”იაგუარი” ჰიბრიდულ სუპერავტომობილ C-X75-ს გამოშვებას აპირებს

11 ოქტომბერი

კომპანია ”იაგუარი” პარიზში წარმოდგენილ კონცეპტუალურ ჰიბრიდულ ელექტრომობილ C-X75-ს წარმოების შესაძლებლობას განიხილავს და როგორც ჩანს, პროექტს მწვანე შუქსაც მალე აუნთებს. ამ ინფორმაციას ინგლისური ყოველკვირეული გამოცემა ”ავტოქარი” აქვეყნებს, რომელმაც ინფრმაციის წყარო უშუალოდ ინგლისურ კომპანიაში მოიძია.

ამ ეტაპზე, ”იაგუარის” ხელმძღვანელობა პროექტის რეალიზაციის ორ ვარიანტს განიხილავს: მათგან ერთის მიხედვით, სულ 1000 ცალი C-X75 დამზადდება, რომლებიც მეტწილად ხელით აიწყობა. მეორე ვარიანტით, ტირჟი 2000 ცალი ავტომობილია, რომელთა წარმოებისას, მნიშვნელოვნად მეტი იქნება ავტომატიზებული აწყობის წილი. ორივე ვარიანტით, თუ ავტომობილს აირტურბინულ ძრავებს შეუნარჩუნებენ, მაშინ ინგლისურ კომპანიას ამ აგრეგატების წარმოების დაწყებაც მოუწევს, რაც პროექტის განხორციელებას 5-7 წლით გადადებს.

”ორიდან სამ წლამდე დასჭირდება აირტურბინული ძრავების წარმოების დაწყებას, სამი-ოთხი წელი კი იმისთვისაა საჭირო, რომ ასეთი ძრავების სერიული ავტომობილის სტრუქტურაში ინტეგრირება მოხერხდეს”, - ”ავტოქართან” საუბრისას განაცხადა ”იაგუარის” ალტერნატიული ძალური დანადგარების განყოფილების შეფმა ტონი ჰარპერმა და დასძინა, რომ აირტურბინული ძრავები საკმაოდ გამძლე იქნება და წარმოებისთვის მათი მომზადებაც, შიდაწვის ძრავებზე გაცილებით იაფი დაჯდება.

”აირტურბინულ ძრავებში თითქმის არაფერი ტყდება. ამასთან, მათში 100-ჯერ ნაკლები დეტალი გამოიყენება, ვიდრე ჩვეულებრივ შიდაწვის ძრავებში. აქედან გამომდინარე, ისინი უფრო იაფიცაა”, - ამბობს ჰარპერი.

”ავტოქარის” ინფორმაციით, C-X75-ის ბდი მეტწილად სწორედ იმაზე იქნება დამოკიდებული, თუ რამდენად წარმატებული შეიძლება იყოს ჰიბრიდულ ძალურ დანადგარებში აირტურბინული აგრეგატების გამოყენება. ზემოთ ნათქვამის გარდა, ამ ძრავების კიდევ ერთი უდავო უპირატესობა მათი კომპაქტური ზომებია. აქედან გამომდინარე, ასეთი ძრავი კაპოტის ქვეშ მცირე ადგილს იკავებს, ეს კი ინჟინრებს იმის საშუალებას აძლევს, რომ სალონის მოცულობა გაზარდონ და მისი დამცავი სტრუქტურაც მეტად გააძლიერონ.

ცნობისათვის, პარიზში წარმოდგენილი კონცეპტუალური C-X75 ოთხი ელექტროძრავითაა აღჭურვილი, რომლებიც ჯამში 780 ცხენის ძალას და 1 600 ნიუტონმეტრს იძლევიან. თითოეული ძრავი (მათი სიმძლავრე 195 ცხენის ძალაა) ”თავის” ბორბალს ემსახურება, რაც იმას ნიშნავს, რომ ავტომობილს ყველა ბორბალი წამყვანი აქვს. ავტომობილის ბაზაშია განლაგებული ორი აირტურბინა, რომელთა სიმძლავრეც 188-188 ცხენის ძალაა. ორივე ელექტროგენერატორთანაა დაკავშირებული და მათ მიერ გამომუშავებული ენერგიის წყალობით, ავტომობილის სვლის სიშორე 900 კილომეტრს აღწევს. ისე კი, მარტო აკუმულატორების ბლოკში დაგროვილი ენერგია მხოლოდ 110 კილომეტრის გასავლელადაა სამყოფი.

სავარაუდოდ, ”იაგუარი” პროექტ C-X75-ს მწვანე შუქს აუნთებს და დროტა განმავლობაში, მასში გამოყენებულ ტექნოლოგიებს თავის სხვა მოდელებზეც დანერგავს.

კონცეპცია ”ჰალო ინტერსცეპტორი” - ავტომობილი, თვითმფრინავი და ნავი ერთ სხეულში

11 ოქტომბერი

ახლა ისევ ფანტომასი და მისი მფრინავი მანქანა გაგვახსენდება. უმეტესობას მაინც ის ფრთოსანი ”სიტროენი” გაახსენდება, რომლითაც ნიღბიანი მონსტრი ჰაერში პირუეტებს ხაზავს. ზოგი კი მფრინავ ავტომობილ ”ტერაფუჯას”, რომლის სერიული წარმოებაც მალე დაიწყება, უფრო მიმზიდველი გარეგნობით წარმოიდგენს.
თუმცა, ბრიტანელმა კონცეპტუალურმა დიზაინერმა ფილიპ პოლიმ ისეთი კონცეპტუალური ავტომობილი შეიმუშავა, რომელსაც იდეაში ფრენაც შეუძლია და ცურვაც და ამგვარად, უფრო უნივერსალურია, ვიდრე ”ტერაფუჯა”, ან ისევ ის ფანტომასის ფრთოსანი ”სიტროენი”. ავტორმა კონცეპციას ”ჰალო ინტერსცეპტორი” უწოდა და თან განმარტა, რომ ეს მუტანტი ავტომიბილიცაა, მოტორიანი ნავიც, თვითმფრინავიც და შვეულმფრენიც.
კონცეპტუალური აპარატი ჩვეულებრივი თვითმფრინავი იქნებოდა, გარეგნულად ავტომობილს რომ არ ჰგავდეს. უკანა ნაწილით ის ”ბუგატი ვეირონს” მოგაგონებთ, წინიდან კი სამბორბლიან ელექტრომობილ ”აპტერას” ჰგავს. მაგრამ ფრენის წინ, ფრთები და კუდი ”ეზრდება”. და, ასე განსაჯეთ, ადგილიდან 100 კმ/სთ სიჩქარეს სულ რაღაც 2.4 წამში ავითარებს, ფრენის მაქსიმალური სიჩქარე კი 500 კმ/სთ-ია. ჰო, ეს აუცილებლად უნდა აღინიშნოს, კონცეპტუალურ მფრინავ ავტომობილ ნავს კარებები თოლიას ფრთის სტილში ეღება.
როდესაც ნავად გადაკეთდება, ”ჰალოს” სიგრძე 11 მეტრს აღწევს, მისი სიჩქარე კი მფრინავ ვარიანტზე არანაკლებ შთამბეჭდავია - 117 კმ/სთ (63 კვანძი). კონცეპციის ავტორი არაფერს ამბობს თავისი ქმნილების იმ ვარიანტის დინამიკურ მახასიათებლებზე, რომელსაც ვერტიკალურად აფრენა და დაშვება შეუძლია. პოლი ამბობს, რომ მის ”ჰალოს” ეს თვისებებიც გააჩნია.

აშკარად შთამბეჭდავია, მაგრამ სამწუხაროდ, ასეთი მანქანა ჯერ არავის შეუქმნია და ის არაფერს ნიშნავს, რომ კონცეპტუალურ პროექტებზე მომუშავე დიზაინერს ასეთი მანქანის შექმნის იდეა მოუვიდა. საინტერესოა, ვის რაში დასჭირდება ასეთი სუპერ უნივერსალი? მარტო მფრინავი ავტომობილი რომ იყოს, სხვა საქმე იქნებოდა...

სხვათა შორის, ”მარტო” მფრინავი ავტომობილი პირველად შორეულ 1949 წელს შეუქმნია ვინმე ინჟინერ მულტონ ტეილორს. მან თავის საგზაო თვითმფრინავს უბრალოდ და მარტივად, ”აეროქარი” უწოდა. წარმოიდგინეთ, საკუთარი ერთძრავიანი თვითმფრინავით აეროპორტში ეშვებით, მერე მას საკუთარ კუთხეში დააყენებთ, მარტივი მოძრაობებით უცვლით მას უკანა და გვერდით ნაწილებს - ხსნით კუდსა და ფრთებს და სულ რაღაც ხუთ წუთში, ჯდებით მასში და ჩვეულებრივი გზით, საქმიან შეხვედრაზე, ან შინ გაეშურებით...

კარგია და თქვენ წარმოიდგინეთ, ტეილორმა სულ ექვსი ცალი ასეთი მფრინავი ავტომობილი შექმნა. ყველა გაიყიდა და როგორც ამბობენ, მათგან ორი ჯერაც მუშა მდგომარეობაშია...

”ჰიუნდაი სონატას” ხუთი ვარსკვლავი

11 ოქტომბერი

”ჰიუნდაის” საშუალო ზომის სედანმა ”სონატამ” აშშ-ის საგზაო უსაფრთხოების ეროვნული ადმინისტრაციის (NHTSA – ნეიშნლ ჰაივეი ტრაფიკ სეიფრი ედმინისტრეიშნ) ახალი, მნიშვნელოვნად გამკაცრებული სტანდარტებითაც, უსაფრთხოებაზე უმაღლესი, ხუთვარსკვლავიანი შეფასება დაიმსახურა.

2011 წლის ”სონატას” NHTSA-სგან ხუთი ვარსკვლავი თებერვლის ტესტების შემდეგაც ჰქონდა მიღებული, თუმცა ადმინისტრაციამ ახლახანს თავისი სტანდარტები გაამკაცრა და კორეულმა კომპანიამაც გადაწყვიტა, რომ თავისი ფლაგმანი კიდევ ერთხელ გამოეცადა, რათა მყიდველის კიდევ უფრო მეტი ნდობა მოეპოვებინა.

”ტრადიციულად, მარკა ”სონატა” საშუალო ზომის ავტომობილებს შორის, უსაფრთხოების დონეს კიდევ უფრო მაღლა სწევს ხოლმე და ამ მხრივ, გამონაკლისი არც ახალი ”სონატაა”. 2006 წლიდან მოყოლებული, ”სონატას” სტანდარტულ აღჭურვილობაში, სტაბილურობის ელექტრონული კონტროლის სისტემა შედის, 2011 წლის მოდელი კი უსაფრთხოების მხრივ, კიდევ ერთი წინ გადადგმული ნაბიჯია, რაც უსაფრთხოების მხრივ, მას თავისი კლასის ლიდერად წარმოაჩენს”, - ნათქვამია ”ჰიუნდაი მოტორ ამერიკას” მთავარი აღმასრულებელი ჯონ კრაფჩიკი

”ჰიუნდაი სონატას” სტანდარტულ ეკიპირებაში შედის: ექვსი აირ-ბალიში, მათგან ორი წინაა, კიდევ ორი, წინა სავარძლებს გვერდითა დაჯახებისას იცავს, უკანა სავარძლებს კი გვერდითა ფარდა-ბალიშები იცავს. წინა სავარძლებს აქვს თავის და კისრის დამცავი აქტიური სისტემები. ყველა დასაჯდომ პოზიციას აქვს უსაფრთხოების სამწერტილოვანი ღვედები, წინა სავარძლების ღვედებს წინასწარი დამჭიმები ემსახურება, რაც ღვედისგან ტრავმის მიღების ალბათობას ამცირებს. უკანა სავარძლებს კი ბავშვის სავარძლის სპეციალური სამაგრები აქვს. რაც მთავარია, ავტომობილის სალონი ფოლადის ზემტკიცე სტრუქტურითაა დაცული.

უსაფრთხოების აქტიური სისტემებიდან, ”სონატას” სტანდარტულ ეკიპირებაში შედის: სტაბილურობის ელექტრონული კონტროლი (ESC), ბლოკირების საწინააღმდეგო სისტემა (ABS) და მუხრუჭებზე ზეწოლის გადანაწილების ელექტრონული სისტემა (EBD), ასევე სისტემა ბრეიკ-ესისტ (მუხრუჭების დამხმარე), რომელიც ექსტრემალური დამუხრუჭებისას, მუხრუჭებზე მაქსიმალურ ძალას გადაანაწილებს.

ცნობისათვის, NHTSA-ს ახალი, გამკაცრებული სატესტო პროგრამა ამიერიდან გვერდითა ქრეშ-ტესტებსაც ითვალისწინებს. გარდა ამისა, მხედველობაში მიიღება სისტემები, რომლებიც ავარიის თავიდან არიდებას ემსახურება. დაკიდევ, ქრეშ (დაჯახებაზე) ტესტების დროს, ასევე იყენებენ მანეკენ ქალებს და იმ ექსტრემალურ სცენარებს, რომლებშიც შეიძლება ქალი იყოს გარეული.

”ფორდმა” შეიძლება სუპერ ავტომობილ GT-ს წარმოება განაახლოს

New GT for Ford?

9 ოქტომბერი

ამერიკულ ჟურნალ ”მოტორ ტრენდის” ინფორმაციით, რომელიც მას ”ფორდის” ხელმძღვანელობის წარმომადგენლებმა მიაწოდეს, ამერიკული კომპანია თავისი ლეგენდარული სპორტული სუპერ ავტომობილის, GT-ს წარმოების განახლების შესაძლებლობას განიხილავს.

”ცისფერმა ოვალმა” ეს ავტომობილი პირველად 2003 წელს აღადგინა და ის თავისი დაარსებიდან 100 წლის იუბილეს მიუძღვნა. თუმცა, ოთხი წლის შემდეგ, მისი წარმოება შეწყვიტა. დღეს კი, თუ მისი წარმოების განახლება გადაწყდა, ”ფორდი” აქცენტს ავტომობილის ეკონომიურობასა და ეკოლოგიურობაზე გააკეთებს. უფრო მეტიც, წყარო, რომელმაც ”მოტორ ტრენდს” ეს ინფორმაცია მიაწოდა, არც იმას გამორიცხავს, რომ ახალი GT შეიძლება ელექტრომობილის სახითაც აღდგეს.

ეს სვლა მით უფრო მოსალოდნელია, რომ ევროპული კომპანიები, როგორებიცაა ”მერსედეს ბენცი” და ”პორშე”, მალე დაიწყებენ თავიანთი მოდელების ეკოლოგიური ვერსიების წარმოებას. ასეთები მათ შარშან, ფრანკფურტის საავტომობილო შოუზე გამოფინეს და იქ მათზე საუკეთესო გამოხმაურება მიიღეს. ”პორშემ” ფრანკფურტში წარდგენილი კონცეპტუალური ”918 სპაიდერის” წარმოება გადაწყვიტა, ”მერსედესს” კი იგივე გეგმა SLS AMG-სთან დაკავშირებით აქვს. ორივე მოდელი ელექტროძრავების მაღალი სიმძლავრით გამოირჩევა და მათ სუპერ ავტომობილებისთვის დამახასიათებელი დინამიკური მაჩვენებლები აქვთ. ამგვარად, ელექტრული ”ფორდ GT” მათ ღირსეულ კონკურენტად შეიძლება მოევლინოს.

სხვათა შორის, თავიდან ”ფორდი” მხოლოდ 1000 ცალი წინა თაობის GT-ს გამოშვებას გეგმავდა, მაგრამ ამ ავტომობილზე იმდენად დიდი მოთხოვნა იყო, რომ ორ წელიწადში 1302 ავტომობილი დამზადდა, კიდევ ორი წლის შემდეგ კი ახალი GT-ს რაოდენობამ 3.5 ათასს მიაღწია. მაგრამ შემდეგ ”ცისფერ ოვალში” გლობალური რესტრუქტურიზაცია დაიწყეს და რატომღაც, ამ პროცესში GT-ს წარმოებაც შეწყვიტეს - უბრალოდ, კომპანიის უფროსობამ ჩათვალა, რომ ქარხანა, რომელიც ამ შესანიშნავ ავტომობილს უშვებდა, უნდა დახურულიყო.

წინა თაობის ”ფორდ GT” აღჭურვილი იყო V8 კონფიგურაციის 5.-ლიტრიანი ძრავით, რომელიც 550 ცხენის ძალას და 680 ნიუტონმეტრს იძლეოდა. ძრავთან შეწყვილებული იყო 6-საფეხურიანი მექანიკური კოლოფი. ამ ტანდემის წყალობით, ავტომობილის მაქსიმალური სიჩქარე 330 კმ/სთ იყო, თუმცა ისიც აღსანიშნავია, რომ მაქსიმალური სიჩქარე ელექტრონიკით იყო შეზღუდული.

თუ ახალი GT-ს წარმოება გადაწყდა, მისი ტირაჟი ისევ შეზღუდული იქნება.

ელექტრონული ”ოპელ მერივა” - ახალი ტექნოლოგიების ლაბორატორია

Opel Releases Meriva EV Details

8 ოქტომბერი

”ჯენერალ მოტორსის” გერმანული შტო ”ოპელი” ინტენსიურად მუშაობს ელექტრონული ტექნოლოგიების შემუშავებაზე და ამ მხრივ, ერთ-ერთი მოწინავეა ევროპულ კომპანიებს შორის. უკვე თითქმის დასრულებულია გაზრდილი სვლის მქონე ელექტრონულ ჰიბრიდ ”ოპელ ამპერას” შემუშავებისა და სრულყოფის პროცესი. პარალელურად კი რიუსელსჰაიმელები იმ ტექნოლოგიების შემუშავებასაც ეშურებიან, რომლებმაც ელექტრომობილების ენერგიით დამუხტვის პროცესი უნდა გაამარტივოს და გააიაფოს.

სწორედ ამ მიზნით მომზადდა მოდელ ”მერივას” ელექტრონული ვერსია. ეს ავტომობილი 60 კილოვატიანი (82 ცხენისძალიანი) ელექტრული ძრავითაა აღჭურვილი, რომელიც იმავდროულად, 215 ნიუტონმეტრ მაბრუნ მომენტსაც იძლევა. ელექტროძრავს ენერგიით ლითიუმ-იონური აკუმულატორების ბლოკი ამარაგებს, რომლის ტევადობაც საათში 16 კილოვატია. ეს მარაგი საკმარისია მხოლოდ იმისათვის, რომ ელექტრულმა ”მერივამ” 64 კილომეტრის გავლა შეძლოს. ამასთან, ავტომობილის მაქსიმალური სიჩქარე სულ რაღაც 130 კმ/სთ-ია. ცნობისათვის, მაქსიმალური სიჩქარე ხელოვნურადაა შეზღუდული, რადგან უფრო მეტ სიჩქარეზე ავტომობილის ენერგიის ხარჯი მნიშვნელოვნდ იზრდება.

თუმცა, ელექტრონული ”მერივასთვის” ეს მონაცემები მთავარი სულაც არაა. მისი დანიშნულება ისაა, რომ ”ოპელმა” და ”ჯენერალ მოტორსმა” ორმაგი დანიშნულების დამმუხტავი ტექნოლოგიები შეიმუშაონ. ასეთმა დასამუხტმა მოწყობილობებმა აკუმულატორების დამუხტვა როგორც საყოფაცხოვრებო, 230-ვოლტიანი, ასევე სწრაფად დამმუხტავი, 400-ვოლტიანი შტეპსელიდან უნდა უზრუნველყონ.

გარდა ამისა, ავტომობილი ასევე აღჭურვილია ექსპერიმენტული საზრიანი სისტემით, რომლის მეშვეობითაც, ის ჭარბ ენერგიას ქსელს იქით მიაწვდის. ესე იგი, მიკრო ელექტროსადგურის მოვალეობასაც შეასრულებს, თუმცა მის მიერ გამომუშავებული ენერგია ზღვაში წვეთი იქნება.

”ელექტრონული ”მერივა” საწარმოო მოდელს შეიძლება ჰგავს, მაგრამ რეალურად, ის მხოლოდ საკვლევი ლაბორატორიაა, რომელიც ოთხ ბორბალზე დგას და თავისით გადაადგილდება. მისი მეშვეობით, სწრაფად დამუხტვის პროცესს ვიკვლევთ. გარდა ამისა, ავტომობილს დასამუხტ მოწყობილობასთან ურთიერთობის უნარიც გააჩნია”, - ამბობს ”ოპელის” საინჟინრო განყოფილების ვიცე პრეზიდენტი რიტა ფორსტი.

ელექტრონული ”მერივა” არის შემადგენელი ნაწილი დიდი პროექტისა, სახელად ”მერეჯო მობილ”, რომელიც მომავლის ელექტრონული ავტომობილების ტექნოლოგიებზე მუშაობს. ამ პროექტის მონაწილე, პროფესორი ჰარტმუტ შმეკი ამბობს, რომ მომავლის ელექტრომობილები ელექტროქსელში ენერგიის სტაბილიზატორის მოვალეობის შესრულებასაც შეძლებენ. თუმცა, ამისათვის არაერთი ახალი ტექნოლოგიის შემუშავება იქნება აუცილებელი.

”აუდი” ”კვატროს” წარმოებას ”ჯუჯაროს ჩააბარებს

Audi to build reborn Quattro

8 ოქტომბერი

პარიზის საავტომობილო გამოფენის ერთ-ერთი ყველაზე გამორჩეული ექსპონატი ”აუდი კვატრო” იყო, ავტომობილი, რომელიც გერმანულმა კომპანიამ ამავე სახელწოდების მქონე ლეგენდარული ავტომობილის შექმნიდან 30 წლის იუიბილეს მიუძღვნა. ინგოლშტადტელებმა ამ ავტომობილზე იმდენად კარგი გამოხმაურება მიიღეს, რომ შესაძლოა, მისი მცირესერიული წარმოებაც კი გადაწყვიტონ. არადა, თავიდან ის მხოლოდ საიუბილეო პროტოტიპად იყო ჩაფიქრებული.

თუ ”აუდის” ხელმძღვანელობა ”კვატროს” მწვანე შუქს აუნთებს, მის წარმოებას ალბათ ცნობილ იტალიურ დიზაინ ატელიე ”იტალდიზაინ ჯუჯაროს” ჩააბარებენ. ცნობისათვის, ცოტა ხნის წინ, ეს კომპანიაც, რომელიც ბოლო წლებში ვერაფრით ახერხებდა კრიზისიდან თავის დაღწევას, ”ფოლკსვაგენის” დიდი ოჯახის წევრი გახდა, რომელშიც ”აუდიც” შედის.

”აუდის” ქვეგანყოფილება ”აუდი კვატროს” ხელმძღვანელი შტეფან რაილი ამბობს, რომ მის კომპანიას თითქმის არ აქვს მცირესერიული წარმოების გამოცდილება. ”აუდის” ტექნიკურ ცენტრში უკვე გადაწყვეტილი აქვთ, თუ რა ტექნიკურ აღჭურვილებას მიიღებს ”კვატრო”, თუ მისი წარმოება გადაწყდება. თუმცა, ეს ჯერ ყველაფერს არ ნიშნავს. ”აუდის” სამარკეტინგო გამოკვლევის ჩატარება მოუწევს, რათა დაადგინოს, რამდენად წარმატებული შეიძლება გახდეს ახალი წამოწყება.

სავარაუდოდ, ავტომობილის შასი ფოლადისგან დამზადდება, ძარის სხვადასხვა ელემენტებისთვის კი ალუმინსა და კარბონის კომპოზიტს გამოიყენებენ. აგრეგატების თავიდან შემუშავება კი არ მოუწევთ - ძრავს მოდელ TT RS-სგან აიღებენ, სრულამძრავიან ტრანსმისიას კი, რომელსაც აქტიური უკანა დიფერენციალი აქვს, - მოდელ RS5-სგან. სხვათა შორის, კარბონის კომპოზიტის სერიულ ავტომობილებში გამოყენების ტექნოლოგიები კარგად აქვს დამუშავებული ”ფოლკსვაგენის” ჯგუფში შემავალ კიდევ ერთ იტალიურ კომპანია ”ლამბორგინის”, რომელმაც პარიზშივე სწორედ კარბონისგან დამზადებული კონცეპტუალური სუპერ ავტომობილი ”სესტო ელემენტო” (მეექვსე ელემენტი) წარადგინა. მოკლედ, მსუბუქი მასალების ფართოდ გამოყენების წყალობით, ”კვატროს” წონა 1300 კილოგრამზე მეტი არ იქნება, ამას კი სპორტული ავტომობილის დინამიკური მახასიათებლებისთვის დიდი მნიშვნელობა აქვს.

რაც შეეხება ძრავს, წინასწარი მონაცემებით, სერიულ ავტომობილზეც იმავე აგრეგატს გამოიყენებენ, რითაც კონცეპტუალური ”კვატროა” აღჭურვილი. ესაა (TT RS-ის) 2.5-ლიტრიანი ხუთცილინდრიანი ტურბომოტორი, რომლის სიმძლავრეც 406 ცხენის ძალაა. სხვათა შორის, სერიული TT RS-ის ძრავის სიმძლავრე ”მხოლოდ” 350 ცხენის ძალაა, თუმცა პროტოტიპზე დაყენების წინ, მას მცირე მოდიფიკაცია ჩაუტარდა.

რაილის თქმით, სერიული ”აუდი კვატროს” ფასი ევროპაში 100 000 ევროზე მეტი არ იქნება.

სენსაცია - ”ტრაბანტის” სიჩქარემ 235 კმ/სთ-ს მიაღწია

Trabant Reaches Record Speed of 146 mph (235 km/h)

7 ოქტომბერი

ერთ დროს, აღმოსავლეთ გერმანია თავის ერთადერთ მოდელ ”ტრაბანტით” ამაყობდა. კომუნისტურ გერმანიაში ამ ავტომობილის გამოშვება 50-იანი წლების მიწურულს დაიწყეს. მას იმ დროისთვის შეიძლება აქტუალური გარეგნობა ჰქონდა, მაგრამ ისიც მალე დაუძველდა და ამის მიუხედავად, წარმოების ბოლომდე შეინარჩუნა. ამასთან, ავტომობილს არქაული, ორტაქტიანი მხრჩოლავი ძრავი ამოძრავებდა. მოკლედ, პატარა ურჩხული იყო, მაგრამ ამის მიუხედავად, დღესაც უამრავი თაყვანისმცემელი ჰყავს.

ასეთი თაყვანისმცემლები არიან ძმები, მაიკ და რონი ურლანდები, რომლებმაც უსახური და პრაქტიკულად უსარგებლო ”ტრაბანტისგან” სიჩქარის ნამდვილი მონსტრი შექმნეს. ვიღას გაახსენდება ძველი ”ტრაბი”, როდესაც ურლანდების მიერ მოდერნიზებული მანქანის მონაცემებს გაეცნობა - ბრიტანულ გამოცემა ”ტელეგრაფის” ცნობით, ის 235 კმ/სთ-ს ავითარებს.

არადა, ”ტრაბანტის” საუკეთესო მიღწევა 201 კმ/სთ იყო და ეს სიჩქარე გინესის რეკორდების წიგნშიც კი ჰქონდათ შეტანილი. ცნობისათვის, ორიგინალური ”ტრაბანტის” მაქსიმალური სიჩქარე სულ რაღაც 113 კმ/სთ იყო. თავიანთი რეკორდი კი ურლანდებმა გერმანიის ქალაქ როთენბურგის აეროპორტში დაამყარეს.

ძმებმა ავტომობილის ძრავს მოდიფიკაცია თავად ჩაუტარეს. გარდა ამისა, მნიშვნელოვნად შეიცვალა ”ტრაბის” ძარა, რომელსაც აეროდინამიკური ელემენტები დაემატა. გაიზარდა ავტომობილის წინა და უკანა ბორბლების კვალი, შესაბამისად, მნიშვნელოვნად დაიბერა ოთხივე ფრთა, რომელთა შიგნიღაც განიერი საბურავები ჩაჯდა. რა თქმა უნდა, სპორტულ ყაიდაზე მომართეს საკიდარი, რომელიც უფრო ხისტი გახდა, მისი წყალობით კი ”ტრაბი” მოსახვევებს გაცილებით უკეთ გადის.

ავტომობილის სახურავზე ზორბა ”ლაყუჩი” გამოჩნდა, რომელიც გაზრდილი აპეტიტის მქონე ძრავისთვის ჰაერს აგროვებს. შეიცვალა გარეთა სარკეები - ახლებს პატარა ფართობი აქვთ, რითაც ჰაერის შემხვედრ ნაკადს ნაკლებ წინააღმდეგობას უწევენ.

დაბოლოს, მოდიფიცირებული ”ტრაბი” ურლანდებმა ბერლინის კედლის დანგრევას და ორი გერმანიის გაერთიანების ოცი წლის იუბილეს მიუძღვნეს.

”სმარტი” სუბკომპაქტურ სეგმენტშიც გამოვა

smart forfour Teaser Images

7 ოქტომბერი

”დაიმლერისა” და ”რენო-ნისანის” პარტნიორული თანამშრომლობა მალე პირველ შედეგს გამოიღებს - გერმანული კომპანიის ამერიკული შტოს წარმომადგენლებმა დაადასტურეს, რომ მერმისს, წლის ბოლოს, ამერიკულ ბაზარზე პირველი ხუთკარიანი ”სმარტი” გამოჩნდება, რომელიც ”სმარტის” საწარმოო პროგრამაში, მოდელ ”ფორთუს” ადგილს დაიკავებს.

ახალი ავტომობილი ”ნისანის” პოპულარულ ჰეჩბეკ ”მიკრას” ბაზაზე იქმნება და როგორც ”დაიმლერი” ირწმუნება, ის მხოლოდ ამერიკული ბაზრისთვის იქნება განკუთვნილი. ამერიკული ბაზრისადმი გამოჩენილი ყურადღების მიზეზი ისაა, რომ შარშან ”სმარტს” იქ გაყიდვები ფაქტობრივად ჩაუვარდა. არადა, ერთი წლით ადრე, იქ ”სმარტზე” თითქმის ბუმი იყო. ჩავარდნის შემდეგ, ”სმარტის” თითქმის ყველა, 75-ვე დილერი აღიარებდა, რომ მარკას კიდევ ერთი, B-სეგმენტის მოდელი ესაჭიროება. როგორც ჩანს, ”დაიმლერი” ხუთკარიანი ჰეჩბეკის გამოშვებას უფრო ადრეც ფიქრობდა. სწორედ ამიტომ გააფორმა ფრანგულ-იაპონურ ალიანსთან პარტნიორული ხელშეკრულება.

ცნობილია, რომ ახალი სმარტი იმ პლატფორმაზე აიგება, რომელსაც ”ნისანი” ჰეჩბეკ ”მიკრასა” და უახლეს სუბკომპაქტურ ქროსოვერ ”ჯუკზე” (სხვათა შორის, ამ ავტომობილზე ევროპასა და იაპონიაში ნამდვილი ბუმია) იყენებს. ძრავების და ტრანსმისიის შესახებ, ”დაიმლერს” ჯერჯერობით არაფერი უთქვამს, თუმცა არსებობს ვარაუდი, რომ ხუთკარიანი ”სმარტი” მხოლოდ ბენზინზე მომუშავე ძრავებს მიიღებს. მათგან ერთი იქნება 1.0-ლიტრიანი სამცილინდრიანი აგრეგატი (ამ აგრეგატს დაიმლერი და ნისანი ერთობლივად შეიმუშავებენ), რომელსაც საწვავი ნარევი უშუალოდ წვის კამერაში მიეწოდება.

სხვათა შორის, ასეთ მოკლე დროში ახალი ავტომობილის გამოჩენა იმის აშკარა დასტურია, რომ ახალი ავტომობილი, ფაქტობრივად სახეშეცვლილი ”მიკრა” იქნება. ცნობისათვის, დაახლოებით ასევე იქცევა ”ასტონ მარტინი”, რომელიც ”ტოიოტას” ჯუჯა IQ-ს ბაზაზე, თავის ”სუპერ” ჯუჯა ”სიგნიტს” ქმნის.

როგორც გამოცემა ”ავტომოტივ ნიუსი” იტყობინება, ”მიკრას” ბაზაზე შექმნილი სუბკომპაქტური ”სმარტი” ბაზარზე სულ სამ წელს დაჰყოფს, შემდეგ კი მას სრულიად ახალი მოდელი ”ფორფორ” (ოთხისთვის) შეცვლის, რომელსაც კომპანია მთელ მსოფლიოში გაჰყიდის.

მოდელი ”ფორფორ” პირველად ”სმარტის” საწარმოო პროგრამაში 2004 წელს გამოჩნდა. გერმანულმა კომპანიამ ის იაპონურ ”მიცუბიშისთან” ერთად, ამ უკანასკნელის მოდელ ”კოლტის” ბაზაზე შექმნა. მაგრამ დაბალი მოთხოვნის გამო, მისი წარმოება ორ წელიწადში შეწყდა. რაც შეეხება ”ფორთუს”, ის ამერიკაში პირველად 2008 წელს შეიტანეს და პირველივე წელს დაახლოებით 25 000 ცალი გაყიდეს. მაგრამ შარშან მოთხოვნა მოულოდნელად დაეცა, წელს კი კომპანია ”პენსკეს”, რომელიც ”დაიმლერის” ამერიკელი პარტნიორია, მხოლოდ 4 779 ”ფორთუ” აქვს გაყიდული.

რაც შეეხება ”დაიმლერისა” და ”რენო-ნისანის” პარტნიორობას, ის მარტო ერთი მოდელის ერთობლივად შემუშავებით არ შემოიფარგლება. უკვე დაწყებულია ახალი ”ფორთუს” შესამუშავებლად, რომელიც პლატფორმას მომავალი თაობის ”რენო ტვინგოსგან” გაიზიარებს. უფრო მოგვიანებით კი, იმავე ბაზაზე კაბრიოლეტის, კუპეს და მიკროვენ ”ფორ მორის” გამოშვებაც იგეგმება.

”მინი ქანთრიმენი” რალის მსოფლიო ჩემპიონატისთვის ემზადება

2010 Paris Auto Show: MINI Countryman WRC

3 ოქტომბერი

”მინი” რალის მსოფლიო ჩემპიონატს უბრუნდება, სადაც თავისი უახლესი მოდელით, ქროსოვერ ”ქანთრიმენით იასპარეზებს. რბოლებისთვის ავტომობილს კი ინგლისური კომპანია ”პროდრაივი” ამზადებს, რომელიც არცთუ დიდი ხნის წინ, საჩემპიონო მანქანებს ”სუბარუსთვის” ქმნიდა.

”მინიმ” პირველი სარბოლი ავტომობილი პარიზის ავტო შოუზე გამოფინა, სადაც გამოცხადდა, რომ ეს მანქანა მომავალი სეზონის რეგლამენტის შესაბამისადაა მომზადებული. მომავალი სეზონი ”მინისთვის” მხოლოდ სავარჯიშო იქნება და ამიტომ, გუნდი მხოლოდ რამდენიმე ეტაპზე იასპარეზებს, მისი ერთ-ერთი მანქანის საჭეს კი ბრიტანელი კრის მიიკი მიუჯდება. 2012 წლის სეზონში კი ყველა ეტაპზე მონაწილეობა იგეგმება.

”პროდრაივის” შეფი დევიდ რიჩარდსი იქადნის, რომ ”მინის” გუნდი თავისი პირველი სრული სეზონიდანვე ჩაერთვება ტიტულისთვის ბრძოლაში. პარალელურად, მისი კომპანია ამ მანქანას სხვა, კერძო გუნდებსაც მიჰყიდის და მათაც მოემსახურება, რაც ”პროდრაივს” მანქანის სრულყოფაში დაეხმარება.

სარბოლი ავტომობილი 1.6-ლიტრიანი ტურბოძრავითაა აღჭურვილი, რომელიც რალის მსოფლიო ჩემპიონატზე მოქმედ რეგლამენტს შეესაბამება. მასთან შეწყვილებულია სერია Xტრეკის 6-საფეხურიანი სექვენტალური გადაცემათა კოლოფი. სარბოლი ”მინი” მთლიანად შეესაბამება საერთაშორისო საავტომობილო ფედერაციის (FIA) სერია S2000-ის რეგლამენტს, რაც იმას ნიშნავს, რომ მას მსოფლიო ჩემპიონატში (WRC) მონაწილეობის უფლებაც ექნება. შესაბამისად, მის სახელწოდებას აბრევიატურა WRC-ც დაემატება.

”პარიზის საავტომობილო გამოფენა საუკეთესო ადგილია იმისათვის, რომ ეს მანქანა ყველას ვაჩვენოთ. გამოხმაურება ცნობაზე, რომ ჩვენ რალის მსოფლიო ჩემპიონატს ვუბრუნდებით, ძალიან დადებითი იყო. ეს ჩემპიონატი იმის შესანიშნავი საშუალებაა, რომ ჩვენმა კომპანიამ თავისი მებრძოლი სულისკვეთება გამოავლინოს. მანქანის მომზადების პროცესი გეგმის შესაბამისად მიმდინარეობს. მინდა ვთქვა, რომ სერიული ”მინი ქანთრიმენი” მისთვის შესანიშნავი ბაზისი გამოდგა”, - პარიზის ავტო შოუზე გამოსვლისას განაცხადა ”ბეემვეს” მმართველი საბჭოს წევრმა იან რობერტსონმა, ვინც გერმანული კომპანიის მარკეტინგისა და გაყიდვების საქმეებს განაგებს.

”კია პოპი” კორეული ჯუჯა ელექტრომობილი პარიზში

Kia POP Concept

3 ოქტომბერი

კორეულმა კომპანია ”კიამ”, პარიზის საავტომობილო შიუსთვის ჯუჯა ელექტრომობილი ”პოპ-ი” მოამზადა. ეს არის სამადგილიანი მანქანა, რომელიც კონცეპტუალურ ”რეის” სტილშია შესრულებული. თავის მხრივ, კორეელებმა ”რეი” წლის დასაწყისში, ჩიკაგოს ავტო შოუზე გვიჩვენეს. ”კიას” განმარტებით, ”პოპ-ში” ”მომავლის ურბანული ელექტრომობილის ხედვაა ასახული”.
შესაძლოა, ამ ავტომობილის გარეგნობა ბევრს არ მოეწონოს და მას ზედმეტად არაამქვეყნიური უწოდოს, მაგრამ თქმა არ უნდა, მის მსგავსს ვერც გზებზე ნახავთ და ვერც სხვა კომპანიების კონცეპტუალურ ნამუშევრებს შორის. ”კიას” დიზაინის შეფ პეტერ შრაიერის თქმით, ”პოპ-ი” ისე გამოიყურება, როგორიც შეიძლება იყოს შემდეგი თაობის ავტომობილების მომდევნო მოდელები. ანუ, იმ დროის ავტომობილები, რომლებსაც მწარმოებლები უკვე ელექტრომობილების ერაში გამოუშვებენ.

რა თქმა უნდა, ”პოპ-ს” საერთო არაფერი აქვს ”კიას” ახლანდელ კორპორატიულ სტილთან. ისიც საეჭვოა, ამ კონცეპციის დიზაინიდან რაიმე ელემენტი კორეული კომპანიის მოდელებზე უახლოეს მომავალში ვიხილოთ. ეს უფრო მომავლის ფორმების ძიებაა და ამ ძიებაზე საზოგადოების აზრის შესწავლის მცდელობა.

გამოფენაზე, ”კიას” ამ კონცეპტუალური ავტომობილის ინტერიერზე ყურადღება არ გაუმახვილებია, თუმცა იმის ვარაუდი მაინც შეიძლება, რომ სერიულ მანქანებზე მსგავსი რამ არ გადავა. სალონში ყველაზე საინტერესო სავარძლების განლაგებაა - ორი მათგანი წინაა მოთავსებული, მესამე კი - მათ უკან.

”პოპ-ს” კარებები ქვევიდან ზევით, ეგრეთ წოდებული თოლიას ფრთის სტილში ეღება, როგორც ეს ”ლამბორგინის” ავტომობილებზეა. სალონში ყველაფერი მინიმალისტურ სტილშია შესრულებული. ანუ, საჭის რგოლის გარდა, იქ თითქმის ვერ ნახავთ მართვის დამხმარე საშუალებებს და მაჩვენებლებს. მათ მაგივრობას კი უნივერსალური თაჩ-სქრინ მონიტორი ასრულებს.

ავტომობილი ჯუჯა ზომებით გამოირჩევა. მისი სიგრძე 3.00, სიგანე 1.74, სიმაღლე 1.49, ბაზა კი 2.055 მეტრია. ”პოპ-ი” საკმაოდ მძლავრი, 68-ცხენისძალიანი ელექტროძრავითაა აღჭურვილი, რომელიც მაქსიმუმ 190 ნიუტონმეტრ მაბრუნ მომენტსაც გამოიმუშავებს. ძრავს ენერგიით ლითიუმ პოლიმერული აკუმულატორების ბლოკი ამარაგებს, რომელსაც სრული დამუხტვისთვის 6 საათი ესაჭიროება. მაღალი ძაბვის დამმუხტავი კი მას ენერგიით ნახევარ საათში ავსებს. ”კია პოპ-ის” მაქსიმალური სიჩქარე 160 კმ/სთ-ს აღწევს, მისი სვლის სიშორე კი 140 კილომეტრია.

”ლოტუსის” პარიზული ექსპანსია

Lotus in Paris Auto Show

1 ოქტომბერი

ეკოლოგიური ”სიტი ქარ”

პარიზის საავტომილო შოუზე ყველაზე მრავალრიცხოვანი დებიუტანტებით პატარა ინგლისური კომპანია ”ლოტუსი” გამოირჩევა, რომელმაც სპეციალისტების და შოუს დამთვალიერებლის წინაშე, ერთბაშად ხუთი ისეთი მოდელი წარადგინა, რომლებიც მალე მის სამოდელო გამას შეავსებენ. გარდა ამისა, ”ლოტუსის” სტენდზე ასევე შესაძლებელია კონცეპტუალური საქალაქო ავტომობილის (მას სახელიც შესაბამისი აქვს - ლოტუს სიტი ქარ) ხილვა.

მართალია, სპორტული ხუთეული განსაკუთრებულ ყურადღებას იქცევს, მაგრამ ”ლოტუსის” ექსპოზიციის განხილვა მაინც პატარა საქალაქო ავტომობილის კონცეპციით დავიწყოთ.

ამ ავტომობილს სამი კარი და ოთხი სავარძელი აქვს. ის, როგორც საქალაქო ავტომობილს შეეფერება, მომცრო გაბარიტებით გამოირჩევა, თუმცა შედარებით დიდი კვალიც აქვს. ”ლოტუსისგან” გასაკვირი არ უნდა იყოს, რომ ქალაქის ავტომობილსაც სპორტული შესახედაობა აქვს. სპორტულობის ეფექტს კი განსაკუთრებით დაბალი კლირენსი და დაქანებული საქარე მინა აძლიერებს.

რაც მთავარია, ავტომობილს მბიძგველ ძალას, ”ლოტუსის” ინჟინრების მიერ შემუშავებული ჰიბრიდული სისტემა ანიჭებს. ამ სისტემაში შედის სამცილინდრიანი 1.2-ლიტრიანი შიდაწვის ძრავი 47 ცხენის ძალით და მუდმივ დენზე მომუშავე ელექტროძრავი, რომელიც 54 კილოვატ სიმძლავრეს იძლევა. ელექტროძრავს ენერგიით აკუმულატორების ბლოკი კვებავს, რომლის ტევადობაც 14.8 კილოვატია საათში. შიდაწვის ძრავი ბენზინზე მუშაობს, თუმცა მის საწვავად ასევე ეთანოლის გამოყენებაც შეიძლება.

ჰიბრიდულ სისტემაში ძირითადი ელექტროძრავია, რომელიც ბორბლებთან ერთსაფეხურიანი ტრანსმისიითაა დაკავშირებული. შიდაწვის აგრეგატი კი დამხმარე მოვალეობას ასრულებს - მასთან დაკავშირებულ გენერატორს ელექტროენერგიის გამომუშავებაში ეხმარება, რისი წყალობითაც, ავტომობილის სვლის სიშორე მნიშვნელოვნად იზრდება. კერძოდ, თუ აკუმულატორებში დაგროვილი ენერგია მხოლოდ 60 კილომეტრის გასავლელადაა საკმარისი, შიდაწვის ძრავისა და მასთან ერთად, გენერატორის ჩართვის შემდეგ, ”სიტი ქარის” სვლის სიშორე 500 კილომეტრამდე იზრდება.

ავტომობილი, რომელიც 1400 კილოგრამს იწონის, ადგილიდან 100 კმ/სთ-მდე აჩქარებას 9 წამს ანდომებს, მისი მაქსიმალური სიჩქარე კი 170 კმ/სთ-ია. როცა მანქანა მხოლოდ აკუმულატორების ხარჯზე დადის, მას ნულოვანი გამონაბოლქვი აქვს. როცა საქმეში შიდაწვის ძრავი ერთვება, ყოველი კილომეტრის გავლისას, ატმოსფეროში მხოლოდ 60 გრამი ნახშირორჟანგი გამოიყოფა.

ლოტუსის სპორტული ხუთეული

ბევრმა ავტომწარმოებელმა, თავისი სიახლეები საზოგადოებას პარიზის ავტო შოუს გახსნამდე კარგა ხნით ადრე, ინტერნეტით გააცნო. ინგლისურმა ”ლოტუსმაც” აღიარა, რომ გამოფენისთვის სიახლეებს ამზადებდა, მაგრამ თუ მის პავილიონში ერთბაშად ხუთი ახალი სპორტული ავტომობილი იდგებოდა, ამას ძნელად თუ ვინმე წარმოიდგნდა.

მაგრამ სწორედ ასე მოხდა. პატარა კომპანია, რომელიც უკვე კარგა ხანია, მალაიზიური ”პროტონის” ჯგუფის წევრია, სპეციალისტებს და დამთვალიერებელს სიტყვებით - ”მომავალი აქ იწყება”, შეეგება. მართლაც, ასეთი მრავალფეროვანი პროგრამა ”ლოტუსს” მაშინაც კი არ ჰქონია, როდესაც მას ამ კომპანიის დამაარსებელი, ლეგენდარული ინჟინერი და მენეჯერი კოლინ ჩეპმენი უძღვებოდა. ერთბაშად ხუთი სხვადასხვა კლასის სპორტული ავტომობილის (თუნდაც კონცეპტუალურის) დებიუტი ”ფერარისაც” კი არ დაესიზმრება.

თანაც, ხუთივე ავტომობილი საზოგადოებას შოუ ბიზნესის ვარსკვლავებმა წარუდგინეს. ავტომობილებისთვის შალითების მოხსნის პატივი კინოვარსკვლავებს, მიკი რურკს და სტივენ ბალდუინს, ასევე როკის ვარსკვლავ ბრაიან მეის ერგოთ. სხვათა შორის, ”ლოტუსი” თავისი ძველი მოდელების სახელებს აცოცხლებს. მალე მის გამაში ისევ გამოჩნდება ”ესპრიტი”, ”ელიტი” და ”ელანი”.

დაკიდევ, სიახლეების შტორმის გამო, გამოფენის პრესის დღეს თითქმის ყველა აღიარებდა, რომ პარიზის ავტო შოუზე ”ლოტუსი ბატონობს”...

ლოტუს ესპრიტი

”ესპრიტით” დავიწყოთ. სხვა თუ არაფერი, თავისი პრეზენტაციების სერია ”ლოტუსმა” სწორედ ამ მანქანით დაიწყო. ამ სახელის მატარებელი ავტომობილი გასული საუკუნის 80-იან წლებში თვით ”ფერარის” კვიცებსაც კი უწევდა კონკურენციას. განსაკუთრებით კი მისი დიზაინი გამოირჩეოდა, რომელმაც სპორტული ავტომობილების ახალ მოდას ჩაუყარა საფუძველი - ამ მოდის მიხედვით, იმ დროის სპორტსმენების წინა ფარები კაპოტის ქვეშ იმალებოდა. გარდა ამისა, მაშინდელ ”ესპრიტს” თითქმის ჰორიზონტალური საქარე მინა ჰქონდა. მართალია, ის მანქანა 2.0-ლიტირნი ძრავით იყო აღჭურვილი, თუმცა ბრწყინვალე (იმ დროისთვის შესაფერის) დინამიკური მახასიათებლებით გამოირჩეოდა.

ახალი ”ესპრიტი” კომპანიის საწარმოო პროგრამის გვირგვინადაა ჩაფიქრებული და შესაბამისად, ის ყველაზე ძლიერი აგრეგატითაც აღიჭურვება. ესაა ”ლექსუსისგან” ნასესხები (ლოტუსი და ტოიოტა დიდი ხნის პარტნიორები არიან) 5.0-ლიტრიანი V8, რომელიც 620 ცხენის ძალას იძლევა და რომლის მეშვეობითაც ავტომობილი სტადარტულ აჩქარებას (0-100 კმ/სთ) 3.5 წამში ახერხებს, მისი მაქსიმალური სიჩქარე კი 330 კმ/სთ იქნება.

გარდა ამისა, ავტომობილი კინეტიკური ენერგიის რეკუპერაციის სისტემითაცაა (კერს-ით) აღჭურვილი, რომელსაც ძრავის სიმძლავრის მყისიერი გაზრდა შეუძლია. ძრავთან 7-საფეხურიანი რობოტიზებული კოლოფია შეწყვილებული. ჯერჯერობით სულ ესაა, რაც გაცოცხლებულ ”ესპრიტზე” შეიძლება ითქვას. ჰო, კიდევ ის, რომ ეს ავტომობილი დაახლოებით 175 000 დოლარი ეღირება და მისი გაყიდვები სავარაუდოდ, 2013 წელს დაიწყება.

ლოტუს ეტერნი

”ლოტუსისთვის” ეს აბსოლუტური სიახლეა. ოთხკარიანი კუპეებს კლასში ”ლოტუსი” დებიუტანტია. ამ მანქანის სახელიც ინგლისური კომპანიისთვის ახალია. ”ეტერნი” იგივე აგრეგატებითაა აღჭურვილი , რომლებითაც ”ესპრიტი”. ინგლისური კომპანია აცხადებს, რომ ამ ავტომობილის მყიდველს, ოპციის სახით, ჰიბრიდულ სისტემასაც შესთავაზებენ, რომლის ორი ელექტროძრავიც მოქმედებაში წინა ბორბლებს მოიყვანს, შიდაწვის ძრავი კი უკანა ბორბლებს მოემსახურება.

ჰიბრიდული სისტემის გარეშე კი, ”ეტერნს” ისედაც შესანიშნავი მახასიათებლები აქვს. ძრავის მონაცემებზე ზემოთაც ითქვა. მისი მეშვეობით ავტომობილი ნულიდან 100 კმ/სთ სიჩქარეს 4 წამზე ნაკლებში აკრეფს. ”ლოტუს ეტერნს” ბაზარზე ისეთი ძლიერი კონკურენტები ეყოლება, როგორებიცაა ”პორშე პანამერა” და ”ასტონ მარტინ რეპიდი”. ეს ავტომობილი ბაზარზე ორ-სამ წელიწადში უნდა გამოჩნდეს.

ლოტუს ელიტი

”ელიტიც”, რომელში ჩასაჯდომი ფორმულაცაა 2+2, იმავე 5.0-ლიტრიანი V8 ძრავითაა აღჭურვილი. თუმცა, ამ მოდელისთვის, ”ლოტუსი” მყიდველს ამავე აგრეგატის კიდევ ორ მოდიფიკაციას შესთავაზებს, რომელსაც ორი ტურბოდამჭირხნი მოემსახურება. მოდიფიკაციის მთავარი მიზანი ეკონომიურობის გაუმჯობესებაა. რაც შეეხება სიმძლავრეს, ერთი ვერსიისთვის ის 540 ცხენის ძალა იქნება, მეორესთვის კი - 610 ცხენის ძალა. ნებისმიერი მოდიფიკაციის შემთხვევაში, ავტომობილი ასევე კერს-ით და 7-საფეხურიანი კოლოფითაც აღიჭურვება. ”ელიტის” გაყიდვების დაწყებაც ორ-სამ წელიწადშია მოსალოდნელი.

ლოტუს ელანი

იმავე პერიოდში დაიწყება მოდელ ”ელანის” წარმოება. ეს კონცეპტუალური ავტომობილი V6 კონფიგურაციის 4.2-ლიტრიანი აგრეგატითაა აღჭურვილი, რომელიც 450 ცენის ძალას იძლევა. ძრავთან 7-საფეხურიანი ავტომატია შეწყვილებული. ოპციის სახით კი მყიდველს კერს-საც შესთავაზებენ. აღნიშნული ძრავის წყალობით, 1295-კილოგრამიანი ”ელანი” სტანდარტულ აჩქარებას 3.5 წამში შეძლებს. ”ელანის” გაყიდვები 2013 წელს დაიწყება და ის დაახლოებით 120 000 დოლარი ეღირება.

ლოტუს ელისი

დაბოლოს ”ელისი”, რომელსაც კომპანიის ხელმძღვანელობა ”ლოტუსის” მომავალს უწოდებს. ამის მიზეზი კი ისაა, რომ ეს მომცრო ზომის კუპე ყველაზე იაფი და მასობრივია ინგლისური კომპანიის საწარმოო პროგრამაში. ფოტოზე თვალის ერთი შევლებაც საკმარისია იმის აღსაქმელად, რომ ახლანდელი ”ელისის” დიზაინი წარსულს ბარდება. არადა, მან ”ლოტუსს” სიცოცხლე შეუნარჩუნა და იმის საშუალებაც მისცა, რომ ფეხზე დამდგარიყო. თუმცა, იმის თქმა კი შეიძლება, რომ ახალი ”ელისიც” მისი წინამორბედივით მკვირცხლი და მანევრული იქნება. ბაზარზე მის გამოჩენას 2015 წელს უნდა ველოდოთ.

სხვათა შორის, ”ლოტუსს” პარიზში არაფერი უთქვამს იმის შესახებ, თუ რა ბედი ეწევა მის ორ ახლანდელ მოდელს - ”ევორასა” და ”ევროპას”. სავარაუდოდ, ისინი ინგლისური კომპანიის საწარმოო პროგრამაში ადგილს შეინარჩუნებენ.

სუპერ ელექტრომობილი საკუთარი იუბილესთვის

Jaguar C-X75 Concept

30 სექტემბერი

ინგლისურ დიდ კატას, რომელიც საავტომობილო სამყაროში ”იაგუარის” სახელითაა ცნობილი, დაარსებიდან 75 წელი შეუსრულდა და ამ თარიღთან დაკავშირებით, პარიზის შოუსთვის, გაზრდილი სვლის სიშორის მქონე ელექტრონული კონცეპტუალური სუპერ ავტომობილი მოამზადა, რომელსაც იუბილესთან დაკავშირებით, C-X75 უწოდა.

ავტომობილი ოთხი ელექტროძრავითაა აღჭურვილი, რომელთა ჯამური სიმძლავრე 780 ცხენის ძალას, მაბრუნი მომენტი კი 1600 ნიუტონმეტრს აღწევს. ელექტროძრავები ბორბლებშია მოთავსებული და მათვე ამოძრავებენ. გარდა ამისა, ავტომობილის შუაში გაზზე მომუშავე ორი ტურბინა განლაგდა, რომლებიც მათთან დაკავშირებული გენერატორების დახმარებით, ელექტროენერგიას გამოიმუშავებენ. თითოეული ტურბინის სიმძლავრე 180 ცხენის ძალაა.

მარტო ლითიუმ-იონურ აკუმულატორებში დაგროვილი ელექტროენერგია საკმარისია იმისათვის, რომ ელექტრომობილმა დაახლოებით 100 კილომეტრი გაიაროს. მაგრამ როდესაც ტურბინები ამუშავდება, ავტომობილის სვლის სიშორე 900 კილომეტრამდე იზრდება. რაც არანაკლებ მნიშვნელოვანია, ტურბინების მუშაობის დროს, ყოველი კილომეტრის გავლისას, C-X75 ატმოსფეროს მხოლოდ 28 გრამი ნახშირორჟანგით აბინძურებს.

ოთხი მძლავრი ელექტროძრავის დახმარებით, საიუბილეო სუპერ ელექტრომობილი, რომელიც 1350 კილოგრამს იწონის, ადგილიდან 100 კმ/სთ-მდე აჩქარებას 3.4 წამში ასწრებს, 80-დან 145 კმ/სთ-მდე მას 2.3 წამი ჰყოფნის. მაქსიმალური სიჩქარე კი 330 კმ/სთ-ს აღწევს.

ძრავის გარდა, ამ ავტომობილის აეროდინამიკური პაკეტიც ყურადღებას იმსახურებს. ჯერ ერთი, ძარა ალუმინისგანაა შესრულებული. მეორეც, აეროდინამიკური წინააღმდეგობის კოეფიციენტი საკმაოდ ცოტა - 0.32-ია. რაც მთავარია, ავტომობილის ძირზე განლაგებულია ეგრეთ წოდებული ვენტურის მილი, რომელიც მის ქვეშ გაუხშოებულ არეს წარმოქმნის და ასე მიიღება გრაუნდ ეფექტი. ეს კი ბორბლებზე დინამიკურ დატვირთვას ზრდის. აეროდინამიკური დანიშნულებით, ასევე გამოიყენება გამობოლქვილი გაზის ჭავლი.

და კიდევ ერთი საინტერესო ფაქტი: ”იაგუარის” განცხადებით, კონცეპტუალური C-X75-ის მიხედვით შეიძლება იმაზე მსჯელობაც, თუ როგორი გარეგნობა ექნება ამ კომპანიის ახალ ავტომობილებს.

”ლამბორგინი” მეექვსე ელემენტის მომთვინიერებელი გახდა

Lamborghini Sesto Elemento Concept, the Carbon Surprise

30 სექტემბერი

ყველაფერი უფრო მარტივადაა, ვიდრე ერთი შეხედვით ჩანს. ”ლამბორგინიმ” თავის კონცეპტუალურ სუპერ ავტომობილს, ”სესტო ელემენტო”, ანუ მეექვსე ელემენტი უწოდა და არა ”ჯოტა”, როგორც ნავარაუდები იყო. ავტომობილის შასი და ძარა, თითქმის მთლიანად ნახშირბადის კომპოზიტისგანაა დამზადებული. მეექვსე ელემენტიც ნახშირბადია, რომელსაც ქიმიური ელემენტების ტაბულაში მეექვსე ადგილი უკავია. თავისი სახელის აღსანიშნავად, კონცეპტუალური ავტომობილი შავ, ნახშირბადის ფერადაა შეღებილი. და, იტალიურმა კომპანიამ, ეს ნახშირბადოვანი საოცრება პარიზის საავტომობილო შოუზე გამოფინა.

ეს ავტომობილი არამხოლოდ იმითაა გამორჩეული, რომ მასში ფართოდაა გამოყენებული ნახშირბადის კომპოზიტი. მის შესაქმნელად, სანტ’აგატა ბოლონეზელებმა ახალი ტექნოლოგიური ციკლი გამოიყენეს, რომლის შემუშავებაშიც მონაწილეობა ვაშინგტონის უნივერსიტეტის და აეროკოსმოსურ კომპანია ”ბოინგის” სპეციალისტებმაც მიიღეს.

დაკიდევ, ავტომობილის პრემიერამდე ერთი თვის განმავლობაში, მისადმი მედიის ინტერესის გაღვივების მიზნით, ”ხარებმა” ინტერნეტით 6 ფოტო ტიზერი გამოაქვეყნეს, რომლითაც ნაწილ-ნაწილ გვიჩვენეს თავიანთი ”მეექვსე ელემენტის” სხვადასხვა დეტალები.

გარეგნულად, ”მეექვსე ელემენტი” სტელსის ტიპის თვითმფრინავს ჰგავს. საქარე მინა და ფსევდო კაპოტი თითქმის ერთ სიბრტყეშია მოთავსებული, რაც ”ლამბოს” ტრადიციული სტილია და ჰაერის მინიმალურ წინააღმდეგობას წარმოქმნის. ეს ფსევდო კაპოტი თითქმის მთლიანად ფარავს რადიატორის ბადეს, მის ქვეშ კი დიდი ზომის სპოილერია, რომელიც ჰაერს რადიატორისკენ და ფრთებისკენ მიმართავს.

ამავე სტილშია შესრულებული უკანა სპოილერი და მის ქვემოთ დიფუზორი, რომლებიც ასევე ჰაერის ნაკადის სწორად მიმართვას ემსახურებიან. იგივე დანიშნულებას ასრულებს უკანა ანტი ფრთა, რომლის საყრდენებთანაც ნამწვი აირების თითო გამოსაბოლქვია. ყურადღებას იმსახურებს კაპოტიც, რომელსაც იმდენივე სავენტილაციო ნახვრეტი აქვს, რამდენი ცილინდრიც V10 ძრავს. ამ ნახვრეტების წინ კი წყვილი ჰაერის ამღებია, რომელთა დანიშნულებაც ძრავისთვის ჰაერის ”შეგროვებაა”.

სიმარტივით გამოირჩევა ”სესტო ელემენტოს” ინტერიერი, რომელიც მინიმალისტურ სტილშია შესრულებული. მინიმალისტურში იმიტომ, რომ აქ ვერ ნახავთ მაჩვენებლების და დამხმარე მოწყობილობათა დაფას. საჭის რგოლის უკან ერთადერთ მრავალფუნქციურ მონიტორს წააწყდებით, რომელიც ყველაფერში დაგეხმარებათ. მოკლედ, საეჭვოა, რომ ამ სახით, ინტერიერმა ”სესტო ელემენტოს” საწარმოო ვერსიამდეც მიაღწიოს.

ალბათ საინტერესო იქნება, თუ გეტყვით, რომ კარბონმა ამ ავტომობილში ისეთ დეტალებშიც კი შეაღწია, როგორებიცაა კარდანის ლილვი, გამოსაბოლქვი მილები და საკიდარის წევები. ლაპარაკი აღარაა იმაზე, რომ მონოკოკური შასიც მთლიანად კარბონის კომპოზიტისგან დამზადდა. გამოსაბოლქვ მილებში კი კარბონის ბოჭკო შუშის ბოჭკოთია არმირებული და როგორც ”ლამბორგინი” ირწმუნება, ეს დეტალები 900 გრადუს ტემპერატურასაც კი უძლებს.

კარბონის ფართოდ გამოყენების შედეგი ისაა, რომ ”სესტო ელემენტო” სულ რაღაც 999 კილოგრამს იწონის. თუ გავითვალისწინებთ იმასაც, რომ 5.2-ლიტრიანი V10 ძრავი 570 ცხენის ძალას იძლევა (მისი მაბრუნი მომენტი ოთხ წამყვან ბორბალს შორის თანაბრად ნაწილდება), გამოვა, რომ ავტომობილის ყოველ 1.75 კილოგრამზე თითო ცხენის ძალა მოდის. ამ ფარდობის წყალობით, მას ადგილიდან 100 კმ/სთ სიჩქარის აკრეფა 2.5 წამში შეუძლია, მაქსიმალური სიჩქარე კი 354 კმ/სთ-ს მიაღწევს.

პარიზულ გამოფენაზე, ”ლამბოს” წარმომადგენლებს არაფერი უთქვამთ იმის შესახებ, აპირებენ, თუ არა ”სესტო ლემენტოს” წარმოებას. სამაგიეროდ, კომპანიის შეფი შტეფან ვინკლმანი აცხადებს, რომ ამ კონცეპციისთვის შემუშავებულ ტექნოლოგიებს, მომავალში სხვა მოდელების წარმოების დროსაც გამოიყენებენ.

”სესტო ელემენტო” - ”ლამბორგინის” ნახშირბადოვანი კონცეპცია

Lamborghini Sesto Elemento Concept, the Carbon Surprise

29 სექტემბერი

რა თქმა უნდა, ამ ავტომობილს საერთო არაფერი აქვს ჰოლივუდის ფილმ ”მეხუთე ელემენტთან” და არც უცხოპლანეტელებთან. იტალიური კომპანიის მარკეტოლოგებმა მარტივად გადაწყვიტეს - რამდენადაც ნახშირბადს ქიმიურ ელემენტთა ტაბულაში მე-6 ადგილი უკავია, ავტომობილსაც ამიტომ უწოდეს ”სესტო ელემენტო”, ანუ ”მეექვსე ელემენტი”.
და რა შუაშია ნახშირბადი? შუაში კი არა თავშია - ავტომობილის კონსტრუქცია თითქმის მთლიანად ნახშირბადის ბოჭკოს კომპოზიტისგანაა დამზადებული. ”ხარების” ამ მეექვსე ელემენტის დანიშნულება, პარიზის საავტომობილო შოუზე, ”ლამბორგინის” ტექნოლოგიური შესაძლებლობების დემონსტრაციაა. ეს კი იმისთვისაა საჭირო, რომ სანტ’ა აგატელები თავიანთი მომავალი სუპერ ავტომობილების წარმოებისას, ნახშირბადის კომპოზიტის ფართოდ გამოყენებას აპირებენ და ამ ავტომობილით, თავიანთი მომავალი პროდუქტების პროპაგანდას ეწევიან.

”ლამბორგინიმ” ამ კონცეპტუალური ავტომობილის ფოტო ტიზერების გამოქვეყნება, პარიზული შოუს დაწყებამდე ერთი თვით ადრე დაიწყო. ტიზერებში ხაზგასმით ჩანდა ნახშირბადის კომპოზიტით დამზადებული დეტალები. თუმცა, ფოტო ტიზერების კომენტირებისას, დასავლური საავტომობილო გამოცემები გამოთქვამდნენ ვარაუდს, რომ იტალიურ კომპანიას პარიზისთვის თავისი უახლესი სუპერ ავტომობილი, სახელად ”ჯოტა” ჰქონდა მომზადებული და ტიზერებით მისადმი ინტერესს წინასწარ აღვივებდა.

ფრანგული ვებგვერდი ”ბლოგ აუტომობილ” გვაუწყებს, რომ კარბონის ფართოდ გამოყენების წყალობით, ”სესტო ელემენტო” სულ რაღაც 999 კილოგრამს იწონის. მის ბაზაში კი ის მძლავრი V10 აგრეგატია ჩადგმული, რომელიც მოდელ ”სუპერლეგარას” ემსახურება. იმავე გამოცების ცნობით, ამ ძრავის მეშვეობით, ავტომობილი ადგილიდან 100 კმ/სთ სიჩქარის აკრეფას 2.5 წამში შეძლებს, მისი მაქსიმალური სიჩქარე კი 354 კმ/სთ იქნება.

დაბოლოს, ამ ინფორმაციის წყარო ჯერ მხოლოდ ზემოთ ნახსენები ფრანგული საიტია. ასე რომ, მის ოფიციალურ დადასტურებას ახლა ”ლამბორგინისგან უნდა ველოდოთ. ცდა კი დიდხანს არ მოგვიწევს - ყველაფერი ამ დღეებში, პარიზის ავტო შოუს დაწყებისთანავე გაირკვევა...