ამერიკელები „ტოიოტას“ აღარ ენდობიან

Reputation rankings of Toyota plummeted this year

6 მაისი

სამარკეტინგო კომპანია „პროფეტმა“ ამერიკაში მომუშავე კომპანიების რეპუტაციის ყოველწლიური რეიტინგი გამოაქვეყნა, რომელშიც 150 ყველაზე პოპულარული კომპანიის მონაცემები შევიდა. კომპანიის მიერ ჩატარებულმა გამოკვლევამ აჩვენა, რომ მნიშვნელოვნადაა დაცემული „ტოიოტას“ რეპუტაცია.

იაპონური კომპანია შარშანწინ ამ რეიტინგის ავტომწარმოებელთა სიის სათავეში იმყოფებოდა, შარშანდელი მონაცემებით კი მხოლოდ მეექვსეა. შეფასება 100-ქულიანი სისტემით ხდება. „ტოიოტამ“ ამ სისტემით, 2009 წელს 75.5 ქულა დააგროვა, თუმცა მისი შარშანდლი მონაგარი მხოლოდ 51.3 ქულა იყო. „პროფეტის“ ანალიტიკოსები ამბობენ, რომ ამერიკელ ავტომოყვარულთა თვალში „ტოიოტას“ რეპუტაციის რყევა 2009 წლიდან დაიწყო, როდესაც კომპანიამ ტექნიკური დეფექტების გამო, მილიონობით ავტომობილი გაიხმო.

150 კომპანიის რეიტინგში, „ტოიოტამ“ 139-ე ადგილი დაიკავა. არადა, ერთი წლით ადრე, იმავე სიაში მე-18 იყო. ავტომწარმოებლებს შორის, ამერიკელები ყველაზე მეტად „ჰონდას“ პროდუქციას ენდობიან, რომელსაც 72.8 ქულა დაუგროვდა, რითაც 30-ე ადგილზეა. 72 ქულით 34-ე ადგილი „ბეემვეს“ უკავია, 68.8 ქულით 55-ზეა „ნისანი“. შემდეგ მოდიან: „ფოლკსვაგენი“ (68.6 ქულა, 56-ე ადგილი), „ფორდი“ (67.8 ქულა და მე-60 ადგილი) და „ჯენერალ მოტორსი“ (63.5 ქულა, 83-ე ადგილი).

რეპუტაციის რეიტინგის შესადგენად, „პროფეტმა“ მთელს ამერიკაში 4 900 ადამიანი გამოკითხა, რომელთაგან თითოეულს, სიაში შეტანილი კომპანიების (სულ ასეთი, ამერიკის ეკონომიკის 18 სფეროში მოქმედი 500 კომპანია იყო) რეპუტაცია, ასქულიანი სისტემით უნდა შეეფასებინა. გამოკითხვის შედეგად, შარშან ამერიკაში ყველაზე ავტორიტეტული კომპანიის წოდება პროდუქტების მწარმოებელმა „კრაფტ ფუდსმა“ მოიპოვა (81.3 ქულა). მის გარდა, ავტორიტეტული კომპანიების სიაში ასევე, სედა ადგილები, „სონიმ“, „უოლტ დისნეიმ“, „კოკა კოლამ“, „ნესტლემ“ და „ეპლმა“ დაიკავეს.

და ისევ „ტოიოტას“ შესახებ: ორ წელიწადში იაპონურმა კომპანიამ მთელი მსოფლიოს მასშტაბით, ტექნიკური წუნის გამო, 19.2 მილიონი ავტომობილი გაიხმო, გაცილებით მეტი, ვიდრე ამავე პერიოდში გაჰყიდა. აქედან 13.7 მილიონი ავტომობილის გახმობა მარტო ამერიკაში მოუხდა. გახმობის მტავარი მიზეზ აქსელერატორის სატერფულის გაჭედვა გახდა, რასაც ავტომობილის უნებლიე აჩქარება და ავარიები მოჰყვებოდა.

„აუდი“ სპორტულ R4-ზე უარს ამბობს

Oh No: Audi Rumored to Axe the R4!

6 მაისი

ჯერ ეს ოფიციალურად დადასტურებული არაა, თუმცა გერმანული გამოცემა „აუტო მოტორ უნდ შპორტი“ ავრცელებს ინფორმაციას იმის შესახებ, რომ „აუდიმ“ კონცეპტუალურ მოდელ R4-ის კონვეიერზე დაყენებისგან თავი შეიკავა. ამის მიზეზად კი ის გარემოება სახელდება, რომ ბაზარზე გამოსვლის შემთხვევაში, ეს ავტომობილი კონკურენციას „აუდისვე“ TT-ს, „პორშეს“ „ბოქსსტერსა“ და „კაიმანს“ გაუწევს. ამასთან, გერმანული კომპანიის ხელმძღვანელობას მიაჩნია, რომ R4-ის ბაზაზე ანალოგიური კლასის „ფოლკსვაგენბლიუსპორტი“ მეტისმეტად ძვირი ეღირება და მას პერსპექტივა არ აქვს.

ინგოლსთადტელებს R4-ის ბაზისად, კონცეპტუალური e-ტრონი უნდა გამოეყენებინათ, რომლის დებიუტიც შარშან, დეტროიტის ავტო შოუზე შედგა. ეს ავტომობილი ელექტრული ძალური დანადგარითაა აღჭურვილი. წინა და უკანა ღერძებს, თითო ელექტროძრავი ემსახურება, რომელთა ჯამური სიმძლავრეც 150 ცხენის ძალას, მაქსიმალური მაბრუნი მომენტი კი 2 650 ნიუტონმეტრს (სწორედ ეს რიცხვი ეწერა კომპანიის საგამოფენო პრეს რელიზში) შეადგენს.

„აუდისავე“ მონაცემებით, ამ ელექტროძრავების დახმარებით, ავტომობილს ადგილიდან 100 კმ/სთ-ის აკრეფა 5.9 წამში შეუძლია, მისი მაქსიმალური სიჩქარე კი (ენერგიის დაზოგვის მიზნით), 200 კმ/სთ ნიშნულითაა შეზღუდული. მისი წარმოების დაწყების შემთხვევაში, ავტომობილი შიდაწვის ძრავების გარდა, ელექტროძრავებიტაც უნდა აღჭურვილიყო.

„აუტო მოტორ უნდა შპორტისვე“ ინფორმაციით, გადაიდო შემდეგი თაობის A2-ის წარმოება. ამის მიზეზი ისაა, რომ ტავიდან, ამ მანქანისთვის ახალი პლატფორმის შემუშავება იყო განზრახული, თუმცა შემდეგ ამისგან თავი შეიკავეს, რადგან სრულიად ახალი პლატფორმა ძალიან ძვირი დაჯდებოდა. ახლა კი „აუდი“ „ფოლკსვაგენის“ ახალი, უნივერსალური პლატფორმის შემუშავებას დაელოდება, რომელსაც გერმანულ ჯგუფში შემავალი ყველა სერიული მწარმოებელი გამოიყენებს.

„ჰიუნდაი“ დებიუტისთვის სედან i40-ს ამზადებს

Hyundai to Unveil i40 Saloon in Barcelona

6 მაისი

რამდნიმე დღე და „ჰიუნდაი“ ბარსელონას საავტომობილო შოუზე, i40-ის სედანისძარიან ვერსიას წარადგენს. ჯერ მხოლოდ ორი თვე გავიდა მას შემდეგ, რაც კორეულმა კომპანიამ ამ საშუალო ზომის ავტომობილის უნივერსალისძარიანი ვერსია ჟენევის ავტო შოუზე გვიჩვენა. ახლა კი სედანის ჯერი დადგა.

ახალი ავტომობილით, „ჰიუნდაი“ წინა თაობის „სონტას“ შეცვლის და ის ევროპულ D სეგმენტში, ისეთ პოპულარულ ავტომობილებს გაუწევს კონკურენციას, როგორებიცაა „ოპელ ინსიგნია“, „ფოლკსვაგენ პასატი“, „ტოიოტა ავენსისი“ და „სიტროენ C5“.

ისევე როგორც უნივერსალი, სედანი i40-ც „ჰიუნდაის“ კვლევისა და განვითარების ევროპული ცენტრის მიერაა შემუშავებული, რომელიც გერმანიის ქალაქ რიუსელსჰაიმში მდებარეობს. ჯერჯერობით, კორეული კომპანია თავისი მორიგი სიახლის შესახებ, მხოლოდ მწირ ინფორმაციას ავრცელებს. უფრო კონკრეტულად კი, ავტომობილის ბორბლებს შორის ბაზა 2.77 მეტრია და ამ მაჩვენებლით, ის თავის კლასში ლიდერი იქნება.

უფრო მეტიც, გამოქვეყნებული ინფორმაციით, ავტომობილის წინა სავარძელზე მსხდომთა თავებისთვის, სავარძლის ძირიდან სახურავამდე მანძილი 1025 მილიმეტრია, მხრების დონეზე სალონის სიგანე 1455 მილიმეტრი, ფეხებისთვის განკუთვნილი სივრცის სიგრძე კი - 1170 მილიმეტრი. ყველა ამ პარამეტრით, საშუალო ზომის სედანების კლასში, i40 ლიდერი იქნება.

„როცა i40-ზე ვმუშაობდით, ჩვენი მიზანი ის იყო, რომ სედანებისთვის სტანდარტული, სამმოცულობიანი სქემა დაგვერღვია და ამ ავტომობილისთვის სპორტული ხასიათი მიგვენიჭებინა. დაგრძელებული, დაბლა დაწეული სახურავი, ავტომობილს სწორედ სპორტულ იერს აძლევს“, - ამბობს „ჰიუნდაი მოტორ იუროპის“ ტექნიკური ცენტრის მთავარი ინჟინერი თომას ბიურკლე.

სავარაუდოდ, სედანი i40-იც საბაზო აღჭურვილობაში იმავე ძრავებს მიიღებს, რომლებიც უნივერსალზე გვხვდება. ესაა 1.7-ლიტრიანი ტურბო დიზელი და ბენზინის 2.0-ლიტრიანი ძრავი. მათ შესახებ კონკრეტული ინფორმაცია 12 მაისს, მანქანის მსოფლიო პრემიერის დროს გამოქვეყნდება.

სედან i40-ს პირველ ეგზემპლარს, „ჰიუნდაის“ ქართველი დისტრიბუტორი, კომპანია „ჰიუნდაი ავტო ჯორჯია“, ამ წლის ბოლოს შემოიტანს, მის გაყიდვებს კი მომავალი წლიდან შეუდგება.

„იაგუარ ლენდ როვერი“ 40 ახალ ავტომობილს გეგმავს

Jaguar Land Rover planning 40 new debuts

5 მაისი

როგორც ჩანს, „იაგუარ ლენდ როვერს“ გამყინვარების და სტაგნაციის პერიოდი დაუმთავრდა და ინგლისური კომპანია, რომელიც არცთუ დიდი ხანია, რაც ინდური „ტატას“ ხელში გადავიდა, განვითარებაზე ზრუნვას შეუდგა. მაგრამ ახლანდელი სამოდელო გამით, განვითარებაზე ლაპარაკიც ზედმეტია. ასე რომ, ბრიტანული კომპანიები“ სწორედ ამ ნაკლის გამოსწორებას ეცდებიან - ბაზარზე 40 ახალ პროდუქტს გამოიტანენ. მათ შორის, სრულიად ახალ მოდელებს და არსებულების მოდიფიკაციებს.

ინტერნეტ გამოცემა „დეტროიტ ბიუროს“ ინფორმაციით, „იაგუარის“ უპირველესი გეგმა ისაა, რომ მე-3 სერიის „ბეემვეს“ კონკურენტის წარმოება განაახლოს. ამ სეგმენტში „დიდი კატა“ კარგა ხანს X-ტაიპს უშვებდა, მაგრამ ამ ავტომობილმა მოლოდინი ვერ გაამართლა და შესაბამისად, „იაგუარმაც“ მისი შეცვლა აღარ ისურვა - საერთოდ მოხსნა წარმოებიდან.

სავარაუდოა, რომ ახალი X-ტაიპი მარტო სედანის ძარით არ გამოვა. მის ბაზაზე უნივერსალს, ორ და ოთხკარიან კუპეს, კაბრიოლეტს და ალბათ ჰეჩბეკსაც გამოუშვებენ. პრემიუმ სეგმენტის გერმანელმა კომპანიებმა არაერთხელ დაამტკიცეს, რომ ერთი მოდელის ბაზაზე რამდენიმე დერივატივის წარმოება შეიძლება და ახლა მათს მაგალითს ალბათ მალე „იაგუარიც“ მიბაძავს.

კიდევ ერთი ახალი მოდელი იქნება დიდი ზომის ქროსოვერი, რომლის მსგავსიც, ამ ინგლისურ კომპანიას ჯერ არასდროს უწარმოებია. თანაც, ეს ნათესავი „ლენდ როვერის“ ტერიტორიაა და კარგი არ იქნება, მას რომ ბიზნესში ხელი შეეშალოს. თუმცა, „კატები“ ალბათ ეგრეთ წოდებული საპარკეტო ქროსოვერის წარმოებას დაიწყებენ, თავის ნათესავს კი დიდი გამავლობის უგზოობის მოდელების სეგმენტს დაუტოვებენ. მოკლედ, „იაგუარის“ ქროსოვერი „აუდის“ Q7-ის და „ბეემვეს“ X5-ს გაუწევს კონკურენციას. იმავდროულად, ინგლისური კომპანია უფრო პატარა ქროსოვერის წარმოებაზეც იზრუნებს.

გარდა ამისა, „იაგუარი“ და მასთან ერთად „ლენდ როვერიც“, საკუთარი ძრავების გამასაც გააფართოებენ. ამ გამაში მალე დიზელის ახალი აგრეგატები, ჰიბრიდული სისტემები და ელექტროძრავები გამოჩნდება. სამწუხაროდ, „იაგუარი“ არ აპირებს ამ გამაში ტურბინული ჰიბრიდის შეტანას. არადა, ეს აგრეგატი მან კონცეპტუალურ სუპერ ავტომობილ „იაგუარ C-X75-ისთვის“ (ფოტოზე) გამოიყენა, რომლითაც პარიზის შარშანდელი ავტო შოუს დამთვალიერებელი და დამსწრე სპეციალისტები აღაფრთოვანა.

სამაგიეროდ, ინგლისურმა კომპანიამ ახლახანს გამოაცხადა, რომ ფორმულა 1-ის გუნდ „უილიამსთან“ ერთად, C-X75-ის ბაზაზე, ჰიბრიდულ სუპერქარს გამოუშვებს. ოღონდ, მის სისტემაში შიდაწვის 1.6-ლიტრიანი ტურბო აგრეგატი შევა. სხვათა შორის, ეს ძრავი ფ1-ის ახალი სპეციფიკაციების შესაბამისად დამზადდება და მისი სიმძლავრე 500 ცხენის ძალას მიაღწევს. ჰიბრიდულ სისტემაში ასევე ორი ელექტროძრავი (თითო ღერძზე თითო) და ლითიუმ-იონური აკუმულატორების ბლოკი შევა. „იაგუარი“ და „უილიამსი“ მხოლოდ 250 ცალ ასეთ სუპერ ავტომობილს გამოუშვებენ.

„ფოლკსვაგენი“ რალის მსოფლიო ჩემპიონატზე გამოვა

Volkswagen Polo WRC

5 მაისი

იტალიის კუნძულ სარდინიაზე, სადაც რალის მსოფლიო ჩემპიონატის მორიგი ეტაპი ტარდება, „ფოლკსვაგენმა“ სპეციალური პრესკონფერენცია მოაწყო, რომელზეც დაადასტურა ადრე გავრცელებული ინფორმაცია იმის შესახებ, რომ მომავალი სეზონიდან, ჩემპიონატში მონაწილეობას მისი საქარხნო გუნდი მიიღებს. ოღონდ, ეს იქნება ცალკეულ ეტაპებზე გამოსვლები, 2013 წელს კი გერმანული კომპანიის გუნდი, სეზონის ყველა ეტაპზე მიიღებს მონაწილეობას.

ვოლფსბურგელები რბოლებისთვის შემდეგი თაობის „პოლოს“ მოამზადებენ. ამ ჰეჩბეკის სარბოლი ვერსიის შემუშავებას ფრანგი ფრანსუა-ქსავიე დემასონი ხელმძღვანელობს, ვინც თავის დროზე, „პეჟოსა“ და „სუბარუს“ საქარხნო გუნდებში მუშაობდა. სულ ახლახანს კი ის „ფოლკსვაგენის“ გუნდს დაკარის რალიზე კონსულტაციებს უწევდა.

ჯერჯერობით გარკვეული არაა, თუ ვინ მიუჯდება სარბოლი „ფოლკსვაგენ პოლოს“ საჭეს. ამ ეტაპზე, გერმანული კომპანიის სპორტული შტო, მოლაპარაკებას ყატარელ ნასერ ალ ატიასთან და ნორვეგიელ პეტერ სოლბერგთან აწარმოებს. პირველი წლევანდლი დაკარის ჩემპიონია (რალი-მარათონი ფოლკსვაგენის მანქანით - ტუარეგით მოიგო), მეორე კი - მსოფლიოს 2003 წლის ჩემპიონი. მიმდინარე სეზონში, ალ ატია რალი მარათონში მონაწილეობს, სოლბერგი კი რალის მსოფლიო ჩემპიონატში (სიტროენის მანქანით).

იმავდროულად, „ფოლკსვაგენმა“ გამოაცხადა, რომ ამ სეზონის დასრულების შემდეგ, რალი მარათონებში მონაწილეობას აღარ მიიღებს. დაკარისთვის განკუთვნილ ბიუჯეტს კი მთლიანად რალის მსოფლიო ჩემპიონატისკენ გადაამისამართებს. ეს კი იმას ნიშნვს, რომ მის გუნდს ასმილიონევროიანი ბიუჯეტი ექნება.

სარბოლი მანქანა ჯერაც შემუშავების სტადიაშია. თუმცა უკვე ცნობილია, რომ ის 1.6-ლიტრიანი TSI ტურბოძრავით აღიჭურვება, რომელსაც საწვავი ნარევის უშუალოდ წვის კამერაში მიწოდების სისტემა მოემსახურება. ძრავის სიმძლავრე 300 ცხენის ძალა (მეტი რეგლამენტით დაუშვებელია), მაბრუნი მომენტი კი 350 ნიუტონმეტრი იქნება. ძრავს სეკვენტალური გადაცემათა კოლოფი დაუკავშირდება, რომლის გავლითაც, ტრანსმისია მაბრუნ მომენტს ოთხივე წამყვან ბორბალს გადაუნაწილდება. ავტომობილის მინიმალური წონა (უფრო ნაკლები რეგლამენტით დაუშვებელია) კი 1 200 კილოგრამი იქნება.

პირველი დეტალები „პორშეს“ ახალ ფლაგმანზე

First details of Porsche's next 911-based flagship, the 961

4 მაისი

„პორშე“ თავისი ახალი ფლაგმანის შემუშავებას შეუდგა. გერმანული მედიის ინფორმაციით, ახალი სუპერ ავტომობილი ჰიბრიდულ კონცეპტუალურ მოდელ „918 სპაიდერის“ მოტივებზე შეიქმნება და ის რვაცილინდრიანი ძრავით აღიჭურვება.

ახალი ავტომობილისთვის, ცუფენჰაუზენელებს სახელად 961 აქვთ შერჩეული, რომელსაც ისინი 1986 წლიდან, თავიანთი სარბოლი ავტომობილისთვის იყენებდნენ, რომლითაც ლე მანის 24-საათიან რბოლაში მიიღეს მონაწილეობა.

სხვათა შორის, ძველი 961 „პორშემ“ თავდაპირველად, რალის მსოფლიო ჩემპიონატისთვის შექმნა, თუმცა პორტუგალიის რალის დროს მომხდარი სამი ავარიის გამო, მაშინ B ჯგუფის მანქანებით (რალის ისტორიაში ყველაზე მძლავრი მანქანები) მსოფლიო ჩემპიონატზე ასპარეზობა აიკრძალა. ამიტომ, „პორშემ“ შემუშავებული ტექნოლოგია ლე მანზე საასპარეზოდ გამოიყენა.

ახალი 961, პირველ რიგში, სამოქალაქო დანიშნულებისთვის იქმნება, თუმცა მომავალში მას ალბათ სარბოლ ტრასებზეც ვიხილავთ. ჯერჯერობით უცნბია V8 ძრავის მახასიათებლები, რადგან ის შემუშავების სტადიაშია. სამაგიეროდ, არის ვარაუდი იმისა, რომ მწარმოებელი მყიდველს ოპციის სახით, ჰიბრიდულ ძალურ დანადგარსაც შესთავაზებს. ამ შემთხვევაში, ჰიბრიდული სისტემის ჯამური სიმძლავრე 600 ცხენის ძალას მიაღწევს.

სხვათა შორის, „პორშე“ ჰიბრიდული „918 სპაიდერის“ (ფოტოზე) წარმოებასაც აპირებს, ოღონდ ის შეზღუდული რაოდენობით, მხოლოდ 918 ცალი დამზადდება. მის ჰიბრიდულ სისტემაში 4.0-ლიტრიანი V8 ძრავი (სიმძლავრე 500 ცხენის ძალა) და ორი ელექტროძრავია (თითო ღერძზე თითო) გაერთიანებული. ელექტროძრავების ჯამური სიმძლავრე 218 ცხენის ძალას აღწევს. შიდაწვის ძრავთან, ორდისკოიანი ქუროს საშუალებით, სეკვენტალური კოლოფია შეწყვილებული, ელექტროძრავები კი ენერგიას ლითიუმ-იონური აკუმულატორების ბლოკისგან ღებულობენ, რომელსაც სითხით გაგრილების სისტემა ემსახურება.

ევროპაში ასეთი ჰიბრიდული სუპერ ავტომობილის ფასი 645 000 ევრო იქნება, მოდელი 961 კი დაახლოებით 200 000 ევრო ეღირება.

„მაკლარენის“ სუპერქარი სარბოლოდ მზადაა

McLaren MP4-12C GT3 Unveiled

4 მაისი

ბრიტანულმა კომპანია „მაკლარენ აუტომოტივმა“ თავისი უახლესი სუპერ ავტმობილის, MP4-12C-ს ბაზაზე დამზადებული სარბოლი ავტომობილის შესახებ ინფორმაცია და მისი ფოტოები გაავრცელა. ეს ავტომობილი GT3 სერიის შესაბამისადაა მომზადებული და მან მომავალი სეზონიდან, ლე მანის სერიასა და GT-ს კლასის მსოფლიო ჩემპიონატში უნდა მიიღოს მონაწილეობა.

„მაკლარენტან“ ერთად, ამ ავტომობილის შემუშავებაში მონაწილეობა ცნობილი გუნდის, „CRS რეისინგის“ სპეციალისტებიც მუშაობდნენ. ამ გუნდს, ლე მანისა და GT-ს სერიის რბოლებში მონაწილეობის დიდი გამოცდილება აქვს და პროექტში მის მონაწილეობას დიდი მნიშვნელობა ჰქონდა. სარბოლი ავტომობილის შექმნაში ასევე მონაწილეობდა ბრიტანული კომპანია „რიკარდო“, რომელმაც ძრავის სრულყოფასა და ტრანსმისიის შემუშავებაში მიიღო მონაწილეობა.

სარბოლი ავტომობილი იმავე, 3.8-ლიტრიანი V8 წყვილტურბოიანი ძრავითაა აღჭურვილი, რომლითაც მისი საგზაო ვერსია. ოღონდ, ძრავს 100 ცხენის ძალა მოაკლეს და ახლა ის 500 ცხენის ძალას გამოიმუშავებს. ძრავთან 6-საფეხურიანი სეკვენტალური გადაცემათა კოლოფია დაკავშირებული.

„მაკლარენ MP4-12C GT3“ რეგულირებად სარბოლ საკიდარს ეყრდნობა, ძარა კი რბოლის სპეციფიკის შესაბამისად შემუშავებული აეროდინამიკური ეკემენტებითაა ასხმული. მათ შორისაა რეგულირებადი უკანა ფრთა და მრავალსეგმენტიანი უკანა დიფუზორი. მოდერნიზაცია ჩაუტარდა საწვავის მიწოდების სისტემას, შემშვაბ და გამომშვებ კოლექტორებს, ფაქტობრივად ახალია გაგრილების სისტემა. მანქანის შენელებას წინ ექვსცილინდრიანი მექანიზმი და მასთან შეწყვილებული 378-მილიმეტრიანი დისკო უზრუნველყოფს, უკან კი - ოთხცილინდრიანი მექანიზმი და მასთან ერთად, 355-მილიმეტრიანი დისკო უზრუნველყოფს.

„მაკლარენი“ ირწმუნება, რომ 20-ვე MP4-12C GT3, რომლების წარმოებაც მერმისს იგეგმება, უკვე შეკვეთილია. ამდენივე ავტომობილზე შეკვეთას კი მომდევნო წლებშიც მიიღებს. პირველად MP4-12C GT3 ესპანეთის ტრეკ ნავარაზე იასპარეზებს. ამას მოჰყვება გამოსვლები მანი კურსა (საფრანგეთი) და სილვერსტოუნზე (ბრიტანეთი). მანქანის საჭეს, ფორმულა „რენო 3.5-ის“ ჩემპიონი ალვარო პარენტე და სერია GP2 ეიჟას შარშანდელი მონაწილე ოლივერ ტერვი მიუჯდებიან.

„ოპელი“ კუპე „კალიბრას“ გამოშვებას განაახლებს

Opel Calibra

4 მაისი

ოპელ ფლექსტრიმ GTE

..............................

„ოპელის“ ხელმძღვანელობამ მიიღო გადაწყვეტილება, რომლის თანახმადაც, გერმანული კომპანია მალე ისევ გამოუშვებს ერთ დროს პოპულარულ კუპე „კალიბრას“. ეს ინფორმაცია ინტერნეტ ბლოგერებმა გაავრცელეს, რომლებსაც ხელში „ოპელის“ შესაბამისი დოკუმენტაცია ჩაუვარდათ.

ამ ინფორმაციის მიხედვით, ახალი „კალიბრა“ მოდელ „ინსიგნიას“ პლატფორმას დაეყრდნობა და მისსავე აგრეგატებით აღიჭურვება. კუპეს გარეგნობა კი ორი კონცეპტუალური ავტომობილის - GTC-ს და „ფლექსტრიმ GT-ს“ დიზაინის ერთგვარი კომბინაცია იქნება. სხვათა შორის, ტავის დროზე, GTC-ს დიზაინის ელემენტები „ოპელმა“ „ინსიგნიაზეც“ გამოიყენა.

ოპელ GTC

..............................

რამდენადაც „ინსიგნიას“ პლატფორმაზე აიგება, ახალ „კალიბრას“ წინა წამყვანი ბორბლები ექნება. ამასთან, მისი ტოპ ვერსია სრულამძრავიანი ტრანსმისიით (ინსიგნია OPC-სგან) აღიჭურვება. ტოპ ვერსია 2.8-ლიტრიანი ექვსცილინდრიანი ტურბოძრავით აღიჭურვება, რომლის სიმძლავრეც 325 ცხენის ძალას მიაღწევს. ამ აგრეგატსაც მას „ინსიგნია OPC“ გაუზიარებს.

მოსალოდნელია, რომ ახალი „კალიბრა“ ზოგიერთი იმ აეროდინამიკური ელემენტით აღიჭურვოს, რომლებიც რიუსელსჰაიმელებმა შარშანდელ კონცეპტუალურ „ფლექსტრიმზე“ გამოიყენეს. ეს ავტომობილიც, გაბარიტებით ახლოსაა „ინსიგნიასთან“ და ის „ოპელის“ მოძრავ ლაბორატორიას წარმოადგენს.

მისი მზიდი ნაწილი ალუმინის შენადნობებისგანაა დამზადებული, ძარა კარბონის ბოჭკოს კომპოზიტისგან, შუშები კი პოლიკარბონატისგან. ამის წყალობით, „ფლექსტრიმი“ სედან „ინსიგნიაზე“ დაახლოებით 40 პროცენტით მსუბუქი გამოვიდა. გარდა ამისა, ავტომობილი აქტიური აეროდინამიკური ელემენტებითაა აღჭურვილი, რომელთა წყალობითაც, მისი აეროდინამიკური წინააღმდეგობის კოეფიციენტი სულ რაღაც 0.22-ია. დაკიდევ, „ფლექსტრიმი“ პლაგ-ინ ჰიბრიდული სისტემითაა აღჭურვილი, დაახლოებით ისეთით, როგორსაც „ოპელი“ სერიულ „ამპერაზე“ იყენებს.

ახალ „კალიბრას“ „ოპელი“ თავის რიუსელსჰაიმის ქარხანაში გამოუშვებს. წლიურად სულ რაღაც 14 000 კუპე დამზადდება. ცნობისათვის, პირველი „კალიბრა“ ბაზარზე რვა წლის განმავლობაში დარჩა და ამ დროში, 240 000 ცალი გაიყიდა. სავარაუდოდ, ახალი „კალიბრას“ გაყიდვები 2013 წელს დაიწყება.

ნიუ იორკმა ახალი ტაქსი აირჩია

Nissan wins bid to be next New York City taxi

3 მაისი

მალე ნიუ იორკი თავის ცნობილ ყვითელ ტაქსებს გამოცვლის და ამ დანიშნულებით, „ნისანის“ მინივენებს გამოიყენებს. სწორედ იაპონურმა კომპანიამ მოიგო ქალაქის ტაქსისა და ლიმუზინების კომისიის მიერ ორგანიზებული კონკუსი, რომელშიც მის გარდა თურქული „კარსან ოტომოტივი“ და „ფორდი“ მონაწილეობდა.

აღსანიშნავია, რომ კონკურსის ბოლო ეტაპის წინ, ფავორიტად თურქული კომპანია იყო მიჩნეული, რომელიც პირობას დებდა, რომ თავის ავტომობილებს ნიუ იორკშივე (ბრუკლინში) დაამზადებდა და მათ წარმოებაში, 800 ადამიანს დაასაქმებდა. მაგრამ საბოლოოდ, 10-წლიანი კონტრაქტი, რომელიც 1 მილიარდ დოლარადაა შეფასებული და რომელიც ნიუ იორკისთვის 13 000 ავტომობილის მიწოდებას ითვალისწინებს, „ნისანის“ ნადავლი გახდა.

ამჟამად, „დიდი ვაშლის“ ტაქსომოტორებში სულ 16 განსხვავებული ავტომობილი მუშაობს. „ნისანს“ ყველა მათგანის შეცვლა დაევალება. ავტომობილი, რომელიც მალე ყვითელ ფორმაში გამოეწყობა, მინივენ „ნისან NV200-ზე“ იქნება ბაზირებული. იაპონური კომპანია მის მიწოდებას 2013 წელს დაიწყებს.

ავტომობილი, რომელსაც „ნისანი“ ნიუ იორკის ტაქსისთვის დაამზადებს, ბენზინის 2.0-ლიტრიანი ძრავით, შუშის დამუქებული სახურავით, მგზავრების კაბინის კონდიცირების სისტემით, მობილურის დასამუხტი წერტილით და ორი USB-პორტით აღიჭურვება. მანქანას გვერდზე გასაწევი კარი ექნება, რომელზეც გაღებისას სპეციალური შუქ-სიგნალები აინთება, რათა გზაზე მოძრავი ავტომობილების მძღოლებმა სიფრთხილე გამოიჩინონ.

ნიუ იორკისთვის განკუთვნილ ავტომობილებს „ნისანი“ თავის მექსიკურ (კუერნავაკაში) ქარხანაში ააწყობს. წინასწარი ინფორმაციით, თითოეული ავტომობილის ფასი 29 000 დოლარი იქნება.

„კრაისლერმა“ დიდი, ძალიან დიდი პიკაპი დაამზადა

Ram Goes Big, Really Big with New Long-Hauler Concept Truck

3 მაისი

„კრაისლერი“ იქადნის, რომ „ისინი (კონკურენტები) მის ახალ ქმნილებაზე დიდს ვერაფერს შექმნიან“. ამ ქმნილებას კი კონცეპტუალური „რემ ლონგ ჰაულერ“ ჰქვია. ფოტოს ნახვისას უკვე მიხვდებოდით - ეს წარმოუდგენლად დიდი მანქანა პიკაპია. ასეთებზე ამერიკაში აბოდებთ, ასეთი მანქანები იქ ყველაზე პოპულარულია, სედანებზეც კი. მაგრამ ის დრო წავიდა, როდესაც ამერიკული კომპანიები ერთმანეთს გიგანტების შექმნაში ეჯიბრებოდნენ.

ახლა „ჯენერალ მოტორსიც“ კი იმაზე ზრუნავს, რომ ეკონომიური ავტომობილების მწარმოებლის იმიჯი მოირგოს. და ამიტომ, ის ასეთ დიდ მანქანებს აღარ გამოუშვებს. ასე რომ სდომოდათ, „გენერლები“ „ჰამერს“ ტავიდან არ მოიშორებდნენ. „ფორდი“ ხომ ისედაც, ყველაზე ეკონომიური ავტომობილების მწარმოებელი ამერიკული კომპანია იყო. მოკლედ, კონკურენტებს „ამაზე დიდი პიკაპის“ შექმნას არც ეცდებიან.

„ლონგ ჰაულერი“ მე-5 კლასის პიკაპ „რემ 5500-ის“ შასიზეა ბაზირებული, თუმცა პლატფორმა საგრძნობლადაა დაგრძელებული. ავტომობილის სიგრძე 7.3 მეტრია, ბორბლებს შორის ბაზა კი - 5.014 მეტრი. ამ ბაზაში E კლასის „მერსედეს ბენციც“ კი ჩაეტევა! მონსტრი კონცეპტუალური პიკაპის სიმაღლე ორ მეტრზე მეტია, ის 4.2 ტონას იწონის, სრულად დატვირთვის შემდეგ კი მისი წონა 16.7 ტონამდე შეიძლება გაიზარდოს. ამ ავტომობილის წონა თითქმის 2.5-ჯერ მეტია „მერსედეს ბენცის“ სედან E350-ზე.

ავტომობილი აღჭურვილია კომპანია „ქამინზის“ 6.7-ლიტრიანი ტურბოდიზელით, რომელსაც ერთ რიგში განლაგებული 6 ცილინდრი აქვს. ამ აგრეგატის სიმძლავრეს „კრაისლერი“ არ აქვეყნებს. სამაგიეროდ, სიამაყით გვამცნობს, რომ მისი მაბრუნი მომენტი 1083 ნიუტონმეტრს აღწევს. მასთან შეწყვილებულია 6-საფეხურიანი ავტომატური გადაცემათა კოლოფი, რომლიდანაც გადამუშავებული მაბრუნი მომენტი ოთხივე წამყვან ბორბალს (უკანები შეწყვილებულია) გადაეცემა.

ავტომობილი სამი უზარმაზარი ავზითაა აღჭურვილი, რომელთა საერთო ტევადობაც 643 ლიტრია. ეს კი საკმარისია იმისათვის, რომ მათი სრულად ავსებით, ავტომობილმა 2.5 ათასი კილომეტრი გაიაროს. საწვავზე ამერიკული ფასების გათვალისწინებით, ამდენი საწვავი დაახლოებით 750 დლარი ღირს.

გიგანტური ავტომობილი ალუმინის შენადნობისგან დამზადებულ 19.5-დუიმიან ბორბლებზე დგას, მისი საკიდარი პნევმატურია. უკანა ხედვას კი ვიდეოკამერა უზრუნველყოფს. სალონი აღჭურვილია დივიდი პლეიერით, მაცივრით და ინტერნეტის უკაბელო არხით. მაცივარი უკანა სავარძლებს შორის არსებულ უზარმაზარ ცენტრალურ კონსოლშია მოტავსებული.

„კრაისლერი“ აცხადებს, რომ „ლონგ ჰაულერი“ ჯერჯერობით მხოლოდ კონცეპტუალური ავტომობილია და მას კომპანია ამერიკაში დაგეგმილ 8 გამოფენაზე წარადგენს. ამ გამოფენებზე მიღებული გამოხმაურებების გაანალიზების შემდეგ კი მისი წარმოების საკითხიც განიხილება.

„ნოვიტეკმა“ ყველაზე სწრაფი „ალფა რომეო“ შექმნა

Novitec puts 600 horsepower on the Alfa Romeo 8C Spider

3 მაისი

„ალფა რომეო 8C კომპეტიციონე“ ულამაზესი ავტომობილია, საავტომობილო დიზაინის იტალიური შედევრი, თუმცა თურმე, საშინელი სამართავი და კაპრიზული მანქანა ყოფილა. ამის მიზეზი კი ისაა, რომ ის 90-იანი წლების „მაზერატის“ პლატფორმაზეა ბაზირებული. ამის გამო, მილანელები შეზღუდულები იყვნენ, როდესაც მასზე დასაყენებელ ძრავს ირჩევდნენ.

რა თქმა უნდა, მათ ამაში ვერავინ გაამტყუნებს - ავტომობილი სერიულად უნდა გამოსულიყო და პლატფორმის და ძრავის შეუსაბამობა დიდ პრობლემას წარმოქმნიდა. თუმცა, ამ გარემოებამ ვერ შეაშინა გერმანული სატუნინგო კომპანია „ნოვიტეკი“, რომელმაც „8C კომპეტიციონეს“ ღია ვერსიის - „8C სპაიდერის“ მოდერნიზება გადაწყვიტა.

პირველ რიგში, გერმანელმა ინჟინრებმა ძრავი გააძლიერეს. მათ 4.7-ლიტრიანი V8 აგრეგატი, რომლის სიმძლავრეც 450 ცხენის ძალა, მაქსიმალური მაბრუნი მომენტი კი 470 ნიუტონმეტრია, 600 ცხენის ძალამდე და 588 ნიუტონმეტრამდე გააძლიერეს. ძრავის გასაძლიერებლად, მათ მექანიკური დამჭირხნი და ჩასაბერი ჰაერის შუალედური გამაგრილებელი გამოიყენეს, რომელშიც ჰაერის ჩაბერვის წნევა 0.37 ბარს აღწევს. გარდა ამისა, ძრავს ახალი, რეგულირებადი გამოსაბოლქვი სისტემა დაუყენეს და ელექტრონული მართვის სისტემაც შეუცვალეს.

„ნოვიტეკის“ სპეციალისტების მიერ ჩატარებული მოდერნიზაციის შემდეგ, „8C სპაიდერის“ ტემპერამენტი მნიშვნელოვნად გაუმჯობესდა. ადგილიდან 100 კმ/სთ სიჩქარეს ის ახლა უკვე 3.9 წამში ავითარებს (სტანდარტულ ვერსიას ამისათვის 4.2 წამი სჭირდება), მისი მაქსიმალური სიჩქარე კი 305 კმ/სთ-ია, სტანდარტულისაზე 15 კმ/სთ-ით მეტი.

„ნოვიტეკი“ არაფერს ამბობს მუხრუჭებზე. სავარაუდოდ, მოდერნიზაცია ამ საპასუხის,გებლო კვანძსაც უნდა შეხებოდა, რადგან ავტომობილი გაცილებით სწრაფი და ტემპერამენტიანი გახდა. შეცვლილია საკიდარი, ეომელსაც უფრო ხისტი, რეგულირებადი ამორტიზატორები აქვს. ავტომობილის წინა ნაწილი 21-დუიმიან ბოებლებზე დგას, რომლებზეც „პირელის“ 355/30 საბურავებია ჩაცმული. რაც შეეხება უკანა ბორბლებს, მათი ზომა 22 დუიმია, საბურავების ზომა კი - 315/25.

მის მიერ შემუშავებულ პაკეტს, რა ტქმა უნდა დამონტაჟებით, „ნოვიტეკი“ გერმანიაში 19 900 ევროდ გაჰყიდის.

„მერსედესი“ მილე მილიასთვის ემზადება

Mercedes-Benz Readies Compressor Cars for Mille Miglia 2011

2 მაისი

ლეგენდარულ მილე მილიას რბოლაზე, რომელიც 11-15 მაისს ჩატარდება, „მერსედეს ბენცი“ თავის ლეგენდარულ კომპრესორიან ავტომობილებს - SS-ს და SSK-ს გამოიყვანს, რითაც ამ რბოლაზე გერმანელ რუდოლფ კარაჩოლას მიერ 1931 წელს მოპოვებული დიდ გამარჯვებას აღნიშნავს.

რბოლაში სამქიმიანების მანქანების სხვა მანქანებიც გამოვა, რომლებითაც ფორმულა 1-ის მსოფლიოს ორგზის ჩემპიონი მიკა ჰაკინენი და მსოფლიოს ხუთგზის ჩემპიონ ხუან მანუელ ფანხიოს ძმისშვილი იასპარეზებენ. ეს უკანასკნელი თავისი ლეგენდარული ბიძის სახელს ატარებს. ორივე „მერსედეს ბენც 300 SLR-ით“ იასპარეზებს, ზუსტად ისეთით, როგორითაც დიდმა ფანხიომ, 1955 წელს, მილე მილიაზე მეორე ადგილი დაიკავა.

როგორც ცნობილია, გერმანული კომპანია თავისი დაარსებიდან 125 წლის იუბილეს აღნიშნავს და ამასთან დაკავშირებით, ქალაქ ბრეშას ცენტრში, სადაც ათასმილიანი რბოლა სტარტს აიღებს, თავის ორ ეპოქალურ ავტომობილსაც გამოიყვანს. მათგან ერთია კარლ ბენცის პირველი ავტომობილი, რომელიც კაცობრიობის ისტორიაში, პირველ დაპატენტებულ ავტომობილადაა მიჩნეული. მეორე კი არის კონცეპტუალური პლაგ-ინ ჰიბრიდი F 800, რომელიც შტუტგარტელებმა შარშან, ჟენევის გამოფენაზე გვიჩვენეს.

რბოლაში მოდელ SS-ის საჭეს, ფორმულა 1-ის ყოფილი პილოტი იოხენ მასი და მოტორბოლებში მსოფლიოს 15-გზის ჩემპიონი ჯაკომო აგოსტინი მიუჯდებიან. სტარტზე ასევე დადგება „მერსედეს 300 SL“, რომლითაც კარაჩოლამ 1952 წელს, მილე მილიაზე მეოთხე ადგილი დაიკავა. ვის ერგება ამ მანქანით ასპარეზობის პატივი, ჯერ ცნობილი არ არის. გარდა ამისა, გერმანული კომპანიის ძველი და ახალი სპორტული მანქანებით იაპარეზებენ გერმანიის ტურიზმის კლასის (DTM) 5-გზის ჩემპიონი ბერნდ შნაიდერი და ლე მანისა და DTM-ის სამ-სამ გზის გამარჯვებული კლაუს ლუდვიგი.

„პეჟოს“ კონცეპტუალური EX1 ნურბურგრინგის რეკორდსმენია

Peugeot's EX1 Concept Breaks the Electric Car Record on the Nurburgring

2 მაისი

დიდი ხანია, რაც ლეგენდარულ გერმანულ ტრეკ ნურბურგრინგის ჩრდილოურ მარყუჟზე რბოლები აღარ ტარდება, თუმცა ავტოდრომის ამ მონაკვეთზე სარბოლი და სპორტული ავტომობილები მუდმივად დაქრიან. მათი პატრონების მიზანს, ეგრეთ წოდებულ სატრეკო დღეებში, საკუთარი სიამოვნება და, რა თქმა უნდა, სხვების ჯობნა წარმოადგენს. ამ ფერხულში კი დიდი ავტომწარმოებლებიც არიან ჩაბმულნი, რომლებიც თავიანთი სპორტული და სხვა ტიპის ავტომობილებით, ნორთშლაიფზე (ტრასის ამ გრძელ მონაკვეთს ხშირად მწვანე ჯოჯოხეთსაც უწოდებენ) კონკურენტების მიერ ნაჩვენები დროის გაუმჯობესებას ცდილობენ.

ახლახანს „პეჟომ“ მწვანე ჯოჯოხეთს სწორედ ამ მიზნით მიაკითხა. ოღონდ, იქ თავისი ელექტრული კონცეპტუალური მოდელი - EX1 გამოიყვანა, რომელიც პირველად შარშან, პარიზის ავტო შოუს დროს გვიჩვენა. ვიზიტის მიზანი, ელექტრომობილების რეკორდის გაუმჯობესება იყო და ამ ამოცანას „ლომებმა“ ადვილად გაართვეს თავი.

მათმა ელექტრულმა როდსტერმა, რომლის საჭესაც სტეფან კელე უჯდა, თითქმის წუთით გააუმჯობესეს წინა რეკორდი, რომელიც შარშან „მინის“ სარბოლ ელექტრომობილს დაუმყარებია. 208-კილომეტრიანი წრე EX1-მა 9 წუთსა და 01.338 წამში გაიარა. მისმა საშუალო სიჩქარემ კი 138.324 კმ/სთ შეადგინა. უფრო მეტიც, ფრანგული კომპანია ირწმუნება, რომ მათმა ელექრომობილმა სარეკორდო გარბენი „ძალიან არახელსაყრელ მეტეოპირობებში“ შეასრულა. შედარებისთვის, „მინის“ ელექტრომობილის შარშანდელი რეკორდი 9 წუთსა და 51.45 წამს შეადგენდა.

„პეჟო EX1“ ორი ელექტროძრავითაა აღჭურვილი, რომლებიც წინა და უკანა ღერძებს ემსახურება. ამგვარად, ელექტრომობილი სრულამძრავიანია. თითოეული ძრავი 170 ცხენის ძალას გამოიმუშავებს და მათი ჯამური პიკური სიმძლავრე 340 ცხენის ძალას, მაქსიმალური მომენტი კი 240 ნიუტონმეტრს აღწევს. ძრავები ენერგიას დიდი ტევადობის ლითიუმ-იონური ელემენტების ბლოკისგან ღებულობენ.

ავტომობილი კარბონის კომპოზიტისგან დამზადებულ მონოკოკს ეყრდნობა, რომელიც სიმსუბუქით და სიმტკიცით გამოირჩევა. კარბონის კომპოზიტისგანვეა დამზადებული ავტომობილის ტანი, რომლის სიმაღლე სულ რაღაც, 0.90 მეტრი, სიგანე კი 1.77 მეტრია. ამგვარად, მას ჰაერის შემხვედრი ნაკადისადმი მცირე წინააღმდეგობა აქვს.

სხვათა შორის, ამ ავტომობილმა შარშან ელექტრომობილების სხვა რეკორდებიც გააუმჯობესა - ჩინეთის ქალაქ ჩინჰუს აეროდრომზე, ადგილიდან 100 კმ/სთ სიჩქარე 3.49 წამში აკრიფა. არადა, „პეჟოს“ ოფიციალურ რელიზში აღნიშნულია, რომ სტანდარტული აჩქარებისთვის EX1-ს 3.6 წამი სჭირდება, ადგილიდან 260 კმ/სთ-ს ასაკრეფად კი 6.6 წამი ჰყოფნის.

კონცეპტუალური ქროსოვერი SXC - პირველი ჩინური „პეჟო“

Peugeot Unveils China-Designed SXC Crossover Study

1 მაისი

ჩინური საავტომობილო ბაზარი მსოფლიოს ლიდერი გახდა და ზრდას განაგრძობს. ბუნებრივია, ეს გარემოება, იქ დიდ ავტომწარმოებლებს ისე იზიდავს, როგორც თაფლი ფუტკარს. ჩინეთში დამკვიდრებაზე ხომ მათი მომავალი კეთილდღეობა ბევრადაა დამოკიდებული. ასეთ კომპანიებს შორისაა „პეჟოც“, რომელმაც ახლახანს გამოაცხადა, რომ ცისქვეშეთში თავის უახლეს სედან 508-ს შეიტანს. თუმცა, შანჰაის ავტო შოუზე, ფრანგული კომპანიის სტენდზე კიდევ ერთი საინტერესო ექსპონატი იდგა.

ესაა კონცეპტუალური ქროსოვერი SXC, ავტომობილი, რომელიც უპირველეს ყოვლისა, ჩინური ბაზრისთვის, „პეჟოს“ ჩინელმა სპეციალისტებმა მოამზადეს. მისი აბრევიატურაც ჩინურია - SXC შანჰაი ქროს კონცეპტს ნიშნავს. დაკიდევ, ლომები ამბობენ, რომ ეს ავტომობილი, ჩინელი მყიდველის გემოვნების შესაბამისადაა შემუშავებული.

მისი დინამიური იერი ნუ მოგატყუებთ - გაბარიტების გათვალისწინებით, ავტომობილი ნამდვილი ბრონტოზავრია. მისი ზომებია: სიგრძე 4 870 მილიმეტრი, სიმაღლე 1 610 მმ, სიგანე 2 035 მმ. ბორბლებს შორის ბაზა კი 3.0 მეტრს აღწევს. შედარებისთვის, „ბეემვეს“ სპორტულ ქროსოვერ X6-ის სიგრძე 4 877 მილიმეტრია.

SXC „პეჟოს“ ახალ კორპორატიულ (ჯერაც კონცეპტუალურ სტადიაში მყოფ) სტილშია შესრულებული. ამასთან, მასში თავმოყრილია როგორც უგზოობის მოდელების, ასევე სედანებისთვის და სპორტული მოდელებისთვის დამახასიათებელი ელემენტები. ახალი სტილი განსაკუთრებით, ავტომობილის წინა ნაწილში შეინიშნება. რადიატორის ბადეს ამობრუნებული ტრაპეციის ფორმა აქვს, მის ზედა კიდეებში კი წვრილი ფარები იწყება და წინა ფრთებზე გადადის. რა თქმა უნდა, ყურადღებას იმსახურებს უკანა გაბარიტული ფარები, რომლებსაც ზედმეტად მოღუნული ბუმერანგის მოყვანილობა აქვს. 22-დუიმიანი ბორბლებით და დაბერილი ფორმებით, SXC ნამდვილი სპორტსმენია და თუ ის კონვეიერზე დადგა, შეიძლება ვივარაუდოთ, რომ ბავარიულ X6-ს სერიოზულ კონკურენციას გაუწევს.

შიგნიდან SXC ტიპიური კონცეპტუალური ნამუშევარია - სალონში გაფორმების ბევრ ისეთ ელემენტს ნახავთ, რომლებსაც კონვეიერამდე არავინ მიუშვებს. მაგალითად, მძღოლის სამუშაო ადგილი ისეა მოწყობილი, სარბოლი მანქანის კოკპიტის მსგავსი რამ გეგონება. სალონი მაღალი გვირაბითაა გატიხრული და კოკპიტის შთაბეჭდილებას ესეც ტოვებს. ოთხი ინდივიდუალური სავარძელი კი კომფორტულობაზე მიგვანიშნებს. მაჩვენებლების დაფა კი ისეა გაწყობილი, იფიქრებ, რომ ეს მანქანა (ან იქნებ, საფრენი აპარატიც) ფანტასტიკური ფილმისთვის არისდ შექმნილი.

რაც შეეხება ავტომობილის ძალურ აღჭურვილობას, მბიძგველ ძალას მას „ჰაიბრიდ4“ სისტემა ანიჭებს, რომელიც ლომებს სხვა კონცეპტუალურ ავტომობილებზეც გამოუყენებიათ. მასში შედის როგორც შიდაწვის აგრეგატი - 1.6-ლიტრიანი, ოთხცილინდრიანი ტურბო ძრავი, რომელიც 218 ცხენის ძალას ავითარებს და რომელიც წინა ბორბლებს აბრუნებს, ასევე ელექტროძრავიც (95 ცხ.ძ), რომელიც უკანა ბორბლებთანაა დაკავშირებული. „პეჟო“ ირწმუნება, რომ ამ სისტემით, ეს უზარმაზარი მანქანა ას კილომეტრს 5.8 ლიტრი ბენზინით გადის, ყოველი კილომეტრის გავლისას კი ატმოსფეროს მხოლოდ 143 გრამი ნახშირორჟანგით აბინძურებს.

შანჰაიში გავრცელებულ რელიზში წერია, რომ ამ ორ ძრავს ერთდროულად მუშაობა შეუძლია და ამ შემთხვევაში, ავტომოილი სრულამძრავიანი იქნება. ამასთან, როცა გადაადგილების სიჩქარე დაბალია, მაშინ მხოლოდ ელექტროძრავით მოძრაობაც შეიძლება. ამგვარად, ქალაქის გადატვირთულ გზებზე მოძრაობისას, ნაკლები საწვავი იხარჯება. თუმცა, რა მანძილზე გაქაჩავს მარტო ელექტროძრავი, ამაზე ლომები სდუმან.

„ნეორა“ - ტაივანური ელექტრომობილი

Luxgen shows Neora EV concept

1 მაისი

ტაივანური საავტომობილო კომპანია „ლუქსგენი“ ალბათ თავის ქვეყანაშიც ბევრისთვის უცნობია. ის ჯერ მხოლოდ ორი წელია, რაც ბაზარზე გამოჩნდა და მხოლოდ ორ ავტომობილს - მინივენ „ლუქსგენ7 MPV-ს“ და ქროსოვერ „ლუქსგენ7 SUV-ს“ უშვებს. ახლა კი სედანის წარმოების დაწყებაც გადაუწყვეტია, რომლის კონცეპტუალური ვერსიაც შანჰაის ავტო შოუზე წარადგინა.

სახელი „ნეორა“ ახალ ერას ნიშნავს და როგორც ჩანს, ამ ავტომობილით, ტაივანურ კომპანიას ახალი ცხოვრების დაწყება აქვს გადაწყვეტილი. ამ მიმართულებით კი პირველი ნაბიჯი სწორედ სედანი „ნეორა“ იქნება, რომლის ბაზაზეც მალე ალბათ სხვა ტიპის ავტომობილებსაც ვიხილავთ.

„ლუქსგენ ნეორა“ ორიგინალური გარეგნობით არ გამოირჩევა. სილუეტით ის ერთდროულად ორ ავტომობილს - „ოპელ ამპერას“ და „ჰიუნდაი სონატას“ მლგაგონებთ. თუმცა, ინდივიდუალური ნიშნებითაც (თუნდაც ელეგანტური არ იყოს) გამოირჩევა. ასეთია მისი რადიატორის ბადე, რომელშიც კომპანიის ზორბა ლოგო ჩამჯდარა, ვიწრო ოთხკუთხა ფარები და მშვილდის ფორმის სახურავი, რომლის წყალობითაც, სედანი კუპეს შთაბეჭდილებას ტოვებს.

„ლუქსგენის“ კონცეპტქარი ელექტრომობილია. ოღონდ, ეს სულაც არ ნიშნავს, რომ კონვეიერზე დადგომის შემდეგაც, ასეთად დარჩება. ის აღჭურვილია ელექტროძრავით, რომლის სიმძლავრეც 241 ცხენის ძალას აღწევს, მას კი ენერგიით ლითიუმ-იონური ელემენტების ბლოკი ამარაგებს, რომლის ტევადობაც 48 კილოვატსაათია. მათი წყალობით, „ნეორა“ ადგილიდან 100 კმ/სთ-ის აკრეფა 6.5 წამში შეუძლია, მაქსიმალური სიჩქარე კი 250 კმ/სთ ნიშნულითა შეზღუდული.

„ლუქსგენი“ არაფერს ამბობს იმაზე, თუ რა დროა საჭირო აკუმულატორების სრულად დასამუხტად. სამაგიეროდ, ირწმუნება, რომ ნელ რეჟიმში მოძრაობისას (40 კმ/სთ), ის დაახლოებით 400 კილომეტრის გავლას შეძლებს. ამასთან, სულ ერთი საათია საკმარისი იმისათვის, რომ აკუმულატორები 80 პროცენტით შეივსოს.

ტაივანური კომპანია ჯერჯერობით არ აზუსტებს, თუ როდის დაიწყება „ნეორას“ სერიული წარმოება. სამაგიეროდ, შანჰაიში გამოაცხადეს, რომ ამ ავტომობილს, ტაივანის გარდა, აზიის სხვა ქვეყნებშიც (პირველ რიგში, ალბათ ჩინეთში) გაიტანენ.