”დაიმლერი” და ”რენო” ალიანსის შექმნას აპირებენ

Daimler, Renault in talks over equity stakes

18 მარტი

დტერ ცეტშე

..................................

”ფაინენშლ ტაიმსის” ცნობით, ”დაიმლერი” და ”რენო” აქციების გაცვლის თაობაზე მოლაპარაკებებს აწარმოებენ. ორივე კომპანიიდან მოპოვებული ინფორმაციის მიხედვით, არაა გამორიცხული, რომ ამ მოლაპარაკებათა შედეგად, საავტომობილო სამყაროს ახალი ალიანსი მოევლინოს. იმავე წყაროს ვერსიით, ორი ავტოგიგანტის პარტნიორობის გაღრმავების შემთხვევაში, ისინი ერთმანეთს საკუთარი აქციების მაქსიმუმ 10 პროცენტს გაუცვლიან. პარალელურად კი ერთობლივად შეიმუშავებენ მცირეგაბარიტიანი ავტომობილების პლატფორმას.

უკვე რამდენიმე თვეა, რაც გერმანული ”დაიმლერი” და ფრანგული ”რენო” არ მალავენ, რომ ერთობლივად აპირებენ რამდენიმე პროექტის განხორციელებას, რისი მიზანიც საწარმოო ხარჯების შემცირება, ტექნოლოგიების გაცვლა და საერთო მაკომპლექტებლების გამოყენებაა.

ორივე კომპანიის ინტერესი გასაგებია: ”რენო” კომპაქტური ავტომობილების წარმოებაზეა სპეზიალიზებული და მისი რამდენიმე მცდელობა, შეეღწია მაღალი კლასის ავტომობილების სეგმენტში, წარუმატებლად დასრულდა. ანალოგიური პრობლემები ”მერსედესს” კომპაქტური ავტომობილების სეგმენტში აქვს. გერმანულ კომპანიას სუს, რომ A-კლასზე დაბალი კლასის ავტომობილების წარმოება დაიწყოს, მაგრამ იმის გამო, რომ ახალი პლატფორმის შექმნა მეტისმეტად ძვირი დაუჯდება, ამ საქმეს დამოუკიდებლად ხელს ვერ ჰკიდებს.

დეკემბერში ორივე კომპანიამ გამოაცხადა, რომ ისინი ერთობლივი პროექტების წამოწყებაზე აწარმოებენ მოლაპარაკებას, თუმცა დეტალები არ დაუზუსტებიათ. პრესაში კი გავრცელდა ინფორმაცია იმის შესახებ, რომ ორი კომპანია, ”რენო ტვინგოს” ბაზაზე, ერთობლივად შეიმუშავებს ახალ მცირეგაბარიტიან პლატფორმას, რომელსაც ”დაიმლერი” ოთხადგილიანი სუბკომპაქტური ავტომობილის შესაქმნელად გამოიყენებს. იმავე ინფორმაციით, ეს ახალი ავტომობილი ”სმარტის” ბრენდით გაიყიდება.

კარლოს გონი

....................................

”ფაინენშლ ტაიმსი” წერს, რომ ”დაიმლერს” ძლიერ სჭირდება პარტნიორი, რომელიც მცირეგაბარიტიანი ავტომობილების წარმოებაში დაეხმარება. გერმანული კომპანიის პატარა ავტომობილების ბიზნესი მომგებიანი არა, რისი მიზეზიც ისაა, რომ ”დაიმლერი” მათ შედარებით მცირე რაოდენობით აწარმოებს, ეს კი ავტომობილების თვითღირებულებას ზრდის. შედეგად, მათი ფასი არაკონკურენტუნარიანია.

კომპაქტური ავტომობილების გარდა, ორი კომპანია თანამშრომლობას ასევე მსუბუქი სატვირთოების სფეროშიც აპირებს. ფინანსური ანალიტიკის კომპანია ”სენფორდ ბერნშტაინის” ანალიტიკოს მაქს უორბარტონის თქმით, მოლაპარაკებათა დასაწყისში, ”დაიმლერს” სურდა, რომ ”რენოსგან” ერთობლივი კომპანია შეექმნა, ან მისგან კომპაქტური ავტომობილების წარმოების ლიცენზია მიეღო.

მაგრამ უორბარტონი ამბობს, რომ ”რენოსა” და ”ნისანის” მთავარი აღმასრულებელი კარლოს გონი ”დაიმლერისგან” უფრო ფართო კოოპერაციას მოითხოვს. სწორედ მისი ინიციატივაა აქციების გაცვლა, რაც მან ”დაიმლერის” მთავარ აღმასრულებელ დიტერ ცეტშეს პირადად შესთავაზა - ფრანგული კომპანია მზადაა, ”დაიმლერს”, მისი აქციების პაკეტის სანაცვლოდ, თავისი და ”ნისანის” აქციების პაკეტები გაუცვალოს.

აქციების გაცვლაზე ცეტშე თანახმაა, მაგრამ პრობლემა მათს ღირებულებებშია, რაც თანაბარი აქციების გაცვლას პრობლემურს ხდის. კერძოდ, ”დაიმლერის” აქციების საერთო ღირებულება 37 მილიარდ ევროს შეადგენს, ”რენოს” (რომელსაც ”ნისანის” აქციების დაახლოებით მესამედი ეკუთვნის) საბაზრო ღირებულება კი 9.7 მილიარდი ევროა (როიტერის მონაცემებით).

სააგენტო ბლუმბერგი გვამცნობს, რომ ”დაიმლერისა” და ”რენოს” მოლაპარაკებას სწორედ აქციების ღირებულების შეუთანხმებლობა აფერხებს. ზუსტად ისე, როგორც ეს ”პეჟო-სიტროენისა” და ”მიცუბიშის” მოლაპარაკების დროს მოხდა. მაგრამ ფრანგულმა კომპანიამ ამას ჭორები უწოდა და განაცხადა, რომ ჭორებზე კომენტირებას არ აპირებს.

ცნობისათვის, უკვე რამდენიმე წელია, რაც ”რენო”, რომელსაც ”ნისანის” გარდა, რუსული ”ავტოვაზიც” ეკუთვნის, უცხოელ პარტნიორს ეძებს. ორი წლის წინ, ფრანგულ კომპანიას ანალოგიური მოლაპარაკება ”ჯენერალ მოტორსთანაც” ჰქონდა, მაგრამ ის უშედეგოდ დასრულდა. ”დაიმლერს” კი ალიანსი უკვე ჰქონდა ამერიკულ ”კრაისლერთან”, მაგრამ ეს ალიანსი მისი დაშლით დასრულდა და ახლა გერმანული გიგანტი მსგავს წუმპეში მეორედ შებიჯებას ერიდება.

სხვათა შორის, ჟენევის ავტო შოუზე, გონმა განაცხადა, რომ მისი კომპანია ალიანსის შექმნის თაობაზე მოლაპარაკებას მხოლოდ ”დაიმლერთან” არ აწარმოებს.

”კიონიგსეგ აგერა” - ახალი შვედური სუპერ ავტომობილი

Koenigsegg Agera

16 მარტი

შვედური კომპანია ”კიონიგსეგი” დიდი ისტორიით ვერ დაიკვეხნის, თუმცა სპორტული სუპერ ავტომობილების წარმოებითაა ცნობილი, რომლებიც თავიანთი ტექნიკური მახასიათებლებით, თავისი კლასის იტალიურ კვიცებს (ფერარი) და ხარებს (ლამბორგნი) ტოლს არაფერში უდებენ.
შარშან ”კიონიგსეგს” ”ჯენერალ მოტორსისგან” შვედურ ავტომწარმოებელ ”სააბის” შეძენა სურდა, თუმცა ფინანსური პრობლემების გამო, ამას ვერ მიაღწია. სამაგიეროდ, ჟენევის ავტო შოუზე ახალი შედევრი წარმოადგინა, სახელად ”აგერა”. სიტყვა აგერა შვედურად თურმე მოქმედებას ნიშნავს, მაგრამ კომპანია ამ სახელის წარმომავლობას ბერძნულ სიტყვა აგერატოსს უკავშირებს, რაც მუდმივს ნიშნავს. ძნელია იმის თქმა, თავის საწარმოო პროგრამაში ამ ავტომობილის მუდმივად დატოვებას აპირებს თუ არა, მაგრამ თავისუფლად შეიძლება ვივარაუდოთ, რომ ამ მანქანას დიდხანს არ მოაკლდება მყიდველი.
ასეთი ვარაუდის საბაბს კი ”აგერას” გარეგნობა და მისი შესანიშნავი ტექნიკურ-დინამიკური მახასიათებლები იძლევა. ამასთან, კომპანიის დამაარსებელი და თანამფლობელი (კიონიგსეგის უმსხვილესი აქციონერი ნორვეგიელი ინჟინერი და ბიზნესმენი, ბიორდ ეკერია, ვისაც კომპანიის 49 პროცენტი ეკუთვნის), წარმოშობით გერმანელი დიდგვაროვანი კრისტიან ფონ კიონიგსეგი გვპირდება, რომ მისი კომპანია კვლავაც გააგრძელებს თავისი პირველი შედევრის, მოდელ СС-ს და მისი მოდიოფიკაციების წარმოებას, რომელმაც ”კიონიგსეგს” მთელს მსოფლიოში გაუთქვა სახელი.

ახალი ავტომობილი თავისი წინამორბედის პროპორციებს იმეორებს და ზომებითაც მისი ტოლია, თუმცა დიზაინი აშკარად უფრო დახვეწილი აქვს და ტექნიკურადაც გაცილებით სჯობს პირველ ”კიონიგსეგს”. ამასთან, უფრო ადვილი სამართავიცაა, უკეთესადაც ამუხრუჭებს და რაც მეტად მნიშვნელოვნია, მოსახვევებსაც СС-ზე სწრაფად გადის. მოკლედ, ”აგერას” სახით, ”ბუგატის”, ”ფერარისა” და ”ლამბორგინის” შედევრებს სერიოზული კონკურენტი გამოუჩნდათ, თუმცა ისიც უნდა აღინიშნოს, რომ როგორც ყოველთვის, შვედური კომპანია თავისი მონსტრის ძალიან მცირე რაოდენობით წარმოებას გეგმავს.

”აგერას” საკმაოდ აგრესიული და აეროდინამიკურად დახვეწილი დიზაინი აქვს. მის წინა ფარებს ერთგვარი რომბის ფორმა აქვთ, რომელთა ბლაგვი კუთხეები ოდნავ მომრგვალებულია. წინა და უკანა ბორბლების თაღების ზედა ნაწილში სასუნთქი ”ლაყუჩებია” დატანილი, რომლებიც გაგრილების სისტემებიდან (რადიატორისა და მუხრუჭების) ჰაერის გამოშვებას უზრუნველყოფს. საქარე მინა ძლიერ მომრგვალებულია, როგორც ეს სარბოლ პროტოტიპებს აქვთ. სახურავი კი მასიურია. ამასთან, ის უკანა მხარეს სრულიად გამჭვირვალეა, რაც ღია სალონის შთაბჭდილებას ქმნის. ავტომობილის გვერდების უკანა ნაწილში ტურბოკომპრესორების გაგრილების სისტემების ჰაერის ამღები დიდი ლაყუჩებია ჩატანებული. უკანა ბამპერის ძირში კი ტრაპეციის ფორმის გამოსაბოლქვით შუაზე გაყოფილი დიფუზორი განლაგდა.

”აგერა” 1290 კილოგრამს იწონის, რაც მისი მონაცემების მქონე ავტომობილისთვის ძალიან ცოტაა. დაბალი წონის მისაღწევად, მწარმოებელმა უხვად გამოიყენა ალუმინის შენადნობები და კარბონის კომპოზიტი. ავტომობილის ზომებია: სიგრძე 4293 მმ, სიგანე 1996 მმ და სიმაღლე 1120. ამასთან, წინა და უკანა ბორბლების კვალი ერთი ზომისაა, რაც ავტომობილს იდეალურად აბალანსებს და ამის წყალობით, ის მოსახვევებს მაღალი სიჩქარით გადის.

”კიონიგსეგ აგერა” აღჭურვილია 4.7-ლიტრიანი V8 ძრავით, რომელსაც ორი ტურბო დამჭირხნი ემსახურება. ტურბოჩაბერვის უკეთ ასათვისებლად, ძრავის კუმშვის ხარისხი მხოლოდ 8.9-ია. სამაგიეროდ, მისი სიმძლავრე 910 ცხენის ძალას, მაქსიმალური მაბრუნი მომენტი კი 1100 ნიუტონმეტრს აღწევს (5100 ბრ/წთ-ზე). ამასთან, ის 1000 ნმ-ს ძრავის მუხლა ლილვის ბრუნთა ფართო დიაპაზონში (2680-დან 6100-მდე) აღწევს, რაც იმას ნიშნავს, რომ აგრეგატი თითქმის მუდმივად ავლენს თავის მაქსიმალურ შესაძლებლობებს.

ასეთი მონაცემების ასათვისებლად, ”კიონიგსეგის” ახალი სუპერ ავტომობილისთვის, ფრანგულმა კომპანია ”მიშლენმა” სპეციალური საბურავები შეიმუშავა. სხვათა შორის, ბატონი ფონ კიონიგსეგი ყოველთვის წუწუნებდა იმაზე, რომ ”მიშლენის” რეზინი ბოლომდე ვერასდროს შეესაბამებოდა მისი მონსტრების შესაძლებლობებს. ჰოდა, მისი წუწუნისთვის წერტილი რომ დაესვა, ”ბიბენდუმმა” (ეს მიშლენის ემბლემის მეტსახელია) ახალი კონსტრუქციის საბურავები დაამზადა.

რეზინის გარდა, ახალი ავტომობილის რემასთან უკეთ გასამკლავებლად, ”კიონიგსეგმა” ახალი სამუხრუჭე სისტემაც შეიმუშავა. ამ სისტემის მთავარი დეტალები კი დიდი ზომის სამუხრუჭე დისკოებია. წინას ზომა 392×36-ზეა, უკანისა კი - 380×34. დისკოები კერამიკული მასალისგანაა დამზადებული და მათი უკეთ გაგრილებისთვის, მათ ნახვრეტები აქვთ. გარდა ამისა, ძარაში არსებული სპეციალური ჰაერის ამღებების მეშვეობით, მათ ჰაერის მძლავრი ნაკადი მიეწოდება. მწარმოებელი ირწმუნება, რომ ასეთი სისტემების გადახურება, სარბოლ რეჟიმში მოიძრაობის დროსაც კი შეუძლებელია.

ძლიერი მუხრუჭების და დიდი ზომის საბურავების გარდა, ”აგერას” უკეთ მართვას ასევე ემსახურება დინამიკური სტაბილიზაციის სისტემა, რომელიც, ”კიონიგსეგის” განცხადებით, სხვა ანალოგიურ სისტემებს შორის უსწრაფესია - ის მყისიერად რეაგირებს გზის პირობების შეცვლაზე, მართვის სტილსა და სხვა ნიუანსებზე. სისტემას ავტომატურ რეჟიმში მუშაობა შეუძლია. თუმცა მას აქვს იმის შესაძლებლობაც, რომ მძღოლის ცალკეული მითითებებიც შეასრულოს.

”აგერას” ინტერიერი სისადავით და პრაგმატულობით გამოირჩევა. აქ ყურადღებას იქცევს იატაკისადმი თითქმის პერპენდიკულარულად განლაგებული სპორტული სავარძლები, საჭის პატარა რგოლი და მის უკან მოთავსებული მაჩვენებლები, რომლებზეც ყველა ძირითადი პარამეტრის ნახვა შეიძლება. ცენტრალური პანელის ზედა ნაწილში მოზრდილი მრავალფუნქციური მონიტორი, მის ქვემოთ კი მისივე მართვის პულტი მდებარეობს. მონიტორი შეიძლება გამოყენებულ იქნას, როგორც სანავიგაციო და მულტიმედიური სისტემა და ასევე, როგორც წამზომი. სალონის გასანათებლად, ”კიონიგსეგის” სპეციალისტებმა სპეციალური სისტემა ”გოსტ ლაით” (შუქ ლანდი) შეიმუშავეს, რომელშიც, კომპანიის განცხადებით, ნანოტექნოლოგიაა გამოყენებული.

ჟენევაში წარმოდგენილი ”აგერა” ჯერ მხოლოდ წინასერიული პროტოტიპია. ”კიონიგსეგი” აცხადებს, რომ ამ ავტომობილის წარმოებას ოქტომბერში შეუდგება. მისი სერიული ვერსიის პრეზენტაციას კი პარიზის ავტო შოუზე ჩაატარებს. ამასთან, შვედური” კომპანია კვლავაც გააგრძელებს თავისი ძველი მოდელების - CCX-ის და CCXR-ის წარმოებას.

სარბოლი ავტომობილი, რომელიც შოკოლადზე მუშაობს

Chocolate-Powered Racecar

15 მარტი

თანამედროვე საავტომობილო ინდუსტრიის მთავარი მიმართულება მწვანე ტექნოლოგიების განვითარებაა. თითქმის ყველა კომპანია ქმნის კონცეპტუალურ მოდელებს, რომლებიც მინიმალური რაოდენობით საწვავს მოიხმარენ და გარემოსაც ნაკლებად აბინძურებენ. ბევრი კი ასეთი ავტომობილების წარმოებას მალე დაიწყებს კიდეც. უფრო მეტიც, ”ტოიოტამ” ჰიბრიდული ავტომობილების მოცულობით, იკვე კარგა ხანია, მილიონიან ზღვარს გადააბიჯა. მალე კი ბაზარზე სრულიად ელექტრული ავტომობილები გამოჩნდება, რომლებიც გარემოს საერთოდ არ აბინძურებენ.

ახალი ტექნოლოგიების ძიება კი გრძელდება. და არცთუ იშვიათად, მეცნიერები ისეთ ტექნოლოგიებსაც კი იმუშავებენ, როგორებიც მასობრივ წარმოებაში არასდროს დაინერგება, თუმცა მაინც იქცევენ ყურადღებას, რადგან მათში ადამიანის აზროვნების უსაზღვრობა ჩანს. მაგალითად, რას იტყვით სარბოლ ავტომობილზე, როველიც მამოძრავებელ ძალას შოკოლადის წარმოების ნარჩენებისგან ღებულობს?

არა, ეს უბრალო ფანტაზიის ნაყოფი არაა - ფორმულა 3-ის კლასის ავტომობილი, რომელიც სწორედ შოკოლადის ტექნოლოგიას იყენებს, რეალურად არსებობს! ის ინგლისურ კომპანია ”ლოლას” სარბოლი ბოლიდის ბაზაზე მომზადდა. მასში გამოყენებულია ცალკეული ელემენტები, რომლებიც სტაფილოს, კარტოფილის სახამებლისა და სელისგანაა დამზადებული. საიტ planetark.org-ის მიერ გავრცელებული ინფორმაციით, ასეთ ავტომობილს ადგილიდან 100 კმ/სთ სიჩქარის აკრეფა 2.5 წამში შეუძლია, მისი მაქსიმალური სიჩქარე კი 220 კმ/სთ-ს აღწევს. ამ ავტომობილის მუხრუჭების დისკოები ბრაზილიური ხილის, კაჟუს კურკებისგან უნდა დამზადდეს.

ეს უცნაური სარბოლი ავტომობილი ინგლისის უორვიკის უნივერსიტეტში შეიქმნა და ის პირველად საზოგადოებამ ბოსტონის მასაჩუსეტსის ტექნოლოგიურ ინსტიტუტში, ენერგიის კონფერენციაზე იხილა.

”ის უჩვეულოდ ”მწვანეა”, მისი დამზადებისას ის მასალებია გამოყენებული, რომლებიც ჩვეულებრივ, სანაგვეზე ხვდება. ამ მანქანამ საზოგადოების მოწონება დაიმსახურა, რადგან რადგან ის ძალიან უჩვეულო და გამორჩეულია”, - ამბობს პროექტის ერთ-ერთი ავტორი, კერი კირვანი.

სარბოლი ავტომობილი ”ბეემვეს” წარმოების 2.0-ლიტრიანი მოდიფიცირებული ძრავითაა აღჭურვილი, რომელიც ადრე ბენზინზე მუშაობდა, მოდიფიცირების შემდეგ კი დიზელის ძრავის პრინციპით მუშაობს. საწვავად კი შოკოლადის ნარჩენებისგან დამზადებულ სითხეს (ბიოზეთს, ბიოდიზელს) იყენებს. ისე კი, სხვა ბიოლოგიური ნარჩენებისგან გამოხდილ ბიოდიზელზე მუშაობაც შეუძლია.

ცნობისათვის, ამ პროექტის განხორციელებაზე სულ 200 000 დოლარი დაიხარჯა.

”მიცუბიში” ”პეჟო-სიტროენისთვის” 100 000 ელექტრომობილს დაამზადებს

Mitsubishi to make 100,000 EVs for France's PSA

14 მარტი

”მიცუბიში მოტორსი” მალე ამერიკაში ელექტრომობილ i-MiEV-ს გაყიდვას დაიწყება, პარალელურად კი, 100 000 ცალს თავისი ევროპელი პარტნიორის, ”პეჟო-სიტროენისთვის” დაამზადებს. ამგვარად, იაპონურ კომპანიას ამ პატარა ელექტრომობილის წარმოების მოცულობის გაზრდის საშუალება მიეცემა, რაც წარმოების თვითღირებულებას შეამცირებინებს.

ორ კომპანიას შორის მიღწეული შეთანხმებით, რომლის შესახებაც მათ ჟენევის ავტო შოუს დროს გამოაცხადეს, ამ შეთანხმების რეალურად განხორციელება ოქტომბერში დაიწყება, როცა ”მიცუბიში” ელექტრომობილების წარმოებას დაიწყებს. i-MiEV-ს ”პეჟოსა” და ”სიტროენისეული” ვერსიების გაყიდვები კი ევროპის ბაზარზე წლის მიწურულს დაიწყება.

ფრანგული კომპანია იმედოვნებს, რომ წლიურად 25 000 ცალი ელექტრომობილის გაყიდვას შეძლებს. ამათგან ნახევარი ”პეჟოს” ბრენდით გაიყიდება, ნახევარი კი - ”სიტროენისა”. რაც შეეხება ”მიცუბიშის”, იაპონური კომპანია შეკვეთილ ელექტრომობილებს მიზუშიმას (იაპონია) ქარხანაში გამოუშვებს. თავისი ემბლემით დამზადებული i-MiEV-ს გაყიდვებს აპრილში შეუდგება, ამერიკის ბაზარზე კი მას მერმისს შეიტანს.

”პეჟო-სიტროენისთვის” დამზადებულ ავტომობილს სხვაგვარი დიზაინი, განსხვავებული საკიდარი და მართვის სისტემა ექნება. განსხვავებული იქნება მისი ტექნიკურ-დინამიკური მახასიათებლებიც და ინტერიერის გაფორმებაც. ორ კომპანიას შორის მიღწეული შეთანხმებით, იაპონური კომპანია თავისი პარტნიორისთვის ელექტრომობილების წარმოებას 5-6 წელი გააგრძელებს.

პარტნიორები იმედოვნებენ, რომ წარმოების მოცულობის ზრდის კვალობაზე, შემცირდება ელექტრომობილის თვითღირებულებაც. თუმცა ავტომობილის ფასის თითქმის ნახევარი ლითიუმ-იონურ აკუმულატორებზე მოდის. ასეთი აკუმულატორები მსუბუქიცაა და მათ მეტი ტევადობაც აქვთ, მაგრამ მეტისმეტად ძვირია.

თუმცა, ”მიცუბიში” და კიდევ ერთი იაპონური კომპანია ”ნისან მოტორი” თვლიან, რომ ელექტრომობილების ფასის შემცირების ერთ-ერთი მთავარი საშუალება წარმოების მოცულობის ზრდაა, რაც ასევე გააიაფებს ლითიუმ-იონურ აკუმულატორებს. ცნობისათვის, ”ნისანმა” შარშან საზოგადოებას თავისი პიტველი ელექტრომობილი ”ლიფი” წარუდგინა, რომლის სერიულ წარმოებასაც მალე დაიწყებს.

”მიცუბიშიმ” ოთხადგილიან i-MiEV-ზე შეკვეთების მიღება ერთი წლის წინ დაიწყო და აქამდე მასზე მხოლოდ 2 000 შეკვეთა აქვს მიღებული. იაპონური კომპანია იმედოვნებს, რომ წელს 9 000 ცალი ელექტრომობილის გაყიდვას შესძლებს, მერმისს კი გაყიდვებს გააორმაგებს. 2013 წლისთვის ელექტრომობილების წარმოების მოცულობა 30 000-მდე უნდა გაიზარდოს. ”პეჟო-სიტროენის” მიერ შეკვეთილ ავტომობილებსაც თუ დავუმატებთ, ეს რიცხვი 55 000 ათასამდე გაიზრდება.

დიდი ხანია, ”მიცუბიშის” და ”პეჟო-სიტროენს” პარტნიორული ურთიერთობანი აკავშირებთ. უფრო მეტიც, შარშან ინტერნეტში გაჩნდა ცნობები იმის შესახებ, რომ ფრანგული კომპანია თავისი იაპონელი პერტნიორის აქციების სოლიდური პაკეტის დაუფლებას აპირებდა. მაგრამ ეს ხმები ორივე მხარემ ჟენევაში უარყო. სამაგიეროდ, მათ დაადასტურეს, რომ ისინი წარმოების სფეროში თანამშრომლობას გააღრმავებენ.

”პორშეს” ჰიბრიდული სუპერ ვარსკვლავი

Porsche 918 Spyder Concept

13 მარტი

მითი იმის შესახებ, რომ ჰიბრიდული და ელექტრონული ავტომობილები დინამიკისა და სიმძლავრის მხრივ, ვერანაირ კონკურენციას ვერ გაუწევენ თანამედროვე სუპერ ავტომობილებს, ჟენევაში საბოლოოდ დაიმსხვრა, როცა ”პორშემ” თავისი კონცეპტუალური მოდელი, შუამოტორიანი ჰიბრიდული ”918 სპაიდერი” წარმოადგინა.

”918 სპაიდერი” გერმანული კომპანიის სარბოლ მოდელ RS-ის ბაზაზეა შექმნილი და ის ეგრეთ წოდებული პლაგ-ინ სისტემითაა აღჭურვილი, რომლის მეშვეობითაც, მისი აკუმულატორების ბლოკი ენერგიას საყოფაცხოვრებო ელექტროქსელიდან ივსებს.

ამ ავტომობილის მთავარი აგრეგატია 3.4-ლიტრიანი ატმოსფერული V8 ძრავი, რომელიც 500 ცხენის ძალას ავითარებს. მასთან დაკავშირებულია 7-საფეხურიანი ავტომატური კოლოფი. შიდაწვის ძრავის გარდა, ჰიბრიდულ სისტემაში ორი ელექტროძრავიც შედის, რომელთაგან ერთი წინა ღერძს ემსახურება, მეორე კი - უკანას. მათი ჯამური სიმძლავრე კი 218 ცხენის ძალას შეადგენს. ამგვარად, ჰიბრიდული სისტემის სიმძლავრე 718 ცხენის ზალას აღწევს.

ამ ჰიბრიდული დანადგარის წყალობით, ”918 სპაიდერს” ადგილიდან 100 კმ/სთ სიჩქარის აკრეფა 3.2 წამში შეუძლია, მისი მაქსიმალური სიჩქარე კი 320 კმ/სთ-ს აღწევს. პრეზენტაციის დროს, რალიში მსოფლიოს ორგზის ჩემპიონმა, გერმანელმა ვალტერ რიორლმა, ვინც ”პორშეს” ავტომობილების გამომცდელების ჯგუფს ხელმძღვანელობს, განაცხადა, რომ ამ ჰიბრიდულ ავტომობილს, გერმანულ ავტოდრომ ნურბურგრინგის ჩრდილოური მარყუჟის გავლა 7 წუთსა და 30 წამში შეუძლია. ასეთ მცირე დროში კი ამავე ტრასას, სუპერ ავტომობილი ”პორშე კარერა GT-ც” კი ვერ გადიოდა.

ავტომობილის ძარა მთლიანად კარბონის კომპოზიტისგანაა დამზადებული, რისი წყალობითაც, ის 1.49 ტონას იწონის. ეკონომიურ რეჟიმში მუშაობისას, ის 100 კილომეტრზე სულ რაღაც 3 ლიტრ საწვავს მოიხმარს, ყოველი კილომეტრის გავლისას კი ატმოსფეროში მხოლოდ 70 გრამ СО2-ს გამოჰყოფს. ამასთან, მას მხოლოდ ელექტროძრავებით გადაადგილებაც შეუძლია. ოღონდ, აკუმულატორების ტევადობა საკმარისია მხოლოდ იმისათვის, რომ ასე ”918 სპაიდერმა” 25 კილომეტრი გაიაროს.

”918 სპაიდერი” სულ ოთხ რეჟიმში მუშაობს. ერთი რეჟიმი ელექტრომობილისაა. მეორე რეჟიმით მუშაობისას, საქმეში შიდაწვის ძრავიცაა ჩართული და ელექტროძრავებიც. ამასთან ელექტრონიკა თვითონ წყვეტს, როდის და რა ინტენსივობით გამოიყენოს ეს ძრავები.

მესამე რეჟიმი სპორტულია. ამ დროს, შიდაწვის ძრავის მაბრუნი მომენტის ძირითადი ნაწილი უკანა ღერძისკენაა მიმართული, ელექტრომოტორები კი ავტომობილის წევის დასაბალანსებლად გამოიყენება. დაბოლოს, მეოთხე, სარბოლი რეჟიმი. ამ დროს, ყველა ძრავი მაქსიმალური ეფექტურობით მუშაობს.

გარდა ამისა, ჰიბრიდული სუპერ ავტომობილი აქტიური აეროდინამიკური ელემენტებითაცაა აღჭურვილი. მაგალითად, გამოსაწევი ჰაერის ამღებებით, რომლებიც დიდი სიჩქარით მოძრაობისას, ძარის ქვეშ იმალება. სალონში ყურადღებას იქცევს მოსახსნელი საჭის რგოლი და მთლიანად სენსორულ ელემენტებზე აწყობილი ცენტრალური პანელი. ავტომობილს თანამედროვე სანავიგაციო სისტემაც ემსახურება.

ნახეთ ავტოინდუსტრიის მომავალი ჟენევაში

Geneva International Motor Show

8 მარტი

ტრადიციულად, მარტის დასაწყისში, ჟენევა დიდ საავტომობილო შოუს მასპინძლობს. ავტოინდუსტრიის მსოფლიო სიახლეების დიდი რანდევუ წელს მეოთხმოცედ ტარდება და მართალია, დიდი ეკონომიკური კრიზისი საავტომობილო მრეწველობას ჯერაც მძიმე ტვირთად აწევს და სპეციალისტები კარგი პროგნოზებით ჯერაც არ გვანებივრებენ, მაგრამ ჟენევას ეს მაინც არ ეტყობა.

თუ შარშან ”პალექსპოს” პავილიონებში მხოლოდ 32 მსოფლიო პრემიერა გაიმართა, ამჯერად იქ სიახლეების ნამდვილი შტორმი იყო. პრაქტიკულად ყველა საავტომობილო კომპანია ჟენევაში მნიშვნელოვანი სიახლით წარსდგა, რომელთა უმეტესობა კონცეპტუალური ნამუშევრებია. ამ ნამუშევრებში კი ნათლად ისახება მსოფლიო ავტოინდუსტრიის მომავალი.

დღეს უკვე თამამად შეიძლება იმაზე ლაპარაკი, რომ მომავალი ელექტრომობილებისაა. მართალია, ჟენევური სიახლეების უმეტესობას ჰიბრიდული ავტომობილები შეადგენს, მაგრამ ეს შიდაწვისძრავიანი ავტომობილებიდან ელექტრომობილებზე გადასვლის უმტკივნეულო გზაა და ჰიბრიდების სიმრავლეც იმაზე მიუთითებს, რომ სულ მალე, კომპანიები თავიანთ მყიდველებს სწორედ ელექტრომობილებს შესთავაზებენ.

მაგრამ ისეც ნუ იფიქრებთ, რომ ჟენევაში ყველას მხოლოდ მომავლის ტექნოლოგიები აინტერესებს. იქ ბევრი ახალი სერიული ავტომობილის ნახვაც შეიძლება და ისეთი კონცეპტუალური მოდელებისაც, რომლებითაც მათი შემქმნელები თავიანთი ახალი კორპორატიული სტილის დემონსტრირებას ახდენენ.

დაკიდევ, ჟენევაში აშკარად იგრძნობა კრიზისის დასასრულის მოახლოება. ამ გარდამავალ პერიოდს კი მწარმოებლები იმისათვის იყენებენ, რომ რაც შეიძლება მეტი მყიდველი მიიზიდონ. ისინი მათ თავიანთ ახლო მომავლის სიახლეებსაც უჩვენებენ, ისეთებს, როგორებსაც ბევრი პოტენციური მყიდველი დაელოდება და თავის მოძველებულ ავტოს მანამ დაიტოვებს, სანამ ჟენევაში შეთვალიერებული ახალი ავტომობილი დილერთა შოურუმებში გამოჩნდება.

ძნელია იმის თქმა, თუ ჟენევური ექსპონატებიდან რომელია ყველაზე თვალსაჩინო და ისეთი, რომელიც სხვებზე მეტად იმსახურებს იმას, რომ რეპორტაჟი მასზე მოყოლით დავიწყოთ. იქნებ ”პეჟოთი”, რომელსაც დაარსებიდან 200 წელი შეუსრულდა და ამასთან დაკავშირებით, გარდა იმისა, რომ თავისი ლოგო შეცვალა, თავის ახალ კორპორატიულ სტილსაც დაუდო სათავე და აცხადებს, რომ მალე პრემიუმ სეგმენტში გაბატონებულ გერმანულ კომპანიებს, ”ფრანგული ლომების” სახით, სერიოზული კონკურენტი გამოუჩნდება.
ხუთიანი პეჟოსგან

......................................

”ლომების” ახალ ლოგოს, მათი მეტად ორიგინალური სტენდის ცენტრალური ადგილი უკავია, ყველა სიახლე კი საზოგადოებამ სწორედ ამ ლოგოს ფონზე იხილა. ”პეჟოს” მთავარი სიახლე კი სედანი ”ხუთიანი პეჟოსგანაა”, რომელიც მალე სერიულად გამოვა (დიზაინში მინიმალური ცვლილებებით) და ერთდროულად ორ მოძველებულ და მყიდველისთვის ყელში ამოსულ სედანს - 407-ს და 607-ს შეცვლის.

პეჟო SR1

..........................

აქვე ”ლომებს” კონცეპტუალური SR1-იც აქვთ გამოფენილი, რომელიც იმის წარმოდგენას გვიქმნის, თუ როგორი გარეგნობა ექნება ამ კომპანიის შემდეგი თაობის ავტომობილებს. მართალია, ამ მანქანის შესახებ ინფორმაცია და ფოტოები ფრანგულმა კომპანიამ ჯერ კიდევ თვენახევრის წინ გაგვაცნო, მაგრამ მისი პრეზენტაცია სწორედ ჟენევაში გაიმართა და საზოგადოების დიდი მოწონება დაიმსახურა.

რახან ”პეჟოთი” დავიწყეთ, მაშინ მისი ნათესავი ”სიტროენით” გავაგრძელებთ, სადაც არანაკლები სიახლეების ხილვა შეიძლება. ”ორმაგი შევრონის” სტენდის ვარსკვლავი კონცეპტუალური ”სარვოლტია”, რომელიც შემქმნელებმა ვერცხლის ფერში გამოაწყეს და ვარდისფერით და შავით შეაზავეს. აშკარად სპორტული გარეგნობის ამ ავტომობილს, ელერონები, არაერთი ჰაერის ამღები, დიდი უკანა ფრთა და დიფუზორი გამოარჩევს. რაც მთავარია, მას პატარა, ოვალური რადიატორის ბადე აქვს და ნუ გაიკვირვებთ, თუ ასეთ რადიატორებს მალე ”სიტროენის” სხვა, თანაც სერიულ ავტომობილებზეც იხილავთ. მის გვერდით თავს იწონებს კომპანიის შარშანდელი კონცეპცია ვარდისფერი ”რევოლტი”. ალბათ სახელიც მიგანიშნებთ, რომ ”შევრონებსაც” გეზი ელექტრიფიკაციისკენ აქვთ აღებული.სიტროენ სარვოლტი

.............................................
საიტროენ რევოლტი

..............................................

”სიტროენის ექსპოზიციაში ასევე შედის სერია DS-ის ავტომობილები. ამ სერიით, ფრანგული კომპანია მალე პრემიუმ სეგმენტში შეაბიჯებს და ბუნებრივია, მის ფართოდ რეკლამირებას ცდილობს. ამიტომ, გამოფენის დამთვალიერებლებს ამ ავტომობილებში ჩაჯდომის და მათი ახლოს გაცნობის საშუალება მისცეს. ბოლოსდაბოლოს, ასე ისინი უკეთ შეძლებენ სასურველი ავტოს შერჩევას.

სიტროენ DS ჰაი რაიდერი

ახლა გერმანელებზე გადავიდეთ და ”პორშეთი” დავიწყოთ, რომელსაც სტენდიც ისეთივე პატარა აქვს, როგორიც მისი საწარმოო პროგრამაა. სამაგიეროდ, იქ ორი სიახლის ხილვაა შესაძლებელი. ერთია მეორე თაობის უგზოობის ”კაიენი”, რომელსაც შტუტგარტელები მალე მყიდველს ჰიბრიდული აგრეგატითაც შესთავაზებენ. მეორე კი სუპერ ავტომობილი ”918 სპაიდერი”, რომელიც წარმოებიდან მოხსნილ ”კარერა GT-ს” ძლიერ ჰგავს. თუმცა, ამ ავტომობილს მხოლოდ დახვეწილი, სპორტული დიზაინი როდი გამოარჩევს. მთავარი ისაა, რომ ის ჰიბრიდული აგრეგატითაა აღჭურვილი. ამ ჰიბრიდში 500-ცხენისძალიანი შიდაწვის და 218-ცხენისძალიანი ელექტროძრავია გაერთიანებული. შედეგი წარმოუდგენელია - შესანიშნავი დინამიკური მახასიათებლების გარდა, მანქანა კომპაქტებისთვისაც კი შესაშური ეკონომიურობით გამოირჩევა. 3 ლიტრი 100 კილომეტრზე და ყოველი კილომეტრის გავლისას, ატმოსფეროში გამოყოფილი მხოლოდ 70 გრამი CO2. ასეთ შედეგებზე ყველა იოცნებებდა.

პორშე 918

...........................

თუმცა, ამაზე უკეთესი ეკონომიურობით და ეკოლოგიურობით, ”პალექსპოში” გამოფენილი კიდევ ერთი შტუტგარტული ქმნილება გაგაოცებთ. ოღონდ, მას სამქიმიანი ვარსკვლავი ამშვენებს და სახელად ”მერსედესი” ჰქვია. ”პეჟოსი” არ იყოს, ”მერსედესიც” ახალ კორპორატიულ სტილს ამუშავებს და მის დასაგემოვნებლად, გამოფენის დამთვალიერებლებს კონცეპტუალური ”F 800 სტაილი” უჩვენა. სწორედ ასეთი ფორმა ექნება მეორე თაობის ოთხკარიან კუპე CLS-ს. მაგრამ მთავარი ეს სულაც არაა. უფრო საინტერესოა ის, რომ ”F 800 სტაილი” ჰიბრიდული სისტემითაა აღჭურვილი. ამ სისტემაში შედის შიდაწვის V6 ძრავი, რომელიც 272 ცხენის ძალას იძლევა და ელექტროძრავი, რომლის სიმძლავრეც 109 ცხენის ძალას აღწევს. ამ სისტემის მეშვეობით, ავტომობილს ადგილიდან 100 კმ/სთ-მდე აჩქარება 4.8 წამში შეუძლია, 100 კილომეტრს 2.9 ლიტრი საწვავით გადის, ყოველ კილომეტრზე კი მხოლოდ 68 გრამ ნახშირორჟანგს გამოჰყოფს.

მერსედეს F 800

..............................

სხვათა შორის, ”პორშეს” და ”მერსედესის” ჰიბრიდული სისტემები ეგრეთ წოდებულ პლაგ-ინ ტიპისაა, ანუ მათი აკუმულატორები ჩვეულებრივი საყოფაცხოვრებო ელექტროქსელიდან იმუხტება. მოდი და ამის შემდეგ, ჰიბრიდულ ავტომობილებს ალმაცერად შეხედე...

სხვა თუ არაფერი, ასეთი ავტომობილების შექმნაზე უკვე ”ფერარიც” ზრუნავს. იტალიურმა კომპანიამ შოუს დამთვალიერებლებს თავისი პირველი ჰიბრიდული სუპერ ავტომობილი წარუდგინა სახელად HY-KERS. ამ სახელის პირველი ნაწილი სიტყვა ჰიბრიდის პირველი ორი ასოა. მეორე კი აბრევიატურა, რაც კინეტიკური ენერგიის რეკუპერაციის სისტემას ნიშნავს. ცნობისათვის, ანალოგიური სისტემა ”ფერარის” ფორმულა 1-ის გუნდის ინჟინრების ნახელავია და მართალია, ის დიდი პრიზების ცირკში ვერ დამკვიდრდა, მაგრამ სამაგიეროდ, საგზაო ავტომობილებში გამოიყენებენ.

სხვათა შორის, ამ ავტომობილს ჰიბრიდული მხოლოდ პირობითად შეიძლება ეწოდოს, რადგან მასში ძირითად მბიძგველ ძალას ისევ შიდაწვის ძრავი გამოიმუშავებს, ელექტროძრავს კი (რომლის სიმძლავრეც 100 ცხენის ძალას შეადგენს) მხოლოდ დამხმარე ფუნქცია აკისრია და ის კერს-ის მიერ გამომუშავებულ ენერგიას მოიხმარს.

რა თქმა უნდა, აღნიშვნას კიდევ ერთი ფაქტი იმსახურებს - HY-KERS-ს ეკოლოგიურობის ხაზგასასმელად, მარანელოელებმა ის სალათისფრად შეღებეს. ბოლო ხანებში, ”ფერარი” აშკარად აღარაა სისხლისფერზე ჩაციკლული. მაგრამ სალათისფერი მის ფერთა გამაში მაინც მოულოდნელი სიახლეა.

ფერარი HY-KERS

.......................................

რახან სუპერ ავტომობილების მწარმოებლები ვახსენეთ, ბარემ ”ბუგატის” და ”ლამბორგინის” მოდელებზეც ვთქვათ ორიოდ სიტყვა. ამათ განსაკუთრებული სიახლეები არ აქვთ. ”ბუგატის” სედან ”16C გალიბიერის” პრემიერა შარშან შედგა, ჟენევაში კი ის ფართო საზოგადოების წინაშე წარსდგა. რაც შეეხება ”ლამბოს” სიახლეს, ეს შემსუბუქებული ”გალიარდოა”, სახელად ”LP570-4 სუპერლეგერა”. საბაზო მოდელთან შედარებით, ის 70 კილოგრამით მსუბუქია. ამის შედეგი კი ისაა, რომ ავტომობილის საწვავის ხარჯი დაახლოებით 20 პროცენტით შემცირდა და ახლა ის 100 კილომეტრზე სულ რაღაც 13.5 ლიტრს შეადგენს.
ლამბორგინი გალიარდო LP570-4 სუპერლეგერა

........................................

ბუგატი 16C გალიბიერი

დავუბრუნდეთ გერმანელებს. გამოფენის ერთ-ერთი ყველაზე საინტერესო, თანაც სერიული ექსპონატის ხილვა ”აუდის” სტენდზე შეიძლება, რომლის მთავარი პერსონაჟი - სუბკომპაქტური ჰეჩბეკი A1, მალე კონკურენციას ისეთ პოპულარულ ავტომობილს გაუწევს, როგორიც ”მინია”. ინგოლშტადტელებმა თავიანთი სიახლის იმიჯის ასამაღლებლად, მის პრეზენტაციაზე ჯასტინ ტიმბერლეიკი მიიწვიეს (სამაგიეროდ, ”მერსედესის” სტენდზე მიხაელ შუმახერის ნახვა შეიძლებოდა, ”სეატს” კი თავისი პროდუქციის რეკლამირებაში შაკირა დაეხმარა). ”აუდის” სტენდზევე დგას A1-ის ელექტრონული ვერსია e-ტრონი.

აუდი A1

.........................

თქმა არ უნდა, ”მინის” სერიოზული კონკურენტი გამოუჩნდა, თუმცა უსაქმოდ არც ინგლისური მარკა დარჩა, რომელმაც საზოგადოებას, როგორც იქნა, თავისი ქროსოვერი ”ქანთრიმენი” უჩვენა, რომელმაც ”მინის” გაყიდვების ზრდის ტენდენცია უნდა გააძლიეროს.
მინი ქანთრიმენი

........................................

ჰიბრიდების თემა ”ბეემვეშიც” აქტუალურია. ბავარიელებმა თავიანთი ექსპოზიციის ცენტრში ახალი მე-5 სერიის სედანი მოათავსეს, რომელიც მე-3 სერიის დაგრძელებული ვერსიის შთაბეჭდილებას ტოვებს. გარშემო კი მას სამოდელო გამის უკლებლივ ყველა მოდელის ჰიბრიდული ვერსია დაუყენეს.
ბეემვე მე-5 სერია

........................................

წეღან ”აუდი” ვახსენეთ და არაფერი ვთქვით კიდევ ერთ სიახლეზე, რომელიც ინგოლშტადტელებმა მოამზადეს. ესაა აღდგენილი მარკა ”ისპანო სუიზა”, რომლის სახელითაც, გერმანულმა კომპანიამ თავისი R8-ს ბაზაზე ახალი სპორტული ავტომობილი შექმნა.
ისპანო სუიზა

..............................

ჟენევაში პირველად შეიძლება იხილოთ ”ასტონ მარტინის” ისტორიაში პირველი ჯუჯა ავტომობილი სახელად ”სიგნიტი”. ნახავთ ამ ავტომობილს და კიდევ ერთხელ მიხვდებით, რატომ ფასობს ასე ძვირად ამ ინგლისური მარკის ავტომობილები. არადა, ”ბარტყის” (სიგნიტ ინგლისურად ბარტყს ნიშნავს) დონორი ”ტოიოტა iQ” ასეთ შთაბეჭდილებას ნამდვილად ვერ მოახდენს.

ასტონ მარტინ სიგნიტი

რა თქმა უნდა, აღნიშვნას იმსახურებს ”ალფა რომეოს” ახალი ”ჯულიეტა”, რომლის დებიუტიც იტალიური კომპანიის ასწლოვან იუბილეს დაემთხვა. შეიძლება თამამად ითქვას, რომ გამოფენის სერიულ ექსპონატებს შორის, ”ჯულიეტა” ერთ-ერთი ყველაზე ელეგანტურია. იტალიელებისგან ეს არც არავის უკვირს. საინტერესო სხვა რამაა - შეძლებს კი ეს ჰეჩბეკი კრიზისში მყოფი მილანური მარკისთვის ლოკომოტივის როლის შესრულებას?

ალფა რომეო ჯულიეტა

..................................................

ჟენევაში ”ვოლვოც” სახეცვლილი გამოჩნდა, მისი ექსპოზიციის მთავარი ვარსკვლავი კი უახლესი სედანი S60-ის, რომელიც ძირითადად ბიზნესმენებს და კონსერვატიული გემოვნების მქონე ავტომოყვარულებს აინტერესებთ. დიდი აჟიოტაჟი გამოიწვია ”რენოს” ახალმა მინი როდსტერმა ”უინდმა”, რომელსაც შესანიშნავი დიზაინი გამოარჩევს. აქვე ნახავთ ”გორდინის” სახელით გამოფენილ ”კლიო სპორტის” ახალ ვერსიას.
რენო უინდი
ვოლვო S60

..............................

”ფერარის” და ”პორშეს” დარად, ჰიბრიდული ავტომობილი დგას ”ლოტუსის” სტენდზეც. ესაა მოდელ ”ევორას” ბაზაზე შექმნილი ელექტრომობილი 414E. სახელში რიცხვი ორი ელექტროძრავის ჯამური სიმძლავრის მიმანიშნებელია. ამ ავტომობილს შიდაწვის ძრავიც აქვს, თუმცა ის და მასთან დაკავშირებული გენერატორი, მხოლოდ ელექტროძრავებისთვის საჭირო ელექტროენერგიას გამოიმუშავებენ.
ლოტუს 414E

.................................

”ჰიუნდაის” მთავარი ექსპოზიციაა ჰიბრიდული i-ფლოუ, რომელსაც დიზელის ძრავისა და ელექტროძრავის ტანდემი ემსახურება. ამ ავტომობილის შექმნისას, კორეულ კომპანიას პარტნიორობას ელექტროქიმიური გიგანტი BASF-ი უწევდა. შედეგად, შემუშავებულ იქნა რამდენიმე ახალი ტექნოლოგია, რომლებიც ავტომობილის წონის შემცირებისთვისაა მოწოდებული.

ჰიუნდაი i-ფლოუ

”ოპელის” ვარსკვლავია კონცეპტუალური ”ფლექსტრიმ GT/E”, რომელიც შესანიშნავი აეროდინამიკური მახასიათებლებით გამოირჩევა. თავად განსაჯეთ: ამ ავტომობილის შემხვედრი ჰაერისადმი წინააღმდეგობის კოეფიციენტი მხოლოდ 0.22-ია. მას მოდელ ”ამპერასთვის” შემუშავებული ჰიბრიდული სისტემა E-REV ემსახურება, რომლის წყალობითაც, ”ფლექსტრიმის” სვლის სიშორე 500 კილომეტრია.

ოპელ ფლექსტრიმ GT/E

..................................................

საინტერესო სიახლე აქვს ”სეატსაც”, რომელმაც ”იბიცას” ბაზაზე კონცეპტუალური ელექტრომობილი IBE დაამზადა. ამ ავტომობილს 102-ცხენისძალიანი ელექტროძრავი ემსახურება. ეს მისი მაქსიმალური სიმძლავრეა, ნომინალი კი მხოლოდ 68 ცხენის ძალას შეადგენს. ამ სიმძლავრის განვითარების შემთხვევაში, ავტომობილი ნაკლებ ენერგიას მოიხმარს და ამ დროს, მისი სვლის სიშორე 130 კილომეტრს აღწევს. ესპანური კომპანია გვპირდება, რომ მალე ამ ელექტრომობილის სერიულ წარმოებას დაიწყებს.

სეატ IBE

..............................

”ნისანს” ორი სიახლე აქვს - ახალი თაობის სუბკომპაქტური ჰეჩბეკი ”მიკრა” და სუბკომპაქტური ქროსოვერი ”ჯუკი”. ეს ორი ავტომობილი ერთსა და იმავე პლატფორმაზეა აგებული და მათზე იაპონური კომპანია დიდ იმედებს ამყარებს.

ნისან მიკრა

ნისან ჯუკი

..............................

სამწუხაროდ, დღევანდელ რეპორტაჟში ყველა სიახლის გაცნობა შეუძლებელია. არადა, ჟენევაში პატარა სადიზაინერო ატელიეებმაც არაერთი საინტერესო სიახლე წარმოადგინეს. აქტიურობა სატიუნინგო კომპანიებმაც გამოიჩინეს. მოკლედ, ამჯერად ”პალექსპოში” იმდენი ახალი ავტომობილის ნახვა შეიძლებოდა, ჟენევის შარშანდელი გამოფენის მსგავს რამდენიმეს რომ ეყოფოდა. იმ ავტომობილებიდან, რომლებზეც ამჯერად საუბარი ვერ ხერხდება, ყველაზე გამორჩეულებსა და საინტერესოებს ”ავტო პანორამა” შემდეგ ნომრებში გაგაცნობთ.

”მერსედეს ბენცის” ”SLS AMG გალვინგი” ფორმულა 1-ის პეისკარი გახდა

Mercedes-Benz SLS AMG Gullwing Official F1 Safety Car for 2010 Season

7 მარტი

სხვა ავტომობილებთან ერთად, ჟენევაში ”მერსედეს ბენცმა” ფორმულა 1-ის ატრიბუტიკით გაწყობილი სუპერ ავტომობილი ”SLS AMG გალვინგი” წარმოადგინა, რომელიც ამ სეზონში, ფორმულა 1-ის ოფიციალური პეისკარის მოვალეობებს შეასრულებს. ეს ავტომობილი შტუტგარტული კომპანიისვე როდსტერ SL 63 AMG-ს ჩაანაცვლებს, რომელიც დიდი პრიზების ცირკს წინა ორ სეზონში ემსახურებოდა.

ახალი პეისკარი თავის მოვალეობებს რამდენიმე დღეში, ბაჰრეინის დიდ პრიზზე შეუდგება, მსოფლიო საზოგადოებისთვის მის წარდგენაში კი მონაწილეობა ”სამქიმიანების” ფორმულა 1-ის გუნდის გერმანელმა პილოტებმა - მიხაელ შუმახერმა და ნიკო როსბერგმა მიიღეს.

ახალი პეისკარი იმავე 571-ცხენისძალიანი V8 ძრავითაა აღჭურვილი, რომლითაც სტანდარტული ”SLS AMG გალვინგი”. ამასთან, ძრავთან 7-საფეხურიანი კოლოფია დაკავშირებული, რომელიც ძრავისგან მაბრუნ მომენტს ორმაგი ქუროს გავლით ღებულობს. გაფორმების გარდა, სტანდარტული ავტომობილისგან პეისკარს ახალი გამოსაბოლქვი სისტემაც განასხვავებს, რომელიც ძრავის გრუხუნა ხმას არბილებს. და, რა თქმა უნდა, სახურავის უკანა ნაწილში, სპეციალური მანათობლებია დამონტაჟებული. გარედან, ავტომობილი ფ1-ის ლოგოებითაა აჭრელებული.

სალონში, ცენტრალურ პანელზე დამატებულია ორი მონიტორი, საიდანაც, პეისკარზე მომუშავე მარშლები რბოლას ადევნებენ თვალყურს. მათსავე განკარგულებაშია რადიოსისტემა, რომლის მეშვეობითაც, პეისკარის პერსონალს კავშირი მთავარ მსაჯთან აქვს. ცენტრალურ პანელზევეა დამონტაჟებული ეგრეთ წოდებული მარშალის სისტემა, რომლის მეშვეობითაც, მანქანის პილოტი იმავე ნიშნებს ღებულობს, რომლებიც სპეციალური საშუალებებით, რბოლის მონაწილეებსაც გადაეცემათ.

”SLS AMG გალვინგის” გარდა, ფორმულა 1-სთვის სამსახურს გააგრძელებს უნივერსალი ”მერსედეს SL 63 AMG ესტეიტი”, რომელიც ფ1-ის ოფიციალური სამედიცინო ავტომობილის მოვალეობებს შეასრულებს.

”პეჟოს” სამიზნე გერმანული პრემიუმ ბრენდებია

Peugeot aims at German premium brands with new styling (Automotive News Europe)

5 მარტი

ჟენევის საავტომობილო შოუზე, ”პეჟომ” კონცეპტუალური ავტომობილის - ”5 პეჟოსგან” პრეზენტაცია ჩაატარა. ფრანგული კომპანია იმედოვნებს, რომ ამ ავტომობილის ბაზაზე შექმნილი ახალი სედანი, კონკურენციას პრემიუმ სეგმენტის გერმანული ლიდერების ისეთ პოპულარულ მოდელებს გაუწევს, როგორებიცაა ”მერსედეს ბენცის” C კლასი, ”ბეემვეს” მე-3 სერია და ”აუდის” A4.

”5 პეჟოსგან” ”ფრანგული ლომების” სედან 508-ს წინამორბედია და მისი წარმოების დაწყება მერმისს, წლის დასაწყისში იგეგმება. ”პეჟოს” მმართველი დირექტორი ჟან-მარკ გალესი აცხადებს, რომ 508-ს სერიული ვერსიის მსოფლიო პრემიერა ჟენევის მომავალი წლის გამოფენაზე ჩატარდება.

”ეს ის სეგმენტია, რომელშიც გერმანული ბრენდები დომინირებენ და ამ ავტომობილით, ჩვენ ამ სეგმენტში დამკვიდრებას და მათთან კონკურენციას ვგეგმავთ. სწორედ ამ დანიშნულებით მოვამზადეთ ეს კონცეპტუალური ავტომობილი”, - პრეზენტაციაზე განაცხადა გალესმა.

”ხუთიანი პეჟოსგან” ახალ კორპორატიულ სტილშია შესრულებული, რომლის დამკვიდრებასაც ფრანგული კომპანია პირველად სწორედ 508-ით დაიწყებს. ეს სტილი რადიატორის შემცირებული ბადით, წვრილი ფარებით და დინამიკური, თუმცაღა ახლანდელ მოდელებზე ნაკლებად აგრესიული დიზაინით გამოირჩევა. ფაქტობრივად, ”პეჟოს” ახალი დიზაინი მიჰყვება ევროპული ავტომწარმოებლების ახალ ტრენდს, რომელსაც დასაბამი ”ფოლკსვაგენ პასატმა” და ”ოპელ ინსინიამ” მისცეს.

”ამ კონცეპტუალურ ავტომობილს, ჩვენი სამომავლო დიზაინის გენები აქვს. ყოველ ავტომობილში, რომლებსაც ამიერიდან წარმოგიდგენთ, თქვენ ამ გენებს შენიშნავთ. ისინი კონცეპტუალური SR1-სა და ”ხუთიანი პეჟოსგან” გარეგნობის შთაგონებით შეიქმნება”, - ამბობს გალესი და დასძენს, რომ სედანი 508 მალე ერთდროულად უფრო პატარა 407-სა და უფრო დიდ 607 სედანებს შეცვლის. თანაც, ის ხაზს უსვამს, რომ სერიული 508-ს დიზაინი, 90 პროცენტით დაემგვანება ”ხუთიანს პეჟოსგან”.

ჟენევაში წარმოდგენილი ”5 პეჟოსგან” ფრანგული კომპანიის ”ჰიბრიდ4” სისტემითაა აღჭურვილი. ამ სისტემაში, ავტომობილის წინ განლაგებული 2.0-ლიტრიანი (165-ცხენისძალიანი) დიზელი და უკან განლაგებული ელექტროძრავია გაერთიანებული, რომელიც დამატებით 38 ცხენის ძალას იძლევა. ფრანგული კომპანიის განცხადებით, ამ ჰიბრიდული სისტემის წყალობით, ავტომობილი 100 კილომეტრს 3.8 ლიტრი საწვავით გადის, ყოველი კილომეტრის გავლისას კი ატმოსფეროში მხოლოდ 99 გრამ CO2-ს გამოჰყოფს. და თუ მხოლოდ ელექტროძრავით მოძრაობს, მაშინ ნულოვანი გამონაბოლქვი აქვს.

”ნისანი” ახალ ”მიკრაზე” დიდ იმედებს ამყარებს

Nissan unveils new compact car (Reuters)

5 მარტი

”ნისან მოტორმა” ჟენევაში თავისი დაბალფასიანი სუბკომპაქტური ჰეჩბეკი ”მიკრა” (ზოგიერთ ბაზარზე ის ”მარჩის” სახელით იყიდება) წარმოადგინა, რომელიც მთელი მსოფლიოს ბაზარზე გაიყიდება. იაპონური კომპანია ამ ავტომობილის ბაზაზე მოდელების მთელი ოჯახის შექმნას აპირებს და იმედოვნებს, რომ 2013 წლისთვის მათი გაყიდვების მოცულობა 1 მილიონს გასცდება.

ახალი ჰეჩბეკი ”ნისანის” სრულიად ახალ, V პლატფორმაზეა აგებული. ამ პლატფორმის წარმოებისას, იაპონური კომპანია ახალ, მსუბუქსა და მტკიცე მასალებს გამოიყენებს და მისი წარმოება, წინამორბედზე იაფი დაჯდება. პლატფორმის სიიაფეს კი, პირველ რიგში ის ფაქტორი განსაზღვრავს, რომ მას ”მიკრას” ბაზაზე დამზადებული ბევრი მოდელისთვის გამოიყენებენ.

ახალი ”მიკრა”, პირველ რიგში, სწრაფად განვითარებად ქვეყნებში გაიყიდება, როგორებიცაა ტაილანდი, ინდოეთი და ჩინეთი. ამასთან, ის ევროპის ბაზარზეც დარჩება. ჯერჯერობით უცნობია, შეიტანს თუ არა მას იაპონური კომპანია აშშ-ის ბაზარზე.

”ადრე ჩვენი კომპანია კომპაქტურ სეგმენტებში ფართოდ არ იყო წარმოდგენილი, რისი მიზეზიც ის ფაქტი იყო, რომ ჩვენ შესაბამისი მონაცემების მქონე პლატფორმა არ გვქონდა. ახალი პლატფორმა კი ჩვენს მიდგომას ძირეულად ცვლის. მისი საშუალებით, ჩვენ კონკურენტუნარიანნი ვხდებით”, - ამბობს ”ნისანის” მთავარი აღმასრულებელი კარლოს გონი.

ახალი ”მიკრას” ფასი ჯერჯერობით არ გამოცხადებულა. გონი ამბობს, რომ ეს პატარა ავტომობილი, მსოფლიოს 160-ზე მეტ ქვეყანაში გაიყიდება. ამ ავტომობილის გამოშვებას პირველი ”ნისანის” ტაილანდური ქარხანა დაიწყებს, შემდეგ კი ინდოეთის ჯერიც დადგება. ინდოეთის ბაზარი ”ნისანისთვის” მეტად მნიშვნელოვანია. აქ კომპაქტურ სეგმენტში ”მარუტი სუზუკი” და ”ჰიუნდაი” ლიდერობენ. ასე რომ, ”მიკრას” იქ მკაცრი კონკურენცია ელის.

გონის განცხადებით, პლატფორმის მსუბუქი სტრუქტურის წყალობით, ახალი ”მიკრა” გამონაბოლქვში ნახშირორჟანგის მცირე შემცველობით გამოირჩევა. განვითარებითი ბაზრებისთვის განკუთვნილი ”მიკრა”, ყოველი კილომეტრის გავლისას, ატმოსფეროს მხოლოდ 115 გრამი CO2-ით აბინძურებს. ეგ კიდევ არაფერი - მალე ”ნისანი” ევროპული სპეციფიკაციის შესაბამისად მომზადებულ ”მიკრასაც” წარმოადგენს, რომლის გამონაბოლქვშიც, CO2-ის შემცველობა სულ რაღაც 95 გრ/კმ იქნება.

”ჯულიეტა” – ”ალფა რომეოს ახალი ფლაგმანი

Fiat counts on new Alfa model to give brand a boost (Reuters)

5 მარტი

ჟენევის საავტომობილო შოუზე, ”ფიატის” საავტომობილო ჯგუფში შემავალმა კომპანია ”ალფა რომეომ” თავისი ახალი ფლაგმანი მოდელი - ჰეჩბეკი ”ჯულიეტა” წარადგინა, რომლითაც მილანური კომპანიის გამოცოცხლება უნდა დაიწყოს. სავარაუდოდ, სწორედ ”ჯულიეტა” გახდება ის ავტომობილი, რომლითაც ”ალფა რომეო” ამერიკის ბაზარს დაუბრუნდება. ცნობისათვის, იტალიურმა კომპანიამ აშშ-ის ბაზარი 1985 წელს დატოვა.

”ფიატი” ”ალფა რომეოს” ახალ სტრატეგიას მალე გამოაქვეყნებს. ანალიტიკოსები დარწმუნებულნი არიან, რომ მილანური ასწლოვანი ავტომწარმოებლის ფეხზე დადგომის საქმეში, მთავარი როლი სწორედ ”ჯულიეტას” დაეკისრება. ”ფიატის” მთავარმა აღმასრულებელმა სერჯო მარკიონემ იანვარში განაცხადა, რომ მისი კომპანია ”ალფა რომეოს” გაყიდვას არ აპირებს და აქციონერებს აღუთქვა, რომ მალე მის ახალ სამოქმედო სტრატეგიას გამოაქვეყნებს.

”კრედიტ სუისის” ანალიტიკოსი სტიუარტ პერსონი აცხადებს, რომ ”ალფას” ასაღორძინებლად მთავარი წარმოების რაოდენობის გაზრდა არ იქნება. მთავარია ხარისხი და ეს ბრენდი იმ შემთხვევაშიც გახდება კონკურენტუნარიანი, თუ წარმოების მოცულობას რამდენიმე ასეული ათასის ფარგლებში შეინარჩუნებს. სხვათა შორის, თავის დროზე სწორედ საკითხისადმი ამგვარი მიდგომით განვითარდა სამი გერმანული პრემიუმ ბრენდი (მერსედესი, ბეემვე და აუდი), რომლებიც უკვე წარმოების მილიონიან ზღვარს გასცდნენ.

შარშან ”ალფა რომეომ” მთელს მსოფლიოში 110 000 ავტომობილი გაჰყიდა, საიდანაც უმეტესობა ევროპაში დარჩა. გაყიდვების გაზრდის საშუალება შეიძლება გახდეს ამერიკულ ბაზარზე დაბრუნება, თუმცა ეს 2012 წლამდე არ იგეგმება.

”ალფა რომეო” ”ფიატის” ჯგუფში 1986 წლიდან შედის და იქიდან მოყოლებული, მისი გაყიდვები თითქმის ყოველწლიურად კლებულობს, რის გამოც, ტურინელები მის გაუქმებასაც კი ფიქრობდნენ, თუმცა მარკიონემ მილანელებს ბოლო შანსი მისცა. თუმცა ანალიტიკოსების უმეტესობა ასეთ რადიკალურ ნაბიჯს მაინც არ ელოდა.

სხვათა შორის, მარკიონე ”ალფა რომეო ჯულიეტას” ჟენევურ პრეზენტაციას არ დასწრებია. ამ დროს ის ბრაზილიაში იმყოფებოდა, სადაც ”ფიატმა” თავის ბრაზილიურ კომპანია CNH-ის ახალი ქარხნის გახსნის ცერემონიაში მიიღო მონაწილეობა. ქარხანა, რომლის მშენებლობაც 557 მილიონი დოლარი დაჯდა, სასოფლო-სამეურნეო მანქანა-დანადგარების წარმოებაზეა სპეციალიზებული. მარკიონეს გარდა, მის გახსნას ბრაზილიის პრეზიდენტი ლუის ინასიო ლულა და სილვაც დაესწრო. ცნობისათვის, ბრაზილიის ეკონომიკის სოფლის სექტორი სწრაფი ტემპით ვითარდება, მისთვის საჭირო მანქანა-დანადგარების ბაზრის 24.5 პროცენტს კი ”ფიატი” აკონტროლებს.

სხვათა შორის, ბრაზილიის ეკონომიკური რეცესია შედარებით მცირე ხანს გაგრძელდა და შარშან, იქაურ ავტო ბაზარზე გაყიდვების 11.4-პროცენტიანი ზრდა დაფიქსირდა. ტურინულ ავტო გიგანტს კი ამ ბაზარზე სოლიდური წილი უკავია.