”ფერარი F450” ფრანკფურტისთვის ემზადება

Ferrari F450

21 ივლისი

”ფერარი” ფრანკფურტის მოტორ შოუსთვის გამალებით ამზადებს თავის უახლეს მოდელ F450-ს, რომელმაც მარანელოელთა სამოდელო გამაში ჯერაც პოპულარული, თუმცა უკვე მოძველებული F430 სკუდერია უნდა შეცვალოს.

ცნობილია, რომ იტალიური კომპანია თავისი სიახლის საგზაო ტესტებს ჩრდილოეთ იტალიაში ატარებს, სადაც პაპარაცებმა ავტომობილს რამდენიმე მსტოვრული ფოტოც კი გადაუღეს, მაგრამ ის იმდენად საგულდაგულოდაა შენიღბული, რომ ამ ფოტოების მიხედვით, მის გარეგნობაზე თითქმის არაფრის თქმა არ შეიძლება.

ერთადერთი ელემენტი, რასაც მარანელოელები ტესტირების დროს არ მალავენ, წინა მაშუქებია, რომლებიც შესანიღბი შავი ქსოვილით საერთოდ არაა დაფარული. და მაინც, სხვადასხვა საინტერნეტო გამოცემები, რომლებიც შებიღბული ავტომობილების ”გაშიფვრაზე” არიან დახელოვნებულნი, ცდილობენ, რომ მსტოვრული ფოტოების მიხედვით, ახალი სუპერავტომობილის ფოტო რობოტი შეადგინონ. ერთ-ერთი ასეთი საიტი ”ტოპსპიდია” (TopSpeed), რომელმაც F450-ის საკმაოდ რეალური სურათი დახატა და რა თქმა უნდა, ინტერნეტითაც გაავრცელა.

ამ ფოტოების მიხედვით, ავტომობილის გარეგნობაში კუთხოვანი ფორმების სიჭარბე შეინიშნება, რაც ბოლო დროს მოდად იქცა. ისე კი, F450 თავისი წინამორბედის პროპორციებს იმეორებს და უფრო მეტიც, ძრავის ჰაერის ამღები ფოსოები მასაც უკანა ბორბლების თაღების თავზე აქვს მოთავსებული. წინა საბარგული წინა ამობურცულ ფრთებს შორისაა ჩაძირული და რბილად გადადის საქარე მინაში, რაც ავტომობილს დინამიურ გამომეტყველებას ანიჭებს. ყურადღებას ასევე ძრავის გამაგრილებელი სისტემის რადიატორების დიდრონი ჰაერის ამღებები იქცევს.

წინასწარი მონაცემებით, ახალი ავტომობილი, რომელიც ”ფერარის” შიგნით F142-ად მოიხსენიება, F430 სკუდერიას V8 ძრავით აღიჭურვება, რომლის მუშა მოცულობაც ოდნავ, 4.5 ლიტრამდეა გაზრდილი. ძრავთან კი გადაბმულობის ორმაგი ქუროთი, 7-საფეხურიანი, სეკვენტალური კოლოფია დაკავშირებული, რომელიც ასევე მოდელ ”კალიფორნიაზე” გამოიყენება.

რა თქმა უნდა, ამ ეტაპზე, არც F450-ის ფასები გამოქვეყნებულა. ცნობისათვის, ევროპაში F430 სკუდერია 175 000 ევრო, ამერიკაში კი 168 000–227 000 დოლარი ღირს. სავარაუდოდ, ახალი ავტომობილი ამაზე ძალიან ძვირი არ ეღირება.

ისტორიული ”იაგუარ C-ტაიპი” აუქციონზე გაიყიდება

21 ივლისი

მონტერეის (კალიფორნია) სპორტული და კლასიკური ავტომობილების აუქციონზე, რომელიც პებლ ბიჩის ელეგანტურობის კონკურსის დღეებში ტარდება, გასაყიდად გამოტანილია 1952 წელს გამოშვებული სარბოლი ავტომობილი ”იაგუარ C-ტაიპი”, რომლითაც ფორმულა 1-ის ამერიკელმა ჩემპიონმა ფილ ჰილმა 1952 წელს (მაშინ ის ჩემპიონი ჯერ არ იყო) ინგლისურ კომპანიას ჩრდილოეთ ამერიკაში პირველი გამარჯვება მოაპოვებინა.

ეს ავტომობილი ერთ-ერთი პირველია ”იაგუარის” ისტორიაში, რომელიც კომპანიამ გასაყიდად ჩრდლოეთ ამერიკის ბაზარზე შეიტანა. აუქციონზე გამოტანილი ავტომობილიც ამერიკაში 1952 წელს ჩაიტანეს. როგორც კი ნიუ იორკის პორტში გადაიტვირთა, ავტომობილი მაშინვე შტატ ვისკონსინის გზას გაუყენეს, სადაც ელკჰარტ ლეიკის ავტოდრომზე, ამერიკის მიწაზე მისი სარბოლი ნათლობა შედგა. რბოლაზე კი ის მისი საგზაო ვერსიის გაყიდვების სასტიმულიროდ გავიდა.

იმ დროს 25 წლის ჰილმა ”იაგუარ C-ტაიპით” პირველი გამარჯვება შელდონის თასზე მოიპოვა. ”იაგუარის” დასავლეთ ამერიკელი დისტრიბუტორის, ჩარლზ ჰორნბურგის სპონსორობით, ჰილმა კიდევ რამდენიმე რბოლაში მიიღო მონაწილეობა და მათგან ერთი მოიგო.

რაც რბოლებში აღარ მონაწილეობდა, აღნიშნულმა ავტომობილმა რამდენიმე მფლობელი გამოიცვალა და ”გზად” სრულად აღდგა. მას ახლაც ის ძრავი აქვს (მუშა მდგომარეობაში), რომლითაც ფილ ჰილი რბოლებში გამოდიოდა. აღსანიშნავია ისიც, რომ სარბოლი კარიერის განმავლობაში, ავტომობილი ერთხელაც არ დამტვრეულა.

”იაგუარ C-ტაიპის” სააუქციონო საწყისი ფასი ჯერჯერობით არ ქვეყნდება.

მსოფლიოს წლის საუკეთესო ავტომობილის ნომინანტები

World Car of the Year

21 ივლისი

პორშეს კაიმან/ბოქსსტერი ორ ნომინაციაშია დასახელებული

.................................................................................

მსოფლიოს წლის საუკეთესო ავტომობილის გამოცხადება ტრადიციულად, ნიუ იორკის საავტომობილი შოუზე, აპრილში ხდება ხოლმე. ნომინაციებში ის ავტომობილები შეჰყავთ, რომლებსაც კომპანიები უკვე აწარმოებენ და ნომინაციების გამოცხადების მომენტში, მას მინიმუმ ხუთ ქვეყანაში და ორ კონტინენტზე მაინც ჰყიდიან.

კონკურსის საორგანიზაციო კომიტეტმა უკვე გამოაქვეყნა იმ ავტომობილების სია, რომლებსაც 2010 წლის საუკეთესო ავტომობილისა და საუკეთესო სპორტული ავტომობილის წოდების მოპოვების შანსი ექნებათ. პირველ კატეგორიაში 31 ახალი ავტომობილია შესული, მეორეში კი - 15. კონკურსი საუკეთესოებს ასევე მწვანე (ეკოლოგიურ) ავტომობილების და საუკეთესო დიზაინის ნომინაციებშიც ავლენს. ამ ორ კატეგორიაში ნომინაციები მოგვიანებით გამოქვეყნდება.

კონკურსი მერმის მეშვიდედ გათამაშდება. ტრადიციულად, ჟიურიში მსოფლიოს წამყვანი საავტომობილო გამოცემების ჟურნალისტები შევლენ. რამდენიმე ეტაპზე შერჩევის შემდეგ, კონკურსის 45-კაციანი ჟიური სამ-სამ ფინალისტს აარჩევს, რომელთაგან საუკეთესოებიც მერმის, ნიუ იორკის ავტო შოუზე გამოცხადდება.

2010 წლის საუკეთესო ავტომობილი

აუდი Q5, მე-5 სერიის ბეემვეს გრან ტურიზმო, ბეემვე X1, ბეემვე Z4, ბიუიკ ლაქროსი, კადლაკ SRX, შევროლე კამარო, შევროლე კრუზი, სიტროენ C3 პიკასო, ჰონდა ინსაითი, ჰიუნდაი ჯენეზის კუპე, ჰიუნდაი i20, ინფინიტი QX, იაგუარ XJ, კია ფორტე/სერატო კუპი, კია სორენტო, კია სოული, ლექსუს HS250h, ლექსუს RX, მაზდა3, მერსედეს-ბენც E-კლასი, მიცუბიში აუტლანდერი, ნისან 370Z/370Z როდსტერი, ნისან კუბი, ნისან პატროლი, პეჟო 3008, პორშე ბოქსსტერი/კაიმანი, პორშე პანამერა, რენო სცენიკი, სუბარუ ლეგასი, ტოიოტა პრიუსი.

2010 წლის საუკეთესო სპორტული ავტომობილი

ასტონ მარტინ V12 ვენტიჯი, აუდი R8 V10, აუდი S4 ლიმუზინ/ავანტი, აუდი TT RS კუპე/როუდსტერი, ბეემვე 335i პერფორმენს სედანი, ბეემვე X6M/X5M, ბეემვე Z4, იაგუარ XFR, მაზდასპიდ3, მერსედეს-ბენც E 63 AMG, მიცუბიში ლანსერ სპორტბეკ რალიარტი, ნისან 370 Z, პორშე 911 GT3, პორშე ბოქსსტერი/კაიმანი, რენო კლიო 3 რენო სპორტი

”ასტონ მარტინმა” უგზოობის ”ლაგონდას” პროექტი შეაჩერა

Aston Martin Lagonda

21 ივლისი

”ასტონ მარტინმა” გამოაცხადა, რომ აჩერებს პროექტს, რომელიც უგზოობის მოდელის ”ლაგონდას” სახელით გამოშვებას ითვალისწინებდა. ამის ოფიციალურ მიზეზად მსოფლიო ეკონომიკური კრიზისი და ამის შედეგად გამოწვეული გაყიდვების კლება დასახელდა.

ავტომობილის კონცეპტუალური ვერსია პირველად ჟენევის წლევანდელ ავტო შოუზე გამოჩნდა და ბევრი კრიტიკა დაიმსახურა. კრიტიკოსთა აზრით (რეალურად ასეცაა), ავტომობილი ძლიერ ჰგავს შვედური ”სააბის” უგზოობის ”9X აეროს”. როგორც ამბობენ, პროექტის შეჩერების მიზეზი სწორედ ”სააბთან” მსგავსება გახდა. ინტერნეტში ასევე ვრცელდება ხმები იმის შესახებ, რომ ”ასტონ მარტინის” ხელმძღვანელობამ პროექტი ისევ დიზაინერებს დაუბრუნა, რომლებსაც ავტომობილისთვის ინდივიდუალური გარეგნობის შემუშავება დაევალათ.

სხვათა შორის, ჟენევაში, ”ასტონ მარტინის” სტენდზე უგზოობის ”ლაგონდა” მხოლოდ ერთი დღე იდგა, შემდეგ კი, კომპანიის ერთ-ერთი თანამფლობელის, ინგლისელი დევიდ რიჩარდსის მოთხოვნით, ის სტენდიდან მოიხსნა. მაშინ კომპანიამ თავი იმით იმართლა, რომ ავტომობილი ჯერ მხოლოდ ერთ ეგზემპლარად არსებობს და ის სხვა გამოფენაზე იყო წასაღები. არადა, მარტის დასაწყისში ყველაზე მნიშვნელოვანი საავტომობილო ფორუმი სწორედ ჟენევაში ტარდება. რა იგულისხმებოდა ”სხვაგან-ში”, ეს გაურკვეველი დარჩა, რადგან კონცეპტუალური ”ლაგონდა” სხვა გამოფენებზე აღარც გამოჩენილა.

სხვათა შორის, კონცეპტუალური ავტომობილის დიზაინის დაწუნებაზე ის გარემოებაც მიუთითებს, რომ ”ასტონ მარტინის” შეფ ულრიხ ბეცის თქმით, მის კომპანიას მოძებნილი ჰყავს ინვესტორი, რომელიც მზადაა, ავტომობილის წარმობისთვის მოსამზადებლად საჭირო 250 მილიონი გირვანქა სტერლინგი გაიღოს. ”მაგრამ ახლა მისი დებიუტისთვის შესაფერისი დრო არ არის. კონცეპცია ჯერაც დასახვეწია, რასაც დრო და დამატებითი ინვესტიცია დასჭირდება”, - ამბობს ბეცი. ფული არის, წარმობის დაწყების სურვილი კი - არა. ”ასტონ მარტინი” ისეთ ავტომობილებს აე აწარმოებს, რომ მათი რეალიზაცია გლობალური ეკონომიკის მდგომარეობაზე იყოს დამოკიდებული. ესე იგი, უგზოობის ”ლაგონდას” პროექტის შეჩერების მთავარი მიზეზი ავტომობილის დიზაინის დაწუნებაა.

ასეა თუ ისე, ”ასტონ მარტინში” უკვე მუშაობენ ახალ კონცეპციაზე, რომელიც ასევე ”ლაგონდას” მარკით წელსვე რომელიმე დიდ გამოფენაზე გამოჩნდება. სავარაუდოდ, ეს დიდი გამოფენა ფრანკფურტის მოტორ შოუ იქნება.

ცნობისათვის, ჟენევაში წარმოდგენილი უგზოობის ”ლაგონდა” ”მერსედეს-ბენცის” GL-ის პლატფორმაზეა აგებული. ის აღჭურვილია ინგლისური კომპანიის V12 ძრავით. ამ ავტომობილის წარმოების დაწყების სავარაუდო დროდ 2012 წელი სახელდებოდა.

”აკურა” ქროსოვერ ZDX-ის წარმოებას იწყებს

Acura ZDX

21 ივლისი

”ჰონდას” ჯგუფში შემავალმა ”აკურამ”, რომელიც პრემიუმ კლასის ავტომობილების წარმოებაზეა სპეციალიზებული, საზოგადოებას თავისი ახალი ავტომობილი - ქროსოვერ ”აკურა ZDX-ს” საწარმოო ვერსია წარუდგინა. უკანა ნაწილში დახრილი სახურავით, ეს ავტომობილი უგზოობის კუპეს მოგვაგონებს, ბაზარზე კი ის კონკურენციას ”პორშე კაიენსა” და ”ბეემვე X6-ს” გაუწევს.

”აკურა ZDX” აღჭურვილია 3.7-ლიტრიანი, V6 კონფიგურაციის ბენზინის აგრეგატით, რომლის სიმძლავრეც 300 ცხენის ძალას აღწევს. ძრავთან 6-საფეხურიანი ავტომატური გადაცემათა კოლოფია შეწყვილებული, რომლის გავლითაც, მის მიერ გამომუშავებული მაბრუნი მომენტი სრულამძრავიან სისტემას (SH-AWD) გადაეცემა.

ჯერჯერობით უცნობია, მწარმოებელი ამ ავტომობილზე სხვა ძრავების გამოყენებასაც თუ აპირებს, ასევე არ ქვეყნდება ZDX-ის დინამიკური მახასიათებლები.

სამაგიეროდ ცნობილია, რომ ავტომობილი აღჭურვილია ხმით მართვადი სანავიგაციო სისტემით, ადაპტირებადი კრუიზ კონტროლითა და პანორამული ხედვის სისტემით, რომელიც მძღოლს პარკირებისას საქმეს უადვილებს და ეგრეთ წოდებული მკვდარი ზონების გაკონტროლების საშუალებას აძლევს.

”აკურა ZDX-ის” გაყიდვები ამ ზამთარში დაიწყება. ჯერჯერობით, იაპონური კომპანია თავისი სიახლის ფასებს არ აქვეყნებს. თუმცა, იქიდან გამომდინარე, რომ ახალი ავტომობილი ”აკურას” სამოდელო გამაში უგზოობის MDX-სა და სედან RL-ს შორის ნიშას დაიკავებს, შეიძლება ვარაუდი, რომ ZDX-ს ღირებულება 40-46 ათას დოლარს შორის მოექცევა.

”ჯენეზის კუპეთი” დაპყრობილი პაიკს პიკი

Genesis Coupe

20 ივლისი

გასულ უქმეებზე, ავტოსპორტული ამერიკის ყურადღება ერთ-ერთი ყველაზე პოპულარული რბოლის, პაიკს პიკისკენ იყო მიპყრობილი, რომელიც მსოფლიოში ურთულეს სამთო რბოლადაა მიჩნეული. ამ რბოლისთვის, ყველა გუნდი ისეთივე მონდომებით ემზადება, როგორც, ვთქვათ, ლე მანის 24-საათიანი რბოლისთვის მისი მონაწილენი მთელი წლის განმავლობაში ემზადებიან ხოლმე.

ასეთ გუნდებს შორისაა ”ჰიუნდაი”, რომელმაც პაიკს პიკზე პირველად გამოიყვანა მანქანა. ამისათვის, კორეულმა კომპანიამ თავისი სარბოლი ავტომობილი კლას ”RWD ტაიმ ატაკისთვის”, კუპე ”ჯენეზისის” ბაზაზე მოამზადა და რბოლა ბრწყინვალე შედეგით დაასრულა.

რალის, დრიფტის და წრიული რბოლების ახალზელანდიელმა სპეციალისტმა რაის მილენმა, თავისი სპეციალური ”ჯენეზისით”, თითქმის 20-კილომეტრიანი დისტანცია, რომელზეც 156 ურთულესი მოსახვევი იყო გასავლელი, 12 წუთსა და 09.397 წამში განვლო და კლას ”RWD ტაიმ ატაკის” ძველი რეკორდი, რომელიც მასვე ეკუთვნოდა, 22 წამზე მეტით გააუმჯობესა. თანაც, ფინიშის ხაზზე ისე გაიარა, უკანა ბორბლებს საბურავები აღარ შერჩენოდა და ავტომობილი ფოლადის დისკებზე იდგა.

”ეს შესანიშნავი მანქანაა და ათასობით მაყურებლის წინაშე, მისით ასპარეზობა ჩემთვის დიდი პატივი იყო. ფინიშამდე უკანა საბურავებმა ვერ გამიძლო, მანქანას კი ეს თითქმის არც უგრძვნია. საერთოდ, პაიკს პიკი აბსოლუტურად ყველასგან გამორჩეული რბოლაა და ორმაგად სასიამოვნოა, როდესაც მასზე საკუთარი რეკორდის გასაუმჯობესებლად გამოდიხარ და მიზანს აღწევ. ეს ფანტასტიკურია”, - ნაბოლევს განაცხადა მილენმა, ვინც უახლოესი მდევარი წუთზე მეტით ჩამოიტოვა.

”ბიუიკ რეგალი” ამერიკისთვის

Buick Regal

20 ივლისი

”ჯენერალ მოტორსი” თავის ყველაზე ახალ მარკა ”სატურნს” ჰყიდის, მაგრამ ეს იმას არ ნიშნავს, რომ იმ ნიშას, რომელიც ამ მარკის საწარმოო პროგრმას აშშ-ის ბაზარზე ეკავა, აუთვისებელს დატოვებს. შემცვლელად კი მარკა ”ბიუიკი” დაუსახავს, რომლისთვისაც, ამ ეტაპზე ყველაზე პრიორიტეტული ჩინური ბაზარია.

მეორე მხრივ, ამერიკის ბაზარზე ჯერ არ შესულა ევროპის წლის საუკეთესო ავტომობილად დასახელებული ”ოპელ ინსინია”, რომელსაც ამერიკაში ”სატურნ აურას” სახელით ელოდნენ. მაგრამ რამდენადაც ”სატურნი” მალე ”ჯენერალ მოტორსის” ოჯახის წევრი აღარ იქნება, სასწრაფოდ ”აურას” შემცვლელი იყო მოსაძებნი. პარალელურად, ”ოპელ ინსინიას” ბაზაზე შექმნილ მანქანას ამრიკული კომპანია ჩინეთში ”ბიუიკ ლაქროსის” სახელით ჰყიდის. თითქოს, ლოგიკური იყო, რომ ეს ავტომობილი ამერიკაშიც ამავე სახელით გაყიდულიყო. მაგრამ ”გენერლებმა” სხვა გზა აირჩიეს და ”ინსინიას” ბაზაზე კიდევ ერთი ავტომობილის - ”ბიუიკ რეგალის” წარმოება გადაწყვიტეს, რომელიც ასევე წარმატებით იყიდება ჩინეთში.

”ჯენერალ მოტორსის” ავტომობილების ინტეგრაციის შეფმა როჯერ კნიობელმა გამოცემა ”აუტომოტივ ნიუსთან” საუბრისას განაცხადა, რომ ”რეგალი” კომპანიის სამოდელო გამაში ”ლაქროსზე” ერთი საფეხურით დაბლა დაიკავებს ადგილს და მასზე რამდენიმე ათასი დოლარით იაფი ეღირება. ჯერ ახალი ”რეგალის” ფასი არ გამოცხადებულა, თუმცა ”ლაქროსის” ფასის (27 835 დოლარი) მიხედვით შეიძლება ვარაუდი, რომ ამერიკაში გაამერიკელებული ”ინსინია”, ანუ ”ბიუიკ რეგალი” 20 000 დოლარის ფარგლებში ეღირება, რაც ”ოპელის” ამ ეპოქალური ავტომობილის ევროპულ ფასზე მნიშვნელოვნად ნაკლებია.

”რეგალიც” და ”ლაქროსიც” ერთსადაიმავე, ”ეპსილონ II” პლატფორმაზეა ბაზირებული, რომელსაც წინა წამყვანი ბორბლები აქვს. ამ ორი ავტომობილის განსასხვავებლად, ”რეგალს” არ ექნება ხმის ისეთი ჩამხშობები, როგორებიც ”ლაქროსს” აქვს და საერთოდ, ეს უკანასკნელი უფრო მდიდრულადაა შესრულებული. ხმის ჩამხშობებია მაგალითად, შუშის სპეციალური ლამინატი და სპეციალური ნივთიერება, რომლითაც ავტომობილის ძირია დამუშავებული. ამასთან, ”რეგალი” ”ლაქროსზე” დაახლოებით 172 მილიმეტრით მოკლეა. მათი ბაზების სიგრძეებს შორის სხვაობა კი (კვლავ ლაქროსის სასარგებლოდ) 100 მილიმეტრია.

კნიობელის თქმით, ”ბიუიკმა” ამერიკაში კონკურენცია ”ლექსუსსა” და ”აკურას” უნდა გაუწიოს. ამისათვის, ამ მარკის სამოდელო გამის მნიშვნელოვანი გაფართოება იგეგმება. კერძოდ, არცთუ ისე შორეულ მომავალში, ამერიკელ მყიდველს ”ოპელ ასტრას” ბაზაზე დამზადებულ ”ბიუიკის” ჰეჩბეკებსაც შესთავაზებენ.

ყველა დროის ყველაზე ძვირადღირებული ”ალფა რომეო”

Alfa Romeo 8C Spider

20 ივლისი

სპორტული მოდელი ”8C კომპეტიციონე” ”ალფა რომეოს” საიმიჯო ავტომობილია და ძალიან მცირე რაოდენობით მზადდება. შარშან მილანურმა კომპანიამ ამ ავტომობილის ღია ვერსიის, ”8C სპაიდერის” წარმოება დაიწყო, რომელიც მხოლოდ მერმის მიაღწევს აშშ-ის ბაზარს, სადაც ამ ულამაზეს ავტომობილს მოუთმენლად ელიან.

ისევე როგორც 8C-ს კუპე ვერსიას, ”ალფა რომეო” ”სპაიდერსაც” მხოლოდ 500 ცალს დაამზადებს, აქედან კი ოკეანის გაღმა მხოლოდ 35 ცალი გაიგზავნება, სადაც ახლახანს მიღებული გადაწყვეტილებით, თითოეული მათგანი 299 000 დოლარად გაიყიდება. ეს ფასი კი იმას ნიშნავს, რომ ”8C სპაიდერი” მილანური კომპანიის ისტორიაში ყველაზე ძვირადღირებული ავტომობილია.

”ალფა რომეო” ”8C სპაიდერს” მოდენას ქარხანაში უშვებს. ავტომობილი ”მაზერატი გრანტურიზმოს” პლატფორმაზეა ბაზირებული და აგრეგატები და სხვადასხვა მექანიკური კვანძებიც მისგანვე აქვს ნასესხები. ავტომობილი მამოძრავებელ ძალას 4.7-ლიტრიანი V8 ძრავისგან ღებულობს, რომელიც მუხლა ლილვის 7 000 ბრ/წთ-ზე 450 ცხენის ძალას გამოიმუშავებს, 4750 ბრ/წთ-ზე კი 480 ნიუტონმეტრ მაქსიმალურ მაბრუნ მომენტს იძლევა. ამასთან, მაქსიმალური მაბრუნი მომენტის 80 პროცენტის გამომუშავება 2 500 ბრ/წთ-ზე ხდება. ცნობისათვის, ბრუნთა რიცხვების წითელი ხაზი 7 500 ბრ/წთ-ზე გადის, ბრუნთა მაქსიმალური რიცხვი კი 7 600-ითაა შეზღუდული.

ძრავთან შეწყვილებულია 6-საფეხურიანი სეკვენტალური გადაცემათა კოლოფი, რომლის საფეხურების შეცვლაც საჭის რგოლის უკან მოთავსებული ბერკეტებითაა შესაძლებელი. წამყვან ბორბლებს შორის მაბრუნ მომენტს თვითბლოკირებადი დიფერენციალი ანაწილებს.

ცხენის ძალების მთელ ამ კოჰორტას მეტად დახვეწილი სამუხრუჭე სისტემა აკონტროლებს, რომელიც იტალიურ კომპანია ”ბრემბოს” მიერაა შემუშავებული. სამუხრუჭე დისკები (380-მილიმეტრიანი წინა და 360-მილიმეტრიანი უკანა), 20-დუიმიან ბორბლებშია მოთავსებული. მოძრაობის უსაფრთხოების გაუმჯობესებას ”ალფა რომეოს” VDC ტრეკშნ კონტროლისა და სტაბილურობის სისტემები უზრუნველყოფს.

დაბოლოს, ”ალფა რომეო” აცხადებს, რომ 8C-ს ბაზაზე კიდევ უფრო ტემპერამენტიანი ვერსიის, GTA-ს წარმოებაც იგეგმება. ამ ავტომობილის შესახებ ჯერჯერობით მხოლოდ ისაა ცნობილი, რომ ის მხოლოდ 100 ცალი დამზადდება. თუმცა, თუ მისი ღია ვერსიის წარმოებაც გადაწყდა, მაშინ ტირაჟი ალბათ გაორმაგდება.

ამერიკის გზებზე ელექტრომობილების დომინირებას ელიან

Electric cars

20 ივლისი

შტატ კალიფორნიის ბერკლის უნივერსიტეტის მიერ ჩატარებულმა ანალიზმა აჩვენა, რომ 2030 წელს ამერიკის დილერების მიერ გაყიდული მანქანების 86 პროცენტი ელექტრომობილი იქნება, თუ მყიდველს ავტომობილთან ერთად, ძვირადღირებული აკუმულატორის შეძენაც არ მოუწევს.

ამ ეტაპზე, ბევრი კომპანია მუშაობს იმაზე, რომ ელექტრომობილების მფლობელებს ენერგიის შეძენის ისეთივე მოსახერხებელი ხერხი შესთავაზოს, როგორითაც სატელეკომუნიკაციო კომპანიები მობილური ტელეფონების მფლობელებს სალაპარაკო დროის ყიდვას სთავაზობენ. სისტემას პირობითად ”პეი-პერ-მაილ-ს” (გადაიხადე მილის მიხედვით) უწოდებენ. ასეთ კომპანიებს შორის, ყველაზე გამორჩეული ამერიკულ-ებრაული ”ბეტერ პლეისია”, რომელსაც უკვე შემუშავებული აქვს ელექტრომობილების ენერგომომსახურების მოსახერხებელი გრაფიკი.

მის მიხედვით, ოჯახი ყიდილობს ელექტრომობილს, მაგრამ მისი აკუმულატორის მფლობელად ”ბეტერ პლეისი” რჩება. როდესაც ელექტრომობილი ენერგიით გასამართ სადგურს მიადგება (რომელიც ”ბეტერ პლისისა” იქნება), იქ მას აკუმულატორს შეუცვლიან, რისი წყალობითაც, მანქანას სადგურზე დიდი ხნით ხნით შეყოვნება არ მოუწევს.

დაანგარიშებულია, რომ ენერგიით დასამუხტი სადგურების ქსელის მშენებლობა, მთელი აშშ-ის მასშტაბით, დაახლოებით 320 მილირდი დოლარი დაჯდება. სამაგიეროდ, ქვეყანა გამონაბოლქვით გამოწვეული პრობლმების თავიდან აცილებით, 210 მილიარდს დაზოგავს. რაც მთავარია, აკუმულატორების გარეშე, ელექტრომობილები თითქმის იმდენივე ან უფრო ნაკლებიც კი ეღირება, რამდენიც შიდაწვისძრავიანი ავტომობილები ღირს. მათი მომსახურება კი გაცილებით იაფი დაჯდება.

ცნობისათვის, ”ბეტერ პლეისისთვის” ელექტრომობილებს ფრანგული კომპანია ”რენო” დაამზადებს. ბერკლის ანალიტიკოსებმა ისიც გამოითვალეს, რომ ახლანდელი ფასების მიხედვით, ელექტრომობილების ენერგიით დამუხტვა (მილზე გადაანგარიშებით) თითქმის იმდენივე დაჯდება, რაც შიდაწვისძრავიანი ავტომობილის საწვავით გაწყობა ჯდება. მერე კი, როდესაც საწვავის ფასი გარდაუვალად გაიზრდება, ელექტროენერგიის შეძენა გაცილებით იაფი იქნება.

წყალში ნაპოვნი ”ბუგატი”

Brescia Bugatti

20 ივლისი

ასეთი იყო ტბაში ჩაძირვამდე 1925 წელს გამოშვებული ”ბრეშა”

წყალში მარტო ჩაძირულ გემებს როდი პოულობენ. ფსკერზე თურმე ოდესღაც ჩაძირული ავტომობილის ნახვაც შეიძლება, ავტომობილისა, როგორებსაც დღეს სანთლით ეძებენ და როგორებშიც ასეულობით ათას, ხშირად კი მილიონობით დოლარსაც იხდიან. და რა მნიშვნელობა აქვს, როგორ მოხვდა შვეიცარიის ერთ-ერთი ტბის ფსკერზე ასეთი ავტომობილი.

რამდენიმე დღის წინ, შვეიცარიის ქალაქ ასკონას მყვინთავთა კლუბის წევრებმა, ქალაქის მახლობლად მდებარე ტბა ვერბანოს ფსკერზე ჩაძირული ”ბუგატი” იპოვნეს, რომელიც იქ მინიმუმ 70 წლის განმავლობაში იმყოფებოდა.

”ბუგატის” ისტორიის ფრანგი ექსპერტი ჰანს მატი ამბობს, რომ ტბის ფსკერზე ნაპოვნი ავტომობილი ”ბრეშა ბუგატია”, მასზე აღმოჩენილი ნომრის მიხედვით კი დადგინდა, რომ ის 1925 წლის 11 აპრილს დაამზადეს. ავტომობილი საფრანგეთში, ქალაქ ნანსიში გაყიდულა. ამ ეტაპზე, მის შესახებ მეტი არაფერია ცნობილი.

ჟურნალ ”ტოპსპიდის” ინფორმაციით, ამჟამად მთელს მსოფლიოში თითქმის 3 000 ”ბუგატი” არსებობს, მათგან 160 ცალი შვეიცარიაში იმყოფება. როგორც ანტიკვარული მანქანების სპეციალისტები ამბობენ, ტბაში აღმოჩენილი ავტომობილი აღდგენას არ ექვემდებარება. მაგრამ აუქციონზე მისი გაყიდვა თურმე ამ სახითაც შესაძლებელია.

მატი ამბობს, რომ ეტორე ბუგატის ”ბრეშას” სახელით არაერთი მოდელი დაუმზადებია. ყველა მათგანს განსაკუთრებული ნიშანი აქვს, რომელიც მათი ამოცნობის საშუალებას იძლევა. მაგალითად, ”ტაიპ 13 ბრეშა” იმითაა გამორჩეული, რომ მას კარბურატორი ძრავის მარცხენა მხარეს აქვს მოთავსებული, რაც ”ბუგატის” სხვა მოდელებზე არ გვხვდება. მასვე გამოსაბოლქვი მილი მარჯვნივ აქვს. ”ტაიპ 23 ბრეშა” კი ავტოინდუსტრიის ისტორიაში პირველი სერიული ავტომობილია, რომელსაც ძრავის ცილინდრზე ორზე მეტი სარქველი აქვს.

”იაგუარ X-ტაიპის” წარმოება დროზე ადრე შეწყდება

Jaguar X-Type

20 ივლისი

ინგლისური კომპანია ”იაგუარის” ხელმძღვანელობამ გადაწყვიტა, რომ დაგეგმილზე ნახევარი წლით ადრე შეწყდეს ”იაგუარ X-ტაიპის” წარმოება. ძველი გადაწყვეტილებით, ამ მოდელის წარმოება მერმის, ზაფხულში უნდა შეწყვეტილიყო, მაგრამ ეს ამ წლის ბოლოს მოხდება. ეს კი საწარმოო ხარჯების შესამცირებლად კეთდება. ამასთან დაკავშირებით, კომპანია ქარხნიდან დაახლოებით 300 თანამშრომელს დაითხოვს.

იმის გამო, რომ X-ტაიპზე” მოთხოვნა ძალიან შემცირებულია, ”იაგუარი” მის მწარმოებელ ქარხანას სექტემბერში სამი კვირით გააჩერებს. ”იაგუარ ლენდ როვერის” შეფი დევიდ სმიტი ამბობს, რომ ამ ორი მარკის ავტომობილების გაყიდვები ბოლო ათ თვეში დაახლოებით 28 პროცენტითაა შემცირებული, რის გამოც, კომპანიას წარმოების და თანამშრომელთა შემცირება უწევს. კერძოდ, უკვე დათხოვნილია 2200 თანამშრომელი და გადახედილია ახალი პროექტები და საინვესტიციო პროგრამები.

კრიზისის დასაძლევად, ევროპის საინვესტიციო ბანკმა ”იაგუარ ლენდ როვერს” 330 მილიონი ევროს კრედიტი გამოუყო, თუმცა კომპანიას ეს თანხა ჯერ არ მიუღია. არადა, სმიტი ამბობს, რომ ამ თანხის დაგვიანების შემთხვევაში, მის კომპანიას კიდევ უფრო მეტი პრობლემა შეექმნება.

შეკვეთით შექმნილი ჯუჯა ელექტრომობილის პროექტი

Lotus supermini

19 ივლისი

სპორტული ავტომობილების მწარმოებელ ინგლისურ კომპანია ”ლოტუსის” ინჟინრებმა ჯუჯა ელექტრომობილის პროექტი მოამზადეს, რომელიც, მათი აზრით, შეიძლება ბრიტანული ქალაქების გზებზე 2015 წელს გამოჩნდეს.

პროექტი ითვალისწინებს ჯუჯა ზომების ავტომობილის წარმოებას, რომელიც 37 კილოვატიანი ძრავით აღიჭურვება. მასში ენერგიის დასაგროვებლად, ავტომობილის ძირზე განლაგებულ ლითიუმ-იონურ აკუმულატორს გამოიყენებენ, რომელიც ენერგიას საყოფაცხოვრებო ქსელიდან (პლუგ-ინ სისტემა) შეივსებს. პროექტის მიხედვით, აკუმულატორის ერთი სრული დამუხტვით, რასაც სამსაათნახევარი დასჭირდება, ავტომობილის სვლის მარაგი 80 კილომეტრს მიაღწევს. მისი მაქსიმალური სიჩქარე კი 105 კმ/სთ იქნება.

”ლოტუსის” მიერ დაპროექტებული ელექტრომობილი ძალიან პატარა გაბარიტებით გამოირჩევა. ფაქტობრივად, ის ”სმარტის” ზომისაა და გაცილებით პატარაა ”ტოიოტას” ჯუჯა iQ-ზე. ამ უკანასკნელის სალონში ჩასაჯდომი ფორმულა 3+1-ია, ”ლოტუსი” კი გვარწმუნებს, რომ მის ჯუჯაში 4 ადამიანი მოთავსდება. თუმცა, პროექტის ციფრული ესკიზებიდან კარგად ჩანს, რომ უკანა სავარძლებზე კომფორტულად ჯდომა პრაქტიკულად გამორიცხულია. მაგრამ თუ უკანა ორი სავარძელი დაიკეცება, წინა ორი ადგილი საკმაოდ კომფორტული იქნება და საბარგულის ზომაც მნიშვნელოვნად გაიზრდება.

”ლოტუსის” მინი ელექტომობილის ზომებია: სიგრძე 2 600 მმ, სიგანე 1 600 მმ, სიმაღლე 1 700 მმ და ბაზა კი - 2 000 მმ. ავტომობილის პლატფორმა ალუმინის პროფილებისგან დამზადდება, რაც შეეხება ძარას, წარმოების მოცულობიდან გამომდინარე, მის საწარმოებლად ალუმინს, ან კომპოზიციურ მასალებს გამოიყენებენ.

”ლოტუსის” საინჟინრო დივიზიონის შეფი რასელ კერი ამბობს, რომ კომპანიის ინჟინრებმა ეს პროექტი სულ რაღაც ორ კვირაში, ჟურნალ ”აუტომოტივ ინჯაინერის” შეკვეთით მოამზადეს. შედარებისთვის, კონცეპტუალური პროექტირებისთვის 3-6 თვეა ხოლმე საჭირო. ეს იმის მანიშნებელია, რომ რეალურად, ”ლოტუსის” მინი ელექტრომობილი ჯერ მხოლოდ უხეშად დამუშავებული ესკიზის დონეზეა შექმნილი. ამასთან, კერი ამბობს, რომ ეს პროექტი საგულდაგულოდაც რომ დამუშავდეს, მის მიხედვით ავტომობილების წარმოებას თავად ”ლოტუსი” მაინც არ აპირებს. სამაგიეროდ, კომპანია მზადაა, ის რომელიმე ავტომწარმოებელს მიჰყიდოს.

”აუდი” A1-ს ბრიუსელში გამოუშვებს

Audi A1

19 ივლისი

ბელგიურ გაზეთ ”ლე სუართან” საუბრისას, ”აუდის” ბრიუსელური ქარხნის ხელმძღვანელმა ალფონს დინტნერმა განაცხადა, რომ მისი ქარხანა მინი ჰეჩბეკ A1-ის სერიულ წარმოებას ოქტომბერში შეუდგება. ამასთან, ახალი ავტომობილის წარმოების დაწყებამდე, ქარხანა ხუთი კვირით გაჩერდება, რათა მასში საჭირო გადაიარაღება ჩატარდეს.

დინტნერის თქმით, წარმოების დასაწყისში, A1 სამკარიანი ჰეჩბეკის ძარით დამზადდება, მოგვიანებით კი ქარხანა ხუთკარიანი სპორტბეკის წარმოებასაც დაიწყებს. სავარაუდოდ, ავტომობილის საწარმოო ვერსიის ხილვა პირველად ფრანკფურტის მოტორ შოუზე იქნება შესაძლებელი.

A1-ის პირველი კონცეპტუალური ვერსია, სახელად ”მეტროპროჯექტ კვატრო”, ”აუდიმ” პირველად ორი წლის წინ, ტოკიოს ავტო შოუზე წარადგინა, შარშან კი იგივე ავტომობილი უკვე კონცეპტუალური ”A1 სპორტბეკის” სახელით, პარიზის ავტო შოუზე გამოჩნდა.

საწარმოო ვერსია გარეგნობით ყველაზე ახლოს სწორედ ”A1 სპორტბეკთან” იქნება. რა თქმა უნდა, მასზე არ გადავა ის დეკორატიული ელემენტები, რომლებიც კონცეპტუალურ ავტომობილზე, მეტი ყურადღების მიპყრობის მიზნით იყო გამოყენებული. მაგალითად, ”A1 სპორტბეკის” კარებებს ჩარჩო არ ჰქონდა, A1-ზე კი აუცილებლად ექნება. ასევე შეიცვლება დიდრონი ბამპერები, რომლებიც ავტომობილს აგრესიულ იერს სძენდა. დაკიდევ, შედარებით გაუბრალოვდება ავტომობილის ინტერიერი.

”აუდი A1” თავის მთავარ მეტოქეზე - ”ბეემვეს” ”მინიზე” გრძელი და განიერია. ინგოლშტადტელები თავიანთ ახალ ავტომობილზე 4-ცილინდრიანი ძრავების ფართო გამას გამოიყენებენ. მათ შორისაა 1.2-ლიტრიანი (86 ცხენის ძალით), 1.4-ლიტრიანი (122 ცხენის ძალით) და 1.4-ლიტრიანი ტურბოძრავი (122 ცხენის ძალით), რომლებიც ბენზინზე მუშაობენ, ასევე 1.6-ლიტრიანი დიზელის აგრეგატი, რომლის სიმძლავრეც 90 ცხენის ძალაა.

შემდგომში ”აუდი” აუცილებლად აპირებს A1-ის ღია და სპორტული ვერსიების წარმოებას. ამ უკანასკნელს S1-ს დაარქმევენ და ის 200-ცხენისძალიანი ძრავით აღიჭურვება.

”ვერცხლისფერი ისრების” სახელოვანი ისტორიის ერთი ფურცელი

Avus 1937

18 ივლისი

ამ დღეებში ”აუდი” დაარსებიდან 100 წლის იუბილეს აღნიშნავს, რასთან დაკავშირებითაც, გუდვუდის სიჩქარის ფესტივალზე, გერმანული კომპანიისადმი მიძღვნილი უზარმაზარი მონუმენტი წამოჭიმეს. საზოგადოებას კი იმ ავტომობილებს უჩვენებენ, რემლებმაც ”აუდის” სახელი გაუთქვეს.

სამწუხაროდ, ამ ავტომობილებს შორის ვერავინ იხილავს სტრიმლაინერის სერიის მოდელებს, რომლებიც 1937 წელს ”აუტო უნიონის” (ეს აუდის ერთ-ერთი და ყველაზე სახელოვანი წინამორბედია) სპორტულმა განყოფილებამ, ლეგენდარული ფერდინანდ პორშეს ხელმძღვანელობით შექმნა. ეს ავტომობილები დიდი პრიზების რბოლებისთვის შექმნილი ბოლიდების ბაზაზე დამზადდა და მათგან აეროდინამიკური, გარსშემოდენილი ძარით განსხვავდებოდნენ. სამწუხაროდ, მათგან დღემდე ვერცერთი ვერ შემორჩა.

დღეს მეტსახელი ”ვერცხლისფერი ისრები” მხოლოდ ”მერსედეს-ბენცის” სარბოლი ავტომობილებისადმი მიმართებაში გამოიყენება, მაგრამ ყველამ როდი იცის, რომ ამ თიკუნით ომისწინა გერმანიაში ”აუტო უნიონის” ბოლიდებიც სარგებლობდნენ. ორივე კომპანია ნაცისტური გერმანიის ხელმძღვანელობის მხარდაჭერით სარგებლობდა, თუმცა ისინი უპირველეს მეტოქედ ერთმანეთს მიიჩნევდნენ.

1937 წელს, ბერლინის მახლობლად მდებარე ტრეკ აფუსის ხელმძღვანელობამ ახალი, თავისუფალი ფორმულა შემოიღო, რომელიც სარბოლ ავტომობილებს ყოველგვარ შეზღუდვას უხსნიდა. ამ ფორმულის მიხედვით, ”აუტო უნიონმა” და ”მერსედეს-ბენცმა” სუპერ ბოლიდები დაამზადეს, რომლებსაც თითქმის ოცკილომეტრიან ტრასაზე სიჩქარის წარმოუდგენელი ზღვარის - 400 კმ/სთ-ის გადალახვა შეეძლოთ. ორი გერმანული გუნდის პაექრობა განსაკუთრებით საინტერესო იმ მოსახვევში იყო, რომელსაც ხშირად ”სიკვდილის კედელსაც” უწოდებდნენ. ამის მიზეზი ის იყო, რომ მოსახვევი 43-გრადუსიან ვირაჟს წარმოადგენდა, რომლის გზის საფარიც აგურებით იყო ნაშენი. ასეთი დახრა კი მანქანებს მოსახვევის მაქსიმალურთან მიახლოებული სიჩქარით გავლის საშუალებას აძლევდნენ. აფუსის რბოლები იმდენად საინტერესო იყო, რომ მათ 300-400 ათასი მაყურებელი ესწრებოდა ხოლმე.

”ვერცხლისფერი ისრების” შტრომლინერების პირველი დიდი აფუსური რბოლა 1937 წელს ჩატარდა. ასპარეზობა სამ, შვიდწრიან სპრინტად დაიყო, რომელთაგან თითოზე საასპარეზოდ 6-8 მანქანა გამოდიოდა. მათგან ოთხი სტრიმლაინერი იყო - ორ-ორი ”აუტო უნიონისა” და ”მერსედესისგან”. დანარჩენი კი დიდი პრიზის კლასის სარბოლი ბოლიდები იყო.

სტრიმლაინერები დიდი სიჩქარით გამოირჩეოდა. სამაგიეროდ, დიდი პრიზის კლასის ბოლიდები მათ მოსახვევების გავლისას სჯობდნენ. და მაინც, უფრო მაღალი საშუალო სიჩქარე სტრიმლაინერებს ჰქონდა.

1937 წლის აფუსური რბოლის პირველი სპრინტი ყველაზე საინტერესო გამოდგა და ორი გერმანელი პილოტის, რუდოლფ კარაჩოლასა (მერსედესი) და ბერნდ როზემეიერის (აუტო უნიონი) უშეღავათო პაექრობით აღინიშნა. ბოლო წრემდე მათ ბორბალი-ბორბალში იარეს, ფინიშზე კი კარაჩოლამ როზემეიერს 0.7 წამით მიასწრო.

მეორე სპრინტი უფრო ჩქაროსნული გამოდგა. მასში პირველობისთვის მანფრედ ფონ ბრაუხიჩმა (მერსედესი) და იტალიელმა ლუიჯი ფაჯოლიმ (აუტო უნიონი) იბრძოლეს. ასპარეზობას ადრევე გამოეთიშა ჰერმან ლანგი, ვის ”მერსედესსაც” საბურავი გაუსკდა და პილოტმა ძლივს შეძლო მანქანის დამორჩილება. შუა რბოლაში ფაჯოლის მანქანას ტრანსმისია დაუზიანდა და ფონ ბრაუხიჩმა ადვილი გამარჯვება მოიპოვა.

და მაინც, გადამწყვეტი მესამე სპრინტი იყო, რომლის გამარჯვებულიც, რბოლის გამარჯვებულადაც ცხადდებოდა. ამ რბოლაში (წინა ორის შედეგების მიხედვით), სამი სტრიმლაინერი ”მერსედესმა” გამოიყვანა (ფონ ბრაუხიჩი, კარაჩოლა და ლანგი), ერთი კი - ”აუტო უნიონმა” (როზემეიერი). მაგრამ როზემეიერის მანქანაზე V16 ძრავი დაზიანდა - მის ძრავზე სტარტის წინ მხოლოდ 13 ცილინდრი მუშაობდა...

რბოლა კი ლანგმა მოიგო.

ჯეი ლენოს ახალი შენაძენი

Jay Leno

18 ივლისი

ჯეი ლენო და მისი სკანერ-პრინტერი

ამერიკის ერთ-ერთი ყველაზე პოპულარული ტელეწამყვანი ჯეი ლენო, ვისაც 1992 წლიდან მოყოლებული, ტელეკომპანია ენბისის პოპულარული ტოკ-შოუ ”ღამის შოუ ჯეი ლენოსთან ერთად” მიჰყავს, წლევანდელიდან კი იმავე ტელეარხზე ”ჯეი ლენოს შოუს” წამყვანია, საავტომობილო სამყაროში უნიკალური ავტო კოლექციითაა ცნობილი. მის ფარეხში ისეთ იშვიათ ავტომობილებსაც კი შეხვდებით, რომლებსაც წინა საუკუნის დასაწყისში, ერთეულებს ამზადებდნენ.

ბუნებრივია, იშვიათი და დროთა განმავლობაში გვარიანად შელახული ავტომობილების რესტავრაცია დიდ ძალისხმევას, მოთმენას და სოლიდურ სახსრებს მოითხოვს, მაგრამ ყველაზე ცუდი ისაა, რომ ზოგიერთი ავტომობილის დაზიანებული დეტალის აღდგენა, ან შეცვლა შეუძლებელია. ამის გამო, კოლექციონერები ხშირად კერძო სახელოსნოებს აკითხავენ, რომლებიც მათთვის სასურველ დეტალებს ძალიან ძვირად ამზადებენ.

მაგრამ ამიერიდან, მათ სერიოზული კონკურენტი გამოუჩნდათ თავად ლენოს სახით, ვინც რამდენიმე დღის წინ, საზოგადოებას უნიკალური დანადგარის შეძენის შესახებ ამცნო. ტელევარსკვლავმა, რომელმაც ახლახანს ”იაგუარის” უახლესი ფლაგმანის, სედან XJ-ს პრეზენტაციაში მიიღო მონაწილეობა, ”ნექსტენჯაინ 3D” სკანერი და ”იდმენშნ 3D” პრინტერი შეიძინა. ეს დანადგარები იმითაა გამორჩეული, რომ მათი მეშვეობით, ნებისმიერი ავტომობილის ნებისმიერი დეტალის ასლის დამზადება შეიძლება.

”ამ განსაკუთრებული დანადგარებით, ნებისმიერი ფორმის დეტალს დავამზადებ. სკანერი წამში 50 000 წერტილს აფიქსირებს და უმაღლესი ხარისხის ციფრული მოდელის შექმნა შეუძლია”, - ამბობს ლენო.

დანადგარები შემდეგი პრინციპით მოქმედებენ: სკანერის სპეციალურ სეგმენტში იდება ის დეტალი, რომლის აღდგენაცაა საჭირო. სკანერი მის ციფრულ სურათს ადგენს და მას პრინტერს გადასცემს, რომელიც პლასტიკური მასისგან მოდელს ამზადებს. შემდეგ მოდელი სპეციალიზებულ სახელოსნოში იგზავნება, სადაც მისგან ყალიბებს იღებენ და მათში დეტალის ნამზადს ასხამენ. ნამზადის დამუშავების შემდეგ კი ის საბოლოო სახეს ღებულობს და გამოყენებისთვის მზადაა.

დეტალის სკანირებისთვის დაახლოებით 20 წუთია საჭირო, პრინტერი კი პლასტიკატის მოდელს დაახლოებით 3 საათში ქმნის. რა თქმა უნდა, გაცილებით მეტი დრო ყალიბების შექმნაზე, ნამზადის ჩამოსხმასა და მის დამუშავებაზე მიდის. სამაგიეროდ, მინიმუმამდეა დაყვანილი ხელით შრომა, რაც საბოლოო პროდუქტს მნიშვნელოვნად აიაფებს.

ლენო ამბობს, რომ თუ გაქვთ ”ფერარის” ძრავი, რომელიც მთელს მსოფლიოში ერთადერთია, შეგიძლიათ ის მთლიანად დაშალოთ და მისი სკანერ-პრინტერის მეშვეობით, თითოეული დეტალის ასლი დაამზადოთ. ამის შემდეგ კი თქვენი უიშვიათესი ავტომობილით ყოველდღიურ სარგებლობას მისი გაფუჭების შიშის გარეშე შესძლებთ, ან სამარქაფოდ, მეორე ძრავს ააწყობთ.

ლენოს თქმით, სკანერი მან 2 995 დოლარად შეიძინა, პრინტერში კი 15 000 დოლარი გადაიხადა. ”რა თქმა უნდა, მათი ყიდვა საკმაოდ ძვირი დამიჯდა, მაგრამ სამაგიროდ, მათი მეშვეობით ისეთი დეტალების დამზადება შემიძლია, რომლებიც ამ ორ დანადგარზე ათჯერ უფრო ძვირი ღირს”, - ამბობს ამერიკელი კოლექციონერი.