„ჰიუნდაი“ იაპონიას ეხმარება

Hyundai To Donate JPY100 Million to Quake-Striken Japan

22 მარტი

დღეს იაპონიას ყველა ეხმარება. ქვეყანა, რომელიც სულ ცოტა ხნის წინ, მსოფლიოს მეორე უდიდესი ეკონომიკა იყო, დღეს ჰუმანიტარული კატასტროფის ზღვარზე იმყოფება. ამიტომ, ამომავალი მზის ქვეყანას ახლა ისინიც ეხმარებიან, ვისაც ადრე თავად უწვდიდა ხელს. იაპონელებს ისინიც ეხმარებიან, რომლებიც ცოტა ხნის წინ მათი უშეღავათო კონკურენტები იყვნენ (და ასეთებადვე რჩებიან). მაგალითად, კორეული საავტომობილო კომპანია „ჰიუნდაი“...

„ჰიუნდაიმ“ იაპონიის დასახმარებლად 100 მილიონი იაპონური იენი (დაახლოებით 1.3 მილიონი დოლარი) გამოჰყო. ეს ფული, იაპონიის იმ მხარეს მოხმარდება, რომლებიც მიწისძვრამ და ცუნამიმ ყველაზე მეტად დააზარალა. ამ თანხას იაპონია კორეული წითელი ჯვრის ორგანიზაციის ხელით მიიღებს, რომელიც მას იაპონიის წითელ ჯვარს გადასცემს. ეს უკანასკნელი კი მიღებული დახმარებით, საკვებს, წყალს, მედიკამენტებს და სხვა აუცილებელ ნივთებს შეიძენს.

პარალელურად, „ჰიუნდაი მოტორის“ ჯგუფის თავმჯდომარე მონ-კუ ჩუნმა, თავისი კომპანიის იაპონელ ბიზნეს პარტნიორებს თანაგრძნობის წერილები დაუგზავნა. მანვე განაცხადა, რომ საჭიროების შესაბამისად, „ჰიუნდაი მოტორი“ იაპონიას შემდგომშიც დაეხმარება.

„როგორც ყოველთვის, „ჰიუნდაი“ ბუნებრივი კატაკლიზმებით დაზარალებულ რეგიონებს მთელს მსოფლიოში ეხმარება და ამით ყოველთვის უსვამს ხაზს იმ ფაქტს, რომ მსოფლიოს განუყოფელი ნაწილია. ჩვენმა კომპანიამ, თავის დროზე, დახმარება გაუწია ირანის 1999 წლის მიწისძვრით, 2004 წლის აზიის ცუნამით, 2007 წელს, საბერძნეთის ხანძრებით დაზარალებულებს, ასევე 2009 და 2010 წლებში, ჰაიტისა და ჩილეში მომხდარი მიწისძვრების დროს დაზარალებულებს“, - ნათქვამია კომპანიის განცხადებაში.

„ჰიუნდაის“ გარდა, იაპონიას ფულად დახმარებას ევროპული და ამერიკული კომპანიებიც უწევენ.

აღსანიშნავია, რომ დიდ იაპონურ საავტომობილო კომპანიებს, მიწისძვრით და ცუნამით დაზარალებულ რეგიონებში, თავიანთი ქარხნები გაჩერებული აქვთ. უფრო მეტიც, ამ კატასტროფის გამო, მაკომპლექტებლების მწარმოებელი არაერთი იაპონური კომპანიაა გაჩერებული, ეს კი, ამ კომპანიების პარტნიორი ამერიკული და ევროპული კომპანიების შეფერხებას იწვევს.

„ლამბორგინის“ ახალი ფლაგმანი - „ავენტადორLP 700-4“

Lamborghini Aventador LP 700-4

21 მარტი

„ლამბოს“ მორიგი ფლაგმანის გამოჩენას საავტომობილო სასმყარო დიდხანს ელოდა. არამარტო ისინი, ვისაც მისი შეძენის საშუალებას ჯიბე აძლევს, არამედ ისინიც, ვისაც ასეთ მანქანებზე მხოლოდ ოცნება თუ შეგვიძლია. მოლოდინს კი თავად მწარმოებლის მიერ პრემიერამდე კარგა ხნით ადრე დაწყებული სარეკლამო კამპანია აძლიერებდა, რომელიც „მურსიელაგოს“ შემცვლელის ნაწილ-ნაწილ გაცნობაში გამოიხატებოდა.

სახელი, ძრავი, საკიდარი, ტრანსმისია, მონოკოკი, აწყობილი შასი და ბოლოს მთლიანად ავტომობილი - იტალიურმა კომპანიამ ჟენევამდე ასე თანდათან გაგვაცნო თავისი ახალი სუპერი, რომელიც უახლესი ტექნოლოგიების გამოყენებითაა დამზადებული, ისეთებითაც კი, რომლებსაც ჯერჯერობით, „ლამბოს“ ყველაზე დიდი კონკურენტი „ფერარიც“ კი არ ფლობს.

ჟენევაში, როგორც იქნა, მისი ერთ-ერთი მთავარი ვარსკვლავი პირადად გაეცნო ჯერ მედიასა და საავტომობილო სამყაროს, შემდეგ კი ფართო საზოგადოებასაც. და, რა თქმა უნდა, ყველანაირი მოლოდინი გაამართლა - გარეგნობითაც „ლამბორგინის“ ტრადიციების ჭეშმარიტი გამგრძელებელია და რა თქმა უნდა, აღჭურვილობითაც. ბარემ უნდა ითქვას, გარეგნობით, ის როგორღაც სახმელეთო სტელსის შთაბეჭდილებასაც ტოვებს. მაგრამ თუ სტელსის სისტემის დანიშნულება ისაა, რომ სამხედრო თვითმფრინავები რადარებისთვის უხილავი გახადოს, „ავენტადორის“ გარეგნობის მიზანი საწინააღმდეგოა - მან რაც შეიძლება მეტი თვალი უნდა მიიზიდოს. ალბათ, ამ მოკლე დახასიათების შემდეგ, გარეგნობაზე მეტად გაჩერება აღარ ღირს - ისედაც ყველაფერი კარგად ჩანს...

რა იმალება ძარის ქვეშ? პირველ რიგში, კარბონის კომპოზიტით დამზადებული კოკპიტი და მასზე ასხმული საკიდარი და ძალური დანადგარები. კარბონის უხვად გამოყენების წყალობით, ავტომობილი საკმაოდ მსუბუქი გამოვიდა - „მხოლოდ“ 1575 კილოგრამს იწონის. წონის დიდი ნაწილიც 6.5-ლიტრიან V12 ძრავზე მოდის, რომელიც 700 ცხენის ძალას (8 200 ბრ/წთ-ზე) და 690 ნიუტონმეტრს (5 500 ბრ/წთ-ზე) გამოიმუშავებს. ამ მონაცემების ასათვისებლად, „ლამბომ“ კომპანია „გრაცანოს“ წარმოების 7-საფეხურიანი ავტომატური კოლოფი (ISR - ინდივიდუალური გადამრთველი ღეროები) შეარჩია.

კოლოფიდან მაბრუნი მომენტი ოთხივე წამყვან ბორბალს მიეწოდება. ამ სისტემაში, უკანა დიფერენციალი თვითბლოკირებადია, წინას კი სისტემა ESP (ელექტრონული სტაბილურობის პროგრამა) ემსახურება. ამ ტანდემის მეშვეობით, „ავენტადორი“ ადგილიდან 100 კმ/სთ სიჩქარის აკრეფას 2.9 წამში ასწრებს, მისი მაქსიმალური სიჩქარე კი 350 კმ/სთ-ია.

„ლამბორგინი“ თავისი ახალი ფლაგმანის მიერ საწვავის მოხმარებაზე კონკრეტულ მონაცემებს არ აქვეყნებს, თუმცა ირწმუნება, რომ ეს მონსტრი ისეთივე ბენზინყლაპია არაა, როგორც ერთი შეხედვით ჩანს. პირიქით, „მურსიელაგოსთან“ შედარებით, 20 პროცენტით ეკონომიურია. ამასთან, მასზე 8 პროცენტით მძლავრიცაა. და რაც მთავარია, ამას ყოველგვარი ჰიბრიდული ვირუსის (როგორც ჟენევაში მომუშავე ჟურნალისტები ამბობდნენ) გარეშე მიაღწია.

ისღა დაგვრჩენია, „ავენტადორის“ ფასი გაუწყოთ. ევროპაში მისი შეძენის მსურველებს 255 000 ევროს გადახდა მოუწევთ, ამერიკაში კი - 379 700 დოლარისა. რა თქმა უნდა, ყველა ვერ შესწვდება, თუმცა მთელს მსოფლიოში საკმარისზე მეტი ყოფილა მისი მუშტარი. „ლამბორგინის“ განცხადებით, ყველა ავტომობილი, რომლებსაც სანტ’აგატა ბოლონეზელები წელს გამოუშვებენ, უკვე გაყიდულია.

ჟენევა 2011

„ფერარი FF“ - პირველი სრულამძრავიანი მარანელოდან

Ferrari FF's Show-Official Debut

21 მარტი

„ფერარიმ“ ჯერ კიდევ ჟენევის გამოფენამდე ორი კვირით ადრე გაგვაცნო თავისი ახალი ავტომობილი - „ფერარი FF“, რომელიც იტალიური კომპანიის ისტორიაში, პირველი სრულამძრავიანი მოდელია (მისი აბრევიატურა FF, ფერარი ფოურს, ანუ ფერარი ოთხს ნიშნავს) და რომელიც მარანელოელთა სამოდელო გამაში „612 სკალიეტის“ ადგილს დაიკავებს.
სრულამძრავიანი ტრანსმისიის გარდა, „ფერარი FF-ს“ იტალიური კომპანიისთვის უცნაური გარეგნობაც ახასიათებს. უფრო კონკრეტულად კი, მასში უცნაური უკანა ნაწილია, რომელსაც შეიძლება მოჭრილი კუდი, ან გრან ტურიზმოს კლასის ჰეჩბეკი ვუწოდოთ, საავტომობილო სამყაროში კი ამ სტილს „შუტინგ ბრეიკად“ მოიხსენიებენ. ავტომობილის დიზაინი ატელიე „პინინფარინას“ ნახელავია, პროექტს კი ამ ატელიეს მთავარი დიზაინერი ფლავიო მანცონი ხელმძღვანელობდა.
„ფერარი FF-ის“ გაბარიტებია: სიგრძე 4.907 მეტრი, სიგანე 1.953 მეტრი, სიმაღლე კი 1.374 მეტრი. ყველა ამ პარამეტრით, ის „სკალიეტიზე“ დიდია (შესაბამისად 5, 4 და 30 მილიმეტრით). ახალ ავტომობილს მოზრდილი საბარგულიც გამოარჩევს, რომლის მოცულობაც 450 ლიტრია და თუ უკანა სავარძლებს დაკეცავთ, საბარგულის მოცულობა 800 ლიტრს აღწევს.
ახალი ავტომობილი სრულიად ახალი V12 ძრავითაა აღჭურვილი, რომლის მუშა მოცულობაც 6.262 ლიტრია. ძრავის მაქსიმალური სიმძლავრე 660 ცხენის ძალა (8 000 ბრ/წთ-ზე), მაქსიმალური მაბრუნი მომენტი კი 683 ნიუტონმეტრია (6 000 ბრ/წთ-ზე). ამასთან, 500 ნმ უკვე 1 000 ბრ/წთ-ზე მიიღწევა(!). ძრავთან ორდისკოიანი ქუროთი, 7-საფეხურიანი რობოტიზებული გადაცემათა კოლოფია (კომპანია გეტრაგის წარმოების) შეწყვილებული.
„ფერარი FF“ 1 790 კილოგრამს იწონის, წონისა და სიმძლავრის ფარდობა კი, ყოველ ტონაზე 368 ცხენის ძალას შეადგენს. ღერძებს შორის წონის განაწილება 47:53 -ზეა, სადაც მეტი დატვირთვა უკანა ღერძზე მოდის. მარანელოელთა მონაცემებით, ავტომობილს ადგილიდან ასამდე აჩქარება 3.7 წამში შეუძლია, მისი მაქსიმალური სიჩქარე კი 335 კმ/სთ-ია. 100 კილომეტრის გასავლელად, მას 15.4 ლიტრი საწვავი სჭირდება, ყოველ კილომეტრზე კი ატმოსფეროში 360 გრამ ნახშირორჟანგს გამოჰყოფს. სხვათა შორის, აპეტიტის შემცირება სისტემა HELE-ს (ჰაი ემოუშნს - ლოუ ემიშნს - კარგი ემოციები, მცირე გამონაბოლქვი) დამსახურებაა, რომელშიც სისტემა სტოპ-სტარტიც შედის.

„ფერარი“ განსაკუთრებით ამაყობს FF-ის ტრანსმისიით, რომლის წყალობითაც, ეს ავტომობილი ნებისმიერი ხარისხის გზაზე თავს ისე გრძნობს, როგორც თევზი წყალში. კომპანიის განმარტებით, „ტრანსმისია მაბრუნ მომენტს ბორბლებს შორის მუდმივად, საზრიანად და საჭიროების შესაბამისად ანაწილებს“. ამიტომ, FF-ს ასფალტზეც, თოვლშიც, გრუნტზეც და ქვიშაზეც გზა „კარგად უჭირავს“.

გარდა ამისა, ავტომობილი აღჭურვილია საკიდარის რხევების მაგნეტორეოლოგიური ჩამქრობი სისტემით და „ბრემბოს“ წარმოების მძლავრი სამუხრუჭე სისტემით, რომლებშიც, რა ტქმა უნდა, კარბონ-კერამიკული დისკოებია გამოყენებული.

„ტატა“ ევროპელენს „ნანოს“ ნაცვლად „პიქსელს“ შესთავაზებს

Production Version of Tata Pixel Coming to Europe

20 მარტი

მაშინვე, როგორც კი მსოფლიოს თავისი სუპერ იაფი ავტომობილი - ჯუჯა ჰეჩბეკი „ნანო“ გააცნო, ინდურმა საავტომობილო კომპანია „ტატამ“ გამოაცხადა, რომ ამ ავტმობილის მოდიფიცირებულ ვერსიას ევროპის ქვეყნებშიც შეიტანდა. მაგრამ გავიდა ორი წელი და ჟენევის ავტო შოუზე, „ნანოს“ ევროპული ვერსიის ნაცვლად, ამ ავტომობილის მოდიფიცირებულ პლატფორმაზე დამზადებული კონცეპტუალური ჰეჩბეკი „პიქსელი“ ვიხილეთ.
კომპანიის დამაარსებელმა და შეფმა რატან ტატამ განაცხადა, რომ „პიქსელის“ სერიული ვერსია ბაზარზე მას შემდეგ გამოჩნდება, რაც კონცეპტუალურ ავტომობილს „ლამბოს“ ტიპის კარებებს ჩვეულებრივით შეუცვლიან. ასევე მანქანას ზოგიერთ ისეთ „კონცეპტუალურ“ ფუტურისტულ ინსტრუმენტს მოაცილებენ, რომლებიც მის სერიულ ვერსიას არ დასჭირდება. ასეთი ინსტრუმენტია მოწყობილობა, რომელიც ავტომობილს პრაქტიკულად ადგილზე მობრუნების საშუალებას აძლევს. კერძოდ, დაბალი სიჩქარით მოხვევისას, გარე რადიუსზე მყოფი ბორბალი მოძრაობის მიმართულებით ბრუნავს, შიდა რადიუსისა კი - საპირისპირო მიმართულებით.

მოკლედ, „პიქსელი“ მსოფლიოს უიაფესი ავტომობილის (ნანოს) კიდევ უფრო პატარა, ორკარიანი ვერსიაა. რა თქმა უნდა, კონცეპტუალური ვერსია სერიულის პლატფორმაზეა დაფუძნებული. თუმცა, გარეგნობით ისინი ერთმანეთთან ახლოსაც არ არიან. რა თქმა უნდა, ჟენევაში წარმოდგენილი კონცეპტუალური მოდელი გაცილებით კოხტაა, თუმცა სანამ კონვეიერამდე მიაღწევს, მას გარეგნობასაც შეუცვლიან.

„პიქსელი“ დიზელის 1.2-ლიტრიანი სამცილინდრიანი ძრავითაა აღჭურვილი, რომელიც მხოლოდ 60 ცხენის ძალას გამოიმუშავებს. ძრავი ავტომობილის უკანა სავარძლების ქვეშაა მოთავსებული, მასთან კი 5-საფეხურიანი კოლოფია შეწყვილებული. დახვეწილი აეროდინამიკის, მცირე წინაჭობის მქონე საბურავების და სისტემა სტოპ-სტარტის დახმარებით, ავტომობილი 100 კილომეტრზე მხოლოდ 3.4 ლიტრ საწვავს მოიხმარს, ყოველი კილომეტრის გავლისას კი ატმოსფეროში მხოლოდ 89 გრამ ნახშირორჟანგს გამოჰყოფს.

გარდა ამისა, რატან ტატა გვპირდება, რომ ევროპაში ოთხკარიან „პიქსელსაც“ შეიტანს, რომელსაც გარეგნობა კონცეპტუალური მოდელის მსგავსი ექნება. არაა გამორიცხული, რომ მისი წარმოების დაწყების შემდეგ, ავტომობილს ისევ „ნანო“ უწოდონ. ამასთან, რატან ტატა უარყოფს ხმებს იმის შესახებ, რომ „ნანოს“ წარმოებას პრობლემები შეექმნა. თუმცა ის კი აღიარა, რომ ამ ავტომობილის რეალიზაცია, მიუხედავად მისი დაბალი ფასისა (დაახლოებით 2 500 დოლრაი), პრობლემურია.

რატან ტატა იმედოვნებს, რომ ევროპული ბაზარი საქალაქო მინი ავტომობილს, რომელიც მანევრულობით გამოირჩევა და გარეგნულად ძლიერ ჰგავს „პინინფარინას“ კონცეპტუალურ „ნიდოს“ (თუმცა, ამ ორი კომპანიის თანამშრომლობაზე ჟენევაში არაფერი თქმულა), კარგად მიიღებს.

კონცეპტი „ქეპჩერი“ – „რენოს“ დიზაინის ახალი ენა

Renault Captur Concept Demonstrates New Design Language

20 მარტი

„რენო“ თავისი ავტომობილების კორპორატიულ სტილს ცვლის და ამ მეტად საპასუხიმგებლო საქმეს სათავეში კომპანიის მთავარი დიზაინერი, ჰოლანდიელი ლორენს ფან დენ აკერი ხელმძღვანელობს, რომელიც ადრე „მაზდაში“ მუშაობდა და იქაც იაპონური კომპანიის ახალ სტილს ამუშავებდა.

მისი ხელმძღვანელობით, ახალ სტილში შესრულებული პირველი კონცეპტუალური ავტომობილი - კუპე „დეზირი“ შარშან ვიხილეთ. ახლა კი იმავე სტილში, ფრანგებმა სუბკომპაქტური ქროსოვერი „ქეპჩერი“ შეიმუშავეს, რომელიც „რენოს“ იაპონელი პარტნიორის, „ნისანის“ ანალოგიური კლასის „ჯუკის“ ბაზაზე შეიქმნა და რომლის პირველი ჩვენებაც ჟენევის ავტო შოუზე გაიმართა.

ავტომობილის გაბარიტებია: სიგრძე 4.223 მეტრი, სიგანე 1.950 მეტრი, სიმაღლე 1.586 მეტრი, ბორბლებს შორის ბაზა 2.624 მეტრი, კლირენსი - 0.261 მეტრი. კონცეპტუალური ავტომობილის ძარა მთლიანად კარბონის კომპოზიტისგანაა დამზადებული. ამასთან, სახურავი მოსახსნელია, რაც იმის საშუალებას იძლევა, რომ ავტომობილი კაბრიოლეტად გადაკეთდეს.
„ქეპჩერს“ მხოლოდ ორი კარი აქვს, ოღონდ ორივე ძალიან გრძელია, რაც უკანა სავარძლებზე ადვილად მოხვედრის საშუალებას იძლევა. ამასთან, კარები ქვევიდან ზევით, „ლამბორგინის“ სტილში იღება. ავტომობილი საკმაოდ მსუბუქია - მხოლოდ 1 300 კილოგრამს იწონის, რაც კარბონის დეტალების დამსახურებაა. რაც შეეხება აეროდინამიკური წინააღმდეგობის კოეფიციენტს, ის ქროსოვერისთვის ძალიან ცოტა - მხოლოდ 0.31-ია.

კონცეპტუალური ავტომობილი 1.6-ლიტრიანი ტურბოდიზელითაა აღჭურვილი. ამასთან, მას წყვილი ტურბინა ემსახურება, რაც მცირელიტრაჟიანი ძრავებისთვის იშვიათი შემთხვევაა. ძრავი 160 ცხენის ძალას და 380 ნიუტონმეტრს (1 750 ბრ/წთ-ზე) გამოიმუშავებს. წყვილდისკოიანი ქუროს მეშვეობით, ძრავთან რობოტიზებული გადაცემათა კოლოფია (EDC) დაკავშირებული.

„რენოს“ მონაცემებით, ამ აგრეგატების დახმარებით, სპორტული ქროსოვერი ადგილიდან ასის აკრეფა 8 წამში შეუძლიამისი მაქსიმალური სიჩქარე კი 210 კმ/სთ-ს აღწევს. ფრანგული კომპანია ავტომობილის საწვავის ხარჯის შესახებ მონაცემებს არ აქვეყნებს. სამაგიეროდ, გვარწმუნებს, რომ ყოველი კილომეტრის გავლისას, „ქეპჩერი“ ატმოსფეროში მხოლოდ 99 გრამ ნახშირორჟანგს გამოჰყოფს.

ჟენევა 2011

„ასტონ მარტინ ვირაჟი“ - კომფორტიც და ტემპერამენტიც

Aston Martin Virage

20 მარტი

ამ მანქანის სახელი რას გეუბნებათ? ალბათ იმას, რომ მოსახვევების მაღალი ტემპით გავლა უნდა შეეძლოს. ესე იგი, ტემპერამენტი ადგილზეა და კომფორტიც - სხვანაირად, რა „ასტონი“ იქნებოდა. ბოლოს და ბოლოს, ჯუჯა ჰეჩბეკი „სიგნიტიც“ კომფორტულია. ინგლისური კომპანიის სამოდელო გამაში, „ვირაჟი“ DBS-სა და DB9-ს შორის ნიშას შეავსებს.

აი, როგორ ახასიათებს თავის ახალ ავტომობილს თავად მწარმოებელი: „ამ ავტომობილზე გამოვიყენეთ ის ტექნოლოგიები, რომლებიც DBS-ზე დავნერგეთ და ის კომფორტი, რომლითაც მყიდველს DB9 და „რეპიდი“ ხიბლავს“. „ვირაჟი“ კუპეა, მის ღია (რბილსახურავიან) ვერსიას კი „ვოლანტე“ დაერქმევა. ეს ორივე სახელი, „ასტონის“ საწარმოო პროგრამაში ადრეც ფიგურირებდა, თუმცა წლების განმავლობაში, დავიწყებას იყო მიცემული.

ავტომობილი აღჭურვილია V12 ძრავით, რომლის მუშა მოცულობაც 5.935 ლიტრია. ეს აგრეგატი, სხვადასხვა მოდელისთვის სხვადასხვა დონეზეა ფორსირებული. ამჯერად კი მისი სიმძლავრე 490 ცხენის ძალაა (6 500 ბრ/წთ-ზე), მაქსიმალური მაბრუნი მომენტი კი - 570 ნიუტონმეტრი (5 750 ბრ/წთ-ზე). ძრავთან 6-საფეხურიანი ავტომატური კოლოფია (ტაჩტრონიკ 2) დაკავშირებული, რომელშიც საფეხურების შეცვლა ელექტრონული სისტემით ხორციელდება. სხვათა შორის, საინტერესოა ამ ორი აგრეგატის შეთანწყობა - ძრავი წინ მდებარეობს, ავტომობილის შუა ნაწილში განლაგებულ კოლოფს ის კარდანის ლილვით უკავშირდება. ამ ტანდემის დახმარებით, „ვირაჟს“ ადგილიდან 100 კმ/სთ-ის აკრეფა 4.6 წამში შეუძლია, მისი მაქსიმალური სიჩქარე კი 299 კმ/სთ-ია.

დაკვირვებული თვალი ალბათ შენიშნავდა, რომ „ასტონ მარტინის“ ავტომობილებს სახელები თითქმის ყოველთვის ასო „ვი-ზე“ ეწყება. გამონაკლისებია მხოლოდ ოთხკარიანი კუპე „რეპიდი“ და ის მოდელები, რომელთა სახელებიც აბრევიატურებია. ეს ტრადიცია თითქმის ასწლოვან კომპანიას 1950-იანი წლებიდან აქვს, როცა თავის მოდელ DB2-ზე ოპციის სახით, მყიდველს ძრავს, სახელად „ვენტიჯ“, სთავაზობდა.

რაც შეეხება სახელ „ვირაჟს“ (რაც ფრანგულად მოსახვევს ნიშნავს), ის პირველად 1985 წელს გამოიყენეს. ამ სახელს მხარი კომპანიის მაშინდელმა მთავარმა აღმასრულებელმა ვიქტორ გონტლეტმა და „ასტონ მარტინის“ მფლობელთა კლუბმა დაუჭირეს.

„ასტონ მარტინ ვირაჟის“ მთავარი კონკურენტი, ანალოგიური მახასიათებლების მქონე „მაზერატი გრანტურიზმო MC სტრადალე“ იქნება. ინგლისურმა კომპანიამ თავის ახალ ავტომობილზე შეკვეთების მიღება უკვე დაიწყო, არადა ფასი ჯერ არ გამოუცხადებია. სავარაუდოდ, „ვირაჟი“ 200 000 დოლარი ეღირება.

ჟენევა 2011

„ალფას“ პატარა სუპერ ავტომობილი

Alfa Romeo 4C Concept

19 მარტი

ეს ის ავტომობილი უნდა გახდეს, რომელიც „ალფა რომეოს“ შელახული იმიჯის გამოსწორებასა და კრიზისის დაძლევაში დაეხმარება. ხელმისაწვდომი სუპერ ავტომობილი - ასე მოიხსენიებდნენ პალექსპოს ერთ-ერთ გამორჩეულ კონცეპტუალურ ექსპონატს ჟურნალისტები.

მილანური კომპანია საიმიჯო ავტომობილს - „8C კომპეტეციონეს“ ადრეც უშვებდა, მაგრამ ეს ნამდვილი სუპერი იყო, შესაბამისი ფასით და შეზღუდული ტირაჟით, რის გამოც, ბრენდის იმიჯის გამოსწორებაში ვერანაირი როლი ვერ ითამაშა. ჰოდა, ახლა ეს მისია „ალფა 4C-ს“ დაეკისრება.

კარბონის კომპოზიტის შასი, შუაში განლაგებული ძრავი, რომელიც მამოძრავებელ ძალას უკანა წამყვან ბორბლებს ანიჭებს - ყველაფერი ეს სუპერ ავტომობილების სტილშია. თუმცა, „ალფა 4C-ს“ ბევრი რამ ჩვეულებრივი, სერიული ავტომობილებისგანაც აქვს მიღებული.

დავიწყოთ იმით, რომ ამ პატარა კუპეს მზიდი ელემენტი ფოლადის კარკასია, რომელზეც კარბონისგან დამზადებული ძარის პანელებია ასხმული. ავტომობილის სიგრძე 4.00 მეტრია, ბაზა კი - 2.40 მეტრი. წინა საკიდარი წყვილ ჩანგლისებრ ბერკეტებს ეყრდნობა, უკან კი მაკფერსონის სისტემაა გამოყენებული. „ალფა 4C“ სულ რაღაც, 850 კილოგრამს იწონის, ღერძებს შორის კი ეს წონა 40:60-ზეა (წინ/უკან) განაწილებული.

4C ოთხ ცილინდრს აღნიშნავს. სწორედ ამდენი ცილინდრი აქვს 1.75-ლიტრიან ტურბოაგრეგატს, რომელიც 200 ცხენის ძალას იძლევა. ძრავთან ორდისკოიანი ქუროს მეშვეობით, რობოტიზებული ტრანსმისიაა დაკავშირებული. სუპერქარისთვის ცხენის ძალები თუ გეცოტავათ, დაგამშვიდებთ - ყოველ ცხენის ძალაზე მხოლოდ 4.25 კილოგრამი მოდის, რაც კარგი მაჩვენებელია.

ორი სიტყვა ძრავზე უნდა ითქვას. ტურბოკომპრესორის გარდა, მას საწვავის უშუალოდ წვის კამერაში შეფრქვევის სისტემა, მუდმივად ცვალებადი ფაზების მქონე აირგანაწილების სისტემა და სპეციალური მოწყობილობა ემსახურება, რომელიც ტურბო ჩამორჩენას აბალანსებს. მთელი ეს ავლა-დიდება საკმარისია იმისათვის, რომ „ალფა 4C-ს“ მაქსიმალური სიჩქარე 250 კმ/სთ იყოს, ადგილიდან ასამდე აჩქარებას კი 5 წამზე ნაკლებში ასწრებდეს.

ჟენევა 2011

„მინი როკეტმენი“ - ყველაზე პატარა „მინის“ კონცეპცია

MINI Rocketman Concept

18 მარტი

ჟენევის გამოფენის ერთ-ერთი ყველაზე გამორჩეული ვარსკვლავი „მინის“ ახალი კონცეპტუალური მოდელი, სახელად „როკეტმენი“ გახდა. ამ ავტომობილით, ბრიტანულმა კომპანიამ გვახარა, რომ იმ გაბარიტებს დაუბრუნდება, რომლითაც ლეგენდარული ალექს ისიგონისის პირველმა „მინიმ“, მსოფლიოს ავტომოყვარულთა გულები დაიპყრო.

მცირე ზომების გარდა, ამ სამკარიან ავტომობილს ისიც გამოარჩევს, რომ მის სალონში მხოლოდ სამი სავარძელი მოთავსდა (ჩასაჯდომი ფორმულა 3+1). თუმცა, პროექტის ავტორები იმით გვამშვიდებენ, რომ საჭიროების შემთხვევაში, უკან მეორე სავარძლის დადგმაც შეიძლება (ბარემ ასეც მოქცეულიყვნენ).

„როკეტმენი“ თავისი კარებების უცნაური კონსტრუქციითაც გამოირჩევა. პირველ რიგში, უნდა აღინიშნოს, რომ სამივე კარი ორსეგმენტიანია. უკანა კარს ერთი საყრდენი აქვს და ისიც, სახურავშია შეჭრილი. ის ქვევიდან ზევით იხსნება. ამასთან, მას მეორე სეგმენტიც აქვს, რომელიც საპირისპირო მიმართულებით - ზევიდან ქვევით იღება. საბარგული მინიატურულია და იქ მხოლოდ ხელჩანთას თუ მოათავსებთ.

გვერდითა კარებებიც ორსეგმენტიანია. წინა სეგმენტი ფსევდოკარია და ჩვეულებრივად იღება, მასზე კი ჩვეულებრივი კარია დაკიდებული, რომელიც შეიძლება გაშლილი იყოს, ან მოკეცილი. შესაბამისად, მოკეცილ მდგომარეობაში, პარკირებისთვის შეზღუდულ ადგილზეც ისე იღება, რომ სალონში მოხვედრა, ან იქიდან გადმოსვლა გამარტივებულია. გვერდითა კარებებს არ აქვს შუშის ჩარჩოები. სახურავი კი მთლიანად გამჭვირვალეა. თანაც, მასზე ბრიტანეთის დროშაა გამოსახული (თუმცა, ფერების გარეშე).

„როკეტმენის“ გაბარიტებია: სიგრძე 3.419 მეტრი, სიგანე 1.907 მეტრი, სიმაღლე 1.398 მეტრი. ავტომობილი კარბონის კომპოზიტისგან შექმნილ სივრცულ მზიდ სისტემაზეა (ბეემვეს ტექნოლოგია) ბაზირებული, რომელიც ძარის ზოგიერთ ადგილას და ინტერიერში ჩანს კიდეც. დაკიდევ, ეს პატარა ავტომობილი უზარმაზარ, 18-დუიმიან ბორბლებზე დგას.

ჟენევაში „მინის“ არაფერი უთქვამს იმაზე, თუ რა ძრავითაა აღჭურვილი „როკეტმენი“. არაა გამორიცხული, რომ საგამოფენო მანქანა ძრავის გარეშეც კი იყო. მის დანიშნულებას ხომ მხოლოდ კონცეპციის ჩვენება წარმოადგენდა და ისიც, რომ მალე ინგლისური კომპანიის საწარმოო პროგრამაში კიდევ ერთი ავტომობილი გამოჩნდება.

ჟენევა 2011

„ბეემვეს“ კიდევ ერთი ხედვა - კავშირი მძღოლსა და მანქანას შორის

BMW's Vision ConnectedDrive Roadster Concept

18 მარტი

გერმანული კომპანია თავისი მომავლის ხედვების დემონსტრირებას აგრძელებს. პირველი ხედვა „ვიჟნ ეფიშნტდაინემიქსი“ იყო, რომელიც მალე i8-ს სახით მოევლინება ავტოსამყაროს. ამჯერად კი ჟენევაში ბავარიელებმა კონცეპტუალური „ვიჟნ კონექტდრაივი“ წარმოადგინეს, ღია ავტომობილი, რომელშიც მთავარი არც მისი აგრეგატები და არც გარეგნობაა.

გამოფენაზე ბავარიელებმა გამოაცხადეს, რომ ეს ავტომობილი (შემოკლებით ვიჟნ CD) მხოლოდ საჩვენებელი კონცეპციაა და რომ მსგავსი რამ კონვეიერზე არ მოხვდება. თუმცა არც ის დამალეს, რომ კომპანიიდან კრის ბენგლის წასვლის შემდეგ, „ბეემვე“ თავისი კორპორატიული სტილის შეცვლას აპირებს და ახალი სტილის პირველი ვერსია სწორედ ეს როდსტერია.

კონცეპტუალური ავტომობილი, „ბეემვეს“ ახალი მთავარი დიზაინერის, ჰოლანდიელი ადრიან ფან ჰოოიდონკის ხელმძღვანელობით შეიქმნა. „ვიჟნ CD-ის“ გარეგნობა აშკარად აგრესიული და დახვეწილია. დღესვე შეიძლება ითქვას, რომ აქედან მომავალ სერიულ ავტომობილებზე ალბათ რადიატორის ახალი ფორმა და უკანა ფარები გადავა. ძარის დანარჩენი ელემენტები მნიშვნელოვნად შეიცვლება.
მთავარი სიახლეები ავტომობილის სალონშია და ისინი სტილს არ ეხება. თუმცა, ესეც ყურადღებას იმსახურებს - როდსტერი ორადგილიანია და ადგილებიც სარბოლი მანქანის კოკპიტის ტიპის სალონშია განლაგებული. მძღოლის ადგილის წინ, მრავალფუნქციური და რაც მთავარია, პროექცირებადი სამგანზომილებიანი მონიტორი განლაგდა, რომელზეც აბსოლუტურად ყველანაირი ხელმისაწვდომი ინფორმაციის გამოტანაა შესაძლებელი. ბავარიელები ირწმუნებიან, რომ მათ მიერ შემუშავებული სამგანზომილებიანი სისტემა, მალე მათს ავტომობილებში, ტრადიციულ მაჩვენებელთა დაფას გამოდევნის. სხვათა შორის, მსგავსი საინფორმაციო მოწყობილობა მგზავრის სავარძლის წინაც მდებარეობს.
ახალი დამხმარე მოწყობილობა, რომელიც უამრავი მაკონტროლებელი სენსორითაა აღჭურვილი, მძღოლს საქმეს უადვილებს. ამ სენსორების და მონიტორის დახმარებით, შესაძლებელია ავტომობილის გარშემო არსებული ვითარების სწრაფად და ეფექტურად გაკონტროლება და საჭიროების შემთხვევაში, რეაგირებაც. ამასთან, სისტემას სხვა მსგავსი სისტემებით აღჭურვილ ავტომობილებთან ურთიერთობა შეუძლია. ყველაფერი ეს კი ავტომობილის და მასში მყოფთა უსაფრთხოებას უზრუნველყოფს.

ავტომობილი ინტერნეტშია ჩართული და მასში მყოფთ, მსოფლიო ქსელით განუსაზღვრელად სარგებლობა შეუძლიათ. მისი დახმარებით, შეგიძლიათ გზად არსებულ რესტორანში, თქვენთვის სასურველი კერძი შეუკვეთოთ, სახლში კი ვიდეო მომართოთ და სასურველი ფილმი თქვენი მისვლისთანავე ჩაირთვება. რა თქმა უნდა, ელექტრონული სისტემა მგზავრობის დაგეგმვაში და ყველაზე ეკონომიური მარშრუტის შერჩევაშიც დაგეხმარებათ.

მოკლედ, „ბეემვეს“ მორიგი ხედვით, ავტომობილების ინდუსტრიაშიც, მომავალი ელექტრონიკისა და სოციალური ქსელისაა...

ჟენევა 2011

„პორშე პანამერა S ჰიბრიდი“

Porsche Panamera S Hybrid

17 მარტი

„პორშემ“ ჟენევის საავტომობილო გამოფენა თავისი ახალი ავტომობილის - ჰიბრიდული „პანამერას“ (პანამერა S ჰიბრიდის) პრემიერისთვის გამოიყენა. მწარმოებლის განცხადებით, 380-ცხენისძალიანი გრანტურიზმო, „პორშეს“ ისტორიაში ყველაზე ეკონომიური ავტომობილია.
თავად განსაჯეთ, კომბინირებული რეჟიმით მოძრაობისას, 100 კილომეტრის გასავლელად, მას 6.8 ლიტრი საწვავი ჰყოფნის, ყოველი კილომეტრის გავლისას კი, ატმოსფეროს მხოლოდ 159 გრამი ნახშირორჟანგით აბინძურებს. ოღონდ, ეს მხოლოდ იმ შემთხვევაშია შესაძლებელი, როდესაც ავტომობილი „მიშლენის“ წარმოების ყველა სეზონის საბურავებზე დგას, რომლებიც რხევებზე შემცირებული წინააღმდეგობით გამოირჩევა.
რაც შეეხება „პანამერა S ჰიბრიდის“ აღჭურვილობას, მის კაპოტქვეშ მოთავსებულია „აუდისგან“ მიღებული 3.0-ლიტრიანი დამჭირხნიანი V6, რომელიც 333 ცხენის ძალას გამოიმუშავებს. ჰიბრიდულ სისტემაში ასევე გაერთიანებულია მომცრო ელექტროძრავი, რომლის მაქსიმალური სიმძლავრეც 47 ცხენის ძალაა. ამ ორი აგრეგატის ჯამური სიმძლავრე 380 ცხენის ძალაა.
ორივე ძრავს ავტომობილის ერთად და ცალ-ცალკე ტარება შეუძლია. ელექტროძრავი ასევე მუშაობს როგორც გენერატორი და სტარტერი. ამგვარად, საჭირო აღარაა ამ ორი აგრეგატის ცალკე დაყენება, რითაც ავტომობილის წონა მცირდება. ორივე ძრავი ერთმანეთთანაა შეწყვილებული და ისინი 8-საფეხურიან ტრანსმისიასთანაა (ტიპტრონიკ) დაკავშირებული, რომელიც მათ მიერ გამომუავებულ მაბრუნ მომენტს უკანა წამყვან ბორბლებს აწვდის.

„პორშეს“ განცხადებით, ჰიბრიდული „პანამერა“ ადგილიდან 100 კმ/სთ სიჩქარეს 6.0 წამში აღწევს, მისი მაქსიმალური სიჩქარე კი 270 კმ/სთ-ია. მხოლოდ ელექტროძრავის მეშვეობით გადაადგილებისას, ავტომობილის სვლის სიშორე მხოლოდ 2 კილომეტრია და ამ დროს, მისი სიჩქარე მხოლოდ 85 კმ/სთ-ია. ელექტროძრავი ენერგიას ნიკელ მეტალ ჰიდრიდული აკუმულატორისგან ღებულობს, რომელიც თავის მხრივ, დამუხრუჭებისას და ინერციით მოძრაობისას, ძრავ/გენერატორისგან იმუხტება.

„პორშე“ ჰიბრიდული „პანამერას“ გაყიდვას ივნისში დაიწყებს. გერმანიაში ამ ავტომობილის საბაზო ღირებულება 106 185 ევრო იქნება.

ჟენევა 2011

„როლს როისის“ პირველი ელექტრომობილი

Rolls Royce 102EX Phantom Electric

17 მარტი

ვინ იფიქრებდა, რომ „როლს როისი“ ოდესმე გიგანტურ ძრავებზე უარს იტყოდა. მაგრამ თანამედროვე ავტოინდუსტრიის ახალი მოდა, უფრო სწორედ ტრენდი, ლიმუზინების მწარმოებელი ბრიტანული მარკისთვისაც მიმზიდველი აღმოჩნდა. ამის დასტურია ის ფაქტი, რომ ჟენევის ავტო შოუზე, „როლს როისმა“ ელექტრონული „ფანტომი“ – 102EX წარადგინა.
ამ ავტომობილზე, 6.75-ლიტრიანი V12 ძრავი ორმა ელექტროძრავმა შეცვალა, რომელთა ჯამური სიმძლავრე 389 ცხენის ძალა, მაბრუნი მომენტი კი 800 ნიუტონმეტრია. ექვსსაფეხურიანი ავტომატური კოლოფი კი ერთსაფეხურიანი ტრანსმისიით შეიცვალა.
ორივე ელექტროძრავი უკანა ღერძზე ზის და ისინი ლითიუმ-იონური ელემენტების ბლოკისგან იკვებება. სხვათა შორის, ეს აკუმულატორების ყველაზე დიდი ბლოკია მათ შორის, რომლებიც კი ოდესმე ავტომობილებზე გამოუყენებიათ. მისი ტევადობა 70 კილოვატსაათია, გამართულად მუშაობის ვადა კი - სამი წელი.
აკუმულატორების დასამუხტად, სამი ტიპის მოწყობილობას იყენებენ. მათგან ერთფაზიანის გამოყენების შემთხვევაში, აკუმულატორების სრულ დამუხტვას 20 საათი სჭირდება, სამფაზიანს კი 8 საათი ჰყოფნის. მესამე მოწყობილობა ეგრეთ წოდებული ინდუქციური დამმუხტავია, რომელიც მანქანის ძირზე მოთავსებულ ფირფიტას იყენებს. ოღონდ, ის ჯერ სამუშაო კონდიციამდე არ მიუყვანიათ. ნებისმიერ შემთხვევაში, ელექტრული „ფანტომის“ სვლის სიშორე 200 კილომეტრია.

რაც შეეხება ამ გიგანტური ელექტრომობილის ტემპერამენტს, 102EX-ს ადგილიდან 100 კმ/სთ-ის აკრეფა 8 წამში შეუძლია (ბენზინისძრავიანი ფანტომი იგივეს 5.7 წამში ახერხებს), მისი მაქსიმალური სიჩქარე კი ხელოვნურადაა შეზღუდული (ენერგიის დაზოგვის მიზნით) და 160 კმ/სთ-ს აღწევს.

ჟენევის შოუს დასრულებისთანავე, „როლს როისმა“ თავისი პირველი ელექტრომობილი, მსოფლიო ტურნეში გააგზავნა, იმ ქვეყნებში, სადაც ყველაზე მეტი ავტომობილი ეყიდება. ამ ტურნეს მიზანი კი მარტივია - პოტენციურ მყიდველთა აზრის შესწავლა. მიღებული გამოხმაურებების ანალიზის შემდეგ კი გადაწყდება, რომელი ალტერნატიული ტექნოლოგიებია როლსების მყიდველებისთვის ყველაზე მისაღები.

ინდური „ფერარი“ „ტოიოტა კოროლას“ ბაზაზე

ამაზე უკეთესს საქართველოში დაგიმზადებენ!

Indian Firm Whips up a Ferrari F430 Replica out of a Toyota Corolla

17 მარტი

მთელს მსოფლიოში უამრავი კომპანიაა, რომლებიც სუპერ ავტომობილების კლონებს ამზადებენ. ზოგიერთი მათგანის ნამუშევარი იმდენად დახვეწილია, რომ ნამდვილი „ფერარის“, „ლამბორგინის“ და „ეი-სი კობრასგან“ ვერც განასხვავებთ. მაგრამ ყველა მათგანი „პონტიაკ ფიეროს“, „ტოიოტა MR2-ის“, ან კიდევ (იშვიათად) „ტოიოტა სელიკას“ ბაზაზეა შექმნილი.

მაგრამ არსებობენ გამონაკლისებიც, რომლებიც თავიანთი „შედევრებისთვის“ (ასეთ ავტომობილებს ხშირად კიტქარებად მოიხსენიებენ) სხვა, წინაამძრავიანი ავტომობილების ბაზაზე ქმნიან. ამ ფოტოზე გამოსახული ავტომობილი, რომელიც ძლიერ ჰგავს „ფერარი F430-ს“, არც მეტი, არც ნაკლები, „ტოიოტა კოროლას“ პლატფორმაზეა ბაზირებული.

კომპანიას, უფრო სწორედ, პატარა ფირმას, რომელმაც ეს მანქანა შექმნა, „იგზეეკიუტივ მოდქარ ტრენდს“ ეწოდება. ეს ინდური ფირმაა, რომელიც ქალაქ მუმბაიში მდებარეობს. ამ ავტომობილის შესახებ მხოლოდ ისაა ცნობილი, რომ მასში ჩასაჯდომი ფორმულაა 2+2 და ის 10 ლაკჰი, ანუ დაახლოებით 22 500 ამერიკული დოლარი ღირს.

ისე, თუ მსგავსი კიტქარის ყიდვა გსურთ, ინდოეთში წასვლა სულაც არაა საჭირო. მსგავს სუპერ ავტომობილს შეკვეთით თბილისშიც დაგიმზადებენ. ალბათ გსმენიათ თვითნასწავლი დიზაინერის, გოჩა ქსოვრელის შესახებ, რომელმაც შარშან „ჰონდა სივიკის“ ბაზაზე მცირე შედევრი შექმნა.

გოჩა ქსოვრელი ასეთი ავტომობილის დამზადებას დიდი ხანია, აპირებს, მაგრამ უსახსრობა უშლის ხელს. მაგრამ თუ შეკვეთას მიიღებს, „სუბარუ იმპრეზას“, ან „მიცუბიში ლანსერ ევოს“ აგრეგატების ბაზაზე, ისეტ კიტქარს დაგიმზადებთ, ნამდვილი „ლამბოსა“ და „ფერარისგან“ ვერ განასხვავებთ...

„ჰიუნდაის“ აღმაშენებელი გადადგა

Hyundai R&D head Lee steps down

17 მარტი

„ჰიუნდაის“ წარმატებების ერთ-ერთი მთავარი შემოქმედი, კორეული კომპანიის კვლევისა და განვითარების განყოფილების შეფი ლი ჰიუნ-სუნი თანამდებობიდან გადადგა. მან „ჰიუნდაი“ აქ მუშაობის 27 წლის შემდეგ დატოვა.

ის ერთ-ერთი იმ ადამიანთაგანია, რომელმაც ამ კომპანიის სტაბილურ განვითარებაში დიდი როლი შეასრულა. სწორედ მისი დიდი დამსახურებაა ის, რომ კორეულ კომპანიას დღეს მოწინავე ტექნოლოგიების დამნერგავის სახელი აქვს და რომ მის პროდუქციას მომხმარებელი უმეტეს შემთხვევაში ენდობა.

ლი „ჰიუნდაიში“ იმ დროიდან მუშაობდა, როცა კორეულმა კომპანიამ თავისი პირველი ძრავი (სერია ალფა) შეიმუშავა. ეს 1991 წელს მოხდა, მანამდე კი „ჰიუნდაი“ „მიცუბიშის“ აგრეგატებზე იყო დამოკიდებული. შემდეგ კი, ლის ხელმძღვანელობით, „ჰიუნდაი“ თანდათან ნერგავდა საწვავის შეფრქვევის, ჰიბრიდულ და სხვა მოწინავე ტექნოლოგიებს. ჰიბრიდული აგრეგატი ახლახანს „სონატას“ კაპოტქვეშ აღმოჩნდა, რომელსაც მალე მიიღებს ამერიკელი მყიდველი.

„ჰიუნდაის“ კვლევისა და განვითარების განყოფილების ხელმძღვანელის თანამდებობაზე, ლის იანგ ვუნ-ჩული შეცვლის, ვინც ადრე კომპანიის კვლევისა და განვითარების კორეული ცენტრის პრეზიდენტი იყო.

„ტატა მოტორსი“ ევროპისთვის ელექტრომობილსაც გამოუშვებს

Tata Motors to Launch Electric Car in Europe

16 მარტი

„ნისანი“ პირველი დიდი კომპანიაა, რომელმაც ელექტრომობილების მასობრივი წარმოება დაიწყო. ეს შარშან მოხდა და ელექტრომობილმა, სახელად „ნისან ლიფ“, მაშინვე წლის საუკეთესო ავტომობილის წოდება მოიპოვა. მას შემდეგ კი მასზე დიდი მოთხოვნაა. იმდენად დიდი, რომ იაპონური კომპანია მიღებული შეკვეთების შესრულებას ვერ აუდის.

მალე ბაზარზე რამდენიმე ახალი ელექტრომობილის გამოჩენაა მოსალოდნელი და ერთ-ერთი პირველი, რომელიც ევროპაში „ლიფს“ კონკურენტს მოუვლენს, ინდური „ტატა მოტორსი“ გახდება, კომპანია, რომელიც ჯერჯერობით მხოლოდ მსოფლიოს უიაფესი ავტომობილის - „ნანოს“ წარმოებითაა ცნობილი.

ინდური კომპანია ელექტრომობილს, სახელად „ინდიკა ვიტა EV“, მალე წარადგენს ევროპაში. პირველი ქვეყნები, სადაც ეს ელექტრომობილი გაიყიდება, დანია, ნორვეგია და ბრიტანეთია. პირველ რიგში, ამ ქვეყნების გზებზე სატესტო ეგზემპლარები დაიწყებს მოძრაობას. ბრიტანეთში ის ზაფხულში გამოჩნდება. სხვათა შორის, ალბიონის მთავრობამ, ამ ავტომობილისთვის სპეციალური შეღავათი დააწესა 5 000 გირვანქა სტერლინგის სახით.

„ტატა მოტორსის“ მიერ გავრცელებული ინფორმაციით, „ინდიკა ვიტა EV“ აკუმულატორების ერთი სრული დამუხტვით დაახლოებით 170 კილომეტრის გავლას შეძლებს, მისი აკუმულატორების დასამუხტად 8 საათია საჭირო. ავტომობილის მაქსიმალური სიჩქარე კი მხოლოდ 114 კმ/სთ-ია.

„პორშე კაიუნს“ ლაიპციგის ქარხანა გამოუშვებს

Leipzig Confirmed as Porsche Cajun Production Site

16 მარტი

„პორშე“ ისევ „სუფთა“ გერმანულ კომპანიად დარჩება - თავის ავტომობილებს კვლავაც მხოლოდ გერმანიაში გამოუშვებს. გერმანული კომპანიის ხელმძღვანელობამ გადაწყვიტა, რომ კომპაქტური ქროსოვერი „კაიუნი“ ლაიპციგში აწარმოოს, რისთვისაც აღმოსავლეთ გერმანიის ამ ქალაქში მდებარე ქარხანას მნიშვნელოვანი მოდიფიკაცია ჩაუტარდება.

შტუტგარტული კომპანია ქარხანას (ფოტოზე) 400 ჰექტარით გააფართოებს. ახალი ხაზები მთლიანად კომპანიის მეხუთე მოდელის წარმოებით იქნება დაკავებული. ახალ ფართობზე ასევე განთავსდება სამღებრო და ამწყობი სექციები. ამასთან, იქ სამუშაოდ, „პორშე“ 1 000 ახალ თანამშრომელს აიყვანს. ჯერ უცნობია, რამდენი სამუშაო ადგილი დაემატება ცუფენჰაუზენისა და ვაიზახის საწარმოებში, რომლებიც ასევე დაკავშირებული იქნება „კაიუნის“ წარმოებასთან.

„პორშეს“ შეფი მათიას მიულერი ლაიპციგის ქარხანას ქებით მოიხსენიებს და ამბობს, რომ იქ „კაიენისა“ და „პანამერას“ წარმოებამ დაამტკიცა, რომ ამ ქარხანას უმაღლესი ხარისხის პრემიუმ ავტომობილების წარმოება შეუძლია. „ჩვენი გადაწყვეტილება, ახალი ავტომობილიც ამავე ქარხანაში ვაწარმოოთ, იმის დასტურია, რომ ჩვენ ლაიპციგური საწარმოს შესაძლებლობებს ვენდობით“, - დასძენს მიულერი.

ახალი ავტომობილების შესახებ, სხვა ინფორმაცია პრაქტიკულად არ ვრცელდება. უფრო მეტიც, „კაიუნზე“ ჯერ ჭორებსაც ვერ გაიგებთ, რაც იმის ნიშანია, რომ მისი წარმოების დაწყებამდე სამი წელი მაინც რჩება. ერთადერთი ცნობა, რაც მწარმოებელმა მედიისთვის გაიმეტა ისაა, რომ ამ ავტომობილით, „პორშე“ ახალგაზრდა მყიდველის მიზიდვას იმედოვნებს.