უიშვიათესი „ფერარი ტესტა როსა“ 4 მილიონ დოლარად იყიდება

Rare four-cylinder '57 Ferrari Testa Rossa expected to top $4 million at auction

17 მაისი

ამ ავტომობილს ხშირად „ფერარი 500-საც“ უწოდებენ. რა თქმა უნდა, აქ „ფიატ 500“ არაფერ შუაშია. ლაპარაკია მოდელზე, რომლის სრული სახელწოდებაა „ფერარი 500 TRC“ (აბრევიატურა ნიშნავს ტესტა როსა ტაიპ C-ს). ეს არის ავტომობილი სპაიდერის ძარით და ოთხცილინდრიანი (ერთ რიგში განლაგებული ცილინდრებით) ძრავით, რომელიც მარანელოელთა ცნობილმა ინჟინერმა აურელიო ლამპრედიმ სპეციალურად, ფორმულა 2-ის ავტომობილისთვის შექმნა.

მას შემდეგ, რაც ლამპრედიმ მარანელო დატოვა, ეს ძრავი სპორტული პროტოტიპების კლასს მიუსადაგეს. ავტომობილი მოდელ „მონცას“ ბაზაზე შეიქმნა (1953 წელს) და რაც მთავარია, ის პირველი ავტომობილია, რომელსაც სახელად ტესტა როსა უწოდეს. ამის მიზეზი კი ის გარემოება გახდა, რომ ძრავს, რომელიც ამ ავტომობილს მამოძრავებელ ძალას ანიჭებს, წითლად შეღებილი ბლოკის თავი აქვს.

სხვათა შორის, 500-ის შემდეგ, „ფერარიმ“ გაცილებით მძლავრი „250 ტესტა როსაც“ გამოუშვა, თუმცა პირველი კოლექციონერებში დღეს უფრო ფასობს, რადგან ძალიან ცოტაა დამზადებული. მარანელოში მხოლოდ 19 ცალი „ფერარი 500 TRC“ დაამზადეს. თუმცა, შემდეგ 250-ის უპოპულარულესი ვერსია - GTO გამოუშვეს და ამით 500 დაჩრდილეს.

ფოტოზე გამოსახული ავტომობილი, აღნიშნული 19-დან მეექვსეა. ის სიჩილიელმა მყიდველმა შეუკვეთა, რომელმაც თავისი კვიცი რამდენიმე რბოლაშიც კი გამოიყენა. სხვათა შორის, ამ მოდელით, ოღონდ არა ფოტოზე ნაჩვენები ეგზემპლარით, ლე მანის და ტარგა ფლორიოს მარათონები, ასევე ნაკლებად პოპულარული მონტე პელეგრინოს (პალერმოში) სამთო რბოლაა მოგებული (თავის კლასებში).

ავტომობილს, რომელსაც ფოტოზე ხედავთ, სააუქციონო კომპანია „RM ოქშენზი“, ვილა დ’ესტეს (იტალიის ჩრდილოეთში მდებარე ტბა კომოს პირასაა) ელეგანტურობის კონკურსზე გამოიტანს. წინასწარი ვარაუდით, ავტომობილი 2.6-3.3 მილიონ გირვანქა სტერლინგად გაიყიდება. ცნობისათვის, იმავე აუქციონზე, „ფერარი 500 TRC-თან“ ერთად, „ბერტონეს“ 6 კონცეპტუალური ავტომობილი, „ძაგატოს“ ძარებით შემოსილი რამდენიმე „ალფა რომეო“, ასევე „ტალბოს“ და „ბუგატის“ რარიტეტული ავტომობილები გაიყიდება.

„ასტონ მარტინი“ ელექტრომობილსაც გამოუშვებს

Aston Martin will launch an electric Cygnet

17 მაისი

„ასტონ მარტინი“ თავისი სენსაციური საქალაქო მინიქარის, „სიგნიტის“ ელექტრონულ ვერსიაზე მუშაობს. ამ ინფორმაციას ბრიტანული ავტორიტეტული საავტომობილო გამოცემა „ქარ“ აქვეყნებს. სხვათა შორის, ინგლისურ კომპანიამდე, ანალოგიური ავტომობილის (iQ) ბაზაზე ელექტრომობილს მანამდე „ტოიოტაც“ გამოუშვებს.

ცნობილია, რომ სწორედ „ტოიოტა iQ“ არის „ასტონის“ ჯუჯას საბაზო ავტომობილი. პრაქტიკულად, ისინი იდენტურებია და მხოლოდ გარეგნობით განსხვავდებიან და ისიც, მინიმალურად. ექსკლუზიური ავტომობილების მწარმოებელ ინგლისურ კომპანიას, ამ პატარას გამოშვება იმისთვის დასჭირდა, რომ მისი წარმოების ავტომობილების გამონაბოლქვში ნახშირორჟანგის საშუალო შემცველობა შემცირდეს და ამით, ევროპის გამკაცრებული სტანდარტები მეტნაკლებად დაკმაყოფილდეს.

ბუნებრივია, „ასტონ მარტინი“ არც ელექტრომობილის შემუშავებისას დაიწყებს გამომგონებლობას და იმას აიღებს, რასაც იაპონური კომპანია მანამდე თავისი ჯუჯასთვის შეიმუშავებს. ოღონდ, მიღებულ სიახლეს თავისი ბრენდით, თავის კორპორატიულ სტილში გადააფორმებს.

სხვათა შორის, თავისი ელექტრული iQ „ტოიოტამ“ ჟენევის ავტო შოუზე ახლახანს წარადგინა. ის 64-ცხენისძალიანი ელექტროძრავითაა აღჭურვილი, რომელიც ენერგიას ლითიუმ-იონური ელემენტების ბლოკისგან ღებულობს. ამ ბლოკის ტევადობა კი 11 კილოვატსაათია. ბლოკი მანქანის უკანა ნაწილის ძირზე, ზუსტად იქ მოთავსდება, სადაც შიდაწვისძრავიან iQ-ს საწვავის ბაკი აქვს დამაგრებული.

აკუმულატორების ტევადობა საკმარისია იმისათვის, რომ ავტომობილმა ერთი სრული დამუხტვით, დაახლოებით 105 კილომეტრი გაიაროს. 0-100 კმ/სთ აჩქარებისთვის მას 14 წამი სჭირდება, მაქსიმალური სიჩქარე კი 125 კმ/სთ-ს აღწევს. აკუმულატორები ჩვეულებრივი საყოფაცხოვრებო ქსელიდან და სპეციალური მოწყობილობითაც იმუხტება. ამასთან, ამ უკანასკნელის გამოყენებისას, 15 წუთში აკუმულატორის 80 პროცენტით შევსებაა შესაძლებელი.

ცნობისათვის, ბენზინისძრავიანი „სიგნიტის“ წარმოების შესახებ განცხდადება „ასტონ მარტინმა“ პირველად ორი წლის წინ გამოაქვეყნა, ახლახანს კი მის წარმოებას შეუდგა. ამ ავტომობილისთვის ბენზინის ერთადერთი, ოტხცილინდრიანი 1.33-ლიტრიანი ძრავია გათვალისწინებული, რომელიც თითქმის 100 ცხენის ძალას გამოიმუშავებს. წინასწარი შეკვეთების რაოდენობით შეიძლება თქმა, რომ წლიურად „ასტონი“ სულ რაღაც 1 500 ცალი „სიგნიტის“ გაყიდვას შეძლებს. ამასთან, კომპანია ირწმუნება, რომ მის მიერ წარმოებული არცერთი ჯუჯა ერთმანეთის მსგავსი არ იქნება...

შემდეგი თაობის S-კლასი ოთხი ძარით ფაიყიდება

Next S-Klasse to Come in Four Body-styles

16 მაისი

როდესაც ლაპარაკი „მერსედეს ბენცის“ S-კლასზეა, ალბათ ყველას თვალწინ ლუქსის კლასის სედანები წარმოუდგება, ავტომობილები, რომლებსაც ავტომოყვარულების დიდი ნაწილი შენატრის და ცოტა ნაწილი კი მართავს. მაგრამ როგორც ჩანს, პრემიუმ ბაზარზე გამეფებული უშეღავათო კონკურენცია მალე ამ ტრადიციასაც დაასამარებს. ასე 2013 წელს მოხდება, როდესაც ბაზარზე მეექვსე თაობის S-კლასი გამოვა.

საქმე ისაა, რომ ამ თაობის მოდელთან ერთად, შტუტგარტელები მყიდველს ოთხ სხვადასხვა ძარას შესთავაზებენ. აქამდე თუ ახალ S-კლასებში ახალი მხოლოდ დიზაინი, ძრავები და სხვადასხვა დამხმარე აღჭურვილობა იყო, ამჯერად მთავარი სიახლე ძარების მრავალფეროვნება იქნება.

ამჟამად ძირითადად სედანისძარიანი S-კლასის ვტომობილები იყიდება. მყიდველს ასეთ ავტომობილებს სტანდარტული, ან დაგრძელებული ბაზით სთავაზობენ. მოკლე პლატფორმაზე S-კლასის კუპეს ვერსიისთვისაც იყენებენ, რომელიც CL-ის სახელითაა ცნობილი (მომავალში S-კლასის კუპეს დაარქმევენ), დაგრძელებულ პლატფორმაზე კი ულტრა ლუქსის კლასის „მაიბახს“ ამზადებენ.

თითქოს ლოგიკურია, რომ მეოთხე ძარა უნივერსალი, ან ოთხკარიანი კუპე უნდა იყოს. მაგრამ სამქიმიანებს სხვა გეგმები აქვთ - ბრიტანულ გამოცემა „ქარ-ის“ ინფორმაციით, ისინი მყიდველს ოთხკარიან კაბრიოლეტსაც შესთავაზებენ. გერმანული კომპანია ასეთი S-კლასის გამოშვებას ადრეც აპირებდა, მაგრამ მაშინ ჩაითვალა, რომ ბაზარი ამისთვის მზად არ იყო.

სხვათა შორის, „მერსედეს ბენცმა“ ოთხი წლის წინ, კონცეპტუალური ოთხკარიანი კაბრიოლეტი „ოუშნ დრაივი“ გვიჩვენა, თუმცა კულუარებში მაშინვე ალაპარაკდნენ იმაზე, რომ ამ ავტომობილის სერიული ვერსია ორკარიანი იქნებოდა. ჯერჯერობით, კონცეპცია განუხორციელებელია, თუმცა როგორც ჩანს, მასში გამოყენებული ტექნოლოგიებიდან ზოგიერთს სერიულ ავტომობილზე მაინც ვიხილავთ. და თუ ასე მოხდა, შტუტგარტული კაბრიოლეტი კონკურენციას „ბენტლის“ ორკარიან კაბრიოლეტ „კონტინენტალ GTC-ს“ გაუწევს.

აქვე უნდა ითქვას, რომ მალე „მერსედესი“ უნივერსალურ უკანაამძრავიან არქიტექტურას (MRA) შეიმუშავებს, რომელიც 93 სხვადასხვა მოდულისგან იქნება შედგენილი, ეს გარემოება კი მათ ამ არქიტექტურის სხვადასხვა კლასის მოდელებისთვის გამოყენების საშუალებას მისცემს.

„ოპელი“ ახალ პრემიუმ მოდელს გამოუშვებს

Opel to launch premium model, small EV

16 მაისი

„ჯენერალ მოტორსის“ გერმანული შტო „ოპელი“ გაყიდვებს მუდმივად ზრდის და მიღწეულით დაკმაყოფილებას არ აპირებს. უფრო მეტიც, თანდათან პრემიუმ ბრენდად გარდაქმნას ცდილობს და ამაში ახალი ტექნოლოგიების ათვისებაც ეხმარება. გერმანულ პრესაში გავრცელებული ინფორმაციით, რიუსელსჰაიმელები ახლა „ინსიგნიაზე“ მაღალი კლასის მოდელის და „ამპერაზე“ პატარა ელექტრომობილის გამოშვებას გეგმავენ.

„ჩვენს ბრენდს მხოლოდ „ინსიგნიათი“ დაკმაყოფილება არ შეუძლია. წარმატებას, რომელიც ამ ავტომობილმა მოგვიტანა, განვითარება სჭირდება“, - გერმანულ გამოცემა „ველტ ამ ზონტაგთან“ საუბრისას განაცხადა „ოპელის“ ახალმა ხელმძღვანელმა კარლ-ფრიდრიხ შტრაკემ.

მისი თქმით, ახალი პრემიუმ ავტომობილი ქროსოვერი იქნბა. მისი წარმოება სავარაუდოდ, ოთხ წელიწადში დაიწყება. შტრაკე დასძენს, რომ ახალი ავტომობილი, პრემიუმ სეგმენტის გერმანული კომპანიების - „ბეემვეს“, „მერსედეს ბენცის“ და „აუდის“ შესაბამის მოდელებს კონკურენციას არ გაუწევს.

რაც შეეხება ელექტრომობილს, ის ან ჰეჩბეკ „კორსას“ ზომისა იქნება, ან კიდევ უფრო პატარა - „აგილას“ ზომისა. სავარაუდოდ, მისი ძალური დანადგარი „ამპერას“ ტიპისა იქნება. ანუ, ბორბლებს ამძრავ ძალას ელექტროძრავი მიაწვდის, მცირელიტრაჟიანი შიდაწვის ძრავი კი ელექტროენერგიის გამომუშავებაზე იზრუნებს.

რაც მთავარია, „ოპელი“ ევროპის გარეთ ექსპანსიასაც დიდ მნიშვნელობას ანიჭებს. შტრაკე იმედოვნებს, რომ სამ წელიწადში, მისი კომპანიი მიერ ევროპის გარეთ წლიურად გაყიდული ავტომობილების რიცხვი 150 ათასს მიაღწევს. არადა, მისი წინამორბედი ნიკ რილი უფრო მოკრძალებულ რიცხვს - 100 ათასს ასახელებდა. შტრაკე ამბობს, რომ „ოპელს“ ამერიკული კომპანიისგან, ევროპის გარეთ გაფართოებაზე მწვანე შუქი აქვს ანთებული. პირველ რიგში, გერმანული კომპანის თავის ავტომობილებს სამხრეთ ამერიკაში, შემდეგ ჩინეთსა და ავსტრალიაშიც შეიტანს.

„მაკლარენი“ „ვეირონის“ კონკურენტ „მეგა მაკს“ ამზადებს

'Mega Mac' to eclipse Veyron

16 მაისი

„მაკლარენს“ ჯერ თავისი პირველი სუპერ ავტომობილის - MP4-12C-ს წარმოება არ დაუწყია, თუმცა როგორც ბრიტანული გამოცემა „ავტოქარი“ გვამცნობს, მისი ინჟინრები უკვე მუშაობენ კიდევ ერთი მოდელის შემუშავებაზე, რომელმაც ინგლისური კომპანიის ფლაგმანის როლი უნდა შეასრულოს და რომლითაც, „მაკლარენი“ კონკურენციას თვით „ბუგატი ვეირონს“ გაუწევს.

„ავტოქარის“ მონაცემებით, ახალი ავტომობილი, რომელსაც „მეგა მაკის“ სახელით მოიხსენიებს, შესანიშნავი ტექნიკურ-დინამიკური მახასიათებლებით გამორჩეული და ყოველდღიური მოხმარებისთვისაც მოსახერხებელი იქნება. „მაკლარენი“ ამ ავტომობილს მხოლოდ 500 ცალს დაამზადებს და თითოეულს 350-400 ათას გირვანქა სტერლინგად გაჰყიდის. შედარებისთვის, „ფერარიმაც“ სწორედ 500 ცალი „ენცო“ დაამზადა, „ბუგატიმ“ კი 300 ერთეულ „ვეირონს“ დასჯერდა.

„ავტოქარის“ მიერ მოპოვებული ინფორმაციით, ახალი ავტომობილის სტილი, MP4-12C-სთან შედარებით, უფრო „ბრაზიანი და ფუნქციური“ იქნება. თავისი გაბარიტებით, ის MP4-12C-ზე დიდი უნდა იყოს, გარეგნობით კი ერთდროულად მასაც და ძველ F1-საც მოგაგონებთ.

ახალი ავტომობილი აქტიური აეროდინამიკური ელემენტებით აღიჭურვება. ეს იქნება წინა და უკანა რეგულირებადი სპოილერები, რომლებიც ავტომობილის მოძრაობის სიჩქარის შესაბამისად შეიცვლიან პოზიციას. მსგავსი უკანა სპოილერი „მაკლარენმა“ MP4-12C-ზეც გამოიყენა. ამ სპოილერების დანიშნულება ისაა, რომ მაღალი სიჩქარით მოძრაობისას, მათ ჰაერის შემხვედრ ნაკადს მცირე წინააღმდეგობა შეუქმნან და პირიქით, სიჩქარის მკვეთრი დაგდებისას და შედარებით დაბალი სიჩქარით მოსახვევების გავლისას, რაც შეიძლება მეტი წინააღმდეგობა შექმნან.

ავტომობილის შიგნით, აქცენტი ფუნქციურობაზე გაკეთდება, კომფორტი კი მეორეხარისხოვანი იქნება. ავტომობილს საბარგულიც პატარა ექნება და ის სავარძლების უკან მოთავსდება. სალონშივე მოთავსდება ტელემეტრიული მონიტორი, რომელზეც ავტომობილის მოძრაობის დინამიკის მონაცემების ჩაწერა იქნება შესაძლებელი. ამ სისტემასთან უნისონში იმუშავებს ვიდეოკამერაც, რომლის ჩანაწერსაც ასევე ტელემეტრიული სისტემა დაიმახსოვრებს.

რა თქმა უნდა, ახალი ავტომობილის მთავარი ნაწილი და მისი სიამაყე ძრავია. ესაა 5.0-ლიტრიანი V8, რომელიც „მაკლარენმა“ და ბრიტანულ კომპანია „რიკარდოსთან“ ერთად შეიმუშავებს (ისევე როგორც MP4-12C-ს ძრავი). ჯერჯერობით უცნობია, ამ აგრეგატს ტურბოკომპრესორი ექნება თუ არა. სამაგიეროდ, ცნობილია მისი მაქსიმალური სიმძლავრე - 799 ცხენის ძალა (7 500 ბრ/წთ-ზე). ეს ნიშნავს, რომ აგრეგატის ყოველი ლიტრი მუშა მოცულობა 160 ცხენის ძალას იძლევა. გარდა ამისა, ძრავის მაქსიმალური მაბრუნი მომენტი 799 ნიუტონმეტრი (3 500-6 800 ბრ/წთ-ზე) იქნება.

ძრავს ორდიკოიანი ქუროს მეშვეობით, იტალიურ კომპანია „გრაციანო“ წარმოების 7-საფეხურიანი სეკვენტალური გადაცემათა კოლოფი დაუკავშირდება. ჯერჯერობით უცნობია ახალი სუპერ ავტომობილის დინამიკური მონაცემები და ტემპერამენტი. „აუტოქარის“ ვარაუდით“, ადგილიდან 100 კმ/სთ-ის ასაკრეფად, მას 2.8 წამი ეყოფა, ადგილიდან 160 კმ/სთ-მდე 5.5 წამი იქნება საკმარისი, ადგილიდან 320 კმ/სთ-მდე კი - 20 წამი. სხვათა შორის, 0-100 კმ/სთ აჩქარებისთვის „ბუგატი ვეირონ სუპერ სპორტს“ ოდნავ“ ნაკლები დრო სჭირდება. სამაგიეროდ, 320 კმ/სთ-ს ეს მონსტრი ორი წამით გვიან ავითარებს.

ისევე როგორც MP4-12C, „მეგა მაკიც“ კარბონის კომპოზიტისგან დამზადებული მონოკოკზე აიგება. ახალ ავტომობილსაც ალუმინის საკიდარი ექნება, თუმცა მისი გეომეტრია და დრეკადი ელემენტების სიხისტეც შეიცვლება. ამორტიზატორები ადაპტირებად იქნება, ავტომობილის ამოყირავებას კი სპეციალური ჰიდრავლიკური სისტემა შეეწინააღმდეგება. პილოტის ცდომილებების გასწორებას კი 5-საფეხურიანი ტრექშნ კონტროლი ეცდება. სტანდარტულ აღჭურვილობაში შევა იტალიურ კომპანია „ბრემბოს“ კარბონ-კერამიკული მუხრუჭები და სამუხრუჭო ძალის გამანაწილებელი ელექტრონული სისტემა.

რაც შეეხება სახელ, „მეგა მაკი“ არ დარჩება. ამასთან, ავტომობილისს ახელწოდებაში ალბათ შევა რიცხვი 799. ავტომობილებს „მაკლარენის“ ძველ საწარმოში დაამზადებენ, იმავე შენობაში, სადაც ფორმულა ერთის ბოლიდები მზადდება. წარმოება დაახლოებით 5 წელი გაგრძელდება, თითო ავტომობილის აწყობას კი სამ კვირამდე დასჭირდება.

„ჰიუნდაი i40“ - ჟენევიდან ბარსელონამდე

Hyundai Reveals i40 Sedan in Barcelona

15 მაისი

ჟენევის წლევანდელ საავტომობილო შოუზე, „ჰიუნდაიმ“ უნივერსალისძარიანი i40 წარადგინა, გავიდა ორ თვეზე ცოტა მეტი და ბარსელონას მოტორ შოუს დამთვალიერებელმა, ამავე ავტომობილის სედანისძარიანი ვერსია იხილეს. ეს ავტომობილი ევროპული ბაზრისთვისაა განკუთვნილი, ძველი კონტინენტისვე D სეგმენტს შეესაბამება და ის კორეული კომპანიის რიუსელსჰაიმის (გერმანია) ტექნიკურ ცენტრშია შემუშავებული. რა თქმა უნდა, მისი შექმნისას, ევროპელი მყიდველის გემოვნება და მოთხოვნებია გათვალისწინებული.

სედანი i40 „ჰიუნდაის“ კორპორატიულ სტილშია შესრულებული, რომელიც „ფლუიდიკ სკულპჩას“ (თხიერი სკულპტურა) სახელითაა ცნობილი. ავტომობილის გაბარიტებია: სიგრძე 4 740 მილიმეტრი, ბორბლებს შორის ბაზა 2 770 მილიმეტრი. რაც მთავარია, სედანს ფართე სალონი აქვს. კერძოდ, მისი სავარძლების ძირიდან ჭერამდე მანძილი 1 025 მილიმეტრია, მხრების დონეზე სალონის სიგანე 1 455 მილიმეტრი, ფეხებისთვის განკუთვნილი სივრცის სიგრძე კი - 1 170 მილიმეტრი. კორეული კომპანია სიამაყით აცხადებს, რომ ყველა ამ პარამეტრით, საშუალო ზომის სედანების კლასში, i40 ლიდერთა შორის იქნება.

ჯერჯერობით, ახალი ავტომობილისთვის, რომელმაც ძველი „სონატა“ უნდა შეცვალოს, ბენზინის და დიზელის ორ-ორი ძრავია გათვალისწინებული. ბენზინის ძრავებიდან, ერთის მუშა მოცულობა 1.6 ლიტრია და ის 135 ცხენის ძალას გამოიმუშავებს, მეორე კი 2.0-ლიტრიანია და მისი მაქსიმალური სიმძლავრე 177 ცხენის ძალას აღწევს.

მეორე ძრავით, როცა მასთან 6-საფეხურიანი მექანიკური გადაცემათა კოლოფი იქნება შეწყვილებული, ავტომობილს ადგილიდან 100 კმ/სთ სიჩქარის ასაკრეფად 9.7 წამი დასჭირდება. სამაგიეროდ, შერეული ციკლით მოძრაობისას, 100 კილომეტრის გასავლელად, მას 6.8 ლიტრი ბენზინი ეყოფა, ყოველ კილომეტრზე კი ატმოსფეროში 159 გრამ ნახშირორჟანგს გამოუშვებს.

რაც შეეხება დიზელის აგრეგატებს, ორივეს მუშა მოცულობა 1.7 ლიტრია. მათგან ერთის სიმძლავრე 115, მეორისა კი 136 ცხენის ძალაა. ამათგან უფრო სუსტი, სისტემა სტოპ-სტარტისა და მუხრუჭების ენერგიის რეკუპერაციის სისტემის დახმარებით, უფრო ეკონომიურიცაა. კერძოდ, ასი კილომეტრის გასავლელად, ამ ძრავით აღჭურვილ i40-ს 4.3 ლიტრი საწვავი ჰყოფნის, ატომოსფეროში კი (ყოველ კილომეტრზე) მხოლოდ 113 გრამ ნახშირორჟანგს გამოჰყოფს.

„ჰიუნდაი“ ვარაუდბს, რომ წლიურად 60 000 ცალ i40-ს გაჰყიდის. ამასთან, გაყიდული ავტომობილების დაახლოებით 65 პროცენტი, დიზელისძრავიანი იქნება. ავტომობილი ასევე უამრავი დამხმარე სისტემით აღიჭურვება, რომლებიც მის პასიურ უსაფრთხოებას მოემსახურება. ესენია: ABS, ESP, აღმართში დამხმარე, მუხრუჭების დამხმარე, მანქანის სტაბილურობის სამართავი და სხვა სისტემები. უსაფრთხოებასვე 9 აირბალიში უზრუნველყოფს.

სედან i40-ის წარმოება წლის ბოლოს დაიწყება და მისი ფასიც მაშინ გამოცხადდება. სავარაუდოდ, მის პირველ ეგზემპლარს, „ჰიუნდაის“ ქართველი დისტრიბუტორი, კომპანია „ჰიუნდაი ავტო ჯორჯია“, ამ წლის ბოლოსვე შემოიტანს, მის გაყიდვებს კი მომავალი წლიდან შეუდგება.

„ფოლკსვაგენის“ დიდ ოჯახს ჩინელი წევრი შეემატა

Volkswagen to make electric cars in China with FAW

15 მაისი

„ფოლკსვაგენმა“ და ჩინურმა საავტომობილო კომპანია FAW-მა (ფირსტ აუტომობილ უორკს) ერთობლივი საწარმო ჩამოაყალიბეს, რომლის სახელია „კაილი“ და რომლის მთავარი დანიშნულებაც, ჩინური ბაზრისთვის ელექტრომობილების წარმოებაა. ამგვარად, გერმანული კომპანია კიდევ ერთი უცხოელი ავტომწარმოებელია, რომელმაც ჩინელ პარტნიორთან ერთად, ცისქვეშეთის ბაზარზე სამოქმედოდ, სპეციალურად ჩამოაყალიბა ახალი კომპანია. მანამდე იგივე „ნისანმა“, „მერსედეს ბენცმა“, „ჰონდამ“ და „ჯენერალ მოტორსმა“ გააკეთეს, მალე კი მათ „ტოიოტაც“ მიბაძავს.

ჩინეთში ადგილობრივი კომპანიების მონაწილეობით, ერთობლივი საწარმოების შექმნას, ქვეყნის მთავრობა ახალისებს, რისთვისაც სპეიალური შეღავათებია დაწესებული. ბუნებრივია, ამ შეღავათებით წარმოება, ჩინური ბაზრის უცხოელ ლიდერებს სურთ და ისინი ამისათვის შესაბამის ნაბიჯებს დგამენ.

„ფოლკსვაგენი“ რომელიც ევროპის უდიდესი ავტომწარმოებელია და მსოფლიო ლიდერობასაც ეშურება, ჩინური ბაზრისთვის ელექტრომობილების წარმოებას 2013 წელს დაიწყებს. შესაძლოა, ეს იყოს „ბორა ბლიუ-e-მოუშნის“ ბაზაზე შექმნილი ელექტრომობილი, ავტომობილისა, რომლის კონცეპტუალური ვერსიაც, ვოლფსბურგელებმა შარშან, გუანჟოუს მოტორ შოუზე, „ლავიდას“ (ფოტოზე) სახელით წარადგინეს. სხვათა შორის, ჩინეთში „ფოლკსვაგენს“ კიდევ ერთი ძლიერი პარტნიორი ჰყავს SAIC-ის სახით, რომელთან ერთადაც, ასევე ერთობლივი სამომავლო გეგმები აქვს. „ლავიდას“ შექმნაში, SAIC-ის სპეციალისტებიც მუშაობდნენ.

ცნობისათვის, შარშან ჩინეთის მტავრობამ შეღავათების საცდელი სისტემა გამოაქვეყნა, რომლითაც იმ მყიდველების წახალისებას ისახავს მიზნად, რომლებიც ეკოლოგიურად სუფთა ავტომობილის შეძენას ამჯობინებენ. ეს სისტემა ჯერ მხოლოდ ხუთ დიდ ქალაქში იმოქმედებს, თუმცა მომავალში, მთელს ქვეყანაზე გავრცელდება.

რაც შეეხება სხვა კომპანიებს, რომლებიც ჩინელ პარტნიორებთან ერთად, ელექტრომობილების წარმოებას მალე დაიწყებენ: „ჯენერალ მოტორსმა“ იმავე SAIC-თან ერთად, „შევროლე საილ-ის“ ელექტრონული ვერსია მოამზადა და მალე მის წარმოებას შეუდგება. „ნისანს“ ჩინური კომპანია „დონფენი“ შეუამხანაგდა, რომელთან ერთადაც, ცენტრალური ჩინეთის ქალაქ დონფენში, თავის ელექტრომობილ „ლიფის“ გამოშვებას დაიწყებს.

ჩინეთთან დაკავშირებით, სერიოზული გეგმები „დაიმლერსაც“ აქვს, რომლის პარტნიორიც არის ჩინური BYD. ეს უკანასკნელი ლითიუმ-იონური ელემენტების წარმოებაზეა სპეციალიზებული და მას საავტომობილო ბიზნსში ისეთი სერიოზული პარტნიორი ჰყავს, როგორიც ამერიკელი მილიარდერი უორენ ბაფეტია. ესენიც ახალი ბრენდის ჩამოყალიბებას აპირებენ, რომელიც ელექტრომობილების წარმოებას 2013 წელს დაიწყებს.

2006 კილომეტრი ერთი ავზით

Skoda Fabia GreenLine 2,006 km / 1,246 Miles on a Single Tank of Fuel

15 მაისი

ამიერიდან, შიდაწვისძრავიანი ავტომობილების სვლის სიშორის რეკორდი „შკოდას“ ეკუთვნის - ჩეხური კომპანიის სუბკომპაქტურ ჰეჩბეკ „ფაბიას“ ეკონომიურმა მოდიფიკაცია „გრინლაინმა“, ერთი სრული ავზით, 2006 კილომეტრი გაიარა. სარეკორდო ვოიაჟის ავტორია ვინმე გერჰარდ პლატნერი, ვინც ავსტრიიდან დანიაში და უკანა გზაზე ერთი ავზი იმყოფინა.

გამგზავრების წინ, პლატნერის მანქანის ავზი ბოლომდე აავსეს და დალუქეს, მოგზაურობის დროს კი, მას გამყოლი აცილებდა. მოგზაურმა გერმანიის ყველაზე გრძელი მარშრუტით (A7) ისარგებლა. მისი დასრულების შემდეგ კი აღმოჩნდა, რომ „ფაბია“ ყოველ 100 კილომეტრს მხოლოდ 2.21 ლიტრი საწვავით გადიოდა. არადა, პასპორტში უწერია, რომ 100 კილომეტრის გასავლელად, 3.4 ლიტრი (დიზელის საწვავი) სჭირდება.

„შკოდა ფაბია გრინლაინ-ი“ დიზელის 1.2-ლიტრიანი აგრეგატითაა აღჭურვილი, რომელიც 75 ცხენის ძალას გამოიმუშავებს. მის ეკიპირებაში ასევე შედის რხევებისადმი შემცირებული წინააღმდეგობის მქონე საბურავები, სპოილერი, რომელიც მანქანის აეროდინამიკურ წინააღმდეგობას ამცირებს, სისტემა სტოპ-სტარტი და დამუხრუჭებისას გამოყოფილი ენერგიის რეკუპერაციის სისტემა.

სხვათა შორის, გერჰარდ პლატნერი შემთხვევითი პიროვნება არ არის. მას მსოფლიოს რამდენიმე რეკორდი ეკუთვნის (სხვადასხვა მარკის ავტომობილებით, ეკონმიურობის და შორეული მგზავრობის) და მთელს მსოფლიოში, 120-ზე მეტი გარბენი აქვს შესრულებული. გარდა ამისა, „შკოდას“ სერია „გრინლაინის“ მეორე თაობის ავტომობილების ტესტირების საწყის ეტაპზე ღებულობდა მონაწილეობას.

რა თქმა უნდა, პლატნერს (ფოტოზე თავის სარეკორდო ფაბიასთან) ჰკითხეს, როგორ შეძლო ასეთი შორი მანძილის ერთი ავზით გავლა, თუმცა ის საკუთარი საიდუმლოს გამხელას არ აპირებს: „ნორმაზე ნაკლები საწვავი რომ დავხარჯე, ამით იმის დამტკიცება მსურდა, რომ მწარმოებლების გარდა, გარემოზე ზრუნვა ჩვეულებრივ ავტომფლობელებსაც შეგვიძლია. რა თქმა უნდა, ამისათვის ბევრი რამის გათვალისწინება გვიწევს. მაგალითად, საბურავებში ოპტიმალური წნევის“...

„ნისანი“ და „რენო“ ერთად 10 მილიონი ავტომობილის გაყიდვას გეგმავენ

Nissan, Renault aim for combined 10 mln unit sales - media

14 მაისი

„რენოსა“ და „ნისანის“ ალიანსი იმედოვნებს, რომ სამ-ხუთ წელიწადში გაყიდვებს 10 მილიონამდე გაზრდის. ეს ინფორმაცია, იაპონურ გაზეთ „მაინიჩის“, იაპონურ-ფრანგული ალიანსის მთავარმა აღმასრულებელმა კარლოს გონმა გააცნო. ამგვარად, გამოჩნდა მეოთხე საავტომობილო კონგლომერატი, რომელსაც მსოფლიო ლიდერობის პრეტენზია გააჩნია.

შარშანდელი მონაცემებით, ლიდერი „ტოიოტაა“, რომელმაც „ჯენერალ მოტორსი“ სამი ათეული ათასი ავტომობილით ჩამოიტოვა. მეოთხეზეა „ფოლკსვაგენის“ ჯგუფი, რომელიც რამდენიმე დიდ და პატარა კომპანიას აერთიანებს. „რენო-ნისანმა“ შარშან 7.3 მილიონი ავტომობილი გაჰყიდა და ამ მაჩვენებლით მესამე იყო. სავარაუდოდ, „ტოიოტა“ წელს პირველობას დაკარგავს, რადგან მისი წარმოება და გაყიდვები იაპონიის მიწისძვრისა და ცუნამის შემდეგ, მნიშვნელოვნად შემცირდა და სრული დატვირთვით ამუშავებას წლის ბოლომდე ვერ შეძლებს. თუმცა ვინ გახდება პირველი, ეს ჯერაც უცნობია, რადგან იაპონურმა კატაკლიზმებმა თავისი კვალი ამერიკულ და ევროპულ კომპანიებსაც დაატყო.

იაპონურ კომპანიებს შორის, ყველაზე მეტად სწორედ „ტოიოტამ“ იზარალა. თუმცა, კარგ დღეში არც „ნისანია“, რომელსაც მიწისძვრის არეალში რამდენიმე საწარმო აქვს. მათ შორის ერთ-ერთი უდიდესია ძრავების ქარხანა, რომელიც ფუკუშიმას პრეფექტურაში მდბარეობს. გონის თქმით, ეს საწარმო მუშაობას მალე განაახლებს. ყოველივეს მიუხედავად, ალიანსი პოზიციების დათმობას არ აპირებს და იმედოვნებს, რომ ისევე როგორც შარშან, წელსაც მისი გაყიდვები რეკორდული იქნება.

„ნისანის“ საწარმოებს შორის, მიწისძვრამ ყველაზე მეტად ფუკუშიმაში მდებარე ძრავების ქარხანა დააზარალა. ამჟამად, ეს საწარმო ენერგიით არ მარაგდება. ამ ქარხნაში აწყობილი ძრავებით, „ნისანის“ იაპონური და უცხოური ქარხნები მარაგდება. ის ორცვლიანი რეჟიმით მუშაობას მალე განაახლებს. სულ კი, „ნისანის“ ყველა საწარმო სრული დატვირთვით, ოქტომბერში ამუშავდება.

გუნმა ასევე უარყო ვარაუდი იმის შესახებ, რომ ბუნებრივი კატასტროფები უარყოფითად იმოქმედებს ელექტრომობილების წარმოებასა და გაყიდვებზე. პირიქით, „ნისან ლიფის“ წარმოება დაგეგმილი ტემპით მიმდინარეობს და პრაქტიკულად არც შეფერხებულა.

დონალდ ტრამპს ეი ჯეი ფოიტი შეცვლის

A.J. Foyt to replace Donald Trump

14 მაისი

ინდი 500-ის რბოლას ერთი საინტერესო ტრადიცია აქვს - მის პეისკარს ცნობილი ადამიანები პილოტირებენ. წელს ეს რბოლა მეასედ ტარდება და პეისკარის პილოტად, არც მეტი, არც ნაკლები, მილიარდერი დონალდ ტრამპი (ფოტოზე პეისკარის საჭესთან) იყო მიწვეუილი. ისიც დათანხმდა, თუმცა საიუბილეო რბოლის სტარტამდე სამიოდ კვირით ადრე ცნობილი გახდა, რომ კაბრიოლეტ „შევროლე კორვეტ SS-ის“ საჭეს ტრამპი კი არა, სახელოვანი ამერიკელი მრბოლი, ინდი 500-ის ოთხგზის გამარჯვებული (ის ერთადერთია, ვისაც ეს ლეგენდარული რბოლა სამზე მეტჯერ აქვს მოგებული) ეი ჯეი (ენტონი ჯოზეფ) ფოიტი მიუჯდება.

სხვათა შორის, როდსაც პეისკარის პილოტად ტრამპი გამოცხადდა, ამან რბოლის ფანებს შორის პროტესტის ტალღა გამოიწვია. თავად ბიზნესმენი შესაძლოა მალე აშშ-ის პრეზიდენტის არჩევნებში კანდიდატად ჩაებას და საყოველთაო უკმაყოფილების გამოწვევა არ ისურვა. პროტესტებს რბოლის ორგანიზატორებიც მოერიდნენ. და ამიტომ, ტრამპი ფოიტმა შეცვალა.

წლევანდელ ინდი 500-ს ორი დებიუტანტო ეყოლება. ესენი არიან ფ1-ის ბოლო ამერიკელი პილოტი სკოტ სპიდი და ჩინელი ჰო-პინ ტუნი. სპიდი ერთხანს „რედ ბულის“ ტესტ პილოტი იყო, 2006 წელს კი, „ტორო როსოს“ მანქანით, ფორმულა ერთში მისი დბიუტი შედგა. თუმცა წარმატებები არ ჰქონია.

ტუნი პირველი ჩინელი პილოტია, ვინც ინდი 500-ზე იასპარეზებს. ესეც ფ1-თანაა დაკავშირებული - „რენოს“ სარეზერვო და ტესტ პილოტია. გარდა ამისა, მას გამოცდილება მიღებული აქვს ისეთ სერიებში, როგორებიცაა GP2, A1GP და ფორმულა სუპერლიგა. ორივე ახალბედა როჯერ პენსკეს „დრაგონ რეისინგის“ მანქანებით იასპარეზებს.

სხვათა შორის, ორივე პილოტს თუნდაც მიზერული შანსი აქვს იმისა, რომ ბონუსის სახით, 5 მილიონი დოლარი მიიღოს. ეს კი იმ შემთხვევაში მოხდება, თუ რომელიმე მათგანი ფინიშის ხაზს პირველი გადაკვეთს. ამხელა ბონუსი მხოლოდ იმ ახალბედბისთვისაა გათვალისწინებული, რომლებიც ინდი 500-ზე სხვა სერიებიდან არიან მოსულები და ინდი ქარის სერიაში რეგულარულად არ მონაწილეობენ.

კუნიოს პირველი ავტომობილი

Fardier de Cugnot

14 მაისი

წელს „მერსედეს ბენცი“, კარლ ბენცის მიერ პირველი ავტომობილის შექმნიდან 125 წლის იუბილეს აღნიშნავს. მაგრამ ყველამ როდი იცის, რომ ეს მხოლოდ პირველი შიდაწვისძრავიანი ავტომობილი იყო. გაცილებით ადრე, კერძოდ კი 1769 წელს, პირველი თვითმავალი ურემი, რომელსაც დღეს თავისუფლად შეიძლება ვუწოდოთ ავტომობილი, ფრანგმა გამომგონებელმა ნიკოლა-ჟოზე კუნიომ დაამზადა.

კუნიოს თვითმავალი ურემი (ფარდიე დე კუნიო, ან ფარდიე ა ვაპურ) სამხედრო დანიშნულებით შექმნა და მის მამოძრავებლად ორთქლის მანქანა გამოიყენა. თავისი ქმნილების საფუძვლად, მან ორბორბლიანი მძიმე ურემი გამოიყენა, რომელსაც სამხედროები მძიმე არტილერიის გადასატანად იყენებდნენ. ჩვეულებრივ, ურემს ცხენები ეზიდებოდნენ, რომლებიც კუნიომ დამატებითი ბორბლით და მასზე დამაგრებული ორთქლის მანქანით შეცვალა.

პირველად კუნიომ შედარებით პატარა ორთქლის მანქანა დაამზადა. მომდევნო წელს კი დიდი ზომის მანქანაც დამზადდა, რომელსაც გამომგონებლის გათვლით, ერთ საათში, 4 ტონა ტვირთის თითქმის 8 კილომეტრზე გადატანა შეეძლო (თუმცა, პრაქტიკაში ეს არავის შეუმოწმებია). საკუთრივ ორთქლის ურიკა 2.5 ტონას იწონიდა.

იმის გამო, რომ ყრიკაზე წონა მეტისმეტად უთანაბროდ იყო განაწილებული, ის არასტაბილურობით გამოირჩეოდა. ამ არასტაბილურობას ის ფაქტიც აძლიერებდა, რომ ურიკას მოძრაობა მოუწყობელ გზებსა და აღმართებზე უწევდა. სწორედ ეს გახდა პირველი ავარიის მიზეზიც - 1771 წელს, მეორე ურიკა უკონტროლო გახდა, დაღმართზე დაგორდა და არსენალის კედელს დაეჯახა. სწორედ ეს ინციდენტი შეიძლება ჩაითვალოს პირველ საავტომობილო ავარიად.

არც ორთქლის მანქანა გამოირჩეოდა სტაბილური მუშაობით. მისი ქვაბი ურიკის წინ იყო დაკიდული. მის ძირზე საცეცხლე იყო განლაგებული. დგუშის ასამოძრავებლად საჭირო ორთქლის წარმოქმნას დაახლოებით 15 წუთი სჭირდებოდა, რის გამოც, მანქანის მოძრაობა ხშირად წყდებოდა და მისი სიჩქარეც ამის გამო მცირდებოდა.

ხანმოკლე ტესტების შემდეგ, საფრანგეთის არმიამ კუნიოს ორთქლის მანქანაზე უარი თქვა. ამის მიუხედავად, 1772 წელს საფრანგეთის მეფე ლუი მეთხუთმეტემ, კუნიოს პენსიის სახით, წლიური 600 ლივრი დაუწესა. მისი მანქანა კი, 1800 წელს პარიზის ხელოვნების და ხელობის ეროვნული კონსერვატორიის მუზეუმში გადაიტანეს, სადაც დღემდე ერთ-ერთი გამორჩეული ექსპონატია.

კუნიოს ორთქლის ურიკის ზუსტი ასლი ტამპა ბეის (აშშ) საავტომობილო მუზეუმშიცაა გამოფენილი. ეს ექსპონატი, რომელიც ორიგინალურისგან განსხვავებით, მოქმედია, ახლახანს პარიზში, ყოველწლიურ პოპულარულ შოუ „რეტრომობილზე“ გამოფინეს.

„რენო“ მინი ელექტრომობილ „ტვიზის“ გაყიდვებს იწყებს

Renault opens online reservations for Twizy all-electric two-seater

13 მაისი

ელექტრომობილების მწარმოებელთა მწირ სიაში ამიერიდან „რენოც“ უნდა მოვიხსენიოთ - ფრანგულმა კომპანიამ ბარსელონას მოტორ შოუზე გამოაცხადა, რომ იწყებს ორადგილიან მინი ელექტრომობილ „ტვიზი-ზე“ ონლაინ-შეკვეთების მიღებას. თუმცა, ისიც დასძინა, რომ ამ ავტომობილის მსოფლიო პრემიერა მოგვიანებით, (სავარაუდოდ, ფრანკფურტის ავტო შოუზე, სადაც ორი წლის წინ, მისი კონცეპტუალური ვერსიის დებიუტი შედგა) გაიმართება.

ლაპარაკია „ტვიზი-ს“ ორ ვერსიახე. ერთია საკუთრივ „ტვიზი“, რომელსაც მყიდველს ორი განსხვავებული კომპლექტაციით (ურბან და ტექნიკ) შესთავაზებენ, მეორე კი - „ტვიზი 45“. სამივე შემთხვევაში, ნახევრად ღია ავტომობილი ორადგილიანია. ამასთან, მგზავრის სავარძელი მძღოლისას უკანაა მოთავსებული (ეგრეთ წოდებული ტანდემ განლაგება).

„ტვიზი 45“ აღჭურვილია 5-ცხენისძალიანი ელექტროძრავით და მას ლითიუმ-იონური აკუმულატორების სრული დამუხტვით, 100 კილომეტრის გავლა შეუძლია. მისი აკუმულატორები საყოფაცხოვრებო შტეპსელიდან 3.5 საათში იმუხტება. ეს პატარა და სუსტი ავტომობილი, რომლის მაქსიმალური სიჩქარეც სულ რაღაც 45 კმ/სთ-ია, 6 990 ევრო ღირს. ოღონდ, მის ფასში აკუმულატორების ფასი არ შედის. მათ ფასს მყიდველი განვადებით, თვეში 45 ევროს გადაიხდის. აღსანიშნავია, რომ „ტვიზი 45-ის“ დაბალი სიჩქარის გამო, მისი მართვისთვის ზოგიერთ ევროპულ ქვეყანაში, მართვის ლიცენზია საჭირო არ იქნება. ამდენად, ის ახალგაზრდა მყიდველისთვის სკუტერის შესანიშნავი, თუმცა ოდნავ უფრო ძვირი და ამასთან გაცილებით უსაფრთხოც, შემცვლელი იქნება.

თითქმის ორჯერ მეტი (80 კმ/სთ) სიჩქარე აქვს „ტვიზი ურბანს“ და „ტვიზი ტექნიკს“, რომლებიც 17-ცხენისძალიანი ელექტროძრავითაა აღჭურვილი. პირველის საბაზო ფასი (აკუმულატორების გარეშე) 7 690 ევროა, მეორისა კი - 8 490 ევრო. ამასთან, მათ მყიდველს, აკუმულატორების ლიზინგი თვეში 49 ევრო დაუჯდებათ.

ონლაინ შეკვეთის მსურველებს, „რენო ტვიზი-ზე“ შეკვეთის განსათავსებლად, მხოლოდ 20 ევროს გაღება მოუწევთ.

„ჰიუნდაი ჯენეზისი“ ჯერჯერობით სრულამძრავიანი არ გამოვა

Hyundai Genesis won't get all-wheel drive until next gen

13 მაისი

ამერიკული გამოცემა „ქარ ენდ დრაივერ“ იტყობინება, რომ „ჰიუნდაი“ ჯერ არ აპირებს თავისი ბიზნეს კლასის სედან „ჯენეზისის“ (ფოტოზე) სრულამძრავიანი ტრანსმისიით აღჭურვას, თუმცა ალბათ, ასეთ სისტემას, ამ ავტომობილის მეორე თაობა მიიღებს, რომელიც ბაზარზე 2014 წელს გამოჩნდება.

ეს კი ნიშნავს, რომ სრულამძრავიან ტრანსმისიას ჯერ ვერც კუპე „ჯენეზისი“ და უფრო დიდი სედანი „ეკუსი“ მიიღებს. სამივე მოდელი, რომლებიც ამერიკის ბაზარზე დიდი პოპულარობით სარგებლობს, მალე ახალ პლატფორმაზე გადავა და მხოლოდ ამის შემდეგ იქნება შესაძლებელი მათზე სრულამძრავიანი ტრანსმისიის დაყენება. ამასთან, მათი ძრავების გამაც, მალე უფრო მძლავრი აგრეგატებით შეივსება.

„ჰიუნდაის“ ამერიკული შტოს მთავარი აღმასრულებელი ჯონ კრაფჩიკი დიდი ხანია, არ მალავს, რომ სედანი და კუპე „ჯენეზისი“, ასევე სედანი „ეკუსი“, ოპციის სახით, აუცილებლად მიიღებენ სრულამძრავიან ტრანსმისიებს. ამიტომ, ბევრი ელოდა, რომ ეს 2012 წელს მოხდებოდა. მაგრამ „ქარ ენ დრაივერის“ ახალი ინფორმაციით, ახლანდელ პლატფორმაზე ეს გარკვეულ სირთულეებთანაა დაკავშირებული.

„ჯენეზისი“ ამერიკაში მოთხოვნადი ავტომობილია, თუმცა მისი გაყიდვების წლიური მოცულობა მაინც ვერ აღწევს 30 000 ცალს. ბაზარზე სრულამძრავიანი ვერსიის გამოსვლის შემდეგ კი, ამ ერთგვარად მაგიური ბარიერის გადალახვა არ გაჭირდება. მაგრამ სამწუხაროდ, სანამ ბაზარზე მეორე თაობის „ჯენეზისი“ გამოვა, მყიდველს მხოლოდ გაძლიერებული ძრავებით, გაუმჯობესებული საკიდარით და უფრო დახვეწილი დიზაინით დაკმაყოფილება მოუწევს.

ამერიკული „ლამბო“ 2000 ცხენის ძალით

Lamborghi Indomable Going Into Production as Mostro Di-Potenza SF22

12 მაისი

კონცეპტუალური სუპერ ავტომობილი, სახელად „ლამბორგინი ინდომეიბლ“, არის დიზაინის მექსიკელი სტუდენტების - დანიელ ჩინჩინელა ოჩოასა და ალბერტო ფერნანდეს ალბილარესის ნამუშევარი, რომელიც მათ „ლამბორგინის“ სპონსორობით 2009 წელს დაამზადეს. მაშინ ბევრს ეგონა, რომ იტალიური კომპანია, მექსიკელების ნამუშევარს ფრთებს შეასხამდა და მწვანე შუქს აუნთებდა. მაგრამ ასე არ მოხდა.

სანტ’აგატა ბოლონეზელებს თავისი გეგმები აქვთ და მათ შესანიშნავად ახორციელებენ. მათი სპონსორობით ჩატარებული სამუშაოთი კი ამერიკული კომპანია „215 რეისინგი“ ისარგებლებს, რომელმაც კონცეპტუალური ავტომობილის შექმნის ლიცენზია შეიძინა და ახლა სწორედ მის რეალიზებაზე ზრუნავს. ოღონდ, რეალურ ავტომობილს სხვა სახელი ექნება - SF22 და მისთვის სპეციალურად, ახალი ბრენდი შეიქმნება, სახელად „მოსტრო დი-პოტენცა“ (იტალიურად ეს ძალის მონსტრს ნიშნავს). მანქანის სახელი ამერიკულ უახლეს სამხედრო თვითმფრინავ F22-თან ასოცირდება. თუმცა, ამ შემთხვევაში, აბრევიატურა სტრიტ ფაიტერს, ანუ ქუჩის მებრძოლს ნიშნავს.

პროექტის შესაბამისად, ავტომობილი კარბონის კომპოზიტით დამზადებულ მონოკოკზე უნდა აიწყოს. ძარაც კარბონის და კევლარის კომპოზიტისგან დამზადდება. სუპერ ავტომობილის გაბარიტებია: სიგრძე 4 460 მილიმეტრი, სიგანე 1 905 მილიმეტრი, სიმაღლე 1 230 მილიმეტრი და ბორბლებს შორის ბაზა - 2 650 მილიმეტრი. რა თქმა უნდა, ძრავი ბაზაში მოთავსდება და ის მამოძრავებელ ძალას უკანა წამყვან ბორბლებს მიაწვდის.

რაც შეეხება ძრავს, ის არის „ჯენერალ მოტორსის“ წარმოების 9.4-ლიტრიანი (!) წყვილ ტურბოკომპრესორიანი V8, რომლის სიმძლავრე 2 000 ცხენის ძალას, მაქსიმალური მაბრუნი მომენტი კი 2 700 ნიუტონმეტრს მიაღწევს. ამ მართლაც მონსტრ ძრავს, რომელსაც მშრალი კარტერი ექნება, 6-საფეხურიანი სეკვენტალური გადაცემათა კოლოფი შეუწყვილდება.

ასეთი ტანდემის დახმარებით, „მოსტრო დი-პოტენცას“ SF22 ადგილიდან 100 კმ/სთ სიჩქარეს 2.5 წამში აკრეფს, დრეგსტერების დისტანციას კი (400 მეტრს) 9,5 წამში დაფარავს. ავტომობილის მაქსიმალური სიჩქარე 426 კმ/სთ-ს მიაღწევს.

„215 რეისინგი“ აცხადებს, რომ ამ ავტომობილს მხოლოდ 50 ცალს დაამზადებს. მასზე შეკვეთების მიღება მერმისს უნდა დაიწყოს. ამასთან, შემკვეთს წინასწარი შესატანის სახით, მხოლოდ 1 000 დოლარის გადახდა მოუწევს. სულ კი, სასურველი ავტომობილის შესაძენად, 950 000 დოლარი იქნება საჭირო.

ახალი „კორვეტი“ შეიძლება შუაძრავიანი გახდეს

Corvette C7 to Be Much Sharper

12 მაისი

მართალია, უკვე დიდი ხანია, რაც „ჯენერალ მოტორსი“ უარყოფს, რომ მისი ახალი „კორვეტი“, რომელსაც სახელად C7 დაერქმევა, ისევ კლასიკური შეთანწყობით მომზადდება, მაგრამ ინტერნეტში ამ დღეებში ისევ გავრცელდა ხმები იმის შესახებ, რომ ამერიკულმა გიგანტმა გადაიფიქრა და რომ ახალი „კორვეტი“ სუპერ ავტომობილებისათვის შესაფერის შეთანწყობას მიიღებს. ეს კი იმას ნიშნავს, რომ C7-ს ძრავი ბაზაში ექნება.

მეექვსე თაობის „ვეტემ“ ევროპულ სუპერ ავტომობილებს სერიოზული კონკურენცია გაუწია. პირველ რიგში ეს მისმა გარეგნობამ და ტექნიკურმა მახასიათებლებმა განაპირობა. და ახლა გენერლებისგან კიდევ ერთი ნაბიჯის წინ გადადგმას ელიან, რაც სწორედ ის იქნება, რომ C7-ს ძრავი ბაზაში ჩაუდგან.

ჰოდა, ინტერნეტით გავრცელებული ინფორმაცია, რომელიც „ჯენერალ მოტორსის“ უცნობ წყაროს იმოწმებს, ამერიკული კომპანიის ხელმძღვანელობა ახლა სწორედ ამ საკითხს განიხილავს. ახალ „კორვეტთან“ დაკავშირებით, გენერლებს დიდი გეგმები აქვთ, რაზეც თუნდაც ის ფაქტი მეტყველებს, რომ 131 მილიონი დოლარი მოხმარდება ბოულინგ გრინის ქარხანას, რომელიც სწორედ „კორვეტის“ წარმოებაზეა სპეციალიზებული.

„შევროლე“ ახალი „კორვეტის“ წარმოებას 2013 წელს დაიწყებს. და „ჯენერალ მოტორსს“ სურს, რომ ამ ავტომობილმა ღირსეული კონკურენცია გაუწიოს სუპერ ავტომობილების ისეთ ლიდერებს, როგორებიც „ფერარი“ და „ლამბორგინია“. ამის შემდეგ, ეს ავტომობილი გლობალური ბაზრის სერიოზული მოთამაშე გახდება.

არსებობს ერთი პრობლემა, რომელიც სასწრაფო გადაწყვეტას საჭიროებს იმ შემთხვევაში, თუ შუაძრავიანი „კორვეტის“ წარმოება გადაწყდება. ეს პრობლემა ძრავს უკავშირდება - ამ ეტაპზე, მსოფლიო ავტოინდუსტრიის მთავარი მიზანი, ცილინდრების რაოდენობის და ლიტრაჟის შემცირებაა. მაგრამ თუ „კორვეტზე“ V6 აგრეგატს დააყენებენ, ამით მისი, როგორც სუპერ ავტომობილის რეპუტაცია შეილახება. ეს კი გენერლებს არაფრად სჭირდებათ. ამიტომ, მათ ახალი V8 ძრავის შემუშავება მოუწევთ, რომელსაც საკმარისი ცხენის ძალები და შედარებით მოკრძალებული აპეტიტი ექნება.