გორდონ მარის ფილოსოფია ”iსენტერი”

Gordon Murray-iCentre

5 სექტემბერი

საავტომობილო დიზაინის ბრიტანული კომპანია ”გორდონ მარის” საქალაქო მიკროავტომობილ T25-ის შესახებ ინფორმაცია რამდენიმე დღის წინ უკვე გაგაცანით. ალბათ გეხსომებათ პროექტის ავტორისა და კომპანიის დამაარსებლის, გორდონ მარის ხედვა ”iსენტერი”, რომელიც მძღოლის პოსტის ცენტრში მოთავსებას გულისხმობს. ეს ხედვა მან პირველად სუპერავტომობილი ”მაკლარენ F1-ის” პროექტირებისას გამოიყენა, ახლა კი რადკალურად განსხვავებული T25-ის ჯერია.

”iსენტერი” მარის საშუალებას აძლევს, რომ მინიატურულ T25-ს სავარძლების 6 სხვადასხვა განლაგება ჰქონდეს (სურათზე). ამასთან, სტანდარტულიდან განლაგების შეცვლა სუ რაღაც 30 წამშია შესაძლებელი. უცვლელი მხოლოდ ერთი - მძღოლის სავარძელი რჩება. ამ ვარიაციების წყალობით, მინიატურული ავტომობილის ბარგის დასაწყობი სივრცის (როგორც ასეთი, მას საბარგული არ გააჩნია) მოცულობა 750 ლიტრს მიაღწევს. ასეთი საბარგულით კი სრულგაბარიტიანი სედანებიც კი ვერ დაიკვეხნიან.

მარის მძღოლის სავარძლის ცენტრში განლაგების იდეა ჯერ კიდევ სტუდენტობისას (1966 წელს), დურბანის (სამხრეთ აფრიკა) ტექნოლოგიურ ინსტიტუტში, მექანიკური ინჟინერიის შესწავლისას მოსვლია.

ინტერიერის ცენტრში მძღოლის სავარძლის მოთავსებით, უმჯობესდება მძღოლის ხედვის არე, სიმძიმის ცენტრი სიმეტრიის ღერძთან ახლოს ინაცვლებს და დაბლა იწევს, რაც ავტომობილის მართვადობას აუმჯობესებს. ბარგის დასაწყობ 750-ლიტრიან სივრცეში კი, როგორც პროექტის ავტორები ამბობენ, სუპერმარკეტების 6 ურიკა ეტევა.

საჭის გარდა, მძღოლის განკარგულებაში მხოლოდ ორი სატერფულია (აქსელერატორი და მუხრუჭი), გადაცემათა კოლოფს კი სრულად ავტომტურ, ან ნახევრად ავტომატურ რეჟიმში მუშაობა შეუძლია. ამ რეჟიმს კი შესამაბის ღილაკზე დაჭერით შეარჩევთ. ნახევრად ავტომატური რეჟიმის არჩევისას, მძღოლი შესაბამის ბერკეტს სამი რეჟიმიდან ერთ-ერთზე - წინ, ნეიტრალ, ან რევერსზე დააყენებს, დანარჩენს კი კოლოფი თვითონ გააკეთებს.

T25-ის შასი უკვე გადის საგზაო ტესტებს. პარალელურად კი, მარი და მისი თანამოაზრეები ახალ პროექტს - ”iსტრიმს” ამუშავებენ, რომელსაც იმ კომპანიას შესთავაზებენ, რომელიც T25-ის წარმოების ლიცენზიას შეიძენს.

”iსტრიმი” არის საწარმოო პროცესის მარისეული ორგანიზების აღწერილობა, რომელიც საწარმოო ხაზის ფართობს და მისთვის საჭირო ინვესტიციის მოცულობას, ჩვეულებრივ საწარმოებთან შედარებით, დაახლოებით 80%-ით(!) ამცირებს.

”ფოლკსვაგენი” ”პანამერას” პლატფორმას სხვა ბრენდებისთვის გამოიყენებს

VW Panamera Platform

4 სექტემბერი

რამდენიმე დღის წინ ჩვენს მკითხველს ვაცნობეთ, რომ ”ფოლკსვაგენს” ”პორშეს” ორი არასპორტული მოდელის - სედან ”პანამერას” და უგზოობის ”კაიენის” წარმოების შეწყვეტა აქვს განზრახული. დღეს ინტერნეტით გავრცელდა ინფორმაცია იმის შესახებ, რომ ვოლფსბურგული გიგანტი, ”პანამერას” პლატფორმის თავის ჯგუფში შემავალი ზოგიერთი ბრენდის მოდელებისთვის გამოყენებას აპირებს.

ინტერნეტ გამოცემა ”ინსაიდ ლაინმა” შეიტყო, რომ ერთადერთი ბრენდი, რომლისთვისაც ვოლფსბურგელები ”პანამერას” პლატფორმას არ გამოიყენებენ, ”ლამბორგინია”. არადა, ”პორშესა” და ”ფოლკსვაგენის” გაერთიანების გამოცხადების შემდეგ, გაჩნდა ვარაუდი იმის შესახებ, რომ იტალიური კომპანია თავისი ოთხკარიან სედან ”ესტოკეს” სწორედ ”პანამერას” პლატფორმაზე ააგებდა.

სავარაუდოდ, ”პანამერას” პლატფორმის სრულამძრავიან და უკანა წამყვანბორბლიან ვერსიებს, თავიანთი ახალი ავტომობილების ბაზისად ”ბენტლი”, ”ბუგატი” და ალბათ, ”აუდიც” გამოიყენებენ.

”პანამერას” წარმოებას ”პორშე” ალბათ 2017 წელს შეწყვეტს. მანმდ კი შტუტგარტული კომპანია თავისი სედანისთვის სრულიად ახალ, ბენზინზე მომუშავე V6 ძრავს გამოუშვებს, რომელიც აგებულებით, არსებული V8 ძრავის შემცირებული ვარიანტი იქნება. სავარაუდოდ, ”პორშე” უარს იტყვის ”პანამერას” დიზელის ძრავით აღჭურვაზე, რადგან კონკურენტი გერმანული კომპანიების მაგალითმა აჩვენა, რომ პრემიუმ სეგმენტში ასეთი აგრეგატების მქონე ავტომობილები პოპულარობით ვერ სარგებლობენ. სამაგიეროდ, შტუტჰარტული კომპანია თავისი სედანის ჰიბრიდულ ვერსიას ამზადებს, რომელსაც მყიდველს 2011 წელს შესთავაზებენ.

”ფორდის” ახალი ”C-მაქსი”

Ford C-MAX

4 სექტემბერი

მიუხედავად იმისა, რომ ”ფორდის” კომპაქტვენ ”C-მაქსს” ევროპული ბაზარი მერმის, პარიზის ავტო შოუსთვის ელოდა, ამერიკული კომპანიის ევროპულმა შტომ ამ პოპულარული ავტომობილის ახალი მოდელის პრეზენტაცია ფრანკფურტის მოტორ შოუსზე დაგეგმა.

ახალი ”C-მაქსი” ჟენევაში ნაჩვენები კონცეპტუალური ”იოსის მაქსის” სტილშია შესრულებული. განსაკუთრებულ ხაზგასმას იმ გარემოება იმსახურებს, რომ ავტომობილი კუპეს სტილშია შესრულებული, თუმცა იმავდროულად, ის კვლავ კომფორტულ, ძალიან პრაქტიკულ და ვრცელსალონიან ავტომობილად დარჩა.

”ცისფერმა ოვალმა” ახალ ”C-მაქსზე” რამდენიმე სრულიად ახალი ტექნოლოგია გამოიყენა. მათ შორისაა სერია ”ეკობუსტის” მიხედვით შექმნილი ბენზინის 1.6-ლიტრიანი ძრავი, რომელსაც საწვავი პირდაპირ წვის კამერაში მიეწოდება და ის პირველად ამერიკულმა კომპანიამ კონცეპტუალურ ”იოსის მაქსზე” გამოიყენა. ახალი ტექნოლოგიებია პარალელურად პარკირების სისტემა, რომელიც ნახევრად ავტომატურ რეჟიმში მუშაობს და ეგრეთ წოდებული ”ბრმა ზონების” აღმომჩენი სისტემა.

ახალი ”C-მაქსი” ბაზარზე მერმის, წლის მეორე ნახევარში გამოჩნდება. მის შესახებ უფრო დაწვრილებით ინფორმაციას კი კომპანია ფრანკფურტში გამოაქვეყნებს.

”ჰიუნდაის” ფრანკფურტული ექსპონატები

Hyundai ix-Metro Concept

4 სექტემბერი

სრულიად ელექტრული i10

”ჰიუნდაი ix-მეტრო”

...........................................................................

კორეული ავტოგიგანტი ”ჰიუნდაი” ფრანკფურტის ავტო შოუსთვის რამდენიმე სიახლეს ამზადებს. ესენია მინი ელექტრომობილი i10, კონცეპტუალური ”ix-მეტრო”, წარმოებისთვის გამზადებული უგზოობის ix35, რომელმაც პოპულარული ”ტუსანი” უნდა შეცვალოს, თხევად გაზზე მომუშავე ”ელანტრას” ჰიბრიდი და უგზოობის განახლებული ”სანტა ფე”.

”ix-მეტრო” ბაზარზე ორი წლის შემდეგ უნდა გამოვიდეს. სავარაუდოდ, ის სუბკომპაქტური კლასის უახლეს ქროსოვერს დაუდებს სათავეს, თუმცა არაა გამორიცხული, რომ მისი სახით ფრანკფურტული ავტო რანდევუს დამთვალიერებლებმა შემდეგი თაობის i20 იხილონ.

”ix-მეტრო” სამხრეთ კორეული კომპანიის გლობალური დიზაინის ჯგუფმა შექმნა, რომელიც ქალაქ ნამიანში ბაზირებულ ცენტრშია ბაზირებული. ავტომობილი ჰიბრიდების კლასს განეკუთვნება. ჰიბრიდული სისტემის ძირითადი აგრეგატი ბენზინზე მომუშავე, სამცილინდრიანი ტურბოძრავია, რომლის მუშა მოცულობაც 1.0 ლიტრი, მაქსიმალური სიმძლავრე კი 125 ცხენის ძალაა. ძრავთან ორდისკოიანი ქუროთი დაკავშირებულია 6-საფეხურიანი კოლოფი. სისტემა სტარტ-სტოპის მეშვეობით, ძრავი ყოველ კილომეტრზე ატმოსფეროში მხოლოდ 80 გ. CO2-ს გამოჰყოფს.

კომპანიის მეორე კონცეპტუალური ავტომობილი სრულიად ელექტრული i10-ია, რომლის გაყიდვასაც ”ჰიუნდაი” ალბათ მერმის დაიწყებს. ეს პატარა ავტომობილი საკმაოდ მძლავრი, 49-კილოვატიანი ელექტროძრავითაა აღჭურვილი, რომელიც 16 კილოვატსაათიანი აკუმულატორისგან იკვებება.

i10-ის მაქსიმალური სიჩქარე 130 კმ/სთ, სვლის სიშორე კი 160 კილომეტრი უნდა იყოს. ეს ავტომობილი იმითაცაა საინტერესო, რომ მისი ზოგიერთი კვანძი ელექტრონიკით იმართება. ასეთებია საჭის მექანიზმი, წყლის ტუმბო, მუხრუჭების ვაკუუმის ტუმბო და ჰაერის კონდიცირების სისტემა.

ჩამოთვლილი ავტომობილების გარდა, ”ჰიუნდაისვე” სტენდზე შესაძლებელი იქნება პოპულარულ ჰეჩბეკ i30-ის გარემოსადმი მეგობრული ვერსია ”ბლიუ ედიშნ”, რომელიც ასევე სისტემა სტარტ-სტოპითაა აღჭურვილი და ყოველი კილომეტრის გავლისას, ატმოსფეროში მხოლოდ 113 გრამ CO2-ს გამოჰყოფს.

ავტომობილი იდიოტებისთვის...

Car for Idiots..

4 სექტემბერი

ასე, საკმაოდ უკმეხად შეამკო ”ჯენერალ მოტორსის” ფართოდ რეკლამირებული ელექტრული ჰიბრიდი ”შევროლე ვოლტი” ”აუდის” ამერიკული შტოს პრეზიდენტმა იოჰან დე ნაისხენმა.

”რომელი ჭკუათამყოფელი გადაიხდის 15 000 დოლარით მეტს ავტომობილში, რომელიც ”კოროლას” უწევს კონკურენციას. მგონი, ასეთი იდიოტი ბევრი არ უნდა იყოს. მეორე მხრივ, ასეთ ავტომობილებს ის ადამიანები იყიდიან, რომლებიც საკუთარ თავს ინტელექტუალურ ელიტას მიაკუთვნებენ”, - ამბობს დე ნაისხენი.

გერმანული კომპანიის ამერიკული დივიზიონის შეფი გამოთქვამს სურვილს, რომ აშშ-ის მთავრობამ ნაკლები ყურადღება დაუთმოს ელექტრომობილებს და ნაკლები ფულადი სახსრები მოახმაროს ასეთი ავტომოილების განვითარებას. სამაგიეროდ, მისი რჩევაა, ამერიკელებმა აქცენტი სუპერეკონომიურ დიზელის აგრეგატებზე გადაიტანონ. დე ნაისხენის ქმით, დიზელისძრავიანი ავტომობილი ელექტრომობილზე მძლავრი, გამძლე და მოსახერხებელია და მისი აზრით, გარემოზე უკეთესი ზემოქმედება ექნება. ”აუდი ამერიკას” შეფის ასეთი განწყობა გასაგებია - გერმანული კომპანია დიზელის ძრავების ექსპერტად ითვლება და ამ კუთხით, მოწინავე ტექნოლოგიებს ფლობს. ბუნეზებრივია, ”აუდი” ამ ტექნლოგიების პროპაგანდას ეწევა.

”შევროლე ვოლტს” მხოლოდ დე ნაისხენი როდი აკრიტიკებს. თავად ”ჯენერალ მოტორსში” ამ ავტომობილს ხშირად, ფასის მხრივ, ”კომერციულად გაუმართლებელს” უწოდებენ. ბევრი ამბობს, რომ ეს ავტომობილი, ”ჯენერალ მოტორსისა” და ”შევროლესთვის” მეტად რისკიანი პროექტია, რომელიც ჩაფლავების შემთხვევაში, კომპანიას უზარმაზარ ზარალს მოუტანს.

ამერიკული კომპანიის ვიცე აღმასრულებელი ბობ ლუცი კი ამბობს, რომ 15 000-დოლარიან სხვაობას, მყიდველს ავტომობილის არნახული ეკონომიურობა გადაახდევინებს - მწარმოებლის დაპირებით, შერეული ციკლით (აკუმულატორებში დაგროვილი და შიდაწვის ძრავთან დაკავშირებული გენერატორის მიერ გამომუშავებული ენერგიით) მუშაობისას, ”შევროლე ვოლტი” 100 კილომეტრის გავლას 1 ლიტრი საწვავით შესძლებს.

იოჰან დე ნაისხენის სკეპტიციზმის მიუხედავად, ”შევროლე ვოლტის” შეძენა ბევრ ”იდიოტს” აქვს გადაწყვეტილი. ასე განსაჯეთ, ამერიკელებს ამ ავტომობილის ყიდვას თვით ქვეყნის პრეზიდენტი ბარაკ ობამაც ურჩევს...

”მერსედეს-ბენცი” სერიულ ელექტრომობილს ფრანკფურტში გვიჩვენებს

Mercedes-Benz BlueZero E-cell Plus

3 სექტემბერი

ფრანკფურტის საავტომობილო გამოფენაზე, ”მერსედეს-ბენცი” საზოგადოებას სერიული წარმოებისთვის მომზადებულ ელექტრომობილ ”ბლიუზერო E-სელ პლუსს” წარუდგენს, რომლის მცირესერიული წარმოების დაწყებაც მერმის იგეგმება.

ინგლისურ ჟურნალ ”აუტოქარის” ცნობით, ხუთკარიანი ავტომობილი A-კლასის ჰეჩბეკის მოდერნიზებულ პლატფორმაზეა აგებული, გარეგნულად კი ის ისეთია, როგორიც B-კლასის მომდევნო თაობის ჰეჩბეკი უნდა იყოს. ამ ავტომობილის პრემიერა 2012 წელს იგეგმება და სავარაუდოდ, ის სწორედ ”ბლიუზერო E-სელ პლუსის” სტილში შესრულდება.

კონცეპტუალური ავტომობილი მამოძრავებელ ძალას 94-ცხენისძალიანი ელექტროძრავისგან ღებულობს, რომელსაც ელექტროენერგიით ლითიუმ-იონური აკუმულატორების კომპაქტური ბლოკი კვებავს. იმ შემთხვევისთვის, როდესაც აკუმულატორები სრულად განიმუხტება, მათ შევსებას ბენზინზე მომუშავე სამცილინდრიან ძრავთან დაკავშირებული გენერატორი უზრუნველყოფს. ეს ძრავი ”სმარტისგანაა” აღებული და ის მაქსიმუმ 67 ცხენის ძალას გამოიმუშავებს.

შტუტგარტელთა ინფორმაციით, მხოლოდ ელექტროძრავით, ავტომობილს მაქსიმუმ 99 კილომეტრის გავლა შეუძლია. სრულად დამუხტული აკუმულატორებითა და ბოლომდე შევსებული ავზით კი, ”ბლიუზერო E-სელ პლუსს” შეუჩერებლად თითქმის 600 კილომეტრის გავლა შეუძლია.

საინტერესოა ის, რომ აკუმულატორების სრულად დამუხტვას ნახევარი საათი ჰყოფნის. წინა წამყვანბორბლიან ავტომობილს 0-დან 100 კმ/სთ სიჩქარის აკრეფა დაახლოებით 11 წამში შეუძლია, მისი მაქსიმალური სიჩქარე კი 150 კმ/სთ-ს შეადგენს.

”ბეემვე” ”მინის” გამას გააფართოებს

MINI Coupe

3 სექტემბერი

”ბეემვეს” მთავარმა აღმასრულებელმა ნორბერტ რაიტჰოფერმა გამოაცხადა, რომ მომავალი წლიდან, მის ჯგუფში შემავალი ინგლისური კომპანია ”მინი” თავის ოქსფორდულ ქარხანაში ორი ახალი ავტომობილის წარმოებას შეუდგება. ინგლისურ გამოცემა ”ფაინენშლ ტაიმსთან” საუბრისას, რაიტჰოფერს არ დაუკონკრეტებია, თუ რომელ ავტომობილებზე ლაპარაკობდა.

მისი თქმით, ოქსფორდულ ქარხანაში 3 500 ადამიანია დასაქმებულ და ამ მხრივ, ის ერთ-ერთი უდიდესია გაერთიანებულ სამეფოში. ამ ქარხნის წლიური წარმადობა 200 000-220 000 ავტომობილია და ის ამ სიმძლავრით უკვე მუშაობს. სავარაუდოდ, ქარხანას ახალი ხაზი დაემატება, რომელიც სწორედ ამ ორ ახალ ავტომობილს გამოუშვებს.

”მინი” თავისი პოპულარული ჰეჩბეკის ბაზაზე, დღეისათვის რამდენიმე მოდელს აწარმოებს. ესენია ჰეჩბეკი, კაბრიოლეტი და უნივერსალი ”კლუბმენი”. მალე ამათ ქროსოვერი ”ქროსმენი” დაემატება. მაგრამ ამ ავტომობილს კომპანია ინგლისში არ გამოუშვებს. მისი წარმოება ავსტრიულ-კანადურ ”მაგნა შტეირის” ავსტრიულ ქარხანას დაევალება.

ფრანკფურტის ავტოგამოფენაზე კი ბავარიელები ორი, სრულიად ახალი ავტომობილის - კუპესა და როდსტერის (სახელად სპიდსტერ) პრემიერას გეგმავენ. სავარაუდოდ, სწორედ ესაა ის ორი მოდელი, რომელთა გამოც ოქსფორდულ ქარხანას გაფართოება მოუწევს.

გორდონ მარის ჯუჯას ”სმარტზე” ფართო სალონი ექნება

Murray's T25 (AutoCar.co.uk)

2 სექტემბერი

გორდონ მარი T25-ის მოდელებთან
ერთი ჩვეულებრივი ავტოს ადგილზე სამი T25 დაეტევა
T25-ის შასი ტესტირებისას სმარტთან ერთად

T25-ის ტისერი - ფოტო-თავსატეხი

...........................................................................

სახელოვანი სამხრეთაფრიკელი კონსტრუქტორი, ფორმულა 1-ში არაერთი საინტერესო და წარმატებული პროექტის და ლეგენდარულ სუპერავტომობილ ”მაკლარენ F1-ის” ავტორი გორდონ მარი თავის გახმაურებულ პროექტ T25-ზე მუშაობას აგრძელებს. ავტომობილის შასი, მასზე აწყობილი აგრეგატებით და სხვა ნაწილებით, უკვე გადის საგზაო ტესტებს.

პროექტის ავტორი ირწმუნება, რომ მისი ჯუჯა ავტო გაბარიტებით ”სმარტზე” პატარა კი არის, მაგრამ მასზე ტევადი სალონი მაინც ექნება. ამას კი სამადგილიანი ავტომობილის სალონში სავარძლების განლაგების თავისებურება განაპირობებს - მძღოლის სავარძელი სალონის ცენტრშია მოთავსებული, დანარჩენი ორი სავარძელი კი მის ორივე მხარეს, ოდნავ უკან მდებარეობს. სხვათა შორის, ”მაკლარენ F1-შიც” სავარძლებს ზუსტად ასეთი განლაგება ჰქონდა (თავად კონსტრუქტორი მძღოლის ცენტრალურ პოსტს iსენტერს უწოდებს) და ეს უკვე მარის საფირმო ნიშნად იქცა.

T25 უმცირესი გაბარიტებით გამოირჩევა. მისი სიგრძე 2.4 მეტრი, სიგანე კი 1.25 მეტრია. შედარებისთვის, ”სმარტ ფორთუს” ანალოგიური მონაცემები 2.5 და 1.51 მეტრია. ასეთ პატარა ავტომობილს საბარგული არ აქვს, მაგრამ თუ ტვირთის დასადებად მგზავრების სავარძლებს გამოვიყენებთ, მაშინ საბარგო მოცულობა (და არა საბარგულის, რომელიც ავტომობილს უბრალოდ, არ აქვს) 750 ლიტრს მიაღწევს. ასეთი საბარგულით კი სრულგაბარიტიანი სედანებიც კი ვერ დაიკვეხნიან.

ინტერიერის (შედარებით) დიდ მოცულობას ასევე ის გარემოებაც განაპირობებს, რომ ავტომობილის 660 კუბ.სმ-იანი ძრავი T25-ის უკან, საწვავის ავზი და აკუმულატორი კი ძირზეა განლაგებული. იმისათვის, რომ ასეთ პატარა ავტომობილში ჩაჯდომა და იქიდან გადმოსვლა გაადვილდეს, მარიმ ლეგენდარული ”იზეტა” გაიხსენა და მისი კონსტრუქცია განავითარა. მგზავრები სალონში უკანა კარიდან შევლენ, მძღოლი კი - წინიდან.

მარი ამბობს, რომ პირველი ძარიანი ავტომობილი მზად ერთ თვეში ექნება, T25-ის წარმოების დაწყება კი ორ წელიწადში იქნება შესაძლებელი. ამასთან, ის დასძენს, რომ ამ ავტომობილს მისი კომპანია არ გამოუშვებს - მხოლოდ წარმოების ლიცენზიას გაჰყიდის.

მარი დაინტერესებულია, რომ მისი ავტომობილი რომელიმე ინგლისურმა კომპანიამ, ინგლისშივე გამოუშვას. ამასთან, ამ საკითხზე მოლაპარაკება რამდენიმე დაინტერესებულ კომპანიასთან უკვე მიმდინარეობს.

ორტურბოიანი ”მურსიელაგო” 1 100 ცხენის ძალით

Twin Turbo Lamborghini Murcielago

2 სექტემბერი

571 ცხენის ძალა სრულიად საკმარისია იმისათვის, რომ ”ლამბორგინი მურსიელაგო” მსოფლიოში ერთ-ერთი უსწრაფესი ატომობილი იყოს. იმდენად სწრაფი, რომ ბევრი ენთუზიასტი ამ ავტომობილის კონკურენტ მოდელებს ზედაც არ შეხედავს.

მაგრამ არიან ისეთებიც, ვისაც მხოლოდ ”ყველაზე, ყველაზე” სურთ. ჰოდა, სწორედ ასეთებისთვის გაისარჯა ამერიკული სატუნინგო კომპანია ”ჰეფნერ პერფორმენსი”, რომელმაც სპეციალურად მოამზადა ორტურბოკომპრესორიანი კიტი (კომპლექტაცია), რომლის მეშვეობითაც, ”მურსიელაგოს” სიმძლავრე 1 100 ცხენის ძალამდე იზრდება.

უფრო ზუსტად, კომპანიის სტენდზე შემოწმებისას აღმოჩნდა, რომ ასეთი კიტით აღჭურვილი ”მურსიელაგოს” მაქსიმალური სიმძლავრე 1 114 ცხენის ძალას აღწევს. თუ გავითვალისწინებთ, რომ მუხლა ლილვიდან გადაბმულობის ქურომდე, ძრავის სიმძლავრის 15 პროცენტი იკარგება, გამოდის, რომ თუ სტენდის ინდიკატორებს მუხლა ლილვზე დააყენებენ, ძრავის მიერ განვითარებული მაქსიმალური სიმძლავრე 1 300-ცხენისძალიან ნიშნულსაც მიაღწევს.

კიდევ უფრო გაგიკვირდებათ, როცა გაიგებთ, რომ ამ სიმძლავრეს ”ჰეფნერი” ტურბოკომპრესორის ჩაბერვის წნევის 1 ბარამდე გაზრდით აღწევს. შედარებისთვის, ფორმულა 1-ის ტურბოს ხანაში, ტურბოკომპრესორები ჰაერის ნაკადს ძრავში 4 ბარით ჭირხნიდნენ, რისი წყალობითაც, 1.5-ლიტრიანი აგრეგატის სიმძლავრე 1 500 ცხენის ძალას აღწევდა.

”ჰეფნერი” ექსპერიმენტებს ჰაერის უფრო მაღალი წნევით ჩაბერვის შემთხვევებშიც ატარებს, მაგრამ როგორც კომპანია ირწმუნრება, კიდევ უფრო გაზრდლი სიმძლავრის ათვისება ტექნიკურად რთულია და რაც არანაკლებ მნიშვნელოვანია, ასეთი ავტომობილის მომხმარებელს სერიოზულ პრობლემებს შეუქმნის.

საგზაო გამოცდებისას, ”ჰეფნერმა” თავისი კიტით აღჭურვილი ”მურსიელაგოს” სიმძლავრე 950 ცხენის ძალამდე შეამცირა და ესეც საკმარისი აღმოჩნდა იმისათვის, რომ მანქანას 100-დან 200 კმ/სთ-მდე აჩქარება 5.1 წამში მოესწრო. ამერიკული კომპანია ირწმუნება, რომ დეფორსირების გარეშე, ავტომობილი ამ აჩქარებას 5 წამზე ნაკლებში მოასწრებდა.

რა ღირს ”ჰეფნერის” საავტომობილო დოპინგი, ამის შესახებ კომპანია არაფერს ამბობს.

”ბეემვემ” X1-ის წარმოება დაიწყო

BMW X1 Production Starts

2 სექტემბერი

გუშინ, თავის ლაიპციგურ ქარხანაში, ”ბეემვემ” თავისი უახლესი უგზოობის ავტომობილ X1-ის წარმოება დაიწყო. ამ ავტომობილის მსოფლიო პრემიერა ფრანკფურტის მოტორ შოუზე ჩატარდება, რომლის დასრულებისთანავეც, მას ბავარიული კომპანიის ევროპელი დილერები მიიღებენ. მედიის წინაშე კი X1 ოდნავ მოგვიანებით, 24 ოქტომბერს წარსდგება.

მიუხედავად იმისა, რომ ახალი ავტომობილის გაყიდვები ჯერ არ დაწყებულა, ბავარიელებს მასზე უკვე ბევრი წინასწარი შეკვეთა აქვთ მიღებული. თუმცა ლაიპციგურ საწარმოში ის ჯერ შეზღუდული რაოდენობით მზადდება. ქარხნის ყოველდღიური მაქსიმალური წარმადობა 730 ავტომობილია, მაგრამ აქედან მხოლოდ ათი პროცენტია X1. ამასთან, ბავარიელები მოგვიანებით ამ ავტომობილის წილის 300-მდე გაზრდას აპირებენ.

ძრავების მხრივ, მყიდველს X1-ს ექვსი სხვადასხვა კომპლექტაციით შესთავაზებენ. ესენია: xდრაივ28i, xდრაივ23d, xდრაივ20d, sდრაივ20d, xდრაივ18d და sდრაივ18d. მათგან ყველაზე მძლავრი xდრაივ28i იქნება, რომელიც ექვსცილინდრიან, 258-ცხენისძალიანი ძრავით აღიჭურვება. ამ ძრავის მეშვეობით, ავტომობილი ადგილიდან 100 კმ/სთ სიჩქარეს 6.8 წამში განავითარებს, მისი მაქსიმალური სიჩქარე კი 205 კმ/სთ იქნება. უფრო მეტიც, ამ ძრავითვე, სპორტულად მომართული X1-ის მაქსიმალური სიჩქარე 230 კმ/სთ-ს მიაღწევს.

X1-ის ყველა მოდიფიკაცია ბავარიული კომპანიის ტექნოლოგია ”ეფიციენტდაინემიქსის” ელემენტებს მიიღებს. ასეთი ელემენტებია: მუხრუჭების ენერგიის რეგენერაციის სისტემა, ავტომატური სტარტ/სტოპ სისტემა და გადაცემათა კოლოფის ჩართული საფეხურის ინდიკიატორი.

უსაფრთხოების სისტემებში შედის: სამწერტილოვანი ინერციული ღვედები, წინა და გვერდითა აირბალიშები, ასევე ადაპტირებადი სამუხრუჭე მაშუქები და დღის გაბარიტული მაშუქები. დამატებით, მყიდველს ქსენონის ადაპტირებადი მთავარი ფარების შეკვეთის საშუალებაც ექნება.

”ტოიოტას” ჰიბრიდული ექსპონატები

Toyota Prius plug-in

1 სექტემბერი

ფრანკფურტის მოტორ შოუზე იაპონური ავტოგიგანტი ”ტოიოტა” ორი ჰიბრიდული ავტომობილის წარმოდგენას გეგმავს. მათგან პირველი ჰიბრიდ ”პრიუსის” პლაგ-ინ ვერსიაა, რომელიც ენერგიის მარაგს საყოფაცხოვრებო ელექტროქსელიდან ივსებს, მეორე კი ჰეჩბეკ ”აურისის” ბაზაზე დამზადებული ჰიბრიდული ვერსიაა, რომელმაც ფასით კონკურენცია ”ჰონდას” პოპულარულ ჰიბრიდ ”ინსაითს” უნდა გაუწიოს.

პლაგ-ინ ”პრიუსის” პროტოტიპი ნიკელ მეტალოჰიდრიდულის ნაცვლად, უფრო ეფექტური, ლითიუმ-იონური აკუმულატორების ბლოკითაა აღჭურვილი, რომლებიც უფრო სწრაფადაც იმუხტება და უფრო მეტ ენერგიასაც იტევს. მწარმოებელი ირწმუნება, რომ ჩვეულებრივი შტეპსელიდან ამ აკუმულატორების სრულად დამუხტვა საათნახევარში შეიძლება. მხოლოდ ელექტრომოტორით, ასეთი ”პრიუსი” მხოლოდ 15-25 კილომეტრს გადის, შემდეგ კი საქმეში შიდაწვის ძრავი ერთვება, რომლის მუშა მოცულობა 1.8 ლიტრი, სიმძლავრე კი 98 ცხენის ძალაა.

პლაგ-ინ სისტემით აღჭურვილი ”პრიუსის” გაყიდვას ”ტოიოტა” ალბათ 2011 წელს დაიწყებს.

რაც შეეხება ჰიბრიდულ ”აურისს”, ეს ავტომობილი ”პრიუსის” ჰიბრიდული სისტემითაა აღჭურვილი, რისი წყალობითაც, ავტომობილის ხარჯი 100 კილომეტრზე დაახლოებით 4 ლიტრია, ყოველი კილომეტრის გავლისას კი ის ატმოსფეროში დაახლოებით 100 გრამ ნახშირორჟანგს გამოჰყოფს.

სავარაუდოდ, ჰიბრიდული ”აურისის” წარმოებას ”ტოიოტა” მერმის, ბრიტანეთში დაიწყებს, ევროპაში ამ ავტომობილის ღირებულება კი ”პრიუსისაზე” (თითქმის 25 000 ევრო ღირს) ნაკლები იქნება.

დაბოლოს, ”ტოიოტა” თავის მყიდველს პირდება, რომ 2020 წელს მისი ყველა მოდელი ჰიბრიდულ სისტემასაც მიიღებს.

შესაძლოა, ”ტოიოტასთან” ”ბეემვემაც” ითანამშრომლოს

BMW To Team Up With ToyotaFor Isetta?

31 აგვისტო

თანამედროვე ავტოინდუსტრია წარმოების დივერსიფიკაციასა და კოოპერაციას ეყრდნობა - თითქმის ყველა დიდი ავტომწარმოებელი თავის პროდუქციას მთელს მსოფლიოში, დიდი და საშუალო ზომის ბაზრის მქონე რეგიონებში აწარმოებს. მაგალითად, ”ჯენერალ მოტორსს” ამერიკის გარდა, ფესვები მექსიკაში, კანადაში, ევროპასა და ავსტრალიაში აქვს გადგმული და ახლა ინტენსიურად ჩინეთშიც მკვიდრდება. იაპონური კომპანიებიც თავიანთ ავტომობილებს აზიაში, ევროპასა და აშშ-ში აწარმოებენ, ”ფოლკსვაგენიც” ყველგანაა მოდებული.

კოოპერაცია კი კონკურენტ კომპანიებს ერთმანეთთან ათანამშრომლებს - ახალი მოდელების შემუშავებისას, ასე ისინი მნიშვნელოვანი სახსრების დაზოგვას ახერხებენ. გარდა ამისა, კოოპერაცია ზოგიერთ კომპანიას ისეთ სეგმენტებში შეღწევის საშუალებას აძლევს, რომლებშიც ადრე მათ ვერ ნახავდით.

ასეთი თანამშრომლობის უამრავი მაგალითი არსებობს, რომელთაგან ყველაზე სენსაციურის შესახებ, ჩვენ სულ ორი თვის წინ გაუწყეთ - ”ასტონ მარტინს” ჯუჯა ავტომობილის წარმოება აქვს გადაწყვეტილი და ამ მიზნის განსახორციელებლად, ”ტოიოტას” შეუამხანაგდა, რომელიც მას ჯუჯა ჰეჩბეკ iQ-ს (სურათზე) ტექნოლოგიას უზიარებს.

ამ ამბის შემდეგ, სულაც აღარაა გასაკვირი ინფორმაცია, რომელიც დღეს ამერიკულ საავტომობილო ინტერნეტ გამოცემებმა გაავრცელეს - ”ტოიოტასთან” მსგავს თანამშრომლობას ”ბეემვეც” აპირებს, რომელსაც საქალაქო სუბკომპაქტური ავტომობილის წარმოება და მისთვის ბრენდ ”ის(ზ)ეტას” გაცოცხლება აქვს გადაწყვეტილი.

ჯერჯერობით, ეს ინფორმაცია არც ”ბეემვეს” დაუდასტურებია და არც ”ტოიოტას”. მაგრამ რამდენიმე გარემოება მიანიშნებს, რომ ისინი დაახლოებას აპირებენ. ორივე კომპანია პატარა ავტომობილების სეგმენტში გააქტიურებას აპირებს (ტოიოტა ამ სეგმენტში დიდი ხნის წინ გაშინაურდა) და ორივესთვის ყველაზე მნიშვნელოვანი ამერიკული ბაზარია, სადაც ახლა სწორედ პატარა ავტომობილებისადმი ინტერესის ზრდა შეინიშნება.

თუ ”ბეემვე” და ”ტოიოტა” თანამშრომლობას მართლაც დაიწყებენ, მათი ერთობლივი გარჯის პირველი შედეგი შეიძლება 2012, ან 2013 წელს ვიხილოთ. უფრო ადრე კი ბავარიელები ბაზარზე ”მინის” მარკით კუპესა და როდსტერს გამოუშვებენ. რა თქმა უნდა, ეს მხოლოდ იმ შემთხვევაში მოხდება, თუ ფრანკფურტის წლევანდელ ავტოშოუზე, დამთვალიერებელთაგან დადებით გამოხმაურებას მიიღებენ.

მერე კი ნუ გაიკვირვებთ, თუ ”ტოიოტა” ამ ორი ავტომობილის ბაზაზე, თავის სამოდელო გამას გააფართოებს...

”ფოლკსვაგენმა” შეიძლება ”პორშეს” ”პანამერა” და ”კაიენი” აღარ გამოუშვას

VW To Kill Porsche Panamera, Cayenne

31 აგვისტო

პორშე პანამერა

............................................

”ფოლკსვაგენთან” ”პორშეს” გაერთიანებას, ამ უკანასკნელის მხრიდან, ბევრი მოწინააღმდეგე ჰყავდა და ისევ ჰყავს. უპირველესად, მათ არ სურთ, რომ მათმა კომპანიამ დამოუკიდებლობა დაკარგოს და ისეთი გიგანტის მიერ შეკრულ კონგლომერატში ჩაიკარგოს, როგორიც ”ფოლკსვაგენია”.

მალე კი შესაძლოა, გაერთიანების მოწინააღმდეგეთა რაოდენობა მალე გაიზარდოს. ინგლისურ ჟურნალ ”ქარ-ის” მიერ გავრცელებული ინფორმაციით, ვოლფსბურგულ გიგანტს გადაწყვეტილი აქვს, რომ ”პორშე” სათავეებს დაუბრუნოს და კვლავ ჭეშმარიტად სპორტული ავტომობილების მწარმოებლის (საპატიო) სტატუსი დაუბრუნოს. ამისათვის კი ორი განსხვავებული, არასპორტული მოდელის - სედან ”პანამერას” და უგზოობის ”კაიენის” წარმოების შეწყვეტა არის გადაწყვეტილი.

რა თქმა უნდა, ეს დაუყოვნებლივ არ მოხდება. იმავე ”ქარ-ის” ცნობით, ამ ორი ავტომობილის წარმოება მხოლოდ მას შემდეგ შეწყდება, რაც მიმდინარე მოდელების საწარმოო ციკლი სრულად ამოიწურება. ამას კი დაახლოებით 7 წელი მაინც დასჭირდება. სწორედ ამდენია ორივე ავტომობილის არქიტექტურის სიცოცხლის ხანგრძლივობა.

პორშე კაიენი

.............................................

არგუმენტი შემდგომშია: ”ფოლკსვაგენი” და მის ჯგუფში შემავალი კომპანიები არაერთ სედანსა და უგზოობის მოდელს აწარმოებენ და არაა იმის საჭიროება, რომ იმავე ტიპის ავტომობილების შესამუშავებლად, ”პორშემ” ასეულობით მილიონი დოლარი ხარჯოს. მაგრამ ისიც ფაქტია, რომ ამავე ლოგიკის მიხედვით, ”აუდისთვის” ზედმეტია სპორტული ავტომობილების წარმოება. მაგალითად, ისეთების, როგორებიცაა TT და R8, ასევე უახლესი ”S5 სპორტბეკი”.

იმავე მოსაზრებით, ”ფოლკსვაგენმა” საკუთარი უგზოობის მოდელების წარმოება უნდა შეაჩეროს, თავისთვის კი მხოლოდ პატარა ჰეჩბეკები და ”კრაისლერისგან” ადრე ნაყიდი მინივენი ”რუტანი” დაიტივოს. და საერთოდ, ვოლფსბურგელებს რისთვის სჭირდებათ ”შკოდა” და ”სეატი”, ეს კომპანიები ხომ ”ფოლკსვაგენის” რებრენდირებულ მოდელებს აწარმოებენ? რაღაც მიზეზი ”ბენტლისა” და ”ლამბორგინისთვისაც” მოიძებნება. და თუ ოდესმე ”ფოლკსვაგენი” ”პორშეს” მფლობელი აღარ იქნება, ამ უკანსკნლს, უაღრესად კონკურენტულ ბაზარზე დამოუკიდებლად არსებობა ძალიან გაუჭირდება.

თუმცა, ვოლფსბურგელებს შტუტგარტული კომპანიის სხვა მიმართულებით წაყვანა სურთ. მაგალითად, პრაქტიკულად გადაწყვეტილია ყველაზე პატარა ”პორშეს” წარმოების დაწყება, რომელიც ”ფოლკსვაგენის” კონცეპტუალური ”ბლიუსპორტის” ბაზაზე აიგება. ასევე იგეგმება ლეგენდარულ მოდელ 356-ის გაცოცხლება. ეს ”პორშეს” ისტორიაში პირველი ავტომობილია. და რა თქმა უნდა, ვოლფსბურგში სერიოზულად დაფიქრდნენ ლე მანის სერიის რბოლებში მოასპარეზე პროტოტიპ ”RS სპაიდერის” ბაზაზე სუპერავტომობილის შექმნაზე.

მოკლედ, არაა გამორიცხული, რომ მალე ”პორშე” ისევ თავის ჩვეულ კალაპოტში ჩადგეს. ამგვარად, კომპანია სპორტული ავტომობილების მწარმოებლის საპარიო სტატუსს გაუფრთხილდება...

”ბეემვეს” კონცეპცია ”ვიჟნ ეფიციენტდაინემიქსი”

BMW Vision EfficientDynamics

30 აგვისტო

ფრანკფურტის წლევანდელი საავტომობილო შოუ ყველაზე ”მწვანე” იქნება მსოფლიოს უდიდეს საავტომობილო გამოფენებს შორის. მისი ერთ-ერთი გამორჩეული ვარსკვლავი კი აუცილებლად გახდება ”ბეემვეს” კონცეპტუალური ავტომობილი უცნური სახელწოდებით ”ვიჟნ ეფიციენტდაინემიქს”, რაც შეიძლება ითარგმნოს, როგორც ”ეფექტური დინამიკის ხედვა”.

ამ ავტომობილმა პრესაში აჟიოტაჟი მასზე პირველი ინფორმაციის გავრცელებისთანავე გამოიწვია. ზოგის მოლოდინით, ის უნდა ყოფილიყო კუპეს ტიპის ავტომობილი, ზოგი ოთხკარიან სედანს (ან კუპეს) ელოდა, შიგადაშიგ კი იყო ლაპარაკი ჰიბრიდზე, რომლის შიდაწვის ძრავსაც სამი ცილინდრი უნდა ჰქონოდა. თავად ბავარიელები კი აცხადებდნენ, რომ ამ კონცეპციით ისინი ყველას უჩვენებდნენ, რომ ეკონომიურობის მკვეთრად გაუმჯობესება მხოლოდ კარგად დამუშავებული აეროდინამიკითაც შეიძლება.

გუშინ კი ”ბეემვემ” ამ კონცეპციის შესახებ მწირი ინფორმაცია გამოაქვეყნა, რომლიდანაც ჩანს, რომ ოთხკარიანი ვარიანტის გარდა, დანარჩენი თითქმის ყველა მოლოდინი გამართლდა.

უპირველეს ყოვლისა, ფოტოებიდან ჩანს, რომ ”ვიჟნ ეფიციენტდაინემიქსი” სპორტული, ორკარიანი ავტომობილია, რომელსაც ორივე კარი ”ლამბორგინის” სტილში, ქვევიდან ზევით ეხსნება. მის სალონში ოთხი სავარძელია მოთავსებული. მათ შორის არსებული ტიხარი კი სარბოლი ბოლიდის კოკპიტის შთაბეჭდილებას ტოვებს.

პირველ რიგში უნდა ითქვას, რომ კონცეპტუალური ავტომობილი ძალიან დახვეწილი და ეფექტური აეროდინამიკით გამოირჩევა. ჯერ ერთი, მისი აეროდინამიკური წინააღმდეგობის კოეფიციენტი სულ რაღაც 0.22-ია. შედარებისთვის, სერიულ ავტომობილებში ეს მაჩვენებელი ყველაზე ხშირად 0.30-ის დონეზეა. გარდა ამისა, ავტომობილს გარსშემოდენილი ფორმა აქვს, რისი წყალობითაც, ჰაერის ნაკადი მისი ძარის არცერთ ნაწილს მკვეთრად არ სწყდება. თანაც, ეს ნკადიზი თითქმის ყოველთვის სასარგებლო სამუშაოსაც ასრულებს.

უაღრესად დახვეწილი აეროდინამიკის გარდა, ავტომობილი სიმსუბუქითაც გამოირჩევა, რასაც მასში უხვად გამოყენებული ალუმინი და მისი შენადნობები განაპირობებს. შასი, ძარა და საკიდარი - თითქმის მთლიანად ალუმინის შენადნობებისგანაა დამზადებული. შუშა კი პოლიკარბონტმა შეცვალა. სალონში კი კევლარის ნაწილები, პანელები და დეტალები სჭარბობს.

კონცეპციის მეორე მთავარი ღირსება მისი ძალური დანადგარი - პლაგ-ინ ჰიბრიდული აგრეგატია, რომელშიც უნისონში სამცილინდრიანი ტურბოდიზელი და ორი ელექტროძრავი მუშაობს. 1.5-ლიტრიანი შიდაწვის ძრავს საწვავი უშუალოდ წვის კამერაში მიეწოდება, მისი სიმძლავრე 163 ცხენის ძალაა. რაც შეეხება ელექტროძრავებს, თითოეული მათგანი ცალკე ღერძს ემსახურება. ამასთან, წინა ღერძისა უფრო მძლავრია. სამივე ძრავის ჯამური სიმძლავრე კი 356 ცხენის ძალას აღწევს.

სამივე ძრავს მუშაობა ცალ-ცალკეც შეუძლია და ერთდროულადაც. შესაბამისად, ავტომობილი შეიძლება იყოს წინა წამყვანბორბლიანი, უკანა წამყვანბორბლიანი და სრულამძრავიანი. ამასთან, სრულამძრავიანი სისტემა მხოლოდ ელექტროძრავებითაც მუშაობს. წინა ელექტროძრავი დამოუკიდებელი აგრეგატია, უკანა კი შიდაწვის ძრავთან ერთად, ჰიბრიდულ სისტემას ქმნის. ორივე ძრავს ელექტროენერგიით ლითიუმ-იონური აკუმულატორები ამარაგებს, მათთან კი ერთსაფეხურიანი კოლოფია დაკავშირებული. რაც შეეხება შიდაწვის ძრავს, მას 6-საფეხურიანი კოლოფი ორდისკოიანი ქუროს მეშვეობით უკავშირდება, მასში გადამუშავებულ მაბრუნ მომენტს კი უკანა ღერძი ღებულობს.

ბავარიელთა მონაცემებით, ”ვიჟნ ეფიციენტდაინემიქსი” იმდენად ტემპერამენტიანია, რომ სწრაფი მანქანების მოყვარულებს, ჰიბრიდული ავტომობილებისადმი დამცინავ დამოკიდებულებას საფუძვლიანად შეუცვლის. თავად განსაჯეთ: 0-100 კმ/სთ აჩქარება მას სულ რაღაც 4.8 წამში შეუძლია, 100 კილომეტრზე ერთი გალონი (დაახლოებით 3.78 ლიტრი) საწვავი ჰყოფნის, ყოველი კილომეტრის გავლისას (ორივე ტიპის აგრეგატის გამოყენებით) კი ატმოსფეროში მხოლოდ 99 გრამ ნახშირორჟანგს გამოჰყოფს. ერთი სრული გაწყობით (საწვავით და ელექტროენერგიით) ”ვიჟნ ეფიციენტდაინემიქსს” დაახლოებით 650 კილომეტრს გაგატარებთ, მხოლოდ ელექტროძრავებით კი მას დაახლოებით 50 კილომეტრის გავლა შეუძლია.

ამჯერად სულ ესაა, უფრო მეტს ამ საოცარი ავტომობილის შესახებ, ფრანკფურტში შევიტყობთ.

”სააბ 9-5” - გაცნობა პრემიერის წინ

Saab 9-5

30 აგვისტო

შვედურმა კომპანია ”სააბმა” სედან 9-5-ის ახალი თაობის მოდელის ფოტოები და მცირე ინფორმაცია გაავრცელა. ამ ავტომობილის მსოფლიო პრემიერა ორ კვირაში ფრანკფურტის საერთაშორისო საავტომობილო გამოფენაზე შედგება.

ახალი ”სააბ 9-5” ”ჯენერალ მოტორსის” გლობალურ პლატფორმა ”ეპსილონ II-ზეა” აგებული, რომელიც ამერიკული კომპანიის კიდევ ერთმა ევროპულმა ბრენდმა ”ოპელმა”, თავისი უახლესი სედან ”ინსინიას” ასაგებად გამოიყენა. ახალი ავტომობილის სიგრძე წინამორბედისასთან შედარებით, 17 სანტიმეტრით, ბაზა კი - 13 სანტიმეტრით, 2.84 მეტრამდე გაიზარდა.

ახალი ავტომობილი კონცეპტუალური ”აერო-X-ის” სტილშია შესრულებული, რომელთანაც მსგავსება განსაკუთრებით მის შემინულობასა და ინტერიერის გაფორმებაში იგრძნობა.

ავტომობილისთვის ორი ტიპის საკიდარია შემუშავებული, რომლებსაც მწარმოებელი ძრავის სიმძლავრის შესაბამისად გამოიყენებს. ორივე შემთხვევაში, საკიდარი ადაპტირებადია, მას და სრულამძრავიანი ტრანსმისიის უკანა დიფერენციალს კი ელექტრონიკა აკონტროლებს.

სრულამძრავიანი ტრანსმისიით 9-5-ის მხოლოდ ის ვარიანტებია აღჭურვილი, რომელთა კაპოტქვეშაც ტურბოძრავები (ბენზინის) თავსდება. ასეთი კი ორია - 2.0 და 2.8-ლიტრიანი, რომელთა მაქსიმალური სიმძლავრე შესაბამისად, 220 და 300 ცხენის ძალას აღწევს. ასევე ბენზინზე მუშაობს 1.6-ლიტრიანი ძრავი 180 ცხენის ძალით და 2.0-ლიტრიანი ”ბიოპაუერ”, რომელსაც ბიოეთანოლიან საწვავ Е85-ზე მუშაობაც შეუძლია. საწვავად დიზელს მხოლოდ ერთი ძრავი იყენებს, რომლის მუშა მოცულბა 2.0 ლიტრი, სიმძლავრე კი 160 ცხენის ძალაა. ყველა ძრავთან შესაწყვილებლად 6-საფეხურიანი მექანიკური და ავტომატური კოლოფებია განკუთვნილი.

ახალი 9-5-ის სალონში მოთავსებულია საპროექციო დისპლეი, რომელსაც წინა საქარე შუშაზე გამოაქვს ავტომობილის სიჩქარის, ძრავის ბრუნთა რიცხვის, გადაცემათა კოლოფში შერჩეული საფეხურის, კრუიზ კონტროლის და სხვა მონაცემები.

შვედური კომპანია 9-5-ის გაყიდვას მერმის დაიწყებს, ევროპელ დიზილერებთან ავტომობილის საბაზო ღირებულება კი 34,7 ათასი ევრო იქნება.