გაიცანით ”როლ როის გოუსტი”

Rolls Royce Ghost

7 სექტემბერი

ბრიტანულმა კომპანია ”როლს როისმა”, როგორც იქნა, საბურველი ახადა თავის უახლეს ავტომობილს, რომელსაც საზოგადოება წლების განმავლობაში ”ბეიბი როლსის” სახელით მოიხსენიებდა. ავტომობილს ”გოუსტი” ჰქვია (მოჩვენება) და მისი მსოფლიო პრემიერა რამდენიმე დღეში, ფრანკფურტის საავტომობილო შოუზე გაიმართება.

მართალია, ”როლს როისის” პირველ მოდელ ”ფანტომზე” დაახლოებით ნახევარი მეტრით მოკლეა, მაგრამ ”გოუსტი” მაინც დიდი გაბარიტებით გამოირჩევა. მის ზორბა კაპოტქვეშ კი შესაფერისი აგრეგატი მოკალათებულა. ესაა 6.6-ლიტრიანი V12, რომელიც ორი ტურბოკომპრესორითაა აღჭურვილი. ის 563 ცხენის ძალას და 780 ნიუტონმეტრს გამოიმუშავებს, ეს ავლა-დიდება კი წამყვან უკანა ბორბლებს 8-საფეხურიანი ავტომატური კოლოფის გავლით მიეწოდობა.

ეს საკმარისია იმისათვის, რომ გიგანტურმა ავტომობილმა ადგილიდან 100 კმ/სთ სიჩქარე 4.6 წამში აკრიფოს. რაც შეეხება მის მაქსიმალურ სიჩქარეს, ისიც ”ფანტომოვით” 250 კმ/სთ-ითაა შეზღუდული (მეტი რა საჭიროა). სამაგიეროდ, ”მოჩვენებას” კარგი მადა აქვს - 100 კილომეტრზე 13.6 ლიტრ ბენზინს მოიხმარს, ყოველი კილომეტრის გავლისას კი ატმოსფეროს 317 გრამი CO2-ით აბინძურებს.

”გოუსტი” უამრავი დამხმარე საშუალებითაა აღჭურვილი. მათ შესახებ ჩვენ რამდენჯერმე უკვე მოგიყევით (ნახეთ ბმულები ქვემოთ). ამჯერად დავამატებთ, რომ მძღოლის განკარგულებაშია კარების დისტანციური გაღების სისტემა, ”ბრმა ზონების” დასაფიქსირებელი” რამდენიმე კამერა, სამოძრაო ზოლიდან გადასვლისას, მძღოლის გამაფრთხილებელი სისტემა, რა თქმა უნდა სტოპ/სრატრ სისტემა, მთავარი ფარების მიმართულების მაკორექტირებელი სისტემა და სხვა.

”გოუსტის” წარმოებას ”როლს როისი” წელსვე დაიწყებს. თითო ავტომობილის ღირებულება 250 000 ევრო იქნება.

http://autopanoramaf1.blogspot.com/2009/06/rolls-royce-ghost-9.html

http://autopanoramaf1.blogspot.com/2009/07/rolls-royce-ghost-22-200-ex.html

http://autopanoramaf1.blogspot.com/2009/06/rolls-royce-ghost-14.html

”მაკლარენი” სიახლეს ამზადებს

McLaren MP4-12C

7 სექტემბერი

მართალია, ”მაკლარენ აუტომოტივი” ამას ოფიციალურად არ ადასტურებს, მაგრამ ინტერნეტში გავრცელებული ცნობით, ხვალ ინგლისური კომპანია თავის ახალ სუპერავტომობილს - MP4-12C-ს გაგვაცნობს, რომელიც აქამდე P11 კოდური სახელწოდებით იყო ცნობილი.

ბრიტანული ”ქარმეგზინის” ინფორმაციით, ავტომობილი, რომელიც ლეგენდარული სამხრეთაფრიკელი კონსტრუქტორის, გორდონ მარის მიერაა შექმნილი და რომელმაც კონკურენცია ”პორშე 911-ს” და ”ფერარის” უახლეს ”458 იტალიას” უნდა გაუწიოს, 6.2-ლიტრიანი V8 ძრავითაა აღჭურვილი, რომელიც 450 ცხენის ძალას ავითარებს. მისი მეშვეობით, MP4-12C ადგილიდან 100 კმ/სთ-მდე აჩქარებას 4.6 წამში შეძლებს, მისი მაქსიმალური სიჩქარე კი 312 კმ/სთ იქნება.

”ქარმეგზინისვე” ინფორმაციით, ახალ ავტომობილზე გამოყენებულია შერჩევითი დამუხრუჭების ტექნოლოგია, რომელიც მძღოლს საშუალებას აძლევს, უკან ბორბლებზე ცალ-ცალკე არეგულიროს სამუხრუჭე ძალა. ამგვარად, საგრძნობლად გაუმჯობესდება ავტომობილის მართვადობა და მანევრულობა.

კომპანიის შეფი რონ დენისი, ვინც ამავე სახელწოდების მქონე ფორმულა 1-ის გუნდის მმართველობა სწორედ საგზაო ავტომობილების პროექტების გამო (ფ1-ის მიმდინარე სეზონის დასაწყისში) დატოვა, აცხადებს, რომ წარმოების დაწყებიდან პირველივე სრულ წელს, 1 000 ცალი MP4-12C-ის გაყიდვა იგეგმება. საკმაოდ თამამი გეგმაა, თუ გავითვალისწინებთ, რომ ავტომობილის საბაზო ღირებულება 150 000 გირვანქა სტერლინგი (დაახლოებით, 250 000 დოლარი) იქნება.

MP4-12C-ს წარმოება მერმის უნდა დაიწყოს, ოთხი წლის შემდეგ კი კომპანია წლიური წარმოების 4 000 ცალამდე გაზრდას აპირებს. ამ დროს კი მისი სამოდელო გამა სამ ავტომობილამდე იქნება გაზრდილი. MP4-12C-ის შემდეგ, ბაზარზე ლეგენდარული ”მაკლარენ F1-ის” შთამომავალი (სამეულიდან ყველაზე ექსტრემალური და ძვირადღირებული) გამოჩნდება, მას კი ყველაზე იაფი მოდელი მოჰყვება, რომლის ფასიც 100 000 გირვანქა სტერლინგზე დაბლა უნდა იყოს.

ახალი ავტომობილისთვის, ”მაკლარენ აუტომოტივი” თავისი მთავარი ბაზის სიახლოვეს ახალ საწარმოს ააშენებს, რომლის დღიური წარმადობა 20 ავტომობილი იქნება.

”პეჟო იონი” - ფრანგული ლომების პირველი ელექტრომობილი

Peugeot iOn

7 სექტემბერი

”პეჟომ” გამოაცხადა, რომ ფრანკფურტის საავტომობილო შოუზე ნულოვანი ბამონაბოლქვის მქონე ავტომობილს, ”პეჟო იონს” წარადგენს, რომელიც მხოლოდ ელექტროენერგიით მუშაობს და რომლის წარმოებაც მერმის, წლის ბოლოს დაიწყება. ამგვარად, ”პეჟო” გახდება პირველი ევროპული კომპანია, რომელიც ძველი კონტინენტის ბაზარზე ელექტრომობილებს გამოიტანს.

ავტომობილი იაპონურ კომპანია ”მიცუბიშის” ელექტრომობილ i MiEV-ის ბაზაზეა შექმნილი, მის შემუშავებაში კი ორივე კომპანიის თანამშრომლებმა თანაბარი მონაწილეობა მიიღეს. ამდენად, სულაც არაა გასაკვირი, რომ ”იონი” გარეგნულად ძლიერ ჰგავს თავის იაპონელ ნათესავს.

ოთხკარიანი ავტომობილის სიგრძე 3.48 მეტრია, მისი მოხვევის რადიუსი კი 4.50 მეტრს აღწევს. ავტომობილს ბიძგს ელექტროძრავი აძლევს, რომლის მაქსიმალური სიმძლავრე 64 ცხენის ძალა, მაქსიმალური მაბრუნი მომენტი კი 180 ნიუტონმეტრია. მისი მეშვეობით, ავტომობილს სულ რაღაც 130 კმ/სთ-ის განვითარება შეუძლია.

”პეჟო იონი” ლითიუმ-იონური აკუმულატორებითაა აღჭურვილი და როცა ისინი სრულადაა დამუხტული, ავტომობილის სვლის სიშორე 130 კილომეტრს აღწევს. სხვათა შორის, ”მიცუბიში i MiEV-ს” სვლის მარაგად 160 კილომეტრი უწერია. ნებისმიერ შემთხვევაში, 130 კილომეტრი სრულიად საკმარისია იმისათვის, რომ ქალაქში მცხოვრები ავტომობილისტის ყოველდღიური მოთხოვნა დააკმაყოფილოს.

აკუმულატორების ბლოკი ელექტროენერგიას საყოფაცხოვრებო ქსელიდან ივსებს (პლაგ-ინ სისტემა), რისთვისაც მას 6 საათი ესაჭიროება. იმავდროულად, სულ 30 წუთია საკმარისი იმისათვის, რომ აკუმულატორები 80 პროცენტით დაიმუხტოს.

”პეჟოსა” და ”მიცუბიშის” შორის მიღწეული შეთანხმებით, იაპონური კომპანია თავის ფრანგ პარტნიორს წლიურად დაახლოებით 25 000 ელექტრომობილს მიაწვდის. ”იონის” ფასი ჯერჯერობით არ ქვეყნდება.

”დონფენი” თურქეთში ქარხანას ააშენებს

Dongfeng’s Plant in Turkey

6 სექტემბერი

დონფენ ფენშენ S30

................................................................

სიდიდით მესამე ჩინური ავტომწარმოებელი ”დონფენ მოტორი” თურქეთში ქარხნის აშენებას აპირებს, რომელიც წლიურად 52 000 ავტომობილს გამოუშვებს. ქარხნის მშენებლობას 250 მილიონი დოლარი მოხმარდება და მასში დაახლოებით 1 000 ადამიანი დასაქმდება.

თურქეთის მხარემ ეს ინფორმაცია დაადასტურა და ასევე აღნიშნა, რომ ქარხნისთვის ადგილი ჯერ შერჩეული არაა და ამ ეტაპზე, სწორედ ამ საკითხთან დაკავშირებით მიმდინარეობს მუშაობა. სავარაუდოდ, ახალი ქარხნის მშენებლობა მერმის, წლის პირველ მეოთხედში დაიწყება.

ამ ქარხნის მეშვეობით, ”დონფენი” ევროპაში ექსპანსიას აპირებს. რა თქმა უნდა, იქ წარმოებული ავტომობილების უმეტესობა თურქეთშივე გაიყიდება. დიდ ნაწილს კი ახლო აღმოსავლეთისა და ჩრდლოეთ აფრიკაშიც გაიტანენ. დროთა განმავლობაში კი, ”დონფენის” ავტომობილებზე მოთხოვნის ზრდის პარალელურად, ქარხნის წარმადობა გაიზრდბა და მისი ნაწარმის დიდი ნაწილი ევროპაში გაიყიდება.

პარალელურად, უცხოურ ბაზრებზე საქმიანობის გასააქტიურებლად, ”დონფენი” სხვა არაჩინური კომპანიების შეძენასა და მათთან ერთობლივი კომპანიების ჩამოყალიბებასაც ეშურება. მაგალითად, გავრცელდა ხმები იმის შესახებ, რომ ”დონფენი” ”ჯენერალ მოტორსისგან” მისი ავსტრალიური ბრენდის - ”ჰოლდენის” გამოსყიდვას ცდილობს. თუმცა, ავსტრალიური კომპანია ჩინურ ავტომწარმოებელთან ყოველგვარი მოლაპარაკების მიმდინარეობას უარყოფს.

”დონფენ მოტორის” ვიცე პრეზიდენტი ლი შაოჯუ ამბობს, რომ მისი კომპანია ეკონომიკური კრიზისით დასუსტებული უცხოური კომპანიების შეძენითაა დაინტერესებული, რადგან ამ ეტაპზე, ეს საკმაოდ იაფი დაუჯდება. სამაგიეროდ, შეძენილი ავტომწარმოებლის ხელთ არსებული ტექნოლოგიები ჩინურ კომპანიას საერთაშორისო ავტორიტეტის მოსაპოვებლად გამოადგება.

”კიას” საფრანკფურტო ექსპონატები

Kia at Frankfurt

6 სექტემბერი

ფრანკფურტის ავტო შოუს დაწყებამდე რამდენიმე დღით ადრე, ავტო მწარმოებლები თავიანთი საგამოფენო ექსპონატების ანონსირებას ეშურებიან. მათ არც ”კია” ჩამორჩა, რომელმაც გამოაცხადა, რომ შოუს დამთვალიერებლებს თავისი ორი პოპულარული მოდელის - ჰეჩბეკ ”ს’იიდს” და უგზოობის ”სორენტოს” (სურათებზე) ჰიბრიდულ ვერსიებს წარუდგენს.

რა თქმა უნდა, ორივე ავტომობილი იმისთვისაა შექმნილი, რომ მათ ნაკლები საწვავი მოიხმარონ და შესაბამისად, გარემოც ნაკლებად დააზიანონ. ამისათვის კი მათს შიდაწვის ძრავებს დამხმარედ ელექტროძრავები შეუწყვილეს.

ჰიბრიდული ”ს’იიდი” იმავე აგრეგატითაა აღჭურვილი, რომელიც ”კიამ” პირველად ”ფორტეზე” გამოიყენა. ”სორენტოს” ჰიბრიდული დანადგარის ძირითად აგრეგატი კი წყვილი ტურბოკომპრესორით აღჭურვილი, 1.6-ლიტრიანი ძრავია, რომელიც 161 ცხენის ძალას გამოიმუშავებს. ჟურნალ ”აუტოქარის” ინფორმაციით, ჰიბრიდული აგრეგატით აღჭურვილი ”სორენტო” ყოველი კილომეტრის გავლისას, ატმოსფეროში მხოლოდ 119 გრამ ნახშირორჟანგს გამოჰყოფს.

ჰიბრიდულ ”სორენტოს” წარმოებას კორეული კომპანიის უესტპოინტური (შტატი ჯორჯია) ულტრათანამედროვე ქარხანა ამ წლის ბოლოდან დაიწყებს.

”სიტროენის” საიდუმლო სიახლე

Citroen's concept

6 სექტემბერი

ფრანგულმა კომპანია ”სიტროენმა” საკუთარი ფეისბუკის გვერდზე თავისი ახალი კონცეპტუალური მოდელის ფოტო თავსატეხი დადო, რომელსაც სახელად არაფრის მთქმელი ”ნუვო C3” (ახალი C3) უწოდა და რომლის პირველ ჩვენებასაც ფრანკფურტის საავტომობილო შოუზე მოაწყობს.

ფოტოზე, განათებული სფეროს ფონზე მდგარი ავტომობილის ლანდი ჩანს, რომლის მიხედვითაც გარკვევით რაიმეს თქმა ძალიან ძნელია. ავტომობილს ”ახალი C3” კი უწოდეს, მაგრამ მას არც C3-თან და არც DS3-თან საერთო არაფერი უნდა ჰქონდეს. კომპანიის ინკოგნიტო წარმომადგენელი ადასტურებს, რომ ეს ფრანკფურტში საჩვენებელი კონცეპტუალური ავტომობილის ფოტო ტისერია, მაგრამ სხვა ინფორმაცია საიდუმლოდ შეინახა. მოკლედ, ყველაფერი კეთდება იმისათვის, რომ ამ ავტომობილისადმი საზოგადოების ინტერესი, რაც შეიძლება, მეტად გაღვივდეს.

თუმცა, ინტერნეტით უკვე გავრცელდა ვარაუდები იმის თაობაზე, რომ ”ნუვო C3” შესაძლოა, ”სიტროენის” ყველაზე ხელმისაწვდომი ავტომობილის წინამორბედი იყოს, რომელიც ლეგენდარული 2CV-ს ტრადიციებს გააგრძელებს (ფოლკსვაგენის და მინის ძველი ლეგენდები ხომ განახლების შემდეგაც ძალიან პოპულარულები არიან?). ამასთან, იმავე ვარაუდის მიხედვით, ახალი კონცეპცია ორი წლის წინ წარმოდგენილი, ასევე კონცეპტუალური ”C-კაქტუსის” უფრო დახვეწილი (საწარმოო ვერსიასთან მიახლოებული) ვარიანტი იყოს.

დაკიდევ, თითქმის გარანტირებულად შეიძლება იმის ვარაუდი, რომ ეს ავტომობილი ჰიბრიდული ძალური დანადგარით იქნება აღჭურვილი. ეს იგივე ჰიბრიდული სისტემაა, რომლით აღჭურვილ რამდენიმე მოდელსაც ფრანკფურტშივე ”სიტროენის” ნათესავი - ”პეჟო” წარადგენს.

”ნუვო C3-ის” გარდა, ფრანკფურტის ავტო შოუს დროს, ”სიტროენის” პავილიონში ასევე შესაძლებელი იქნება ჰეჩბეკ C3-ის და სამკარიანი DS3-ის ნახვა.

”ჰიუნდაის” სრულიად ელექტრული i10

All-electric Hyundai i10

5 სექტემბერი

სხვა სიახლეებთან ერთად, ”ჰიუნდაი” ფრანკფურტის საავტომობილო შოუზე სრულიად ელექტრულ i10-საც გამოფენს, მსოფლიო პრემიერამდე ცოტა ხნით ადრე კი კომპანიამ ამ ავტომობილის შესახებ ინფორმაცია ინტერნეტით გაავრცელა. გაყიდვების პირველი ორი წლის განმავლობაში, კორეელები ამ ავტომობილს ლიზინგით გაჰყიდიან, 2012 წელს კი მის მასობრივ წარმოებას დაიწყებენ.

ამ ავტომობილის შექმნ იმასა მოასწავებს, რომ ”ჰიუნდაიმ” სტრატეგია შეიცვალა - ადრე კორეული კომპანია განვითარების პერსპექტიულ მიმართულებად წყალბადის ფიჭურ ელემენტებსა და ჰიბრიდულ დანადგარებზე მომუშავე ავტომობილებს თვლიდა, ელექტრომობილებს კი ზურგი შეაქცია.

მაგრამ მას შემდეგ, რაც სეულში ელექტრომობილებისთვის სოლიდური საგადასახადო შეღავათები დააწესეს, ”ჰიუნდაისაც” ელექტრომობილებზე გული მოუბრუნდა და როგორც მისი ერთ-ერთი აღმასრულებელი ამბობს, ელექტრომობილი i10 სულ რამდენიმე თვეში შეიქმნა.

”ჩვენთვის ჰიბრიდული ავტომობილები ერთგვარი ხიდია თანამედროვე ავტომობილებსა და წყალბადის ტექნოლოგიებს შორის. მაგრამ იმავდროულად, ვაცნობიერებთ, რომ პერსპექტივა ელექტრომობილებსაც აქვს”, - ამბობს კომპანიის ერთ-ერთი ინკოგნიტო წარმომადგენელი.

თავისი პირველი ელექტრომობილისთვის ლითიუმ-იონის პოლიმერული აკუმულატორები ”ჰიუნდაიმ” ელექტრონიკის კორეულ გიგანტ LG-თან ერთად შექმნა. ასეთი აკუმულატორები ნიკელ ჰიდრიდულზე უფრო გამძლეცაა, იაფიც (თითქმის 40 პროცენტით), მსუბუქიც (დაახლოებით 30 პროცენტით) და ტევადიც (თითქმის 12 პროცენტით).

ავტომობილს აქვს აკუმულატორების სწრაფად დამმუხტავი სისტემა, რომლის მეშვეობითაც, აკუმულატორები ტევადობის 85 პროცენტით სულ რაღაც 15 წუთში იმუხტება. მათი სრული დამუხტვისთვის კი 5 საათია საჭირო.

49-კილოვატიანი ელექტოძრავით აღჭურვილ ავტომობილს, ერთი სრული დამუხტვით 160 კილომეტრის გავლა შეუძლია, მისი მაქსიმალური სიჩქარე სულ რაღაც 130 კმ/სთ-ია, 0-100 კმ/სთ აჩქარებას კი ის 15 წამს ანდომებს.

აკუმულატორებს ერთი ძალიან ცუდი თვისება აქვს - ერთი სრული კომპლექტი 10 000 ევრო ღირს, იმაზე მეტი, ვიდრე შიდაწვისძრავიანი i10. სწორედ ამის გამო, პირველ ხანებში, ელექტრომობილი ლიზინგით გაიყიდება (ფულს მყიდველი თანდათან, ექსპლუატაციის პროცესში იხდის). შემდგომში კი შესაძლოა, ავტომობილი აკუმულატორების გარეშე გაიყიდოს, აკუმულატორების ფასი კი მათი დამუხტვისთვის საჭირო ელექტროენერგიის ღირებულებაში შევა.

გორდონ მარის ფილოსოფია ”iსენტერი”

Gordon Murray-iCentre

5 სექტემბერი

საავტომობილო დიზაინის ბრიტანული კომპანია ”გორდონ მარის” საქალაქო მიკროავტომობილ T25-ის შესახებ ინფორმაცია რამდენიმე დღის წინ უკვე გაგაცანით. ალბათ გეხსომებათ პროექტის ავტორისა და კომპანიის დამაარსებლის, გორდონ მარის ხედვა ”iსენტერი”, რომელიც მძღოლის პოსტის ცენტრში მოთავსებას გულისხმობს. ეს ხედვა მან პირველად სუპერავტომობილი ”მაკლარენ F1-ის” პროექტირებისას გამოიყენა, ახლა კი რადკალურად განსხვავებული T25-ის ჯერია.

”iსენტერი” მარის საშუალებას აძლევს, რომ მინიატურულ T25-ს სავარძლების 6 სხვადასხვა განლაგება ჰქონდეს (სურათზე). ამასთან, სტანდარტულიდან განლაგების შეცვლა სუ რაღაც 30 წამშია შესაძლებელი. უცვლელი მხოლოდ ერთი - მძღოლის სავარძელი რჩება. ამ ვარიაციების წყალობით, მინიატურული ავტომობილის ბარგის დასაწყობი სივრცის (როგორც ასეთი, მას საბარგული არ გააჩნია) მოცულობა 750 ლიტრს მიაღწევს. ასეთი საბარგულით კი სრულგაბარიტიანი სედანებიც კი ვერ დაიკვეხნიან.

მარის მძღოლის სავარძლის ცენტრში განლაგების იდეა ჯერ კიდევ სტუდენტობისას (1966 წელს), დურბანის (სამხრეთ აფრიკა) ტექნოლოგიურ ინსტიტუტში, მექანიკური ინჟინერიის შესწავლისას მოსვლია.

ინტერიერის ცენტრში მძღოლის სავარძლის მოთავსებით, უმჯობესდება მძღოლის ხედვის არე, სიმძიმის ცენტრი სიმეტრიის ღერძთან ახლოს ინაცვლებს და დაბლა იწევს, რაც ავტომობილის მართვადობას აუმჯობესებს. ბარგის დასაწყობ 750-ლიტრიან სივრცეში კი, როგორც პროექტის ავტორები ამბობენ, სუპერმარკეტების 6 ურიკა ეტევა.

საჭის გარდა, მძღოლის განკარგულებაში მხოლოდ ორი სატერფულია (აქსელერატორი და მუხრუჭი), გადაცემათა კოლოფს კი სრულად ავტომტურ, ან ნახევრად ავტომატურ რეჟიმში მუშაობა შეუძლია. ამ რეჟიმს კი შესამაბის ღილაკზე დაჭერით შეარჩევთ. ნახევრად ავტომატური რეჟიმის არჩევისას, მძღოლი შესაბამის ბერკეტს სამი რეჟიმიდან ერთ-ერთზე - წინ, ნეიტრალ, ან რევერსზე დააყენებს, დანარჩენს კი კოლოფი თვითონ გააკეთებს.

T25-ის შასი უკვე გადის საგზაო ტესტებს. პარალელურად კი, მარი და მისი თანამოაზრეები ახალ პროექტს - ”iსტრიმს” ამუშავებენ, რომელსაც იმ კომპანიას შესთავაზებენ, რომელიც T25-ის წარმოების ლიცენზიას შეიძენს.

”iსტრიმი” არის საწარმოო პროცესის მარისეული ორგანიზების აღწერილობა, რომელიც საწარმოო ხაზის ფართობს და მისთვის საჭირო ინვესტიციის მოცულობას, ჩვეულებრივ საწარმოებთან შედარებით, დაახლოებით 80%-ით(!) ამცირებს.

”ფოლკსვაგენი” ”პანამერას” პლატფორმას სხვა ბრენდებისთვის გამოიყენებს

VW Panamera Platform

4 სექტემბერი

რამდენიმე დღის წინ ჩვენს მკითხველს ვაცნობეთ, რომ ”ფოლკსვაგენს” ”პორშეს” ორი არასპორტული მოდელის - სედან ”პანამერას” და უგზოობის ”კაიენის” წარმოების შეწყვეტა აქვს განზრახული. დღეს ინტერნეტით გავრცელდა ინფორმაცია იმის შესახებ, რომ ვოლფსბურგული გიგანტი, ”პანამერას” პლატფორმის თავის ჯგუფში შემავალი ზოგიერთი ბრენდის მოდელებისთვის გამოყენებას აპირებს.

ინტერნეტ გამოცემა ”ინსაიდ ლაინმა” შეიტყო, რომ ერთადერთი ბრენდი, რომლისთვისაც ვოლფსბურგელები ”პანამერას” პლატფორმას არ გამოიყენებენ, ”ლამბორგინია”. არადა, ”პორშესა” და ”ფოლკსვაგენის” გაერთიანების გამოცხადების შემდეგ, გაჩნდა ვარაუდი იმის შესახებ, რომ იტალიური კომპანია თავისი ოთხკარიან სედან ”ესტოკეს” სწორედ ”პანამერას” პლატფორმაზე ააგებდა.

სავარაუდოდ, ”პანამერას” პლატფორმის სრულამძრავიან და უკანა წამყვანბორბლიან ვერსიებს, თავიანთი ახალი ავტომობილების ბაზისად ”ბენტლი”, ”ბუგატი” და ალბათ, ”აუდიც” გამოიყენებენ.

”პანამერას” წარმოებას ”პორშე” ალბათ 2017 წელს შეწყვეტს. მანმდ კი შტუტგარტული კომპანია თავისი სედანისთვის სრულიად ახალ, ბენზინზე მომუშავე V6 ძრავს გამოუშვებს, რომელიც აგებულებით, არსებული V8 ძრავის შემცირებული ვარიანტი იქნება. სავარაუდოდ, ”პორშე” უარს იტყვის ”პანამერას” დიზელის ძრავით აღჭურვაზე, რადგან კონკურენტი გერმანული კომპანიების მაგალითმა აჩვენა, რომ პრემიუმ სეგმენტში ასეთი აგრეგატების მქონე ავტომობილები პოპულარობით ვერ სარგებლობენ. სამაგიეროდ, შტუტჰარტული კომპანია თავისი სედანის ჰიბრიდულ ვერსიას ამზადებს, რომელსაც მყიდველს 2011 წელს შესთავაზებენ.

”ფორდის” ახალი ”C-მაქსი”

Ford C-MAX

4 სექტემბერი

მიუხედავად იმისა, რომ ”ფორდის” კომპაქტვენ ”C-მაქსს” ევროპული ბაზარი მერმის, პარიზის ავტო შოუსთვის ელოდა, ამერიკული კომპანიის ევროპულმა შტომ ამ პოპულარული ავტომობილის ახალი მოდელის პრეზენტაცია ფრანკფურტის მოტორ შოუსზე დაგეგმა.

ახალი ”C-მაქსი” ჟენევაში ნაჩვენები კონცეპტუალური ”იოსის მაქსის” სტილშია შესრულებული. განსაკუთრებულ ხაზგასმას იმ გარემოება იმსახურებს, რომ ავტომობილი კუპეს სტილშია შესრულებული, თუმცა იმავდროულად, ის კვლავ კომფორტულ, ძალიან პრაქტიკულ და ვრცელსალონიან ავტომობილად დარჩა.

”ცისფერმა ოვალმა” ახალ ”C-მაქსზე” რამდენიმე სრულიად ახალი ტექნოლოგია გამოიყენა. მათ შორისაა სერია ”ეკობუსტის” მიხედვით შექმნილი ბენზინის 1.6-ლიტრიანი ძრავი, რომელსაც საწვავი პირდაპირ წვის კამერაში მიეწოდება და ის პირველად ამერიკულმა კომპანიამ კონცეპტუალურ ”იოსის მაქსზე” გამოიყენა. ახალი ტექნოლოგიებია პარალელურად პარკირების სისტემა, რომელიც ნახევრად ავტომატურ რეჟიმში მუშაობს და ეგრეთ წოდებული ”ბრმა ზონების” აღმომჩენი სისტემა.

ახალი ”C-მაქსი” ბაზარზე მერმის, წლის მეორე ნახევარში გამოჩნდება. მის შესახებ უფრო დაწვრილებით ინფორმაციას კი კომპანია ფრანკფურტში გამოაქვეყნებს.

”ჰიუნდაის” ფრანკფურტული ექსპონატები

Hyundai ix-Metro Concept

4 სექტემბერი

სრულიად ელექტრული i10

”ჰიუნდაი ix-მეტრო”

...........................................................................

კორეული ავტოგიგანტი ”ჰიუნდაი” ფრანკფურტის ავტო შოუსთვის რამდენიმე სიახლეს ამზადებს. ესენია მინი ელექტრომობილი i10, კონცეპტუალური ”ix-მეტრო”, წარმოებისთვის გამზადებული უგზოობის ix35, რომელმაც პოპულარული ”ტუსანი” უნდა შეცვალოს, თხევად გაზზე მომუშავე ”ელანტრას” ჰიბრიდი და უგზოობის განახლებული ”სანტა ფე”.

”ix-მეტრო” ბაზარზე ორი წლის შემდეგ უნდა გამოვიდეს. სავარაუდოდ, ის სუბკომპაქტური კლასის უახლეს ქროსოვერს დაუდებს სათავეს, თუმცა არაა გამორიცხული, რომ მისი სახით ფრანკფურტული ავტო რანდევუს დამთვალიერებლებმა შემდეგი თაობის i20 იხილონ.

”ix-მეტრო” სამხრეთ კორეული კომპანიის გლობალური დიზაინის ჯგუფმა შექმნა, რომელიც ქალაქ ნამიანში ბაზირებულ ცენტრშია ბაზირებული. ავტომობილი ჰიბრიდების კლასს განეკუთვნება. ჰიბრიდული სისტემის ძირითადი აგრეგატი ბენზინზე მომუშავე, სამცილინდრიანი ტურბოძრავია, რომლის მუშა მოცულობაც 1.0 ლიტრი, მაქსიმალური სიმძლავრე კი 125 ცხენის ძალაა. ძრავთან ორდისკოიანი ქუროთი დაკავშირებულია 6-საფეხურიანი კოლოფი. სისტემა სტარტ-სტოპის მეშვეობით, ძრავი ყოველ კილომეტრზე ატმოსფეროში მხოლოდ 80 გ. CO2-ს გამოჰყოფს.

კომპანიის მეორე კონცეპტუალური ავტომობილი სრულიად ელექტრული i10-ია, რომლის გაყიდვასაც ”ჰიუნდაი” ალბათ მერმის დაიწყებს. ეს პატარა ავტომობილი საკმაოდ მძლავრი, 49-კილოვატიანი ელექტროძრავითაა აღჭურვილი, რომელიც 16 კილოვატსაათიანი აკუმულატორისგან იკვებება.

i10-ის მაქსიმალური სიჩქარე 130 კმ/სთ, სვლის სიშორე კი 160 კილომეტრი უნდა იყოს. ეს ავტომობილი იმითაცაა საინტერესო, რომ მისი ზოგიერთი კვანძი ელექტრონიკით იმართება. ასეთებია საჭის მექანიზმი, წყლის ტუმბო, მუხრუჭების ვაკუუმის ტუმბო და ჰაერის კონდიცირების სისტემა.

ჩამოთვლილი ავტომობილების გარდა, ”ჰიუნდაისვე” სტენდზე შესაძლებელი იქნება პოპულარულ ჰეჩბეკ i30-ის გარემოსადმი მეგობრული ვერსია ”ბლიუ ედიშნ”, რომელიც ასევე სისტემა სტარტ-სტოპითაა აღჭურვილი და ყოველი კილომეტრის გავლისას, ატმოსფეროში მხოლოდ 113 გრამ CO2-ს გამოჰყოფს.

ავტომობილი იდიოტებისთვის...

Car for Idiots..

4 სექტემბერი

ასე, საკმაოდ უკმეხად შეამკო ”ჯენერალ მოტორსის” ფართოდ რეკლამირებული ელექტრული ჰიბრიდი ”შევროლე ვოლტი” ”აუდის” ამერიკული შტოს პრეზიდენტმა იოჰან დე ნაისხენმა.

”რომელი ჭკუათამყოფელი გადაიხდის 15 000 დოლარით მეტს ავტომობილში, რომელიც ”კოროლას” უწევს კონკურენციას. მგონი, ასეთი იდიოტი ბევრი არ უნდა იყოს. მეორე მხრივ, ასეთ ავტომობილებს ის ადამიანები იყიდიან, რომლებიც საკუთარ თავს ინტელექტუალურ ელიტას მიაკუთვნებენ”, - ამბობს დე ნაისხენი.

გერმანული კომპანიის ამერიკული დივიზიონის შეფი გამოთქვამს სურვილს, რომ აშშ-ის მთავრობამ ნაკლები ყურადღება დაუთმოს ელექტრომობილებს და ნაკლები ფულადი სახსრები მოახმაროს ასეთი ავტომოილების განვითარებას. სამაგიეროდ, მისი რჩევაა, ამერიკელებმა აქცენტი სუპერეკონომიურ დიზელის აგრეგატებზე გადაიტანონ. დე ნაისხენის ქმით, დიზელისძრავიანი ავტომობილი ელექტრომობილზე მძლავრი, გამძლე და მოსახერხებელია და მისი აზრით, გარემოზე უკეთესი ზემოქმედება ექნება. ”აუდი ამერიკას” შეფის ასეთი განწყობა გასაგებია - გერმანული კომპანია დიზელის ძრავების ექსპერტად ითვლება და ამ კუთხით, მოწინავე ტექნოლოგიებს ფლობს. ბუნეზებრივია, ”აუდი” ამ ტექნლოგიების პროპაგანდას ეწევა.

”შევროლე ვოლტს” მხოლოდ დე ნაისხენი როდი აკრიტიკებს. თავად ”ჯენერალ მოტორსში” ამ ავტომობილს ხშირად, ფასის მხრივ, ”კომერციულად გაუმართლებელს” უწოდებენ. ბევრი ამბობს, რომ ეს ავტომობილი, ”ჯენერალ მოტორსისა” და ”შევროლესთვის” მეტად რისკიანი პროექტია, რომელიც ჩაფლავების შემთხვევაში, კომპანიას უზარმაზარ ზარალს მოუტანს.

ამერიკული კომპანიის ვიცე აღმასრულებელი ბობ ლუცი კი ამბობს, რომ 15 000-დოლარიან სხვაობას, მყიდველს ავტომობილის არნახული ეკონომიურობა გადაახდევინებს - მწარმოებლის დაპირებით, შერეული ციკლით (აკუმულატორებში დაგროვილი და შიდაწვის ძრავთან დაკავშირებული გენერატორის მიერ გამომუშავებული ენერგიით) მუშაობისას, ”შევროლე ვოლტი” 100 კილომეტრის გავლას 1 ლიტრი საწვავით შესძლებს.

იოჰან დე ნაისხენის სკეპტიციზმის მიუხედავად, ”შევროლე ვოლტის” შეძენა ბევრ ”იდიოტს” აქვს გადაწყვეტილი. ასე განსაჯეთ, ამერიკელებს ამ ავტომობილის ყიდვას თვით ქვეყნის პრეზიდენტი ბარაკ ობამაც ურჩევს...

”მერსედეს-ბენცი” სერიულ ელექტრომობილს ფრანკფურტში გვიჩვენებს

Mercedes-Benz BlueZero E-cell Plus

3 სექტემბერი

ფრანკფურტის საავტომობილო გამოფენაზე, ”მერსედეს-ბენცი” საზოგადოებას სერიული წარმოებისთვის მომზადებულ ელექტრომობილ ”ბლიუზერო E-სელ პლუსს” წარუდგენს, რომლის მცირესერიული წარმოების დაწყებაც მერმის იგეგმება.

ინგლისურ ჟურნალ ”აუტოქარის” ცნობით, ხუთკარიანი ავტომობილი A-კლასის ჰეჩბეკის მოდერნიზებულ პლატფორმაზეა აგებული, გარეგნულად კი ის ისეთია, როგორიც B-კლასის მომდევნო თაობის ჰეჩბეკი უნდა იყოს. ამ ავტომობილის პრემიერა 2012 წელს იგეგმება და სავარაუდოდ, ის სწორედ ”ბლიუზერო E-სელ პლუსის” სტილში შესრულდება.

კონცეპტუალური ავტომობილი მამოძრავებელ ძალას 94-ცხენისძალიანი ელექტროძრავისგან ღებულობს, რომელსაც ელექტროენერგიით ლითიუმ-იონური აკუმულატორების კომპაქტური ბლოკი კვებავს. იმ შემთხვევისთვის, როდესაც აკუმულატორები სრულად განიმუხტება, მათ შევსებას ბენზინზე მომუშავე სამცილინდრიან ძრავთან დაკავშირებული გენერატორი უზრუნველყოფს. ეს ძრავი ”სმარტისგანაა” აღებული და ის მაქსიმუმ 67 ცხენის ძალას გამოიმუშავებს.

შტუტგარტელთა ინფორმაციით, მხოლოდ ელექტროძრავით, ავტომობილს მაქსიმუმ 99 კილომეტრის გავლა შეუძლია. სრულად დამუხტული აკუმულატორებითა და ბოლომდე შევსებული ავზით კი, ”ბლიუზერო E-სელ პლუსს” შეუჩერებლად თითქმის 600 კილომეტრის გავლა შეუძლია.

საინტერესოა ის, რომ აკუმულატორების სრულად დამუხტვას ნახევარი საათი ჰყოფნის. წინა წამყვანბორბლიან ავტომობილს 0-დან 100 კმ/სთ სიჩქარის აკრეფა დაახლოებით 11 წამში შეუძლია, მისი მაქსიმალური სიჩქარე კი 150 კმ/სთ-ს შეადგენს.

”ბეემვე” ”მინის” გამას გააფართოებს

MINI Coupe

3 სექტემბერი

”ბეემვეს” მთავარმა აღმასრულებელმა ნორბერტ რაიტჰოფერმა გამოაცხადა, რომ მომავალი წლიდან, მის ჯგუფში შემავალი ინგლისური კომპანია ”მინი” თავის ოქსფორდულ ქარხანაში ორი ახალი ავტომობილის წარმოებას შეუდგება. ინგლისურ გამოცემა ”ფაინენშლ ტაიმსთან” საუბრისას, რაიტჰოფერს არ დაუკონკრეტებია, თუ რომელ ავტომობილებზე ლაპარაკობდა.

მისი თქმით, ოქსფორდულ ქარხანაში 3 500 ადამიანია დასაქმებულ და ამ მხრივ, ის ერთ-ერთი უდიდესია გაერთიანებულ სამეფოში. ამ ქარხნის წლიური წარმადობა 200 000-220 000 ავტომობილია და ის ამ სიმძლავრით უკვე მუშაობს. სავარაუდოდ, ქარხანას ახალი ხაზი დაემატება, რომელიც სწორედ ამ ორ ახალ ავტომობილს გამოუშვებს.

”მინი” თავისი პოპულარული ჰეჩბეკის ბაზაზე, დღეისათვის რამდენიმე მოდელს აწარმოებს. ესენია ჰეჩბეკი, კაბრიოლეტი და უნივერსალი ”კლუბმენი”. მალე ამათ ქროსოვერი ”ქროსმენი” დაემატება. მაგრამ ამ ავტომობილს კომპანია ინგლისში არ გამოუშვებს. მისი წარმოება ავსტრიულ-კანადურ ”მაგნა შტეირის” ავსტრიულ ქარხანას დაევალება.

ფრანკფურტის ავტოგამოფენაზე კი ბავარიელები ორი, სრულიად ახალი ავტომობილის - კუპესა და როდსტერის (სახელად სპიდსტერ) პრემიერას გეგმავენ. სავარაუდოდ, სწორედ ესაა ის ორი მოდელი, რომელთა გამოც ოქსფორდულ ქარხანას გაფართოება მოუწევს.

გორდონ მარის ჯუჯას ”სმარტზე” ფართო სალონი ექნება

Murray's T25 (AutoCar.co.uk)

2 სექტემბერი

გორდონ მარი T25-ის მოდელებთან
ერთი ჩვეულებრივი ავტოს ადგილზე სამი T25 დაეტევა
T25-ის შასი ტესტირებისას სმარტთან ერთად

T25-ის ტისერი - ფოტო-თავსატეხი

...........................................................................

სახელოვანი სამხრეთაფრიკელი კონსტრუქტორი, ფორმულა 1-ში არაერთი საინტერესო და წარმატებული პროექტის და ლეგენდარულ სუპერავტომობილ ”მაკლარენ F1-ის” ავტორი გორდონ მარი თავის გახმაურებულ პროექტ T25-ზე მუშაობას აგრძელებს. ავტომობილის შასი, მასზე აწყობილი აგრეგატებით და სხვა ნაწილებით, უკვე გადის საგზაო ტესტებს.

პროექტის ავტორი ირწმუნება, რომ მისი ჯუჯა ავტო გაბარიტებით ”სმარტზე” პატარა კი არის, მაგრამ მასზე ტევადი სალონი მაინც ექნება. ამას კი სამადგილიანი ავტომობილის სალონში სავარძლების განლაგების თავისებურება განაპირობებს - მძღოლის სავარძელი სალონის ცენტრშია მოთავსებული, დანარჩენი ორი სავარძელი კი მის ორივე მხარეს, ოდნავ უკან მდებარეობს. სხვათა შორის, ”მაკლარენ F1-შიც” სავარძლებს ზუსტად ასეთი განლაგება ჰქონდა (თავად კონსტრუქტორი მძღოლის ცენტრალურ პოსტს iსენტერს უწოდებს) და ეს უკვე მარის საფირმო ნიშნად იქცა.

T25 უმცირესი გაბარიტებით გამოირჩევა. მისი სიგრძე 2.4 მეტრი, სიგანე კი 1.25 მეტრია. შედარებისთვის, ”სმარტ ფორთუს” ანალოგიური მონაცემები 2.5 და 1.51 მეტრია. ასეთ პატარა ავტომობილს საბარგული არ აქვს, მაგრამ თუ ტვირთის დასადებად მგზავრების სავარძლებს გამოვიყენებთ, მაშინ საბარგო მოცულობა (და არა საბარგულის, რომელიც ავტომობილს უბრალოდ, არ აქვს) 750 ლიტრს მიაღწევს. ასეთი საბარგულით კი სრულგაბარიტიანი სედანებიც კი ვერ დაიკვეხნიან.

ინტერიერის (შედარებით) დიდ მოცულობას ასევე ის გარემოებაც განაპირობებს, რომ ავტომობილის 660 კუბ.სმ-იანი ძრავი T25-ის უკან, საწვავის ავზი და აკუმულატორი კი ძირზეა განლაგებული. იმისათვის, რომ ასეთ პატარა ავტომობილში ჩაჯდომა და იქიდან გადმოსვლა გაადვილდეს, მარიმ ლეგენდარული ”იზეტა” გაიხსენა და მისი კონსტრუქცია განავითარა. მგზავრები სალონში უკანა კარიდან შევლენ, მძღოლი კი - წინიდან.

მარი ამბობს, რომ პირველი ძარიანი ავტომობილი მზად ერთ თვეში ექნება, T25-ის წარმოების დაწყება კი ორ წელიწადში იქნება შესაძლებელი. ამასთან, ის დასძენს, რომ ამ ავტომობილს მისი კომპანია არ გამოუშვებს - მხოლოდ წარმოების ლიცენზიას გაჰყიდის.

მარი დაინტერესებულია, რომ მისი ავტომობილი რომელიმე ინგლისურმა კომპანიამ, ინგლისშივე გამოუშვას. ამასთან, ამ საკითხზე მოლაპარაკება რამდენიმე დაინტერესებულ კომპანიასთან უკვე მიმდინარეობს.