ამერიკის გზებზე ელექტრომობილების დომინირებას ელიან

Electric cars

20 ივლისი

შტატ კალიფორნიის ბერკლის უნივერსიტეტის მიერ ჩატარებულმა ანალიზმა აჩვენა, რომ 2030 წელს ამერიკის დილერების მიერ გაყიდული მანქანების 86 პროცენტი ელექტრომობილი იქნება, თუ მყიდველს ავტომობილთან ერთად, ძვირადღირებული აკუმულატორის შეძენაც არ მოუწევს.

ამ ეტაპზე, ბევრი კომპანია მუშაობს იმაზე, რომ ელექტრომობილების მფლობელებს ენერგიის შეძენის ისეთივე მოსახერხებელი ხერხი შესთავაზოს, როგორითაც სატელეკომუნიკაციო კომპანიები მობილური ტელეფონების მფლობელებს სალაპარაკო დროის ყიდვას სთავაზობენ. სისტემას პირობითად ”პეი-პერ-მაილ-ს” (გადაიხადე მილის მიხედვით) უწოდებენ. ასეთ კომპანიებს შორის, ყველაზე გამორჩეული ამერიკულ-ებრაული ”ბეტერ პლეისია”, რომელსაც უკვე შემუშავებული აქვს ელექტრომობილების ენერგომომსახურების მოსახერხებელი გრაფიკი.

მის მიხედვით, ოჯახი ყიდილობს ელექტრომობილს, მაგრამ მისი აკუმულატორის მფლობელად ”ბეტერ პლეისი” რჩება. როდესაც ელექტრომობილი ენერგიით გასამართ სადგურს მიადგება (რომელიც ”ბეტერ პლისისა” იქნება), იქ მას აკუმულატორს შეუცვლიან, რისი წყალობითაც, მანქანას სადგურზე დიდი ხნით ხნით შეყოვნება არ მოუწევს.

დაანგარიშებულია, რომ ენერგიით დასამუხტი სადგურების ქსელის მშენებლობა, მთელი აშშ-ის მასშტაბით, დაახლოებით 320 მილირდი დოლარი დაჯდება. სამაგიეროდ, ქვეყანა გამონაბოლქვით გამოწვეული პრობლმების თავიდან აცილებით, 210 მილიარდს დაზოგავს. რაც მთავარია, აკუმულატორების გარეშე, ელექტრომობილები თითქმის იმდენივე ან უფრო ნაკლებიც კი ეღირება, რამდენიც შიდაწვისძრავიანი ავტომობილები ღირს. მათი მომსახურება კი გაცილებით იაფი დაჯდება.

ცნობისათვის, ”ბეტერ პლეისისთვის” ელექტრომობილებს ფრანგული კომპანია ”რენო” დაამზადებს. ბერკლის ანალიტიკოსებმა ისიც გამოითვალეს, რომ ახლანდელი ფასების მიხედვით, ელექტრომობილების ენერგიით დამუხტვა (მილზე გადაანგარიშებით) თითქმის იმდენივე დაჯდება, რაც შიდაწვისძრავიანი ავტომობილის საწვავით გაწყობა ჯდება. მერე კი, როდესაც საწვავის ფასი გარდაუვალად გაიზრდება, ელექტროენერგიის შეძენა გაცილებით იაფი იქნება.

წყალში ნაპოვნი ”ბუგატი”

Brescia Bugatti

20 ივლისი

ასეთი იყო ტბაში ჩაძირვამდე 1925 წელს გამოშვებული ”ბრეშა”

წყალში მარტო ჩაძირულ გემებს როდი პოულობენ. ფსკერზე თურმე ოდესღაც ჩაძირული ავტომობილის ნახვაც შეიძლება, ავტომობილისა, როგორებსაც დღეს სანთლით ეძებენ და როგორებშიც ასეულობით ათას, ხშირად კი მილიონობით დოლარსაც იხდიან. და რა მნიშვნელობა აქვს, როგორ მოხვდა შვეიცარიის ერთ-ერთი ტბის ფსკერზე ასეთი ავტომობილი.

რამდენიმე დღის წინ, შვეიცარიის ქალაქ ასკონას მყვინთავთა კლუბის წევრებმა, ქალაქის მახლობლად მდებარე ტბა ვერბანოს ფსკერზე ჩაძირული ”ბუგატი” იპოვნეს, რომელიც იქ მინიმუმ 70 წლის განმავლობაში იმყოფებოდა.

”ბუგატის” ისტორიის ფრანგი ექსპერტი ჰანს მატი ამბობს, რომ ტბის ფსკერზე ნაპოვნი ავტომობილი ”ბრეშა ბუგატია”, მასზე აღმოჩენილი ნომრის მიხედვით კი დადგინდა, რომ ის 1925 წლის 11 აპრილს დაამზადეს. ავტომობილი საფრანგეთში, ქალაქ ნანსიში გაყიდულა. ამ ეტაპზე, მის შესახებ მეტი არაფერია ცნობილი.

ჟურნალ ”ტოპსპიდის” ინფორმაციით, ამჟამად მთელს მსოფლიოში თითქმის 3 000 ”ბუგატი” არსებობს, მათგან 160 ცალი შვეიცარიაში იმყოფება. როგორც ანტიკვარული მანქანების სპეციალისტები ამბობენ, ტბაში აღმოჩენილი ავტომობილი აღდგენას არ ექვემდებარება. მაგრამ აუქციონზე მისი გაყიდვა თურმე ამ სახითაც შესაძლებელია.

მატი ამბობს, რომ ეტორე ბუგატის ”ბრეშას” სახელით არაერთი მოდელი დაუმზადებია. ყველა მათგანს განსაკუთრებული ნიშანი აქვს, რომელიც მათი ამოცნობის საშუალებას იძლევა. მაგალითად, ”ტაიპ 13 ბრეშა” იმითაა გამორჩეული, რომ მას კარბურატორი ძრავის მარცხენა მხარეს აქვს მოთავსებული, რაც ”ბუგატის” სხვა მოდელებზე არ გვხვდება. მასვე გამოსაბოლქვი მილი მარჯვნივ აქვს. ”ტაიპ 23 ბრეშა” კი ავტოინდუსტრიის ისტორიაში პირველი სერიული ავტომობილია, რომელსაც ძრავის ცილინდრზე ორზე მეტი სარქველი აქვს.

”იაგუარ X-ტაიპის” წარმოება დროზე ადრე შეწყდება

Jaguar X-Type

20 ივლისი

ინგლისური კომპანია ”იაგუარის” ხელმძღვანელობამ გადაწყვიტა, რომ დაგეგმილზე ნახევარი წლით ადრე შეწყდეს ”იაგუარ X-ტაიპის” წარმოება. ძველი გადაწყვეტილებით, ამ მოდელის წარმოება მერმის, ზაფხულში უნდა შეწყვეტილიყო, მაგრამ ეს ამ წლის ბოლოს მოხდება. ეს კი საწარმოო ხარჯების შესამცირებლად კეთდება. ამასთან დაკავშირებით, კომპანია ქარხნიდან დაახლოებით 300 თანამშრომელს დაითხოვს.

იმის გამო, რომ X-ტაიპზე” მოთხოვნა ძალიან შემცირებულია, ”იაგუარი” მის მწარმოებელ ქარხანას სექტემბერში სამი კვირით გააჩერებს. ”იაგუარ ლენდ როვერის” შეფი დევიდ სმიტი ამბობს, რომ ამ ორი მარკის ავტომობილების გაყიდვები ბოლო ათ თვეში დაახლოებით 28 პროცენტითაა შემცირებული, რის გამოც, კომპანიას წარმოების და თანამშრომელთა შემცირება უწევს. კერძოდ, უკვე დათხოვნილია 2200 თანამშრომელი და გადახედილია ახალი პროექტები და საინვესტიციო პროგრამები.

კრიზისის დასაძლევად, ევროპის საინვესტიციო ბანკმა ”იაგუარ ლენდ როვერს” 330 მილიონი ევროს კრედიტი გამოუყო, თუმცა კომპანიას ეს თანხა ჯერ არ მიუღია. არადა, სმიტი ამბობს, რომ ამ თანხის დაგვიანების შემთხვევაში, მის კომპანიას კიდევ უფრო მეტი პრობლემა შეექმნება.

შეკვეთით შექმნილი ჯუჯა ელექტრომობილის პროექტი

Lotus supermini

19 ივლისი

სპორტული ავტომობილების მწარმოებელ ინგლისურ კომპანია ”ლოტუსის” ინჟინრებმა ჯუჯა ელექტრომობილის პროექტი მოამზადეს, რომელიც, მათი აზრით, შეიძლება ბრიტანული ქალაქების გზებზე 2015 წელს გამოჩნდეს.

პროექტი ითვალისწინებს ჯუჯა ზომების ავტომობილის წარმოებას, რომელიც 37 კილოვატიანი ძრავით აღიჭურვება. მასში ენერგიის დასაგროვებლად, ავტომობილის ძირზე განლაგებულ ლითიუმ-იონურ აკუმულატორს გამოიყენებენ, რომელიც ენერგიას საყოფაცხოვრებო ქსელიდან (პლუგ-ინ სისტემა) შეივსებს. პროექტის მიხედვით, აკუმულატორის ერთი სრული დამუხტვით, რასაც სამსაათნახევარი დასჭირდება, ავტომობილის სვლის მარაგი 80 კილომეტრს მიაღწევს. მისი მაქსიმალური სიჩქარე კი 105 კმ/სთ იქნება.

”ლოტუსის” მიერ დაპროექტებული ელექტრომობილი ძალიან პატარა გაბარიტებით გამოირჩევა. ფაქტობრივად, ის ”სმარტის” ზომისაა და გაცილებით პატარაა ”ტოიოტას” ჯუჯა iQ-ზე. ამ უკანასკნელის სალონში ჩასაჯდომი ფორმულა 3+1-ია, ”ლოტუსი” კი გვარწმუნებს, რომ მის ჯუჯაში 4 ადამიანი მოთავსდება. თუმცა, პროექტის ციფრული ესკიზებიდან კარგად ჩანს, რომ უკანა სავარძლებზე კომფორტულად ჯდომა პრაქტიკულად გამორიცხულია. მაგრამ თუ უკანა ორი სავარძელი დაიკეცება, წინა ორი ადგილი საკმაოდ კომფორტული იქნება და საბარგულის ზომაც მნიშვნელოვნად გაიზრდება.

”ლოტუსის” მინი ელექტომობილის ზომებია: სიგრძე 2 600 მმ, სიგანე 1 600 მმ, სიმაღლე 1 700 მმ და ბაზა კი - 2 000 მმ. ავტომობილის პლატფორმა ალუმინის პროფილებისგან დამზადდება, რაც შეეხება ძარას, წარმოების მოცულობიდან გამომდინარე, მის საწარმოებლად ალუმინს, ან კომპოზიციურ მასალებს გამოიყენებენ.

”ლოტუსის” საინჟინრო დივიზიონის შეფი რასელ კერი ამბობს, რომ კომპანიის ინჟინრებმა ეს პროექტი სულ რაღაც ორ კვირაში, ჟურნალ ”აუტომოტივ ინჯაინერის” შეკვეთით მოამზადეს. შედარებისთვის, კონცეპტუალური პროექტირებისთვის 3-6 თვეა ხოლმე საჭირო. ეს იმის მანიშნებელია, რომ რეალურად, ”ლოტუსის” მინი ელექტრომობილი ჯერ მხოლოდ უხეშად დამუშავებული ესკიზის დონეზეა შექმნილი. ამასთან, კერი ამბობს, რომ ეს პროექტი საგულდაგულოდაც რომ დამუშავდეს, მის მიხედვით ავტომობილების წარმოებას თავად ”ლოტუსი” მაინც არ აპირებს. სამაგიეროდ, კომპანია მზადაა, ის რომელიმე ავტომწარმოებელს მიჰყიდოს.

”აუდი” A1-ს ბრიუსელში გამოუშვებს

Audi A1

19 ივლისი

ბელგიურ გაზეთ ”ლე სუართან” საუბრისას, ”აუდის” ბრიუსელური ქარხნის ხელმძღვანელმა ალფონს დინტნერმა განაცხადა, რომ მისი ქარხანა მინი ჰეჩბეკ A1-ის სერიულ წარმოებას ოქტომბერში შეუდგება. ამასთან, ახალი ავტომობილის წარმოების დაწყებამდე, ქარხანა ხუთი კვირით გაჩერდება, რათა მასში საჭირო გადაიარაღება ჩატარდეს.

დინტნერის თქმით, წარმოების დასაწყისში, A1 სამკარიანი ჰეჩბეკის ძარით დამზადდება, მოგვიანებით კი ქარხანა ხუთკარიანი სპორტბეკის წარმოებასაც დაიწყებს. სავარაუდოდ, ავტომობილის საწარმოო ვერსიის ხილვა პირველად ფრანკფურტის მოტორ შოუზე იქნება შესაძლებელი.

A1-ის პირველი კონცეპტუალური ვერსია, სახელად ”მეტროპროჯექტ კვატრო”, ”აუდიმ” პირველად ორი წლის წინ, ტოკიოს ავტო შოუზე წარადგინა, შარშან კი იგივე ავტომობილი უკვე კონცეპტუალური ”A1 სპორტბეკის” სახელით, პარიზის ავტო შოუზე გამოჩნდა.

საწარმოო ვერსია გარეგნობით ყველაზე ახლოს სწორედ ”A1 სპორტბეკთან” იქნება. რა თქმა უნდა, მასზე არ გადავა ის დეკორატიული ელემენტები, რომლებიც კონცეპტუალურ ავტომობილზე, მეტი ყურადღების მიპყრობის მიზნით იყო გამოყენებული. მაგალითად, ”A1 სპორტბეკის” კარებებს ჩარჩო არ ჰქონდა, A1-ზე კი აუცილებლად ექნება. ასევე შეიცვლება დიდრონი ბამპერები, რომლებიც ავტომობილს აგრესიულ იერს სძენდა. დაკიდევ, შედარებით გაუბრალოვდება ავტომობილის ინტერიერი.

”აუდი A1” თავის მთავარ მეტოქეზე - ”ბეემვეს” ”მინიზე” გრძელი და განიერია. ინგოლშტადტელები თავიანთ ახალ ავტომობილზე 4-ცილინდრიანი ძრავების ფართო გამას გამოიყენებენ. მათ შორისაა 1.2-ლიტრიანი (86 ცხენის ძალით), 1.4-ლიტრიანი (122 ცხენის ძალით) და 1.4-ლიტრიანი ტურბოძრავი (122 ცხენის ძალით), რომლებიც ბენზინზე მუშაობენ, ასევე 1.6-ლიტრიანი დიზელის აგრეგატი, რომლის სიმძლავრეც 90 ცხენის ძალაა.

შემდგომში ”აუდი” აუცილებლად აპირებს A1-ის ღია და სპორტული ვერსიების წარმოებას. ამ უკანასკნელს S1-ს დაარქმევენ და ის 200-ცხენისძალიანი ძრავით აღიჭურვება.

”ვერცხლისფერი ისრების” სახელოვანი ისტორიის ერთი ფურცელი

Avus 1937

18 ივლისი

ამ დღეებში ”აუდი” დაარსებიდან 100 წლის იუბილეს აღნიშნავს, რასთან დაკავშირებითაც, გუდვუდის სიჩქარის ფესტივალზე, გერმანული კომპანიისადმი მიძღვნილი უზარმაზარი მონუმენტი წამოჭიმეს. საზოგადოებას კი იმ ავტომობილებს უჩვენებენ, რემლებმაც ”აუდის” სახელი გაუთქვეს.

სამწუხაროდ, ამ ავტომობილებს შორის ვერავინ იხილავს სტრიმლაინერის სერიის მოდელებს, რომლებიც 1937 წელს ”აუტო უნიონის” (ეს აუდის ერთ-ერთი და ყველაზე სახელოვანი წინამორბედია) სპორტულმა განყოფილებამ, ლეგენდარული ფერდინანდ პორშეს ხელმძღვანელობით შექმნა. ეს ავტომობილები დიდი პრიზების რბოლებისთვის შექმნილი ბოლიდების ბაზაზე დამზადდა და მათგან აეროდინამიკური, გარსშემოდენილი ძარით განსხვავდებოდნენ. სამწუხაროდ, მათგან დღემდე ვერცერთი ვერ შემორჩა.

დღეს მეტსახელი ”ვერცხლისფერი ისრები” მხოლოდ ”მერსედეს-ბენცის” სარბოლი ავტომობილებისადმი მიმართებაში გამოიყენება, მაგრამ ყველამ როდი იცის, რომ ამ თიკუნით ომისწინა გერმანიაში ”აუტო უნიონის” ბოლიდებიც სარგებლობდნენ. ორივე კომპანია ნაცისტური გერმანიის ხელმძღვანელობის მხარდაჭერით სარგებლობდა, თუმცა ისინი უპირველეს მეტოქედ ერთმანეთს მიიჩნევდნენ.

1937 წელს, ბერლინის მახლობლად მდებარე ტრეკ აფუსის ხელმძღვანელობამ ახალი, თავისუფალი ფორმულა შემოიღო, რომელიც სარბოლ ავტომობილებს ყოველგვარ შეზღუდვას უხსნიდა. ამ ფორმულის მიხედვით, ”აუტო უნიონმა” და ”მერსედეს-ბენცმა” სუპერ ბოლიდები დაამზადეს, რომლებსაც თითქმის ოცკილომეტრიან ტრასაზე სიჩქარის წარმოუდგენელი ზღვარის - 400 კმ/სთ-ის გადალახვა შეეძლოთ. ორი გერმანული გუნდის პაექრობა განსაკუთრებით საინტერესო იმ მოსახვევში იყო, რომელსაც ხშირად ”სიკვდილის კედელსაც” უწოდებდნენ. ამის მიზეზი ის იყო, რომ მოსახვევი 43-გრადუსიან ვირაჟს წარმოადგენდა, რომლის გზის საფარიც აგურებით იყო ნაშენი. ასეთი დახრა კი მანქანებს მოსახვევის მაქსიმალურთან მიახლოებული სიჩქარით გავლის საშუალებას აძლევდნენ. აფუსის რბოლები იმდენად საინტერესო იყო, რომ მათ 300-400 ათასი მაყურებელი ესწრებოდა ხოლმე.

”ვერცხლისფერი ისრების” შტრომლინერების პირველი დიდი აფუსური რბოლა 1937 წელს ჩატარდა. ასპარეზობა სამ, შვიდწრიან სპრინტად დაიყო, რომელთაგან თითოზე საასპარეზოდ 6-8 მანქანა გამოდიოდა. მათგან ოთხი სტრიმლაინერი იყო - ორ-ორი ”აუტო უნიონისა” და ”მერსედესისგან”. დანარჩენი კი დიდი პრიზის კლასის სარბოლი ბოლიდები იყო.

სტრიმლაინერები დიდი სიჩქარით გამოირჩეოდა. სამაგიეროდ, დიდი პრიზის კლასის ბოლიდები მათ მოსახვევების გავლისას სჯობდნენ. და მაინც, უფრო მაღალი საშუალო სიჩქარე სტრიმლაინერებს ჰქონდა.

1937 წლის აფუსური რბოლის პირველი სპრინტი ყველაზე საინტერესო გამოდგა და ორი გერმანელი პილოტის, რუდოლფ კარაჩოლასა (მერსედესი) და ბერნდ როზემეიერის (აუტო უნიონი) უშეღავათო პაექრობით აღინიშნა. ბოლო წრემდე მათ ბორბალი-ბორბალში იარეს, ფინიშზე კი კარაჩოლამ როზემეიერს 0.7 წამით მიასწრო.

მეორე სპრინტი უფრო ჩქაროსნული გამოდგა. მასში პირველობისთვის მანფრედ ფონ ბრაუხიჩმა (მერსედესი) და იტალიელმა ლუიჯი ფაჯოლიმ (აუტო უნიონი) იბრძოლეს. ასპარეზობას ადრევე გამოეთიშა ჰერმან ლანგი, ვის ”მერსედესსაც” საბურავი გაუსკდა და პილოტმა ძლივს შეძლო მანქანის დამორჩილება. შუა რბოლაში ფაჯოლის მანქანას ტრანსმისია დაუზიანდა და ფონ ბრაუხიჩმა ადვილი გამარჯვება მოიპოვა.

და მაინც, გადამწყვეტი მესამე სპრინტი იყო, რომლის გამარჯვებულიც, რბოლის გამარჯვებულადაც ცხადდებოდა. ამ რბოლაში (წინა ორის შედეგების მიხედვით), სამი სტრიმლაინერი ”მერსედესმა” გამოიყვანა (ფონ ბრაუხიჩი, კარაჩოლა და ლანგი), ერთი კი - ”აუტო უნიონმა” (როზემეიერი). მაგრამ როზემეიერის მანქანაზე V16 ძრავი დაზიანდა - მის ძრავზე სტარტის წინ მხოლოდ 13 ცილინდრი მუშაობდა...

რბოლა კი ლანგმა მოიგო.

ჯეი ლენოს ახალი შენაძენი

Jay Leno

18 ივლისი

ჯეი ლენო და მისი სკანერ-პრინტერი

ამერიკის ერთ-ერთი ყველაზე პოპულარული ტელეწამყვანი ჯეი ლენო, ვისაც 1992 წლიდან მოყოლებული, ტელეკომპანია ენბისის პოპულარული ტოკ-შოუ ”ღამის შოუ ჯეი ლენოსთან ერთად” მიჰყავს, წლევანდელიდან კი იმავე ტელეარხზე ”ჯეი ლენოს შოუს” წამყვანია, საავტომობილო სამყაროში უნიკალური ავტო კოლექციითაა ცნობილი. მის ფარეხში ისეთ იშვიათ ავტომობილებსაც კი შეხვდებით, რომლებსაც წინა საუკუნის დასაწყისში, ერთეულებს ამზადებდნენ.

ბუნებრივია, იშვიათი და დროთა განმავლობაში გვარიანად შელახული ავტომობილების რესტავრაცია დიდ ძალისხმევას, მოთმენას და სოლიდურ სახსრებს მოითხოვს, მაგრამ ყველაზე ცუდი ისაა, რომ ზოგიერთი ავტომობილის დაზიანებული დეტალის აღდგენა, ან შეცვლა შეუძლებელია. ამის გამო, კოლექციონერები ხშირად კერძო სახელოსნოებს აკითხავენ, რომლებიც მათთვის სასურველ დეტალებს ძალიან ძვირად ამზადებენ.

მაგრამ ამიერიდან, მათ სერიოზული კონკურენტი გამოუჩნდათ თავად ლენოს სახით, ვინც რამდენიმე დღის წინ, საზოგადოებას უნიკალური დანადგარის შეძენის შესახებ ამცნო. ტელევარსკვლავმა, რომელმაც ახლახანს ”იაგუარის” უახლესი ფლაგმანის, სედან XJ-ს პრეზენტაციაში მიიღო მონაწილეობა, ”ნექსტენჯაინ 3D” სკანერი და ”იდმენშნ 3D” პრინტერი შეიძინა. ეს დანადგარები იმითაა გამორჩეული, რომ მათი მეშვეობით, ნებისმიერი ავტომობილის ნებისმიერი დეტალის ასლის დამზადება შეიძლება.

”ამ განსაკუთრებული დანადგარებით, ნებისმიერი ფორმის დეტალს დავამზადებ. სკანერი წამში 50 000 წერტილს აფიქსირებს და უმაღლესი ხარისხის ციფრული მოდელის შექმნა შეუძლია”, - ამბობს ლენო.

დანადგარები შემდეგი პრინციპით მოქმედებენ: სკანერის სპეციალურ სეგმენტში იდება ის დეტალი, რომლის აღდგენაცაა საჭირო. სკანერი მის ციფრულ სურათს ადგენს და მას პრინტერს გადასცემს, რომელიც პლასტიკური მასისგან მოდელს ამზადებს. შემდეგ მოდელი სპეციალიზებულ სახელოსნოში იგზავნება, სადაც მისგან ყალიბებს იღებენ და მათში დეტალის ნამზადს ასხამენ. ნამზადის დამუშავების შემდეგ კი ის საბოლოო სახეს ღებულობს და გამოყენებისთვის მზადაა.

დეტალის სკანირებისთვის დაახლოებით 20 წუთია საჭირო, პრინტერი კი პლასტიკატის მოდელს დაახლოებით 3 საათში ქმნის. რა თქმა უნდა, გაცილებით მეტი დრო ყალიბების შექმნაზე, ნამზადის ჩამოსხმასა და მის დამუშავებაზე მიდის. სამაგიეროდ, მინიმუმამდეა დაყვანილი ხელით შრომა, რაც საბოლოო პროდუქტს მნიშვნელოვნად აიაფებს.

ლენო ამბობს, რომ თუ გაქვთ ”ფერარის” ძრავი, რომელიც მთელს მსოფლიოში ერთადერთია, შეგიძლიათ ის მთლიანად დაშალოთ და მისი სკანერ-პრინტერის მეშვეობით, თითოეული დეტალის ასლი დაამზადოთ. ამის შემდეგ კი თქვენი უიშვიათესი ავტომობილით ყოველდღიურ სარგებლობას მისი გაფუჭების შიშის გარეშე შესძლებთ, ან სამარქაფოდ, მეორე ძრავს ააწყობთ.

ლენოს თქმით, სკანერი მან 2 995 დოლარად შეიძინა, პრინტერში კი 15 000 დოლარი გადაიხადა. ”რა თქმა უნდა, მათი ყიდვა საკმაოდ ძვირი დამიჯდა, მაგრამ სამაგიროდ, მათი მეშვეობით ისეთი დეტალების დამზადება შემიძლია, რომლებიც ამ ორ დანადგარზე ათჯერ უფრო ძვირი ღირს”, - ამბობს ამერიკელი კოლექციონერი.

”მახ 2 რეისინგი” პაიკს პიკის დასაპყრობად ემზადება

Mach 2 Racing Ford RS200

17 ივლისი

პაიკს პიკის სამთო რბოლა ერთ-ერთი ყველაზე ურთულესი და პრესტიჟულია ამერიკის კონტინენტზე. მისი დისტანცია სულ რაღაც 20 კილომეტრია, მაგრამ სტარტიდან ფინიშამდე, პილოტებს 156 მოსახვევის გავლა უწევთ, რომელთაგან ბევრი ქარაფებს გადმოსცქერის.

მთის სიმაღლე 4 000 მეტრია, სტარტი ზღვის დონიდან თითქმის 2 900 მეტრის სიმაღლეზე მდებარეობს. დისტანციის ამპლიტუდა კილომეტრზე მეტია, რაც პილოტებს საქმეს ძლიერ ურთულებს - გარდა იმისა, რომ გაუხშოებულ ჰაერში, მძიმე ფიზიკური დატვირთვისას, ჟანგბადის ნაკლებობას განიცდიან, რაც მათს რეაქციაზე უარყოფითად აისახება, ჟანგბადი არც ძრავებს ჰყოფნის, რომელთა სამსახურში ათას ცხენის ძალაზე მეტია.

რბოლისას, ავტომობილების საშუალო სიჩქარე 115 კმ/სთ-ს აღწევს. თითქოს, ეს ბევრი არ არის, მაგრამ ცოტათი ჩამოუვარდება იმ საშუალო სიჩქარეს, რომლითაც ფორმულა 1-ის პილოტები მონაკოს და ბუდაპეშტის ტრასებზე ავითარებენ. თანაც, რბოლა გრუნტზე ტარდება, რაც პილოტებისგან რკინის ნერვებსა და უმაღლეს ოსტატობას მოითხოვს.

პაიკს პიკის გავლის დროის რეკორდი ორი წლის წინ, ”სუზუკი XL7-ის” ეკიპაჟმა დაამყარა, რომელმაც ფინიშს 10 წუთსა და 01.408 წამში უწია. ბევრს მიაჩნია, რომ ეს ადამიანის საინჟინრო და პილოტირების შესაძლებლობათა ზღვარია და რომ ათწუთიანი ბარიერის გადალახვა შეუძლებელია.

მაგრამ ამ მოსაზრებას არ ეთანხმება ბრიტანული გუნდი ”მახ 2 რეისინგი”, რომელმაც სპეციალურად პაიკს პიკის რბოლისთვის და იქაური რეკორდის მოსახსნელად, რალის ლეგენდარულ ”ფორდ RS200-ის” ბაზაზე ნავდვილი მონსტრი შექმნა. ამაში კი მას საბურავების მწარმოებელი კომპანია ”ეივონ ტაიერსი” დაეხმარა. ავტომობილი 1 150-ცხენისძალიანი ძრავითაა აღჭურვილი, ეს კი რეკორდსმენი ”სუზუკის” სიმძლავრეზე 150 ცხენის ძალით მეტია.

ძრავი ავტომობილის ბაზაშია მოთავსებული და მას კომპანია ”გარეტის” ტურბოკომპრესორი ემსახურება, რომლის მეშვეობითაც, ”მხოლოდ” 950 ცხენის ალას გამოიმუშავებს. დამატებითი 200 ცხენის ძალა საწვავად 70 ლიტრი აზოტის ოქსიდის დამატებას მოაქვს. ამ მოცულობის საავტომობილო დოპინგი ოცკილომეტრიან დისტანციაზე სრულიად ”საკმარისია”.

რეკორდის დამყარებას ხვალ ბრიტანელი რალიქროსის ჩემპიონი მარკ რენისონი ეცდება, დღეს კი ის პიკზე სავარჯიშოდ ავა. ”ეს მანქანა პირველად რომ გამოვცადე, მაშინ მას სხვა საბურავები ეყენა და ეს საშინელება იყო. მაგრამ შემდეგ ”ეივონის” სპეციალური საბურავები მივიღეთ და ამან მანქანა სრულიად შეცვალა. ერთხელ ეს საბურავები უხეშ ბეტონზე გამოვცადეთ და მათ კარგად იმუშავეს. ჰოდა, ახლაც იმედი გვაქვს, რომ პაიკს პიკზეც არ გვიმუხთლებენ და მიზნის მიღწევაში დაგვეხმარებიან”, - ამბობს რენისონი.

”ტატა ნანო” პირველ მყიდველს ჩააბარეს

Tata Nano

17 ივლისი

დღეს ინდოეთში ოფიციალურად დაწყო მსოფლიოში ყველაზე იაფფასიანი ავტომობილი, ”ტატა ნანოს” გაყიდვები. მისი მწარმოებელი კომპანია ”ტატა მოტორსის” პრეზიდენტმა რატან ტატამ პირველი ”ნანო” თავად მიუყვანა მუმბაის ავტოსალონს.

”ტატა ნანოს” ერთ-ერთი პირველი მყიდველი მუმბაელი მეწაღე გახდება, ვინც თურმე წლების განმავლობაში აგროვებდა მოტოციკლის შესაძენ ფულს. მაგრამ შემდეგ, როდესაც გაუგია, რომ ”ტატა” იაფფასიანი ავომობილის წარმოებას იწყებდა, თავისი არჩევანი ”ნანოზე” შეაჩერა.

კიდევ ერთი ”ნანო” შეხვდება პირველ ინდოელ ქალ ფოტორეპორტიორს, 96 წლის ჰომი ვიარავალას. კიდევ ერთი ხნიერი ინდოელი, ვინც ”ნანოს” ერთ-ერთი პირველი შეიძენს, 82 წლის ყოფილი პოლიციელია, ვინც აქამდე თურმე მოტოციკლით სარგებლობდა. ის ამბობს, რომ თავის ავტომობილს მომავალში შვილს დაუტოვებს, რომელიც ახლა მხოლოდ 12 წლისაა.

იმის გამო, რომ ამ პატარა ავტომობილის შეძენის სურვილი ასეულობით ათასმა ადამიანმა გამოთქვა, ”ტატამ” სპეციალური ლატარეა ჩაატარა, რომლის დროსაც პირველი 100 000 მყიდველი შეარჩია. დღეისათვის კომპანიას ”ნანოზე” უკვე 203 000 შეკვეთა აქვს მიღებული, მაგრამ მისი საწარმოო სიმძლავრე, ამ ეტაპზე, წლიურად მხოლოდ 50 000 ავტომობილის წარმოების საშუალებას იძლევა.

მიუხედავად იმისა, რომ თავიდან ”ტატა მოტორსი” ”ნანოს” ფასად 2 500 დოლარს ასახელებდა, წარმოების დაწყების შემდეგ, ფასი ოდნავ გაიზარდა და დღეს ავტომობილი ინდოეთში 2 880 დოლარი (140 000 რუპია) ღირს, მისი ტოპ ვერსიის ღირებულება კი 3 800 დოლარს (185 000 რუპია) აღწევს.

ავტომობილი აღჭურვილია ორცილინდრიანი ძრავით, რომელიც მის უკანა ნაწილშია განლაგებული. მისი მუშა მოცულობა 624 კუბურ სანტიმეტრს, სიმძლავრე 35 ცხენის ძალას, მაბრუნი მომენტი კი 48 ნიუტონმეტრს აღწევს. ”ნანოს” სტანდარტულ აღჭურვილობაში შედის 4-საფეხურიანი მექანიკური გადაცემათა კოლოფი. ტოპ ვერსიის მყიდველი კი კონდიციონერით სარგებლობასაც შესძლებს.

ევროპაში ”ტატა ნანოს” გაყიდვები 2012 წელს დაიწყება და მისი ფასი 5 000 ევრო იქნება.

”ფოლკსვაგენ გოლფი” ევროპის ბესტსელერია

VW Golf

17 ივლისი

მიმდინარე წლის პირველი ექვსი თვის შემდეგ, ევროპის ბაზარზე ყველაზე გაყიდვადი ავტომობილი მეექვსე თაობის ”ფოლკსვაგენ გოლფია”. ბლოგ ”ქარსკუპის” მონაცემებით, ევროპელებმა ნახევარი წლის განმავლობაში უკვე 254 023 ”გოლფი” იყიდეს, რაც წინა წელთან შედარებით, 12.7 პროცენტით მეტია.

მეორე ადგილი ”ფორდ ფიესტას” უკავია, რომელმაც მარტში ”გოლფის” უკან მოტოვება კი შესძლო, მაგრამ მას შემდეგ, მცირე უპირატესობა გერმანული მოდელის მხარესაა. ექვსი თვის მონაცემებით, ევროპაში დაახლოებით 243 340 ”ფიესტაა” გაყიდული, რაც გასული წლის ანალოგიურ პერიოდის მაჩვენებელზე 34.2 პროცენტით მეტია.

ევროპის მესამე ყველაზე გაყიდვადი ავტომობილია ”პეჟო 207”, თუმცა მასზე მოთხოვნა შარშანდელთან შედარებით, თითქმის 20 პროცენტითაა (193 778-მდე) შემცირებული. ასევე შეუმცირდა (14.1 პროცენტით, 181 751-მდე) მყიდველი ”ოპელ კორსას”, რომელსაც გაყიდვების მაჩვენებლით მეოთხე ადგილი უკავია. შემდეგ კი ”რენო კლიო” მოდის, რომლის გაყიდვებიც 28 პროცენტით, 144 512-მდე შემცირდა. შემდგომი ადგილები უკავიათ: ”ფიატ გრანდე პუნტოს”, ”ფორდ ფოკუსს”, ”ფიატ პანდას”, ”ოპელ ასტრას” (ახალი ასტრას პრეზენტაცია ფრანკფურტში ჩატარდება) და ”პეჟო 308-ს”.

მწარმოებლების რეიტინგშიც ”ფოლკსვაგენი” ლიდერობს, რომელმაც ნახევარი წლის განმავლობაში სულ 842 787 ავტომობილი გაჰყიდა. შემდეგ მოდიან ”ფორდი” (666 548), ”ოპელი” (557 739), ”ფიატი” (542 115) და ”რენო” (520 763).

ვედეკინგს წასვლაში 100 მილიონ ევროს სთავაზობენ

Wendelin Wiedeking

17 ივლისი

გერმანულ გაზეთ ”ზუდდოიჩე ცაიტუნგის” ინფორმაციით, იმისათვის, რომ ”პორშესა” და ”ფოლკსვაგენის” გაერთიანებას ხელი არ შეუშალოს, ”პორშეს” მთავარ აღმასრულებელ ვენდელინ ვედეკინგს 100 მილიონ ევროს გადაუხდიან. გაზეთის ცნობით, ორი გერმანული კომპანიის გაერთიანების მოწინააღმდეგე ვედეკინგს გადადგომა და ესოდენ დიდი კომპენსაცია ”პორშეს” აღმასრულებელმა ვოლფგანგ პორშემ შესთავაზა.

ვედეკინგს (სურათზე) ხშირად აკრიტიკებენ იმის გამო, რომ მისი ავანტურული წამოწყების გამო - ”პორშეს” კონტროლისთვის დაექვემდებარებინა მასზე გაცილებით დიდი ”ფოლკსვაგენი”, შტუტგარტულ კომპანიას უზარმაზარი დავალიანება, 9 მილიარდი ევრო დაუგროვდა.

ამ ვალის დიდი ნაწილის დაფარვის მიზნით, ვოლფსბურგული კომპანიის სამეთვალყურეო საბჭოს თავმჯდომარე ფერდინანდ პიხმა, ვინც იმავდროულად, ”პორშეს” თანამფლობელიცაა, წამოაყენა წინადადება, რომლის მიხედვითაც, ”ფოლკსვაგენი” ”პორშეს” აქციების თითქმის 50 პროცენტს უნდა დაუფლებოდა. მაგრამ ეს შეთავაზებაც ვედეკინგმა უარყო.

პიხის შეთავაზებით, ”ფოლკსვაგენი” მზადაა, ”პორშეს” აქციების 49.9 პროცენტში 4 მილიარდი ევრო გადაიხადოს. მაგრამ შტუტგარტული კომპანიის პროფკავშირული გაერთიანების ლიდერი უვე ჰუკი ამბობს, რომ ამ პაკეტის რეალური ფასი 7-8 მილიარდი ევროა.

ვედეკინგი ”პორშეს” ხელმძღვანელი 1993 წელს გახდა, როდესაც ეს კომპანია გაკოტრების რეალური კანდიდატი იყო. ახალი ხელმძღვანელის ხელში კი სპორტული ავტმობილების მწარმოებელი, მსოფლიოში ერთ-ერთი ყველაზე წარმატებული კომპანია გახდა. ვედეკინგს ”პორშესთან” კონტრაქტი 2012 წელს უმთავრდება და როგორც ჰუკი ამბობს, ვადის გასვლამდე შეფი არსად წასვლას არ აპირებს.

”ბუგატი” ახალ ავტობილს ფრანკფურტში წარადგენს

Bugatti Bordeaux

17 ივლისი

ეს წელი მეტად მნიშვნელოვანია ”ბუგატისთვის”. ჯერ ერთი იმიტომ, რომ კომპანია დაარსებიდან 100 წლის იუბილეს აღნიშნავს. მეორეც, მალე თავის სამომავლო გეგმებს გამოაქვეყნებს რომელშიც სრულიად ახალი მოდელის წარმოება შედის. ”მალე” სექტემბერში, ფრანკფურტის მოტორ შოუზე იქნება. სექტემბერში კი იმიტომ, რომ ასი წლის წინ ეტორე ბუგატიმ სწორედ ამ თვეში დააარსა თავისი ლეგენდარული კომპანია. და სხვა თუ არაფერი, სწორედ ამ თვეში ტარდება ფრანკფურტის საავტომობილო რანდევუ.

ფრანკფურტამდე კი, კომპანიას, რომელიც უკვე ათ წელზე მეტია, გერმანული ”ფოლკსვაგენის” ჯგუფშია გაერთიანებული, თავისი ახალი ავტომობილის, ოთხკარიანი კუპეს, ან უფრო სწორედ, სუპერ სედანის, ”სუპერ-ვეირონის” ფოტო ტისერები ინტერნეტით გაუმხილეს.

ტისერი ”ფერარის” ინტერნეტ ფორუმიდან გავრცელდა, რომლის ერთ-ერთმა წევრმა განაცხადა, რომ მისმა მეგობარმა ”ბუგატისგან” ფრანკფურტის ავტო შოუზე ოფიციალური მისაწვევი მიიღო, რომელსაც ფოტო ტისერიც (სურათებზე) მოჰყვა. მართალია, ტისერზე არ ჩანს, თუ რა ავტომობილია მასზე გამოსახული, მაგრამ იმის თქმა დანამდვილებით შეიძლება, რომ ეს ”ვეირონი” არაა. და მაინც, ავტომობილის იმ ნაწილს, რომელიც ტისერზე ჩანს, ”ბუგატის” ემბლემა ამშვენებს.

გამოცემა ”ავტოექსპრესის” ინფორმაციით, ახალი ოთხადგილიანი სუპერ ავტომობილის სახელი ”ბორდოა”. ი ოთხტურბოკომპრესორიანი 8.0-ლიტრიანი W16 მონსტრით აღიჭურვება, რომელიც ავტომობილის წინა ნაწილში განლაგდება (ვეირონს ძრავი ბაზაში აქვს). ამასთან ძრავის სიმძლავრე იმდენივე იქნება, რამდენიც ”ვეირონისაა” – 1 001 ცხენის ძალა და 1 250 ნიუტონმეტრი (ეს უკვე ბუგატის ავტომობილების საფირმო მახასიათებელი ხდება). ამგვარად, ”ბუგატი ”ბორდო” მსოფლიოში ყველაზე სწრაფი ოთხადგილიანი ავტომობილი გახდება.

ასი წლის იუბილესთან დაკავშირებით, ”ბუგატი” ფრანკფურტში ასევე წარადგენს ”ვეირონის” სპეციალურ ვერსია ”ბლიუ სენტენერს”, რომელიც საზოგადოებამ პირველად ჟენევის წლევანდელ ავტო შოუზე იხილა. სხვათა შორის, ჟენევაშივეე, კომპანიის მთავარმა აღმასრულებელმა ფრანც-იოზეფ პაეფგენმა გამოცემა ”ავტო ტელეგრააფს” განუცხადა, რომ ამჟამად მუშაობა ერთდროულად რამდენიმე პროექტზე მიმდინარეობს. იქვე მან გამორიცხა ”ბუგატის” მიერ ”ვეირონზე” იაფფასიანი ავტომობილის გამოშვება.

რაც შეეხება ”სუპერ-ვეირონის” შესახებ მოარულ ხმებს, პაეფგენმა თქვა, რომ თუ მსოფლიოში ვინმე ”ვეირონზე” უკეთეს ავტომობილს დაამზადებს, მაშინ ”ბუგატიც” მზად იქნება ”სუპერ-ვეირონის” გამოსაშვებად. მართალია, ამ ეტაპზე, მსოფლიოში უსწრაფესი ავტომობილის წოდება ამერიკულ ”SSC ალტიმეიტ აერო TT-ს” ეკუთვნის, მაგრამ ისიც ფაქტია, რომ ”ვეირონი” ტექნიკურად გაცილებით უკეთესი ავტომობილია და მისი მართვაც გაცილებით იოლია, ვიდრე ამერიკული მონსტრისა.

პაეფგენი ასევე ამბობს, რომ ”ვეირონის” ბაზაზე კიდევ რამდენიმე სპეციალური გამოცემის, მათ შორის, ღია ”გრანდ სპორტის” გამოშვება იგეგმება. ამ ეტაპზე, კომპანიის საწარმო მთლიანად მიღებული შეკვეთების დაკმაყოფილებითაა დაკავებული. ცნობისათვის, ”ვეირონის” გეგმიური ტირაჟი მხოლოდ 300 ავტომობილია, რომელთაგან მხოლოდ 50 ცალია დარჩენილი. პარალელურად, კომპანია უკვე ღებულობს შეკვეთებს ”გრანდ სპორტზე”, რომელზეც უკვე რამდენიმე ათეული განაცხადია მიღებული.

”აუდი A5 სპორტბეკი” - უკვე ოფიციალური ინფორმაცია

Audi A5 Sportback

16 ივლისი

მალე ”აუდის” სამოდელო გამას კიდევ ერთი ახალი ავტომობილი - ხუთკარიანი კუპე (ჰეჩბეკი) ”A5 სპორტბეკი” შეავსებს. ამგვარად, კომპანიის მიერ დასახული გეგმის (რომელიც წლიური გაყიდვების 1.5 მილიონამდე გაზრდას ითვალისწინებს) შესასრულებლად, კიდევ ერთი ნაბიჯი გადაიდგმება.

მწარმოებელი გვამცნობს, რომ ”A5 სპორტბეკი” არის ხუთკარიანი, დაგრძელებული პროფილის მქონე ავტომობილი, რომელიც კუპეს სტილშია შესრულებული და რომელიც, მგზავრებს პრაქტიკულობითა და კომფორტით შეეგებება. კუპეს შეხედულებას ავტომობილს მისი სახურავი აძლევს, რომელიც უკან ძლიერაა დაქანებული და უკანა, საბარგულის კართან ერთად ბოლოვდება. ამასთან, ”A5 სპორტბეკის” სახურავი სედან A4-საზე 36 მილიმეტრით დაბალია. გარდა ამისა, ავტომობილს გრძელი ბაზა აქვს, რომლის სიგრძეც 2.810 მეტრს აღწევს.

სალონში ოთხი სრულფასოვანი ადგილია. საბარგულის მოცულობა 480 ლიტრია, რაც ოდნავ მცირეა A4-ის საბარგულის მოცულობაზე. სამაგიეროდ, თუ უკანა სავარძლებს დავკეცავთ, საბარგულის მოცულობა 980 ლიტრამდე გაიზრდება.

”A5 სპორტბეკისთვის” სულ ხუთი ძრავია განკუთვნილი, რომელთაგან ორი საწვავად ბენზინს იყენებს, სამი კი - დიზელს. ყველა აგრეგატი ასევე A4 და A5 მოდელებსა და მათს დერივატივებზეც გამოიყენება. ბენზინის ძრავებია 2.0-ლიტრიანი TFSI და 3.2-ლიტრიანი V6. პირვლის სიმძლავრე 211 ცხენის ძალაა, მეორისა კი - 265 ცხ.ძ. ორივე აგრეგატი ”აუდის” უახლესი სისტემა ”ვალვლიფტითაა” (სისტემა ავტომატურად არეგულირებს საწვავის შეშვებისა და ნამწვი აირის გამოშვების ფაზებს) აღჭურვილი, რომლის წყალობითაც, მათი კუთრი სიმძლავრე და მაბრუნი მომენტი გაზრდილია, საწვავის მოხმარება კი - შემცირებული. ორივე ძრავით აღჭურვილი ავტომობილები სრულამძრავიან ტრანსმისია ”კვატროთი” აღიჭურვება.

დიზელის ძრავებია: 2.0-ლიტრიანი TDI, 170 ცხენის ძალით და 350 ნიუტონმეტრით, 2.7-ლიტრიანი TDI, 190 ცხენის ძალით და 400 ნიუტონმეტრით და 3.0-ლიტრიანი V6 TDI, 240 ცხენის ძალით და 500 ნიუტონმეტრით. ყველა ვერსია სრულამძრავიანი ტრანსმისიით (კვატრო), 6-საფეხურიანი მექანიკური კოლოფით (ან 7-საფეხურიანი ნახევრად ავტომატურით) და სისტემა სტარტ/სტოპით აღიჭურვება.

ახალი ავტომობილის საბაზო აღჭურვილობაში შევა სისტემა ”სტაბილურობის ელექტრონული პროგრამა” (ESP), რომელსაც წინა ღერძის დიფერენციალის ელექტრონული ჩამკეტი აქვს. ასევე, ”A5 სპორტბეკი” აღიჭურვება ”მართვის დინამიკური სისტემით”, რომელიც სამ განსხვავებულ რეჟიმში მუშაობს. ეს სისტემა აქსელერატორის მგრძნობიარობას, გადაცემათა კოლოფის (ნახევრად ავტომატურის შემთხვევაში) და საჭის მექანიზმის მუშაობას, კონკრეტული რეჟიმის შესაბამისად სრეგულირებს.

ასეთი მდიდრული და მრავალფეროვანი აღჭურვილობის მიუხედავად, A5-ის ოჯახში ”A5 სპორტბეკი” ყველაზე ხელმისაწვდომი ავტომობილი იქნება. ევროპაში მისი სასტარტო ღირებულება 33 650 ევროა (2.0-ლიტრიანი TDI ვერსია), თუმცა გერმანული კომპანია გვპირდება, რომ შემდგომში კიდევ უფრო იაფ ვერსიასაც გამოუშვებს.

”დაიმლერმა” ელექტრული SLS AMG-ს წარმოება დაადასტურა

Mercedes SLS AMG Electric

16 ივლისი

”დაიმლერმა” ოფიციალურად დაადასტურა, რომ წარმოებისთვის ”მერსედესის” პირველ ელექტრომობილს ამზადებს. მოდელიც უკვე შერჩეულია. ესაა სუპერავტომობილი SLS AMG, რომლის შექმნაში მონაწილეობას, სამქიმიანებთან ერთად, მათი პარტნიორის, ტუნინგის საქმეში გაწაფული AMG-ს სპეციალისტებიც მიიღებენ.

ელექტრომობილი ოთხი მძლავრი ელექტროძრავით აღიჭურვება, რომლებიც ბორბლების სიახლოვეს მოთავსდება. მათი კომბინირებული სიმძლავრე 392 კილოვატს (525 ცხენის ძალას), მაქსიმალური მაბრუნი მომენტი კი 880 ნიუტონმეტრს მიაღწევს.

საინტერესოა, რომ შტუტგარტელებმა ელექტროძრავები ბორბლების შიგნით კი არა, მათ სიახლოვეს განალაგეს, რათა ბორბლის დაურესორებელი წონა შეემცირებინათ. ელექტრული SLS AMG-ს სატესტო ვერსია მაღალი ვოლტაჟის ლითიუმ-იონური აკუმულატორებითაა აღჭურვილი, რომელთა გაგრილებასაც სპეციალური სისტემა მოემსახურება. აკუმულატორების ტევადობა 40 ამპერია საათში. აკუმულატორები მოძრაობის დროსაც, მუხრუჭების მიერ გამოყოფილი ენერგიითაც დაიმუხტება.

დადასტურებული ინფორმაციით (შესამაბისი მონაცემები, ოღონდ ნავარაუდები, სამი დღის წინაც გაგაცანით), ელექტრომოტორებით აღჭურვილ SLS AMG-ს ადგილიდან 100 კმ/სთ-ს ასაკრეფად 4 წამი დასჭირდება. ეს კი იგივე აჩქარებაა, რითაც ამ ავტომობილის შიდაწვისძრავიანი ვერსია ამაყობს, რომლის კაპოტქვეშაც 6.3-ლიტრიანი V8, 571 ცხენის ძალით ბობოქრობს.

შედარებისთვის, დღეისათვის მეტად პოპულარული კალიფორნიული კომპანია ”ტესლას” ელექტრომობილ S-ს 0-100 კმ/სთ აჩქარებისთვის 6 წამი სჭირდება, მის სპორტულ ვერსიას კი - წამით ნაკლები. სხვათა შორის, ცოტა ხნის წინ, ”დაიმლერი” ”ტესლას” აქციონერი გახდა და ისინი ერთობლივად აპირებენ ელექტრომობილების შემუშავებას.

იულიან ბუმბუს კონცეპტუალური ”ბეემვე”

BMW S.X. Concept

16 ივლისი

რუმინელი დიზაინერი იულიან ბომბუ საავტომობილო დიზაინის ხელოვნებას მილანში დაეუფლა და შემდეგ, პრაქტიკა ”ალფა რომეოში” გაიარა. ახლა კი ბუქარესტში საკუთარი ატელიე აქვს, რომელიც ინდუსტრიული დიზაინის სფეროში მუშაობს. შიგადაშიგ კი, ბუმბუ თავისუფალ თემებს ასრულებს და ნამდვილ შედევრებს ქმნის. რამდენიმე თვის წინ მან საავტომობილო სამყარო კონცეპტუალური ”ლამბორგინი ინსექტათი” გააოცა, ახლა კი მორიგი კონცეპტუალური შედევრი - ”ბეემვე S.X.” შექმნა.

”ბეემვე S.X.” არის ბუმბუსეული ინტერპრეტაცია იმისა, თუ როგორი შეიძლება იყოს ბავარიული კომპანიის ლუქსის კლასის სპორტული ავტომობილი. S.X. არის უფრო განიერი და დაბალი, ვიდრე მასთან ყველაზე ახლოს მყოფი მე-6 სერიის ”ბეემვე”, ამასთან მასზე მოკლეცაა და უფრო გრძელი ბაზაც აქვს. მოკლედ, ნამდვილი მტაცებელია.

ვიზუალური თვალსაზრისით, S.X. ბავარიული კომპანიის კორპორატიულ სტილს შეეფერება, თუმცა მასში სიახლეც ბევრი შეინიშნება. მსგავსება განსაკუთრებით წინხედსა და უკანა ხედში შეინიშნება. სამაგიეროდ, იგივეს თქმა არ შეიძლება მის გვერდხედზე.

რამდენადაც ნამუშევარი მხოლოდ ესკიზების სახით არსებობს, მისი შემქმნელი არაფერს გვეუბნება იმაზე, თუ ყველაზე მეტად რა აგრეგატები მიესადაგება მის ქმნილებას. და რამდენადაც, S.X. -ს სუპერავტომობილობაზე აქვს პრეტენზია, მისთვის ზედგამოჭრილი 5.0-ლიტრიანი V10 იქნებოდა, რომელიც 536 ცხენის ძალას ავითარებს, ან ამ ძრავის ფორსირებული ვარიანტი...