”ნისანმა” ელექტრომობილ ”ლიფის” ფასები გამოაქვეყნა

Nissan Leaf

25 მაისი

ეს ნამდვილი მოვლენაა - პირველად მსოფლიო ავტოინდუსტრიის ისტორიაში, ელექტრომობილის მასობრივად წარმოება იწყება. პიონერი კი ”ნისანია”, რომელმაც ახლახანს, თავის ელექტრომობილ ”ლიფის” ფასები და მისი გაყიდვების სტრატეგია გამოაქვეყნა.

დღეს მთელს მსოფლიოში, არაერთი პატარა თუ დიდი კომპანია აწარმოებს ელექტრომობილებს, მაგრამ წარმოების მოცულობა იმდენად მცირეა, რომ მათ გამო, ავტოინდუსტრიაში მომხდარ დიდ გარდატეხაზე ლაპარაკიც კი უხერხულია. ეს გარდატეხა კი რეალურად მაშინ დაიწყება, როდესაც ”ნისან ლიფი” იაპონური კომპანიის დილერთა შოურუმებში გამოჩნდება.

მოკლედ მსოფლიოს პირველი მასობრივი ელექტრომობილის შესახებ: ის ხუთკარიანი ჰეჩბეკია, რომელიც ევროპული კლასიფიკაციით C სეგმენტს, ეგრეთ წოდებულ ”გოლფ” კლასს შეესაბამება. პირველად ის შარშან, იოკოჰამაში გამოჩნდა და მაშინვე სპეციალისტების დიდი ყურადღება მიიქცია. განსაკუთრებით კი საინტერესო ის განცხადება იყო, რომლის შესაბამისადაც, ”ნისან ლიფი” დაახლოებით, თავისი კლასის შიდაწვისძრავიანი ავტომობილების ფასში გაიყიდებოდა.

”ნისან ლიფის” ელექტროძრავი 107 ცხენის ძალას და 280 ნიუტონმეტრს ავითარებს. ამასთან, მაქსიმალური მაბრუნი მომენტი მაშინვე მიიღწევა, როგორც კი ძრავი ამოქმედდება (ეს ელექტროძრავების თვისებაა). ამ ძრავის მეშვეობით, ”ლიფის” მაქსიმალური სიჩქარე 140 კმ/სთ-ს აღწევს, რაც საქალაქო ავტომობილისთვის სრულიად საკმარისია.

ელექტრომობილის ენერგიის წყარო ლითიუმ-იონური აკუმულატორების ბლოკია, რომელში დაგროვილი მუხტიც საკმარისია იმისათვის, რომ მანქანამ 160 კილომეტრი გაიაროს. ეს კი, იაპონური კომპანიის განცხადებით, სრულად დააკმაყოფილებს მსოფლიო ავტომფლობელთა 70 პროცენტზე მეტის ყოველდღიურ საჭიროებებს. აკუმულატორების სრული დამუხტვისთვის ”ნისან ლიფს” 8 საათი სჭირდება, მაგრამ სწრაფი დამუხტვის რეჟიმით, სულ ნახევარი საათია საკმარისი იმისათვის, რომ აკუმულატორები 80 პროცენტით დაიმუხტოს.

”ნისანმა” გამოაცხადა, რომ ევროპაში ელექტრომობილი ”ლიფი” პირველ რიგში, ოთხი ქვეყნის - ირლანდიის, ჰოლანდიის, პორტუგალიისა და ბრიტანეთის ბაზრებზე გაიყიდება. ამ ქვეყნებზე არჩევანი იმ მარტივი მიზეზის გამო შეჩერდა, რომ იქ ეკოლოგიურად სუფთა ავტომობილები მნიშვნელოვანი საგადასახადო შეღავათებით სარგებლობს. ეს კი ავტომობილის საბოლოო ფასზე დადებითად აისახება.

ევროპული ოთხი ქვეყნიდან, ”ნისან ლიფი” ყველაზე ძვირი ტიტების ქვეყანაში ეღირება. იქ მას დილერები 32 839 ევროდ დააფასებენ. სამაგიეროდ, ამ ქვეყნის მთავრობა ელექტრომობილის მყიდველს პირდება, რომ ”ნისან ლიფის” ექსპლუატაციის პირველი 5 წლის განმავლობაში, დაახლოებით 6 000 ევროს დაზოგვა იქნება შესაძლებელი. ელექტრომობილების მფლობელ ჰოლანდიელებს რეგისტრაციის გადასახადს არ გადაახდევინებენ და საგზაო გადასახადისგანაც გაათავისუფლებენ.

ირლანდიასა და პორტუგალიაშიც, ელექტრომობილებისთვის საგზაო გადასახადი უკვე გააუქმეს და ეკოლოგიურად სუფთა ავტომობილებს, ჯამში 5 000 ევროს გადასახადებისგანც ათავისუფლებენ. შედეგად, ამ ორ ქვეყნებში ”ნისან ლიფი” 29 955 ევრო ეღირება. ყველაზე იაფი კი ეს ელექრტომობილი ბრიტანეთში ეღირება, სადაც მყიდველს 27 471 ევროს (უფრო სწორედ, ამ ფასის შესაბამისი თანხა გირვანქა სტერლინგებში) გადახდა მოუწევს. აქვე უნდა ითქვას, რომ ალბიონზე ასეთი დაბალი ფასი ნაწილობრივ შესუსტებულმა გირვანქა სტერლინგმაც განაპირობა. აუცილებლად უნდა გავითვალისწინოთ ის ფაქტიც, რომ ოთხივე ჩამოთვლილ ქვეყანაში, ”ნისან ლიფის” ფასებში აკუმულატორების ღირებულებაც გათვალისწინებულია, მათი საექსპლუატაციო ვადა კი მინიმუმ 5 წელია.

ამ ქვეყნებში ”ნისან ლიფზე” წინასწარი შეკვეთების მიღებას ივლისში დაიწყებენ. პირველი შემკვეთები სასურველ ავტომობილს პორტუგალიასა და ჰოლანდიაში დეკემბრიდან მიიღებენ, ოდნავ მოვიანებით კი ელექტრომობილი ბრიტანულ კუნძულებსაც მიაღწევს.

ევროპამდე, ”ნისანმა” თავის ელექტრომობილზე შეკვეთების მიღება უკვე დაიწყო იაპონიასა და აშშ-ში. ამომავალი მზის ქვეყანაში, მისი საბაზო ღირებულება 40 640 დოლარია, თუმცა საგადასახადო შეღავათების გათვალისწინებით, ფასი 32 370 დოლარამდე ჩამოდის. შედარებისთვის, იაპონური ბაზრის ბესტსელერი, ჰიბრიდული ”ტოიოტა პრიუსი” იქ 22 200 დოლარად იყიდება.

ყველაზე დიდი შეღავათებით კი ”ლიფი” (ფოთოლი) ამერიკაში ისარგებლებს, სადაც მისი საბაზო ღირებულება 32 780 დოლარია. ამას აკლდება ქვეყნის მთავრობის მიერ, ეკოლოგიურად სუფთა ავტომობილებზე დაწესებული შეღავათები, რომლებიც ჯამში 7 500 დოლარს შეადგენს და გამოდის რომ, აშშ-ში ”ნისან ლიფის” 25 280 დოლარად შეძენა შეიძლება. უფრო მეტიც, ზოგიერთ შტატში, ამ ავტომობილის მყიდველი დამატებითი ბონუსებითაც ისარგებლებს.

სამაგიეროდ, ამერიკის ბაზარზე, ”ნისან ლიფის” შეძენის მსურველთათვის ერთი პირობა მოქმედებს - მათ უნდა შეიძინონ აკუმულატორების დასამუხტი სპეციალური მოწყობილობა, რომელიც აკუმულატორების საყოფაცხოვრებო ელექტროქსელიდან დამუხტვის საშუალებას იძლევა. ასეთი მოწყობილობის ფასი კი 2 200 დოლარია.

მაგრამ ეს არაფერია იმ დიდ შეღავათთან, რასაც ელექტრომობილი თავის მფლობელს მისცემს - ”ნისან ლიფის” აკუმულატორების სრულად დამუხტვა ერთ კოლოფ სიგარეტზე იაფი დაჯდება(!).

”ნისანი” თავისი ელექტრომობილის წარმოებას ჯერ იაპონიაში დაიწყებს. იქ გამოშვებული ავტომობილები ზემოთ ჩამოთვლილ ქვეყნებში გაიყიდება. 2012 წელს მუშაობას ამერიკული ქარხანა დაიწყებს, რომელიც ამერიკის და მახლობელი რეგიონის ქვეყნების ბაზრებს დააკმაყოფილებს. 2013 წელს კი სანდერლენდის ქარხანა ამოქმედდება, რომლის მიერ წარმოებული ”ლიფიც” ევროპული ბაზრისთვის იქნება განკუთვნილი

აღსანიშნავია, რომ წარმოების პირველ წელს, იაპონურ კომპანიას შედარებით მოკრძალებული გეგმები აქვს - სულ რაღაც 6 000 ცალი ”ლიფის” გამოშვებას აპირებს. თუმცა, ამის ახსნა ადვილია. ჯერ ერთი, ავტომობილი თავისი კლასისთვის საკმაოდ ძვირი ღირს. მეორეც, ბაზარზე ის აბსოლუტური სიახლეა და აქედან გამომდინარეობს მესამე - ჯერჯერობით, ელექტრომობილების დასამუხტი სადგურების ქსელი არცერთ ქვეყანაში არაა შექმნილი. ასე რომ, თავიდან ”ლიფის” მფლობელებს საკუთარი, საშინაო დასამუხტი მოწყობილობის იმედზე ყოფნა მოუწევთ.

მოკლედ, გარკვეული დროა საჭირო იმისათვის, რომ ავტომოყვარულები ელექტრომობილებს შეეჩვიონ და შეჩვევის ეს რთული და ძვირადღირებული მისია პირველმა ”ნისანმა” ითავა. რა თქმა უნდა, მიმდევრების ელექტრომობილებს გაცილებით იოლი ცხოვრება ელით - მათ ”ლიფის” მიერ გატკეპნილ გზაზე მოუწევთ გავლა...

ახალი დეტალები ”ფერარი ენცოს” შესახებ

Next Ferrari Enzo: new details

24 მაისი

ძველი ”ფერარი ენცო”

..........................................

ინგლისურ ჟურნალ ”ავტოქართან” საუბრისას, ”ფერარის” გენერალურმა დირექტორმა ამედეო ფელისამ განაცხადა, რომ მისი კომპანია არ აპირებს ნახშირბადოვანი ბოჭკოს კომპოზიტების ფართოდ გამოყენებას მანამ, სანამ არ დაადგენს, ხანგრძლივი ექსპლუატაციისას ეს მასალა რამდენად გამძლეა.

”ჩვენ ამ მასალას ვიყენებთ და გამოვიყენებთ ისეთ ავტომობილებში, რომლებსაც ძალიან შეზღუდული რაოდენობით ვაწარმოებთ და რომლებიც ყოველდღიური გამოყენებისთვის არაა განკუთვნილი, ისეთებზე, როგორიც ახალი ”ენცო” იქნება”, - ჟურნალთან საუბრისას განაცხადა ფელისამ.

”ფერარი” კარბონის კომპოზიტებს დიდი ხანია იყენებს ისეთ მოდელებზე, როგორებიცაა F50 და ”ენცო”. თუმცა ფელისა ირწმუნება, რომ ეს მასალა ჯერ არაა ემდენად შესწავლილი, რომ ის სხვა, უფრო მრავალტირაჟიან მოდელებზეც ფართოდ გამოიყენონ.

”ფერარისგან” განსხვავებით, უფრო თამამად იქცევა ”მაკლარენი”, რომელმაც თავისი პირველი სერიული ავტომობილის, MP4-12C-ის მზიდი ელემენტი მთლიანად კარბონის კომპოზიტისგან დაამზადა. მალე კარბონს თავისი სუპერ ავტომობილების წარმოებაში ფართოდ დანერგავს ”მერსედეს-ბენცი”, ”ბეემვე” კი თავის კონცეპცია ”ეფიციენტდაინემიქსის” ერთ-ერთ მთავარ ელემენტად კარბონის ფართოდ გამოყენებას მიიჩნევს.

”ერთის თქმა შემიძლია - დღეს არავინ იცის, ავარიის დროს რა მოსდის მზიდ სტრუქტურას, რომელიც კარბონისგან არის დამზადებული. ვინ იცის, რა მდგომარეობაში ჩავარდება 20-30 წლის შემდეგ მანქანა, რომლის სტრუქტურაც კარბონისაა? ამ ეტაპზე, მხოლოდ თვითმფრინავების წარმოებაში აქვთ ამაზე წარმოდგენა, მაგრამ იქაც, ამ მასალის გამოყენება ძალიან შეზღუდულია. ჩვენი მანქანები კი რემონტს ადვილად ექვემდებარება, თუ ძლიერ არ დაზიანდება. ჩვენ კი არ გვინდა, რომ მათ ეს თვისება დაეკარგოთ”, - ამბობს ფელისა.

მანვე განაცხადა, რომ ახალი ”ფერარი ენცოს” წარმოება 2012 წელს დაიწყება. ავტომობილი კი ორტურბოკომპრესორიანი V8 ძრავით აღიჭურვება. კარგა ხანს იყო ლაპარაკი იმაზე, რომ ახალი ”ენცოსთვის” მარანელოელები წყვილტურბოიან V6 აგრეგატს ამზადებდნენ. თუმცა ფელისამ ექვსცილინდრიანი ძრავი მისი კომპანიის საწარმოო პროგრამაში კატეგორიულად გამორიცხა.

”ექვსცილინდრიანი ძრავი ჩვენს გეგმებში არ შედის და არც შევა მანამ, სანამ მას მომხმარებელი მოგვთხოვს. დღეს ბევრი ფიქრობს, რომ ძრავის და მანქანის შესაძლებლობანი მისი ცილინდრების რაოდენობაზეა დამოკიდებული. სწორედ ამიტომაა, რომ შემუშავების პროცესში გვაქვს ჰიბრიდული ტექნოლოგია, რომელსაც V8 და V10 ძრავებით აღჭურვილ ავტომობილებზე გამოვიყენებთ. უფრო მეტიც, ჩვენ ჰიბრიდული ტექნოლოგიებით, V12 ძრავების შენარჩუნებაც შეგვიძლია”, - ამბობს ფელისა.

ჯერჯერობით, არაფერია ცნობილი ახალი ”ენცოს” ტექნიკური მახასიათებლების შესახებ. სავარაუდოდ, იტალიური კომპანია სულ 500 ცალ სუპერ ავტომობილს (ისევე როგორც პირველი ”ენცოს” შემთხვევაში) გამოუშვებს, რომელთა ფასიც, 500 000 დოლარის ფარგლებში იქნება.

”პინინფარინას” საიუბილეო ქმნილება - ელექტრომობილი ”ნიდო”

Pininfarina Shows All-Electric Nido Mini

24 მაისი

ძარების წარმოებასა და საავტომობილო დიზაინზე სპეციალიზებულმა კომპანია ”პინინფარინამ”, სუბკომპაქტურ ელექტრომობილ ”ნიდოს” პრეზენტაცია ჩაატარა. ეს ავტომობილი ”პინინფარინას” დაარსებიდან 80 წლის იუბილესთან დაკავშირებით დამზადდა. მაგრამ მისი კონცეპტუალური ვერსიისგან განსხვავებით, რომელიც ”პინინფარინამ” 2004 წელს, პარიზის ავტო შოუზე გვიჩვენა, ახალი ”ნიდო” სერიული წარმოებისთვის მომზადებული ავტომობილია.
”ნიდოს” გაბარიტებია: სიგრძე 2.905 მეტრი, სიგანე 1.683 მეტრი, სიმაღლე 1.507 მეტრი და ბორბლების ბაზა 2.068 მეტრია. ამგვარად, ის ”სმარტზე” 0.215 მეტრით გრძელი, 0.123 მეტრით განიერი და 0.037 მეტრით დაბალია. საჩვენებელი ელექტრომობილი ფოლადის მილებისგან შეკრულ კარკასზეა აგებული, თუმცა კომპანიის განცხადებით, წარმოებისას ასეთ კარკასს ალუმინისა შეცვლის. სერიული ”ნიდოს” წონა 900 კილოგრამია.

”ნიდო” აღჭურვილია 40-ცხენისძალიანი ელექტროძრავით, რომელიც ავტომობილის უკანა ნაწილშია მოთავსებული. ძრავი ენერგიას ნიკელ-ქლორიდული აკუმულატორების (სერია ზებრა Z5) ბლოკისგან ღებულობს. მათი დახმარებით, ”ნიდოს” შეუჩერებლად 140 კილომეტრის გავლა შეუძლია.

”პინინფარინას” მონაცემებით, ”ნიდოს” პროტოტიპს ადგილიდან 60 კმ/სთ სიჩქარის აკრეფა 6.7 წამში შეუძლია, მისი მაქსიმალური სიჩქარე კი 120 კმ/სთ-ია. აკუმულატორების სრულად დასამუხტად, დაახლოებით 8 საათია საჭირო. ავტომობილს ენერგიის დაზოგვაში, ”პირელის” მიერ სპეციალურად შემუშავებული საბურავები დაეხმარება.

აღსანიშნავია, რომ ლითიუმ-იონურ აკუმულატორებთან შედარებით, ნიკელ-ქლორიდული აკუმულატორები მეტი ტევადობით და ექსპლუატაციის მეტი პერიოდით გამოირჩევიან. მათში გამოყენებული შენაერთების დიდი ნაწილი გარემოსადმი უვნებელია. ამასთან, აკუმულატორები გადამუშავებას სრულად ექვემდებარება. ასეთი აკუმულატორების მთავარი ნაკლი მათი სიძვირეა, რის გამოც, მათით აღჭურვილი ავტომობილის ექსპლუატაციის ხარჯები, შიდაწვისძრავიანისა შესაბამის მაჩვენებელს უტოლდება.

”პინინფარინას” ხელმძღვანელობა აცხადებს, რომ ”ნიდოს” მოდულური სტრუქტურა მის უნივერსალურობას განაპირობებს. ეს ნიშნავს, რომ მის ბაზაზე როგორც ჰიბრიდული, ასევე შიდაწვისძრავიანი ავტომობილის წარმოება (ნიდოს პირველი კონცეპტი შიდაწვისძრავიანი იყო) შეიძლება. გარდა ამისა, პერსპექტივაში, დიდი იქნება ძარების არჩევანი. ორადგილიანი ჰეჩბეკის გარდა, ”ნიდოს” ბაზაზე შეიძლება ოდნავ დიდი ჰეჩბეკის (ჩასაჯდომი ფორმულით 2+2), პიკაპის, მიკროვენისა და ფურგონის დამზადება.

ადრე გამოქვეყნებული განცხადების შესაბამისად, ელექტრომობილების წარმოების საქმეში, ”პინინფარინას” პარტნიორობას ფრანგული კომპანია ”ბოლორე” გაუწევს, რომელიც აკუმულატორების წარმოებაზეა სპეციალიზებული. ”ნიდოს” წარმოების დაწყების შემდეგ, ”პინინფარინა” მასზე დიდი ზომის, ოთხადგილიანი ელექტრომობილის გამოშვებასაც აპირებს, რომელსაც წამყვანი წინა ბორბლები ექნება.

მარკიონე კარლოს გონის წარმატების გამეორებას ცდილობს

(გაგრძელება, დასაწყისი 6 მაისი)

Marchionne faces tough challenge to match Ghosn's success

24 მაისი

სერჯო მარკიონე

..........................................

კარლოს გონმა რომ ”ნისანი” ჩაიბარა (1999 წელს), იაპონური კომპანია აღმავლობის გზაზე იყო, რასაც ვერ ვიტყვით იმ ”კრაისლერზე”, რომელიც ”ფიატს” და მასთან ერთად, სერჯო მარკიონეს ჩააბარეს. კრიზისმა საერთოდ მოსპო ამერიკული კომპანია. ხარჯების შეკვეცის საბაბით, ”კრაისლერის” ძველმა პატრონმა, საინვესტიციო ჯგუფმა ”ცერბერუსმა”, ახალი ავტომობილების შემუშავებისთვის გამოყოფილი ბიუჯეტიც კი შეკვეცა.

როცა მარკიონემ ამერიკული კომპანია ჩაიბარა (ერთი წლის წინ), ”კრაისლერის” ინჟინრები მცირე რაოდენობით მოდელების შემუშავებით იყვნენ განახლებული. ამასთან, სამოდელო გამაში საერთოდ ვერ ნახავდით მცირეგაბარიტიანსა და საწვავის ეკონომიური ხარჯის მქონე ავტომობილებს. ახლა კი, მალე ”კრაისლერის” დილერთა შოურუმებში, ”ფიატ 500”გამოჩნდება. თანდათან კი ამერიკული საავტომობილო ჯგუფის ორი ბრენდის (კრაისლერის და დოჯის) სამოდელო გამაში, ”ფიატის” ჯგუფში შემავალი კომპანიების (ფიატი, ალფა რომეო და ლანჩა) მცირეგაბარიტიანი ავტომობილების ბაზაზე შექმნილ ავტომობილებსაც ვიხილავთ.

მართალია, სათავეში გონის მისვლისას, ”ნისანმა” ზედიზედ მეოთხე წელი დაასრულა ზარალით, მაგრამ მის საწარმოო პროგრამაში რამდენიმე ახალი მოდელი გამოჩნდა. ამასთან, ”რენომ”, რომელმაც იაპონური კომპანიის 36.8 პროცენტი დაისაკუთრა, ”ნისანის” მოსასულიერებლად, 5.4 მილიარდი დოლარის ინვესტიცია გაიმეტა. მოკლედ, გონს წარმატების საფუძველი რეალურად შემზადებული დახვდა.

კარლოს გონი

.......

.......

.......

.......

.......

.......

გონის გამოწვევები

მაგრამ რა თქმა უნდა, პრობლემები გონსაც დახვდა. უპირველეს ყოვლისა, ეს კულტურული განსხვავება იყო. ის დასავლეთის ტიპის პირველი მენეჯერი გახდა, რომელიც სათავეში იაპონურ კომპანიას ჩაუდგა. იმისათვის, რომ ნაწილობრივ იაპონელად ეგრძნო თავი, გონმა სალაპარაკო იაპონურის შესწავლა დაიწყო, ”ნისანის” კაფეტერიაში იაპონურ საკვებს მიირთმევდა და იმავე ესკალატორით სარგებლობდა, რითაც ”ნისანის” რიგითი თანამშრომლები.

იაპონურის სწავლით, გონმა ”ნისანის” აღმასრულებლებს და რიგით თანამშრომლებს შორის სიმპათია და ნდობა დაიმსახურა. ამას განსაკუთრებული მნიშვნელობა იაპონური კომპანიის რესტრუქტურიზაციის პროცესში ჰქონდა. ”ხარჯების გამანადგურებელმა”, როგორც მას ფრანგულ პრესაში შეარქვეს, რესტრუქტურიზაციის დროს ხუთი საწარმო დახურა და 21 000 თანამშრომელი დაითხოვა, რაც ”ნისანის” მუშათა შტატის დაახლოებით 14 პროცენტს შეადგენდა. ასეთ რადიკალურ ნაბიჯებს კი ავტორიტეტული ხელმძღვანელი სჭირდებოდა.

ანალიტიკოსთა შეფასებები

დღეისათვის, ორი კომპანიის (რენოს და ფიატის) შეფასებისას, სააგენტო ბლუმბერგი შემდეგ მონაცემებს აქვეყნებს: 34 ანალიტიკოსიდან, 12 ”რენოს” აქციების შეძენას გვირჩევს, 9-ს აზრით, კარგი იქნება ამ კომპანიის აქციების შენარჩუნება, 5 კი ფიქრობს, რომ უკეთესი იქნება მათი გაყიდვა. დანარჩენები პროგნოზისგან თავს იკავებენ. ”ფიატის” შემთხვევაში, მისი ქციების ყიდვას 12 ანალიტიკოსი გვირჩევს, ამდენივეს აზრით, კარგი იქნება აქციების შენარჩუნება და მხოლოდ 10-ს მიაჩნია, რომ აუცილებელია ტურინული კონცერნის აქციების თავიდან მოშორება. აშკარაა, რომ ”ფიატთან” დაკავშირებით, ანალიტიკოსებს ამ ეტაპზე, უფრო ჩამოყალიბებული აზრი აქვთ.

”მორგან სტენლის” ყველაზე ავტორიტეტული ევროპელი ანალიტიკოსი საავტომობილო ინდუსტრიის დარგში, ედამ ჯონასი, ვინც იმავდროულად, ბლუმბერგის საუკეთესო ანალიტიკოსიცაა, ამბობს, რომ ”ფიატი” ამჟამად ზედმეტადაა შეფასებული. თუმცა დასძენს, რომ შესაძლოა, იტალიური კონცერნის ფასეულობას ”კრაისლერმა” დამატებითი წონა შესძინოს.

სამაგიეროდ, სხვა ავტორიტეტული სპეციალისტები ”ფიატის” აქციების გაყიდვის რეკომენდაციას იძლევიან. მათი აზრით, იტალიურ ავტო მწარმოებელს, გლობალურ ბაზარზე, მათ შორის ჩინეთში გავრცელების ნალები შანსი აქვს. თუმცა, არიან ისეთებიც, რომლებიც საპირისპიროში არიან დარწმუნებულნი.

მარკიონე - გარდაქმნების სპეციალისტი

მარკიონე იტალიის ქალაქ კიეტიში დაიბადა, 14 წლისა კი კანადაში გადასახლდა. ამჟამად ის კანადს და იტალიის მოქალაქეა. განათლებით ბუღალტერმა, ვექილმა და სასამართლო შუამავალმა, მარკიონემ თავისი კარიერა კანადაში დაიწყო, სადაც კომპანია ”დელუა ენდ ტაჩში” მუშაობდა. 1994 წელს ის ქიმიურ-ფარმაცევტულ ჯგუფ ”ალუსუის ლონცაში” დაგავიდა, სამი წლის შემდეგ კი ამ ჯგუფიდან ფარმაცევტული ბიზნესი გამოყო და ჯგუფი ”ლონცა” ჩამოაყალიბა. მარკიონეს გამჭრიახობის წყალობით, ამ ჯგუფის მოგება სამ წელიწადში გასამმაგდა.

მარკიონემ კომპანიების ეფექტურად გარდამქმნელის რეპუტაცია მჯერ კიდევ ”ფიატში” მისვლამდე დაიმკვიდრა. 2004 წელს კი ტუეინული კონცერნის მთავარი აღმასრულებელი გახდა. მანამდე ოთხი წლის განმავლობაში, ”ფიატი” წაგებაზე მუშაობდა. მარკიონეს პირველი დამსახურება ისაა, რომ მან ”ფიატი” ”ჯენერალ მოტორსს” დააშორა (უფრო სწორედ, ფიატთან დაშორება გენერლებმა ითხოვეს, რისთვისაც ორ მხარეს შორის არსებული კონტრაქტი უნდა დარღვეულიყო) და თან, ამისათვის ამერიკული გიგანტისგან, რომელსაც დიდი კრიზისის ნიშნები ჯერაც არ ეტყობოდა, 2 მილიარდი დოლარი მიიღო.

ამას მოჰყვა ბანკებთან გაფორმებული მეტად ხელსაყრელი კონტრაქტები, 19,000 თანამშრომლის დათხოვნა, ახალი მოდელების შემუშავების დროის 3 წლამდე (ოთხი წლიდან) შემცირება და ბაზარზე ახალი მოდელების გამოშვება. შედეგად, 2005 წელი ”ფიატმა” მოგებით დაასრულა (!).

ბევრი ანალიტიკოსი დღეს ამბობს, რომ მარკიონე ამჟამად ”კრაისლერის” ხარჯების შეკვეცის გზების ძებნითაა დაკავებული. თუმცა ისიც ფაქტია, რომ ეს საქმე ნაწილობრივ მანამ გაკეთდა, სანამ ის დეტროიტული კომპანიის შეფი გახდებოდა. ეს შარშან, იმ ექვს კვირაში მოხდა, როცა ”კრაისლერი” ხელოვნური გაკოტრების რეჟიმში იმყოფებოდა. ამ პერიოდს მარკიონე ამერიკული კომპანიის ”სარეცხ მანქანაში” გატარებას ადარებს. ”ჭუჭყის” სახით, კომპანიამ 8 ქარხანა მოიშორა (დახურა), გაყიდა, ან გააქირავა უძრავი ქონების ნაწილი და კონტრაქტი 789 ამერიკელ დილერთან შეწყვიტა. გარდა ამისა, აშშ-ის მთავრობისგან, შეღავათიანი სესხის სახით, რამდენიმე მილიარდი დოლარი მიიღო (ვალის დიდი ნაწილი უკვე დაფარულია).

ანალიტიკოსების აზრით, იმ ათი წლის განმავლობაში, რაც ”კრაისლერი” ჯერ ”დაიმლერის”, შემდეგ კი ”ცერბერუსის” ხელში იყო, მისი ინჟინრების ინოვაციურობა და კრეატიულობა დაჩლუნგდა, რადგან ამერიკული კომპანიის რეალური განვითარებით არავინ იყო დაინტერესებული. ახლა კი, მარკიონემ ამ თვისებათა გამოცოცხლება დაიწყო, რაც კიდევ ერთი ნიშანია იმისა, რომ ”ფიატს” ”კრაისლერთან” შორს მიმავალი მიზნები აკავშირებს და ეს ორივე კომპანიისთვის სასარგებლო იქნება.

ერთ-ერთი პირველი საქმე, რაც მარკიონემ ”კრაისლერის” სათავეში მისვლის შემდეგ გააკეთა, ის იყო, რომ 40-ზე მეტ მაღალი რანგის მენეჯერს საქმე გადაუნაწილე. სხვათა შორის, ”ფიატის” მთავარ აღმასრულებლად დანიშვნის შემდეგაც, ის ანალოგიურად მოიქცა. ის ამბობს, რომ ბიზნესში ისეთ ადამიანებს ენდობა, რომლებსაც შემდეგი ორი ფუნდამენტური თვისება გააჩნია: ხალხის გაძღოლა და სიახლეების დანერგვა.

რესტრუქტურიზაციის გარდა, მარკიონეს მთავარი საზრუნავი ორი კომპანიის საწარმოო პროგრამის გადახალისებაცაა. ამჟამად ის ”ჯიპის” პოპულარულ უგზოობის მოდელ ”გრანდ ჩეროკითაა” დაკავებული, რომელიც ამერიკულ ბაზარზე მალე გამოჩნდება. ის ამ მოდელს უყურებს, როგორც წუმპედან ”კრაისლერის” ამომყვანს და ავტომობილს, რომელსაც ამერიკული ჯგუფის კრიზისიდან გამოყვანაში მთავარი როლის შესრულება შეუძლია.

მაგრამ ანალიტიკოსები თვლიან, რომ ”გრანდ ჩეროკის” ”კრაისლერის” გაყიდვების ზრდის მცირე ხნით შენარჩუნება შეუძლია. უფრო სერიოზული წარმატებისთვის კი სამოდელო გამის გაფართოებაა საჭირო, რასაც გაცილებით მეტი დრო დასჭირდება. თუმცა მარკიონე ამისთვისაც მზადაა. ცოტა ხნის წინ, მან ”ფიატის” ჯგუფის რესტრუქტურიზაციის გეგმა შეიმუშავა, რომელიც ”კრაისლერის” და იტალიური კომპანიის ბრენდების მჭიდრო თანამშრომლობას ითვალისწინებს.

მოკლედ, რაც ორი საავტომობილო ჯგუფის შეფი გახდა, მარკიონე ჯვირაში 7 დღე მუშაობს და ტურინსა და დეტროიტს შორის მუდმივად გადაფრენაშია. სხვაგვარად არც შეიძლება - ორივე კომპანია ამ ეტაპზე გარდატეხის პროცესშია და ყურადღების ოდნავ მოდუნებასაც კი, შეიძლება უზარმაზარი ზარალი მოჰყვეს.

დაბოლოს, კითხვაზე, როგორ შეაფასებს გონს, მარკიონე ამბობს, რომ ”რენო-ნისანის” შეფი ”რკინის მუშტივითაა” და დასძენს: ”ის ჩემზე გაცილებით უკეთესი მმართველია”. ამას ამბობს, მაგრამ გულში ალბათ ფიქრობს, რომ მისი დროც დადგება...

1936 წლის ”ბუგატი” 30 მილიონზე მეტად გაიყიდა

1936 Bugatti Type 57SC Atlantic Sells for $30M+

21 მაისი

ამიერიდან, კითხვაზე, რომელია მსოფლიოში ყველაზე ძვირადღირებული ავტომობილი, თამამად შეგიძლიათ უპასუხოთ - 1936 წლის ”ბუგატი ტაიპ 57SC ატლანტიკი”. კომპანია ”გუდინგ ენდ კომპანის” აუქციონზე, ერთ-ერთმა ამერიკულმა მუზეუმმა, ამ ავტომობილში 30 მილიონ დოლარზე მეტი გადაიხადა. მოდით და ეკონომიკურ კრიზისზე ილაპარაკეთ...

სიძვირის მიხედვით, უძვირფასეს ”ბუგატისთან” ყველაზე ახლოსაა 1957 წელს გამოშვებული ”ფერარი 250 ტესტა როსა”, რომელშიც შარშან 12.2 მილიონი დოლარი გადაიხადეს. შემდეგია 1931 წლის ”ბუგატი როიალე კელნერ კუპე”, რომელშიც 1987 წელს ინკოგნიტო კოლექციონერმა 8.7 მილიონი დოლარი გადაიხადა.

ეტორე ბუგატის ფაბრიკამ თავის დროზე, სულ ოთხი ცალი ”ტაიპ 57SC ატლანტიკი” დაამზადა. მათგან დღეს მხოლოდ ორია შემორჩენილი. ერთი ტანსაცმლის მწარმოებელ ამერიკელ მულტიმილიონერ რალფ ლორენს ეკუთვნის, მეორე კი ასევე მოდის ბიზნესის მულტიმილიონერს, აწგარდაცვლილი დოქტორ პიტერ უილიამსონის საკუთრება იყო, ახლა კი, სარეკორდო თანხად შტატ კალიფორნიის მულენის საავტომობილო მუზეუმმა შეიძინა. ეს ის ავტომობილია, რომელმაც 2003 წელს, პებლ ბიჩის ელეგანტურობის კონკურსზე გაიმარჯვა.

”ატლანტიკი” ფრანგული კომპანიის მიერ 1935 წლის პარიზის შოუზე ნაჩვენებ პროტოტიპ ”აეროლაით ელექტრონ კუპეს” ბაზაზე შეიქმნა. ის ეგზემპლარი, რომელიც სარეკორდო თანხად გაიყიდა, პირველია იმ ოთხეულიდან, რომლებიც ”ბუგატიმ” დაამზადა და ამიტომაც, განსაკუთრებით ფასეულია კოლექციონერთა შორის.

”ფოლკსვაგენი” ქროსოვერს ”სუზუკი SX4-ის” ბაზაზე გამოუშვებს

Volkswagen Rocktan

21 მაისი

”ფოლკსვაგენი” წარმოებისთვის სრულიად ახალი ქროსოვერს ამზადებს, რომელიც ”სუზუკი SX4-ის” პლატფორმაზე აიგება. ბრაზილიურ საავტომობილო გამოცემა ”ნოტიციას აუტომოტივასის” მიერ გავრცელებული (არაოფიციალური) ინფორმაციით, ახალ ავტომობილს ”როკტანს” დაარქმევენ.

”როკტანს” წინა ან სრულამძრავიანი ტრანსმისია ექნება, მის ძრავების გამაში კი 1.4-დან 2.0 ლიტრამდე მუშა მოცულობის მქონე ბენზინის და დიზელის ძრავები შევა, რომელთაგან ყველაზე მძლავრის მაქსიმალური სიმძლავრე 140 ცხენის ძალას მიაღწევს.

”ფოლკსვაგენის” სამოდელო გამაში, ახალი ქროსოვერი თავისივე კლასის ”ტურანსა” და ”ქროსგოლფს” შორის ნიშას შეავსებს. ევროპულ ბაზარზე მისი მთავარი კონკურენტი ”ნისან ქაშკაი” იქნება. სულ ესაა ის ინფორმაცია, რაც ბრაზილიური გამოცემისთვის ხელმისაწვდომი გახდა.

შეგახსენებთ, რომ ”ფოლკსვაგენმა” იანვარში იაპონური კომპანიის აქციების 19.9 პროცენტი შეიძინა, რის შემდეგაც, ორმა კომპანიამ ახალი, თანაბარუფლებიანი ალიანსი ჩამოაყალიბა. თანამშრომლობა სხვადასხვა კლასის ავტომობილების წარმოების სფეროში თანამშრომლობას ითვალისწინებს. ძირითადი აქცენტი კი ჰიბრიდული და ელექტრული ტექნოლოგიების ერთობლივად შემუშავებაზე გაკეთდება. წარმოებულ ავტომობილებს კი ორივე კომპანია თავ-თავისი მარკით გაჰყიდის.

კონცეპტუალური SC90 – ”ვოლვოს” დიზაინის მომავალი?

Volvo SC90 Sports Sedan Concept

21 მაისი

ნოფონ ბანსაზენი ამერიკელი დიზაინერია (აშკარად ფრანგული წარმოშობის - მის წარმომავლობას ინტერნეტში დიდხანს უშედეგოდ ვეძებდი და ბოლოს ისღა გავიგე, რომ სან დიეგოელია) და სულ ოთხი წელია, რაც დამოუკიდებლად ქმნის ავტომობილების დიზაინს. მან სახელი რამდენიმე თვის წინ გაითქვა, როდესაც ”პორშეს” ნახევრად სატვირთო ავტომობილის, პიკაპის კონცეპტუალური პროექტი შეიმუშავა. ახლა კი ”ვოლვოსაც” გადასწვდა და შვედურ კომპანიას, რომელსაც ახლახანს ჩინელები დაეპატრონენ, ოთხკარიანი კუპე (ან სპორტული სედანი) SC90 შესთავაზა.

უფრო სწორედ, მან ეს პროექტი ”ვოლვოს” შეკვეთით და მეთვალყურეობით შეიმუშავა. სამუშაოს დაწყებამდე კი შვედური კომპანიის თანამედროვე კორპორატიული დიზაინი, მისსავე კონცეპტუალურ ცენტრში შეისწავლა. ჯერ უცნობია, ბანსაზენმა თავისი ნამუშევრით, შვედებს S80-ის შემცვლელის მომავალი სახე უჩვენა, თუ სრულიად ახალი ავტომობილი, რომელმაც იდეაში კონკურენცია ”პორშე პანამერას” უნდა გაუწიოს.

ფაქტი კი აშკარაა - კონცეპტუალურ ავტომობილს საკმაოდ აგრესიული გარეგნობა აქვს და შესაძლოა, მის მიხედვით, ”ვოლვო” ახალი კორპორატიული სტილის შემუშავებასაც იწყებს. რა თქმა უნდა, ამ შემთხვევაში, ბანსაზენისეული სტილი დაიხვეწება, ”დაწყნარდება” და უფრო ”ადამიანური” გახდება.

ისიც უნდა ითქვას, რომ პროექტში არაფერია ნათქვამი ავტომობილის ტექნიკურ აღჭურვილობაზე. როგორც ჩანს, ”ვოლვოს” მის ნამუშევარში მხოლოდ ავტომობილის გარეგნობა აინტერესებდა, რაც იმის ირიბი დასტურია, რომ შვედებს (უფრო სწორედ, ჩინელებს) სწორედ თავიანთი ავტომობილების დიზაინის დახვეწა აინტერესებთ.

”ბუგატი ვეირონის” შემცვლელი კიდევ უფრო მძლავრი იქნება

Bugatti Veyron

21 მაისი

ვენის ტექნოლოგიურ ინსტიტუტში ლექციის კითხვისას, ”ფოლკსვაგენის” დირექტორთა საბჭოს თავმჯდომარე ფერდინანდ პიხმა განაცხადა, რომ ”ბუგატი ვეირონის” შემცვლელი 1 200-ცხენისძალიანი ძრავით აღიჭურვება.

ეს ავტომობილი ”ბუგატიმ”, რომელიც გერმანული კომპანიის ჯგუფში შედის, სწორედ პიხის დიდი მონდომების წყალობით გამოუშვა და როგორც ჩანს, დიდი ფერდინანდ პორშეს შთამომავალი ამ მარკის მომავალზე კვლავაც ზრუნავს. ძრავის ამ ტექნიკური მონაცემის გარდა, პიხს ახალი ავტომობილის შესახებ სხვა არაფერი უთქვამს.

ცნობისათვის, ”ვეირონის” წარმოება ”ბუგატიმ” ხუთი წლის წინ დაიწყო, ამ ავტომობილის ღია ვერსია (გრანდ სპორტ) კი 2008 წელს გამოუშვა. ”ვეირონი” სრულამძრავიანი ტრანსმისიით გამოირჩევა და ის 1001-ცხენისძალიანი ძრავითაა აღჭურვილი, რომელიც მაქსიმალურ მომენტს (1250 ნმ-ს) ძრავის მუხლა ლილვის 2 200 ბრ/წთ-ზე ავითარებს.

ამ აგრეგატებით, ”ვეირონს” 0-100 კმ/სთ-მდე აჩქარება 2.5 წამში შეუძლია, 0-დან 200 კმ/სთ-ს 7.3 წამში კრეფს, 300 კმ/სთ-ს 16.7 წამში აღწევს, მისი სპიდომეტრის ისარი კი 400-იან მაჩვენებელს 50 წამში აღწევს. რაც შეეხება მაქსიმალურ სიჩქარეს, ის 407 კმ/სთ-ია.

”ბუგატი” სულ 300 ცალი ”ვეირონის” წარმოებას აპირებს. აქედან მას უკვე 200-ზე მეტი შეკვეთა აქვს მიღებული. სულ 150 ცალი ”ვეირონ გრანდ სპორტის” წარმოება იგეგმება. ორივე ავტომობილის ღირებულება ევროპულ ბაზარზე 1.5 მილიონი ევროა.

სანამ ”ვეირონის” შემცვლელს ვიხილავდეთ, ბაზარზე ”ბუგატის” მეორე ავტომობილი - სედანი ”16C გალიბიერი” გამოჩნდება, რომლის პირველი ჩვენება შარშან, ფრანკფურტის საავტომობილო შოუმდე რამდენიმე დღით ადრე, სპეციალურ წვეულებაზე შედგა. ამ ავტომობილის კაპოტქვეშ განლაგებულია ”ვეირონის” აგრეგატი, რომელიც 800 ცხენის ძალამდეა დეფორსირებული. ფრანგულ-იტალიური კომპანია ამ ავტომობილსაც მხოლოდ 300 ცალს დაამზადებს.

ექვსმეტრიანი კუპე ”მაიბახის” ბაზაზე

Maybach Coupe 57S

21 მაისი

გერმანული სატიუნინგო ატელიე ”ქსენატეკი” იმითაა ცნობილი, რომ სერიული ავტომობილების ბაზაზე, ექსკლუზიურ შედევრებს ამზადებს. ამჯერად, მის სპეციალისტთა ხელი ისედაც ექსკლუზიურ ავტომობილს - ”მაიბახ 57S-ს” შეეხო, რომლის ბაზაზეც მათ ექვსმეტრიანი კუპე დაამზადეს. გერმანულ ჟურნალ ”ავტო მოტორ უნდ შპორტის” ინფორმაციით, ”ქსენატეკი” ამ კუპეს სულ 100 ცალს დაამზადებს.

ამავე ჟურნალის ინფორმაციით, ”მაიბახის” ორკარიანი ვერსიების წარმოებაში, ”ქსენატეკს” ტექნოლოგიურად ”დაიმლერი” (რომელსაც მაიბახი ეკუთვნის) დაეხმარება. ინგლისურ ჟურნალ ”ავტოქარის” ინფორმაციით კი, კუპეს გარეგნობის შემუშავებაში მონაწილეობა ”მერსედეს-ბენცის” სპეციალისტებმაც მიიღეს, რომლებსაც შტუტგარტული კომპანიის მთავარი დიზაინერი გორდენ ვაგენერი ხელმძღვანელობდა.

მიუხედავად იმისა, რომ კართა რაოდენობა განახევრდა, ავტომობილმა ოთხი ადგილი შეინარჩუნა. ასევე შენარჩუნებულია ავტომობილის სიგრძეც (5.7 მეტრი) და ბაზაც (3.39 მეტრი). სამაგიეროდ, 0.2 მეტრით, 2.18 მეტრამდე გაიზარდა ავტომობილის სიგანე და ის 1.48 მეტრამდე დადაბლდა. დაკიდევ, 0.2 მეტრით უკან დაიწია შუა საყრდენმა.

ტექნიკური თვალსაზრისით კი კუპე სედან ”მაიბახ 57S-ის” იდენტურია. ის აღჭურვილია 6.0-ლიტრიანი წყვილ ტურბოკომპრესორიანი V12 ძრავით, რომელიც 612 ცხენის ძალას ავითარებს. ამ აგრეგატის დახმარებით, ადგილიდან 100 კმ/სთ-ის ასაკრეფად, კუპეს 5.0 წამი ჰყოფნის, მისი მაქსიმალური სიჩქარე კი 275 კმ/სთ-ს აღწევს.

უფრო მეტიც, ”ქსენატეკის” ხელმძღვანელობა ”უფრო” სპორტული ვერსიის წარმოებასაც გეგმავს. ასეთ შემთხვევაში, ავტომობილს უფრო მძლავრ ძრავს ჩაუდგამენ და ის უფრო ხისტ საკიდარსაც მიიღებს. შესაბამისად, შეიცვლება სამუხრუჭე სისტემა და ბორბლებიც, ავტრომობილს კი სახელში ”ევო” დაემატება.

”ქსენატეკი” სულ 100 ცალი კუპე ”მაიბახის” (სპორტულ ავტომობილს ჯერ საკუთარი სახელიც არ აქვს) წარმოებას აპირებს, თითოეულის ღირებულება კი 650 000 ევრო იქნება. ამ ავტომობილით, ”დაიმლერმა” კონკურენცია ”ბენტლი ბრუკლენდსს” და ”როლს როის ფანტომ კუპეს” უნდა გაუწიოს.

”აუდი A9” - ჰიბრიდული სპორტული სედანის კონცეპცია

Audi A9 Hybrid Sports Sedan Concept by Daniel Garcia

21 მაისი

რასაც ამ სურათზე ხედავთ, დამოუკიდებელმა ესპანელმა დიზაინერმა დანიელ გარსიამ შეიმუშავა და მას ”აუდი A9” უწოდა. რა თქმა უნდა, ეს იმას არ ნიშნავს, რომ ამ პროექტს რამე საერთო აქვს გერმანულ კომპანიასთან. არადა, ეს ავტომობილი ”აუდის” ბავარიული ”ბეემვეს” პროექტ ”ვიჟნ ეფიციენტფაინემიქსისადმი” გაცემული შესანიშნავი პასუხი იქნებოდა.

არადა, როგორც ცოტა ხნის წინ, ”ბეემვემ” თავისი მე-5 სერიის GT-თი ფაქტობრივად ბაზრის ახალი ნიშა გახსნა, A9-საც თავისუფლად შეუძლია სრულიად ახალი ნიშია - ზე-ლუქსის კლასის, ჰიბრიდული სპორტული სედანების კლასის ნიშისთვის დასაბამის მიცემა. თუმცა, ასეთი ნიშა ფაქტობრივად უკვე არსებობს და მასში ”პორშე პანამერა” და ”ასტონ მარტინ რეპიდი” ”თარეშობენ”.

გარსია ამბობს, რომ თავის შედევრზე მუშაობისას, შთაგონების წყაროდ სახელოვან არქიტექტორ სანტიაგო კალატრავას მიერ ვალენსიაში აშენებული შენობები გამოიყენა. ამასთან, პროექტში ლაპარაკია ჯერაც შეუმუშავებელ ნანოტექნოლოგიურ მასალაზე, რომელიც თავისით მყარდება და იმ ფერს ღებულობს, რომელიც გარემოს შეესაბამება.

რა თქმა უნდა, ასეთი ავტომობილი მხოლოდ გარემოსადმი მეგობრული ძალური დანადგარით შეიძლება იყოს აღჭურვილი. მაგრამ სანამ ასეთი ტექნოლოგიები მასობრივ წარმოებაში დამკვიდრდება, ”აუდის” შეუძლია, რომ A9 ბენზინის, ან დიზელის ძრავით აღჭურვოს. ამასთან, გარსია არც ჰიბრიდულ დანადგარზე იტყოდა უარს, რომელშიც ბენზინის ძრავი და ბორბლებში მოთავსებული ელექტროძრავები უნისონში იმუშავებდა.

”მერსედეს-ბენც ჰექსაუილ” - ირანელი ინჟინრის სავარჯიშო

Mercedes-Benz Hexawheel Concept Study

21 მაისი

კონცეპტუალური ”მერსედეს ჰექსაუილი” მხოლოდ სტუდიური ნამუშევარია და მის შემხედვარეს, ადამიანს საინტერესო კითხვა დაებადება - როგორი იქნება მინი ოფ-როუდერი, თუ ”დაიმლერი” მის წარმოებას ”სმარტის”, ან ”მერსედესის” მარკით გადაწყვეტს?
ირანელმა ინჟინერ მექანიკოსმა, 35 წლის სიამაკ რუჰი დეჰკორდიმ ასეთი ავტომობილის მისეული ხედვა კომპიუტერის დახმარებით შეიმუშავა. თან, შტუტგარტელებს საინტერესო გადაწყვეტა შესთავაზა - ექვსბორბლიანი, სრულამძრავიანი მანქანა, რომელიც ორ ურიკაზე დგას.

ეს პლატფორმები ერთმანეთს ორიგინალური მექანიზმით უკავშირდება, რომლის მთავარი ელემენტიც ჰიდრავლიკური სისტემაა. მისი მეშვეობით, ავტომობილს ურთულესი წინაღობების დაძლევის უნარი ექნება. ავტორის ჩანაფიქრით, ჰიდრავლიკური სისტემით ავტომობილის ტრანსმისიაც უნდა აღიჭურვოს.

ექვსბორბალა დიზელის აგრეგატით აღიჭურვება, თუმცა პროექტის ავტორს არც ეკოლოგიურად სუფთა დანადგარების საწინააღმდეგო აქვს რამე. უფრო მეტიც, ის ამბობს, რომ პერსპექტივაში, მის ავტომობილს ამძრავი ძალა შეიძლება ელექტროძრავმა და წყალბადის ფიჭურმა დანადგარმაც მიანიჭოს. ავტომობილის სიგრძე 4.8 მეტრია, მისი ორივე ბაზის სიგრძე კი 1.95-1.95 მეტრი.

ძნელი წარმოსადგენია, ”მერსედესმა” ასეთი ექსტრავაგანტური იდეის განხორციელება განიზრახოს, თუმცა თქმა არ უნდა, ირანელ ინჟინერს მდიდარი ფანტაზია ჰქონია და ვინ იცის, იქნებ მის მიერ ექვსბორბალას კონსტრუქციაში შემოთავაზებული ზოგიერთი იდეა ოდესმე რომელიმე ავტომწარმოებელმა მოიწონოს კიდეც...

”ტესლა” და ”ტოიოტა” პარტნიორები ხდებიან

Tesla to make electric vehicles with Toyota, buy NUMMI

21 მაისი

ელონ მუსკი

.................................

ელექტრომობილების მწარმოებელი კალიფორნიული კომპანია ”ტესლა მოტორსი” და მსოფლიოს უდიდესი ავტომწარმოებელი, იაპონური ”ტოიოტა მოტორი” თანამშრომლობას იწყებენ. ისინი ერთობლივად შეიმუშავებენ ელექტრომობილებს, რომლებსაც კალიფორნიის ქალაქ ფრიმონში მდებარე ქარხანა NUMMI-ში (ნიუ იუნაიტიდ მოტორ მენიუფექჩურინგ ინკორპორეიტიდ) დაამზადებენ.

ეს ქარხანა არცთუ დიდი ხნის წინ, ”ტოიოტას” და ”ჯენერალ მოტორსის” ერთობლივი საკუთრება იყო და ის ორივე კომპანიისთვის ერთსადაიმავე მოდელებს სხვადასხვა მარკით (ტოიოტას და პონტიაკის) აწარმოებდა. მაგრამ შარშან ამერიკულმა კომპანიამ თავის წილზე უარი თქვა, რის შემდეგაც, ”ტოიოტამ” ქარხნის შენარჩუნება არ ისურვა და დახურა.

მოდელ S

..........................

ახლა კი, იაპონურ კომპანიასთან დადებული გარიგებით, ”ტესლა” NUMMI-ს ქარხანას შეისყიდის და მასში 1 000-მდე ადამიანს დაასაქმებს. ჯერჯერობით უცნობია, თუ რა მოდელების წარმოებას აპირებს ამ ქარხანაში ”ტესლა”. სავარაუდოდ, ეს ელექტრული სედანი იქნება.

მცირე ზომის კალიფორნიული კომპანიის ბიზნესში ”ტოიოტა” 50 მილიონ დოლარს დააბანდებს. სამაგიეროდ, როდესაც ”ტესლა” საფონდო ბირჟაზე თავის აქციებს გაიტანს, იაპონური კომპანია მის საკონტროლო პაკეტს დაეუფლება. გარდა ამისა, ორივე კომპანია ახალი მოდელების შემუშავებისას მჭიდროდ ითანამშრომლებს.

ამ თანამშრომლობისას, ”ტესლა” შეუზღუდავად ისარგებლებს ”ტოიოტას” საინჟინრო რესურსებით და მისთვის იაპონური კომპანიის მიმწოდებელთა ბაზაც გახსნილი იქნება. სამაგიეროდ, ”ტოიოტა” თავისი ახალი პარტნიორისგან, ელექტრომობილების შემუშავების საკითხში, დიდ გამოცდილებას გაიზიარებს. სხვათა შორის,თავისი ჰიბრიდული მოდელებისთვის, იაპონური კომპანია ჯერაც მოძველებულ, ნიკელ-მეტალ-ჰიდრიდულ აკუმულატორებს იყენებს, როცა ”ტესლამ” თავიდანვე უფრო თანამედროვე, ლითიუმ-იონურ ელემენტებზე გააკეთა აქცენტი.

”ათწლეულების წინ, ”ტოიოტამაც” მოღვაწეობა სარისკო საქმით დაიწყო. დღეს ჩვენ კიდევ ერთ რისკიან საქმეს ვეკიდებით და ვიმედოვნებთ, რომ ამ საქმეში ჩვენს ქარხნებში დასაქმებულთა გამოცდილება და შრომისმოყვარეობა დაგვეხმარება”, - ამბობს ”ტოიოტას” პრეზიდენტი აკიო ტოიოდა.

”ტესლას” მთავარი აღმასრულებელი ელონ მუსკი ამბობს, რომ NUMMI-ს ქარხნის ელექტრომობილების წარმოებისთვის მოსამზადებლად, მის კომპანიას ასეულობით მილიონი დოლარის დახარჯვა მოუწევს. ამისთვის კი ის იმ 465 მილიონი დოლარის გამოყენებას აპირებს, რომლებიც აშშ-ის ენერგიის დეპარტამენტისგან, შეღავათიანი სესხის სახით მიიღო. რა თქმა უნდა, ამ თანხის ნაწილს კომპანია ელექტრულ სედან S-ის შემუშავებისთვის გამოიყენებს. ქარხნის მოდერნიზებისთვის, ”ტესლა” ასევე გამოიყენებს იმ 20 მილიონ დოლარს, რომელიც შტატ კალიფორნიისგან მიიღო.

მუსკი არ ამბობს, თუ რა დაუჯდა დახურული ქარხნის შეძენა. სამაგიეროდ, აზუსტებს, რომ მოდელ S-ის წარმოება 2012 წელს დაიწყება. ამასთან, კომპანია ამ მოდელს წლიურად 20 000 ცალს დაამზადებს. მოგვიანებით კი ”ტესლას” საწარმოო პროგრამაში ახალი მოდელებიც გამოჩნდება, რომლებსაც ასევე NUMMI-ს ქარხანა გამოუშვებს.

”ეს უზარმაზარი ქარხანაა, რომელშიც ჩვენ მხოლოდ ერთ კუთხეს დავიკავებთ”, - ამბობს მუსკი და დასძენს, რომ მართალია, თავიდან მისი კომპანია ამ ქარხნის შესაძლებლობების მხოლოდ მინიმუმს გამოიყენებს, მაგრამ სამოდელო გამის გაფართოებასთან ერთად, წარმოების მოცულობაც გაიზრდება და საბოლოოდ, ასეულობით ათასს მიაღწევს. პროექტში დასაქმებულთა რაოდენობა კი 10 000-ს (ამ რიცხვში, მიმწოდებელ კომპანიებში ”ტესლას” პროექტთან დაკავშირებულ თანამშრომელთა რაოდენობაცაა გათვალისწინებული) მიაღწევს.

ამჟამად ”ტესლა” ორადგილიან ელექტრულ როდსტერს აწარმოებს, რომლის ფასიც 100 000 დოლარია. რაც შეეხება სედან ”მოდელ S-ს”, მისი ფასი 40 000 დოლარი იქნება.

რაც შეეხება ”ტოიოტას”, ეს კომპანია აქამდე აქცენტს ჰიბრიდულ მოდელებზე აკეთებდა და ელექტრომობილებისადმი ინტერესს ფაქტობრივად არ ავლენდა. მაგრამ როგორც ჩანს, მისი პოზიცია შეიცვალა და სავარაუდოდ, ”ტესლასთან” თანამშრომლობის შედეგად, ელექტრომობილები მის სამოდელო გამაშიც მალე გამოჩნდება...

”ოპელმა” შეიძლება კუპე ”კალიბრას” წარმოება განაახლოს

New Opel Calibra Coupe Rumored

21 მაისი

2007 წელს, ჟენევის ავტო შოუზე, ”ოპელმა” კონცეპტუალური კუპე GTC წარადგინა და მაშინ ბევრმა იფიქრა, რომ ეს ავტომობილი ერთ დროს საკმაოდ პოპულარული კუპე ”კალიბრას” ახალი ვერსიის წინამორბედი უნდა ყოფილიყო. მაგრამ მალე გაირკვა, რომ ამ ავტომობილით, ცხოვრებას სრულიად ახალი მოდელი - ”ინსინია” იწყებდა, რომლითაც რიუსელსჰაიმელებმა პრემიუმ კლასში შებიჯება გადაწყვიტეს.

იმავდროულად, გამოცხადდა, რომ გერმანულ კომპანიას, რომელიც ”ჯენერალ მოტორსის” ევროპული შტოა, ”კალიბრას” აღდგენასთან დაკავშირებით, არანაირი გეგმები არ ჰქონდა. უფრო მეტიც, გაჩნდა ვარაუდი იმის შესახებ, რომ ”კალიბრას” ნაცვლად, ”ოპელი” ბაზარზე ”ასტრაზე” ბაზირებულ კუპეს გამოუშვებდა (კალიბრა მოდელ ვექტრას ბაზაზე მზადდებოდა).

მაგრამ ინგლისური გამოცემა ”ქარ”, მის ხელთ არსებული (დაუსახელებელი) წყაროს საფუძველზე ამტკიცებს, რომ GTC-ს ბაზაზე მეორე თაობის ოთხადგილიანი ”კალიბრას” წარმოების საკითხი გერმანულ კომპანიაში ჯერაც განიხილება. და თუ პროექტს მწვანე შუქს აუნთებენ, ახალი ავტომობილი ბაზარს 2013 წელს მოევლინება. და... დღესვე შეიძლება ვივარაუდოთ, რომ გარეგნულად ის მეტნაკლებად, ორკარიანი ”ინსინიას” შთაბეჭდილებას დატოვებს.

იმისათვის, რომ ახალმა ”კალიბრამ” მის მწარმოებელს მოგება მოუტანოს, ”ოპელმა” და მისმა ინგლისურმა ტყუპისცალმა ”ვოქსჰოლმა” წლიურად მინიმუმ 30 000 ცალი ”კალიბრა” უნდა აწარმოონ. ერის კიდევ ერთი გარემოება, რომელზეც ”ქარ-ის” ინკოგნიტო წყარო მიუთითებს. მისი თქმით:

”ამ და მსგავს პროექტებთან დაკავშირებით, ჩვენ გაცილებით თავდაჯერებულები ვიქნებით, თუ მათში მონაწილეობას ”ბიუიკი”, ”შევროლეს” ჩრდილო და სამხრეთამერიკული შტოები და ”სააბი” მიიღებენ და რისკის ნაწილს გადაინაწილებენ”. ამჟამად, შვედური ”სააბი” ამერიკული კონგლომერატის წევრი აღარაა, რაც იმას ნიშნავს, რომ ”ჯენერალ მოტორსის” ინკოგნიტო წარმომადგენელს ეს სიტყვები ამ წლის დასაწყისში უნდა ეთქვა...

მანქანის სახელის გამო, ”რენოს” ზოი რენო უჩივის

Woman Called Zoe Renault to Sue French Carmaker over Name Issue

20 მაისი

23 წლის პარიზელი სტუდენტი ზოი რენო უკმაყოფილოა იმით, რომ ფრანგული საავტომობილო კომპანია ”რენო”, თავის სუბკომპაქტურ ელექტრომობილისთვის ”ზოი-ს” დარქმევას აპირებს. უფრო მეტიც, როგორც ბრიტანული გაზეთი ”გარდიანი” იუწყება, მას თურმე ადვოკატიც კი დაუქირავებია იმისთვის, რომ კომპანიას მისი სახელის გამოყენების საშუალება არ მისცეს.

ადვოკატი, სახელად დავიდ კუბი აცხადებს, რომ საფრანგეთში დაახლოებით 30 000 ადამიანს ჰქვია ზოი და არცერთ მათგანს არ გაუხარდება, თუ ჯუჯა ელექტრომობილს მის სახელს დაუძახებენ. მან წერილით მიმართა ”რენოს” მთავარ აღმასრულებელ კარლოს გონს, რომელშიც წერს, რომ ავტომობილისთვის ვინმეს სახელის დარქმევა, ამ სახელის მატარებლების უფლებების შელახვაა.

”დამეთნხმებით, რომ არცერთ მშობელს არ ესიამოვნება, თუ სახელს, რომელიც მათ თავიანთ შვილს უწოდეს, მარკეტინგული მიზნით გამოიყენება”, - სწერს კუბი გონს. გაზეთ ”პარიზიენთან” საუბრისას, ზოი რენომ განაცხადა, რომ მას არ სურს, მისი სახელი ”რენოს” ელექტრომობილთან ასოცირდებოდეს. ”ნამდვილად არ მესიამოვნება, თუ ვინმე იტყვის - ”ზოი დაზიანდა”, ”ზოი დაიმტვრა”, ან რაღაც ამგვარს და მე ამას გავიგებ”, - ამბობს ზოი რენო.

სხვათა შორის, ის პირველი არაა, ვინც ”რენოს” გეგმებით უკმაყოფილოა. საფრანგეთში უკვე ამ სახელის ბევრმა მატარებელმა გამოთქვა თავისი უკმაყოფილება. ისინი პროტესტის ნიშნად, პეტიციებსაც კი გეგმავენ. თუმცა, შესაძლოა, რომ პროტესტები საჭირო არც გახდეს. ყოველ შემთხვევაში, ”რენოს” წარმომადგენელი აცხადებს, რომ მართალია, ”რენო” ამ სახელის დათმობას არ აპირებს, თუმცა ის მხოლოდ კონცეპტუალური მოდელისთვისგამოიყენა, რაც იმას არ ნიშნავს, რომ სერიულ ავტომობილსაც იგივე სახელი დარჩება.

”პეჟო” ”გოლფ GTI-ს” კონკურენტს პარიზისთვის ამზადებს

Peugeot Tries to Challenge Golf GTI

20 მაისი

”პეჟომ” ოფიციალურად გამოაცხადა, რომ წარმოებისთვის ჰეჩბეკ 308-ს დამუხტულ ვერსიას - 308 GTi-ს ამზადებს, რომელიც მხოლოდ ევროპულ ბაზარზე გაიყიდება. ახალი ავტომობილი მხოლოდ ხუთკარიან ძარას მიიღებს, მისი პრემიერა კი პარიზის საავტომობილო შოუზე გაიმართება.

”პეჟო 308-ს” ახალი მოდიფიკაცია 1.6-ლიტრიანი ტურბოძრავით აღიჭურვება, რომლის მაქსიმალური სიმძლავრეც 200 ცხენის ძალა, მაქსიმალური მაბრუნი მომენტი კი 275 ნიუტონმეტრი (1700-4500 ბრ/წთ დიაპაზონში) იქნება. ძრავს კი 6-საფეხურიანი ავტომატური კოლოფი შეუწყვილდება.

გარდა ამისა, პოპულარული ჰეჩბეკის ახალი ვერსია 1 სანტიმეტრით დადაბლებულ საკიდარს მიიღებს. ზამბარები და ამორტიზატორტები უფრო ხისტი გახდება. ავტომობილი 18-დუიმიან ბორბლებზე დადგება, რომლებიც 225/40 ზომის საბურავებით შეიმოსება. სამუხრუჭე სისტემა კი 340-მილიმეტრიანი (წინ) და 290-მილიმეტრიანი დისკოებით აღიჭურვება.

მთელი ამ ავლა-დიდებით, ”პეჟო 308 GTi” ადგილიდან 100 კმ/სთ სიჩქარის აკრეფას 7.7 წამში მოასწრებს, მისი მაქსიმალური სიჩქარე კი 237კმ/სთ-ს მიაღწევს. ამასთან, 100 კილომეტრის გასავლელად, ძრავს მხოლოდ 6.9 ლიტრი საწვავი დასჭირდება, ყოველ კილომეტრზე კი ის ატმოსფეროში 159 გრამ ნახშირორჟანგს გამოჰყოფს.

სწრაფ 308-ს სტანდარტულისგან შეცვლილი ბამპერები (ვერსიაСС-სგან აღებული), შავი ფერის დიფუზორით, უკანა ანტი ფრთით და სხვა ფორმის გამოსაბოლქვი მილებით გამოარჩევთ. გარდა ამისა, უკანა მარჯვენა ფარის გვერდზე გაჩნდება წარწერა Gti. სალონში, სტანდარტულ სავარძლებს სპორტულები შეცვლის, რომლებიც ტყავში იქნება გამოწყობილი. შეიცვლება საჭის რგოლი, ზოგიერთი დეტალი კი ალუმინის დეკორით გალამაზდება.

სხვათა შორის, დინამიკური მახასიათებლებით, 308 GTi-ს მისი კონკურენტები აშკარად სჯობნიან. მაგალითად, ”ფორდ ფოკუს ST-ს”, თავისი 225-ცხენისძალიანი ტურბო ძრავით, 0-100 კმ/სთ აჩქარება 6.8 წამში შეუძლია, 200-ცხენისძალიან ”ფოლკსვაგენ გოლფ GTI-ის” შესაბამისი მაჩვენებელი 6.9 წამია, ”შკოდა ოქტავია RS-ისა” კი - 7.2 წამი.

პარიზულ გამოფენამდე, ”პეჟო” თავის ახალ ავტომობილს პირველად ფრანგ დილერებს უჩვენებს, საფრანგეთში კი 308 GTi-ს ფასი 26 900 ევრო იქნება.