”ლექსუსმა” ინტერნეტით თავისი უახლესი კონცეპტუალური მოდელის ფოტო ტისერი გამოაქვეყნა, რომელსაც საზოგადოებას პირველად ფრანკფურტის ავტო შოუზე უჩვენებს. ამ ავტომობილის (მისი სახელი ჯერ უცნობია) სერიული ვერსიის ჩვენება კი მერმის, ჟენევის ავტოგამოფენაზე იგეგმება.

ინტერნეტში გავრცელებული ინფორმაციით, ”ლექსუსმა” ჩრდილოეთ ამერიკაში უკვე დაარეგისტრირა ინდექსები CT 200h, CT 300h და CT 400h, რომლებიც შესაძლოა, სწორედ თავის პირველ ჰეჩბეკზე გამოიყენოს. თუმცა, ისიც ცნობილია, რომ ჰეჩბეკის ტიპის ავტომობილები, პირველ რიგში, ევროპულ ბაზარზეა პოპულარული.

ჯერჯერობით, ახალი ავტომობილის შესახებ ოფიციალური ინფორმაცია არ გამოქვეყნებულა. ცნობილია მხოლოდ ის, რომ ამ ჰეჩბეკის ბაზაზე, ”ლექსუსი” ჰიბრიდსაც გამოუშვებს, რომელიც 187-ცხენისძალიანი სისტემით აღიჭურვება. სისტემაში ოთხცილინდრიანი, 2.4-ლიტრიანი შიდაწვის ძრავი (147 ცხენის ძალით) და ელექტრომოტორი (40 ცხ.ძ) გაერთიანდება. შიდაწვის ძრავის მიერ გამომუშავებულ მაბრუნ მომენტს კი, ჩვეულებრივი გადაცემათა კოლოფის ნაცვლად, უსაფეხურო ვარიატორი გადაამუშავებს. ჰიბრიდული სისტემის სავარაუდო ხარჯი 100 კილომეტრზე დაახლოებით 6.50 ლიტრი უნდა იყოს.

”ლექსუსი” იმედოვნებს, რომ თავის ისტორიაში პირველი ჰეჩბეკისძარიანი ავტომობილით, სერიოზულ კონკურენციას ისეთ ძლიერ მეტოქეებს გაუწევს, როგორებიც ”აუდი A3” და პირველი სერიის ”ბეემვეა”.

”ჰიუნდაი ix35” - ჯერ მხოლოდ ფოტო ტისერები

Hyundai ix35

17 აგვისტო

ფრანკფურტის მოტორ შოუზე, კორეული ”ჰიუნდაი” თავისი უგზოობის პოპულარული მოდელის, ”ტუსანის” შემცვლელს, ix35-ს გამოფენს, რომლის ფოტო ტისერებიც კომპანიის ვებსაიტზე უკვე გამოჩნდა. თუმცა, ამ ფოტოების გარდა, ”ჰიუნდაი” თავისი სიახლის შესახებ თითქმის არაფერს გვიყვება.

ინტერნეში გავრცელებული ინფორმაციით, კორეაში ეს ავტომობილი ”ტუსან ix-ის” სახელით გაიყიდება, ევროპაში კი მას ix35-ს დაარქმევენ. ჯერჯერობით უცნობია, რა სახელით წარდგება ის აშშ-ის ბაზარზე.

მართალია, ტისერების მიხედვით შეუძლებელია იმის წარმოდგენა, თუ როგორი გარეგნობა ექნება ახალ ავტომობილს, თუმცა უფრო ადრე გავრცელებული მსტოვრული ფოტოების მიხედვით შეიძლება ვივარაუდოთ, რომ ”ჰიუნდაი ix35” ჟენევის წლევანდელ ავტო შოუზე წარმოდგენილი კონცეპტუალური ”ix-ონიკის” სტილშია შესრულებული.

”ჰიუნდაი” აცხადებს, რომ ix35 თავიდან ბოლომდე ევროპაში, კომპანიის ფრანკფურტულ ტექნიკურ ცენტრშია შემუშავებული და მასში არაერთი ახალი ტექნოლოგიაა გამოყენებული. საერთო ჯამში, ”ჰიუნდაისთვის” ის წინ გადადგმული დიდი ნაბიჯია.

”ჰიუნდაი ix35” ევროპულ ბაზარზე კონკურენციას ისეთ სერიოზულ მეტოქეებს გაუწევს, როგორებიც ”ფოლკსვაგენ ტიგუანი” და ”ტოიოტა RAV-4-ია”. ამ ავტომობილის გარდა, კორეული კომპანია ფრანკფურტში ასევე განახლებულ ”სანტა ფეს” წარადგენს. ორივე ავტომობილის შესახებ დაწვრილებითი ინფორმაცია კი შოუს დაწყებამდე ცოტა ხნით ადრე გამოქვეყნდება.

ფრანკფურტამდე: მინი კუპე კონცეპტი

Mini Coupe Concept

17 აგვისტო

ფრანკფურტის მოტორ შოუსთვის, ინგლისური კომპანია ”მინი” ორ მთავარ სიახლეს ამზადებს, რომელთაგან ერთი წარმოებისთვის გამზადებული ქროსოვერია, მეორე კი ორკარიანი სპორტული კონცეპტუალური მოდელი, რომლის შესახებაც ჯერ ბავრი არაფერია ცნობილი.

ინტერნეტ გამოცემა ”ინსაიდ ლაინი” ვარაუდობს, რომ კონცეპტუალური ავტომობილი ან ორადგილიანი კუპე იქნება, ან ღია სპიდსტერი. ნებისმიერ შემთხვევაში, ორივე ავტომობილი ”მინის” ერთადერთ, R57 პლატფორმაზეა ბაზირებული.

გამოცემის სპეციალისტებმა კონცეპტუალური ”მინის” სავარაუდო ფოტო რობოტი შეადგინეს, რომელზეც ჩანს, რომ უკანა ნაწილით, ავტომობილი ”აუდი TT-ს” ჰგავს. თუმცა, კომპანიაში ირწმუნებიან, რომ მათი სპორტული ავტომობილის ნახვისას ეჭვი არავის შეეპარება, რომ ეს ”მინის” ოჯახის წევრია.

რაც შეეხება ძრავებს, ამ ეტაპზე, არც ამ მხრივაა რაიმე ცნობილი. ინგლისური კომპანია გვპირდება, რომ ორადგილიანი სპორტული მოდელიც ისეთივე ეკონომიური იქნება, როგორებიც მისი ნათესავებია. არც ისაა გამორიცხული, რომ ახლო მომავალში, მასზე ”ბეემვეს” უახლესი სამცილინდრიანი ძრავი ვიხილოთ, რომელსაც ბავარიელები მე-3 და 1-ლი სერიის მოდელებისთვის ამზადებენ.

”ვენგა” – ”კიას” ახალი კომპაქტვენი

Kia Venga

17 აგვისტო

ფრანკფურტის ავტო შოუს დაწყებამდე ერთი დღეც აღარ დარჩა და ავტომწარმოებელთა უმეტესობამ უკვე დაიწყო იმ სიახლეთა ფოტო ტისერების და ინფორმაციის გამოქვეყნება, რომლებსაც საზოგადოება გამოფენისას, მათს პავილიონებში იხილავს.

თავის მყიდველს სიახლეებს ”კიაც” უმზადებს, რომელთაგან ერთის, სრულიად ახალ მიკროვენ ”ვენგას” ფოტოები ინტერნეტით დღეს გავრცელდა. კორეული კომპანია ამ ავტომობილს მრავალმხრივი დანიშნულების ავტომობილს (MPV) უწოდებს. თუმცა ”ვენგა” აშკარად ჰეჩბეკია და შესაბამისი ძარის მქონე ”ფორდ ფიესტას” უპირებს მეტოქეობას, რომელიც ევროპაში ბაზრის B-სეგმენტის გამოკვეთილი ლიდერია.

ცოტა უცნაურია, მაგრამ იმ დროს, როდესაც ამერიკული ”შევროლე” თავის ახალ ავტომობილებს კორეელ ინჟინრებს ამუშავებინებს, კორეული ”კია” ახალი მოდელების შესაქმნლად თავის ევროპულ საინჟინრო განყოფილებას იყენებს - ”ვენგა” მთლიანად ევროპაშია შემუშავებული.

”ვენგას” კონცეპტუალური ვერსია (სახელით No3) ”კიამ” პირველად ჟენევის ავტო შოუზე წარადგინა. ამ ორი ავტომობილს შორის გარეგნული სხვაობა მინიმალურია. ”ვენგას” სიგრძე 4068 მმ, სიმაღლე 1600 მმ და ბაზა 2615 მილიმეტრია. ის სულ რამდენიმე მილიმეტრით გრძელია ”ფიესტაზე” და როგორც კორეული კომპანია აცხადებს, სიგრძეში სხვაობა მხოლოდ სალონის ხარჯზე მოდის.

ახალი ავტომობილისთვის სულ ორი ძრავია განკუთვნილი. ერთია 1.4-ლიტრიანი ბენზინის, მეორე კი - 1.6-ლიტრიანი დიზელის. შესაბამისად, მათი სიმძლავრე 75 და 115 ცხენის ძალაა. საინტერესოა ის ფაქტი, რომ ამ პატარა ავტომობილის სტანდარტულ აღჭურვილობაში სისტემა სტარტ/სტოპი შედის, რომელიც ისედაც მცირეაპეტიტიანი ავტომობილის საწვავის ხარჯს და მის გამონაბოლქვში ნახშირორჟანგის შემცველობას მნიშვნელოვნად ამცირებს. სისტემა ავტომობილის შუქნიშანზე, ან საცობში დგომის დროს, ავტომატურად თიშავს ძრავს და მას ავტომატურადვე რთავს, როგორც კი მძღოლი აქსელერატორის სატერფულს აწვება.

ჯერჯერობით არ გამოცხადებულა ”ვენგას” ფასი. სამაგიეროდ, უკვე ცნობილია, რომ მას ”კიას” ჩეხური ქარხანა გამოუშვებს, მისი გაყიდვები კი წელსვე დაიწყება.

გაიცანით: ბენტლი მულსანი

Bentley Mulsanne

16 აგვისტო

”ბენტლისგან” ამ ავტომობილს დიდხანს ელოდნენ. მოლოდინი მას შემდეგ დაიწყო, რაც ”ბენტლი” და ”როლს როისი” გერმანულმა კომპანიებმა - (შესაბამისად) ”ფოლკსვაგენმა” და ”ბეემვემ” დაინაწილეს, ”როლს როისი” კი ”ფანტომის” წარმოებას შეუდგა. ”ბენტლის” სამოდელო გამაში შესაბამისი კლასის ”არნაჟი” კი ჰყავდა, მაგრამ ის გვარიანად მოძველებული იყო, რის გამოც, ფასით ”ფანტომს” მცირე კონკურენციასაც ვერ უწევდა.

”ჰენესი ვენომ GT” ჟენევური პრემიერისთვის ემზადება

Hennessey Venom GT

16 აგვისტო

ამერიკული სატუნინგო ატელიე ”ჰენესი პრეფორმენს ინჯინირინგი” ადრე მხოლოდ სხვა კომპანიების პოპულარული ავტომობილების მოდერნიზებით იყო დაკავებული და ამ საქმიანობით სახელიც გაითქვა, მაგრამ როგორც ჩანს, მის ხელმძღვანელობას ეს არ აკმაყოფილებდა და მათ საკუთარი მოდელის შემუშავება გადაწყვიტეს. თანაც ისეთის, რომელიც კონკურენციას თვით ”ბუგატი ვეირონსაც” კი გაუწევს.

ავტომობილს უკვე სახელიც აქვს - ”ვენომ GT”. მას პირველად საზოგადოება მერმის, ჟენევის ავტო შოუზე იხილავს. ის შუაძრავიანი შეთანწყობით გამოირჩევა და რა თქმა უნდა, წამყვანი უკანა ბორბლები აქვს. მისი შექმნის სურვილი ატელიეს შეფმა ჯონ ჰენსიმ პირველად ორი წლის წინ გამოთქვა. მაშინ პროექტი უკვე მზად იყო, მაგრამ ამ ორი წლის განმავლობაში, მასში ბევრი რამ შეიცვალა. მაგალითად, თუ თავიდან ჩაფიქრებული იყო ორტურბოკომპრესორიანი 8.5-ლიტრიანი V10-ს გამოყენება (1000-ცხენისძალიანი სიმძლავრით), შემუშავების პერიოდში მისი სხვა აგრეგატით შეცვლა გადაწყდა.

ამ მიზნით, ”ჰენესის” კონსტრუქტორებმა ”შევროლე კორვეტ ZR1-ის” LS9 აგრეგატი შეარჩიეს, რომელსაც V8 კონფიგურაცია აქვს. ძრავი ერთი მექანიკური და ორი ტურბოდამჭირხნითაა აღჭურვილი, რომელთა მეშვეობითაც (სუნთქვა შეიკავეთ), 1 200 ცხენის ძალას ავითარებს. ეს საკმარისია იმისათვის, რომ 1088-კილოგრამიანი ავტომობილის მაქსიმალური სიჩქარე 440 კმ/სთ (სუნთქვა კიდევ ერთხელ შეიკავეთ) იყოს. ეგ კიდევ არაფერი, ”ჰენესის” ინფორმაციით, გაჩერებულ ”ვენომ GT-ს” 100 კმ/სთ-ს აკრეფა 2.4 წამში შეუძლია (არ გაიგუდოთ), 0-160 კმ/სთ-ს 5.3 წამში, 0-240-ს 8.9 წამში, 0-320-ს კი 14.3 ავითარებს. ცოტა არ იყოს, ამბიციური მახასიათებლებია, რომელთა მიხედვითაც, ეს სუპერავტომობილი ფორმულა 1-ის ბოლიდებსაც კი გაუწევს კონკურენციას. ეს კი ცოტა საეჭვოა.

”პირველი ტექსასელი არ ვარ, ვინც ბრიტანული სტილის შასის ზემძლავრი ამერიკული ძრავით აღვჭურვავ. მაგრამ დარწმუნებული ვარ, ჩვენი ავტომობილი მალე მთელს მსოფლიოში გაითქვავს სახელს და ის ისეთივე პოპულარული გახდება, როგორიც 60-იან წლებში ”AC კობრა” იყო”, - ამბობს ჯონ ჰენესი.

”ვენომ GT” ინგლისური ”ლოტუს ექსიჯის” ალუმინის პლატფორმაზეა ბაზირებული და როგორც ”ჰენესის” მიერ გამოქვეყნებულ ფოტოებზე ჩანს, გარეგნობითაც მას ჰგავს. თუმცა ზორბა უკანა ფრთის (რომელიც სიჩქარის შესაბამისად იცვლის დახრის კუთხეს), რადიატორების გვერდითა ჰაერამღებების, ძალიან დაბალი კლირენსისა და სხვა ელემენტების წყალობით, მას უფრო აგრესიული გამომეტყველება აქვს, რითაც მიგვანიშნებს, ძარის ქვეშ ნამდვილი მხეცი იმალება. ჯონ ჰენესი გვპირდება, რომ ავტომობილი ისეთივე მანევრული იქნება, როგორების წარმოებითაც ”ლოტუსია” განთქმული.

”ვენომ GT-ს” საბაზო ღირებულება 600 000 დოლარია. აქედან მყიდველს 200 000-ის გადახდა კომპანიაში განაცხადის შეტანისას მოუწევს, ამდენივეს 4 თვის შემდეგ გადაიხდის, განაცხადს შეტანიდან 9 თვის შემდეგ (სწორედ ეს დროა საჭირო ავტომობილის წარმოებისთვის) კი დარჩენილი 200 000-ის გადახდაც მოუწევს.

ყველაზე მძლავრი ჰიბრიდები მსოფლიოში

BMW Hybrids

16 აგვისტო

როდესაც ავტომწარმოებელი ჰიბრიდულ ავტომობილს ქმნის, მისი მიზანი საწვავის ხარჯის შემცირებაა. მაგრამ არსებობს სხვა მიდგომაც, რომლითაც უფრო პრემიუმ სეგმენტის მწარმოებლები ხელმძღვანელობენ. ამ შემთხვევაში, მიზანი ავტომობილის ძალური დანადგარის ეფექტურობის გაუმჯობესებაა.

ამ მიდგომით ხელმძღვანელობს ”ბეემვე”, რომელმაც ორიოდე დღის წინ, თავისი ორი უახლესი ჰიბრიდული მოდელის შესახებ გაავრცელა ინფორმაცია. ორივე ავტომობილი ჰიბრიდულ სისტემა ”ექტივჰიბრიდითაა” აღჭურვილი და თამამად შეიძლება ითქვას, რომ დღეისათვის, ორივე ყველაზე მძლავრია მათ შორის, რომლებიც ჰიბრიდომობილების ბაზარზე იყიდება.

ეს ავტომობილებია მე-7 სერიის სედანი და უგზოობის X6, რომელთა ოფიციალური პრემიერა სექტემბერში, ფრანკფურტის ავტო შოუზე გაიმართება. გარდა იმისა, რომ ეს ორი ავტომობილი თავისი სიმძლავრით გვაოცებს, ისინი შესაბამის ბენზინისძრავიან ვერსიებზე 15-20 პროცენტით ეკონომიურებიცაა.

”ბეემვე X6 ექტივჰიბრიდის” ჰიბრიდული დანადგარის სრული მაქსიმალური სიმძლავრე 480 ცხენის ძალას, მაბრუნი მომენტი კი 778 ნიუტონმეტრს აღწევს. ჰიბრიდული სისტემის ძირითადი ნაწილია 4.4-ლიტრიანი V8 ბენზინის ძრავი, რომელსაც ორი ტურბოდამჭირხნი ემსახურება. მასთან 7-საფეხურიანი, ავტომატური გადაცემათა კოლოფია შეწყვილებული. ჰიბრიდულ სისტემაში ასევე ორი ელექტროძრავიც შედის, რომელთა სიმძლავრე 91 და 86 ცხენის ძალაა. ეს ძრავები შიდაწვისას აჩქარების დროს ეხმარებიან, შენელებისა და დამუხრუჭებისას კი ისინი გენერატორის მოვალეობას ასრულებენ და ენერგიას ნიკელ-მეტალოჰიდრიდულ აკუმულატორებში აგროვებენ.

ბავარიელთა მიერ გავრცელებული ინფორმაციით, ”ბეემვე X6 ექტივჰიბრიდს” ადგილიდან 100 კმ/სთ სიჩქარის აკრეფა 5.4 წამში შეუძლია, მისი მაქსიმალური სიჩქარე კი ელექტრონიკის მეშვეობით, 208 კმ/სთ-ითაა შეზღუდული. თუ მოხდა ისე, რომ ავტომობილის საწვავის ავზი დაცარიელდა, მხოლოდ ელექტროძრავებით ის 2.5 კილომეტრს გაგატარებთ, ამ დროს კი მისი მაქსიმალური სიჩქარე 60 კმ/სთ იქნება.

რაც შეეხება საწვავის ხარჯს, ზუსტი მონაცემი ჯერ არ გამოქვეყნებულა. ინტერნეტში გავრცელებული ინფორმაციით კი, 100 კილომეტრის გასავლელად, ”X6 ექტივჰიბრიდს” დაახლოებით 10 ლიტრი ბენზინი ჰყოფნის, ეს კი თითქმის 20 პროცენტით ნაკლებია ბენზინისძრავიანი X6-ის ხარჯზე. აქ ისიც უნდა გავითვალისწინოთ, რომ ჰიბრიდული ვარიანტი ჩვეულებრივზე 181 კილოგრამით მძიმეა.

ოდნავ სუსტია ”ბეემვე ექტივჰიბრიდ 7-ის” ჰიბრიდული დანადგარი, რომლის ძირითადი ნაწილი იგივე ორტურბინიანი 4.4-ლიტრიანი V8 ძრავია, რომელიც ამჯერად 440 ცხენის ძალას იძლევა. მასთან უნისონში კი 8-საფეხურიანი ავტომატი და სულ რაღაც 20-ცხენისძალიანი ელექტროძრავი მუშაობს. სისტემის ჯამური მაქსიმალური სიმძლავრე 455 ცხენის ძალას აღწევს. ”ბეემვე ექტივჰიბრიდ 7-ის” მაქსიმალური სიჩქარე 24 კმ/სთ-ია, ადგილიდან 100 კმ/სთ სიჩქარეს კი ის 4.8 წამში ავითარებს.

ბავარიული კომპანია ამ ავტომობილებს პირველ რიგში, აშშ-ის ბაზარზე შეიტანს. ჯერჯერობით ცნობილი არ არის, დაგეგმილია თუ არა მათი სხვა ბაზრებზე გაყიდვა.

ჩინური ”ჰაიმა ავტო” ჰიბრიდებს და ელექტრომობილებს გამოუშვებს

Haima Auto

14 აგვისტო

ჩინური ავტომწარმოებელი ”ჰაიმა ავტო”, რომელიც ჩინურ ავტო კომპანიებს შორის უდიდსის - FAW-ის ნაწილია, წარმოებისთვის ორ ახალ ავტომობილს - ჰიბრიდულსა და ელექტრომობილს ამზადებს, რომელთა ბაზარზე გამოჩენაც 2011 წელსაა მოსალოდნელი.

ამ ორი ავტომობილის შესაქმნელად, ”ჰაიმას” ინჟინრები უკვე ოთხი წელია მუშაობენ, მაგრამ სხვადასხვა მიზეზის გამო, რომელთაგან ყველაზე სერიოზული გლობალური ეკონომიკური კრიზისია, პროექტები გაჭიანურდა. თუმცა, ამ ეტაპზე, ორივე ავტომობილი, რომელთა სახელები ჯერ არ გამოქვეყნებულა, ეროვნულ ლაბორატორიებში უკვე გადის ინტენსიურ ტესტირებას.

სხვათა შორის, შანჰაის წლევანდელ ავტო შოუზე, ”ჰაიმამ” კონცეპტუალური ელექტრომობილი Me (სურათზე) წარადგინა, რომელიც აკუმულატორების ერთი სრული დამუხტვით 190 კილომეტრს გადის, მისი მაქსიმალური სიჩქარე კი 120 კმ/სთ-ს აღწევს. დაკიდევ, თუ აკუმულატორი სრულადაა განმუხტული, ენერგიით მისი სრულად შევსებისთვის მხოლოდ ოთხი საათია საჭირო. ჩინური პრესის ინფორმაციით, კონცეპტუალურ Me-ზე გამოყენებულ ტექნოლოგიებს ”ჰაიმა” თავის ჰიბრიდსა და ელექტრომობილზეც იყენებს.

ბოლო წლებში, ჩინური ავტოკომპანიები სულ უფრო ხშირად იპყრობენ საერთაშორისო მედიის ყურადღებას. ჯერ ერთი, ამის მიზეზი ისაა, რომ ისინი მყიდველს სულ უფრო მოწინავე ტექნოლოგიებით აღჭურვილ ავტომობილებს სთავაზობენ. მეორეც, მათმა ქვეყანამ მსოფლიო ეკონომიკური კრიზისის დროს ყველაზე ნაკლებად იზარალა და ამის შედეგად, ცისქვეშეთში ახალი ავტომობილების გაყიდვები კრიზისის დროსაც მაღალი ტემპით იზრდება.

ამ ეტაპზე, ჩინური კომპანიებიდან ყველაზე მეტად ”ჯილი” (Geely) აქტიურობს, რომელიც მერმის, ავსტრიულ სადიერო კომპანია ”დენზელთან” ერთად, თავისი ავტომობილების ევროპაში გაყიდვებს დაიწყებს. პარალელურად, ”ჯილი” ინტენსიურად ცდილობს შვედურ კომპანია ”ვოლვოს” შეძენას.

”ტოიოტა” ”პრიუსზე” იაფსა და ეკონომიურ ჰიბრიდს გამოუშვებს

Yaris-Based Hybrid

14 აგვისტო

”ტოიოტა” ერთ-ერთი პირველია იმ კომპანიებს შორის, რომელმაც მიზნად გარემოსადმი მეგობრული ავტომობილების წარმოება დაისახა და ამ კუთხითაც (გარდა იმისა, რომ მსოფლიოს უდიდესი ავტომწარმოებელია), დღეისათვის მსოფლიოს ბაზარზე ლიდერობა მის ხელთაა.

თუმცა, შორს არაა ის დრო, როდესაც მის ჰიბრიდულ ”პრიუსს”, რომელიც ამ ეტაპზე, ეკოლოგიურად სუფთა ავტომობილების ბაზრის გამოკვეთილი ლიდერი და იაპონიის ბაზრის ბესტსელერია, კონკურენტები შეავიწროებენ. ასეთთა შორის პირველი მერცხალი ელექტრომობილი ”ნისან ლიფია”, რომელიც უკვე გაეცნო საავტომობილო სამყაროს და რომლის გაყიდვებიც მერმის უნდა დაიწყოს. მერმისვე ბაზარზე ჰიბრიდულ ელექტრომობილ ”შევროლე ვოლტის” გამოჩენაა მოსალოდნელი. და როცა ამ ორი ავტომობილის გაყიდვები დაიწყება, ”პრიუსის” გაყიდვებიც უნდა შემცირდეს.

მაგრამ ”ტოიოტას” თადარიგი უკვე დაჭერილი აქვს - წარმოებისთვის ”პრიუსზე” პატარა ჰიბრიდულ ავტომობილს ამზადებს, რომელიც უფრო ეკონომიურიც იქნება და უფრო იაფიც ეღირება. ამ ავტომობილის ბაზისად კი, იაპონური კომპანია თავის სუბკომპაქტურ ჰეჩბეკ ”იარისს” იყენებს.

ახალი ჰიბრიდული ავტომობილის მთავარი ღირსება მისი სიიაფე იქნება. გაზეთ ”იომიურის” ცნობით, ”იარისის” ბაზაზე წარმოებული ჰიბრიდი იაპონიაში 1.5 მილიონი იენი (დაახლოებით 15 700 დოლარი) ეღირება. ეს ავტომობილი 100 კილომეტრის გასავლელად 2.5 ლიტრ ბენზინს მოიხმარს, რაც მესამე თაობის ”პრიუსის” ხარჯზე თითქმის ორჯერ ნაკლებია.

”ახლა ჩვენ დაბალფასიან ჰიბრიდულ ავტომობილს ვქმნით, როგორიც ”ჰონდა ინსაითია”. იმისათვის კი, რომ ბაზარზე კონკურენტუნარიანობა შევინარჩუნოთ, ჩვენი ჰიბრიდული ავტომობილების რაოდენობა უნდა გავზარდოთ და აქცენტი პატარა ჰიბრიდებზე გადავიტანოთ, ისეთებზე, როგორიც ”იარისია” (სურათზე)”, - ჯერ კიდევ ჟენევის ავტო შოუზე განაცხადა მესამე თაობის ”პრიუსის” მთავარმა ინჟინერმა აკიჰიკო ოცუკამ.

ჯერჯერობით უცნობია, აპირებს თუ არა ”ტოიოტა” სრულიად ელექტრული ავტომობილების წარმოებას.

”ფოლკსვაგენი” და ”პორშე” გაერთიანებაზე შეთანხმდნენ

VW-Porsche

14 აგვისტო

როგორც მოსალოდნელი იყო, ”ფოლკსვაგენმა” და ”პორშემ” შერწყმის შესახებ შეთანხმებას მიაღწიეს, რომლის შესაბამისადაც, ვოლფსბურგული გიგანტი წელსვე ”პორშეს” აქციების 42 პროცენტს გამოისყიდის, რაც მას 3.3 მილიარდი ევრო (4.7 მლრდ დოლარი) დაუჯდება. მერმის კი ”ფოლკსვაგენი” ფერდინანდ პიხისა და ვოლფგანგ პორშეს ოჯახებისგან, სპორტული ავტმობილების მწარმოებლის და მისი სადილერო ქსელის აქციებსაც გამოისყიდის, რაშიც დამატებით 3.55 მლრდ ევროს (დაახლოებით 5 მლრდ დოლარს) გადაიხდის.

”ფოლკსვაგენის” ხელმძღვანელობა აცხადებს, რომ ორი კომპანიის გაერთიანების პროცესი 2011 წელს დასრულდება. ამასთან, პორშეს და პიხის ოჯახები ”პორშეს” უმსხვილეს აქციონერებად დარჩებიან, ქვემო საქსონიის მთავრობას კი, რომელსაც ”ფოლკსვაგენის” აქციების 20 პროცენტი ეკუთვნის, ვოლფსბურგულ კომპანიასთან დაკავშირებული ნებისმიერი (მისთვის მიუღებელი) საკითხვის დაბლოკვის უფლება კვლავაც დარჩება.

გაგრძელდება მოლაპარაკება ყატარის სამთავრობო საინვესტიციო კომპანიასთან, რომელიც ამ წლის ბლოს ”ფოლკსვაგენის” 17 პროცენტის მფლობელი გახდება. ამ აქციებს არაბული სახელმწიფო ”პორშესგან” გამოისყიდის, რომელსაც გერმანული გიგანტის 51 პროცენტი ეკუთვნის.

სწორედ ამ აქციების შეძენის პროცესში დაუგროვდა ”პორშეს” უზარმაზარი ვალი, რომელიც დღეისათვის 10 მილიარდ ევროს აღწევს. ამ ვალის ნაწილს კომპანია ყატარელებისთვის ”ფოლკსვაგენის” აქციების მიყიდვით მიღებული ფულით დაფარავს, ნაწილს კი ”ფოლკსვაგენისთვის” საკუთარი აქციების მიყიდვის შედეგად მიღებული თანხით. ასევე, ვალების გასტუმრებას მოხმარდება იმ თანხის ნაწილიც, რომელსაც შტუტგარტელები საკუთარი კაპიტალის 5 მილიარდი ევროთი გაზრდის გზით მიიღებენ.

დაბოლოს, 15 სექტემბრიდან ”პორშეს” ”ფოლკსვაგენის” მთავარი აღმასრულებელი მარტინ ვინტერკორნი უხელმძღვანელებს, ”პორშეს” ახლანდელი მთავარი აღმასრულებელი მიხაელ მახტი კი ”ფოლკსვაგენის” დირექტორთა საბჭოში შევა.