საინსმა პირველი ეტაპი მოიგო

დაკარის რალი-რეიდი

13 იანვარი

დაკარის რბოლის ლიდერის, ესპანელი კარლოს საინსის გამარჯვებით დასრულდა რალი რეიდის მოროგი, მეათე ეტაპი, რომლის 238-კილომეტრიანი მარშრუტიც, ლა სერენადან სანტიაგომდე, მან სამ საათსა და ერთ წუთში განვლო. წლევანდელ დაკარზე, ეს საინსის მიერ მოგებული პირველი ეტაპია, რითაც მან საერთო კლასიფიკაციაში ლიდერობა განიმტკიცა და კიდევ უფრო მიუახლოვდა სანუკვარ მიზანს. ათი ეტაპის შემდგ, ის 10 წუთსა და 6 წამს უგებს უახლოეს მდევარსა და თანაგუნდელს (ფოლკსვაგენის საქარხნო გუნდში), ყატარელ ნასერ ალ-ატიას, რომელსაც უკვე სამი ეტაპი აქვს მოგებული.

საინსმა, ვისთვისაც ეს კარიერაში, დაკარის რალი რეიდზე მოგებული მე-16 ეტაპია, 28 წამით აჯობა ”ბეემვეთი” მოასპარეზე ფრანგ სტეფან პეტერანსელს, ვისაც საერთო ჩათვლაში მეოთხე ადგილი უკავია. ეტაპი მესამემ, გამარჯვებულთან წუთზე მეტი ჩამორჩენით დაასრულა საინსის ამერიკელმა თანაგუნდელმა მარკ მილერმა, ვინც საერთო ჩათვლაშიც მესამეზეა.

”დღეს არანაირი პრობლემა არ შეგვქმნია. სტარტიდან დაახლოებით მე-80 კილომეტრზე, ნასერს დავეწიე და მას კვალში ჩავუდექი. გასწრება არც მიფიქრია, რადგან ის რადიოში გაფრთხილებას არ უსმენდა და ამ დროს, გასწრების მანევრი სახიფათო იქნებოდა. ეს ძალიან ნელი და მოსახვევებით სავსე გზა იყო. ასეთი რთული მარშრუტი ჯერ არცერთ სხვა ეტაპზე არ გვქონია. ვიცოდი, რომ ის ჩემს გაშვებას არ აპირებდა. ასე რომ, დარჩენილი გზა მის მიერ დატოვებულ მტვრის ჭავლს მივყვებოდი”, - ნარბოლევს განაცხადა საინსმა, ვინც ეტაპი ნასერზე წუთნახევრით გვიან დაიწყო (როგორც წინა ეტაპის მეორეადგილოსანმა) და ალ-ატიას სწორედ ამის ხარჯზე მოუგო.

თავის მხრივ, ალ-ატიამ განაცხადა, რომ მეათე ეტაპი მისთვის ძალიან სტრესული იყო: ”ძალიან, ძალიან სახიფათო ეტაპი იყო. უამრავი მოსახვევის გავლამ მოგვიწია და გზაც ისეთი იყო, ნებისმიერ მომენტში შეიძლებოდა შეცდომის დაშვება. ასეთ პირობებში, იმითაც კმაყოფილი დავრჩი, რომ ეტაპი პრობლემების გარეშე დავასრულე. რბოლა პირველმა დავიწყე, რის გამოც, მთელი გზა არანორმალური სტრესის ქვეშ ვიყავი. ეს ძალიან ძნელი იყო. ამიტომ, შედეგით ძალიან კმაყოფილი ვარ”.

დეტროიტის ავტო შოუ

”კადილაკმა” თავისი მომავალი ფლაგმანი გაგვაცნო

12 იანვარი

”ჯენერალ მოტორსის” პრემიუმ ბრენდმა ”კადილაკმა”, დეტროიტის საავტომობილო შოუზე თავისი ფლაგმანის, სედან DTS-ის შემცვლელი წარმოადგინა, რომლის კონცეპტუალური ვერსიაც, საზოგადოებას ”XTS პლატინუმ კონცეპტის” სახელით გააცნო.

ავტომობილის წარდგენისას, ”კადილაკის” გენერალურმა მენეჯერმა ბრაიან ნესბიტმა განაცხადა, რომ ”XTS პლატინუმ კონცეპტი” შექმნილია, როგორც პირადი შტაბბინა, რომელიც ეფექტური აგრეგატებითაა აღჭურვილი, არის კომფორტული და კომუნიკაბელური”.

დეტროიტში წარმოდგენილი კონცეპტუალური ავტომობილი ”კადილაკის” სპეციალისტების მიერ შემუშავებული, 3.6-ლიტრიანი ბენზინის V6 ძრავითაა აღჭურვილი, რომელსაც საწვავი უშუალოდ წვის კამერაში მიეწოდება. შიდაწვის ძრავთან უნისონში მუშაობს პლაგ-ინ ჰიბრიდული სისტემა, რომლის მეშვეობითაც, აკუმულატორების ბლოკი ენერგიას საყოფაცხოვრებო ელექტროქსელიდან შეივსებს. ”კადილაკი” გვარწმუნებს, რომ ამ სისტემის მეშვეობით, XTS ჩვეულებრივ ჰიბრიდულ მოდელებზე თითქმის ორჯერ უფრო ეკონომიური იქნება.

არადა, ჰიბრიდული სისტემის კომბინირებული მაქსიმალური სიმძლავრე 350 ცხენის ძალას აღწევს, მაქსიმალური მაბრუნი მომენტი კი - 400 ნიუტონმეტრს. ”კადილაკის” რელიზში წერია, რომ ავტომობილს მხოლოდ ელექტროძრავითაც შეუძლია გადაადგილება, თუმცა ამ რეჟიმში მუშაობისას, ავტომობილის სვლის სიშორე დაზუსტებული არაა.

როგორც ”კადილაკის” ფლაგმანს შეეფერება, ”XTS პლატინუმ კონცეპტი” დიდი გაბარიტებით გამოირჩევა: მისი სიგრძე 5.170, სიგანე 1.900, სიმაღლე 1.500, ბორბლებს შორის ბაზა კი 2.837 მეტრია.

ავტომობილი აღჭურვილია ადაპტირებადი საკიდარით (მაგნეტიკ რაიდ კონტროლ), რომელიც გზის საფარის შესაბამისად, თვითონვე ირჩევს მუშაობის რეჟიმს და რაც არანაკლებ მნიშვნელოვანია, სვლის მაქსიმალურ სირბილეს უზრუნველყოფს. და კიდევ, სპეციალურად ამ მოდელისთვის, საბურავების მწარმოებელმა კომპანია ”ბრიჯსტოუნმა” ახალი საბურავები შეიმუშავა.

დეტროიტის ავტო შოუ

FT-CH - ”ტოიოტას” ახალი ჰიბრიდული ავტომობილი

12 იანვარი

დეტროიტში ”ტოიოტამ” თავისი ახალი ჰიბრიდული მოდელი, კონცეპტუალური FT-CH წარმოადგინა. ავტომობილის გარეგნობა იაპონური კომპანიის ფრანგულ (ქალაქ ნიცაში) დიზაინ-ცენტრში დამუშავდა. ”ტოიოტას” ხელმძღვანელობამ დიზაინერებს დავალება მისცა, რომ მათ შეექმნათ ისეთი ავტომობილი, რომელიც ამ ჰიბრიდული მოდელისადმი ახალგაზრდა მყიდველთა ინტერესს აღძრავდა.

”ტოიოტას” FT-CH-ს შესახებ ტექნიკურ-ეკონომიკური მონაცემები არ გამოუქვეყნებია. თუმცა ის კი გვამცნო, რომ ეს კონცეპტუალური მოდელი ”პრიუსზე” 55 სანტიმეტრით მოკლე და 2.5 სანტიმეტრით ვიწროა. თავისი გაბარიტებით ის კომპაქტურ ჰეჩბეკ ”იარისთანაა” ახლოს. ამასთან, უფრო მცირე წონის წყალობით, ”პრიუსზე” ეკონომიურიცაა.

”ტოიოტას” ეკონომიურ და ეკოლოგიურად სუფთა ავტომობილების წარმოებასთან დაკავშირებით, კარგად ჩამოყალიბებული გეგმა აქვს. მაგალითად, 2012 წლიდან, ის პლაგ-ინ ჰიბრიდული სისტემით აღჭურვილი ავტომობილების წარმოებას დაიწყებს. იმავე წელს იგეგმება ელექტრომობილების წარმოების დაწყებაც. მოგვიანებით, ელექტრომობილების გამაში ისეთი მოდელებიც გამოჩნდება, რომლებიც ენერგიას წყალბადის ფიჭური ელემენტებისგან მიიღებენ.

”ტოიოტა” ჯერჯერობით არ აზუსტებს, აპირებს თუ არა FT-CH-ის წარმოებას. თუ ეს ავტომობილი კონვეიერზე დადგა (ამის დიდი შანსია), ის ”პრიუსზე” იაფი იქნება და იაპონური კომპანიის საწარმოო პროგრამაში, ჰიბრიდული ავტომობილების ახალ ოჯახს დაუდებს სათავეს, რომელშიც, სამ წელიწადში რვა ახალი მოდელი გამოჩნდება. ამასთან, ეს ავტომობილები არ იქნება არსებული მოდელების ჰიბრიდული ვერსიები.

”ტოიოტა” დეტროიტის შოუს დროს, FT-CH-ზე გამოხმაურებებს შეისწავლის და კონვეიერზე მისი დაყენების საკითხს ამის შემდეგ გადაწყვეტს. და თუ ამ ავტომობილს მწვანე შუქი აენთო, ის იაპონური კომპანიის დილერთა შოურუმებში 2011 წლიდან გამოჩნდება.

დეტროიტის ავტო შოუ

GMC-ის კონცეპტუალური ”გრანიტი”

12 იანვარი

დეტროიტის საავტომობილო შოუზე, ”ჯენერალ მოტორსის” შტო GMC-მ კონცეპტუალური კომპაქტვენი ”გრანიტი” გამოფინა. თავისი გაბარიტებით, ეს ავტომობილი ახლოსაა ”გოლფის” კლასის ჰეჩბეკებთან და მისი წარმოების დაწყების შემდეგ, ის GMC-ს (ჯენერალ მოტორს ტრაქ კომპანი) საწარმოო პროგრამაში ყველაზე პატარა მოდელი გახდება.

”გრანიტის” გაბარიტული სიგრძე 4.097 მეტრია, ბორბლებს შორის ბაზა კი - 2.631 მეტრი. ამ მონაცემებით, ის ახლოს დგას ”ფორდის” პოპულარულ ჰეჩბეკ ”ფოკუსთან”. ამასთან, ”გრანიტს” უჩვეულოდ განიერი და მაღალი ძარა აქვს, რაც მისი სალონის კომფორტულობას განაპირობებს. გარდა ამისა, ძარას არ აქვს შუა საყრდენი, მისი წინა და უკანა კარებები კი საპირისპირო მიმართულებით იღება, რითაც გაადვილებულია ავტომობილის შიგნით შესვლა და იქიდან გადმოსვლა.

”ეს არის სრულიად ახალი ტიპის ავტომობილი GMC-ს საწარმოო პროგრამაში. ”გრანიტი” ერთ-ერთი იმ ახალ მოდელთაგანია, რომელიც ხალხს ”ჯენერალ მოტორსზე” შეხედულებას რადიკალურად შეაცვლევინებს. ჩვენ მას მრავალმხრივი დანიშნულების საქალაქო ავტომობილს ვუწოდებთ. მისი შექმნისას, ჩვენი მიზანი ის იყო, რომ ახალი თაობის მომხმარებელთა თვალში, ”ჯენერალ მოტორსს” ფუნქციონალური და კოხტა ავტომობილების მწარმოებლის იმიჯი ჰქონდეს”, - განაცხადა GMC-ს წარმოების და მარკეტინგის განყოფილების დირექტორი ლაიზა ჰატჩინსონი.

”გრანიტის” კაპოტქვეშ განლაგებულია 1.4-ლიტრიანი ბენზინის ტურბომოტორი, რომელიც 138 ცხენის ძალას იძევა. მასთან შეწყვილებულია 6-საფეხურიანი ნახევრად ავტომატური გადაცემათა კოლოფი. მათ შორის მაბრუნი მომენტის გადაცემას კი ორდისკოიანი გადაბმის ქურო უზრუნველყოფს.

დიზაინერებმა ”გრანიტისთვის” საკმაოდ ორიგინალური ინტერიერი შეიმუშავეს, რომელიც ალბათ, კონვეიერამდე უცვლელად ვერ მიაღწევს. აქ ყურადღებას მართვის მექანიკური საშუალებები იქცევს, რომლებიც თვითმფრინავის ანალოგიურ ელემენტებს მოგაგონებთ. მაგალითად, ორსაყრდენიანი საჭის რგოლი, რომელიც ამ ორი საყრდენი-წკირის გამო, უფრო საავიაციო შტურვალს ჰგავს. უჩვეულოა გადაცემათა კოლოფის გადამრთველიც - ბერკეტის ნაცვლად მის ადგილზე ერთგვარი ჯოისტიკია. ხელსაწყო-მაჩვენებლების დაფა კი მხოლოდ საჭის რგოლის სიმაღლეზე, ერთ პარალელზეა განთავსებული. კონცეპტუალური მოდელის შესაბამისია სავარძლებიც, რომლებიც წარმოების დაწყებამდე აუცილებლად დაკარგავს ორიგინალობას და ”მოსაწყენ” დიზაინს მიიღებს.

სავარაუდოდ, ”გრანიტის” წარმოებას GMC მერმის დაიწყებს. ამასთან, ”ჯენერალ მოტორსის” ტრადიციის შესაბამისად, ამავე ავტომობილს ავტომწარმოებლის სხვა ბრენდებიც გამოუშვებენ.

დეტროიტის ავტო შოუ

”ფოლკსვაგენმა” კომპაქტური კუპე წარმოადგინა

12 იანვარი

შარშან ”ფოლკსვაგენმა” საზოგადოებას არაერთი სიახლე უჩვენა, რომელთაგან ზოგი მაშინვე დადგა კონვეიერზე, ზოგს კი წარმოების პერსპექტივა აქვს. თუმცა, ვოლფსბურგელთა აქტივობა ამით არ მცირდება. უფრო მეტიც, არსებობს მოსაზრება, რომ წელს გერმანული გიგანტი კიდევ უფრო მეტ სიახლეს გვიჩვენებს.

ამ სიახლეთაგან კი პირველი მერცხალი ახალი კომპაქტური კუპეა, რომლის ხილვაც ამ დღეებში დეტროიტის ავტო შოუს დამთვალიერებლებს შეუძლიათ. არსებობს იმის ვარაუდი, რომ ამ ავტომობილის წარმოების დაწყების შემდეგ, მას ”ჯეტა კუპეს” დაარქმევენ. ამ ვარაუდის საფუძველს ის ფაქტი იძლევა, რომ ავტომობილი კომპაქტურ სედან ”ჯეტას” ბაზაზეა აგებული.

დეტროიტში გამოფენილი კომპაქტური კუპეს სიგრძე 4.54 მეტრი, სიგანე 1.78 მეტრი, სიმაღლე კი 1.41 მეტრია. რაც მთავარია, ის ჰიბრიდული ძალური დანადგარითაა აღჭურვილი - კაპოტქვეშ განლაგებულია TSI სერიის 1.4-ლიტრიანი ტურბოძრავი, რომელიც 150 ცხენის ძალას იძლევა. მასთან უნისონში მუშაობს 27-ცხენისძალიანი ელექტროძრავი, რომელსაც ენერგიით ლითიუმ-იონური აკუმულატორების ბლოკი კვებავს. შიდაწვის ძრავთან 7-საფეხურიანი გადაცემათა კოლოფია (DSG) დაკავშირებული.

”ფოლკსვაგენი” აცხადებს, რომ კომპაქტურ კუპეს მარტო ელექტროძრავითაც შეუძლია გადაადგილება, თუმცა ამ რეჟიმში მოძრაობისას, სვლის სიშორე არ კონკრეტდება. არც ისაა ცნობილი, თუ რა დროს სჭირდება აკუმულატორების სრულად დამუხტვას.

სამაგიეროდ, პრეს რელიზში მითითებულია, რომ 100 კილომეტრის გასავლელად, კომპაქტური კუპე მხოლოდ 4.2 ლიტრ ბენზინს მოიხმარს, ყოველი კილომეტრის გავლისას კი ის ატმოსფეროს მხოლოდ 98 გრამი ნახშირორჟანგით აბინძურებს. და ეს იმ დროს, როდესაც ავტომობილი საკმაოდ ტემპერამენტიანია - ადგილიდან 100 კმ/სთ სიჩქარეს ის 8.1 წამში კრეფს, მისი მაქსიმალური სიჩქარე კი 227 კმ/სთ-ს აღწევს.

”ფოლკსვაგენის” სამოდელო გამაში, ახალი კომპაქტური კუპე ”სიროკოსა” და CC-ს შორის ნიშას შეავსებს. მოსალოდნელია, რომ თავიდან ის მხოლოდ აშშ-ის ბაზარზე გაიყიდება, თუმცა მოგვიანებით, ის ევროპისა და სხვა რეგიონების ბაზრებზეც გამოჩნდება.

დეტროიტის ავტო შოუ

”ლანჩა დელტა” ”კრაისლერის” სახელით

12 იანვარი

დეტროიტში გახსნილ საავტომობილო შოუზე, ”კრაისლერმა” თავისი ევროპელი პარტნიორის, ”ფიატის” ჯგუფში შემავალ იტალიურ კომპანია ”ლანჩას” პოპულარული ჰეჩბეკი ”დელტა” საკუთარი ბრენდით წარმოადგინა. როდის დაიწყებს ამერიკული კომპანია ამ ავტომობილის სერიულ წარმოებას, ჯერ გადაწყვეტილი არაა.

სამაგიეროდ ცნობილია, რომ ”კრაისლერის” რესტრუქტურიზაციის გეგმის შესაბამისად, ამერიკული კომპანიის ზოგიერთი მოდელი მალე ევროპაში ”ლანჩას” მარკით დაიყიდება და პირიქით, იტალიური კომპანიის პოპულარულ მოდელებს, ”კრაისლერი” საკუთარი ემბლემით გაჰყიდის. ამგვარი გაცვლის შედეგად, ”კრაისლერის” სამოდელო გამა ხუთიდან შვიდ ავტომობილამდე გაიზრდება, ”ფიატი” კი თავის ჯგუფში შემავალი ბრენდების გაყიდვებს გაზრდის.

”ლანჩასთან” პარტნიორობა ”კრაისლერს” ევროპის ბაზარზე შეღწევაში გამოადგება. ამისათვის ის ”ლანჩას” სადილერო ქსელს გამოიყენებს. ამასთან, მინივენი ”კრაისლერ ვოიაჯერი” ”ლანჩა ფედრას” შეცვლის, მომდევნო თაობის ”კრაისლერ 300C” კი ევროპაში ”ლანჩა თეზისის” სახელით გაიყიდება. ამ ორი ბრენდის კიდევ ერთი საერთო მოდელი კომპაქტური ქროსოვერი გახდება, რომელიც ევროპისა და აშშ-ის ბაზრებზე შესაბამისად, ”ლანჩას” და ”კრაისლერის” მარკებით გაიყიდება.

პარალელურად, ”დოჯის” ავტომობილები ამიერიდან ევროპაში ”ფიატის” ემბლემით გაიყიდება. ამერიკული კომპანიის ერთადერთი ბრენდი, რომელიც ამერიკაშიც და ევროპაშიც ავტომობილებს საკუთარი ემბლემით გაჰყიდის, ”ჯიპია”, რომელიც კვლავაც მხოლოდ უგზოობის ავტომობილების წარმოებას გააგრძელებს.

”დელტას” კრაისლერისეული ვერსია, ამერიკული კომპანიის უახლესი, ეგრეთ წოდებული მსოფლიო ძრავითაა აღჭურვილი, რომელსაც 4 ცილინდრი აქვს და რომლის მუშა მოცულობაც 2.4 ლიტრია. ა, აგრეგატის სიმძლავრე 190 ცხენის ძალას აღწევს. ”კრაისლერის” წარმომადგენელთა განცხადებით, ეს ძრავი, ანალოგიური ლიტრაჟის აგრეგატთან შედარებით, უფრო მძლავრიცაა და ეკონომიურიც.

ალ-ატიამ საინსთან ჩამორჩენა შეამცირა

დაკარის რალი-რეიდი

12 იანვარი

დაკარის რალი-რეიდზე, რომელიც სამხრეთ ამერიკაში, არგენტინისა და ჩილეს მიწაზე მიმდინარეობს, ”ფოლკსვაგენის” საქარხნო გუნდს ბადალი არ ჰყავს. რეიდის მეცხრე ეტაპიც გერმანული კომპანიის ეკიპაჟის გამარჯვებით დასრულდა და რბოლის კლასიფიკაციაშიც, პირველი სამი ადგილიც მის ეკიპაჟებს აქვთ ოკუპირებული.

რბოლას კლსაიკურ რალიში მსოფლიოს ორგზის ჩემპიონი, ესპანელი კარლოს საინსი ლიდერობს, თუმცა მისთვის გამარჯვების იოლად დათმობას არ აპირებს ყატარელი ნასერ ალ-ატია, რომელმაც მეცხრე ეტაპი სოლიდური უპირატესობით მოიგო და ლიდერ თანაგუნდელთან ჩამორჩენა 8 წუთამდე შეამცირა.

კოპიაპოდან ლა სერენამდე 338-კილომეტრიანი გზა ალ-ატიამ 1 საათში, 59 წუთსა და 28 წამში გაიარა და საინსს 5 წუთით და 59 წამით აჯობა. ეს ყატარელი მრბოლის მიერ წლევანდელ დაკარზე მოგებული მესამე, კარიერაში კი მეექვსე ეტაპია.

”გუშინდელი ეტაპის შემდეგ ვთქვი, რომ დღეს საინსთან მინიმუმ ექვსი წუთი უნდა მომეგო, რათა პირველობისთვის ბრძოლის შანსი შემენარჩუნებინა. მთავარი კი ისაა, რომ მას დღესაც რომ გაეზარდა ჰანდიკაპი, მაშინ გუნდი მას ლიდერად მიიჩნევდა და მითითებების მოცემას დაიწყებდა, რაც საბოლოო გამარჯვების იმედებს გადამიწურავდა. ახლა კი ბრძოლა გრძელდება და იმედი მაქვს, რომ გუნდი არანაირად არ შემზღუდავს”, - ამბობს ალ-ატია, ვისაც იმედი აქვს, რომ მეათე ეტაპზე კვლავ შეძლებს ჩამორჩენის შემცირებას.

მეათე ეტაპზე, რბოლის მონაწილეებს კლასიკური რალის სპეცმონაკვეთის მარშრუტის გავლა უწევთ და რაც მთავარია, გზა ქვიშიანი არ იქნება. ეს კი იმას ნიშნავს, რომ მოწინავე ეკიპაჟს, რომელსაც გზის გაკვალვა მოუწევს, პრობლემები ნაკლებად ექნება.

ავტოინდუსტრიის ტენდენციები 2010 წელს

10 იანვარი

რენოს ელექტრონული ოთხი მუშკეტერი (მარცხნიდან): ფლუენსი, ტვიზი, კანგუ და ზოი

..........................................................

ახალი წლის დადგომისთანავე, აქტუალური გახდა კითხვა - რა ტენდენციებია მოსალოდნელი საავტომობილო ინდუსტრიაში - გაგრძელდება შარშანდელი ტენდენციები, თუ რამე რევოლუციურად ახალია მოსალოდნელი? პირდაპირ შეიძლება ითქვას, არავითარი რევოლუცია, ხმაურიანი დებიუტები კი ალბათ მრავლად იქნება. ბაზარზე გაყიდვების მოცულობის ზრდას ელიან, თუმცა ბევრი მწარმოებელი ფრთხილ პროგნოზებს აკეთებს და თვლის, რომ ამ მხრივ, წელსაც ბევრი სიძნელის გადალახვა მოუწევთ.

მთავარი ტენდენცია კი ეკოლოგიაზე ზრუნვა და ახალი ტექნოლოგიების დანერგვა უნდა იყოს, რაშიც უპირველეს ყოვლისა, ჰიბრიდული ტექნოლოგიების განვითარება და ბაზარზე ელექტრომობილების გამოჩენა მოიაზრება. ასე განსაჯეთ, დეტროიტის საერთაშორისო გამოფენის ორგანიზატორებმა, კობო სენტერში სპეციალური ”ელექტრუნული ბულვარიც” კი მოამზადეს, რომელზეც ორ ათეულზე მეტი ელექტრო და ჰიბრიდული ავტომობილის პრემიერა გაიმართება.

ჰონდა CR-Z

.................................

გავიხსენოთ გასული წლის ბოლო დიდი ავტოგამოფენის ყველაზე გამორჩეული ექსპონატები: ელექტრული ”ფოლკსვაგენ Up!”, ელექტრონული ”სმარტი”, ”მინი E”, ”აუდი E-ტრონი” და ”რენოს” ოთხი ელექტრონული მუშკეტერი (ტვიზი, ზოი, კანგუ და ფლუენსი) - ყველა მათგანს მამოძრავებელ ძალას ელექტროძრავი ანიჭებს. უფრო ადრე, ”ნისანმა” საზოგადოებას ელექტრონული ”ლიფი” უჩვენა, ცოტა მოგვიანებით კი, ტოკიოს ავტო შუზე, საზოგადოება ასევე ელექტრონული და მეტად უცნაური ”ლენდ გლაიდერით” გააკვირვა.

”მიცუბიშიმ” უკვე დაიწყო თავისი მიკრო ელექტრომობილის, i-MiEV-ის მცირესერიული წარმოება და მისი წარმოების ტექნოლოგია თავის ფრანგ პარტნიორ ”პეჟო სიტროენს” გაუზიარა. ეს ორი კომპანია კი i-MiEV-ის ბაზაზე, მალე ამ ელექტრომობილის საკუთარი ვერსიის წარმოებას შეუდგება. ამ ტრენდს არც შვედური ”ვოლვო” ჩამორჩება, რომელიც ამ დღეებში, დეტროიტის შოუზე, ჰეჩბეკ С30-ის ელექტრონულ ვერსიას წარადგენს.

შევროლე ვოლტი

.......................................

სწრაფად ვითარდება ჰიბრიდული ავტომობილების ბაზარიც. აქ უდავო ლიდერი ”ტოიოტაა”, რომლის ჰიბრიდული პრიუსუც იაპონიაში ყველაზე გაყიდვადი ავტომობილია. მართალია, გასული წლის დასაწყისში, ამ ავტომობილს სერიოზული კონკურენტი გამოუჩნდა ”ჰონდა ინსაითის” სახით, მაგრამ საბოლოოდ, უფრო ეკონომიურმა ”პრიუსმა” ახალგამომცხვარი მეტოქე უკან ჩამოიტოვა (გაყიდვების მოცულობით).

მაგრამ ჰიბრიდების ბაზარზე, მალე რამდენიმე ახალი მოთამაშე გამოჩნდება, რომელთაგან ყველაზე გამორჩეული ალბათ ”შევროლე ვოლტი” იქნება, რომლის ძირითადი მამოძრავებელიც ელექტროძრავია, შიდაწვისძრავი კი მასში ელექტროენერგიის გამოსამუშავებლად გამოიყენება. ეს ახალი სიტყვაა ჰიბრიდულ კლასში და ”ჯენერალ მოტორსი” იმედოვნებს, რომ ”ვოლტის” დახმარებით, მის იმიჯს, როგორც ხარჯიანი ავტომობილების მწარმოებლისას, ყველა მალე დაივიწყებს.

ნისან ლენდ გლაიდერი

......................................................................

ჰიბრიდული ავტომობილების წარმოებას მალე პრემიუმ კლასის ავტომობილების მწარმოებლებიც დაიწყებენ. ჩვენ უკვე გაგაცანით ”ბეემვეს” ორი ჰიბრიდული მოდელი, რომლებიც მე-7 სერიის სედანსა და ქროსოვერ X6-ზეა ბაზირებული. ამ ორ ავტომობილს ჯერჯერობით შეიძლება თავისუფლად ვუწოდოთ მსოფლიოში ყველაზე მძლავრი ჰიბრიდები. თუმცა, მათ მალე ამ წოდებას ”ფერარის” ჰიბრიდული 599 წაართმევს. თუმცა, ისიც უნდა ითქვას, რომ ეს ეგრეთ წოდებული ”მსუბუქი ჰიბრიდი” იქნება. ანუ, მასში მთავარ აგრეგატად ისევ შიდაწვის ძრავი დარჩება, რომელსაც ენერგიის დაზოგვაში, ფორმულა ერთიდან მოსული სისტემა კერს-ი (კინეტიკური ენერგიის რეკუპერაციის სისტემა) დაეხმარება.

თავიანთ მყიდველებს ჰიბრიდულ სპორტულ ავტომობილებს მალე შესთავაზებენ ”სუბარუ”, ”ნისანი” და ”ჰონდა”. ამასთან, ეს უკანასკნელი წელსვე დაიწყებს ჰიბრიდული CR-Z-ის წარმოებას. ჰო, ჰიბრიდულ მოდელებს ასევე გამოუშვებენ ”ბენტლი”, ”მერსედეს ბენცი”, ”ლამბორგინი” და ”როლს როისიც” კი. მოკლედ, ამ ტიპის ავტომობილების სეგმენტში ნამდვილი ბუმის მოსალოდნელი.

ტოიოტა პრიუსი

...........................................

თუმცა, როგორც კი ლითიუმ-იონური აკუმულატორების ფასი მნიშვნელოვნად შემცირდება, მოსალოდნელია, რომ ჰიბრიდულ ავტომობილებს მალე ელექტრომობილები დაჩრდილავს. სხვათა შორის, აკუმულატორების სიძვირის წამალი ”რენოსა” და ”ნისანს” უკვე მოფიქრებული აქვთ - პროექტ ”ბეტერ პლეისის” ფარგლებში, ეს ორი კომპანია თავიანთი ელექტრომობილებისთვის გასაღების მნიშვნელოვან ბაზარს მიიღებს.

კიდევ ერთი მნიშვნელოვანი მოვლენა, რაც წელსაა მოსალოდნელი, ჩინური ავტოინდუსტრიის შემდგომი აღზევებაა. ჯერ ერთი, ჩინური ბაზარი მალე ალბათ მსოფლიოს უდიდესი ბაზრის სტატუსს მოიპოვებს და ამერიკისას გადაასწრებს. მეორეც, ჩინური კომპანიები სწორედ წელს დაიწყებენ საზღვარგარეთ ექსპანსიას. ამ მიმართულებით გადადგმული პირველი ნაბიჯი, ჰოლდინგ ”ჟეძიან ჯილის” მიერ შვედური ”ვოლვოს” გამოსყიდვაა.

”ფორდი” აცხადებს, რომ ”ვოლვოში” წილის შენარჩუნებას არ აპირებს, თუმცა ჩინელთა ხელში გადასულ შვედურ კომპანიასთან პარტნიორულ თანამშრომლობას კვლავაც გააგრძელებს. ეს კი ”ჯილისთვის” უცხოურ ბაზრებზე შეღწევისთვის საუკეთესო პლაცდარმი იქნება.

ცოტა ხნის წინ, ”ბეიძინ აუტომოტივმა” ”ჯენერალ მოტორსისგან” კიდევ ერთი შვედური კომპანიის, ”სააბის” ორი მოდელის, 9-5-ისა და 9-3-ის ინტელექტუალური საკუთრება, საწარმოო ხაზებთან ერთად გამოისყიდა. ეს კი იმას ნიშნავს, რომ მალე ამ ავტომობილებს ”ბეიძინ აუტომოტივი” გამოუშვებს.

კვლავ გაგრძელდება კომპანიების გაერთიანებებისა და ერთი კომპანიის მიერ მეორის შესყიდვების პროცესი, თუმცა ამ ტენდენციას უფრო კლების პერსპექტივა აქვს, რადგან ამ მიმართულებით, საერთაშორისო ბაზარზე ძირითადი რესურსი პრაქტიკულად ამოწურულია - შარშან უკვე დაფიქსირდა ”ფიატის” და ”კრაისლერის” ალიანსი, ”პორშე” თავისი ნათესავი ”ფოლკსვაგენის” ჯგუფს შეუერთდა, ”ჰამერი” ჩინური ”ტენჭონის” კუთვნილება გახდა, ”ვოლკსვაგენმა” და ”სუზუკიმ” აქციების პაკეტები გაცვალეს და სტრატეგიული ალიანსი შექმნეს.

წელს მოსალოდნელია ”ფორდის” მიერ ”ჯილისთვის” ”ვოლვოს” მიყიდვის პროცესის დასრულება. ასევე საბოლოო სახეს მიიღებს გარიგება ”ჯენერალ მოტორსსა” და BAIC-ს შორის. ასევე მოსალოდნელია ”ვოლკსვაგენის” ოჯახში სატვირთო ავტომობილების მწარმოებელი MAN-ის შესვლა. დაბოლოს, ყველაზე მსხვილი გარიგება ”პეჟო სიტროენსა” და ”მიცუბიშის” შორის უნდა შედგეს, რომლის შედეგადაც, იაპონური კომპანია ფრანგული გიგანტის ნაწილი გახდება და ამით, ლოგიკურად გაგრძელდება ამ ორი მწარმოებლის მრავალწლიანი პარტნიორობა.

”მონტევერდი” – ”ფერარიზე” განაწყენებით შექმნილი კომპანია

10 იანვარი

ალბათ, ავტომოყვარულების დიდმა ნაწილმა იცის სპორტულ სუპერ ავტომობილების მწარმოებელ კომპანია ”ლამბორგინის” დაარსების ისტორია - ფერუჩო ლამბორგინიმ ის ენცო ფერარიზე განაწყენებულმა დააარსა და მიზნად კომენდატორეს დაჩრდილვა დაისახა. დაჩრდილვისა რა გითხრათ, მაგრამ მისი გვარის მატარებელი ფირმა ისეთ მანქანებს უშვებს, რომლებსაც ბევრი ნატრობს და ცოტა ყიდულობს.

ბევრმა როდი იცის, რომ ფერუჩო ერთადერთი ბიზნესმენი როდია, რომელმაც ავტომობილების წარმოებას, ფერარიზე გულმოსულმა მიჰყო ხელი. იტალიური წარმოშობის შვეიცარიელ პეტერ მონტევერდისაც თითქმის ანალოგიური ისტორია აქვს. 12 წლის განმავლობაში, ის შვეიცარიაში ”ფერარის” ავტომობილების გავრცელებაზე მუშაობდა.

მაგრამ შემდეგ, ენცო ფერარიმ მას ერთდროულად 100 ავტომობილის შეძენა მოსთხოვა და თან ისე, რომ მათი ფასი წინასწარ უნდა გადაეხადა. მონტევერდის ამის საშუალება შეიძლება ჰქონდა კიდეც, მაგრამ კომენდატორესგან ასეთი უსამართლობა ვერ მოითმინა და ლამბორგინის მსგავსად, მანაც საკუთარი ავტომობილების წარმოება გადაწყვიტა.

უნდა ითქვას, რომ მონტევერდი ამ საქმეში საკმაოდ გაწაფული საქმოსანი იყო - თავისი გვარის მატარებელი ფირმის შექმნამდე, MBM-ის სახელით ის ერთადგილიან სარბოლ და ტურიზმის კლასის სპორტულ ავტომობილებს წლების განმავლობაში ამზადებდა. 1967 წელს კი მან გამოუშვა ავტომობილი სახელწოდებით ”მონტევერდი 375S”, რომელიც მეტად მიმზიდველი და ორიგინალური დიზაინით გამოირჩეოდა.

ლუქსის კლასის ამ კუპეს დიზაინი ცნობილმა დიზაინერმა პიეტრო ფრუამ შეიმუშავა, რომელიც თავადაც აწარმოებდა ექსკლუზიურ ავტომობილებს. ავტომობილი ”კრაისლერის” წარმოების 375-ცხენისძალიანი ძრავით აღიჭურვა, უკანა საკიდრად კი მან დე დიონის სისტემა (იმ დროისთვის უკვე საკმაოდ მოძველებული) მიიღო.

”ფერარის” ავტომობილებისგან განსხვავებით, ”მონტევერდის” პირველი მანქანა უფრო ხნიერი მომხმარებლისთვის იყო განკუთვნილი და ამიტომ, ოპციის სახით, ფირმა მყიდველს ავტომატურ ტრანსმისიასაც სთავაზობდა. ყოველივეს მიუხედავად, ”მონტევერდი” თავის ბაზელის ქარხანაში წლიურად 50 ცალ 375S ამზადებდა.

”მონტევერდის” ისტორიაში კი ერთ-ერთ ყველაზე გამორჩეულ ქმნილებად ასევე სპორტული ”ჰაი 450 SS” (ჰაი გერმანულად ზვიგენს ნიშნავს) იქცა. იმ დროს, სპორტული ავტომობილების ბაზარზე მოდაში ძრავის შუა განლაგება იქცა, რაც ფორმულა 1-ის აშკარა გავლენა იყო. ”მონტევერდიმაც” ჩამორჩენა არ ისურვა და ”ჰაი 450 SS-ზე” ძრავი სწორედ შუაში განალაგა. ავტომობილის შექმნაში, თავად პეტერ მონტევერდის გარდა, მონაწილეობა ატელიე ”ფისორეს” დიზაინერმა ტრევორ ფიორემაც მიიღო.

”ზვიგენი” ძალიან მოკლებაზიანი და განიერ კვალიანი გამოვიდა. ბაზის დამოკლებას ხელი იმ გარემოებამ შეუწყო, რომ ძრავი ლამის სალონში, ორად ორ სავარძელს შორის განთავსდა. ეს კი არამარტო იმ დროის, არამედ საერთოდ, ავტოინდუსტრიის ისტორიაში არგაგონილი გადაწყვეტა იყო.

”მონტევერდიმ” ეს ძრავიც, სერია ”ჰემიდან”, ”კრაისლერისგან” აიღო. აგრეგატი 450 ცხენის ძალას ავითარებდა, რაც ავტომობილის სახელწოდებაშიც აისახა. აგრეგატი ფოლადის კუთხოვანი მილებისგან შეკრულ ჩარჩოზე ხისტად მაგრდებოდა. საკიდარი წინ და უკან განსხვავებული იყო. წინ თუ რხევების ჩაქრობას ჩანგლის ტიპის წყვილები და მათტან დაკავშირებული დრეკადი ელემენტები უზრუნველყოფდა, უკან ისევ ეგზოტიკური დე დიონი დარჩა. ავტომობილის დამუხრუჭებას კი დისკოსებრი, ვენტილირებადი სისტემა უზრუნველყოფდა.

ძარა ”ფისორემ” თავის იტალიურ საწარმოში დაამზადა. ეს ნაკლებად ცნობილი ატელიეც 50 პროცენტით მონტევერდის ეკუთვნოდა. გამოუცდელ სტუდიასთან თანამშრომლობის შედეგი ის იყო, რომ ავტომობილი საკმაოდ მძიმე გამოვიდა - ის 1290 მკგ-ს იწონიდა. თუმცა, მძლავრი ძრავის წყალობით, მას ადგილიდან 100 კმ/სთ სიჩქარის 5 წამზე ნაკლებში აკრეფა შეეძლო.

”მონტევერდიმ” ეს ავტომობილი პირველად საზოგადოებას ჟენევაშუ უჩვენა. 1970 და 1971 წლებში, 450 SS კიდევ რამდენიმე გამოფენაზე გამოჩნდა და ყოველთვის, მასზე რაღაც, უმნიშვნელო დეტალი იყო შეცვლილი. 1971 წლის დეკემბერში, ეს ავტომობილი, როგორც იქნა, გაიყიდა. თითქოს, ფირმა მეტის დამზადებას აღარც აპირებდა, მაგრამ ორი წლის შემდეგ, კიდევ ერთი ”ზვიგენი” დამზადდა. ოღონდ, მას GTS უწოდეს. ესეც ”კრაისლერის” იმავე ძრავით იყო აღჭურვილი, ოღონდ უფრო გრძელი ბაზა ჰქონდა და ალუმინის ბორბლებზე იდგა.

17 წელი გავიდა, სანამ ”მონტევერდი” მესამე ”ზვიგენს” დაამზადებდა. ამჯერად, მონტევერდიმ კარბონიც გამოიყენა და ძარა ისევ გრძელ ბაზაზე დასვა. 1992 წელს ბოლო ”ჰაი” დამზადდა, ოღონდ იმ ძველი მანქანისა ამას მხოლოდ სახელიღა ჰქონდა. თანაც, იმ დროისთვის, ფირმა ”მონტევერდი” უკვე რვა წლის გაუქმებული იყო.

ბოლო ”ზვიგენს” საფუძვლიანად შეცვლილი ძარა, შასი და ”კოსუორტის” ფორმულა 1-ის ძრავი ჰქონდა.

უნდა ითქვას, რომ ყოველი ”ჰაი” სრულიად განსხვავებული ავტომობილი იყო. მონტევერდის მისი სერიული წარმოების დაწყება არც უფიქრია. თუმცა დროდადრო, მის დახვეწაზე უარს არ ამბობდა. ისე კი, თუ ვინმე ”ჰაის” შეკვეთას ისურვებდა, მონტევერდი ყველაფერს ცდილობდა, რომ შემკვეთს საბოლოო არჩევანი მოდელ 375S-ზე შეეჩერებინა. და ეს კარგად გამოსდიოდა.

ცოტა უცნაურია, მაგრამ ფაქტია, რომ პირველი პროტოტიპის გარდა, ”მონტევერდის” ამ ავტომობილის სხვა მოდიფიკაციები არც გაუყიდია. პეტერ მონტევერდი ცოცხალი აღარაა, მისი ”ზვიგენები” კი დღესაც მისი ფირმის საწარმოში დგას, რომელიც მუზეუმადაა გადაკეთებული...

რაც შეეხება იმ ერთადერთ გაყიდულ ”ზვიგენს”, ის 1971 წლის დეკემბერში, ვინმე კარლ-ჰაინც შუბერტზე გაიყიდა და მას შემდეგ, რამდენიმე მფლობელი გამოიცვალა. ბოლოს ის ამერიკელი ნორბერტ მაკნამარას ხელში აღმოჩნდა, რომელმაც საკმაოდ შელახულ მდგომარეობაში მყოფი ავტომობილი ატელიე ”ფისორეს” შეაკეთებინა და ოქროსფრად შეაღებინა. ათი წლის შემდეგ, ავტომობილი მანაც გაყიდა და მისმა ახალმა მფლობელმა, მას ძველი ფერი დაუბრუნა.

”ბონჰემის” რეტრომობილების აუქციონის სპეციალისტთა შეფასებით, ”ჰაი 450 SS-ის” ამ ეგზემპლარის ფასი 400 000-500 000 გირვანქა სტერლინგია.

”სააბის” ყიდვა ფორმულა 1-ის ბოსსაც მოუნდა

F1 boss Ecclestone joins Saab bidders

8 იანვარი

”სააბის” შეძენის მოსურნეთა რიგებს ფორმულა 1-ის კომერციულ უფლებათა ბატონ-პატრონი, ბრიტანელი მილიარდერი (ფორბსის შეფასებით, მისი ქონება 3.7 მილიარდ დოლარს შეადგენს) ბერნი ეკლსტოუნიც (სურათზე) შეუერთდა. ეკლსტოუნთან ერთად, ”ჯენერალ მოტორსს” შვედური კომპანიის გამოსყიდვის განაცხადი ლუქსემბურგულმა საინვესტიციო ფონდმა ”ჯენიი კეპიტალზმაც” წარუდგინა.

მართალია, ახალი წლის შემდეგ, ამერიკულმა კომპანიამ თავისი შვედური შტოს გამოსყიდვაზე სამი ახალი შეთავაზება მიიღო, მაგრამ ”გენერლები” მაინც ”სააბის” საქმიანობის შეჩერერბაზე ფიქრობენ, რისთვისაც საკონსულტაციო ფირმები მოიწვიეს.

თუმცა ეკლსტოუნი და ”ჯენიი კეპიტალზი” იმედოვნებენ, რომ ერთობლივი ძალისხმევით, ამერიკელებს განზრახვას გადააფიქრებინებენ და ”სააბის” აქციების საკონტროლო პაკეტს დაეუფლებიან.

”ჩვენ გვჯერა, ”სააბს”, როგორც საერთაშორისო ბრენდს, თავისი ღირებულება შენარჩუნებული აქვს და რიგ წამყვან ბაზრებზე კვლავაც პოპულარობით სარგებლობს. როგორც ინოვატორ კომპანიას, მას განვითარების კარგი პერსპექტივა გააჩნია და ყველაფერს ვეცდებით, რომ ეს პოტენციალი გამოუყენებელი არ დარჩეს”, - ნათქვამია ”ჯენიი კეპიტალზის” ოფიციალურ რელიზში.

სხვათა შორის, ახლახანს, ”ჯენიი კეპიტალზმა” ”რენოს” ფორმულა 1-ის გუნდის აქციების საკონტროლო პაკეტი გამოისყიდა. გამორიცხული არაა, რომ ამ გარიგებაში, ლუქსემბურგულ კომპანიასთან ერთად, ეკლსტოუნიც არის გარეული. ცნობისათვის, ეკლსტოუნისა და ”ჯენიი კეპიტალზი” საინვესტიციო აქტივობას კოორდინაციას შვედი ინვესტორი ლარს კარლსტრიომი უწევს. მისი თქმით, ”სააბის” შეძენის შემთხვევაში, მის ჯგუფს წამყვანი ევროპული ბანკებიდან კრედიტების მოზიდვა აქვს გადაწყვეტილი, მოზიდულ თანხას კი კომპანიის განვითარებისთვის გამოიყენებენ.

საინტერესოა ისიც, რომ ”სააბის” შეძენა კიდევ ერთ ისეთ კომპანიას სურს, რომელიც ორი წლის წინ, თავადაც მონაწილეობდა ფ1-ის მსოფლიო ჩემპიონატში. ესაა ჰოლანდიური ”სპაიკერი”, რომელსაც კანადელი მილიარდერი ვიქტორ მიულერი (ეს კაცი წარმოშობით ყოფილი საბჭოეთიდანაა) ფლობს.

”სააბის” შეძენა ასევე სურს შვედურ კონსორციუმს, რომელსაც სათავეში ”სააბის” აეროკოსმოსური შტოს ყოფილი აღმასრულებელი და შვედეთის თავდაცვის სამინისტროს ყოფილი მაღალი მოხელე, იან ნიგრენი უდგას.

”ჯენიი კეპიტალზი” აცხადებს, რომ ”სააბის” დაუფლების შემთხვევაში, ამ კომპანიებს სხვა კომპანიებთან პარტნიორული თანამშრომლობით განავითარებს. აქცენტი კი ეკონომიური ძრავებისა და ეკოლოგიურად სუფთა ტექნოლოგიების განვითარებაზე გაკეთდება.

მართალია, ამ ეტაპზე ”ჯენერალ მოტორსში” ყველაზე რეალურად ”სააბის” დახურვას თვლიან, მაგრამ ხელსაყრელი შეთავაზების შემთხვევაში, ამერიკული კომპანია ”სააბს” გაჰყიდის. ამიტომ, ”გენერლები” ახლა სწორედ ამ შემოთავაზებათა შესწავლაში არიან.

”ჯენერალ მოტორსის” მთავარი აღმასრულებელი ედ უაითექრი ამბობს, რომ მას ეჭვი ეპარება ახალ შემოთავაზებათა რეალობაში, რისი მთავარი მიზეზიც ისაა, რომ ყველა მსურველს, ”სააბის” შესაძენად ფულის ბანკებიდან მოზიდვა აქვს გადაწყვეტილი, კრიზისის პირობებში კი დიდი კრედიტის აღება სერიოზულ პრობლემას წარმოადგენს.

მომავლის ”მერსედესს” გონება მართავს

Mercedes Benz Cyborg Sensation Concept

8 იანვარი

როდესაც ავტოდიზაინერები თავისუფალ კონცეპციებს ქმნიან, ყველაზე ხშირად თავიანთი ქმნილებისთვის რეალურ აგრეგატებს არჩევენ, თუმცა არანაკლებ ხშირია შემთხვევები, როდესაც მათი ფანტაზია ძრავებს და მართვის უჩვეულო საშუალებებსაც გასწვდება ხოლმე. და ამ დროს, შეიძლება ისეთი განსაზღვრებაც კი გაიგონოთ, რასაც თვით ნაცარქექია და ბარონი მიუნხჰაუზენიც კი ვერ შემოგთავაზებდათ...
ახალგაზრდა დიზაინერმა დერეკ ჩიკ კინმა მოამზადა კონცეპტუალური ”მერსედეს ბენც საიბორგ სენსეიშნ ვიჰაიქლი”, ავტომობილი, რომელიც თავისი გარეგნობითაც დანახვისთანავე იქცევს ყურადღებას. და სანამ მის აგრეგატს შევეხებოდეთ, გეტყვით, რომ დაახლოებით ასეთი ავტომობილი ევროპულ გზებზე 2040 წელს უნდა გამოჩნდეს. არ შეგეშინდეთ, ესეც კონცეპციის ავტორის ვერსიაა. ისე, შტუტგარტელები ასეთ მონსტრს კონვეიერს სიზმარშიც არასდროს გააკარებენ - ასეთი ავანგარდიზმი მათ არც ახლა ახასიათებს და ძნელი წარმოსადგენია, მომავალში შეიცვალონ ამ საკითხისადმი მიდგომა.

კონცეპციის მიხედვით, ავტომობილი ორადგილიანია და ალბათ არ გაგიკვირდებატ (მისი გარეგნობიდან გამომდინარე), თუ გეტყვით, რომ ის უგზოობის პირობებში თავს ისე იგრძნობს, როგორც თევზი წყალში. მაგრამ მთავარი არც ესაა. მთავარი ისაა, რაც სათაურში წერია!

ავტომობილს არც საჭის რგოლი აქვს, არც ჯოისტიკი და არც პედლები. რა საჭიროა ეს ყველაფერი, თუკი ადამიანს ”კიბორგული სენსაციის” მართვა გონების ძალითაც შეუძლია. როგორც ამბობენ, გონებით მექანიზმების მართვა მიღწევადი რამაა, მაგრამ ავტომობილში ასეთი სისტემის გამოყენება ბევრ სირთულესთან იქნება დაკავშირებული. თუმცა პროექტის ავტორს ეს სრულებით არ აშინებს.

ის შემდეგ აღწერილობას გვთავაზობს - მძღოლისთვის განკუთვნილია სპეციალური ჩაფხუტი, რომელსაც მისი აზრების წაკითხვა შეუძლია. ჩაფხუტის სენსორები ტვინის მიერ გამოცემულიმპულსებს იჭერენ და მათ კომპიუტერს გადასცემენ, რომელიც მიღებულ ინფორმაციას გადაამუშავებენ და მართვის სისტემებს ბრძანების სახით უგზავნიან.

მართვის სისტემის მუშაობის პრინციპის ასეთი ”დაწვრილებითი” აღწერა კარგია, მაგრამ პროექტში არაფერია ნათქვამი იმაზე, თუ რა ტიპის აგრეგატით აღიჭურვება ”კიბორგული სენსაცია”.

სამაგიეროდ, იბადება კითხვა. რა მოხდება იმ შემთხვევაში, თუ მძღოლს თვალი სხვა რამისკენ (ვთქვათ, ლამაზი ქალისკენ) გაექცევა და მართვაზე წამიერად მაინც არ იფიქრებს? ალბათ, კარგი არაფერი. თუმცა, სანამ ასეთი ავტომობილის წარმოების საკითხი დღის წესრიგში დადგება, გამომგონებლები ადამიანის ტვინს, წინასწარი დაპროგრამებული კიბერნეტიკული ტვინით, ან ადამიანისა და კიბერნეტიკული ტვინების ჰიბრიდით შეცვლიან...

”ტატა მეჯიკ ირისი” - ყველაზე ლამაზი მსოფლიოში

Tata Magic Iris

8 იანვარი

რა თქმა უნდა, პირიქითაა - ეს მიკრო ვენი შეიძლება მსოფლიოს უმახინჯეს ავტომობილადაც ჩაითვალოს. ის უფრო მახინჯია, ვიდრე მისი ცნობილი ნათესავი ”ნანო”, რომელიც მსოფლიოს უიაფესი ავტომობილის სტატუსს ატარებს. ”მეჯიკ ირისს” სხვა თვისებაც აქვს, რის გამოც ის შეიძლება დაცინვის ობიექტი გახდეს.

ჯერ ერთი, ის ნამდვილი ჯუჯაა. რამდენი კაცი შეძლებს მასში ჩაჯდომას? ინდურ კომპანიას, ნიუ დელის საავტომობილო შოუზე, ამის შესახებ არაფერი უთქვამს. საინტერნეტო გამოცემა ”აუტობლოგის” ცნობით, ”მეჯიკ ირისს” ხუთი ადამიანის გადაყვანა შეუძლია. ცნობილია, რომ ”მეჯიკ ირისი” 12-დუიმიანი საბურავებითაა აღჭურვილი.

ეგ კიდევ არაფერი - მამოძრავებელ ძალას მისთვის 0.661-ლიტრიანი დიზელის ძრავი გამოიმუშავებს, რომელიც წყლით გრილდება. ეს ძრავი სულ რაღაც 11 ცხენის ძალას გამოიმუშავებს, რაც საკმარისია მხოლოდ იმისათვის, რომ ავტომობილის მაქსიმალური სიჩქარე 54 კმ/სთ იყოს.

უცნაური ”ლამბორგინი”

8 იანვარი

აღმოსავლეთ ლონდონში მცხოვრებმა 32 წლის არქიტექტორმა ბენედიქტ რედკლიფმა უცნაური პროექტი განახორციელა - ფოლადის მავთულებისგან ერთ დროს პოპულარული ”ლამბორგინი კოუნტაჩის” რეპლიკა შექმნა. არქიტექტორის ქმნილება ზომებში ზუსტად ემთხვევა ორიგინალურ სუპერ კუპეს, თუმცა არც ძრავი გააჩნია, არც ტანსმისია და არც ინტერიერი.

ნახაზების შედგენას რედკლიფმა რამდენიმე კვირა მოანდომა, რაშიც მას ”ლამბორგინი” დაეხმარა. მალე კი, იტალიური კომპანიისგანვე, თავისი ჩანაფიქრის განხორციელების ოფიციალური ნებართვა აიღო. თავისი ჩანაფიქრის აწყობას კი ენთუზიასტმა ოთხი თვე მოანდომა.

აღსანიშნავია, რომ რედკლიფმა მავთულებით ”კოუნტაჩის” ყველა ფორმა გამოიყვანა. ასე განსაჯეთ, ბორბლებიც მავთულებისგან დაამზადა და მათ ”პირელის” წარწერაც გაუკეთა.

”ეს იკონური ავტომობილია, რომელსაც მნახველი ახლაც კი აღტაცებაში მოჰყავს. მართალია, ჩემი ”კოუნტაჩი” უმოძრაოა, მაგრამ ის ორიგინალურია. როცა ხალხი მას ხედავდა ლონდონის ქუჩებში, ბევრი მისაბმელზე ადიოდა და შიგნით ჩაჯდომას ცდილობდა. რა თქმა უნდა, ნამდვილ ”ლამბოს” ყოლას ვისურვებდი, მაგრამ ეს მანქანები ძალიან ძვირია. ამიტომ, მე ჩემებურად შევძელი საკუთარი ”ლამბოს” შექმნა”, - ამბობს რედკლიფი.

ცნობისათვის, ”კოუნტაჩს” ”ლამბორგინი” 1974-1989 წლებში აწარმოებდა და მისი მეშვეობით, ”ფერარის” სერიოზულ კონკურენციას უწევდა. რედკლიფი იმედოვნებს, რომ მავთულებით აწყობილ ”კოუნტაჩს” 40 000 გირვანქა სტერლინგად გაჰყიდის.

”ჰიუნდაის” ”ლურჯი სურვილი” დეტროიტში

Hyundai Blue-Will

8 იანვარი

დეტროიტის საავტომობილო შოუსთვის, კორეულმა კომპანია ”ჰიუნდაიმ” ჰიბრიდული მოდელი ”ბლიუ-ვილ” მოამზადა, რომელიც სავარაუდოდ, ამერიკულ ბაზარზე 2012 წელს გამოჩნდება. ეს პირველი ჰიბრიდული ავტომობილია, რომელიც კორეულმა კომპანიამ მოამზადა. თუმცა ჯერჯერობით გადაწყვეტილი არაა, ის მხოლოდ ამერიკის ბაზრისთვის შეიქმნა, თუ გლობალური ბაზრისთვის.

”ბლიუ-ვილი” აღჭურვილია მუდმივად ცვალებად ტრანსმისიასთან დაკავშირებული ბენზინის 1.6-ლიტრიანი ძრავით, რომლის ბლოკიც და ცილინდრების თავიც ალუმინისგანაა დამზადებული, საწვავი კი მას უშუალოდ წვის კამერაში მიეწოდება. შიდაწვის ძრავთან და ტრანსმისიასთან უნისონში 100-კილოვატიანი ელექტროძრავი მუშაობს.

აკუმულატორების ბლოკი და საწვავის ავზი უკანა სავარძლების ქვეშაა მოთავსებული, რითაც საბარგულში ადგილი ბარგისთვის გამოთავისუფლდა. ავტომობილის სახურავზე მზის ელემენტების პანელი მდებარეობს, რომელიც აკუმულატორებს მოძრაობის დროს, დამატებითი ენერგიით მუხტავს.

კორეული კომპანიის მიერ გამოქვეყნებული მონაცემების მიხედვით, ”ლურჯი სურვილს” მარტო ელექტროძრავით თითქმის 60 კილომეტრის გავლა შეუძლია. ჰიბრიდულ რეჟიმში მოძრაობისას, ავტომობილი 100 კილომეტრის გასავლელად 4.2 ლიტრ საწვავს მოიხმარს. ეგრეთ წოდებულ პლაგ-ინ რეჟიმში მოძრაობისას კი საწვავის ხარჯი 2.2ლიტრი/100 კმ-ის ექვივალენტურია.

”ფორდი” დეტროიტში ”მუსტანგ GT-ს” გამოფენს

Ford Mustang GT

8 იანვარი

დეტროიტის საავტომობილო შოუსთვის, ამერიკულმა კომპანია ”ფორდმა” თავის პოპულარულ მასკლ ქარის, ”მუსტანგის” ვერსია GT-ს (გრან ტურიზმო) მოდერნიზებული ვარიანტი მოამზადა.

განახლებული ვტომობილი 5.0-ლიტრიანი V8 ძრავითაა ეკიპირებული, რომელიც მაქსიმალურ 412 ცხენის ძალა სიმძლავრეს და 530 ნიუტონმეტრ მაბრუნ მომენტს ავითარებს. ეს აგრეგატი იმითაცაა საინტერესო, რომ ის თავის ანალოგებთან შედარებით, 20 პროცენტით ნაკლებს იწონის.

აღსანიშნავია, რომ ”ფორდი” მყიდველს კვლავ შესთავაზებს ”მუსტანგ GT-ს” ძველ ვერსიას, რომელიც 4.6-ლიტრიანი V8 აგრეგატითაა აღჭურვილი და 315 ცხენის ძალასა და 440 ნიუტონმეტრს ავითარებს.

ახალი ძრავის გარდა, განახლებული ”მუსტანგ GT” ახალი ტრანსმისიითაცაა აღჭურვილი. ამიერიდან, ძრავის მიერ გამომუშავებულ მაბრუნ მომენტს, 5-საფეხურიანის ნაცვლად, 6-საფეხურიანი კოლოფი გადაამუშავებს. მყიდველს შეუძლია აარჩიოს მექანიკური (MT82), ან ავტომატური (6R80) კოლოფი.

მწარმოებელი ჯერჯერობით არ აქვეყნებს განახლებული ავტომობილის დინამიკურ მახასიათებლებს. ჯერჯერობით ცნობილია მხოლოდ ის, რომ ახალი ”მუსტანგ GT” წინაზე სწრაფი და ტემპერამენტიანი იქნება. ცნობისათვის, ამ ავტომობილის უფრო სუსტი ვერსია ადგილიდან 100 კმ/სთ სიჩქარეს 5 წამში ავითარებს.

ასევე ცნობილია, რომ ”მუსტანგ GT-ს” ავტომატურკოლოფიანი ვერსია ქალაქში მოძრაობისას, 100 კილომეტრს 14 ლიტრი საწვავით გადის, ტრასაზე კი 9 ლიტრიც ჰყოფნის.