”ბეემვეს” 1-ლი სერიის M კუპე პრემიერის წინ

BMW 1 Series M Coupe Official Details

15 დეკემბერი

ტრადიციისამებრ, ”ბეემვე” თავისი ყველა მოდელის ტემპერამენტიან ვერსიას ამზადებს, რომელსაც ინდექსად M ეწერება. ამ ინდქსის მატარებელი ავტომობილები დიდი პოპულარობით სარგებლობს, რამაც ბავარიელებს სპეციალური სატუნინგო შტოს - M-ის ჩამოყალიბებისკენ უბიძგა. და, როგორც კი ბაზარზე მათი ახალი ავტომობილი გამოვა, M-ის სპეციალისტები მაშინვე შეუდგებიან ხოლმე მის სრულყოფას. ასე მოხდა 1-ლი სერიის კუპეს შემთხვევაშიც. მის M ვერსიის გამოჩენას ავტოსამყარო მოუთმენლად ელოდა და ეს მოლოდინი ახლახანს დასრულდა.
ოღონდ, სანამ მათი ახალი შედევრის შესახებ მოვყვებით, მის სახელზე უნდა შევჩერდეთ. ტრადიციისამებრ, მოდერნიზებულ ავტომობილს სახელად M1 ერგებოდა, მაგრამ ეს სახელი ”დაკავებულია” - ის იმ სარბოლ მონსტრს ერქვა, რომელიც ბავარიელებმა 1978 წელს დაამზადეს და სამი წელი უშვებდნენ. ბუნებრივია, კომპანიის ხელმძღვანელობამ, იმ შუაძრავიანი სუპერავტომობილის სახელის სხვა ავტომობილისთვის დარქმევა არ ისურვა.

გამოსავალი მარტივად მოიძებნა - 1-ლი სერიის M კუპე. ამ სახელით შეინიღბა ავტომობილი, რომელიც კუპე ”ბეემვე 135i-ს” ბაზაზე დამზადდა. გაზრდილი ბამპერების ხარჯზე, ავტომობილი სიგრძეში 20 მილიმეტრით (4380 მილიმეტრამდე) გაიზარდა. სიგანში კი 55 მილიმეტრი (1803 მმ-მდე) მოემატა. გაიზარდა ბორბლების კვალიც. წინ 70 მილიმეტრით (1541 მმ-მდე), უკან კი - 46 მილიმეტრით (1543 მმ-მდე).

ყურადღებას იქცევს ავტომობილის გარეგნობაში შეტანილი ერთი ცვლილება -

წინა ბამპერის კიდეებში, ბორბლების წინ, მას ვერტიკალური ლაყუჩები აქვს. ბავარიული კომპანიის სპეციალისტები განმარტავენ, რომ ამ ლაყუჩების მიერ შეგროვილი ჰაერი, ბორბლების წინ ერთგვარ საჰაერო ფარდას წარმოქმნის, რაც ბორბლების თაღების არეში ჰაერის ტურბულენტური არეალის წარმოქმნას უშლის ხელს.

რაც შეეხება ძრავს, ავტომობილი აღჭურვილია 3.0-ლიტრიანი 6-ცილინდრიანი (რიგში განლაგებული ცილინდრებით) ძრავით, რომელიც წყვილი ტურბოდამჭირხნის მეშვეობით, 340 ცხენის ძალას (5 900 ბრ/წთ-ზე) და 450 ნიუტონმეტრს (1 500-4 500 ბრ/წთ-ზე) ავითარებს. ამ აგრეგატით, 1 495-კილოგრამიანი ავტომობილი ადგილიდან 100 კმ/სთ სიჩქარის აკრეფას 4.9 წამში ასწრებს, 200 კმ/სთ-მდე კი 17.3 წამი სჭირდება.

სხვათა შორის, ძრავის ანალოგიური მონაცემები აქვს ”აუდის” უახლეს RS3-ს, რომელიც 1-ლი სერიის M კუპეზე მძიმე კია (1 585 კგ), მაგრამ ადგილიდან ასს უფრო სწრაფად - 4.6 წამში კრეფს. როგორც ჩანს, ”ოთხი რგოლის” უპირატესობას 7-საფეხურიანი რობოტიზებული კოლოფი S ტრონიკი განაპირობებს, რომელიც გადაცემის საფეხურების უსწრაფეს ცვლას უზრუნველყოფს. ბავარიულ M-ის ძრავის მაბრუნი მომენტის გადამუშავება 6-საფეხურიან მექანიკას ევალება. ”აუდის” ავტომობილი კი სრულამძრავიანი ტრანსმისიითაცაა აღჭურვილი.

სამაგიეროდ, 1-ლი სერიის M კუპემ თავი გერმანულ ავტოდრომ ნურბურგრინგზე შესანიშნავი შედეგით გამოიჩინა - ტრასის ჩრდილოური დიდი მარყუჟი 8 წუთსა და 12 წამში გაიარა.

1-ლი სერიის M კუპეს მსოფლიო პრემიერა დეტროიტის საავტომობილო შოუზე, იანვარში გაიმართება, თუმცა პირველი მყიდველი სასურველ ავტოს მხოლოდ მაისში მიიღებს. გერმანიაში ამ ავტომობილის სასტარტო ფასი 50 500 ევრო იქნება, 500 ევროთი მეტი, ვიდრე ”აუდი RS3” ღირს.

”გემბალა” ”კაიენ ტორნადოთი” დაბრუნდა

Gemballa is Back: Tornado 2011 Porsche Cayenne

15 დეკემბერი

მიუხედავად იმისა, რომ რამდენიმე თვის წინ, მისი დამაარსებელი უვე გემბალა სამხრეთ აფრიკაში, გაურკვეველ ვითარებაში მოკლეს, კომპანია ”გემბალა” არსებობას მაინც აგრძელებს. მისმა მთავარმა აღმასრულებელმა ანდრეას შვარტსმა და ინვესტორმა შტეფენ კორბახმა სახელოვანი გერმანული სატუნინგო კომპანია აღადგინეს და ახალი შედევრიც გაამზადეს.

”გემბალას” სპეციალისტებმა ამჯერად ისედაც შესანიშნავი ”პორშე კაიენის” დახვეწა გადაწყვიტეს და დასახულ ამოცანას, თავი შესანიშნავად გაართვეს. მათ ნახელავს კი სახელად ”ტორნადო” ეწოდა - სახელი პირდაპირ მიგვანიშნებს იმაზე, რომ ჩვენს წინაშე ნამდვილი სტიქიაა, რომელიც მის პატრონს, ექსტრემალური მართვით უზარმაზარი სიამოვნების მინიჭებას პირდება.

”გემბალას” სპეციალისტებმა პირველ რიგში, ”კაიენის” ძარის პანელების შეცვლაზე იზრუნეს. ჯერ ერთი, ახალი პანელები კარბონის კომპოზიტისგან დამზადდა. მეორეც, შეიცვალა მთლიანად ავტომობილის დიზაინი. მან უფრო აგრესიული გამომეტყველება მიიღო. კარბონით შეიცვალა კაპოტი, წინა ფრთები, ზღურბლი, კარებები და უკანა ნაწილის ზოგიერთი დეტალი. კარბონიზაციის წყალობით, ავტომობილმა წონში 70 კილოგრამი დაიკლო.

რა თქმა უნდა, მოდერნიზაცია ”კაიენის” ძრავსაც ჩაუტარდა. ახალი პროგრამა შეიყვანეს ძრავის მართვის ბლოკში, რისი წყალობითაც, 4.8-ლიტრიანი ორ ტურბოიანი V8 აგრეგატის სიმძლავრე 500-დან 580 ცხენის ძალამდე გაიზარდა. მაქსიმალურმა მომენტმა კი 30 პროცენტით, 1000 ნიუტონმეტრამდე მოიმატა. ეგ კიდევ არაფერი, ”გემბალა” ძრავის კიდევ უფრო გაძლიერებას აპირებს. შედგენილია ”ტორნადოს” ტუნინგის პროგრამა, რომელიც ძრავის სიმძლავრის 670-700 ცხენის ძალამდე გაზრდას ითვალისწინებს.

”კაიენის” სპორტ პაკეტში ასევე შევიდა 22-დუიმიანი ბორბლები და მათში ჩამჯდარი ”ბრემბოს” სამუხრუჭე სისტემები. წინა სამუხრუჭე დისკოების დიამეტრი 420 მილიმეტრია, უკანებისა კი - 405 მილიმეტრი.

ცვლილებბი ჯერ არ შეხებია ”კაიენის” ინტერიერს, თუმცა ”გემბალა” აცხადებს, რომ პროექტი ჯერ ბოლომდე მიყვანილი არაა და ავტომობილის სრულყოფის მორიგი ეტაპი სწორედ სალონს შეეხება.

ლეპტოპის ელემენტები ელექტრომობილებისთვის

Toyota, Daimler, BMW adopt Tesla's laptop battery strategy for Evs

14 დეკემბერი

შევროლე ვოლტი

..............................

საავტომობილო ინდუსტრია საკმაოდ მაღალი ტემპით გადადის ელექტრომობილების წარმოებაზე. თუმცა არსებობს გარემოება, რომელიც ამ ტემპს ანელებს და ეს გარემოება აკუმულატორების სიძვირეა - თანამედროვე ელექტრომობილების ფასის ნახევარზე მეტი სწორედ აკუმულატორების ბლოკზე მოდის. სიძვირის გარდა, ლითიუმ-იონური აკუმულატორები (რომლებიც ამ როლში ჯერჯერობით მაინც საუკეთესო ვარიანტად რჩება) არც საკმარისი ტევადობით გამოირჩევა და შედარებით მალეც გამოდის მწყობრიდან.

მოკლედ, პრობლემა ბევრია, რომელთაგან ყველაზე მეტად ელექტრომობილების დამკვიდრებას მაინც აკუმულატორების სიძვირე უშლის ხელს. ბუნებრივია, ავტომწარმოებელთა უპირველესი საზრუნავი ისეთი ტექნოლოგიების შემუშავებაა, რომლებიც აკუმულატორების მნიშვნელოვან გაიაფებას გამოიწვევს.

ნისან ლიფი

..............................

ამ მხრივ, მიგნებად შეიძლება ჩაითვალოს კალიფორნიულ კომპანია ”ტესლა მოტორზის” მიერ ლეპტოპის აკუმულატორებისგან შედგენილი კვების ბლოკის გამოყენება. როგორც ირკვევა, ლეპტოპების ცილინდრული ელემენტებისგან შედგენილი ბლოკი იმდენად იაფია, რომ სწორედ მათი გამოყენება გადაწყვიტეს ისეთმა დიდმა კომპანიებმა, როგორებიც ”ტოიოტა”, ”დაიმლერი” და ”ბეემვეა”. თუმცა ისიც ფაქტია, რომ ”ჯენერალ მოტორსი”, ”ნისანი” და ”მიცუბიში” სპეციალურად ავტომობილებისთვის დამზადებულ აკუმულატორებს იყენებენ და სწორედ ამ კომპანიებმა დაასწრეს სხვებს ბაზარზე პირველი ელექტრომობილების გამოშვება.

ანალიტიკოსები ირწმუნებიან, რომ საავტომობილო ლითიუმ-იონური ელემენტების სიძვირეს მხოლოდ ის ფაქტი განაპირობებს, რომ ჯერჯერობით მასობრივად მათი წარმოება არ ხდება. ლეპტოპებს კი მასობრივად უშვებენ და აქედან გამომდინარე, მათი ელემენტებიც გაცილებით იაფია.

ლითიუმ-იონური აკუმულატორების წარმოებაში მსოფლიო ლიდერის, იაპონურ ელექტრონულ გიგანტ ”სანიოს” მონაცემებით, ავტოსექტორის მოთხოვნის წყალობით, ამ ტიპის ელემენტების ბიზნესის მოცულობა მთელს მსოფლიოში, სამზე მეტჯერ გაიზრდება. ცნობისათვის, ამ ბაზრის მოცულობა დღეისათვის 1.5 ტრილიონი იენია, მალე კი ის 5 ტრილიონამდე (დაახლოებით 60 მილიარდ დოლარამდე) გაიზრდება.

”ედვანსდ რისერჩის” ტოკიოს ოფისის ანალიტიკოსი კოძი ენდო ამბობს, რომ ელექტრომობილების წარმოების მოცულობის ზრდის კვალობაზე, ელემენტების ფასიც კლებას დაიწყებს და საბოლოოდ, ელექტრომობილების თვითღირებულება, მათი შესაბამისი კლასის შიდაწვისძრავიანი ავტომობილების თვითღირებულებაზე დაბლა დაიწევს. ამას კი შედეგად, ავტომობილების საცალო ფასის კლება მოჰყვება.

პირველი ელექტრომობილები

მინის ელექტრომობილი

..............................

დღეს მასობრივად ელექტრომობილებს მხოლოდ ორი კომპანია - ”ჯენერალ მოტორსი” და ”ნისანი” უშვებს. მალე მათ ”ფორდი”, ”ტოიოტა”, ”რენო” და ”ფოლკსვაგენი” შეუერთდებიან. შედარებით მცირეა ”მიცუბიშის” წარმოება, რომელიც სუბკომპაქტური გაბარიტების ელექტრომობილს ”პეჟოსა” და ”სიტროენისთვისაც” გამოუშვებს.

”ბლუმბერგ ნიუ ენერჯი ფაინენსის” მონაცემებით, ბაზარზე არსებული ელექტრომობილების (შევროლე ვოლტის და ნისან ლიფის) ფასის თითქმის სამ მეოთხედს აკუმულატორების ფასი შეადგენს. სწორედ ესაა იმის მიზეზი, რომ კომპაქტური ”შევროლე ვოლტი” ამერიკაში 41 000 დოლარი, დაახლოებით იმავე ზომის ”ნისან ლიფი” კი 32 780 დოლარი ღირს (ორივე აცვტომობილის ფასს, აშშ-ის მთავრობის მიერ ელექტრომობილებზე დაწესებული საგადასახადო შეღავათები აკლდება).

მაგრამ, ყოველივეს მიუხედავად, ანალიტიკური კომპანია ”ჯეი დი პაუერ ენდ ესოშიეიტიდი” აცხადებს, რომ წელს მთელ მსოფლიოში დაახოებით 945 000 ჰიბრიდული და ელექტრული ავტომობილი გაიყიდება. რა თქმა უნდა, აქედან უმეტესობა ჰიბრიდი იქნება. ეს რიცხვი, მსოფიო ავტოწარმოების დაახლოებით 2.2 პროცენტია. იმავე ”ბლუმბერგ ნიუ ენერჯი ფაინენსის” გათვლებით, 2020 წელს გაყიდვების მოცულობაში, ჰიბრიდების და ელექტრომობილების წილი 9 პროცენტამდე გაიზრდება.

დავუბრუნდეთ ისევ ”ტესლა მოტორზს”. მისი ელექტრული სპორტული როდსტერისთვის აკუმულატორებს ”სანიო” ამზადებს, რომელიც ”პანასონიკის” იმპერიის ნაწილია. ამ უკანასკნელს, ”ტესლას” 30 მილიონი აქცია აქვს ნაყიდი და მასვე ლითიუმ-იონური აკუმულატორებით (სანიოს მარკის) ამარაგებს. ”პანასონიკის” გარდა, ”ტესლა მოტორზის” აქციონერები ”დაიმლერი” და ”ტოიოტაც” არიან, რომლებიც კალიფორნიული კომპანიის მიერ შემუშავებული ტექნოლოგიებითაც სარგებლობენ.

ლეპტოპის ელემენტები ავტომობილებში

ტესლა როუდსტერი

..............................

პირველად ეს იდეა ”ტესლამ” დაამუშავა, რომელმაც 109 000 დოლარად ღირებული თავისი ელექტრო როდსტერი ”პანასონიკის” წარმოების 6 831 ცალი ცილინდრული პატარა ელემენტისგან შემდგარი ბლოკით აღჭურვა. კალიფორნიელებს მალე ”დაიმლერმა” მიბაძა, რომელმაც ”სმარტის” და A-კლასის ჰეჩბეკის ელექტრული ვერსიებისთვის, აკუმულატორების ბლოკები ”ტესლას” დაამზადებინა.

იგივე გზა აირჩია ”ტოიოტამაც”, რომელიც მალე უგზოობის ელექტრომობილ RAV4-ს გამოუშვებს. ლეპტოპის ელემენტებისგან შემდგარი ბლოკებითაა აღჭურვილი ის 450 ცალი ელექტრული ”მინიც”, რომლებიც ”ბეემვემ” ლიზინგით გაჰყიდა. ანალოგიური ელემენტების გამოყენების შესაძლებლობას, ”ფოლკსვაგენის” კალიფორნიული კვლევითი ცენტრიც სწავლობს.

დიდი ზომის, ეგრეთ წოდებული საავტომობილო ლითიუმ-იონური აკუმულატორები კილოვატზე 700-800 დოლარი ღირს. შედარებისთვის, ლეპტოპის მომცრო ელემენტებისგან შექმნილი ბლოკის ღირებულება, ყოველ კილოვატზე 200 დოლარამდე ღირს.

ელექტრული ტოიოტა RAV4

..............................

განსხვავება შესამჩნევია და ბადებს კითხვას - რატომ არ იყენებენ ”ჯენერალ მოტორსი” და ”ნისანი” ასეთსავე აკუმულატორებს? უბრალოდ, როდესაც მათ თავიანთ ელექტრომობილებზე მუშაობა დაიწყეს, თავიდანვე დიდი ზომის ლითიუმ-იონური აკუმულატორები აირჩიეს, რადგან პატარა ელემენტების მწარმოებლებს, ავტომობილებისთვის ამ ელემენტების გამოსაშვებად, რესურსები არ ჰყოფნიდათ (ჯერჯერობით, არც ახლა ჰყოფნით). დღეს კი, თუ აკუმულატორების შეცვლას მოინდომებენ, ავტომობილის კონსტრუქციაც შესაცვლელი ექნებათ, რაც უზარმაზარ ხარჯებთანაა დაკავშირებული.

ცნობისათვის, ”შევროლე ვოლტისთვის” აკუმულატორებს ”ჯენერალ მოტორსი” კორეული ”LG ქემისგან” ღებულობს. ”ნისანისთვის” კი ”ლიფის” აკუმულატორებს ”NEC კორპორეიშნი” აწარმოებს, რომელიც პერსონალური კომპიუტერების წარმოებაში მსოფლიო ლიდერია.

”ტოიოტას” ელექტრული RAV4-სთვის აკუმულატორებს ”ტესლა” და ”პანასონიკი” უმზადებენ, მაგრამ ჰიბრიდული ”პრიუსისთვის”, იაპონური კომპანია დიდი ზომის აკუმულატორებს იყენებს. ამავე აკუმულატორებით აღიჭურვება ახალი პატარა ელექტრომობილიც, რომელსაც ”ტოიოტა” 2012 წელს გამოუშვებს.

”დადგება დრო, როდესაც პოტენციური მყიდველი იტყვის - ეს ის მანქანაა, რომელიც მე მინდა. ჩვენ გვსურს, გავხდეთ ისეთი ავტომწარმოებელი, რომელსაც ასეთი მყიდველისთვის მრავალფეროვანი პასუხი ექნება. საავტომობილო და ლეპტოპის ელემენტების გამოყენებით, მომხმარებელს უფრო ფართო არჩევანს შევთავაზებთ”, - ამბობს ”ტოიოტას” პრეზიდენტი აკიო ტოიოდა.

აუდი ოთხცილინდრიან A8-ს გამოუშვებს

Audi Will Make Four-Cylinder A8

14 დეკემბერი

ავტომობილების ეკონომიურობაზე ზრუნვის ვირუსი პრემიუმ სეგმენტის მწარმოებლებსაც გადაედო. ბეემვე ახალი, მწვანე ტექნოლოგიების ასათვისებლად 1.2 მილიარდ ევროს გაიღებს, მერსედსმა კი ამავე საქმისთვის გამოყოფილი სახსრები გააორმაგა - მილიარდამდე გაზარდა. ჯერი აუდიზეა, რომელმაც გამოაცხადა, რომ თავის ფლაგმანს, სედან A8-ს ოთხცილინდრიანი ძრავითა და ჰიბრიდული სისტემით აღჭურვავს. ოღონდ, ეს ძრავი ჰიბრიდული აგრეგატის ნაწილი იქნება.

ძრავის მოცულობის და ცილინდრების რიცხვის შემცირების მთავარი მიზანი, ეკონომიურობის გაუმჯობესება და მავნე აირებით ატმოსფეროს მინიმალურად დაბინძურებაა. ევროპაში მალე გამონაბოლქვზე ახალი, მკაცრი ნორმები ამოქმედდება, რომელთა დარღვევის შემთხვევაშიც, მწარმოებლებს საჯარიმო თანხების გადახდა მოუწევთ. და ბუნებრივია, ისინი ცდილობენ, რომ ეს ნორმები დაიცვან, ან მათ მაქსიმალურად მიუახლოვდნენ.

ეკოლოგიურად სუფთა A8-ს შესაქმნელად, ინგოლშტადტელები ჰიბრიდულ პლატფორმას ამზადებენ, რომელშიც პატარა, ოთხცილინდრიან ძრავთან, ელექტროძრავი იქნება შეწყვილებული. ჯერ ამ ჰიბრიდული აგრეგატის ტექნიკური მახასიათებლები არ გამოქვეყნებულა, თუმცა აუდი ირწმუნბეა, რომ მისი დახმარებით, ევრო6 სტანდარტს დააკმაყოფილებს.

სხვათა შორის, ახლახანს ოთხცილინდრიანი S-კლასის სედანის წარმოების გადაწყვეტილება მერსედეს ბენცმა მიიღო. ცნობისათვის, უკვე 60 წელია, რაც შტუტგარტელები S-კლასის სედანს უშვებენ და ჯერ არ ყოფილა შემთხვევა, რომ ამ ავტომობილის კაპოტის ქვეშ 4-ცილინდრიანი ძრავი მოეთავსებინოთ.

კონკურენტისგან გასნხვავებით, აუდიში ფიქრობენ, რომ მარტო ძრავის მოცულობის და ცილინდრების რიცხვის შემცირებით, მხოლოდ იმას მიიღებენ, რომ ავტომობილის დინამიკური მახასიათებლები გაუარესდება. ამიტომ, საჭიროა დამხმარე ელექტროძრავი, რომელიც შიდაწვის ძრავის დაპატარავებით გამოწვეულ სიმძლავრის დანაკარგებს დააბალანსებს.

სხვათა შორის, მერსედესმა ჟენევის წლევანდელ ავტო შოუზე სწორედ ჰიბრიდული კონცეპტუალური ავტომობილი F 800 სტაილი გამოფინა, რომელიც შესანიშნავი დინამიკური მახასიათებლებითაც გამოირჩევა და ძალიან ეკონომიურიცაა.

სანამ ოთხცილინდრიანი ძრავით აღჭურვილ A8-ს წარმოებას დაიწყებს (სავარაუდოდ, ეს 2012 წელს მოხდება) აუდი მერმისს მყიდველს ამ სედანის V6 ტურბოდიზელიან ვერსიას შესთავაზებს, რომელსაც წინა წამყვანი ბორბლები ექნება. გერმანული კომპანია განმარტავს, რომ ასეთი წარმომადგენლობითი ავტომობილების ეკონომიურობაზე ზრუნვა იმ მყიდველის ინტერესების გათვალისწინებით ხდება, რომლებსაც სურთ, რომ პრესტიჟულ ავტომობილსაც ფლობდნენ და იმავდროულად, ზედმეტი გადასახადის გადახდასაც ერიდებიან. ცნობისათვის, ევროპის განვითარებულ ქვეყნებში სულ უფრო იზრდება გადასახადი ხარჯიან ავტომობილებზე. ამგვარად, მთავრობები ცდილობენ, რომ ატმოსფეროში გამონაბოლქვის შემცირებას მიაღწიონ და როგორც ჩანს, მათს მცდელობას შედეგი მოაქვს.

დაბოლოს, თავიანთი კონკურენტებისგან განსხვავებით, გამონაბოლქვის შემცირების სხვა გზა აირჩია ბეემვემ, რომელიც ცილინდრების რიცხვის შემცირებას ჯერჯერობით არ გეგმავს. ბავარიელებს ამ საკითხისადმი სხვანაირი მიდგომა აქვთ. მათ ურჩევნიათ, გამონაბოლქვის შემცირებას საწვავის უფრო ეფექტური წვის ხარჯზე მიაღწიონ, რისთვისაც ძრავის კონსტრუქციის გართულება უწევთ...

პეკინში ავტომობილების შეძენას ზღუდავენ

Beijing Could Impose One Car Per Person Limit

10 დეკემბერი

ჩინეთის საავტომობილო ბაზარი დიდი ტემპებით ვითარდება. მსოფლიოს უდიდესი ავტომწარმოებლები კი, მუდმივად მზარდი მოთხოვნის დასაკმაყოფილებლად, ცისქვეშეთში სულ უფრო მეტ საავტომობილო ქარხანას აშენებენ. მაგრამ ქალაქის ხელისუფლება ახლა იმაზე დაფიქრდა, თუ რა შეიძლება გააკეთოს ისეთი, რომ პეკინის გზებზე არსებული საცობების პრობლემა მოგვარდეს.

და... ისინი აპირებენ, რომ პეკინის მოსახლეობისთვის, ავტომობილების შეძენაზე შეზღუდვები შემოიღონ. კერძოდ, მათ მიერ მომზადებულია კანონპროექტი, რომელიც პეკინში მცხოვრებლებს ერთზე მეტი ავტომობილის ყოლას აუკრძალავს. ისინი კი, ვისაც პეკინში საცხოვრებელი არ გააჩნია, ავტომობილის ყიდვის უფლებას მხოლოდ იმ შემთხვევაში მიიღებენ, თუ ქალაქში მინიმუმ ხუთი წელი აქვთ ნამუშევარი.

ახალი კანონის შემოღება, ავტო ინდუსტრიაში მოღვაწე ბიზნესმენთა უკმაყოფილებას იწვევს. ისინი ფიქრობენ, რომ ახალი წესების შემოღება, ჩინეთში ავტობაზრის განვითარებას შეაფერხებს. არადა, ინდუსტრიის ამ სფეროზე, ქვეყნის ერთიან შიდა პროდუქტში ერთ-ერთი ყველაზე დიდი წილი მოდის.

გამოცემა ”გლოუბლ ტაიმსთან” საუბრისას, ამ ფაქტთან დაკავშირებით, თავისი უკმაყოფილება ჩინეთის ავტო მწარმოებელთა ასოციაციის გენერალური მდივნის ასისტენტმა სიონ ჩუანლინმა გამოთქვა.

”ავტომობილების შეძენასთან დაკავშირებით შეზღუდვების შემოღებას სერიოზული შედეგები მოჰყვება. ავტო სექტორის ნებისმიერი სახით შეყოვნება, ქვეყნის ერთიანი შიდა პროდუქტის მოცულობაზე უარყოფითად იმოქმედებს და ეროვნულ ეკონომიკას უკან დასწევს”, - ამბობს სიონ ჩუანლინი და დასძენს, რომ ჩინეთმა უკვე მიაღწია გაყიდვების იმ დონეს, რომელიც კრიზისამდე იყო, რაც მთავრობის მიერ შემოღებული წამახალისებელი სუბსიდიების პირდაპირი შედეგია. და გაყიდვების ზრდა აუცილებლად გაგრძელდება, თუ მთავრობა მყიდველთა უფლებებს არ შეზღუდავს.

”ჩინეთის ავტო ბაზრის ზრდა პრობლემა არაა. სახელმწიფო მოხელეებმა ყველაფერი უნდა იღონონ იმისათვის, რომ მოსახლეობას, სატრანსპორტო საშუალებათა დიდი არჩევანის საშუალება ჰქონდეს. გზებზე საცობებთან ბრძოლა კი ამ გზებზე მოძრაობის მოწესრიგებით შეიძლება”, - დასძენს სიონ ჩუანლინი.

”ფოლკსვაგენ Up-ის” გაყიდვები მერმისს დაიწყება

Volkwagen Up Will be Priced Around EUR10,000

8 დეკემბერი

გამოცემა ”აუტომოტივ ნიუს იუროპმა” გაავრცელა ინფორმაცია იმის შესახებ, რომ მერმისს, ფრანკფურტის საავტომობილო შოუზე, ”ფოლკსვაგენი” თავის მინიავტომობილ Up-ის სერიული ვერსიის პირველ ჩვენებას მოაწყობს. შოუს დამთვალიერებლის წინაშე წარსდგება სამკარიანი, ოთხადგილიანი ავტომობილი, რომელიც ბენზინისა და დიზელის სამცილინდრიანი ძრავებით იქნება აღჭურვილი.

მინიავტომობილს ”ფოლკსვაგენის” ბრატისლავას (სლოვაკეთი) ქარხანა გამოუშვებს. მყიდველს კი მას მერმისსვე, წლის ბოლოს შესთავაზებენ. Up-ის (ფრანკფურტში ის ალბათ ლუპოს სახელით წარსდგება) საბაზო ღირებულება 10 000 ევრო იქნება. იმავე პლატფორმაზე, მოგვიანებით ანალოგიური კლასის ავტომობილებს ”ფოლკსვაგენის” ჯგუფში შემავალი ”სეატი”, ”შკოდა” და სავარაუდოდ, ”აუდიც” გამოუშვებენ.

გერმანულ გამოცემა ”აუტომობილვოხესთან” საუბრისას, ”ფოლკსვაგენის” განვითარების განყოფილების შეფმა ულრიხ ჰაკენბერგმა განაცხადა, რომ Up-ის ბოლო პროტოტიპზე მუშაობა პრაქტიკულად დასრულებულია. შემდეგი ეტაპი კი, წარმოებისთვის მომზადეული სატესტო ავტომობილების მცირე პარტიის დამზადება იქნება.

Up-ის გამაში, სამკარიანი ჰეჩბეკის გარდა, ვოლფსბურგელები ხუთკარიან ჰეჩბეკსა და ელექტრომობილსაც გამოუშვებენ. ამ უკანასკნელის გაყიდვები 2013 წელს უნდა დაიწყოს. იმავდროულად, ბაზარზე ელექტრული ”გოლფი” და ”ჯეტაც” გამოვა. რაც შეეხება შიდაწვისძრავიან Up-ს, მისთვის ჩვეულებრივი მექანიკური ტრანსმისიებია გათვალისწინებული. მოგვიანებით კი მყიდველს ორქუროიან კოლოფებსაც შესთავაზებენ.

ცნობისათვის, ამ პატარა ავტომობილის შემუშავების დასაწყისში, ვოლფსბურგელებს სუდათ, რომ ძრავი უკან განეთავსებინათ. მაგრამ ეს გარკვეულ სირთულეებთან იყო დაკავშირებული და ავტომობილსაც აძვირებდა. ამიტომ, არჩევანი საბოლოოდ მაინც ძრავის წინა ნაწილში მოთავსებაზე შეჩერდა. ასე, Up-ს ძრავებს და ბევრ სხვა მაკომპლექტებლებს, უფრო დიდი (სუბკომპაქტური) ”პოლო” გაუზიარებს.

ლაპარაკი იყო იმაზეც, რომ ვოლფსბურგელები მინი ავტომობილისთვის ორცილინდრიან ძრავებს შეიმუშავებდნენ, მაგრამ ჰაკენბერგი ამ ვარაუდს უარყოფს. თუმცა იმასაც დასძენს, რომ ”ფიატ 500-ზე” გამოყენებული მსგავსი აგრეგატი შესანიშნავია.

”ამ ეტაპზე, ჩვენი ამოცანა არა მცირე ძრავების დამზადება, არამედ არსებული აგრეგატების და კვანძების სრულყოფაა, რათა გაუმჯობესდეს მათი შესაძლებლობები და ეკონომიურობა. Up-ი მხოლოდ სამცილინდრიანი ძრავებით აღიჭურვება, რომლებსაც მოწინავე ტექნოლოგიებით დავამზადებთ და რომელთა ხარისხსაც მყიდველი შეაფასებს”, - ამბობს ჰაკენბერგი.

ფერდინანდ ალექსანდერ პორშე 75 წლისაა

Ferdinand Alexander Porsche Celebrates 75th Birthday

8 დეკემბერი

ფერდინანდ ალექსანდერ პორშეს, ადამიანს, ვინც ლეგენდარული ”პორშე 911-ის” დიზაინი შეიმუშავა, 11 დეკემბერს 75 წელი უსრულდება. დიდი ფერდინანდ პორშეს შვილის, ფერი პორშეს პირმშო ქალაქ შტუტგარტში დაიბადა, სპორტული ავტომობილების მწარმოებელი კომპანიის დიზაინ სტუდიას კი 1962-1972 წლებში ხელმძღვანელობდა. სწორედ ამ პერიოდში შეიქმნ ორი ლეგენდარული ავტომობილი - 911 და 904.

ფერდინანდ ალექსანდერს ბავშვობიდანვე იზიდავდა ავტომობილები, რაც მისი ბაბუის, დიდი ფერდინანდის დამსახურებაა. ის ბევრ დროს ატარებდა დიზაინ ოფისებში, სადაც მისი ბაბუა მუშაობდა. ომის დროს, მათი ოჯახი ავსტრიაში გადასახლდა და ფერდინანდ ალექსანდერი ცელ ამ ზის სკოლაში მიიყვანეს. სკოლის შემდეგ, მან ქალაქ ულმის დიზაინის კოლეჯში ისწავლა, რისი დამთავრების შემდეგაც, ბაბუის ფირმის სადიზაინერო დეპარტამენტში დაიწყო მუშაობა.

ახალგაზრდა დიზაინერმა თავისი ნიჭი პირველად პროექტ ”ტაიპ 754-ზე” მუშაობისას გამოავლინა. ეს იყო კონცეპტუალური ნამუშევარი, რომელმაც ”პორშეს” ავტომობილების სტილი განსაზღვრა. 1962 წელს სათავეში ”პორშეს” დიზაინ სტუდიას ჩაუდგა. ერთი წლის შემდეგ, სტუდიამ საავტომობილო სამყარო მოდელ ”პორშე 901-ით” (იგივე 911) გააოცა. საგზაო მანქანების გარდა, ფერდინანდ ალექსანდერი სარბოლი ტექნიკითაც იყო გატაცებული. სწორედ ის მუშაობდა ”პორშეს” ფორმულა ერთის პროექტ ”ტაიპ 804-სა” და დიდი ტურიზმის კლასის სარბოლ ”904 კარერა GTS-ზე”.

1971 წელს ”პორშე” სააქციო საზოგადოებად გადაკეთდა, რის შემდეგაც, ფერდინანდ ალექსანდერმა კომპანია დატოვა და საკუთარი სადიზაინერო კომპანია ჩამოაყალიბა. ამჯერად მან საათების და სხვადასხვა საგნების დიზაინზე მუშაობას მიჰყო ხელი და მათ ”პორშე დიზაინის” მარკით ჰყიდდა. გარდა ამისა, სხვა კომპანიების შეკვეთითაც, მათს სტილზე მუშაობდა.

2003 წელს, მან კომპანია ”პორშე ლიცენც უნდ ჰანდელსგეზელშაფტი” (პორშეს ლიცენზიებისა და შრომის კომპანია) ჩამოაყალიბა, რომელიც სახელ ”პორშეს” საავტომობილო სამყაროს მიღმა განაგებს.

”ოპელი” ელექტრული ”ამპერას” ოჯახს შექმნის

Vauxhall Ampera range to expand

8 დეკემბერი

”ოპელს” ჯერ თავისი პირველი ელექტრომობილის, ”ამპერას” წარმოება არ დაუწყია, თუმცა მის შემცვლელსა და მასზე ბაზირებული რამდენიმე მოდელის წარმოებაზე უკვე ზრუნავს. ამის თაობაზე, ჟურნალ ”ავტოქართან” საუბრისას, ”ჯენერალ მოტორსის” ევროპული შტოს შეფმა ნიკ რილიმ განაცხადა. მისი თქმით, მომდევნო თაობის ”ამპერას” შემდეგ, ბაზარზე მისსავე პლატფორმაზე აგებული ჰეჩბეკი (ოპელ ასტრას ტიპის) და ხუთადგილიანი ქროსოვერიც გამოვა.

რილის განცხადებით, პირველი თაობის ”ამპერას” წარმოება 2015 წლამდე დეტროიტში გაგრძელდება, შემდეგ კი, მეორე თაობის ელექტრომობილს ”ჯენერალ მოტორსის” ბრიტანული (ელესმერ პორტის) ქრხანა გამოუშვებს. არაა გამორიცხული, რომ ”ამპერას” ოჯახის მოდელები სხვა ქარხნებმაც გამოუშვას.

რაც მთავარია, ”ოპელი” იმედოვნებს, რომ მეორე თაობის ”ამპერას” წარმოების დაწყებამდე, დაახლოებით 50 პროცენტით შემცირდება აკუმულატორების ფასი, რომლებზეც მთლიანად ავტომობილის ფასის თითქმის ნახევარი მოდის. გარდა ამისა, უნდა გაიზარდოს მათი ტევადობაც, რასაც შედეგად ავტომობილის სვლის სიშორის (მარტო ელექტროძრავით გადაადგილებისას) ზრდა უნდა მოჰყვეს.

რილი ამბობს, რომ თუ პირველი ”ამპერა”, რომელიც ბაზარზე ერთი წლის შემდეგ გამოჩნდება, 43 ათასი ევრო უნდა ღირდეს, მეორე თაობისა, შესაბამისი ზომის შიდაწვისძრავიან მოდელებზე მხოლოდ 6-10 ათასი ევროთი ძვირი ეღირება. რა თქმა უნდა, პირველი თაობის ”ამპერას” ფასს, რიგ სახელმწიფოებში, ეკოლოგიურად სუფთა ავტომობილებისთვის მოქმედი საგადასახადო შეღავათები შეამცირებს. მაგრამ დიდი შანსია იმისა, რომ ბაზარზე მეორე თაობის ”ამპერას” დებიუტამდე, ეს შეღავათები შემცირდეს, ან სულაც გაუქმდეს.

დაბოლოს, ”ოპელ ამპერა” პრაქტიკულად სახეშეცვლილი ”შევროლე ვოლტია”, რომლის გაყიდვებიც ამერიკაში დღე-დღეზე დაიწყება. ამ ავტომობილს მხოლოდ აკუმულატორებში დაგროვილი ენერგიით, 65 კილომეტრის გავლა შეუძლია. თუმცა აკუმულატორების დაცლის შემდეგ, საქმეში შიდაწვის ძრავისა (100 ცენის ძალა) და გენერატორის ტანდემი ერთვება, რომლის მეშვეობითაც, ”ამპერას” სვლის სიშორე 500 კილომეტრამდე იზრდება.

”როლს როისი” სედან ”გოსტის” სამ ვერსიას გამოუშვებს

Rolls Royce Is Working on Three New Ghost Variants

8 დეკემბერი

”როლს როისს” თავისი საწარმოო პროგრამის გაფართოება აქვს გადაწყვეტილი, რისთვისაც, ბაზისად თავის ახალ სედან ”გოსტს” გამოიყენებს. სამი წლის განმავლობაში, ბაზარზე ”გოსტის” კუპე და კაბრიოლეტი ვერსია, ასევე დაგრძელებული სედანი გამოვა.

ინტერნეტით გავრცელებული ინფორმაციით, ინგლისური კომპანია პირველ რიგში სწორედ ”გოსტის” დაგრძელებული ვერსიის წარმოებას დაიწყებს. ეს ავტომობილი სიგრძეში მეორე საყრდენის უკან ჩამატებული სეგმენტის წყალობით მოიმატებს. მას უფრო გრძელი სახურავი და უკანა კარები ექნება. მისი სიგრძე კი საბაზო სედანისასთან შედარებით, 13 სანტიმეტრით გაიზრდება.

შემდგ კი ”გოსტის” ორკარიანი ვერსიების - კუპესა და კაბრიოლეტის ჯერი დადგება. წინასწარ შეიძლება იმის თქმა, რომ სამივე ვერსიის შემთხვევაში, ავტომობილის სტილი უცვლელი დარჩება. მისი მხოლოდ პროპორციები შეიცვლება. ამიტომ, სავარაუდოა, რომ მათი წარმოების დაწყებამდე, ”როლს როისს” თავისი სიახლეების კონცეპტუალური ვერსიების ჩვენება არ დასჭირდება.

”გოსტი” ძალიან წარმატებული მოდელია - ყოველ გაყიდულ ”ფანტომზე” სამი ”პატარა” სედანი მოდის. რა თქმა უნდა, ამის მთავარი მიზეზი, ამ ორი ავტომობილის ფასებს შორის სხვაობაა. თუ ”ფანტომი” ამერიკაში მინიმუმ 388 000 დოლარი ღირს, ”გოსტის” ფასი ”მხოლოდ” 250 000-დან იწყება. ორივე ავტომობილი ერთმანეთისგან ზომებით განსხვავდება, თუმცა გარეგნობა თითქმის ერთნაირი აქვთ. ცნბისათვის, ”როლს როისმა” წელს უკვე დაახლოებით 2 500 ”გოსტი” გაყიდა.

”როლს როისი” ასევე ჰიბრიდული ძალური დანადგარებით აღჭურვილი ავტომობილების წარმოების შესაძლებლობას განიხილავს. თუმცა, ჯერჯერობით ამ საკითხზე, მხოლოდ პოტენციურ მყიდველთა აზრის შესწავლა მიმდინარეობს. ამასთან, ინგლისურ კომპანიას ნაკლებად აწუხებს ის ფაქტი, რომ ევროკავშირი გამონაბოლქვზე მკაცრ სტანდარტებს აწესებს - ”როლს როისი” გერმანული ”ბეემვეს” ოჯახის წევრია და მისი ავტომობილების ჭარბ გამონაბოლქვს, ”ბეემვესა” და ”მინის” ავტომობილების მცირე გამონაბოლქვი აბალანსებს.

ახალი ”ლანჩა სტრატოსი” ”ფერარიზე” და ”ლამბოზე” ტემპერამენტიანია

New Lancia Stratos Full Specs and Performance Figures Released

7 დეკემბერი

”პინინფარინას” მიერ გერმანელ ბიზნესმენ მიხაელ სტოშეკის შეკვეთით შექმნილი ახალ ”ლანჩა სტრატოსის” მცირესერიული წარმოების საკითხი ჯერაც დღის წესრიგში დგას, თუმცა იტალიური დიზაინ-ატელიე ამ რეტრო სუპერ ავტომობილის სრულყოფას და ტესტირებას მაინც აგრძელებს. მორიგი ტესტირებისთვის კი ფრანგულუ ავტოდრომი პოლ რიკარი გამოიყენა.
ტესტირების შემდეგ, ახალი ”სტრატოსის” ზოგიერთი ტექნიკური მონაცემი გამოქვეყნდა. და როგორც ირკვევა, რიგი პარამეტრებით, ეს ავტომობილი ”ფერარისა” და ”ლამბორგინის” ისეთ სუპერებზე სწრაფია, როგორებიცაა ”ფერარი 458 იტალია” და ”ლამბორგინი გალიარდო LP570-4 სუპერლეგარა”. არადა, ის უფრო ძველი ”ფერარის”, ”F430 სკუდერიას” პლატფორმაზეა აგებული.

ახალი ”სტრატოსი” გარეგნულად ძლიერ ჰგავს ძველ, ლეგენდარულ ”სტრატოსს”, რომელმაც იტალიურ კომპანიას 1970-იან წლებში გაუთქვა სახელი, როდესაც რალის მსოფლიო ჩემპიონატი სამჯერ მოიგო (იტალიელ სანდრო მუნარისთან და შვედ ბიორნ ვალდეგაარდთან ერთად). ავტომობილის სიგრძე 4.1 მეტრი, სიგანე კი თითქმის 2.0 მეტრია.

ახალი ”სტრატოსი” თავის წინამორბედს აგრესიული იერითაც ჰგავს. სამაგიეროდ, მისგან განსხვავებით, მასში ბლომად კარბონის კომპოზიტია გამოყენბული, რისი წყალობითაც, ის საკმაოდ მსუბუქი - 1247 კილოგრამია. წონის 44 პროცენტი წინა ღერძზე მოდის, დანარჩენი 56 პროცენტი კი - უკანაზე. შასი ”F430 სკუდერიასგან” არის აღებული და 20 სანტიმეტრით არის დამოკლებული. რაც შეეხება ძარას, ის მთლიანად კომპოზიციური მასალისგან დამზადდა.

რაც შეეხება ძრავს, ეს არის იმავე ”F430 სკუდერიასგან” აღებული 4.3-ლიტრიანი V8, რომელიც 540 ცხენის ძალას (დონორზე 30 ცხენის ძალით მეტს) და 500 ნიუტონმეტრს ავითარებს (შესაბამისად, 8 200 და 3 750 ბრ/წთ-ზე). ამგვარად, ძრავის ყოველ ცხენის ძალაზე, ავტომობილის 2.30 კილოგრამი მოდის.

ახალი ”სტრატოსი” 19-დუიმიან ბორბლებზე დგას, რომელთაგან წინებზე 265/30, უკანებზე კი 315/30 ზომის საბურავებია ჩაცმული. საბურავები ”დანლოპის” წარმოებისაა (სერია სპორტ მაქს). ავტომობილის დამუხრუჭებას 398 (წინ) და 350 (უკან) მილიმეტრიანი დისკები (ბრემბოს წარმოების) უზრუნველყოფს.

მთელი ამ ავლა-დიდებით, ახალ ”სტრატოსს” ადგილიდან 100 კმ/სთ-ის აკრეფ 3.3 წამში შეუძლია, მისი სიჩქარე 200 კმ/სთ-ს კი 9.7 წამში აღწევს. შედარებისთვის, 0-200 კმ/სთ-მდე აჩქარება ”ფერარი 458 იტალიას” 10.4 წამში შეუძლია, ”ლამბორგინი გალიარდო LP570-4 სუპერლეგარას” კი - 10.2 წამში. სამაგიეროდ, მაქსიმალური სიჩქარე მხოლოდ 274 კმ/სთ-ია, რაც იმის შედეგია, რომ უკანა ღერძში მთავარი გადაცემის კბილანების გადაცემის რიცხვი გაიზარდა.

”პინინფარინას” სურს, რომ 25 ცალი ახალი ”ლანჩა სტრატოსი” დაამზადოს, თუმცა ამისათვის, ”ფიატისგან” ნებართვა უნდა აიღოს, რადგან ბრენდი ”ლანჩა” სწორედ ტურინულ საავტომობილო ოჯახში შედის. რატომ მხოლოდ 25 და არა მეტი? იმიტომ რომ, შემკვეთთან დადებული ხელშეკრულება, მეტის წარმოების უფლებას არ აძლევს.

”რედ ბულ X1” - ოცნების ავტომობილის შოუ-მოდელი

Red Bull X1

6 დეკემბერი

გსმენიათ რამე ისეთი სარბოლი ავტომობილის შესახებ, რომელიც ადგილიდან 100 კმ/სთ სიჩქარის აკრეფას წამნახევარზე ნაკლებ დროს ანდომებს, მისი მაქსიმალური სიჩქარე კი 450 კმ/სთ-ზე მეტია? სიმართლე გითხრათ, ასეთი ავტომობილი ბუნებაში არ არსებობს, თუმცა ვირტუალური სამყაროს ვარსკვლავად მაშინვე იქცა, როგორც კი ”სონი პლეისტეიშნმა”, ”პოლიფონი დიჯიტალსმა” და ”რედ ბულ რეისინგმა” თავიანთი ერთობლივი ნამუშევრის, ვიდეოთამაშ ”გრან პრი 5-ის” და მისი ახალი ვარსკვლავის შექმნის შესახებ გამოაცხადეს.

როგორც ფორმულა 1-ის ახალი ჩემპიონი, გერმანელი სებასტიან ფეტელი ამბობს, ”რედ ბულ X1” ავსტრიული გუნდის ტექნიკური დირექტორის, ფორმულა 1-ის გენიოს ედრიან ნიუის ოცნების ავტომობილია, რომელშიც მან მთელი თავისი ცოდნა და გამოცდილება ჩააქსოვა. თანაც ისე, რომ არანაირი ტექნიკური რეგლამენტი არ ზღუდავდა.

ავტომობილის პროექტირებისას, ნიუიმ ისეთი ტექნოლოგიები გამოიყენა, რომლებიც რეალურად მუშაობს. მართალია, თავად ავტომობილი, მისი ძრავი და ტრანსმისია ვირტუალურია, მაგრამ მათი რეალურად დამზადება არავითარ ტექნიკურ სირთულეს არ წარმოადგენს. მაშ, მის მონაცემებსაც უფრო დაწვრილებით გავეცნოთ:

სიგრძე 4.75 მეტრი, სიგანე 2.18 მეტრი, სიმაღლე 0.98 მეტრი, ბორბლებს შორის ბაზა 2.90 მეტრი, წინა ბორბლების კვალი 1.85 მეტრი, უკანა ბორბლების კვალი 1.78 მეტრი. ავტომობილის მშრალი წონა 545 კილოგრამი, სრული წონა კი - 615 კილოგრამი. ”რედ ბულის” პრეს რელიზში წერია, რომ ამდენივე იქნება მისი ავსტრალიელი პილოტის, მარკ უებერის წონა, მან რომ მოსახვევი 300 კმ/სთ სიჩქარით გაიაროს. ამ დროს, მასზე მოქმედი გადატვირთვა 8.25G-ს მიაღწევს. ცნობისათვის, ამ მაჩვენებელს სამხედრო თვითმფრინავები აღწევენ...

ახლა X1-ის კაპოტქვეშაც ჩავიხედოთ: თითქოს, იქ განსაკუთრებულს ვერაფერს ვნახავთ - 3.0-ლიტრიანი V6 ბევრ სერიულ ავტომობილზეც დგას. თუმცა, X1-ის აგრეგატს ორი ტურბოდამჭირხნი ემსახურება, რომელთა დახმარებითაც, ძრავის მაქსიმალური სიმძლავრე (რა თქმა უნდა, თეორიულად) 1483 ცხენის ძალას აღწევს. მაქსიმალური მაბრუნი მომენტი 714 ნიუტონმეტრია (12 000 ბრ/წთ-ზე), ძრავის მაქსიმალური ბრუნთა რიცხვი კი - 15 000.

ამ ვირტუალურმა ავტომობილმა ავტოსამყაროს იმდენად დიდი ინტერესი გამოიწვია, რომ ”სონიმ” და ”რედ ბულმა” მისი სრულმასშტაბიანი მოდელის დამზადება გადაწყვიტეს და ეს საქმე კომპანია ”IDC მოდელზს” შეუკვეთეს. ამ უკანასკნელმა კი შეკვეთა, ულტრათანამედროვე კომპიუტერული დანადგარების დახმარებით, სულ რაღაც, 4 კვირაში შეასრულა.

დაბოლოს, წარმოდგენა რომ გქონდეთ, რეალურად რა შეუძია ვირტუალურ ”რედ ბულ X1-ს” (თუ საბურავებმა გაუძლეს), გეტყვით, რომ ფეტელმა ამ ავტომობილით სუძუკას ვირტუალური ტრასა, ფორმულა 1-ისთვის სარეკორდო დროზე (ოღონდ, რეალური ტრასისთვის) 20 წამით სწრაფად გაიარა...

”ჰიუნდაი” საკუთარ იმიჯს გადახედავს

Hyundai Overhauls Its Brand Image

6 დეკემბერი

”ჰიუნდაი” იანვარში, დეტროიტის საავტომობილო შოუზე თავის ახალ გლობალურ სტრატეგიას გამოაქვეყნეს. კორეული კომპანია ბაზრის უმაღლეს, პრემიუმ სეგმენტს უმიზნებს, რასაც შედეგად, მის პროდუქციაზე ფასების მომატება მოჰყვება. რა თქმა უნდა, ზედა სეგმენტში გადასვლა, პროდუქციის ხარისხის მნიშვნელოვანი გაუმჯობესების შედეგიც იქნება.

კომპანია თავისი ცალკეული მოდელებისთვის უკვე იყენებს ახალ დევიზს - ”მოდერნ პრემიუმ” (თანამედროვე პრემიუმი) და ამ ფრაზას მალე ”ჰიუნდაი” თავისი ყველა მოდელისთვის გამოიყენებს. ეს ფრაზა ამჟამინდელ ”დრაივ იორ უეი-ს” (იარე შენი გზით) შეცვლის. პრემიუმ სეგმენტში გადასვლა მარტო დევიზის შეცვლაში არ აისახება. კომპანია კლიენტების მომსახურების დონის გაუმჯობესებას, ინოვაციური მარკეტინგული საშუალებების გამოყენებას და თავისი ავტომობილების გარეგნობის გადახალისებას აპირებს.

”გასული ათი წლის განმავლობაში, ჩვენ საკუთარი კომპანიის იმიჯს, ხარისხიანი ავტომობილების მწარმოებლის მხრივ ვავითარებდით. ამიერიდან კი ჩვენი აქცენტი პრემიუმ სეგმენტისკენ იქნება მიმართული, რასაც ალბათ ახალ პრემიუმს, ან თანამედროვე პრემიუმს დავარქმევთ”, - ამბობს ”ჰიუნდაის” აღმასრულებელი ვიცე პრეზიდენტი ჩო ვონ ჰონი, ვინც კომპანიის გლობალური მარკეტინგის საქმეებს განაგებს.

სხვათა შორის, სიტყვა ჰიუნდაი ჯორეულად ”თანამედროვეს” ნიშნავს. კარგა ხანს, ის ამ სახელს ნამდვილად ვერ ამართლებდა, მაგრამ რამდენიმე წელია, კორეული კომპანია სწორედ თანამედროვე ავტომობილების გამოშვებითაა დაკავებული, რაც მისი გაყიდვების მოცულობის განუხრელ ზრდაში აისახება.

ჩო აცხადებს, რომ მისი სურვილია, ”ჰიუნდაი” იაპონურ კომპანიებზე მაღლა დადგეს. ამისათვის კი კორეელებს აქცენტი სტილის დახვეწაზე, უახლესი ტექნოლოგიების დანერგვასა და ტექნიკის საიმედობის გაზრდაზე აქვთ გადატანილი. შედეგიც ბრწყინვალე აქვთ: სააგენტო ”JD პაუა ენდ ესოშიეიტიდის” მიერ ჩატარებულმა გამოკვლევამ აჩვენა, რომ ხარისხის შეფასებისას, ამერიკელი მომხმარებელი, ”ჰიუნდაის” ”ტოიოტაზე”, ”ინფინიტიზე”, ”აუდიზე” და ”ლინკოლნზე” მაღლა აყენებს. უფრო მეტიც, იმავე გამოკვლევის შედეგად, ”ჰიუნდაის” ორი მოდელი - ”აქცენტი” და ”ელანტრა”, თავ-თავიანთ სეგმენტებში, საუკეთესოთა სამეულშია შესული.

საშუალო კლასის სედანი ახალი ”სონატა” (ფოტოზე) კი დევიზ ”თანამედროვე პრემიუმის” სიმბოლოდ იქცა. ”ჩვენი პროდუქცია გაცილებით უკეთესია, ვიდრე ჩვენი რეპუტაცია, მაგრამ ხალხი უკვე აცნობიერებს ჩვენი ავტომობილების ჭეშმარიტ ღირებულებას”, - ამბობს ”ჰიუნდაის” კიდევ ერთი აღმასრულებელი ვიცე პრეზიდენტი ოჰ სუკ-გეუნი, ვინც ახალი ”სონატას” დიზაინის შემუშავებას უძღვებოდა.

P.S. გამოცემა ”უოლ სტრიტ ჯორნელთან” საუბრისას, ”ჰიუნდაის” ამერიკული შტოს პრეზიდენტმა ჯონ კრაფჩიკმა განაცხადა, რომ მისი კომპანია ახალი, პრემიუმ სეგმენტის ბრენდის ჩამოყალიბებას გეგმავს, რომლითაც კონკურენციას ”ბეემვეს”, ”მერსედესს” და ”ლექსუსს” გაუწევს. არაა გამორიცხული, რომ ახალ ბრენდს სახელად ”ჯენეზისი” ეწოდოს.

კრაფჩიკის თქმით, განიხილება ახალი ბრენდის მარკეტინგის რამდენიმე ვარიანტი. მათგან პირველის მიხედვით, შეიქმნება ცალკე სადილერო ქსელი, რომელიც მხოლოდ ”ჯენეზისის” ავტომობილების რეალიზაციით და სერვისით იქნება დაკავებული. მეორე, უფრო რეალური ვერსიით, ”ჰიუნდაის” ახლანდელი დილერები ”შოურუმს შოურუმში” გახსნიან. ”შიდა” შოურუმები კი ახალ ბრენდს დაეთმობა.

რა თქმა უნდა, ახალი ბრენდის სრულფასოვნებისთვის, საჭირო იქნება, რომ მისი სამოდელო გამა რამდენიმე ახალი ავტომობილით შეივსოს. სავარაუდოდ, პირველ რიგში, ესენი მე-3 სერიის ”ბეემვეს” და ქროსოვერ ”ლექსუს RX-ის” კლასის ავტომობილები იქნება.

”ჰიუნდაი” + ჯაზი = წარმატებული ავტობიზნესს

Sonata Event

5 დეკემბერი

ავტობიზნესში არის ასეთი ტერმინი - კმაყოფილების ხარისხი. ეს ის მაჩვენებელია, რომელიც ავტომწარმოებელსა და მის კლიენტს შორის დამოკიდებულებას ასახავს. ეს დამოკიდებულება კი განსაზღვრავს, მყიდველის შემდეგი მანქანა ისევ იმ მარკისა იქნება, რომლითაც გადაადგილდება, თუ სხვა ბანაკში გადაინაცვლებს. რაც უფრო მეტი ერთგული მყიდველი ჰყავს კომპანიას, მით უკეთ მიდის მისი ბიზნესი. ასე მუშაობენ ისინი, ვისთვისაც მნიშვნელობა აქვს არამხოლოდ დღევანდელ კვერცხს, არამედ ხვალინდელ ქათამსაც.

დასამალი არაფერია იმაში, რომ წლების განმავლობაში, ”ჰიუნდაი” მსოფლიოსა და საქართველოს ბაზარზეც, პოზიციებს იაფფასიანი ავტომობილებით იმყარებდა. კორეულმა კომპანიამ ზუსტად ის გზა გაიარა, რომლითაც ორი-სამი ათეული წლით ადრე, იაპონურმა კომპანიებმა იარეს. ახლა ”ჰიუნდაი” მსოფლიოს მეხუთე უდიდესი კომპანიაა და ბუნებრივია, გაყიდვების მოცულობის ზრდის პარალელურად, მიღწეულის შენარჩუნებაზე ზრუნვაც უწევს.

კომფორტი, თანამედროვე ტექნოლოგიები, საწვავის ეკონომიურად ხარჯვა, ხელმისაწვდომი ფასი, დიზაინი და სერვისის მაღალი ხარისხი - ეს ის ფაქტორებია, რომლებსაც დღევანდელი ”ჰიუნდაი” თავის მყიდველს სთავაზობს. ამ ფაქტორებს კი 3 დეკემბრიდან, ერთგული მყიდველის გართობაზე ზრუნვაც დაემატა.

”ჰიუნდაი ავტო საქართველომ”, პირველ რიგში, სწორედ თავის ერთგულ მყიდველს გაუკეთა საჩუქარი, როდესაც მის სასეიროდ, თბილისში კომპანია ”ისტერნ პრომოუშნის” დახმარებით, ცნობილ ამერიკელ ჯაზმენ (დრამერ) პუჯი ბელის (ამას მარკუს მილერთან, დევიდ სენბორნთან, ელ ჯეროსთან ერთად აქვს დაკრული) ჯგუფი ჩამოიყვანა და მის მიერ ვირტუოზულად შესრულებული მუსიკა მოასმენინა. ამ მყიდველთა ნაწილი მალე ავტომობილის გამოცვლაზე იფიქრებს (ღმერთმა ამის საშუალება მისცეს). და რას იყიდის მათი უმეტესობა? რა თქმა უნდა, ”ჰიუნდაის” რომელიმე მოდელს - ვისაც რაზე მიუწვდება ხელი. ეს კი იმის მანიშნებელი იქნება, რომ კორეულ კომპანიას საქართველოში, მყიდველთან კმაყოფილების მაღალი ხარისხი აკავშირებს.

და პარალელურად, ახალი მყიდველის მისაზიდადაც შესანიშნავი სამოდელო გამა აქვს, რომელსაც ზაფხულიდან კომპაქტური ”ელანტრა” დაემატება, ავტომობილი, რომელსაც უკვე შეარქვეს ”პატარა სონატა”. რაც შეეხება თავად ”სონატას”, ის საშუალო ზომის სედანია, რომელიც მყიდველს თავისი ელეგანტური გარეგნობით, საწვავის ეკონომიური ხარჯით, უსაფრთხოებით (ამერიკის ქრეშ-ტესტებზე ხუთი ვარსკვლავი აქვს მიღებული), შესაშური კომფორტით, კარგი მართვადობით, შესრულების მაღალი ხარისხით და რა თქმა უნდა, თავისი კლასისთვის ხელმისაწვდომი ფასით იზიდავს. და, რა თქმა უნდა, ამიერიდან ქართველი ავტო მოყვარულის თვალში, ”სონატაც” და მთლიანად კომპანია ”ჰიუნდაიც”, შესანიშნავ ჯაზთანც ასოცირდება...

”მასტრეტა MXT” - მექსიკური სპორტქარი

Mexico-Developed Mastretta MXT Poised for 2011 Debut

5 დეკემბერი

ოთხწლიანი წვალების შემდეგ, მექსიკელმა ინჟინრებმა თავი მოაბეს თავიანთი ქვეყნის ისტორიაში პირველი სპორტული ავტომობილის წარმოებისთვის მომზადებას. მათი ნახელავის პირველად ხილვის საშუალება კი პარიზის საავტომობილო შოუს დამთვალიერებლებს ჰქონდათ.

პირველივე შეხედვისთანავე აშკარაა, რომ ”მასტრეტა MXT” - ასე ჰქვია პირველ მექსიკურ სპორტქარს, ერთბაშად ორ ანალოგიური კლასის ავტომობილს, ”ლოტუს ელისსა” და ”ოპელ სპიდსტერს” ჰგავს. მამოძრავებელ ძალას კი მას ”ფორდის” წარმოების ოთხცილინდრიანი 2.0-ლიტრიანი ძრავი (სერია დურატეკი) ანიჭებს, რომელიც ტურბოკომპრესორის დახმარებით, 240 ცხენის ძალას ავითარებს.

”მასტერტას” მწარმოებელი ირწმუნება, რომ ამ აგრეგატით, ავტომობილს ადგილიდან 100 კმ/სთ სიჩქარის აკრეფა 5.9 წამში შეუძლია, მისი მაქსიმალური სიჩქარე კი 230 კმ/სთ-ს აღწევს. ერთ დროს, ასეთი მონაცემებით, ნებისმიერი ავტომწარმოებელი იტრაბახებდა, მაგრამ დღეს ამით ვერავის გააკვირვებ. თუმცა, ”მასტრეტას” მაინც შეუძლია დაიტრაბახოს, რომ თავის მფლობელს დიდ სიამოვნებას მიანიჭებს - ”ლოტუს ელისის” მსგავსად, ისიც მოსახვევებში შესაშური მდგრადობით გამოირჩევა, რასაც სიჩქარის გურმანები ძლიერ აფასებენ.

ძნელი მისახვედრი არ უნდა იყოს, რომ ავტომობილს სახელი მისმა შემქმნელებმა, ძმებმა, დანიელ და კარლოს მასტრეტებმა, თავიანთი გვარის შესაბამისად მისცეს. ისე კი, მათს კომპანიას ”ტექნოიდეა” ჰქვია და ის იმ ავტობუსების დიზაინსა და კონსტრუქციებზე მუშაობს, რომლებსაც მექსიკო სიტისთვის უკვე 20 წელია, ”მერსედეს ბენცი” და ”ინტერნეიშნლი” აწარმოებენ.

ავტომობილი ძალიან მსუბუქია, ეს კი შესაძლებელი გახდა მის კონსტრუქციაში ალუმინის იმ შენადნობთა გამოყენებით, რომლებსაც ავიაკოსმოსურ სფეროში მომუშავე კომპანიები იყნებენ. იმავდროულად, ინჟინრებმა თავიანთი მანქანა არაერთი თანამედროვე ელექტრონული სისტემით აღჭურვეს, ისეთითაც კი, როგორიც გლობალური პოზიციონირების სისტემაა (GPS).

მწარმოებლის განცხადებით, ”მასტრეტათი” დაინტერესება უკვე გამოთქვეს ინგლისში, გერმანიასა და იტალიაში. ”ტექნოიდეა” მალე სადისტრიბუციო ხელშეკრულებებს ამერიკაში, აზიასა და ახლო აღმოსავლეთში გააფორმებს. ჯერ მხოლოდ 100 ცალი MXT-ის დამზადება იგეგმება, თუმცა მასზე მოთხოვნის არსებობის შემთხვევაში, წარმოების მოცულობა გაიზრდება. რაც შეეხება ფასს, ის ისეთია, რომ ”მასტრეტამ” ”ლოტუს ელისთან” კონკურენცია შესძლოს - 55 000 დოლარი.

საიდუმლო მოლაპარაკება ”ფიატსა” და ”ფოლკსვაგენს” შორის

Fiat Secretly Negotiated Alfa Romeo Sale to VW

5 დეკემბერი

მოლაპარაკების თემა კი ისევდაისევ, ”ალფა რომეოა”. არადა, არცთუ დიდი ხნის წინ, იტალიური კომპანიის შეფმა სერჯო მარკიონემ განაცხადა, რომ მილანური ბრენდის გაყიდვას არ აპირებს და რომ მას კრიზისიდან ორ წელიწადში გამოიყვანს. თუმცა, ისიც ცნობილია, ”ფოლკსვაგენის” სამეთვალყურეო საბჭოს თავმჯდომარე ფერდინანდ პიხმა (ვინც დიდი ფერდინანდ პორშეს შთამომავალია) დაჟინებით განაცხადა, რომ ”ალფა რომეოს” შეძენ მისი ერთ-ერთი მთავარი მიზანია და რომ ამ მიზანს იმავე ორ წელიწადში მიაღწევს.

პიხს არაფერი უთქვამს იმაზე, თუ როგორ აპირებს მარკიონეს დაყოლიებას. თუმცა, მისი თქმით, თუ ამჟამად ”ალფა რომეო” ფულის განიავების საშუალებაა, ”ფოლკსვაგენის” ხელში მომგებიან კომპანიად გადაიქცევა. მარკიონეს საკმაოდ უკმეხი და დამცინავი პასუხის შემდეგ, მათ შორის მოლაპარაკების საბაბი თითქოს არ უნდა არსებულიყო, მაგრამ თურმე ასე არ ყოფილა და ამას ისეთი სერიოზული გამოცემა გვატყობინებს, როგორიც ”ავტომოტივ ნიუსია”.

ამ გამოცემის ინფორმაციით, მხარეები მოლაპარაკებას უკვე ოთხი თვეა აწარმოებენ. უფრო მეტიც, მარკიონეს სპეციალური ჯგუფი გამოუყვია იმისათვის, რომ მოვლენათა განვითარების ორი შესაძლო სცენარი მოამზადონ. კერძოდ, რა იქნება იმ შემთხვევაში, თუ ”ფიატი” ”ალფა რომეოს” გაყიდვას გადაწყვეტს და რა შეიძლება მოხდეს, თუ მის შენარჩუნებას ეცდება.

რა თქმა უნდა, ზუსტად ორივე ვარიანტის გათვლა შეუძლებელია, მაგრამ გუნდმა დავალება შეასრულა და ტურინული ავტოჯგუფის შეფს ანგარიში წარუდგინა. უნდა ითქვას, რომ ორივე შემთხვევაში, არსებობს ”ალფას” გაყიდვის როგორც დადებითი, ასევე უარყოფითი შედეგები. მათ მიერ ჩატარებული გამოკვლევის მიხედვით, ”ფიატისთვის” ძალიან ძნელი იქნება მომდევნო ორი წელი.

ჯერ ერთი, კომპანიას ფული სჭირდება ”ალფა რომეოს” რესტრუქტურიზაციისა და ახალი მოდელების შემუშავებისთვის - უახლოეს მომავალში მილანური კომპანია, რომელსაც წელს დაარსებიდან ასი წელი შეუსრულდა, ბაზარზე ხუთი ახალი ავტომობილის გამოტანას აპირებს. ამას კი უზარმაზარი ინვესტიცია სჭირდება, რაზეც ტურინელებს ხელი არ მიუწვდებათ. ასე რომ, ”ალფას” გაყიდვამ მათ სულის მოთქმის და ”კრაისლერში” რესტრუქტურიზაციის ჩატარების საშუალება უნდა მისცეს.

მეორე მხრივ, თუ ”ფიატი” შეძლებს საჭირო სახსრების მოზიდვას (ეს მან უახლოეს წარსულში, იმავე მარკიონეს მეთაურობით გააკეთა და გაკოტრებას გადაურჩა) და ”ალფა რომეოს” პრემიუმ ბრენდად ჩამოყალიბებას, მაშინ ეს უკანასკნელი ”ფიატს” ისევ მსოფლიო ავტო ბაზრის სოლიდურ მოთამაშედ გადააქცევს.

მართალია, ჯგუფის მოღვაწეობის ანგარიში არ გამოქვეყნებულა, მაგრამ ”ავტომოტივ ნიუსმა” მოვლენათა განვითარების ორი ვარიანტის მისეული შესაძლო შედგები შემოგვთავაზა:

”ალფა რომეოს” გაყიდვის შემთხვევაში:

1. ”ფიატი” 1.5-2.0 მილიარდ ევროს მიიღებს, რაც მას ვალებისგან სრულად გაათავსუფლებს;

2. ახალი მოდელების შემუშავებისათვის გასაწევი ხარჯები 1.5 მილიარი ევროთი შემცირდება, რადგან ტურინელებს აღარ მოუწევთ ”ალფას” ავტომობილების შექმნაზე ფულის ხარჯვა;

3. ”ალფა” წლიურად ”ფიატს” დაახლოებით 200 მილიონი ევროთი აზარალებს. გაყიდვის შემდეგ კი ეს ტვირთიც მოიხსნება;

4. ”ალფას” მოშორების შემდგ, ”ფიატი” ევროპაში ”დოჯს” წამოსწევს, როგორც სპორტულ ბრენდს, ”კრაისლერი” და ”ლანჩა” კი აქცენტს კომფორტსა და მდიდრულობაზე გააკეთებენ.

”ალფა რომეოს” შენარჩუნების შემთხვევაში:

1. თუ ”ფიატი” შეძლებს, გაუძლოს მოსალოდნელ სამწლიან კრიზისულ პერიოდს, მაშინ ის გაცილებით სიცოცხლისუნარიანი გახდება და ”ალფას” ავტომობილებს უფრო დიდი მარჟით გაჰყიდის, ვიდრე თავისას, ეს კი დიდ მოგებას მოუტანს;

2. ”ფიატს” შეუძლია, გაყიდოს ”მანეტი მარელი”, ”კომაუ” და ”ტეკსიდი” (შესაბამისად, ავტომაკომპლექტებლების, საწარმოო საშუალებების და ძრავის ბლოკების მწარმოებლები), რაც 2 მილიარდ ევროს მოუტანს, ეს თანხა კი ”ალფა რომეოს” რესტრუქტურიზაციისთვის დასჭირდება. ინვესტორები მარკიონეს ამ ნაბიჯს ძალიან მოუწონებენ;

3. კრიზისიდან თავდაღწეული ”ალფა რომეოს” მოგების მარჟა სწრაფად შეიძლება გაიზარდოს 10 პროცენტამდე, ეს კი მარკიონეს, მის მიერ 2014 წლისთვის შეპირებული მოგების (3.5 მილიარდი ევრო) მოტანას შეაძლებინებს.

4. ”ფიატი” დიდ ფულად სახსრებს დაზოგავს, თუ ”ალფა რომეოს” და ”კრაისლერს” პლატფორმების გაზიარების საშუალებას მისცემს. ასე მილანური კომპანია ადვილად მიაღწევს რენტაბელობის ზღვარს (წლიურად 300 000 ცალი) და იმ ზღვარსაც (500 000), რომელიც მარკიონემ დაუსახა. ამ ბოლო რიცხვიდან, დაახლოებით 300 000 ცალს ”კრაისლერის” მოდელებთან საერთო პლატფორმა ექნება;

5. ”ალფა რომეო” თავის ახალ კომპაქტურ გლობალურ არქიტექტურას ”ჯიპს” გაუზიარებს და შემუშავებულ ახალ ავტომობილებს, ისეთ მნიშვნელოვან ბაზრებზე გაიტანს, როგორებიცაა ჩინეთი და ინდოეთი;

6. ცნობილია, რომ დიდ მარჟას მაღალი კლასის მწარმოებლები აღწევენ, დაბალი კლასის ავტომობილებს კი კომპანიებისთვის მცირე მოგება მოაქვს. მარტო ”კრაისლერით” და ”ლანჩათი” ფონს გასვლა გაჭირდება. ამგვარად, ”ალფას” გაყიდვა ”ფიატს” შემოსავლის სოლიდურ წყაროს დააკარგვინებს, შენარჩუნება კი - პირიქით.