დონალდ ტრამპს ეი ჯეი ფოიტი შეცვლის

A.J. Foyt to replace Donald Trump

14 მაისი

ინდი 500-ის რბოლას ერთი საინტერესო ტრადიცია აქვს - მის პეისკარს ცნობილი ადამიანები პილოტირებენ. წელს ეს რბოლა მეასედ ტარდება და პეისკარის პილოტად, არც მეტი, არც ნაკლები, მილიარდერი დონალდ ტრამპი (ფოტოზე პეისკარის საჭესთან) იყო მიწვეუილი. ისიც დათანხმდა, თუმცა საიუბილეო რბოლის სტარტამდე სამიოდ კვირით ადრე ცნობილი გახდა, რომ კაბრიოლეტ „შევროლე კორვეტ SS-ის“ საჭეს ტრამპი კი არა, სახელოვანი ამერიკელი მრბოლი, ინდი 500-ის ოთხგზის გამარჯვებული (ის ერთადერთია, ვისაც ეს ლეგენდარული რბოლა სამზე მეტჯერ აქვს მოგებული) ეი ჯეი (ენტონი ჯოზეფ) ფოიტი მიუჯდება.

სხვათა შორის, როდსაც პეისკარის პილოტად ტრამპი გამოცხადდა, ამან რბოლის ფანებს შორის პროტესტის ტალღა გამოიწვია. თავად ბიზნესმენი შესაძლოა მალე აშშ-ის პრეზიდენტის არჩევნებში კანდიდატად ჩაებას და საყოველთაო უკმაყოფილების გამოწვევა არ ისურვა. პროტესტებს რბოლის ორგანიზატორებიც მოერიდნენ. და ამიტომ, ტრამპი ფოიტმა შეცვალა.

წლევანდელ ინდი 500-ს ორი დებიუტანტო ეყოლება. ესენი არიან ფ1-ის ბოლო ამერიკელი პილოტი სკოტ სპიდი და ჩინელი ჰო-პინ ტუნი. სპიდი ერთხანს „რედ ბულის“ ტესტ პილოტი იყო, 2006 წელს კი, „ტორო როსოს“ მანქანით, ფორმულა ერთში მისი დბიუტი შედგა. თუმცა წარმატებები არ ჰქონია.

ტუნი პირველი ჩინელი პილოტია, ვინც ინდი 500-ზე იასპარეზებს. ესეც ფ1-თანაა დაკავშირებული - „რენოს“ სარეზერვო და ტესტ პილოტია. გარდა ამისა, მას გამოცდილება მიღებული აქვს ისეთ სერიებში, როგორებიცაა GP2, A1GP და ფორმულა სუპერლიგა. ორივე ახალბედა როჯერ პენსკეს „დრაგონ რეისინგის“ მანქანებით იასპარეზებს.

სხვათა შორის, ორივე პილოტს თუნდაც მიზერული შანსი აქვს იმისა, რომ ბონუსის სახით, 5 მილიონი დოლარი მიიღოს. ეს კი იმ შემთხვევაში მოხდება, თუ რომელიმე მათგანი ფინიშის ხაზს პირველი გადაკვეთს. ამხელა ბონუსი მხოლოდ იმ ახალბედბისთვისაა გათვალისწინებული, რომლებიც ინდი 500-ზე სხვა სერიებიდან არიან მოსულები და ინდი ქარის სერიაში რეგულარულად არ მონაწილეობენ.

კუნიოს პირველი ავტომობილი

Fardier de Cugnot

14 მაისი

წელს „მერსედეს ბენცი“, კარლ ბენცის მიერ პირველი ავტომობილის შექმნიდან 125 წლის იუბილეს აღნიშნავს. მაგრამ ყველამ როდი იცის, რომ ეს მხოლოდ პირველი შიდაწვისძრავიანი ავტომობილი იყო. გაცილებით ადრე, კერძოდ კი 1769 წელს, პირველი თვითმავალი ურემი, რომელსაც დღეს თავისუფლად შეიძლება ვუწოდოთ ავტომობილი, ფრანგმა გამომგონებელმა ნიკოლა-ჟოზე კუნიომ დაამზადა.

კუნიოს თვითმავალი ურემი (ფარდიე დე კუნიო, ან ფარდიე ა ვაპურ) სამხედრო დანიშნულებით შექმნა და მის მამოძრავებლად ორთქლის მანქანა გამოიყენა. თავისი ქმნილების საფუძვლად, მან ორბორბლიანი მძიმე ურემი გამოიყენა, რომელსაც სამხედროები მძიმე არტილერიის გადასატანად იყენებდნენ. ჩვეულებრივ, ურემს ცხენები ეზიდებოდნენ, რომლებიც კუნიომ დამატებითი ბორბლით და მასზე დამაგრებული ორთქლის მანქანით შეცვალა.

პირველად კუნიომ შედარებით პატარა ორთქლის მანქანა დაამზადა. მომდევნო წელს კი დიდი ზომის მანქანაც დამზადდა, რომელსაც გამომგონებლის გათვლით, ერთ საათში, 4 ტონა ტვირთის თითქმის 8 კილომეტრზე გადატანა შეეძლო (თუმცა, პრაქტიკაში ეს არავის შეუმოწმებია). საკუთრივ ორთქლის ურიკა 2.5 ტონას იწონიდა.

იმის გამო, რომ ყრიკაზე წონა მეტისმეტად უთანაბროდ იყო განაწილებული, ის არასტაბილურობით გამოირჩეოდა. ამ არასტაბილურობას ის ფაქტიც აძლიერებდა, რომ ურიკას მოძრაობა მოუწყობელ გზებსა და აღმართებზე უწევდა. სწორედ ეს გახდა პირველი ავარიის მიზეზიც - 1771 წელს, მეორე ურიკა უკონტროლო გახდა, დაღმართზე დაგორდა და არსენალის კედელს დაეჯახა. სწორედ ეს ინციდენტი შეიძლება ჩაითვალოს პირველ საავტომობილო ავარიად.

არც ორთქლის მანქანა გამოირჩეოდა სტაბილური მუშაობით. მისი ქვაბი ურიკის წინ იყო დაკიდული. მის ძირზე საცეცხლე იყო განლაგებული. დგუშის ასამოძრავებლად საჭირო ორთქლის წარმოქმნას დაახლოებით 15 წუთი სჭირდებოდა, რის გამოც, მანქანის მოძრაობა ხშირად წყდებოდა და მისი სიჩქარეც ამის გამო მცირდებოდა.

ხანმოკლე ტესტების შემდეგ, საფრანგეთის არმიამ კუნიოს ორთქლის მანქანაზე უარი თქვა. ამის მიუხედავად, 1772 წელს საფრანგეთის მეფე ლუი მეთხუთმეტემ, კუნიოს პენსიის სახით, წლიური 600 ლივრი დაუწესა. მისი მანქანა კი, 1800 წელს პარიზის ხელოვნების და ხელობის ეროვნული კონსერვატორიის მუზეუმში გადაიტანეს, სადაც დღემდე ერთ-ერთი გამორჩეული ექსპონატია.

კუნიოს ორთქლის ურიკის ზუსტი ასლი ტამპა ბეის (აშშ) საავტომობილო მუზეუმშიცაა გამოფენილი. ეს ექსპონატი, რომელიც ორიგინალურისგან განსხვავებით, მოქმედია, ახლახანს პარიზში, ყოველწლიურ პოპულარულ შოუ „რეტრომობილზე“ გამოფინეს.

„რენო“ მინი ელექტრომობილ „ტვიზის“ გაყიდვებს იწყებს

Renault opens online reservations for Twizy all-electric two-seater

13 მაისი

ელექტრომობილების მწარმოებელთა მწირ სიაში ამიერიდან „რენოც“ უნდა მოვიხსენიოთ - ფრანგულმა კომპანიამ ბარსელონას მოტორ შოუზე გამოაცხადა, რომ იწყებს ორადგილიან მინი ელექტრომობილ „ტვიზი-ზე“ ონლაინ-შეკვეთების მიღებას. თუმცა, ისიც დასძინა, რომ ამ ავტომობილის მსოფლიო პრემიერა მოგვიანებით, (სავარაუდოდ, ფრანკფურტის ავტო შოუზე, სადაც ორი წლის წინ, მისი კონცეპტუალური ვერსიის დებიუტი შედგა) გაიმართება.

ლაპარაკია „ტვიზი-ს“ ორ ვერსიახე. ერთია საკუთრივ „ტვიზი“, რომელსაც მყიდველს ორი განსხვავებული კომპლექტაციით (ურბან და ტექნიკ) შესთავაზებენ, მეორე კი - „ტვიზი 45“. სამივე შემთხვევაში, ნახევრად ღია ავტომობილი ორადგილიანია. ამასთან, მგზავრის სავარძელი მძღოლისას უკანაა მოთავსებული (ეგრეთ წოდებული ტანდემ განლაგება).

„ტვიზი 45“ აღჭურვილია 5-ცხენისძალიანი ელექტროძრავით და მას ლითიუმ-იონური აკუმულატორების სრული დამუხტვით, 100 კილომეტრის გავლა შეუძლია. მისი აკუმულატორები საყოფაცხოვრებო შტეპსელიდან 3.5 საათში იმუხტება. ეს პატარა და სუსტი ავტომობილი, რომლის მაქსიმალური სიჩქარეც სულ რაღაც 45 კმ/სთ-ია, 6 990 ევრო ღირს. ოღონდ, მის ფასში აკუმულატორების ფასი არ შედის. მათ ფასს მყიდველი განვადებით, თვეში 45 ევროს გადაიხდის. აღსანიშნავია, რომ „ტვიზი 45-ის“ დაბალი სიჩქარის გამო, მისი მართვისთვის ზოგიერთ ევროპულ ქვეყანაში, მართვის ლიცენზია საჭირო არ იქნება. ამდენად, ის ახალგაზრდა მყიდველისთვის სკუტერის შესანიშნავი, თუმცა ოდნავ უფრო ძვირი და ამასთან გაცილებით უსაფრთხოც, შემცვლელი იქნება.

თითქმის ორჯერ მეტი (80 კმ/სთ) სიჩქარე აქვს „ტვიზი ურბანს“ და „ტვიზი ტექნიკს“, რომლებიც 17-ცხენისძალიანი ელექტროძრავითაა აღჭურვილი. პირველის საბაზო ფასი (აკუმულატორების გარეშე) 7 690 ევროა, მეორისა კი - 8 490 ევრო. ამასთან, მათ მყიდველს, აკუმულატორების ლიზინგი თვეში 49 ევრო დაუჯდებათ.

ონლაინ შეკვეთის მსურველებს, „რენო ტვიზი-ზე“ შეკვეთის განსათავსებლად, მხოლოდ 20 ევროს გაღება მოუწევთ.

„ჰიუნდაი ჯენეზისი“ ჯერჯერობით სრულამძრავიანი არ გამოვა

Hyundai Genesis won't get all-wheel drive until next gen

13 მაისი

ამერიკული გამოცემა „ქარ ენდ დრაივერ“ იტყობინება, რომ „ჰიუნდაი“ ჯერ არ აპირებს თავისი ბიზნეს კლასის სედან „ჯენეზისის“ (ფოტოზე) სრულამძრავიანი ტრანსმისიით აღჭურვას, თუმცა ალბათ, ასეთ სისტემას, ამ ავტომობილის მეორე თაობა მიიღებს, რომელიც ბაზარზე 2014 წელს გამოჩნდება.

ეს კი ნიშნავს, რომ სრულამძრავიან ტრანსმისიას ჯერ ვერც კუპე „ჯენეზისი“ და უფრო დიდი სედანი „ეკუსი“ მიიღებს. სამივე მოდელი, რომლებიც ამერიკის ბაზარზე დიდი პოპულარობით სარგებლობს, მალე ახალ პლატფორმაზე გადავა და მხოლოდ ამის შემდეგ იქნება შესაძლებელი მათზე სრულამძრავიანი ტრანსმისიის დაყენება. ამასთან, მათი ძრავების გამაც, მალე უფრო მძლავრი აგრეგატებით შეივსება.

„ჰიუნდაის“ ამერიკული შტოს მთავარი აღმასრულებელი ჯონ კრაფჩიკი დიდი ხანია, არ მალავს, რომ სედანი და კუპე „ჯენეზისი“, ასევე სედანი „ეკუსი“, ოპციის სახით, აუცილებლად მიიღებენ სრულამძრავიან ტრანსმისიებს. ამიტომ, ბევრი ელოდა, რომ ეს 2012 წელს მოხდებოდა. მაგრამ „ქარ ენ დრაივერის“ ახალი ინფორმაციით, ახლანდელ პლატფორმაზე ეს გარკვეულ სირთულეებთანაა დაკავშირებული.

„ჯენეზისი“ ამერიკაში მოთხოვნადი ავტომობილია, თუმცა მისი გაყიდვების წლიური მოცულობა მაინც ვერ აღწევს 30 000 ცალს. ბაზარზე სრულამძრავიანი ვერსიის გამოსვლის შემდეგ კი, ამ ერთგვარად მაგიური ბარიერის გადალახვა არ გაჭირდება. მაგრამ სამწუხაროდ, სანამ ბაზარზე მეორე თაობის „ჯენეზისი“ გამოვა, მყიდველს მხოლოდ გაძლიერებული ძრავებით, გაუმჯობესებული საკიდარით და უფრო დახვეწილი დიზაინით დაკმაყოფილება მოუწევს.

ამერიკული „ლამბო“ 2000 ცხენის ძალით

Lamborghi Indomable Going Into Production as Mostro Di-Potenza SF22

12 მაისი

კონცეპტუალური სუპერ ავტომობილი, სახელად „ლამბორგინი ინდომეიბლ“, არის დიზაინის მექსიკელი სტუდენტების - დანიელ ჩინჩინელა ოჩოასა და ალბერტო ფერნანდეს ალბილარესის ნამუშევარი, რომელიც მათ „ლამბორგინის“ სპონსორობით 2009 წელს დაამზადეს. მაშინ ბევრს ეგონა, რომ იტალიური კომპანია, მექსიკელების ნამუშევარს ფრთებს შეასხამდა და მწვანე შუქს აუნთებდა. მაგრამ ასე არ მოხდა.

სანტ’აგატა ბოლონეზელებს თავისი გეგმები აქვთ და მათ შესანიშნავად ახორციელებენ. მათი სპონსორობით ჩატარებული სამუშაოთი კი ამერიკული კომპანია „215 რეისინგი“ ისარგებლებს, რომელმაც კონცეპტუალური ავტომობილის შექმნის ლიცენზია შეიძინა და ახლა სწორედ მის რეალიზებაზე ზრუნავს. ოღონდ, რეალურ ავტომობილს სხვა სახელი ექნება - SF22 და მისთვის სპეციალურად, ახალი ბრენდი შეიქმნება, სახელად „მოსტრო დი-პოტენცა“ (იტალიურად ეს ძალის მონსტრს ნიშნავს). მანქანის სახელი ამერიკულ უახლეს სამხედრო თვითმფრინავ F22-თან ასოცირდება. თუმცა, ამ შემთხვევაში, აბრევიატურა სტრიტ ფაიტერს, ანუ ქუჩის მებრძოლს ნიშნავს.

პროექტის შესაბამისად, ავტომობილი კარბონის კომპოზიტით დამზადებულ მონოკოკზე უნდა აიწყოს. ძარაც კარბონის და კევლარის კომპოზიტისგან დამზადდება. სუპერ ავტომობილის გაბარიტებია: სიგრძე 4 460 მილიმეტრი, სიგანე 1 905 მილიმეტრი, სიმაღლე 1 230 მილიმეტრი და ბორბლებს შორის ბაზა - 2 650 მილიმეტრი. რა თქმა უნდა, ძრავი ბაზაში მოთავსდება და ის მამოძრავებელ ძალას უკანა წამყვან ბორბლებს მიაწვდის.

რაც შეეხება ძრავს, ის არის „ჯენერალ მოტორსის“ წარმოების 9.4-ლიტრიანი (!) წყვილ ტურბოკომპრესორიანი V8, რომლის სიმძლავრე 2 000 ცხენის ძალას, მაქსიმალური მაბრუნი მომენტი კი 2 700 ნიუტონმეტრს მიაღწევს. ამ მართლაც მონსტრ ძრავს, რომელსაც მშრალი კარტერი ექნება, 6-საფეხურიანი სეკვენტალური გადაცემათა კოლოფი შეუწყვილდება.

ასეთი ტანდემის დახმარებით, „მოსტრო დი-პოტენცას“ SF22 ადგილიდან 100 კმ/სთ სიჩქარეს 2.5 წამში აკრეფს, დრეგსტერების დისტანციას კი (400 მეტრს) 9,5 წამში დაფარავს. ავტომობილის მაქსიმალური სიჩქარე 426 კმ/სთ-ს მიაღწევს.

„215 რეისინგი“ აცხადებს, რომ ამ ავტომობილს მხოლოდ 50 ცალს დაამზადებს. მასზე შეკვეთების მიღება მერმისს უნდა დაიწყოს. ამასთან, შემკვეთს წინასწარი შესატანის სახით, მხოლოდ 1 000 დოლარის გადახდა მოუწევს. სულ კი, სასურველი ავტომობილის შესაძენად, 950 000 დოლარი იქნება საჭირო.

ახალი „კორვეტი“ შეიძლება შუაძრავიანი გახდეს

Corvette C7 to Be Much Sharper

12 მაისი

მართალია, უკვე დიდი ხანია, რაც „ჯენერალ მოტორსი“ უარყოფს, რომ მისი ახალი „კორვეტი“, რომელსაც სახელად C7 დაერქმევა, ისევ კლასიკური შეთანწყობით მომზადდება, მაგრამ ინტერნეტში ამ დღეებში ისევ გავრცელდა ხმები იმის შესახებ, რომ ამერიკულმა გიგანტმა გადაიფიქრა და რომ ახალი „კორვეტი“ სუპერ ავტომობილებისათვის შესაფერის შეთანწყობას მიიღებს. ეს კი იმას ნიშნავს, რომ C7-ს ძრავი ბაზაში ექნება.

მეექვსე თაობის „ვეტემ“ ევროპულ სუპერ ავტომობილებს სერიოზული კონკურენცია გაუწია. პირველ რიგში ეს მისმა გარეგნობამ და ტექნიკურმა მახასიათებლებმა განაპირობა. და ახლა გენერლებისგან კიდევ ერთი ნაბიჯის წინ გადადგმას ელიან, რაც სწორედ ის იქნება, რომ C7-ს ძრავი ბაზაში ჩაუდგან.

ჰოდა, ინტერნეტით გავრცელებული ინფორმაცია, რომელიც „ჯენერალ მოტორსის“ უცნობ წყაროს იმოწმებს, ამერიკული კომპანიის ხელმძღვანელობა ახლა სწორედ ამ საკითხს განიხილავს. ახალ „კორვეტთან“ დაკავშირებით, გენერლებს დიდი გეგმები აქვთ, რაზეც თუნდაც ის ფაქტი მეტყველებს, რომ 131 მილიონი დოლარი მოხმარდება ბოულინგ გრინის ქარხანას, რომელიც სწორედ „კორვეტის“ წარმოებაზეა სპეციალიზებული.

„შევროლე“ ახალი „კორვეტის“ წარმოებას 2013 წელს დაიწყებს. და „ჯენერალ მოტორსს“ სურს, რომ ამ ავტომობილმა ღირსეული კონკურენცია გაუწიოს სუპერ ავტომობილების ისეთ ლიდერებს, როგორებიც „ფერარი“ და „ლამბორგინია“. ამის შემდეგ, ეს ავტომობილი გლობალური ბაზრის სერიოზული მოთამაშე გახდება.

არსებობს ერთი პრობლემა, რომელიც სასწრაფო გადაწყვეტას საჭიროებს იმ შემთხვევაში, თუ შუაძრავიანი „კორვეტის“ წარმოება გადაწყდება. ეს პრობლემა ძრავს უკავშირდება - ამ ეტაპზე, მსოფლიო ავტოინდუსტრიის მთავარი მიზანი, ცილინდრების რაოდენობის და ლიტრაჟის შემცირებაა. მაგრამ თუ „კორვეტზე“ V6 აგრეგატს დააყენებენ, ამით მისი, როგორც სუპერ ავტომობილის რეპუტაცია შეილახება. ეს კი გენერლებს არაფრად სჭირდებათ. ამიტომ, მათ ახალი V8 ძრავის შემუშავება მოუწევთ, რომელსაც საკმარისი ცხენის ძალები და შედარებით მოკრძალებული აპეტიტი ექნება.

„ჰიუნდაი“ ინდოეთში აქტიურდება

Hyundai Planning 1,000 Outlets in Rural India, New Affordable Model

12 მაისი

წელიწადში გაყიდული ავტომობილების რაოდენობით, „ჰიუნდაის“ ინდურ ბაზარზე მეორე ადგლი უკავია. თუმცა კორეული კომპანია ამას არ სჯერდება და ამ ქვეყნის პროვინციებში კიდევ 1 000 ახალი სადილერო პუნქტის გახსნას და სრულიად ახალი, იაფფასიანი ავტომობილის გამოშვებას აპირებს. ყველაფრის მიზეზი კი ისაა, რომ ინდურ ბაზარზე, გაცილებით მაღალი ტემპით, „ფოლკსვაგენი“ და „ფორდი“ ვითარდებიან.

სააგენტო ბლუმბერგთან საუბრისას, „ჰიუნდაის“ ინდური შტოს დირექტორმა ერვინდ საქსენამ განაცხადა, რომ აზიაში და კონკრეტულად ინდოეთში, მისი კომპანია აქცენტს სწორედ სადილერო ქსელის გაფართოებაზე აკეთებს. ამის მიზეზი ისაა, რომ ინდოეთის პროვინციებში მყიდველუნარიანი მოსახლეობის რაოდენობა იზრდება და საჭიროა, მათთვის ავტომობილების და სერვისის ადგილზევე შეთავაზება.

საქსენას თქმით, აქამდე „ჰიუნდაი“ რეგიონებში მუშაობას დიდ მნიშვნელობას არ ანიჭებდა, თუმცა ახლა, როცა ინდური ეკონომიკა სწრაფად ვითარდება, ავტომობილების შეძენის საშუალება რეგიონების მოსახლეობასაც გაუჩნდა. ამასთან, ქალაქებში გაყიდვების მოცულობის გაზრდა, იქაური ბაზრების გადაჯერების გამო, სულ უფრო რთულდება.

გასული წლის განმავლობაში, „ჰიუნდაიმ“ მსოფლიოს მეორე უდიდეს ქვეყანაში (მოსახლეობის რაოდენობით) გაყიდვები მნიშვნელოვნად გაზარდა, თუმცა ეს ზრდა, „ფორდის“, „ფოლკსვაგენის“ და „ტოიოტას“ გაყიდვების ზრდაზე თითქმის ორჯერ ნაკლებია.

საქსენა ასევე ამბობს, რომ „ჰიუნდაი“ ინდური ბაზრისთვის იაფფასიან მოდელს შეიმუშავებს, რომლითაც კონკურენციას „მარუტი სუძუკის“ სუბკომპაქტურ ჰეჩბეკ „ალტოს“ გაუწევს. ამ ავტომობილის ფასი დაახლოებით 290 ათასი ინდური რუპიაა (დაახლოებით 6 500 დოლარი) და „ჰიუნდაის“ ახალი ავტომობილის ფასის ორიენტირიც სწორედ ესაა.

გარდა ამისა, კორეული კომპანია ინდოეთში ყოველწლიურად ორ ახალ ავტომობილს წარადგენს. თუმცა, მის გეგმებში, მსოფლიოს უიაფესი ავტომობილის - „ტატა ნანოს“ კონკურენტის გამოშვება არ შედის. ახლახანს, „ჰიუნდაიმ“ ინდურ ბაზარზე თავის პოპულარულ სედან „ვერნას“ (ფოტოზე) ახალი ვერსია წარადგინა.

2010 ფისკალური წლის განმავლობაში, „ჰიუნდაიმ“ ინდოეთში 358 904 ავტომობილი გაჰყიდა, წელს კი გაყიდვების 14 პროცენტით გაზრდას და დაახლოებით, 400 000 ავტომობილის რეალიზებას გეგმავს.

„დელტა E-4“ - ბრიტანული სპორტული ელექტრომობილი

Electric 150mph Delta E-4 Coupe Launched

12 მაისი

სანამ დიდი ავტოკომპანიები ელექტრომობილების მასობრივად წარმოებისთვის ემზადებიან, საავტომობილო ბაზარზე არაერთი ისეთი, მანამდე უცნობი კომპანია გამოჩნდა, რომლებმაც მყიდველს საკუთარი ელექტრომობილი შესთავაზა. ახლახანს კიმათს რიგებს ბრიტანული საინჟინრო კომპანია „დელტა მოტორსპორტი“ შეუერთდა, რომელმაც სილვერსტოუნის ავტოდრომზე თავისი პირმშო - „E-4 კუპე“ წარადგინა.

სპორტული ელექტრომობილის შექმნაში მონაწილეობა ოქსფორდის უნივერსიტეტის სპეციალისტებმაც მიიღეს. თავიდანვე, მიზნად იქნა დასახული, რომ ავტომობილის შასი მაქსიმალურად მსუბუქი გამოსულიყო, რათა აკუმულატორების ჭარბი წონა დაბალანსებულიყო. შასი „დელტამ“ შეიმუშავა და მისი შეკვეთით, „KS კომპოზიტსმა“ დაამზადა. კარბონის კომპოზიტის წყალობით, მისი წონა მხოლოდ 85 კილოგრამია, რაც იმავე გაბარიტების მქონე ფოლადის შასიზე დაახლოებით 66 პროცენტით მსუბუქია. რაც მთავარია, შასი სრულად შეესაბამება უსაფრთხოებაზე ევროპულ მოთხოვნებს.

ოქსფორდელებმა მონაწილეობა ელექტროძრავების შემუშავებაში მიიღეს. მათი გარჯის შედეგად, ძრავი მხოლოდ 23 კილოგრამს იწონის. ის 120 ცხენის ძალას და 600 ნიუტონმეტრს იძლევა. მათ ლითიუმ-იონური ელემენტების ბლოკი კვებავს, რომელიც ავტომობილის ძირშია მოთავსებული.

„დელტა“ თავის ელექტრომობილს ორი ვერსიის სახით დაამზადებს. ერთია „ეკო“, მეორე კი - „სპორტი“. „ეკო“ ვერსია ორი ელექტროძრავით აღიჭურვება, აკუმულატორების ტევადობა კი 32 კილოვატსაათი იქნება. ამ შემთხვევაში, ავტომობილი ადგილიდან 100 კმ/სთ სიჩქარეს 6.5 წამში განავითარებს, მისი მაქსიმალური სიჩქარე 185 კმ/სთ-ს მიაღწევს, სვლის სიშორე კი - 224 კილომეტრს.

მეორე შემთხვევაში, ყოველ ბორბალს თითო ეექტროძრავი მოემსახურება. მათ შორის კავშირი უსაფეხურო იქნება. აკუმულატორების ტევადბა ამ შემთხვევაში 48 კილოვატსაათამდე გაიზრდება. სპორტული „E-4 კუპე“ ადგილიდან ასს 4 წამში აკრეფს, მისი მაქსიმალური სიჩქარე 241 კმ/სთ-ს მიაღწევს, სვლის სიშორე კი 320 კილომეტრამდე გაიზრდება.

„დელტას“ ელექტრომობილი პირველად საზოგადოების წინაშე 5 ნოემბერს წარსდგება, მეორე დღეს კი მონაწილეობას მიიღებს მომავლის ავტომობილების გარბენში, რომელიც სტარტს ლონდონში აიღებს და 100 კილომეტრის შემდეგ, ბრაიტონში დასრულდება.

„დელტა“ ჯერჯერობით თავისი ელექტრომობილის ფასს არ აქვეყნებს. მის წარმოებას კი, სავარაუდოდ, მერმისს დაიწყებს.

პუტინს რუსული ჯართი აჩვენეს

12 მაისი

ჩვენი ჩრდილოელი მეზობლის პრემიერ მინისტრი პუტინი, თავისი ქვეყნის მანქანათმშენებლების კავშირის ყრილობას დაესწრო, რომელიც ქალაქ ტოლიატიში გაიმართა. ყრილობის შემდეგ, მან ახალი იაფფასიანი სედანის, „ლადა გრანტას“ ნახვა და მისი ტესტირება მოისურვა, თუმცა ძნელი წარმოსადგენია, ამით კმაყოფილი დარჩენილიყო.

რატომღაც, მანქანის დათვალიერება მან საბარგულით დაიწყო. მისი გახსნა პირველ ცდაზე ვერც მოახერხა... თანმხლებთა დახმარების შემდეგ, ის გახსნეს. პრემიერმა იხტიბარი არ გაიტეხა და საბარგულის მოცულობა მოიწონა - ორ ტომარა „კარტოშკას“ იოლად დაიტევსო (ესე იგი, თვითონაც ჩაეტევა).

შემდეგ ის საჭეს მიუჯდა და რა თქმა უნდა, დაქოქვა მოინდომა, მაგრამ მანქანა გაჯიუტდა. რამდენჯერმე გადაატრიალა გასაღები, მაგრამ „გრანტას“ ხმა არ ამოუღია. მერე ქარხნის წარმომადგენლებმა მანქანას ჯადოსნური სიტყვები უთხრეს და ისიც დაიქოქა. გახარებულმა პუტინმა გონს მოსული ოთხბორბალა ქარხნის სატესტო ტრეკზე გააგელვა.

უკან მობრუნებულს ჰკითხეს, ასეთი მანქანით შორეულ მოგზაურობას თუ გარისკავდა, რაზეც უპასუხა, რომ ეს მანქანა აგარაკზე გასვლებისთვისაა კარგიო. „კალინა“ კი უფრო ძლიერიაო (აბა, ხომ არ იტყოდა, ისიც კარგი ნაგავიაო). ვინც არ იცით: ორი წლის წინ, პუტინმა „ლადა კალინათი“ ციმბირში საჩვენებელი განავარდება მოაწყო. მის კორტეჟს, დაცვასთან ერთად, სატვირთო ავტომობილი მიჰყვებოდა, რომელსაც კიდევ ორი „კალინა“ მიჰქონდა. სამივე „კალინა“ ყვითლად იყო შეღებილი და როგორც ამბობენ, „ძლევამოსილმა“ პრემიერმა „ბედაური“ რამდენჯერმე გამოიცვალა. რატომ? იმიტომ, რომ „კალინა“ ხშირად ფუჭდებოდა...

რა თქმა უნდა, „გრანტას“ სიჯიუტის გამო, ქარხნის მესვეურებს თავის მართლებამ მოუწია. მათ განმარტეს, რომ მანქანას გაზის ელექტრონული სატერფული აქვს. დაქოქვისას, პრემიერი გაზს აწვებოდა, რაც არ უნდა ექნაო...

ცნობისათვის, „კალინა“ და „გრანტა“ მართლა ერთი ნაგავია. მეორე პირველის ბაზაზეა შექმნილი და მისი იაფფასიანი ვერსიაა. მისი წარმოება ოქტომბერში უნდა დაიწყოს...

ელექტრომობილების სარბოლი სერია მალე სტარტს აიღებს

Quietest Race Ever: EV Cup Launches First All-Electric Racing Series

12 მაისი

სარბოლი ნისან ლიფი

..............................

როგორც ამბობენ, რბოლები ავტომობილების განვითარებას უწყობს ხელს. და თუ ასეა, რა შეუწყობს ხელს ახალი ტიპის ავტომობილებს, როგორებიცაა ელექტრომობილები? რა თქმა უნდა, რბოლები! თუმცა, ალბათ ეს მიზანი არ ამოძრავებთ ახალი, სარბოლი ელექტრომობილების თასის ორგანიზატორებს, რომლებიც ამ ტიპის მანქანების პირველ ჩემპიონატს სტარტს 6 აგვისტოს მისცემენ.

ელექტრომობილების პირველი ჩემპიონატის კალენდარში სულ 7 ეტაპია შეტანილი, რომელთაგან ოთხი ბრიტანეთში ჩატარდება, ერთი ბელგიაში და ორიც - ამერიკაში. ფორმულა ერთის მსგავსად, ელექტრომობილების პირველი ჩემპიონატიც სტარტს სილვერსტოუნზე აიღებს. ბრიტანული ტრასებიდან, ამ სერიის რბოლებს ასევე სნეტერტონი, ბრენდს ჰეჩი და როკინგემი უმასპინძლებს, ბელგიაში რბოლა ცოლდერზე ჩატარდება, ამერიკაში კი - ლაგუნა სეკასა და კალიფორნია სპიდუეიზე.

უესტფილდ iრეისერი

..............................

ჩემპიონატი სამი კლასის ავტომობილებს შორის ჩატარდება. მათგან პირველია ეგრეთ წოდებული საქალაქო კლასი, რომელიც ნორვეგიულ კომპანია „თინკ სიტის“ პატარა ელექტრომობილებს შორის ჩატარდება. ეს ავტომობილი 50-ცხენისძალიანი ელექროძრავითაა აღჭურვილი, რომლის მეშვეობითაც, მაქსიმუმ 136 კმ/სთ სიჩქარეს ავითარებს და მას ერთი სრული დამუხტვით, 160 კილომეტრის გავლა შეუძლია.

მეორე კლასი „სპორტულია“ და მასში რბოლები კიტქარების მწარმოებელ ბრიტანულ კომპანია „უესტფილდის“ ავტომობილებით (iრეისერ) ჩატარდება. ეს ავტომობილი წყვილი ელექტროძრავითაა აღჭურვილი, რომლებიც უკანა წამყვან ბორბლებს (თითო ძრავი თითო ბორბალზე) ამოძრავებს. მათი ჯამური სიმძლავრე 260 ცხენის ძალაა. მწარმოებლის მონაცემებით, ავტომობილს ადგილიდან 100 კმ/სთ სიჩქარის აკრეფა 5 წამზე ნაკლებში შეუძლია. მისი მაქსიმალური სიჩქარე კი 184 კმ/სთ-ია. ოღონდ, ის შეზღუდულია, რათა აკუმულატორებში დაგროვილი ენერგიის გადახარჯვა არ მოხდეს. „უესტფილდის“ მონაცემებით, მათს სარბოლ ელექტრომობილს, ერთი სრული დამუხტვით, სარბოლი რეჟიმით მოძრაობისას, დაახლოებით 50 კილომეტრის გავლა შეუძლია.

თინკ სიტი

..............................

მესამე კლასში სპორტული პროტოტიპები შევა. ამ კლასში, მასის და სიმძლავრის არანაირი შეზღუდვა არ დაწესდება, გამარჯვებულები კი, რბოლის დროს ნაჩვენები საუკეთესო დროის შესაბამისად გამოვლინდება. რბოლა კი ეგრეთ წოდებული ტაიმ ტრაიალის პრინციპით (როგორც საგზაო ველოსპორტშია) ჩატარდება - ავტომობილები დისტანციაზე ერთმანეთის მიყოლებით, გარკვეული ინტერვალით გავა. სავარაუდოდ, ამ კლასში მონაწილეობას, „ნისანის“ ელექტრომობილ „ლიფის“ მოდერნიზებული ვერსია მიიღებს.

დაბოლოს, მაყურებლის და სპონსორების მოსაზიდად, თასის ორგანიზატორები ცნობილ ავტომრბოლებს იწვევენ. მათ შორის ერთ-ერთი პირველი, ვინც შეთავაზებაზე თანხმობა განაცხადა, ფორმულა 1-ის 1996 წლის ჩემპიონი, ბრიტანელი დეიმონ ჰილია.

კომპოზიტური ძრავები - ჩამავალი მზის ბოლო გაბრწყინება

Plastic Fantastic: Are composite engines the future?

10 მაისი

მსოფლიო საავტომობილო ინდუსტრია მასობრივი ელექტრიფიკაციის გზას დაადგა. მალე შიდაწვისძრავიანი ავტომობილები ისეთივე ეგზოტიკა იქნება, როგორებიც დღეს ორთქმავლები და იალქნიანი გემებია. მაგრამ ამის მიუხედავად, ავტომწარმოებლები მაინც ცდილობენ შიდაწვის აგრეგატების განვითარებას და დახვეწას.

დღეს, ჰიბრიდული და ალტერნატიული აგრეგატების შემუშავების და განვითარების პარალელურად, ავტომწარმოებლები საწვავის დაზოგვას, ავტომობილების წონის შემცირებითაც ცდილობენ. ავტომობილში კი ერთ-ერთი ყველაზე მძიმე ნაწილი, ძრავის ბლოკია, რომელიც უმეტეს შემთხვევაში, თუჯისგან მზადდება. საკმაოდ ხშირად, ბლოკებს ალუმინისგანაც ამზადებენ, თუმცა ეს საკმაოდ რთულია.

ფლორიდელმა ინჟინერმა მატი ჰოლტცბერგმა ჯერ კიდევ ოთხი ათეული წლის წინ დაიწყო ფიქრი იმაზე, თუ როგორ გაეკეთებინა პლასტიკატისგან, უფრო კონკრეტულად კი, კომპოზიციური მასალისგან ძრავი. სხვათა შორის, იმ დროს კარბონის კომპოზიტს ავიაციასა და ფორმულა 1-შიც თითქმის არავინ იყენებდა. შემდეგ, ეს მასალა შეუცვლელი გახდა სარბოლი ავტომობილების წარმოებისას და ახლახან, „ბოინგმა“ მისგან თავისი უახლესი ლაინერების ფიუზელაჟების წარმოებაც კი დაიწყო...

რამდენიმეწლიანი მუშაობის შემდეგ, 1979 წელს, ბატონმა ჰოლტცბერგმა საკუთარი კომპანია „პოლიმოტორი“ შექმნა და იმავე წელს, პირველი აგრეგატი - „ფორდ პინტოს“ ძრავის კლონი დაამზადა. ძრავის ბლოკი, ისევე როგორც დგუშების კალთები და მათი თითები, კარტერი და ცილინდრების თავის დიდი ნაწილი, პლასტიკისგან იყო დამზადებული. რა თქმა უნდა, მოხახუნე ზედაპირები, წვის კამერა და მისი მომიჯნავე ნაწილები, ფოლადისგან იყო დამზადებული. ორ წელიწადში, „პოლიმოტორის“ პლასტიკური აგრეგატის სიმძლავრემ 300 ცხენის ძალას მიაღწია.

შემდეგ წლებში, კომპანიამ პროფილი შეინარჩუნა და ასე განსაჯეთ, თავისი პლასტიკური ძრავებით, სარბოლ გუნდებსაც კი ამარაგებდა. თუმცა, ბაზარს მისთვის ყურადღება თითქმის არც მიუქცევია. მაგრამ ამის გამო, ჰოლტცბერგმა ყურები არ ჩამოუშვა და ისეთი ძრავის შემუშავება გადაწყვიტა, რომელსაც ბაზარი მიიღებდა. ის ექსპერიმენტებს ფენოლის ფისისგან დამზადებულ დეტალებზე ატარებდა. დღეს კი ის ირწმუნება, რომ პლასტიკი, კონკრეტულად კი კომპოზიციური მასალები, მზადაა ძრავების მასობრივი წარმოებისთვის. ამ მასალის დახმარებით, ძრავები 30-35 პროცენტით შემსუბუქდება, შემცირდება მათ შემუშავებაზე გაწეული ხარჯები და საწარმოო ხარჯები.

არსებობს ორი პრობლემა, რომლებსაც პლასტიკატის ძრავების დამკვიდრებისთვის ხელის შეშლა შეუძლია. ჯერ ერთი, მათი მეორადი გადამუშავება ძვირიც დაჯდება და თანაც, მას მეტი დროც დასჭირდება. მეორეც, კომპოზიტის შემავსებელი ფისები ნავთობისგან მზადდება, ეს ორგანული ნივთიერება კი ამოწურვადიცაა და თანაც, თანდათან ძვირდება...

„ფოლკსვაგენი“ პლაგ-ინ ჰიბრიდების გამოშვებას იწყებს

Volkswagen Announces Introduction of Plug-in Hybrids in 2013

9 მაისი

„ფოლკსვაგენის“ ჯგუფის დირექტორთა საბჭოს თავმჯდომარე მარტინ წინტერკორნმა გამოაცხადა, რომ მის ჯგუფში შემავალი კომპანიები რამდენიმე მნიშვნელოვანი მოდელის პლაგ-ინ ჰიბრიდული ტექნოლოგიებით აღჭურვილი ვერსიების გამოშვებას 2013 წელს დაიწყებს.

„მალე ელექტრომობილი, ინდივიდუალური გადაადგილების ყველაზე გავრცელებული საშუალება გახდება და ამ საქმეში ჩამორჩენას არ ვაპირებთ - „ფოლკსვაგენი“ ამ ტექნოლოგიებს ითვისებს. უახლოეს პერიოდში, პლაგ-ინ ჰიბრიდული სისტემა ელექტრიფიკაციის გზაზე საუკეთესო გამოსავალია, რადგან ის ორი ეპოქის საუკეთესო თვისებებს აერთიანებს“, - ამბობს ვინტერკორნი.

მას არ დაუკონკრეტებია, თუ რომელი მოდელების აღჭურვა იგეგმება პლაგ-ინ სისტემებით. ვოლფსბურგელებმა ამგვარი სისტემები აქამდე მხოლოდ ორ ავტომობილზე - „გოლფის“ ბაზაზე შექმნილ „ტვინდრაივ პლაგ-ინსა“ (ფოტოზე) და „აუდი A5 e-ტრონზე“ გამოიყენეს.

პლაგ-ინ ჰიბრიდელი სისტემა ავტომფლობელებს იმაზე უკეთეს მახასიათებლებს სთავაზობს, ვიდრე ელექტრომობილი. ჯერ ერთი, მეტია სვლის სიშორე, ავტომობილს უკეთესი დინამიკური მახასიათებლები აქვს, ადვილად ადის აღმართებზე და რაც არანაკლებ მნიშვნელოვანია, შედარებით სუფთა გამონაბოლქვიც აქვს. ეს კი მალე ევროპულ ბაზარზე მომუშავე მწარმოებლებისთვის, გადამწყვეტი ფაქტორი გახდება.

ვინტერკორნი თავისი განცხადებით ვენის მოტორ სიმპოზიუმზე გამოვიდა, სადაც „ფოლკსვაგენმა“ ორი უახლესი ძრავი წარადგინა. ესენია 1.4-ლიტრიანი TSI მოტორ E85 და 2.0-ლიტრიანი TDI. გერმანულ კომპანიას ამ ორი აგრეგატის ტექნიკური მახასიათებლები არ დაუკონკრეტებია, თუმცა ირწმუნება, რომ ორივე ატმოსფეროს ძალიან მცირე ოდენობის ნახშირორჟანგით დააბინძურებს.

სხვათა შორის, ახლახანს გერმანიის კანცლერმა ანგელა მერკელმა გერმანული ავტოკომპანიების ხელმძღვანელებს გააცნო ქვეყნის მთავრობის გეგმა, რომლის მიხედვითაც, გერმანიაში 2020 წელს მილიონი ელექტრომობილი უნდა დადიოდეს. ამ მიმართულებით, მწარმოებელთა წასახალისებლად კი მილიარდობით ევრო დაიხარჯება.

„კონტინენტალი“ ფეხით მოსიარულეებზე ზრუნავს

Continental developing stereo cameras to cut down pedestrian injuries

9 მაისი

საავტომობილო საბურავების და მაკომპლექტებელი ნაწილების მწარმოებელმა გერმანულმა კომპანია „კონტინენტალმა“, უსაფრთხოების ახალი სისტემა (კონტიგარდ) შეიმუშავა, რომელიც ფეხით მოსიარულეთა უსაფრთხოების გასაზრდელადაა განკუთვნილი. ის დამოუკიდებლად აღმოაჩენს მძღოლისთვის უხილავ ზონაში მყოფ ფეხმავალს და საჭიროების შემთხვევაში, მანქანის დამუხრუჭებასაც უზრუნველყოფს.

„კონტინენტალის“ მიერ გავრცელებულ რელიზში ხაზგასმულია, რომ გერმანიაში მომხდარი საგზაო შემთხვევების დაახლოებით ნახევარი, ფეხმავალთა ტრავმირებას, ან დაღუპვას იწვევს. ესაა ერთ-ერთი მიზეზი იმისა, რომ ევროპაში, ავტომობილების უსაფრთხოებაზე ტესტირებისას, ხუთვარსკვლავიანი შეფასება ავტომობილს არ ეძლევა, თუ ის ფეხმავლების უსაფრთხოების სისტემებითაც არაა აღჭურვილი.

„ჩვენს მიერ შემუშავებული ახალი სისტემები, რომლებიც ავარიების თავიდან აცილებისთვისაა მოწოდებული, ნებისმიერ სიტუაციაში, სახიფათო სიტუაციებისას, მძღოლს სერიოზულ დახმარებას გაუწევს. ამიტომ, ჩვენ ვეძებთ ახალ საშუალებებს, რომლებიც ავტომობილის გარშემო არსებული სივრცის მონიტორინგის საშუალებას მოგვცემს“, - „კონტინენტალის“ შასის და უსაფრთხოების დივიზიონის პასიური უსაფრთხოების განყოფილების შეფი ანდრეას ბრანდი.

„კონტინენტალის“ ახალი სისტემა ორი კამერისგან მიერ მიღებულ გამოსახულებებს სტერეო რეჟიმში აღიქვამს და რაც მთავარია, თვალთახედვის არეში მოძრავ ფეხმავლებს აფიქსირებს, რომლებსაც შესაძლოა, მძღოლი ვერც ხედავდეს. ამასთან, მათი გადაადგილების მიმართულებასა და სიჩქარესაც განსაზღვრავს. და თუ სისტემა განსაზღვრავს, რომ ფეხმავალი შეიძლება მანქანის წინ მოულოდნელად აღმოჩნდეს, მაშინ ის მძღოლისგან დამოუკიდებლად აჩერებს მანქანას.

ვიდეოკამერები ფეხმავალს მარტო კი არ აფიქსირებენ, არამედ მის სიმაღლესა და სიშორესაც საზღვრავენ. სხვათა შორის, ერთ კამერას ადამიანის დაფიქსირება დამოუკიდებლად, რა თქმა უნდა, შეუძლია, მაგრამ მანძილსა და მის სიმაღლეს ზუსტად ვერ დაადგენს.

სისტემა სხვა ვარიანტებსაც ითვალისწინებს. მაგალითად, ფეხმავალი მეტისმეტად ახლოსაა და ინტენსიური დამუხრუჭების შემთხვევაშიც კი, მასთან შეჯახება გარდაუვალია. ამ შემთხვევაში, სისტემის ვიდეოკამერები მოსალოდნელი ინციდენტის არეალს აფიქსირებენ, ელექტრონული ტვინი კი განსაზღვრავს, რა მანევრი უნდა შეასრულოს, რომ შეჯახება თავიდან აირიდოს. ანუ, მას საჭის მექანიზმის კონტროლიც შეუძლია.

სისტემა „კონტიგარდი“ ჯერ შემუშავების სტადიაშია, თუმცა მას ახლავე შეუძლია იმ ოპერაციების შესრულება, რომლებზეც ზემოთ მოგიყევით. ასე რომ, შორს არც ის დროა, როცა მას სერიული ავტომობილების მწარმოებლებიც გამოიყენებენ.

„ბეემვე“ მალე ჰიბრიდული X5-ის გაყიდვას დაიწყებს

BMW X5 ActiveHybrid

9 მაისი

ინტერნეტ ჟურნალ „ავტობლოგის“ ჰოლანდიური შტო ავრცელებს ინფორმაციას, რომლის თანახმადაც, ამ წლის ბოლოს, „ბეემვე“ თავის პოპულარულ უგზოობის მოდელ X5-ის ჰიბრიდული ვერსიის გაყიდვას დაიწყებს.

ამ ავტომობილს უკვე დასრულებული აქვს საგზაო ტესტების სრული კურსი, თუმცა მის შესახებ ბავარიელები ინფორმაციას ჯერ პრაქტიკულად არ ავრცელებენ. თუმცა, მათი მიერ ბოლო ორ წელიწადში წარმოდგენილი კონცეპტუალური ჰიბრიდების (სერია ექტივჰაივრიდ) მიხედვით, ახალ ავტომობილზე ზოგადი წარმოდგენის შექმნა შეიძლება.

X5-ის ჰიბრიდული ვერსია აღიჭურვება ძალური სისტემით, რომელშიც დიზელის ძრავი, ელექტროძრავი და ლითიუმ-იონური ელემენტების კომპაქტური ბლოკი შევა. ამ ავტომობილის და მისი აგრეგატების ტექნიკური მონაცემები არ გამოქვეყნებულა. სამაგიეროდ ცნობილია, რომ 2008 წლის ჟენევის ავტო შოუზე წარდგენილი კონცეპტუალური ჰიბრიდი, 204-ცხენისძალიანი ტურბოდზელისა და ელექტროძრავის კომბინირებული სისტემითაა აღჭურვილი. ავტომობილს 100 კილომეტრის გასავლელად, 6.5 ლიტრი საწვავი სჭირდება და ყოველი კილომეტრის გავლისას, ის ატმოსფეროს 170 გრამი ნახშირორჟანგით აბინძურებს.

ჰიბრიდული X5-ის წარმოებას ბავარიელები მალე დაიწყებენ, მისი მსოფლიო პრემიერა კი, სავარაუდოდ, ფრანკფურტის ავტო შოუზე (სექტემბერში) გაიმართება. მაშინვე წერტილი დაესმება ყველა ვარაუდს და გერმანული კომპანია, ამ ავტომობილის შესახებ, ფასის გარდა, ყველა ინფორმაციას გამოაქვეყნებს. ფასი კი გაყიდვების დაწყებამდე ცოტა ხნით ადრე გამოქვეყნდება.

ცნობისათვის, შანჰაის ავტო შოუზე, „ბეემვემ“ სპეციალურად ჩინური ბაზრისთვის მომზადებული ჰიბრიდული მე-5 სერიის სედანის პროტოტიპის პრემიერა ჩაატარა. ეს ავტომობილი 215-ცხენისძალიანი ტურბოძრავით და 94-ცხენისძალიანი ელექტროძრავითაა აღჭურვილი. ელექტროძრავს ენერგიით ლითიუმ-იონური ელემენტების ბლოკი ამარაგებს, რომელიც საბარგულის ქვეშაა მოთავსებული. მასში დაგროვილი ენერგია კი საკმარისია იმისათვის, რომ ავტომობილმა მარტო ელექტროძრავით, შეუჩერებლად 70 კილომეტრზე მეტი გაიაროს. ამასთან, მისი მაქსიმალური სიჩქარე ამ დროს მხოლოდ 60 კმ/სთ იქნება.

„დე ტომაზო“ ახალ „პანტერას“ სადებიუტოდ ამზადებს

De Tomaso Pantera Caught Exiting Factory

7 მაისი

უკვე წელიწადზე მეტია, დასავლურ საავტომობილო პრესაში, პერიოდულად ჩნდება ინფორმაცია იტალიურ კომპანია „დე ტომაზოს“ შესახებ, რომელიც იტალიელმა ბიზნესმენმა მარიო როსინიოლომ აღადგინა. რამდენიმე თვის წინ, „დე ტომაზომ“ თავისი პირველი ახალი ავტომობილი - ქროსოვერი „დიუვილი“ გვიჩვენა, თუმცა ამ ბრენდისგან პირველ რიგში, „პანტერას“ ელიან, ავტომობილს, რომელმაც გასული საუკუნის 70-იან წლებში, მას სახელი გაუთქვა.

ახალი „პანტერას“ შესახებ ჯერ არაფერია ცნობილი, თუმცა ახლახანს, ინტერნეტპორტალ „იუთუბიზე“ გამოჩნდა ვიდეოსიუჟეტი, რომელზეც სავარაუდოდ, სწორედ „პანტერა“ უნდა იყოს ასახული. ჯერ ერთი, ის „დე ტომაზოს“ გრულიასკოს ქარხნიდან გამოდის და მეორეც, აშკარად არ ჰგავს ქროსოვერს. უფრო მეტიც, ის ორადგილიანი სპორტული ავტომობილია და მისი ბოხი ხმითაც თუ ვიმსჯელებთ, აშკარად სუპერ ავტომობილი უნდა იყოს...

რა თქმა უნდა, ინკოგნიტო სპორტსმენი შენიღბულია, შავადაა შემოსილი და თან ისე, რომ მისი საბოლოო გარეგნობის შესახებ, მხოლოდ ზოგადი წარმოდგენის შექმნა იყოს შესაძლებელი. თუმცა, ამ სახით მისი ნახვაც საკმარისია იმისათვის, რომ ვივარაუდოთ - საქმე გვაქვს ჯიშიან ავტომობილზე, როგორსაც თავისუფლად შეუძლია, რომ კონკურენცია თვით „ფერარის“ და „ლამბორგინის“ გაუწიოს.

ოღონდ, ამისათვის აუცილებელია, რომ აღჭურვილობაც გარეგნობის შესაფერისი ჰქონდეს. და ეს რომ ასეა, ამაზე მისი ბოხი, აგრესიული ხმაც მეტყველებს, რომლის მიხედვითაც შეიძლება ვთქვათ, რომ ამ მხეცს კაპოტქვეშ მძლავრი და სრულყოფილი აგრეგატი უნდა ედგას.

დადასტურებული არაა, თუმცა ინტერნეტით გავრცელებული ინფორმაციის შესაბამისად, ისევე როგორც ძველი „პანტერა“, ახალი მხეციც „ფორდის“ წარმოების V8 ძრავით აღიჭურვება. ოღონდ, თუ ძველის სიმძლავრე 330 ცხენის ძალა იყო, ახლისა დაახლოებით 550 ცხენის ძალის ფარგლებში იქნება. ეს კი თითქმის იმდენივეა, რაც „აუდის“ R8-ს V10 აგრეგატის სიმძლავრე.

როსინიოლოს გეგმაში „დე ტომაზოს“ პრემიუმ სეგმენტის კომპანიად ჩამოყალიბება შედის. სუპერავტომობილის (დიდი ალბათობით, მას სწორედ პანტერა დაერქმევა) გარდა, ეს გეგმა მდიდრული ქროსოვერის (ქროსოვერ/კუპეს) და ლუქსის კლასის სედანის წარმოებასაც ითვალისწინებს. ქროსოვერი პირველად ჟენევის გამოფენაზე უკვე გვეჩვენა. ახლა კი „პანტერას“ ჯერი მოდის და სავარაუდოდ, პირველად მას ნოემბერში, ლოს ანჯელესის ავტო შოუზე ვიხილავთ.