”ნორსტერ 600R” - კვადროციკლი სპორტქარის თვისებებით

Norster 600R, the Heavy Quadricycle Small Sports Car

5 სექტემბერი

იყო დრო, როცა პატარა და ხელმისწვდომი ინგლისური სპორტული ავტომობილი, სახელად ”ოსტინ-ჰილი სპრაიტი” ბევრ ძვირადღირებულ კუპეს დინამიკური მახასიათებლების მხრივ, ტოლს არაფერში უდებდა. ამ მანქანას დახვეწილი გარეგნობა არ გამოარჩევდა, თუმცა გზებზე ყურადღებას მაინც იქცევდა. და, რა თქმა უნდა, ფანებიც ბლომად ჰყავდა.
მაგრამ გავიდა ათწლეულები და თავგამოდებული კოლექციონერების გარდა, ეს ავტომობილი არავის გახსენებია. თუმცა, ამ ნაკლის გამოსწორებას ფინური კომპანია ”ნორსტერი” ცდილობს, რომლის ინჟინრებმაც კვადროციკლის ტიპის შასიზე, რომელსაც ძრავი ბაზაში აქვს განლაგებული, ნამდვილი სპორტული კუპე შექმნეს, სახელად ”ნორსტერ 600R”. თუნდაც, ჯუჯა ზომებით, მაგრამ ეს არის სპორტული ავტომობილი, რომელსაც მძღოლისთვის დიდი სიამოვნების მინიჭება შეუძლია.
”ნორსტერ 600R” ფინეთში შეიმუშავეს, მაგრამ მას ჩინეთში უშვებენ. ეს კი იმისათვის კეთდება, რომ ”ოსტინ-ჰილის” ტრადიცია გაგრძელდეს და ორადგილიანი ავტომობილი ხელმისაწვდომი იყოს. დაკიდევ, ამ ავტყომობილის მართვა მძღოლის სტანდარტული ლიცენზიითაც შესაძლებელია.
ევროკავშირის ფარგლებში, ”ნორსტერ 600R” დარეგისტრირებულია, როგორც კვადროციკლი, თუმცა მისი მართვა ზუსტად ისევე ხდება, როგორც ჩვეულებრივი ავტომობილისა - საჭის რგოლით. ავტომობილის მზიდი ტანი ფოლადის მილებისგან შეკრულ ჩაჩოს წარმოადგენს, რომელზეც შუშის ბოჭკოს კომპოზიტისგან დამზადებული ძარაა დამაგრებული. კარებები ”ლამბორგინის” სტილში, ქვევიდან ზევით და უკნიდან წინ იხსნება.

ინტერნეტ გამოცემა ”ავტობლოგის” ინფორმაციით, ”ნორსტერ 600R” ჩინურ კომპანია ”ჩერის” მოდელ ”აცტეკოს” 580-კუბურსანტიმეტრიანი ძრავითაა აღჭურვილი, რომელიც ძრავის მუხლა ლილვის 5 500 ბრ/წთ-ზე მაქსიმუმ 34 ცხენის ძალას იძლევა. ძრავს ორი ცილინდრი და ამდენივე გამანაწილებელი ლილვი აქვს, მის ყოველ ცილინდრს კი ოთხი სარქველი ემსახურება. ძრავთან 5-საფეხურიანი გადაცემათა კოლოფია შეწყვილებული. მათი წყალობით, ”ნორსტერ 600R” გამონაბოლქვზე ევრო-4 ნორმას აკმაყოფილებს.

”ნორსტერ 600R” სულ რაღაც 520 კილოგრამს იწონის, სუსტი ძრავი კი საკმარისია იმისათვის, რომ მაქსიმალური სიჩქარე 90 კმ/სთ იყოს. მეტს ეს ძრავი ვერ ერევა. სამაგიეროდ, 100 კილომეტრის გასავლელად ის მხოლოდ 5 ლიტრ ბენზინს მოიხმარს.

საიუბილეოდ, ”იაგუარი” სტილს შეიცვლის

Jaguar concept to reveal future sports-car styling

5 სექტემბერი

რა თქმა უნდა, სტილის შეცვლა ერთ დღეში შეუძლებელია. თუმცა, მთავარი ისაა, რომ ინგლისური კომპანია, რომელსაც წელს დაარსებიდან 75 წელი შეუსრულდა, პარიზის ავტო შოუზე წარადგენს კონცეპტუალურ ავტომობილს, რომელმაც მისი ახალი კორპორატიული სტილი უნდა განსაზღვროს.

ინტერნეტ გამოცემა ”აუტო უიკის” მიერ გავრცელებული ინფორმაციით, კონცეპტუალური ავტომობილი, რომლის სახელიც ჯერ უცნობია, დაახლოებით კუპე XK-ს ზომის, ორკარიანი იქნება. ამასთან, მისი დანახვისას, ეჭვიც არავის შეეპარება იმაში, რომ ეს ლეგენდარული ”იაგუარების” შთამომავალია. ამის დასტური იქნება თუნდაც ის, რომ ავტომობილს რადიატორის ოვალური ბადე ქნება, რაც ლეგენდარულ მოდელ E-ტაიპისთვის იყო დამახასიათებელი.

”აუტო უიკის” ცნობით, კონცეპტუალური ავტომობილის შექმნისას, ”იაგუარის” ინჟინრებმა და დიზაინერებმა შთაგონება ”პორშეს” კონცეპტუალური 918-სგან მიიღეს. ეს ავტომობილი გერმანულმა კომპანიამ ჟენევის წლევანდელ შოუზე წარადგინა და არამარტო დამთვალიერებლების, არამედ სპეციალისტების დიდი მოწონებაც დაიმსახურა, რამაც ”პორშეს” მისი წარმოება გადააწყვეტინა.

მოკლედ, ახალი კონცეპციით, ”იაგუარი” საფუძველს ახალ კორპორატიულ სტილს ჩაუყრის, რომელსაც პირველად სერიულ ავტომობილზე 2012 წელს ვიხილავთ მოდელ XK-ს სახით. ამგვარად, დასრულდეა ინგლისური კომპანიის სტილის ის ციკლი, რომელიც ხუთი წლის წინათ, პირველად სწორედ XK-ზე ვიხილეთ.

სხვათა შორის, წინა სტილი, ისევე როგორც ახალი, ”იაგუარის” დიზაინის განყოფილების დირექტორ იან ქელამის ხელმძღვანელობით შეიქმნა. ეს ის ქელამია, რომელიც ადრე ამბობდა, რომ რადიატორის ოვალური ბადე ვერ მიესადაგება ლუქსის კლასის დიდ ავტომობილებს, რადგან გაწელვისას, ოვალი ელეგანტურ პროპორციებს კარგავს. როგორც ჩანს, ის ახლა სხვაგვარად ფიქრობს.

პარიზში ”იაგუარი” იმავე კონცეპტუალურ ავტომობილს ჰიბრიდული აგრეგატითაც აღჭურვავს. ეს აგრეგატი ბენზინის V6 ტურბო ძრავზე იქნება ბაზირებული, რომელთანც 8-საფეხურიან ავტომატურ კოლოფს დააკავშირებენ. ამ ორ აგრეგატს ”იაგუარი” შემდგომში თავის ახალ მოდელებზეც გამოიყენებს.

”შევროლე კრუზი” ჰეჩბეკის ძარით პარიზში გაგვეცნობა

Chevrolet Cruze Hatcback Debuting in Paris

5 სექტემბერი

”ჯენერალ მოტორსმა” გამოაცხადა, რომ პარიზის საავტომობილო შოუზე, მისი ერთ-ერთი უმთავრესი ექსპონატი ”შევროლე კრუზის” ჰეჩბეკისძარიანი ვერსიის პროტოტიპი იქნება, რომლის გაყიდვებიც მერმისს უნდა დაიწყოს. ჰეჩბეკი სპეციალურად, ევროპული ბაზრისთვისაა მომზადებული, რადგან ძველ კონტინენტზე ასეთი ავტომობილები დიდი პოპულარობით სარგებლობს.

”შევროლე” ახალ ავტომობილს შოუ ქარის ვერსიის სახით წარადგენს, თუმცა აშკარაა, რომ ჰეჩბეკი ”შევროლე კრუზი” წარმოებისთვის პრაქტიკულად გამზადებული ავტომობილია. წინა ნაწილით ის ძლიერ ჰგავს თავის სედანისძარიან ვარანტს, უკნიდან კი ”ოპელ ასტრასთან” მსგავსებაც შეინიშნება.

ჰეჩბეკი ”კრუზი” სედანისგან იმითაც განსხვავდება, რომ მისი სახურავის უკანა ნაწილი დახრილია, რაც ავტომობილს სპორტულ იერს ანიჭებს. ამერიკულ კომპანიას ჯერ ჰეჩბეკის ინტერიერის ფოტოები არ გაუვრცელებია, თუმცა ახლავე შეიძლება იმის ვარაუდი, რომ ის სედანის სალონის იდენტური იქნება. სამაგიეროდ, მოკლე რელიზში ნათქვამია, რომ ამ ავტომობილის საბარგულის მოცულობა 400 ლიტრს აღწევს, უკანა სავარძლების დაკეცვის შემთხვევაში კი ეს მაჩვენებელი მნიშვნელოვნად გაიზრდება.

სალონის გარდა, ჰეჩბეკი სედანისგან ძრავების გამასაც გაიზიარებს, რომელშიც ბენზინის ორი და ერთიც დიზელის ძრავი შედის. ბენზინის აგრეგატების მუშა მოცულობა 1.6 და 1.8 ლიტრია და ისინი შესაბამისად, 113 და 141 ცხენის ძალას იძლევიან. რაც შეეხება დიზელს, ის 2.0-ლიტრიანია და 123 ცხენის ძალას გამოიმუშავებს.

”შევროლეს” ევროპული შტოს პრეზიდენტი და მმართველი დირექტორი უეინ ბრენონი იმედოვნებს, რომ ”კრუზის” ჰეჩბეკისძარიან ვერსიას, ევროპაში მისი კომპანიის გაყიდვების მნიშვნელოვნად გაზრდა შეუძლია. ”ბევრ ბაზარზე, ჰეჩბეკები ძალიან პოპულარულია. მაგალითად, ევროპაში კომპაქტურ სეგმენტში წლიურად დაახლოებით 4.8 მილიონი ავტომობილი იყიდება, რაც მთლიანი ბაზრის დაახლოებით მეოთხედს აღწევს. კომპაქტურ სეგმენტში კი დაახლოებით 65% ჰეჩბეკებზე მოდის. ამ ავტომობილის გაყიდვების დაწყებით, ჩვენ კიდევ ერთხელ დავამტკიცებთ, რომ ევროპულ ბაზარზე სერიოზული მოთამაშეები ვართ”.

ჰეჩბეკ ”კრუზის” გარდა, პარიზულ გამოფენაზე, ”შევროლეს” ექსპოზიციაში ასევე მრავალმხრივი დანიშნულების მოდელ (მინივენი, მონოკაბი) ”შევროლე ორლანდოს”, მცირედ სახეშეცვლილ უგზოობის ”შევროლე კაპტივას” და ახალი ”ავეოს” ხილვა იქნება შესაძლებელი.

”ჰიუნდაიმ” პარიზული გამოფენისთვის კონცეპტუალური ix20 მოამზადა

Hyundai Presents ix20 Sketch: Set for Paris Debut

2 სექტემბერი

რაც დრო გადის, ნიშური სეგმენტები სულ უფრო მეტ მნიშვნელობას იძენს, რადგან საავტომობილო ბაზარზე კონკურენცია, როგორც არასდროს, ისეა გამკაცრებული. ეს გარემოება ავტომწარმოებლებს აიძულებს, რომ მათ პროდუქცია გაამრავალფეროვნონ და იმ სეგმენტებში შეაღწიონ, ან სულაც ისეთ სეგმენტებს ჩაუყარონ საფუძველი, როგორიც მათთვის ადრე უცხო იყო. ასე ისინი უფრო მეტი მყიდველის მიზიდვას ახერხებენ.

ამ ტენდენციას არც ”ჰიუნდაი” ჩამორჩა, რომელმაც პარიზის საავტომობილო გამოფენისთვის, B სეგმენტის კონცეპტუალური მინივენი ix20 მოამზადა, პრემიერამდე კი ინტერნეტით ამ ავტომობილის ესკიზი გაავრცელა.

როგორც ამ ესკიზზე ჩანს, ავტომობილი ულტრა თანამედროვე გარეგნობით გამოირჩევა. ეს ავტომობილი, კორეული კომპანიის კორპორატიულ სტილში (თხევადი სკულპტურა) არის შესრულებული, რომელიც ”ჰიუნდაის” დინამიურ იმიჯს უსვამს ხაზს. ეს კონცეპცია ”ჰიუნდაის” ევროპულ კვლევისა და განვითარების ცენტრში შეიქმნა, რომელიც რუსელსჰაიმში მდებარეობს. ეს არის მეორე ავტომობილი, რომელიც ამ ცენტრში შემუშავდა. პირველი კი ix35 იყო.

კომპანიის განსაზღვრებით, ix20 თავის თვისებებში აერთიანებს პრაქტიკულობას, კომფორტს და მართვის სიმარტივეს. მის სალონში უფრო მეტი სივრცეა, ვიდრე ამავე კლასის სხვა ავტომობილებში. ამასთან, ”მისი მართვა მძღოლისთვის მარტივი და სასიამოვნოა”.

რაც მთავარია, ix25 მთავარ მოთხოვნას პასუხობს - ის ეკონომიური ძრავების ფართო გამას მიიღებს. მათ შორისაა ბენზინის ორი აგრეგატი, რომელთა მუშა მოცულობა, შესაბამისად, 1.4 და 1.6 ლიტრია და ერთიც 1.4-ლიტრიანი დიზელი.

ამ კონცეპტუალური მოდელის გარდა, პარიზის გამოფენის ”ჰიუნდაის” პავილიონში კიდევ რამდენიმე ახალი ავტომობილის, მათ შორის, განახლებული i10-ის ხილვა იქნება შესაძლებელი.

”ლოტუსის” პარიზული კონცეპციები

Lotus prepares for product blitz

2 სექტემბერი

ინგლისური ფირმა ”ლოტუსი”, რომელსაც დღეს მალაიზიური ”პროტონი” ფლობს, პარიზის საავტომობილო შოუზე ოთხ სრულიად ახალ ავტომობილს გამოფენს, რომელთა შორისაც ორი ჰიბრიდული მოდელი იქნება. თუმცა, ისიც წინასწარაა ცნობილი, რომ ამ ოთხეულიდან, წელიწადნახევრის განმავლობაში არცერთი მათგანი ბაზარზე არ გამოჩნდება.

ამ ოთხეულიდან, ყველაზე ადრე ”ლოტუსი” ალბათ მოდელ ”სევენის” თანამედროვე ვარიანტის წარმოებას დაიწყებს. ამ ნაბიჯს ბევრი სპეციალისტი დიდ რისკად მიიჩნევს, თუმცა ”ლოტუსის” მარკეტოლოგები ეყრდნობიან ძველი ”სევენის” დიდ პოპულარობას და მიაჩნიათ, რომ ავტომოყვარულთა შორის ლეგენდარული როდსტერის ნოსტალგია ახალსაც პოპულარულს გახდის.

ინტერნეტ გამოცემა ”აუტოუიკი” გვატყობინებს, რომ ახალი ”სევენი” უფრო კომფორტზე იქნება ორიენტირებული. ასე განსაჯეთ - ღია ავტომობილს კონდიციონერიც კი ექნება. ოღონდ, რა თქმა უნდა, იმ შემთხვევისთვის, როდესაც ის რბილი ტენტით დაიხურება. გამოცემის მიერ გავრცელებული ინფორმაციით, ის ძველ ”სევენთან” შედარებით, მნიშვნელოვნად დამძიმდება, თუმცა მაინც კარგი ტექნიკურ დინამიკური მახასიათებლები ექნება.

ავტომობილის შემუშავების, პროტოტიპის დამზადების და ტექნოლოგიური დამუშავების პროცესი ”ლოტუსის” ინგლისურ შტაბ-ბინაში (რომელიც ქალაქ ჰეტჩელში მდებარეობს) არ ჩატარებულა. მთელი ეს საქმე ესპანურ კომპანიას დაევალა, რომლის სახელიც არ ქვეყნდება. უფრო მეტიც, არსებობს ვარაუდი, რომ გაცოცხლებულ ”სევენს” სწორედ ესპანური კომპანია გამოუშვებს. ასევე არსებობს მოსაზრება, რომ გაცოცხლებული ლეგენდა ძალიან ძვირი, დაახლოებით 100 000 დოლარი ეღირება.

კონცპტუალურ მოდელებს შორის ერთ-ერთი ყველაზე საინტერესო მაინც ალბათ კიდევ ერთი გაცოცხლებული სახელის მატარებელი ავტომობილი - ”ესპრიტი” იქნება. ეს ავტომობილი ჯერ კიდევ ექვსი წლის წინ უნდა დაემზადებინათ, მაგრამ კომპანიის მაშინდელმა მთავარმა აღმასრულებელმა მაიკ კიმბერლიმ პროექტი იმისათვის შეაჩერა, რომ მისი და მარკეტოლოგების აზრით, უფრო საიტერესო ”ევორას” შექმნა დაჩქარებულიყო. ”ევორა” უკვე ბაზარზეა და როგორც ჩანს, ”ესპრიტის” დაბრუნებას წინ ვეღარაფერი დაუდგება.

განახლებული ”ესპრიტიც” სუპერავტომობილების კლასში გამოვა და რა თქმა უნდა, ამ კლასისთვის ყველაზე დამახასიათებელი შეთანწყობა (ძრავი ბაზაში) ექნება. შესაბამისად, V8 ტურბო ძრავის მიერ გამომუშავებულ მაბრუნ მომენტსაც უკანა წამყვანი ბორბლები მიიღებს. ეს ავტომობილიც ძველ ”ესპრიტზე” მძიმე იქნება, რასაც ის ფაქტი განაპირობებს, რომ მისი წარმოებისას, თითქმის არ გამოიყენებენ კარბონის ბოჭკოს. თუმცა, ძარის და შასის ბევრი დეტალი ალუმინისგან დამზადდება.

ყველაზე დიდი მოულოდნელობა კი ”ლოტუსის” სტენდზე ისეთი ავტომობილების ხილვა იქნება, როგორებსაც ეს კომპანია ადრე არასდროს უშვებდა. მათგან ერთია ოთხკარიანი ჰეჩბეკი, რომელიც ”პორშე პანამერას” სტილშია შესრულებული, მეორე კი არის ორკარიანი კუპე, რომელსაც მომავალში მყიდველს კაბრიოლეტის ძარითაც შესთავაზებენ. ამ ორ ავტომობილს წინა წამყვანი ბორბლები და რაც მთავარია, ჰიბრიდული აგრეგატები ექნება.

ორივე ავტომობილზე გამოყენებულია მოდულარულ-ჰიბრიდული შასი, რომელიც ”ლოტუსმა” პირველად ჟენევაში წელს ნაჩვენებ კონცეპტუალურ ჰიბრიდ ”ევორა 414E-ზე” (სურათზე) გამოიყენა და რომლის შექმნაშიც მონაწილეობა დიზაინ ატელიე ”ჯუჯაროს” სპეციალისტებმაც მიიღეს.

ჟენევაში წარმოდგენილ ჰიბრიდულ სისტემებში შედის ”ლოტუსის” მიერ შემუშავებული სამცილინდრიანი მონობლოკური ძრავი, რომელიც სპეციალურად, სერიული ჰიბრიდული აგრეგატებისთვისაა შემუშავებული. ამ ოთხეულის გარდა, ”ლოტუსმა” კიდევ ერთი სიახლე პებლ ბიჩის ელეგანტურობის კონკურსზე წარადგინა. ესაა სარბოლი ერთადგილიანი ”ექსოს T125”, რომელიც ადრენალინის მოყვარული მძოლებისთვისაა შექმნილი და მას შეზღუდული რაოდენობით გამოუშვებენ.

”მინი” პროდუქციას გაამრავალფეროვნებს

Mini aims to extend product range

2 სექტემბერი

”ბეემვეს” ხელში გადასვლის შემდეგ, ინგლისური ”მინი” წლიდან წლამდე ზრდიდა გაყიდვებს და შესაბამისად, წარმოების მოცულობასაც. მაგრამ გლობალურმა ეკონომიკურმა კრიზისმა მისი საქმეც შეაფერხა. მაგრამ ”ბეემვეს” ეს არ აშინებს და გაყიდვების კიდევ უფრო გაზრდას გეგმავს, რაშიც მას პირველ რიგში, ამერიკულ ბაზარზე გააქტიურება დაეხმარება.

ამისათვის, ბავარიელებმა აშშ-ში ”მინის” სადილერო ქსელი 120-მდე (86-დან) გაზარდეს. პარალელურად, ”მინი” საკუთარ სამოდელო გამასაც აფართოებს. ბოლო ახალი მოდელი ქროსოვერი ”ქანთრიმენი” გახდა, რომელმაც ”მინის” გაყიდვები მნიშვნელოვნად უნდა გაზარდოს.

”ქანთრიმენის” შემდეგ, ”მინის” პირველი ახალი ავტომობილი, რომელიც ბაზარზე გამოვა, ელექტრომობილია. ინგლისური კომპანიის 450 ელექტრომობილი ამჟამად ნიუ იორკში, ნიუ ჯერსისა და კალიფორნიაში გადის საგზაო ტესტებს. თანაც, ისინი ლიზინგითაა გაყიდული. ანუ, ტესტებს უკვე რეალური მყიდველი ატარებს. ეს პროცესი კიდევ ერთ წელს გასტანს, რის შემდეგაც, ამ ელექტრომობილების გაყიდვა დაიწყება. მაგრამ, ჯერჯერობით უცნობია წარმოების მოცულობაც და მანქანის ფასიც.

მალე განახლდება ”მინი კუპერი”, ამ ავტომობილის მესამე თაობის ვერსია კი ბაზარზე 2014 წელს გამოჩნდება. ამ ავტომობილს ახალი წინა და სრულამძრავიანი ტრანსმისია ექნება, რომელსაც ”მინის” ”ბეემვე” გაუზიარებს.

2012 წელს კი სამკარიან კომპაქტურ უნივერსალ ”კლუბმენის” რესტაილინგის ჯერი დადგება. იმავე წელს, ”მინი” დაიწყებს რბილსახურავიანი კუპეს წარმოებას, რომლის კონცეპტუალური ვერსიაც პირველად კომპანიამ შარშან, ფრანკფურტის გამოფენაზე გვიჩვენა. უფრო ადრეა მოსალოდნელი ამავე კონცეპტქარის ბაზაზე ორადგილიანი, მოკლებაზიანი კუპეს წარმოების დაწყება.

დაბოლოს, ”მინი” ახლანდელ ”კუპერზე” უფრო პატარა ავტომობილის გამოშვებას აპირებს. ჯერ ამ პატარას სახელი მოფიქრებული არაა. ინტერნეტით ვრცელდება ვარაუდი, რომ მას ”მინი მინორს” დაარქმევენ. ამ ავტომობილს ”ბეემვეს” ინჟინერთა ის ჯგუფი შეიმუშავებს, რომელიც ”პროჯექტ i-ზე” მუშაობს. ამ პროექტით, ბავარიელები ეკონომიური, საქალაქო ავტომობილების წარმოებას გეგმავენ. მოკლედ, თუ ”მინი მინორის” წარმოება გადაწყდა, მან კონკურენცია ”დაიმლერის” ”სმარტ ფორთუს” უნდა გაუწიოს.

”სმარტი” ახალ მოდელებს ”რენოსთან” ერთად გამოუშვებს

Smart will develop new models with Renault

2 სექტემბერი

”სმარტმა” თავისი ჯუჯა ავტომობილების გაყიდვა შარშან დაიწყო და ერთობ წარმატებულადაც, მაგრამ წელს სიტუაცია რადიკალურად შეიცვალა. მიუხედავად ამისა, ”დაიმლერის” შტო იმედოვნებს, რომ ბაზარზე ახალი ავტომობილების გამოშვებით, გაყიდვების მოცულობა გაიზრდება. ახალი ავტომობილების შემუშავებაში კი კომპანიას ”რენო-ნისანის” ალიანსი დაეხმარება.

ახალ ავტომობილებს შორის, პირველ არსებულ მოდელ ”ფორთუს” ახალი თაობის ვერსია იქნება, რომლის შემუშავებაშიც მონაწილეობას ფრანგულ-იაპონური ალიანსი მიიღებს. ამას კი ოთხადგილიანი ავტომობილი მოჰყვება. ”დაიმლერსა” და ”რენო-ნისანს” შორის პარტნიორობის მთავარი მიზანი, საწარმოო ხარჯების შემცირებაა.

მალე ”სმარტ ფორთუს” რესტაილინგი ჩაუტარდება და ”დაიმლერი” იმედოვნებს, რომ ეს ავტომობილის გაყიდვებსაც გამოაცოცხლებს. რაც შეეხება ახალი თაობის მოდელს, ის ახალი ”რენო ტვინგოს” პლატფორმაზე აიგება და ბაზარზე 2013 წელს გამოჩნდება.

”ფორთუს” რესტაილინგური ვერსიის პარალელურად, ”სმარტი” ოქტომბერში დაიწყებს მისი ელექტრული ვერსიის გაყიდვებს. ამ ელექტრომობილის შემუშავებაში ”დაიმლერს” ელექტრომობილების მწარმოებელი კალიფორნიული კომპანია ”ტესლა მოტორზი” ეხმარება, რომლის აქციების პაკეტიც გერმანულმა გიგანტმა შარშან შეისყიდა.

სულ 250 ცალი ელექტრული ”სმარტ ფორთუს” გაყიდვა აქვს დაგეგმილი. ამასთან, გაყიდვები მხოლოდ ლიზინგით იგეგმება. მყიდველს თვეში 599 დოლარის გადახდა მოუწევს. თუმცა, მყიდველთა უმეტესობა კორპორატიული კლიენტი იქნბა და ”სმარტის” ელექტრომობილების შეძენას მხოლოდ 50 კერძო პირი შეძლებს.

ორი წლის შემდეგ, ელექტრული ”სმარტ ფორთუ” მოდერნიზაციას გაივლის. შეიცვლება მისი ინტერიერი, თუმცა მთავარი ისაა, რომ ენერგიის წყაროდ ლითიუმ-იონურ აკუმულატორებს გამოიყენებენ. ამ აკუმულატორებს ჯუჯა ელექტრომობილისთვის ”დაიმლერისა” და კომპანია ”ევონიკ ინდასტრიზის” ერთობლივი კომპანია - ”დოიჩე აკუმოტივი” დაამზადებს.

დაბოლოს, უკვე გადაწყვეტილია ოთხადგილიანი ”სმარტის” წარმოება. ეს პროექტი შტუტგარტელებმა 2006 წელს შეაჩერეს. ეს ავტომობილი ”ფორთუს” დაგრძელებულ პლატფორმას დაეყრდნობა. მას წამყვანი უკანა ბორბლები ექნება და ძრავიც მასზე უკან მოთავსდება. იმავე პლატფორმაზე, ”ტვინგოს” გრძელბაზიან ვერსიას ”რენოც” გამოუშვებს.

მსოფლიოს უიაფესი ავტომობილი ძვირდება

Tata Nano Gets More Expensive

1 სექტემბერი

ტატა ნანო

..............................

შარშან, როდესაც თავისი ციცქნა ავტომობილის - ”ნანოს” პრეზენტაცია ჩაატარა, ინდურმა საავტომობილო კომპანია ”ტატამ” მას მსოფლიოს უიაფესი ავტომობილი უწოდა. რა თქმა უნდა, მას აქეთ, ამ ავტომობილის რეკლამირებისას, ”ტატა” ამ თიკუნს უშურველად იყენებს. მაგრამ შესაძლოა, მალე ამის მორალური უფლება აღარ ჰქონდეს.

საქმე ისაა, რომ ჯერ ერთი, ინტერნეტით გავრცელდა ”ტატას” ინკოგნიტო წარმომადგენლის მიერ სააგენტო ფრანს პრესისთვის მიცემული ინფორმაცია, რომლის მიხედვითაც, სხვადასხვა მიზეზთა გამო, ”ტატა” მალე ”ნანოს” გააძირებს. მეორეც, ჩინურმა კომპანია ”ჯილიმ” გამოაცხადა, რომ მალე ბაზარზე მსოფლიოს უიაფეს ავტომობილს გამოუშვებს, რომლის ფასიც დაახლოებით 2 300 დოლარი იქნება (ნანოს ფასი 2 500 დოლარია.

ჯილი IG

..............................

”ნანოს” შესაძლო გაძვირებაზე ინდური კომპანია ჯერ კიდევ მარტში ალაპარაკდა, თუმცა აქამდე მსგავსი არაფერი მომხდარა. ”ტატა” წუხს, რომ მსოფლიოს უიაფესი ავტომობილის წარმოება სულ უფრო და უფრო ძვირი უჯდება, თუმცა ესეც რომ არა, ”ნანოს” გაძვირება მაინც მოსალოდნელი იყო - მის პრეზენტაციაზე კომპანიის შეფმა რატან ტატამ კი განაცხადა, ჩემი მიზანი, ინდოელი მოსახლეობის სკუტერებიდან ოთხ ბორბალზე გადასხმაა და მერე მოგებაო, მაგრამ ბიზნესმენი რისი ბიზნესმენია, თუ საკუთარ მოგებაზეც არ იზრუნა. მოგების საშუალებას კი გაძვირებული ”ნანოც” მისცემს, რადგან ამ ავტომობილზე ინდოეთში დიდი მოთხოვნაა, მალე კი ის ევროპაშიც (რა თქმა უნდა, გაცილებით ძვირი, რადგან ის ევროპულ მკაცრ სტანდარტებზე იქნება მორგებული) გამოჩნდება.

რაც შეეხება ”ჯილის” უიაფეს ავტომობილს, ”ნანოს” ჩინელი მეტოქის სახელია IG, ანუ ”ინტელიჯენტ ჯილი” (საზრიანი ჯილი). მართალია, ჩინურმა კომპანიამ მას უკვე მსოფლიოს უიაფესი უწოდა, მაგრამ ფაქტია, რომ მისი წარმოება ჯერ არ დაწყებულა. ამდენად, გაძვირებულიც კი, ”ტატა ნანო” თავის საპატიო წოდებას ჯერჯერობით მაინც შეინარჩუნებს. თუმცა, ჩინელებს რომ საქმის სწრაფად (რამდენად ხარისხიანად, ეს სხვა, გამოსწორებადი საქმეა) კეთება ეხერხებათ, ეს უკვე ყველამ იცის და შორს არც ის დროა, როდესაც ”საზრიანი ჯილი” მართლაც მსოფლიოს უიაფესი ავტომობილი გახდება.

სხვათა შორის, მალე ჩინეთში კიდევ ერთი იაფფასიანი ავტომობილის გაყიდვა დაიწყება, რომელიც, ”ნანოს” მნიშვნელოვნად გაძვირების შემთხვევაში, ბაზარზე ”საზრიანი ჯილის” გამოჩენამდე, ყველაზე იაფი ავტოს სახელს დაეუფლება. ესაა ნაკლებად ცნობილ კომპანია ”ზოტი ჰოლდინგის” ციცქნა ”ალტო”, რომელსაც ადრე კომპანია ”ძიანნანი” უშვებდა. მაგრამ ეს უკანასკნელი სწორედ ”ზოტიმ” შეიძინა და ახლა ”ალტოს” ბაზაზე, კიდევ უფრო იაფი მოდელის წარმოებას გეგმავს, რომლის ფასიც 2 900 დოლარი იქნება.

სხვათა შორის, ახლახანს ”ზოტი” გახდა პირველი ჩინური ავტომწარმოებელი, რომელმაც საკუთარი წარმოების ელექტრომობილი კერძო პირს მიჰყიდა...

ლონდნური საავტომობილო აუქციონის ვარსკვლავები

31 აგვისტო

ლამბორგინი მიურა SV ჯოტა

..............................

ლეგენდარული ავტომობილების მოყვარულებისა და დამფასებლებისთვის, 27 ოქტომბერი განსაკუთრებული დღე იქნება - ამ დღეს, ლონდონში გაიმართება საავტომობილო რარიტეტების აუქციონი, რომელზეც რამდენიმე ლეგენდარული ავტომობილის შეძენა იქნება შესაძლებელი. რა თქმა უნდა, სასურველი ავტოს საკუთარ ფარეხში დაყენებას მხოლოდ ისინი შეძლებენ, ვისაც ამისათვის მილიონები არ ენანება.

გასაყიდ ავტომობილებს შორისაა ”ლამბორგინი მიურა SV ჯოტა”. ცნობისათვის, ასეთი ავტომობილი იტალიურმა კომპანიამ სულ ხუთი ცალი დაამზადა. ის ”ლამბორგინის” ტესტ პილოტ ბობ უოლესის მიერ მოდიფიცირებულ ვერსია ”მიურა პრივატას” სპეციალურად მიეძღვნა. ეა ძალიან იშვიათი ავტომობილია ანტიკვარული მანქანების ბაზარზე და ამდენად, ძალიან ძვირიც.

ამ ავტომობილს სპეციალური რესტავრაცია, ამ საქმის სპეციალისტმა გარი ბობილეფმა ჩაუტარა. როგორც ავტომობილის პატრონი ამბობს, რესტავრაცია ძვირი არ დაჯდა, რადგან მისი ”მიურა” ისედაც შესანიშნავ მდგომარეობაში იყო. ასეა თუ ისე, აუქციონის ორგანიზატორები იმედოვნებენ, რომ ”ლამბორგინი მიურა SV ჯოტა” 1.25-1.7 მილიონ დოლარად გაიყიდება.

ასტონ მარტინ DB5

..............................

კიდევ უფრო ძვირად უნდა გაიყიდოს აუქციონის მორიგი ექსპონატი - ”ასტონ მარტინ DB5”, რომელიც კინოსამყაროში ბონდმობილის სახელითაა ცნობილი (ის ჯეიმს ბონდის ორ ფილმში - ”გოლდფინგერსა” და ”თანდერბოლშია” გადაღებული). ეს მანქანა ოდესღაც ფილადელფიელ ბიზნესმენ ჯერი ლის სულ რაღაც 12 000 დოლარად, უშუალოდ ”ასტონ მარტინისგან” შეუძენია, რომლის ფაბრიკაშიც, კინოსა და ავტოსამყაროს ვარსკვლავს მტვერი ედებოდა.

ლი აღიარებს, რომ თავისი ”ბონდმობილის” საჭეს არასდროს მისჯდომია, თუმცა ის ყოველთვის მოვლილი და გაკრიალებული იდგა პატრონის ფარეხში. ასე გასულა 40 წელი. მერე კი ბონდის პარტნიორი ლის ერთ-ერთ ნაცნობს აღმოუჩენია და უთქვამს, რომ შესაძლოა, ეს ავტომობილი დღეს მილიონები ღირდეს. ასე მიაღწია ლონდონის აუქციონამდე შონ კონერის ოთხბორბალა პარტნიორმა.

სხვათა შორის, ეს ავტომობილი აღჭურვილია ყველა იმ საოცრებით, რომლებიც მოუხელთებელ სუპერ აგენტს, მისი საქმიანობის დროს ეხმარებოდა. თანაც, ყველა მოწყობილობა დღესაც მწყობრშია და თუ ბონდს დასჭირდა, მათს გამოყენებას შეძლებს.

საინტერესოა, რომ ბონდის ფილმებისთვის სულ ორი ”ასტონ მარტინ DB5” გამოიყენეს, მაგრამ მეორე ეგზემპლარის ბედი დიდი ხანია, უცნობია. ის ფლორიდელ ბიზნესმენ ენტონი პულიეზეს ეკუთვნოდა, მაგრამ ამ მანქანის შესახებ, 1997 წლის შემდეგ, არაფერია ცნობილი. ამ კაცს მეორე ”ბონდმობილი” 1986 წელს, 275 000 დოლარად შეუძენია და პატარა ქალაქ ბოკა რატონის აეროპორტის ერთ-ერთ კერძო ანგარში დაუყენებია, საიდანაც 11 წლის შემდეგ, გაურკვეველ ვითარებაში დაიკარგა.

ლონდონური აუქციონის ორგანიზატორები იმედოვნებენ, რომ შემორჩენილი ბონდმობილი დაახლოებით 5 მილიონ დოლარად გაიყიდება.

ელექტრომობილების სიჩქარის რეკორდი სტუდენტებმა დაამყარეს

Buckeye Bullet Sets EV Speed World Record

31 აგვისტო

ავტოინდუსტრიის ისტორიის დასაწყისში, ელექტრომობილები ტრანსპორტის ერთ-ერთ ყველაზე პერსპექტიულ საშუალებად იყო მიჩნეული, თუმცა საჭირო ტექნოლოგიების განუვითარებლობამ, ასეთ მანქანებს საუკუნეზე მეტი ხნის განმავლობაში ჩაუკეტა ბაზრის კარი.

მაგრამ ვითარება იცვლება - გვინდა თუ არა, უნდა შევეგუოთ იმ აზრს, რომ არცთუ შორეულ მომავალში, ჩვენი ავტომობილი უხმაურო იქნება და მას მამოძრავებელ ძალას ელექტროძრავი მიანიჭებს. სამაგიეროდ, ის დაახლოებით იმდენივე ელექტროენერგიას მოიხმარს, რამდენსაც ჩვეულებრივი საყოფაცხოვრებო მაცივარი.

თქმა ადვილია, მაგრამ თანამედროვე ავტომოყვარულის გონება ასეთ რადიკალურ ცვლილებას ადვილად ვერ შეეგუება. მყიდველი თუ დარწმუნებული არ იქნა, რომ ელექტრომობილი ისეთივე დინამიური და მძლავრი შეიძლება იყოს, როგორებიც თანამედროვე შიდაწვისძრავიანი ავტომობილებია, მათკენ არც გაიხედავს. მოკლედ, ელექტრომობილებს შესაბამისი პროპაგანდა ესაჭიროებათ და ამ მხრივ, რა უნდა ყურადღების მიქცევის იმაზე უკეთესი საშუალება, ვიდრე სიჩქარის მსოფლიო რეკორდის დამყარებაა.

რეკორდების დამყარებაზე კი ამერიკაში, სხვადასხვა უნივერსიტეტები და მათი სტუდენტები ზრუნავენ. ისინი მიზნის მისაღწევად, ნამდვილ მონსტრებს ქმნიან, ისეთებს, რომლებზეც უფრო ხმელეთზე მქროლავ რაკეტას იტყვი და არა ავტომობილს. თუმცა მთავარი ისაა, რომ ეს ავტომობილი-რაკეტები ფენომენურ სიჩქარეს ავითარებენ და მსოფლიო მედიის (მათთან ერთად კი მომავალი მყიდველისაც) ყურადღებასაც იქცევენ. ჰოდა, რა გასაკვირია, რომ ასეთი უნივერსიტეტების საქმიანობას დიდი საავტომობილო კომპანიები აფინანსებენ.

ერთ-ერთი ასეთია შტატ ოჰაიოს უნივერსიტეტი, რომლის სტუდენტების მიერ შექმნილმა სარეკორდო ელექტრომობილმაც (სტრიმლაინერის კლასის), სახელად ”ბაქაიდ ბულეტ”, ბონვილის გამშრალი ტბის ფსკერზე, წარმოუდგენელი სიჩქარე - 495 კმ/სთ განავითარა. ეს კი 100 კმ/სთ-ით მეტია მსოფლიოს მანამდელ რეკორდზე, რომელიც ჯერ კიდევ წინა საუკუნის მიწურულს (1999 წელს), ინვალიდმა პილოტმა პეტ რამერფილდმა თავისი ”უაით კაითნინგით” დაამყარა.

ოჰაიოელი სტუდენტების ელექტრომობილის სიჩქარის რეკორდი ჯერ ოფიციალური არაა, რადგან გარბენის შესრულებისას, სიჩქარეს მხოლოდ ტრასაზე დამონტაჟებული სენსორები ზომავდა. რეკორდის ოფიციალურად დამტკიცებისთვის კი საერთაშორისო საავტომობილო ფედერაციის ოფიციალური დამკვირვებელია საჭირო. თუმცა, მთავარი ისაა, რომ სტუდენტებს ეს მიღწევა თავად რამერფილდმა მიულოცა, რომელმაც აღიარა, რომ მისი რეკორდი გაუმჯობესებულია.

მალე კი, რეკორდისთვის ოფიციალური სტატუსის მისანიჭევლად, ოჰაიოელები გარბენს ოფიციალური დამკვირვებლების წინაშე შეასრულებენ. ამისათვის კი საჭიროა, რომ საპირისპირო მიმართულებით შესრულდეს ორი გარბენი, რომელთა სტარტს შორისაც ერთ საათზე მეტი არ გავა. სტუდენტების თქმით, ერთ-ერთი საცდელიგარბენისას, მათმა რეკორდსმენმა 514 კმ/სთ-იც კი განავითარა, მაგრამ ეს შედეგი ოფიციალურად არ დაფიქსირებულა.

”ბაქაი ბულეტი” 600-კილოვატიანი ლითიუმ-იონური აკუმულატორების ბლოკითაა აღჭურვილი, რომელიც სტუდენტებს კომპანია ”A123 სისტემზმა” მიაწოდა. ბლოკში სულ 1600 ხალი ელემენტია თავმოყრილი, დაახლოებით ისეთები, როგორებსაც ლეპტოპებში იყენებენ. რა სიმძლავრის ძრავი ამოძრავებს რეკორდსმენს, ამაზე ინფორმაცია არ გამოქვეყნებულა.

”მაზდა” სტილს იცვლის

Mazda uses Shinari concept to show brand's future design language

30 აგვისტო

იაპონურმა კომპანია ”მაზდამ” ახალი კონცეპტუალური მოდელი - ”შინარი” მოამზადა, რომელიც გვიჩვენებს, თუ რა მიმართულებით განვითარდება ”მაზდას” ავტომობილების მომავალი კორპორატიული სტილი.

კონცეპტუალური ავტომობილის გარეგნობაზე ერთდროულად, ”მაზდას” გერმანული, ამერიკული და იაპონური სადიზაინერო სტუდიები მუშაობდნენ. ერთობლივად შემუშავებულ სტილს იაპონური სიტყვა ”კოდო” უწოდეს, რაც მათს ენაზე მოძრაობის სულისკვეთებას ნიშნავს.

”მაზდას” სადიზაინერო განყოფილების ხელმძღვანელ იკუდა მაედას განცხადებით, მისი კომპანიის ავტომობილების დიზაინი, უახლოეს მომავალში, სწორედ ამ ახალ სტილში შესრულდება. თუმცა მას არ დაუზუსტებია, თუ ახალი სტილის დამკვიდრება სერიულ ავტომობილებზე როდის დაიწყება.

ამ ეტაპზე, იაპონური კომპანიის დიზაინერები კონცეპტუალური ავტომობილის ინტერიერსაც ამუშავებენ, ”მაზდა” იმედოვნებს, რომ ინტერიერის გასაწყობად გამოყენებული მასალების ხარისხისა და სალონის გაფორმების დონით, მალე ეს კომპანია ისეთ ავტორიტეტებს გაუტოლდება, როგორებიცაა ”ბეემვე” და ”აუდი”.

სხვათა შორის, უკვე რამდენიმე წელია, ”მაზდა” ყოველ შემდგომ დიდ საავტომობილო გამოფენას ახალი კონცეპტუალური ავტომობილით ხვდება. კორპორატიული სტილის განმსაზღვრელი წინა კონცეპტქარი კი იყო ”ნაგარე”, რომლის პრემიერა 2006 წელს შედგა და რომელმაც ”მაზდას” ყველა მოდელის სტილი განსაზღვრა. მაგრამ შემდეგ კომპანია მისმა მთავარმა დიზაინრმა ლოურენს ფან დენ აკერმა დატოვა და ”მაზდამაც” ახალი სტილის შესაქმნელად მუშაობა მაშინვე დაიწყო. ფან დენ აკერი მაედამ შეცვალა, რომელიც ადრე ”მაზდა2-ის” და ”მაზდა RX-8-ის” სტილის შემუშავებაში მონაწილეობდა.

”ჰიუნდაი” სამ ახალ მომცრო მანქანას გამოუშვებს

Three New Hyundai Small Cars Coming

30 აგვისტო

მალე ”ჰიუნდაი” თავისი სამოდელო გამის კიდევ ერთხელ გადახალისებას დაიწყებს და საწარმოო პროგრამასაც გააფართოებს. ინტერნეტ გამოცემა ”ინსაიდლაინის” ინფორმაციით, უახლოეს 12 თვეში, კორეული კომპანია სამ ახალ პატარა ავტომობილს გამოუშვებს.

პირველი იქნება მოდელ ”აქცენტის” ამერიკული ვარიანტი, რომლის კონცეპტუალური ვერსიაც (RB) ”ჰიუნდაიმ” ახლახანს, მოსკოვის საავტომობილო შოუზე წარადგინა. ეს ავტომობილი კომპანიის შოურუმებში მერმის, ზაფხულში გამოჩნდება.

”აქცენტის” ამერიკული ვერსიისთვის სულ ორი ძრავი იქნება გათვალისწინებული. ერთია 1.4-ლიტრიანი, რომელიც 109 ცხენის ძალას იძლევა, მეორეს მუშა მოცულობა კი 1.6 ლიტრია და ის 122 ცხენის ძალას გამოიმუშავებს. ორივესთან შესაწყვილებლად განკუთვნილია 5-საფეხურიანი მექანიკური, ან 4-საფეხურიანი ავტომატური გადაცემათა კოლოფი.

მეორე ავტომობილი სპორტულია - ხელმისაწვდომი კუპე ”ველოსტერი”. მას წამყვანი წინა ბორბლები ექნება, პირველად მისი სერიული ვერსია კი დეტროიტის საავტომობილო შოუზე დაგვენახება. ამ ავტომობილისთვის ერთი, 1.6-ლიტრიანი ძრავია გათვალისწინებული, რომლის მაქსიმალური სიმძლავრეც 140 ცხენის ძალას აღწევს. კუპე ”ველოსტერის” გაყიდვები მერმისს, წლის ბოლოს დაიწყება.

დანოლოს, მესამე ახალი ავტომობილი განახლებული ”ელანტრა” იქნება, რომლის პრემიერაც ლოს ანჯელესის ავტო შოუზე ჩატარდება. ამ ავტომობილის გაყიდვები წელსვე უნდა დაიწყოს. ის კომფორტის უჩვეულოდ ბევრი საშუალებით იქნება გამდიდრებული. რაც მთავარია, მის კაპოტქვეშ მოთავსდება კორეული კომპანიის სერია ”თეტა II-ის” ოთხცილინდრიანი 2.0-ლიტრიანი ძრავი, რომელიც, როგორც მწარმოებელი ამბობს, გაუმჯობესებული ეკონომიკურ-ეკოლოგიური მახასიათებლებით გამოირჩევა.

”დონტო P1” - არგენტინული სუპერ სათამაშო

Donto P1 Track Car In the Works

28 აგვისტო

ბოლო წლებში, ავტოინდუსტრიაში პოპულარული ხდება ბიზნესის შედარებით ახალი სეგმენტი, რომელიც მყიდველს ისეთ სპორტულ ავტომობილებს სთავაზობს, როგორებსაც ადრე მხოლოდ სარბოლ ტრასებზე თუ წარმოვიდგენდით. ასეთი ავტომობილებია KTM-ის X-ბოუ და ”არიელის” ”ატომი”. მალე კი, არგენტინიდან, მათს რიგებს კიდევ ერთი სწრაფი სათამაშო შეუერთდება.

ესაა პატარა კომპანია ”დონტოს” მიერ ჯერ მხოლოდ კონცეპტუალური პროექტის სახით შემუშავებული P1, რომელიც არგენტინულ ინტერნეტ გამოცემა ”ავტობლოგის” ინფორმაციით, სატესტო პროტოტიპის სახით უკვე არსებობს და საგზაო გამოცდებსაც გადის.

პროექტმა სტარტი 18 თვის წინ აიღო. მის მიხედვით, იგეგმება ორადგილიანი ექსტრემალური ბოლიდის წარმოება, რომელსაც სახურავი მოსახსნელი ექნება. ავტომობილის მთავარი დიზაინერია ლუკას ლოპესი, რომელმაც თავისი ”მხეცი”, სარბოლი ავტომობილების ტექნოლოგიების გამოყენებით შეიმუშავა. მსუბუქი მასალების გამოყენების წყალობით, P1 (ეს აბრევიატურა ალბათ პირველ პროექტს ნიშნავს) ძალიან მსუბუქი (დაახლოებით 700 კილოგრამი) უნდა იყოს. ავტომობილის შასიზე კი ექტორ პერესი მუშაობდა, რომელმაც თავისი პროექტის შემუშავებისას, საერთაშორისო საავტომობილო ფედერაციის (FIA) წესები გაითვალისწინა.

ჯერჯერობით უცნობია, თუ რა აგრეგატი მიანიჭებს ამ არგენტინულ ”მხეცს” მამოძრავებელ ძალას. პროექტის ავტორები ამბობენ, რომ ისინი არჩევანს გერმანულ ძრავზე შეაჩერებენ. საცდელი პროტოტიპი კი ”ფოლკსვაგენის” 1.8-ლიტრიანი ტურბოძრავითაა აღჭურვილი, რომელიც მაქსიმუმ 180 ცხენის ძალას იძლევა.შესაბამისად, შეიძლება ვივარაუდოთ, რომ საბოლოო პროდუქტის ძრავის სიმძლავრეც ამაზე გაცილებით მეტი არ იქნება.

”დონტო” აცხადებს, რომ P1-ს შეზღუდული რაოდენობით გამოუშვებს, მისი ფასი კი 55 000 დოლარი იქნება. გარდა იმისა, რომ თავის პატრონს სარბოლ ტრასებზე დიდ სიამოვნებას მიანიჭებს, ეს ავტომობილი საერთო სარგებლობის გზებზე სარგებლობისთვისაც ვარგისი იქნება.

”გეპარდო” - აღორძინებული ”დე ტომაზოს” პირველი სუპერქარი

De Tomaso Ghepardo Concept

27 აგვისტო

შარშან იტალიელმა ბიზნესმენმა ჯან მარიო როსინიოლომ სუპერავტომობილების მწარმოებელი ოდესღაც ცნობილი იტალიური კომპანია ”დე ტომაზო” შეისყიდა, მაგრამ მას შემდეგ, ამ კომპანიის შესახებ, ჩამი-ჩუმი არ ისმის. თითქოს, ”დე ტომაზოს” აღორძინება ყველას დაავიწყდა, მაგრამ როგორც ირკვევა, არა - დანიელმა დიზაინერმა ფრედერიკ ტიილესენმა კონცეპტუალური მოდელი ”დე რომაზო გეპარდო” შექმნა, რომლის გარეგნობაც, მისივე თქმით, ლეგენდარულ მოდელ ”დე ტომაზო პანტერას” შთაგონებით შეიმუშავა.

დიზაინერის თქმით, ”გეპარდო” წარმოებისთვის მომზადებული კონცეპციაა, თუმცა როგორც ირკვევა, როსინიოლოს ”დე ტომაზოს” მისთვის ეს პროექტი არ შეუკვეთავს. ესე იგი, ეს თავისუფალი ნამუშევარია, თუმცა არაა გამორიცხული, რომ მისი წარმოება მაინც გადაწყდეს. და თუ ასე მოხდა, იტალიური კომპანია ”ასტონ მარტინ რეპიდის”, ”პორშე პანამერასა” და ”ფისკერ კარმას” კონკურენტთა სიაში ჩაეწერება.

კონცეპტუალური ავტომობილი ჯერ მხოლოდ 1:4 მასშტაბის მოდელის სახით არსებობს და შესაძლოა, ცოტა უხერხულად მოგვეჩვენოს მისი ზემოთ ჩამოთვლილი მოდლების კონკურენტად დასახელება, თუმცა მაინც უნდა ითქვას, რომ ”გეპარდო” მათსავით, ოთხკარიანი კუპეა. მისი რეალური გაბარიტები უნდა იყოს: სიგრძე 4820, სიგან 1970, სიმაღლე 1300 და ბაზა 2990 მილიმეტრი. ავტომობილის აეროდინამიკური წინააღმდეგობის კოეფიციენტი მხოლოდ 0.25 უნდა იყოს, მისი საბარგულის მოცულობა კი 500 ლიტრს მიაღწევს.

კონცეპციის ავტორს აგრეგატების დიდი არჩევანი აქვს შერჩეული. მისი თქმით, ავტომობილს საკმაო ადგილი აქვს იმისათვის, რომ მასში ”ფორდის” წარმოების, სერია ”ეკობუსტ-ის” წყვილტურბოიანი 3.5 V6 (465 ცხენის ძალით), ან ოთხი ელექტროძრავი მოთავსდეს, რომელთა ჯამური სიმძლავრეც დაახლოებით 440 ცხენის ძალა იქნება. მეორე შემთხვევაში, საჭირო ელექტროენერგიას ფიჭური ელემენტების ბლოკი გამოიმუშავებს, რომლის სამუშაო ტანი მეთანოლი იქნება და რომელიც ავტომობილის ძირზე განლაგდება.

”ჩემს მიერ შექმნილი ავტომობილი გარემოსადმი მეგობრული ტექნოლოგიებით აღიჭურვება. წარმოიდგინეთ სპორტული ავტომობილი, რომელიც იტალიური სუპერქარებივით ტემპერამენტიანი და თანამედროვე კომპაქტური ავტომობილებივით ეკონომიური იქნება. მასში თქვენ დაინახავთ გადაადგილების ინდივიდუალური საშუალების მომავალს”, - ამბობს პროექტის ავტორი.

ცნობისათვის, როსინიოლოს სულ სამი მოდელის - კუპეს, სედანისა და ქროსოვერის წარმოება აქვს განზრახული. წარმოების წლიური მოცულობა კი, თავიდან მხოლოდ 8 000 იქნება.

”ფოლკსვაგენი” ”ალფა რომეოს” შეძენითაა დაინტერესებული

Volkswagen Courting Alfa Romeo

24 აგვისტო

ცოტა ხნის წინ, ეს ისეთ ჭორად შეიძლებოდა ჩათვლილიყო, რომელსაც ყურადღებასაც კი არავინ მიაქცევდა. მაგრამ როგორც ჩანს, ინტერნეტით რამდენიმე თვის წინ გავრცელებულ ხმებს საფუძველი მაინც აქვს. მათ მიხედვით, ევროპის უდიდეს საავტომობილო ჯგუფ ”ფოლკსვაგენს”, იტალიური ”ალფა რომეოს” შესყიდვა სურს. თუმცა, იგივე წყარო გვამცნობს, რომ ამის სასტიკი წინააღმდეგია ”ფიატი”, რომლის ჯგუფშიც დღეისათვის მილანური კომპანია შედის.

როგორც ცნობილია, ”ფოლკსვაგენს” ამბიციური მიზანი აქვს - 2018 წლისთვის, გერმანულ გიგანტს მსოფლიო ლიდერობის ხელში ჩაგდება აქვს გადაწყვეტილი. ამ მიზნის მისაღწევად კი ძიერ გამოადგება თავისი ქოლგის ქვეშ ისეთი ცნობადი მარკის შეყვანა, როგორიც ”ალფა რომეოა”.

დარგის ანალიტიკოსები ვარაუდობენ, რომ მილანურ კომპანიას განვითარების უკეთესი შანსი სწორედ ”ფოლკსვაგენის” ხელში გადასვლის შემდეგ გაუჩნდება. ”ფიატთან” კი მას მომავალი არ აქვს. არადა, ტურინელებმა, კერძოდ კი მათმა შეფმა სერჯო მარკიონემ, ”ალფას” რესტრუქტურიზაციის და კრიზისიდან გამოყვანის გეგმა ახლახანს წარმოადგინა.

”ფიატის” და ”კრაისლერის” შეფის გეგმის მიხედვით, ”ალფა რომეოს” გაყიდვებმა მალე ნახევარ მილიონს უნდა მიაღწიოს. არადა, შარშან ამ კომპანიამ მხოლოდ 100 ათასზე ოდნავ მეტი ავტომობილის გაყიდვა შეძლო.

”შესაძლოა, ოდესმე ”ალფამ” მართლაც შეძლოს ნახევარი მილიონი ავტომობილის გაყიდვა, მაგრამ ეს მხოლოდ მას შემდეგ მოხდება, რაც ”ფოლკსვაგენის” ხელში გადავა”, - საინტერნეტო გამოცემა ”ავტონიუს იუროპთან” საუბრისას განაცხადა ”კრედიტ სუისის” საავტომობილო ბაზრის კვლევის განყოფილების შეფმა არნდტ ელინგჰორსტმა.

სხვა ანალიტიკოსები იმაზე ფიქრობენ, თუ რა გზით შეიძლება შეუერთდეს ”ალფა რომეო” ”ფოლკსვაგენის” მრავალეროვნულ ოჯახს, რომელშიც ერთი იტალიური კომპანია - ”ლამბორგინი” უკვე ფიგურირებს. მაგალითად, საკვლევი ფირმა ”ბერნშტაინის” ცნობილი ანალიტიკოსი მაქს უორბარტონი ვარაუდობს, რომ ვოლფსბურგული გიგანტის ჯგუფში, ”ალფა რომეო” ესპანურ ”სეატს” ჩაანაცვლებს, რომელსაც ისტორიას ჩააბარებენ.

თუმცა, ყველა ვარაუდი ფუჭი იქნება, თუ ”ალფა რომეოს” გაყიდვას არ მოისურვებს ”ფიატი”. ეს კი ნაკლებად სავარაუდოა, რადგან ტურინული გიგანტის შეფ მარკიონეს მიაჩნია, რომ მალე დადგება ის დრო, როდესაც კონკურენციას მხოლოდ რამდენიმე მსხვილი კომპანია გაუძლებს. დანარჩენები კი ”ბრძოლის ველზე” დაეცემიან. ასე რომ, ”ალფას” ხელიდან გაშვება მარკიონეს სტრატეგიულ გეგმას ეწინააღმდეგება.