უგზოობის ”ლექსუსს” ოქროთი მოაპირკეთებენ

10 დეკემბერი

არაბეთის გაერთიანებულ საემიროებში ”ლექსუსის” დილერმა, კომპანია ”ალ-ფუტაიმ მოტორსმა”, დუბაის მე-10 საერთაშორისო საავტომობილო გამოფნის დამთვალიერებლებს საინტერესო სეირი მოუმზადა - მათ თვალწინ, ფრანგულ კომპანია ”გოლდ ემოსიონის” ოთხი სპეციალისტი, ”ლექსუს LX 570-ს” ოქროს 40 000 ფირფიტით დაფარავს. რა თქმა უნდა, ოქრო უმაღლესი სინჯის იქნება, ეს აქცია კი ”ტოიოტას” ლუქსის მწარმოებელი ბრენდის დაარსებიდან 20 წლის იუბილეს ეძღვნება.

”ალ-ფუტაიმ მოტორსის” გაყიდვების საქმეთა დირექტორი ჰიუ დიკერსონი ამბობს, რომ ემირატებში სულ უფრო იზრდება მოთხოვნა ავტომობილების უნიკალურ დიზაინერულ გადაწყვეტებზე და რომ ამ ტენდენციის უყურადღებოდ დატოვება დიდი ფულის განიავების ტოლფასი იქნებოდა. მისი აზრით, მოოქროვილ ”ლექსუსზე” დუბაიში სოლიდური მოთხოვნაა მოსალოდნელი.

დიკერსონის თქმით, ავტომობილის ძარის ოქროს ფენით დაფარვის შემდეგ, მისი ზედაპირი ლაქით დაიფარება, რის შემდეგაც, შესაძლებელი იქნება მისი საერთო სარგებლობის გზებზე გამოყენება. მოოქროვილძარიანი ”ლექსუს LX 570” გამოფენაზე მის დასრულებამდე დარჩება, მერე კი მისი ყიდვა იქნება შესაძლებელი. რაც შეეხება ფასს, ამის შესახებ დიკერსონი დუმილს ამჯობინებს.

სხვათა შორის, თავის დროზე, მოოქროვილი ”მაიბახით” თვით ერაყის ყოფილი დიქტატორი, სადამ ჰუსეინი სარგებლობდა. ოთხი წლის წინ კი, გერმანულმა საიუველირო კომპანია ”ვიზუალისმა” ”პორშეს” ცხრა ავტომობილის ზედაპირი მოჭედა ოქროთი.

”კია მოტორს ჯორჯიას” საახალწლო აქცია

10 დეკემბერი

”კია მოტორსის” დილერმა საქართველოში, ”კია მოტორს ჯორჯოამ”, თავის ერთ-ერთ ყველაზე პოპულარულ მოდელ ”სორენტოზე” საახალწლო აქცია გამოაცხადა.

კიას სალონში სორენტოს მყიდველებს სთავაზობენ ფასდაკლებას 3 000 დოლარამდე, 0%-იან განვადებას, 200 ლიტრ საწვავს საჩუქრად და 3 წლიან გარანტიას გარბენის შეუზღუდავად.

აღნიშნული მოდელი იწარმოება 2003 წლიდან, დღესდღეობით იგი კონკურენტ მოდელებთან შედარებით ყველაზე დაბალი ფასისა და ძლიერი ტექნიკური შესაძლებლობების წყალობით ერთ-ერთი ყველაზე გაყიდვადი მოდელია თავის კლასში.

ავტომობილი აწყობილია ინტეგრირებულ ჩარჩოზე, ასეთი კონსტრუქცია უფრო მძლავრი ტრანსმისიისა და აგრეგატების გამოყენების საშუალებას იძლევა, აგრეთვე იცავს მთლიანად ძარას და ცალკეულ მის კომპონენტებს რყევით გამოწვეული ნაადრევი ცვეთისგან.

ავტომობილი 4X4 არამუდმივი ტრანსმისით, ცენტრალური დიფერენციალის ბლოკირებითა და გამანაწილებელი კოლოფის დაბალი გადაცემით ადვილად გადალახავს დიაგონალურ დაკიდებას განსაკუთრებით რთულ ლანდშაფტებზე. საბურავებს შორის დიფერენციალს ცვლის მუხრუჭების გამანაწილებელი სისტემა, რომელიც საჭიროების შემთხვევაში ამუხრუჭებს კონკრეტულ საბურავს.

ჩამოთვლილი მახასიათებლების წყალობით, სორენტოს გაცილებით მეტი შესაძლებლობები აქვს, ვიდრე ე.წ ქალაქის ქროსოვერს.

ავტომობილს მიღებული აქვს უამრავი ჯილდო როგორც საუკეთესო „ოფროუდერს“ მომხმარებელთა კმაყოფილების მაღალი ინდექსის მაჩვენებლის წყალობით.

”აუდი” მხოლოდ 1 000 ელექტრომობილ e-ტრონს დაამზადებს

Audi e-tron limited to 1000 sales

10 დეკემბერი

ბრიტანულ საავტომობილო გამოცემა ”აუტოქარის” ცნობით, ”აუდის” ფრანკფურტში ნაჩვენებ კონცეპტუალურ ელექტრომობილ e-ტრონის მცირე ტირაჟით წარმოება აქვს გადაწყვეტილი. გერმანული კომპანიის ექსტერიერების დიზაინის განყოფილების შეფი აკიმ ბედსტაბნერი აცხადებს, რომ ელექტრომობილის გაყიდვები 2012 წელს დაიწყება და მისი ფასი კუპე R8-საზე მაღალი იქნება.

ბედსტაბნერის თქმით, მის კომპანიას არ გაუჭირდება 1 000 ცალი ძვირადღირებული ელექტრომობილის გაყიდვა. მითუმეტეს, რომ მთელ მსოფლიოში მას დაახლოებით 5 000 სადილერო ცენტრი გააჩნია. მაგრამ იმ შემთხვევაში, თუ ელექტრონულ სუპერ ავტომობილზე მოთხოვნა არ იქნა, ”აუდი” მის წარმოებას შეწყვეტს.

მაგრამ გერმანული კომპანიის მარკეტოლოგები იმედოვნებენ, რომ ასე არ მოხდება და არც იმას გამორიცხავენ, რომ მაღალი მოთხოვნის შემთხვევაში, e-ტრონის წარმოება 1 000 ცალის გამოშვების შემდეგაც გაგრძელდეს. მათი თქმით, ამ ავტომობილს მეტწილად ის ადამიანები შეიძენენ, რომლებსაც შიდაწვისძრავიანი სპორტული ავტომობილი უკვე შეძენილი აქვთ და თავიანთი პარკის ელექტრომობილით შევსება მოუნდებათ. ასეთები კი, რა თქმა უნდა, მდიდრები არიან.

ცნობისათვის, ფრანკფურტში ნაჩვენები კონცეპტუალური ”აუდი e-ტრონი” კუპე R8-ს ბაზაზეა აწყობილი. ის ოთხი ელექტროძრავითაა აღჭურვილი, რომლებიც მხოლოდ თითო, ”თავთავიანთ” ბორბალს ემსახურებიან. მათი ჯამური სიმძლავრე 313 ცხენის ძალაა. ძრავებს ელექტროენერგიით ლითიუმ-იონური აკუმულატორების ბლოკი ამარაგებს. მათში დაგროვილი ენერგია კი საკმარისია იმისათვის, რომ e-ტრონმა 248 კილომეტრის გავლა შესძლოს. საყოფაცხოვრებო ქსელიდან აკუმულატორების სრულად დასამუხტად დაახლოებით 8 საათია საჭირო.

”აუდი e-ტრონს” ადგილიდან 100 კმ/სთ სიჩქარის ასაკრეფად 4.8 წამი სჭირდება, მისი მაქსიმალური სიჩქარე კი 200 კმ/სთ-ია, რაც ელექტრომობილებისთვის საკმაოდ კარგი მაჩვენებელია. ყოველ შემთხვევაში, როგორც მწარმოებელი ირწმუნება, ექსტრემალური მართვის მოყვარულებს ეს ავტომობილი არ მოაწყენს.

უგზოობის ”ლექსუსს” ოქროთი მოაპირკეთებენ

10 დეკემბერი

არაბეთის გაერთიანებულ საემიროებში ”ლექსუსის” დილერმა, კომპანია ”ალ-ფუტაიმ მოტორსმა”, დუბაის მე-10 საერთაშორისო საავტომობილო გამოფნის დამთვალიერებლებს საინტერესო სეირი მოუმზადა - მათ თვალწინ, ფრანგულ კომპანია ”გოლდ ემოსიონის” ოთხი სპეციალისტი, ”ლექსუს LX 570-ს” ოქროს 40 000 ფირფიტით დაფარავს. რა თქმა უნდა, ოქრო უმაღლესი სინჯის იქნება, ეს აქცია კი ”ტოიოტას” ლუქსის მწარმოებელი ბრენდის დაარსებიდან 20 წლის იუბილეს ეძღვნება.

”ალ-ფუტაიმ მოტორსის” გაყიდვების საქმეთა დირექტორი ჰიუ დიკერსონი ამბობს, რომ ემირატებში სულ უფრო იზრდება მოთხოვნა ავტომობილების უნიკალურ დიზაინერულ გადაწყვეტებზე და რომ ამ ტენდენციის უყურადღებოდ დატოვება დიდი ფულის განიავების ტოლფასი იქნებოდა. მისი აზრით, მოოქროვილ ”ლექსუსზე” დუბაიში სოლიდური მოთხოვნაა მოსალოდნელი.

დიკერსონის თქმით, ავტომობილის ძარის ოქროს ფენით დაფარვის შემდეგ, მისი ზედაპირი ლაქით დაიფარება, რის შემდეგაც, შესაძლებელი იქნება მისი საერთო სარგებლობის გზებზე გამოყენება. მოოქროვილძარიანი ”ლექსუს LX 570” გამოფენაზე მის დასრულებამდე დარჩება, მერე კი მისი ყიდვა იქნება შესაძლებელი. რაც შეეხება ფასს, ამის შესახებ დიკერსონი დუმილს ამჯობინებს.

სხვათა შორის, თავის დროზე, მოოქროვილი ”მაიბახით” თვით ერაყის ყოფილი დიქტატორი, სადამ ჰუსეინი სარგებლობდა. ოთხი წლის წინ კი, გერმანულმა საიუველირო კომპანია ”ვიზუალისმა” ”პორშეს” ცხრა ავტომობილის ზედაპირი მოჭედა ოქროთი.

”ფოლკსვაგენის” კონცეპტუალური ”Up! ლაიტი”

Volkswagen Up! Lite Concept

10 დეკემბერი

ლოს ანჯელესის საავტომობილო შოუზე, ”ფოლკსვაგენმა” თავისი მორიგი ეკონომიური და ეკოლოგიურად სუფთა კონცეპტუალური ავტომობილი წარმოადგინა, რომელშიც ასევე ორი კონცეპტუალური მოდელის - Up!-ის და L1-ის თვისებებია შერწყმული და რომელსაც შოუს დამთვალიერებელი ”Up! ლაიტ-ის” სახელით გაეცნო.

მწარმოებლის განცხადებით, მისი კონცეპტუალური მოდელი, მსოფლიოში ყველაზე ეკონომიური ოთხადგილიანი ავტომობილია. გერმანული კომპანიის მიერ გავრცელებული რელიზი გვამცნობს, რომ ”Up! ლაიტს” 100 კილომეტრის გასავლელად 2.44 ლიტრი დიზელის საწვავი ჰყოფნის. და ეს მართლაც ფანტასტიური მაჩვენებელია.

ასეთი ეკონომიურობის მიღწევას კი ერთდროულად რამდენიმე ფაქტორი განაპირობებს. ჯერ ერთი, ავტომობილის ჰიბრიდული დანადგარის მთავარი აგრეგატი მეტად ეკონომიური და დაბალი ლიტრაჟის მქონე ტურბო-დიზელია, რომელთან უნისონშიც მცირე სიმძლავრის ელექტროძრავი და 7-საფეხურიანი გადაცემათა კოლოფი (DSG - დაირექტ შიფტ გეარბოქს) მუშაობს. ყველაფერთან ერთად, აგრეგატების ასეთი კომბინაციის წყალბით, ავტომობილი ყოველი კილომეტრის გავლისას, გარემოში მხოლოდ 65 გრამ CO2-ს გამოჰყოფს.

ტურბოდიზელის მუშა მოცულობა სულ რაღაც 0.8 ლიტრია და ის მხოლოდ 51 ცხენის ძალას გამოიმუშავებს. ელექტროძრავის სიმძლავრე კი მხოლოდ 10 კილოვატია. ორივე ამ აგრეგატის ჯამური სიმძლავრე კი 65 ცხენის ძალას აღწევს, რაც საკმარისია იმისათვის, რომ ავტომობილმა ადგილიდან 100 კმ/სთ სიჩქარე 12 წამში აკრიფოს. რაც შეეხება მაქსიმალურ სიჩქარეს, ის 160 კმ/სთ-ს აღწევს.

ეკონომიურობასვე განაპირობებს ავტომობილის სიმსუბუქე - ის მხოლოდ 650 კილოგრამს იწონის. ეს კი მიღწეულია თანამედროვე ტექნოლოგიების საშუალებით. კერძოდ, მზიდი სისტემა შეკრულია მტკიცე ფოლადისა და ალუმინის მასალებით, ძარა კი კარბონის კომპოზიტისგან მზადდება. ავტომობილის აეროდინამიკური წინააღმდეგობის კოეფიციენტი სულ რაღაც 0.237-ია. გარდა ამისა, ეკონომიურობას აუმჯობესებს ენერგიის დამზოგი ისეთი სისტემები, როგორებიცაა მუხრუჭების კინეტიკური ენერგიის რეგენერატორი და სტოპ-სტარტი.

ეს მეხუთე კონცეპტუალური ავტომობილია, რომლებიც ”ფოლკსვაგენმა” პროექტ Up!-ის ფარგლებში შეიმუშავა. პირველი მერცხალი იყო მოდელი Up!, რომელიც საზოგადოების წინაშე პირველად ფრანკფურტის 2007 წლის შოუზე წარსდგა. მას მოჰყვნენ: ”სპეის Up!” (ტოკიოში),”სპეის Up! ბლიუ” ლოს ანჯელესში და ელექტრული E-up! ფრანკფურტის წლევანდელ შოუზე.

”ფოლკსვაგენი” ”სუზუკის” მეხუთედს ყიდულობს

VW will buy 19.9% stake in Suzuki

10 დეკემბერი

ჰერმანულ საავტომობილო გიგანტ ”ფოლკსვაგენს” მტკიცედ აქვს გადაწყვეტილი მსოფლიოს უდიდესი ავტომწარმოებლის სტატუსის დაუფლება. ამ წლის პირველ 9 თვეში, ვოლფსბურგელებმა ყველაზე მეტი ავტომობილის გაყიდვა შეძლეს, მაგრამ ეს ჯერაც არ ნიშნავს, რომ სანუკვარი მიზანი მიღწეულია.

ამიტომ, თავის ჯგუფში შემავალი კომპანიების წარმოების ზრდის პარალელურად, სახალხო ავტომობილების მწარმოებლები, ამ ჯგუფის კიდევ უფრო გაფართოებას ეშურებიამ. ამ მხრივ, მათ პირველი ნაბიჯი ცოტა ხნის წინ გადადგეს, როდესაც მეზობელი ”პორშეს” აქციების 49.9 პროცენტი შეიძინეს და ამაში 3.9 მილიარდი ევრო გადაიხადეს.

ახლა კი იაპონური ”სუზუკის” ჯერიც დადგა. ოთხშაბათს, 9 დეკემბერს, ტოკიოში შედგა ”ფოლკსვაგენის” და ”სუზუკის” ხელმძღვანელთა, მარტინ ვინტერკორნის და ოსამუ სუზუკის შეხვედრა (სურათზე), რომლის შემდეგაც გამოცხადდა, რომ გერმანული კონცერნი იაპონური კომპანიის აქციების 19.9 პროცენტს შეიძენს და ეს მას 2.5 მილიარდი დოლარი დაუჯდება.

შარშან ”ფოლკსვაგენმა” გამოაცხადა, რომ 2018 წლამდე მსოფლიო ლიდერობის ხელში ჩაგდებას აპირებს, მაგრამ ახლა უკვე, ვინტერკორნიც არ მალავს, რომ ამ მიზნის მიღწევა გაცილებით ადრეა შესაძლებელი და მას ამის საწინააღმდეგო არაფერი აქვთ.

პრესკონფერენციაზე, რომელიც ორ ავტომწარმოებელს შორის მიღწეულ გარიგებას მიეძღვნა, ”სუზუკის” 80 წლის შეფმა ოსამუ სუზუკიმ, ვინც თავის კომპანიას 30 წელზე მეტია, ხელმძღვანელობს, განაცხადა, რომ აქციების გაყიდვა არ ნიშნავს იმას, რომ მისი კომპანია მთლიანად ”ფოლკსვაგენის” ხელში გადავა.

”არ მინდა, ვინმე შეცდომაში შევიდეს. ”სუზუკი” არ ხდება ”ფოლკსვაგენის” ოჯახის მე-12 წევრი. სულაც არ მაქვს იმის სურვილი, რომ სხვა ერის წარმომადგენლებმა მითხრან, რა უნდა გავაკეთო”, - განაცხადა სუზუკიმ და ამით მიანიშნა, რომ მისი კომპანია კვლავაც დამოუკიდებლად მუშაობას გააგრძელებს.

ძნელი მისახვედრი არ უნდა იყოს, თუ რა ამოძრავებდა ორივე კომპანიას, როდესაც ხელშეკრულებაზე აწერდა ხელს. ვოლფსბურგელებს მცირელიტრაჟიანი ავტომობილების ის გამოცდილება აინტერესებთ, რაც ”სუზუკის” გააჩნია. იაპონურ კომპანიას კი საკუთარი სამოდელო გამის გაფართოება აქვს გადაწყვეტილი და ამ საქმეში სასარგებლოდ შეუძლია თავისი ახალი პარტნიორის გამოცდილების გაზიარება.

გარიგება ასევე ითვალიწინებს იმას, რომ ”სუზუკი” ”ფოლკსვაგენის” ხმის უფლების მქონე აქციების 2.5 პროცენტს შეიძენს და მათში 1.13 მილიარდ დოლარს გადაიხდის. მთავარი კი ისაა, რომ ახალი, ერთობლივი პროექტების განხორციელებისას, პარტნიორები მილიარდობით დოლარის დაზოგვას შეძლებენ.

პარალელურად, ”ფოლკსვაგენი”, რომელიც ჩინეთის ბაზარზე უდიდესი ავტომწარმოებელია, ”სუზიკის” დახმარებით, ინდურ ბაზარზეც იმედოვნებს ფეხის მოკიდებას. ინდოეთის ბაზარი სწრაფი ტემპით ვითარდება და იქ ახლავე დამკვიდრებას ვოლფსბურგელებისთვის უზარმაზარი მოგების მოტანა შეუძლია.

”ჩვენთვის ”სუზუკისთან” თანამშრომლობა იმითაა მნიშვნელოვანი, რომ კომპაქტური ავტომობილების წარმოებას აზიის განვითარებად ბაზრებზე გავშლით. სამაგიეროდ, ”სუზუკი” ჩვენგან იმით იხეირებს, რომ მისთვის ხელმისაწვდომი იქნება გარემოსადმი მეგობრული ძრავების და ავტომობილების წარმოების ტექნოლოგიები, რომლებსაც ჩვენ ფლობთ”, - პრესკონფერენციაზე განაცხადა ვინტერკორნმა.

მართალია, ცხრა თვის მონაცემებით, ”ფოლკსვაგენს” მსოფლიოში ყველაზე მეტი ავტომობილი ჰქონდა გაყიდული, მაგრა ნახევარი წლის მონაცემებით, მას ”ტოიოტა” ასწრბდა. კერძოდ, გერმანულ გიგანტს პირველ 6 თვეში 3.265 მილიონი ავტომობილი ჰქონდა გაყიდული, ”ტოიოტას” კი - 3.564 მილიონი. მაგრამ თუ ვოლფსბურგელთა გაყიდვებს ”სუზუკის” მიერ გაყიდულ 1.15 მილიონსაც დავუმატებთ, მაშინ მათი შედეგი 4.415 მილიონამდე გაიზრდება. თუმცა, აქციების მეხუთედის ფლობა არ ნიშნავს, რომ იაპონური კომპანიის გაყიდვრბი სულ ”ფოლკსვაგენს” ჩაეთვალოს.

რონ დენისი: ავტობიზნესი ”მაკლარენისთვის” სარგებლიანია

Dennis: Car business good for McLaren

9 დეკემბერი

”მაკლარენის” შეფი რონ დენისი დარწმუნებულია, რომ მისი კომპანია მართებულად იქცევა, რომ საგზაო სპორტული ავტომობილების წარმოებას იწყებს და ”ფერარისთვის” კონკურენციის გაწევას ამ საქმეშიც აპირებს. და ეს მიუხედავად იმისა, რომ ამის გამო, ფორმულა 1-ში მისმა პარტნიორმა ”მერსედეს-ბენცმა” თავისი ყურადღება მეტოქე ”ბრაუნზე” გადაიტანა და მისი მფლობელი გახდა.

როგორც ცნობილია, ”მაკლარენი” უახლოეს მომავალში სამი სპორტული სუპერ ავტომობილის გამოშვებას გეგმავს, რომელთაგან პირველი ბაზარზე ”მაკლარენ MP4-12C” გამოჩნდება. არადა, წინა რამდენიმე წლის განმავლობაში, ”მაკლარენი” და ”მერსედეს-ბენცი” წარმატებულად თანამშრომლობდნენ არამხოლოდ ფორმულა 1-ში, არამედ ავტო ბიზნესშიც, სადაც მათ ერთობლივად შექმნეს ისეთი შესანიშნავი ავტომობილი, როგორიც სუპერ ავტომობილი SLR-ია.

მაგრამ ორი წლის წინ, თავისი სპორტული ავტომობილების პროგრამაში, შტუტგარტელებმა მთლიანად საკუთარი რესურსები ჩართეს და უოკინგელებს ამ საქმეში პარტნიორობაზე უარი უთხრეს, რამაც ალბათ დიდი როლი ითამაშა დენისის მიერ საბოლოო გადაწყვეტილების მიღებაში. ან იქნებ, პირიქით - როდესაც ”სამქიმიანებმა” დენისის ამბიციების შესახებ შეიტყვეს, სწორედ მაშინ გადაწყვიტეს ”მაკლარენთან” პარტნიორობის დამუხრუჭება...

ფაქტი კი ერთია: ”მერსედეს-ბენცმა” ახლახანს ფორმულა 1-ის ახალი ჩემპიონის, ”ბრაუნის” აქციების საკონტროლო პაკეტი შეიძინა და მომავალ სეზონში საკუთარი სახელით იასპარეზებს. თუმცაღა, ჯერჯერობით არც ”მაკლარენთან” პარტნიორობის მთლიანად შეჩერებას გეგმავს და მას ძრავებით კვლავაც მოამარაგებს. აქ იმის აღნიშვნაც ღირს, რომ მოდელი MP4-12C ”მაკლარენის” ინჟინერთა მიერაა შექმნილი, რაც იმი ნიშანია, რომ ინგლისური კომპანია უკვე ფლობს მაღალეფექტური ძრავების შექმნის და წარმოების შესაძლებლობებს.

დენისს მიაჩნია, რომ მისი კომპანიის გერმანელი პარტნიორის ”ბრაუნისკენ” გადახრა ”მაკლარენისთვისაც” და ”ბრაუნისთვისაც” სასარგებლო იქნება:

”ჩვენი კომპანია ვითარდება. ჩვენ ბევრი ძალიან კარგი და ძლიერი პარტნიორი გვყავდა. პირველ რიგში, მათში ”,ერსედეს-ბენცს” ვგულისხმობ. მათი სახით, ფენომენალურად ძლიერი პარტნიორი გვყავდა. იყო მომენტი, როდესაც ბევრი ფიქრი მიწევდა ამ ნაბიჯის გადადგმაზე. მთავარი ის იყო, თუ რა იქნებოდა ”მაკლარენისთვის” ყველაზე სასარგებლო. შეხედეთ ”ფერარის” მიღწევებს. თუ მათ ეს შეუძლიათ, რატომ უნდა ვიფიქროთ, რომ იგივეს ჩვენც ვერ შევძლებთ?

”დარწმუნებული ვარ, ”ბრაუნს” და ”მერსედეს-ბენცს” კარგი მომავალი აქვთ. ჩვენ ამ თანამშრომლობის საწინააღმდეგო არაფერი გვაქვს. ეს კარგი იქნება ფორმულა 1-თვის. ჩვენ აქ სწორედ იმისთვის ვართ, რომ ფ1 განვითარდეს. მე ბევრი ჩავარდნაც მქონია და წარმატებებიც. როგორც კომპანიის და გუნდის შეფს, საპასუხისმგებლო გადაწყვეტილებათა მიღება მიწევს და ვიცი, რომ ხანდახან ისეთი გადაწყვეტილებაც უნდა მივიღო, რაც ჩემთვის შეიძლება მიუღებელი იყოს. ხშირად ისეთი საკითხების გადაწყვეტაც მიწევს, რომლებიც ჩემს პასუხისმგებლობაში არ შედის. მაგრამ ასეთია შეფის ცხოვრება”, - ამბობს დენისი.

მანვე გამორიცხა იმის შესაძლებლობა, რომ ის უახლოეს მომავალში შეიძლება ”მაკლარენის” ფ1-ის გუნდის შეფის თანამდებობაზეც დაბრუნდეს. ”არავითარ შემთხვევაში. ჩემი როლი ფ1-ში დასრულებულია. რა თქმა უნდა, ზოგიერთ რბოლას დავესწრები, რადგან მე ძალიან მიყვარს ეს სპორტი. ჩემი გონება ახლა კომპანიის ხელმძღვანელობაზეა მომართული, მაგრამ გული ისევ რბოლებში რჩება. მე რბოლებს დავესწრები, მაგრამ არა როგორც გუნდის წევრი, არამედ, როგორც უბრალო მაყურებელი. რაც უნდა იყოს, მე ”მაკლარენით” ვსულდგმულობ და ეს არასდროს შეიცვლება”.

”აუდი A8-ს” მაიამური დებიუტი

Audi A8

7 დეკემბერი

მაღალი კლასის ავტომობილების მუშტარს ”აუდიმ” თავისი ფლაგმანის, A8-ს ახალი (მესამე) თაობის სედანი მოუმზადა. ამ ავტომობილისთვის ინგოლშტადტელებს ძირითად ბაზრად ამერიკის შეერთებული შტატები ეგულებათ და რა გასაკვირია, რომ ახალი ავტომობილის პრეზენტაციაც შტატებში, მაიამიში, იმ ქალაქში ჩაატარეს, სადაც მუდამ ზაფხულია და რომელიც როგორც თაფლი ფუტკარს, ისე იზიდავს მდიდართ ამა ქვეყნისათა.

პირველ რიგში, უნდა ითქვას, რომ ახალ ავტომობილს გარეგნულად მისი წინამორბედისგან ბევრი არაფერი განასხვავებს. თვალში საცემია მხოლოდ უცნაური მოყვანილობის ფარები და უზარმაზარი რადიატორი, რომელიც აქამდეც დიდი იყო, მაგრამ ბამპერის მსგავსი წარმონაქმნი, რომელიც უფრო ნომრის დაფის მოვალეობას ასრულებდა, მას შუა ჰყოფდა და ამით ამცრობდა.

ახალი რადიატორი კი ამჯროსანი რაინდის უზარმაზარ ფარს მოგაგონებთ, რომლის აქეთ-იქითაც ამჯარში ჩამალული თვალები - ფარები ჩანს. ასე ავტომობილი უფრო აგრესიულ იერს ღებულობს, თუმცა ეს აგრესია მის ელეგანტურობას სულაც არ ამცირებს. თანაც, აგრესია მიგვანიშნებს, რომ კაპოტქვეშ ველური ცხენების მრავალრიცხოვანი რემა იმალება. თუმცა, სანამ ამ ცხენების რაოდენობას დავითვლიდეთ და მათ შესაძლებლობებსაც შევეხებოდეთ, ორი სიტყვა ავტომობილის გაბარიტებსა და ფარებზეც ვთქვათ.

ახალი A8 ”ფოლკსვაგენის” ჯგუფის D3 პლატფორმაზეა დაფუძნებული, რომელიც ალუმინისგანაა დამზადებული. ძარაც ალუმინისაა და როგორც მწარმოებელი გვამცნობს, წინამორბედზე 24 პროცენტით ხისტია. წინა მოდელთან შედარებით, ახალი სედანის სიგრძე 75 მილიმეტრით, სიგანე კი 55 მილიმეტრით (შესაბამისად, 5 137 და 1 929 მილიმეტრამდე) გაიზარდა. ამასთან, მისი სიმაღლე 16 მილიმეტრით შემცირდა.

რაც შეეხება ფარებს. მათში შუქდიოდური სისტემა გამოიყენება, რომლებიც ახლო შუქსა და ნისლსაწინააღმდეგო განათებას უზრუნველყოფენ. ქსენონის ძირითადი ფარები კი გარე განათებისადმი ადაპტირებადია. რაც მთავარია, მათი განათების მიმართულებას სანავიგაციო სისტემა მართავს. კერძოდ, ეს სისტემა აფიქსირებს მოსალოდნელი მისახვევის ადგილმდებარეობას და ფარების მიერ გამოყოფილი შუქის ჭავლის ნაწილს სწორედ იმ მოსახვევისკენ მიმართავს.

იმ ფოსოებში, რომლებიც სხვა მანქანებზე ნისლსაწინააღმდეგო ფარებს უკავია, ახალ A8-ს უამრავი გადამწოდი აქვს განლაგებული, რომლებიც ელექტრონული მართვის სხვადასხვა სისტემას ემსახურებიან. მაგალითად, ასეთებია რადიოლოკაციური გადამწოდები, რომლებიც ადაპტირებადი კრუიზ კონტროლის სისტემაში შედის და არჩეული დისტანციის შენარჩუნებასა და მოულოდნელად გაჩენილი წინააღმდეგობის წინ გაჩერებას, ან მაქსიმალურად შენელებას ემსახურება. უკანა ფარებიც შუქდიოდურია და გარდა იმისა, რომ ჩვეულებრივ ფარებზე გაცილებით ნაკლებ ენერგიას მოიხმარს, უფრო მკვეთრი შუქითაც გამოირჩევა.

ჯერჯერობით, ახალი A8-თვის მხოლოდ სამი ძრავია განკუთვნილი. ესენია ორი 4.2-ლიტრიანი V8, რომელთაგან ერთი ბენზინზე მუშაობს, მეორე კი - დიზელზე. პირველის სიმძლავრე 372 ცხენის ძალაა და მისი მეშვეობით, ავტომობილს 0-დან 100 კმ/სთ-მდე ასაჩქარებლად 5.7, მეორეს სიმძლავრე კი 350 ცხენის ძალაა, თუმცა მისი მეშვეობით, ავტომობილს აჩქარების უკეთესი ტემპერამენტი (5.5 წამი) აქვს. ყველაზე სუსტია 3.0-ლიტრიანი V6, რომლის მაქსიმალური სიმძლავრეც მხოლოდ 247 ცხენის ძალაა, მისი სტანდარტული აჩქარება კი 6.6 წამში ესწრება. უახლოეს მომავალში, შესაძლებელი იქნება V8-ზე V10 და W12 კონფიგურაციის დიდლიტრაჟიანი ძრავების დაყენება.

რაც შეეხება ტრანსმისიას, მისი მთავარი ნაწილი კომპანია ZF-ის წარმოების ახალი, 8-საფეხურიანი ავტომატია. წამყვანი ყველა ბორბალია (ცნობილი სისტემა კვატრო). წინა და უკანა ღერძებს შორის მაბრუნ მომენტს ”ტორსენის” დიფერენციალი ანაწილებს. განაწილების პროპორციაა 40:60-ზე უკანა ღერძის სასარგებლოდ.

ახალი A8-ს ინტერიერი წინამორბედზე ფართეცაა, კომფორტულიც და ნათელიც. საინტერესოა, რომ სალონის გასაწყობ მასალებს თავად ავტომობილის მყიდველი უკვეთავს. ასე რომ, ყველა ავტომობილის სალონი გარკვეულწილად, ინდივიდუალური იქნება. ინტერიერის გასაშუქებლად, ”აუდიმ” ახალი სისტემა გამოიყენა, რომელიც მძღოლის სურვილის შესაბამისად, შეიძლება იყოს მოწითალო, თეთრი ან მოყვითალო.

სტანდარტულ ვერსიაში, წინა სავარძლები 12 მიმართულებით რეგულირდება. შეკვეთის შემთხვევაში კი შესაძლებელია ისეთი სავარძლების დაყენება, რომლებიც 22 განსხვავებულ პოზიციას იკავებენ. შესაძლებელია ასევე სპორტული სავარძლების შეკვეთა.

ახალი A8 სისტემა კერს-ითაც (კინეტიკური ენერგიის რეკუპერაციის სისტემა) გამოირჩევა. ეს სისტემა კინეტიკურ ენერგიას ელექტროენერგიად გარდაქმნის (როგორც ფორმულა 1-ის ზოგიერთ მანქანაზე) და ამგვარად, აკუმულატორებში მუხტის შენარჩუნებას ემსახურება.

და, რა თქმა უნდა, ყურადღებას ამ შესანიშნავი ავტომობილის უსაფრთხოების სისტემებიც იმსახურებს. მაგალითად, მძღოლი დაიბნა და ვერ რეაგირებს მოულოდნელად გაჩენილ წინაღობაზე, რის გამოც, შეჯახება თითქოს გარდაუვალია. ამ დროს, საქმეში ელექტრონიკა ერევა, რომელიც წინა ბამპერის ქვეშ განლაგებული გადამწოდების მეშვეობით აფიქსირებს საფრთხეს და მანქანის მართვას თავის თავზე იღებს. პირველ რიგში, ავტომობილი 3.0 მ/წმ2 უარყოფითი აჩქარებით ნელდება. ამ დროს იხურება ფანჯრები, ლუქი, იჭიმება უსაფრთხოების ღვედები და სისტემა გამაფრთხილებელ ხმას გამოსცემს. მოკლედ, მანქანა შეჯახებისთვის ემზადება. შეჯახებამდე თითქმის ნახევარი წამით ადრე, მანქანა მაქსიმალურად ამუხრუჭებს. იმდენად, რომ შეჯახების მომენტში, მისი სიჩქარე 40 კმ/სთ-ზე მეტი არ უნდა იყოს. რა თქმა უნდა, ამ სიჩქარეზე მანქანა და მასში მსხდომნი გაცილებით ნაკლებად საზარალდებიან. ავტომობილი დაახლოებით ასევე მოქმედებს, როდესაც უკნიდან შეჯახების საშიშროება წარმოიქმნება.

ინტერირში არსებული სარკის გვერდებზე მოთავსებულია ვიდეოკამერები, რომლებიც 65 კმ/სთ სიჩქარეზე, პარალელურ რეჟიმში მოძრაობას ინტენსიურად აკონტროლებენ და თუ დაგეძინათ და მოხვევის ციმციმას ჩაურთავად, ავტომობილი ზოლს შეიცვლის, სისტემა საჭის რგოლზე ”გამოსაფხიზლებელ” ვიბრაციას ჩაგირთავთ და გაგაღვიძებთ. იგივე კამერები საგზაო ნიშნებსაც სკონტროლებენ და მათ შესახებ ინფორმაცია ცენტრალურ მონიტორზე გადააქვთ.

”აუდი” თავის ფლაგმანზე პირველად გამოიყენებს ღამით ხედვის სისტემას. ინფრაწითელი სხივების მეშვეობით, ღამით ეხილავი საგნების 300 მეტრის სიშორეზე გარჩევაა შესაძლებელი. სისტემა განსაჯუთრებით მკვეთრად ადამიანებსა და ცხოველებს გამოსახავს.

მესამე თაობის A8-ს გაყიდვებს 2010 წლის მარტში დაიწყებს. ავტომობილის საბაზო ვერსია 3.0-ლიტრიანი ძრავით 59 000 ევრო ეღირება, ბენზინის V8 ძრავით კი მისი სასტარტო ღირებულება 65 000 ევრო იქნება.

”ალფა რომეო P2” - ვიტორიო იანოს პირველი შედევრი

Alfa Romeo P2

7 დეკემბერი

”ალფა რომეოს” სახელოვანი სარბოლი წარსული აქვს. თუნდაც ის ფაქტი რად ღირს, რომ ფორმულა 1-ის პირველმა მსოფლიო ჩემპიონმა, იტალიელმა ჯუზეპე ”ნინო” ფარინამ თავისი ტიტული სწორედ მილანური კომპანიის ბოლიდით მოიპოვა, ფორმულა 1-ის პირველი ჩემპიონატის საბოლოო შედეგებით კი, პირველი სამი ადგილი ”ალფა რომეოს” პილოტებმა, სამმა ”ფ-მ” - ფარინამ, ლეგენდარულმა არგენტინელმა ხუან მანუელ ფანხიომ და იტალიელმა ლუიჯი ფაჯოლიმ დაიკავეს.

მაგრამ სპორტულ არენაზე ”ალფას” დებიუტი ასეთივე წარმატებული არ ყოფილა. მილანელთა პირველმა სარბოლმა ავტომობილმა (P1), რომელიც დიდი პრიზების კლასიფიკაციას შეესაბამებოდა, სრული კრახი განიცადა. არადა, ფაქტობრივად, ის იმ დროის მეტად წარმატებული ”ფიატის” ექვსცილინდრიანი ძრავით აღჭურვილი მოდელის ზუსტი ასლი იყო.

სადებიუტო რბოლაშივე, რომელიც 1923 წელს მონცაზე, ევროპის დიდი პრიზის სახელით ჩატარდა, ვარჯიშის დროს, ”ალფას” ერთ-ერთ პილოტს ფატალური ავარია მოუვიდა. ისე კი, მილანური მანქანები ყველა მეტოქეს კარგა მანძილზე ჩამორჩებოდნენ. დაღუპული თანაგუმდელის პატივსაცემად, გუნდი რბოლაზე აღარც გამოსულა.

ამ კრახის მიუხედავად, ნიკოლა რომეოს დანებება არც უფიქრია. მან ახალგაზრდა ენცო ფერარი ტურინს მიავლინა სადაც მას ”ფიატის” მთავარ ინჟინერთან, ლეგენდარულ ვიტორიო იანისთან უნდა გაემართა მოლაპარაკება. ფერარის არ გასჭირვებია იანოს გადაბირება და ნიჭიერი ინჟინერიც მალე ”ალფა რომეოში” გადაბარგდა.

როგორც მოსალოდნელი იყო, პირველ რიგში, იანოს სასწრაფოდ უნდა შეექმნა უვარგისი P1-ის შემცვლლი. მან იმით დაიწყო, რასაც ”ფიატში” აკეთებდა - თავისი ახალი კომპანიისთვის რვაცილინდრიანი (ერთ რიგში განლაგებული ცილინდრებით) ძრავის შექმნას შეუდგა. იანომ ის შეცდომები გაითვალისწინა, რომლებიც წინა სეზონში იქნა დაშვებული და საკუთარ კონსტრუქციაში რამდენიმე მნიშვნელოვანი ცვლილება შეიტანა. თუ ადრე ის რვაცილინდრიანი ძრავის შესაქმნელად ორ ოთხცილინდრიან ბლოკს იყენებდა, ამჯერად მან ოთხი ორცილინდრიანი ბლოკის გამოყენება ამჯობინა. წინასწარი გათვლებით, ასეთი ძრავი უფრო გამძლე უნდა გამოსულიყო.

ცილინდრების თავებში ორ-ორი სარქველი თავსდებოდა, რომელთა მუშაობასაც თითო, ძრავის ზედა ნაწილში მოთავსებული გამანაწილებელი ლილვი ემსახურებოდა. ამასთან, ახალ ძრავში იანომ გამანაწილებელი ლილვი სარქველებთან ეგრეთ წოდებული დეზებით დააკავშირა, როგორც ამას უფრო ადრე ”პეჟო” აკეთებდა. გარდა ამისა, ახალი ძრავისთვის ”ალფამ” მექანიკური დამჭირხნიც შეიმუშავა, რომლის დახმარებითაც, ძრავის სიმძლავრემ 134 ცხენის ძალას (5 500 ბრ/წთ-ზე) მიაღწია.

ახალი ძრავისა და 4-საფეხურიანი გადაცემათა კოლოფის ტანდემი იანომ დაპრესილი ფოლადისგან შექმნილ ჩარჩოზე დაამონტაჟა. მძლავრი ღერძით, ნახევრად ელიფსური რესორებით და ფრიქციული ამორტიზატორებით, ახალი სარბოლი ავტომობილის წინა ნაწილი იმ დროის სარბოლი ტექნიკის შესაფერისად გამოიყურბოდა.

უკანა ნაწილში, მზიდი ჩარჩო იქ მთავრდებოდა, სადაც მოძრავი ღერძი გადიოდა. აქ ჩარჩოს დიდი თაღოვანი კონსტრუქცია ენაცვლებოდა, რისი მეშვეობითაც, ავტომობილის სიმაღლის შემცირება გახდა შესაძლებელი. კიდევ უფრო უცნაური კი იყო, რომ იანომ უკანა რესორები ავტომობილის ტანის სიგნით შეიტანა.

მგორავი შასი მარტივი ფორმის ძარით დაფარეს, რომელსაც წინ უზარმაზარი რადიატორი ”ამშვენებდა”, უკან კი წაწვეტებული იყო, რითაც წვეთის ფორმის ეფექტი იქმნებოდა.

მუქ შინდისფრად შეღებილ მანქანებს კაპოტზე ოთხფოთლიანი სამყურა ბალახის ტოტი დაახატეს, რაც ”ალფა რომეოს” სპორტული მანქანების ემბლემად იქცა და მას მილანელები დღესაც კი იყენებენ.

ავტომობილი, რომელსაც P2 უწოდეს, სრული გასაიდუმლოებულობის პირობებში იქმნებოდა. მისი დებიუტი 1924 წლის გაზაფხულზე, კრემონას შემოგარენში ჩატარებულ 200-მილიან (დაახლოებით 320-კილომეტრიან) რბოლაზე შედგა. რბოლა იტალიელმა ანტონიო ასკარიმ (ფორმულა 1-ის ორგზის ჩემპიონის, ალბერტო ასკარის მამამ) მოიგო და ”ალფა რომეო P2-ს” პირველი გამარჯვება მოუპოვა. მისი მანქანის საშუალო სიჩქარემ 100 მლ/სთ-ს (დაახლოებით 161 კმ/სთ) მაიღწია, რაც იმ დროს შესანიშნავი შედეგი იყო.

მომდევნო რბოლას, ასერბოს თასს ”ალფა რომეოს” ჯუზეპე კამპარი ლიდერობდა, მაგრამ საბურავი გაუსკდა და მიზანს ვერ მიაღწია. მილანელთა მომდევნო რბოლა იმ დროის უპოპულარულესი ფრანგული დიდი პრიზი იყო, რომელსაც 1924 წელს ლიონის საგარეუბნო გზებმა უმასპინძლა. დისტანცია 810 კილომეტრი იყო, ”ალფას” კი ისეთ სერიოზულ მეტოქეებთან ჰქონდა საქმე, როგორებიც იყვნენ ”დელაჟი”, ”სანბიმი”, ”ფიატი” და ”ბუგატი”.

მილანური საჯინიბოს ორმა პილოტმა - ასკარიმ და კამპარიმ თავიდანვე ხელთ იგდეს ლიდერობა და ყველა მტოქე შორს ჩამოიტოვეს. ასკარი თითქმის ბოლომდე ინარჩუნებდა ლიდერობას, მაგრამ მისი მანქანის ძრავს ბლოკი გაებზარა და მან ფინიშამდე ვერც მიაღწია. სამაგიეროდ, ეს მის ნაცვლად კამპარიმ გააკეთა, რომელმაც ”ალფა რომეოს” პირველი დიდი რბოლა მოაგებინა.

შემდეგი რბოლა მონცაზე იყო. მილანელებს წინა წლის კრახისთვის რევანში სწყუროდათ და რბოლაში ოთხი მანქანა გამოიყვანეს. თითქოს, მათი მთავარი მეტოქე ”მერსედეს-ბენცის” უახლესი სარბოლი მანქანა უნდა ყოფილიყო, მაგრამ ასე არ მოხდა. მილანელებმა ფინიშის ხაზი ოთხივე მანქანით ყველაზე ადრე გადაკვეთეს და მოწინავე ოთხი ადგიი დაიკავეს. ფინიშის ხაზი კი პირველმა ასკარიმ გადაკვეთა. აღსანიშნავია, რომ მეხუთეზე გასულმა როლან-პილენ შმიდმა ასკარისთან ზუსტად ერთი საათი წააგო!

ზამთარში იანომ ძრავს მოდერნიზაცია ჩაუტარა და მის ბედაურთა რემას კიდევ 20 ცხენის დაუმატა. 1925 წელს ”ალფა რომეო” მსოფლიო ჩემპიონატის პირველივე სეზონში ჩაერთო. ჩემპიონატში სულ ოთხი ეტაპი - ინდი 500, ევროპის, საფრანგეთის და იტალიის დიდი პრიზები შედიოდა. საბოლოო ჩათვლაში მხოლოდ ოთხი ეტაპის შედეგები შედიოდა, რის გამოც, მილანელებმა ამერიკაში ასპარეზობისგან თავის შეკავება ამჯობინეს.

პირველი რბოლა - ევროპის დიდი პრიზი სპა ფრანკორშანზე ჩატარდა. ”ალფა რომეო” სამი მანქანით გამოვიდა, რომელთაგან ორს ასკარი და კამპარი მართავდნენ, მესამეს კი - გასტონე ბრილი-პერი. ასკარიმ რბოლისას ყველაზე სწრაფი წრე განვლო და ფინიშთანაც პირველი მიიჭრა. სამწუხაროდ, საფრანგეთის დიდ პრიზზე, რომელიც მონტლერიში ჩატარდა, ასკარის ფატალური ავარია მოუვიდა. ნიკოლა რომეომ ამის გამო დარჩენილი ორი მანქანა რბოლიდან მოხსნა. იოლი გამარჯვება კი ”დელაჟის” მანქანას დარჩა. მონცაზე კი გუნდი ისევ სამი მანქანით წარსდგა. ასკარის ადგილი იტალიური წარმოშობის ამერიკელმა პეტე დეპაოლომ დაიკავა, რომელსაც ”დუეზენბერგის” მანქანით ინდი 500 ჰქონდა მოგებული. შეუდარებლად იასპარეზა ბრილი-პერიმ, რომელმაც მეორეზე გასული კამპარი 20 წუთით ჩამოიტოვა. კიდევ ათი წუთის შემდეგ, ფინიშს მესამეზე გასულმა ”ბუგატიმ” უწია. მსოფლიო ჩემპიონატი ”ალფა რომეოს” გამარჯვებით დასრულდა, რომელმაც ”დუეზენბერგს” აჯობა. ამ გამარჯვების აღსანიშნავად, ”ალფა რომეოს” ემბლემაში სამუდამოდ დარჩა მსოფლიო ჩემპიონის გვირგვინი.

”ალფა რომეო P2-ით” ბოლო გამარჯვება ლეგენდარულმა იტალიელმა აქილე ვარციმ 1930 წელს, ტარგა ფლორიოს (სიცილია) რბოლაზე მოიპოვა, რის შემდეგაც P2 ისტორიას ჩაბარდა. მაგრამ ვიტორიო იანომ ამის შემდეგაც არაერთი სახელოვანი მანქანა შექმნა, რომლებმაც მასაც და მილანურ კომპანიასაც დიდი სახელი მოუხვეჭეს. ფორმულა ერთის პირველი ორი ჩემპიონატის მომგები მანქანებიც მისი შექმნილი იყო.

სულ ”ალფა რომეომ” ექვსი ცალი P2 დაამზადა, რომელთაგან დღეისათვის მხოლოდ ორია შემორჩენილი. ერთის ხილვა ”ალფა რომეოს” მუზეუმში შეიძლება, მეორე გადარჩენილი P2 კ ისაა, რომლითაც ვარციმ ტარგა ფლორიოზე გაიმარჯვა. ამ მანქანის ხილვა ტურინის ”ბისკარეტის” მუზეუმშია შესაძლებელი.

”ალფა რომეოს” ახალი ”ჯულიეტა”
Alfa Romeo Giulietta
4 დეკემბერი”ალფა რომეოს” თავისი პოპულარული ჰეჩბეკის, 147-ის შემცვლელი, რომელიც აქამდე ”მილანოს” სახელით იყო ცნობილი, წარმოებისთვის კარგა ხნის მომზადებული აქვს მაგრამ მის მსოფლიო პრემიერას მაინც მერმის, ჟენევის საავტომობილო გამოფენაზე გეგმავს. თუმცა უკვე ცნობილი გახდა, რომ ავტომობილს მყიდველი ”ჯულიეტას” სახელით მიიღებს.
ავტომობილის შემუშავების საწყის ეტაპზე, მისთვის სახელად 148 შეარჩიეს, შემდეგ კი ის ”მილანოთი” შეცვალეს, თუმცა მარკეტოლოგთა მიერ ჩატარებულმა კვლევამ აჩვენა, რომ ყველაზე უმჯობესი მაინც ”ჯულიეტა” იქნებოდა.
ხუთკარიანი ჰეჩბეკი კომპაქტურ, ეგრეთ წოდებულ ”გოლფის” კლასს (ევროპულ C სეგმენტს) განეკუთვნება. მისი სიგრძე 4.35 მეტრი, სიგანე 1.8 მეტრი, სიმაღლე კი 1.46 მეტრია.
ახალი ავტომობილი აღჭურვაში ოთხ ტურბოძრავს მიიღებს. აქედან ორი ბენზინისაა, ორიც - დიზელის. შესაბამისად, პირველი ორის მაქსიმალური სიმძლავრე 120 და 170 ცხენის ძალა, დიზელებისა კი 105 და170 ცხენის ძალაა. მოგვიანებით, მილანელები ”ჯულიეტას” მძლავრ ვერსიას გამოუშვებენ, რომლის სახელწოდებაც ”კვადრიფოლიო ვერდე” იქნება და ის ბენზინის 235-ცხენისძალიანი ტურბომოტორით აღიჭურვება.
ახალი ”ჯულიეტა” სპორტულად გამოიყურება. მის ამოცნობას კი ”ალფა რომეოს” ემბლემა - ფარის ფორმის რადიატორის ბადე აადვილებს, რომელსაც ზედა ნაწილში ქალაქ მილანის გერბი ამშვენებს. რადიატორის ბადე-სამკუთხედი ჰაერის ამღებს შუაზე ჰყოფს. დაკიდევ, უკანა კარის სახელური, ”ალფა რომეოს” სტილში, მესამე საყრდენის სტრუქტურაშია ჩამალული და ასე შემხვედრი ჰაერის ნაკადს ”შეშფოთების” საბაბს არ აძლევს.
დიფერენციალს ელექტრონიკა მართავს. ავტომობილზე არაერთი ელექტრონული დამხმარე და კომფორტის უზრუნველმყოფი სისტემაა დაყენებული. მათი მეშვეობით, ”ჯულიეტას” მართვის რამდენიმე განსხვავებულ სტილთან მისადაგება შეუძლია.
სავარაუდოდ, ევროპის ბაზარზე ”ალფა რომეო ჯულიეტას” მთავარი კონკურენტები ”ფოლკსვაგენ გოლფი”, ”ფორდ ფოკუსი” და უახლესი ”ოპელ ასტრა” იქნებიან.

”ფოლკსვაგენის” ”ახალი ხოჭოს” ბოლო გამოცემა
Volkswagen New Beetle Final Edition
4 დეკემბერილოს ანჯელესში გახსნილ საავტომობილო შოუზე, ”ფოლკსვაგენმა” თავისი პოპულარული მოდელის, ”ახალი ხოჭოს” სპეციალური ვერსია - ”ფაინალ ედიშნ” წარმოადგინა.
ეს ავტომობილი კუპესა და კაბრიოლეტის ძარებითაა შემოსილი და მას მხოლოდ 3 000 ცალს დაამზადებენ. სახელიდანაც ჩანს, რომ ეს ლეგენდარული ავტომობილის ბოლო გამოცემაა, რის შემდეგაც მისი წარმოება შეწყდება, მის ნაცვლად კი ბაზარს ალბათ კიდევ ერთი, მესამე თაობის ხოჭო მოევლინება. თუმცა შესაბამისი გადაწყვეტილება ჯერ მიღებული არაა.
ბოლო გამოცემის ”ახალი ხოჭო” 2.5-ლიტრიანი ძრავითაა აღჭურვილი, რომლის სიმძლავრეც 150 ცხენის ძალას აღწევს. ძრავთან უნისონში კი 6-საფეხურიანი ავტომატური გადაცემათა კოლოფი (სერია ტიპტრონიკი) მუშაობს.
ბოლო გამოცემის ”ახალი ხოჭო” სპორტული საკიდარითაა აღჭურვილი და 17-დუიმიან ბორბლებზე დგას, რომლებიც მსუბუქი შენადნობებისგანაა დამზადებული. ავტომობილი ღია ცისფერში, ან თეთრ ფერშია გამოწყობილი. კუპეს სახურავი შავია, კაბრიოლეტისა კი თეთრია.
”ახალი ხოჭოს” ბოლო გამოცემის კუპეს ვერსიის სასტარტო ფასი ამერიკაში 20 240 დოლარია, კაბრიოლეტისა კი - 27 170 დოლარი.

”ბენტლი” ”მულსეინს” 2010 წელს გამოუშვებს
Bentley Mulsanne to Be Launched in 2010
2 დეკემბერი”ბენტლი” წარმოებისთვის სრულიად ახალ მოდელს - ზემდიდრულ ”მულსეინს” ამზადებს. ამ ავტომობილის კონცეპტუალურმა ვერსიამ ჯერ პებლ ბიჩის ელეგანტურობის კონკურსის დამსწრე საზოგადოება მოხიბლა, შემდეგ კი ფრანკფურტის შოუზეც მოხიბლა დამთვალიერებელი. ეს კი საკმარისი აღმოჩნდა იმისათვის, რომ ”ფოლკსვაგენის” ჯგუფში შემავალ ინგლისურ კომპანიას მისი წარმოება გადაეწყვიტა.
”ბენტლი” აცხადებს, რომ ”მულსეინის” პროექტირებისას, ინჟინრები არანაირ კომპრომისზე არ წასულან. ყველაფერი იმისთვის კეთდებოდა, რომ ახალი ლიმუზინი მაქსიმალურად კომფორტული და ტემპერამენტიანი გამოსულიყო, რათა ამ კლასის ისეთი სუპერ ვარსკვლავის კონკურენცია შესძლებოდა, როგორიც ”როლს როისის” ”ფანტომია”. ამიტო, საორიენტაციო ფასი - 348 424 დოლარი ის ზღვარი არაა, რომელიც ამ ავტომობილის პოტენციურ მყიდველს დააშინებს.
”ამ ეტაპზე ძალიან ბევრი გამოხმაურება გვაქვს მიღებული, რომლებშიც პოტენციური მყიდველი ”მულსეინით” დაინტერესებას გამოხატავს. ბევრი მათგანი ქრიუში, ჩვენს საწარმოში ექსკურსიაზე მივიწვიეთ. ჩვენ აღფრთოვანებულნი დავრჩით ბევრი ენთუზიასტის, განსაკუთრებით კი ამერიკელების გამოხმაურებებით. ეს კი მაშინ მოხდა, როდესაც ამ ავტომობილის ტურს ქვეყნის შვიდ დიდ ქალაქში ვატარებდით”, - ამბობს ”ბენტლი მოტორსის” გაყიდვებისა და მარკეტინგის საბჭოს წევრი სტიუარტ მაკკალოფი.
”ბენტლი” თავისი ახალი ავტომობილის წარმოებას ქრიუში, გაზაფხულზე დაიწყებს. ამისათვის ქრიუს ქარხანა მოდერნიზაციას გადის. კომპანია მყიდველს ”მულსეინისთვის” ძარის 114 ფერს, ხალიჩების 21 ფერს, 9 სახეობის ხის დეკორატიულ დეტალებს და 24 სახის ტყავს შესთავაზებს. მოკლედ, ეს ჩამონათვალი აშკარად მიგვანიშნებს, რომ ”მულსეინისთვის” აქცენტი კომფორტსა და მდიდრულობაზე კეთდება.
ყოველი ”მულსეინი” ხელით აეწყობა. თითოეულის დასამზადებლად კი 9 კვირა იქნება საჭირო. კომპანია აცხადებს, რომ ამ ავტომობილით ხორცი შეესხმება ”ბენტლი მოტორსის” დამაარსებლის, უოლტერ ოუენ ბენტლის ხედვას, რომლის მიხედვითაც, ”კარგი და სწრაფი ავტომობილი საუკეთესოა თავის კლასში”!

”ფოლკსვაგენი” პიკაპის წარმოებას იწყებს
VW Amarok
2 დეკემბერი”ფოლკსვაგენმა” თავისი ახალი ავტომობილის, პიკაპ ”ამაროკის” შესახებ ოფიციალური ინფორმაცია და ფოტოები გაავრცელა. ავტომობილი, რომელმაც სახელი კანადის ინდიელთა ერთ-ერთ ლეგენდაში არსებული პოლარული მხეცისგან მიიღო, ბოლო 29 წელიწადში, გერმანული კომპანიის სამოდელო გამაში პირველი პიკაპი იქნება.
თავდაპირველად, ამ ავტომობილის ოფიციალური დებიუტი დეკემბრის შუა რიცხვებში იგეგმებოდა, თუმცა მას ალბათ პირველად ახალი წლის პირველ დღეს ვიხილავთ, როდესაც რალი დაკარ 2010-ის ოფიციალური ავტომობილის მოვალეობის შესრულებას შეუდგება.
ავტომობილი, რომლის სიგრძეც 5.25 მეტრია, ”ფოლკსვაგენის” ახალ საფირმო სტილშია შესრულებული და ის ძლიერ ჰგავს კონცეპტუალურ პიკაპს, რომელიც გერმანულმა კონცერნმა პირველად შარშან, ჰანოვერის ავტო შოუზე წარადგინა. გერმანულ ჟურნალ ”ავტო მოტორ უნდ შპორტის” მონაცემებით, ”ამაროკის” საბარგულის სეგმენტის ფართობი 2.52 კვადრატული მეტრია. პიკაპის ტვირთამწეობა კი 1.15 ტონას აღწევს.
ახალი ავტომობილისთვის ვოლფსბურგელებმა სრულიად ახალი პლატფორმა შექმნეს, რომლის საფუძველსაც მტკიცე ფოლადისგან შეკრული ჩარჩო წარმოადგენს. ჩარჩოს ძირითადი ელემენტები გრძივი ლონჟერონებია, რომლებსაც ერთმანეთტან რამდენიმე განივი ტიხარი აკავშირებს. მთლიანობაში კი ისინი მეტად მყარ სტრუქტურას ქმნიან.
ამ მზიდ სტრუქტურაზე დგას 2.0-ლიტრიანი დიზელის ძრავი, რომლის მაქსიმალური სიმძლავრე 163 ცხენის ძალას, მაქსომალური მაბრუნი მომენტი კი 400 ნიუტონმეტრს აღწევს. მოგვიანებით, ”ამროკი” უფრო სუსტ, 122-ცხენისძალიან დიზელსაც მიიღებს. რაც შეეხება ტრანსმისიას, ამ მხრივ შესაძლებელია როგორც უკანა წამყვანბორბლიანი, ასევე სრულამძრავიანი ვერსიის არჩევა. ამასთან, მეორე შეიძლება იყოს მუდმივი, ან ჩერთვადი მოდებით.
”ამაროკის” ყველაზე მძლავრი ვერსია 100 კილომეტრზე 7.8 ლიტრ საწვავს მოიხმარს. თუ გავითვალისწინებთ იმას, რომ მას 80-ლიტრიანი ავზი აქვს, გამოდის, რომ ამ ავტომობილს სრულად ავსებული ავზით, 1 000 კილომეტრზე მეტის გავლა შეუძლია.
”ფოლკსვაგენი” თავის უახლეს პიკაპს არგენტინაში დაამზადებს. ავტომობილი ავსტრალიაში, სამხრეთ აფრიკაში და ორივე ამერიკაში გაიყიდება. მერმის გაზაფხულიდან კი ის ევროპელი დილერების შოურუმებშიც გამოჩნდება. მისი ფასიც სწორედ გაყიდვების დაწყებამდე ცოტა ხნით ადრე დაზუსტდება.

”გრეიტ უოლი” ევროპაში გაყიდვებს იწყებს
Great Wall to Bring Coolbear in Europe
1 დეკემბერიჩინური ავტომწარმოებელი ”გრეიტ უოლი” (დიდი კედელი) 2010 წლიდან ევროპის ბაზარზე თავისი უახლესი მიკროვენის - ”ქულბეარის” გაყიდვების დაწყებას გეგმავს. ამ ავტომობილს ევროპულ ბაზარზე მწვანე შუქი მას შემდეგ აენთო, რაც მან ბრიტანულ სასერტიფიკაციო სააგენტოში გაიარა ტესტები.
გამოცემა ”ჩაინა ქარ ტაიმსის” ინფორმაციით, ”გრეიტ უოლი” აღმოსავლეთ და დასავლეთ ევროპაში საქმიანობის გაფართოებას ესწრაფვის და ”ქულბეარის” გაყიდვის დაწყება, ამ მხრივ გადადგმული პირველი სერიოზული ნაბიჯი იქნება.
”ქულბეარი” გარეგნულად ”სციონის” (ტოიოტას ამერიკული ახალგაზრდული ბრენდი) პოპულარულ xD-ს ჰგავს. ის 1.5-ლიტრიანი ძრავითაა აღჭურვილი, რომელთანაც მექანიკური გადაცემათა კოლოფია დაკავშირებული. მალე კი ავტომატურის გამოყენებაც იქნება შესაძლებელი. რაც მთავარია, კომპანიის განცხადებით, ნახსენები ძრავი გამონაბოლქვზე ევრო5 სტანდარტს აკმაყოფილებს. ეს კი იმას ნიშნავს, რომ ევროპულ ბაზარზე, რეგულატორების მხრიდან, ამ ავტომობილს დაბრკოლება არ შეექმნება.
ძრავი 6 000 ბრ/წთ-ზე მაქსიმუმ 103 ცხენის ძალას გამოიმუშავებს, მისი მაბრუნი მომენტის ჭერი კი 138 ნიუტონმეტრს (4 200 ბრ/წთ-ზე) აღწევს. ადგილიდან 60 კმ/სთ-მდე ასაჩქარებლად, ავტომობილს 4.7 წამი სჭირდება, 0-დან 90 კმ/სთ-ს კი მისი სიჩქარე 6.0 წამში აღწევს.
”გრეიტ უოლი” ევროპის ბაზრისთვის ავტომობილების წარმოებას ბულგარეთში ლოვეხის ქარხანაში აპირებს. გავრცელებული ინფორმაციით, ჩინური კომპანიის ბულგარული საწარმოს წლიური სიმძლავრე 50 000 ავტომობილია. იქ სულ ოთხი მოდელის წარმოება იგეგმება. ”ქულბეარის” გარდა, ის გამოუშვებენ სედან ”ფლორიდს”, უგზოობის ”ჰოვერ 5-ს” და პიკაპ ”უინგლის”. აღნიშნული ქარხანა წარმოებას ალბათ 201 წლის პირველ ნახევარში დაიწყებს.
ჯერჯერობით უცნობია ”ქულბეარის” ფასი, თუმცა ზოგიერთი წყაროს ცნობით, ამ ავტომობილის ღირებულება 12 000 დოლარის ფარგლებში იქნება.

ბრიტანული კომპანია მსოფლიოს უიაფეს ავტომობილს გამოუშვებს
British Company Confirms World's Cheapest Car
1 დეკემბერითუ ბრიტანულ პრესაში გავრცელებულ ინფორმაციას ვენდობით, მალე ”ტატა ნანო” (სურათზე) მსოფლიოს უიაფესი ავტომობილის წოდებას დაკარგავს და ეს პატარა ბრიტანულ კომპანია ”ეკოკა-ს” დამსახურება იქნება. ამ კომპანიის ინჟინრები ახლა იმას არკვევენ, რამდენად შესაძლებელია მიკროავტომობილის შექმნა, რომლის ფასიც 2 200 დოლარზე მეტი არ იქნება.
ეს უნდა იყოს ორადგილიანი ჯუჯა, რომელსაც 340 კუბური სანტიმეტრი მოცულობის ბენზინის ძრავი ექნება და კომპანიის განცხადებით, ”ტატა ნანოზე” ზუსტად 487 დოლარით იაფი ეღირება. ასეთი სიზუსტით ფასის გამოცხადება, ცოტა არ იყოს, ეჭვს იწვევს. სამაგიეროდ, ”ეკოკა” გვამცნობს, რომ მისი ავტომობილის შემუშავებაში მონაწილეობას დაუსახელებელი ინდური კომპანიის სპეციალისტებიც მიიღებენ.
”ჩვენი კომპანიისთვის ყველაზე მიმზიდველი ინდოეთის ბაზარია, რომელიც იმის საშუალებას მოგვცემს, რომ ავტომობილი 2 200 დოლარად გავყიდოთ და საკმარისი მოგებაც მივიღოთ”, - ამბობს ”ეკოკა-ს” მმართველი დირექტორი კარმან ნაღდი.
მართალია, ბატონი ნაღდი თავისი პარტნიორი ინდური კომპანიის სახელს არ გვამცნობს, მაგრამ ბრიტანული პრესა ვარაუდობს, რომ ეს ”მაჰინდრა ენდ მაჰინდრა” უნდა იყოს.
რა თქმა უნდა, ამ ავტომობილის შესახებ რაიმე ინფორმაცია ჯერ არ მოიპოვება. მაგრამ იმავე ბრიტანული პრესის ვარაუდით, მას ”ფოლკსვაგენის ხოჭოს” თშაგონებით შექმნიან. ანუ, ის სახალხო ავტომობილი უნდა იყოს. წინასწარი მონაცემებით, ავტომობილის წონა 330 კილოგრამზე მეტი არ უნდა იყოს. ცნობილია ასევე, რომ ის ავტომატური კოლოფით აღიჭურვება, 100 კილომეტრის გავლისას მხოლოდ 3.7 ლიტრ საწვავს დაწვავს, მისი მაქსიმალური სიჩქარე კი 70 კმ/სთ იქნება.