„ლამბორგინი ჯოტა“ პრემიერისთვის ემზადება

Lamborghini Jota Specs Leaked

5 ნოემბერი

პარიზის საავტომობილო შოუს დაწყებამდე ერთი თვით ადრე, „ლამბორგინიმ“ იმ ავტომობილის ფოტო ტიზერების გამოქვეყნება დაიწყო, რომელიც საზოგადოებას პირველად სწორედ პარიზში უნდა ენახა. მაშინ ბევრმა ჩათვალა, რომ ეს ავტომობილი „მურსიელაგოს“ შემცვლელი „ჯოტა“ (ახალ ავტომობილს ჯერჯერობით სწორედ ამ სახელით მოიხსენიებენ) იქნებოდა, მაგრამ ასე არ მოხდა. გამოფენაზე არანაკლებ საინტერესო ექსპონატი, კონცეპტუალური „სესტო ელემენტო“ (მეექვსე ელემენტი) ვიხილეთ. ავტომობილი, რომლის შესაქმნელადაც იტალიურმა კომპანიამ არაერთი უახლესი ტექნოლოგია შექმნა და გამოიყენა. თუმცა ეს „ჯოტა“ მაინც არ იყო.

გავიდა ცოტა ხანი და „ჯოტაზე“ მედია ისევ ალაპარაკდა. ამჯერად ინტერნეტით ამ ავტომობილის ის ფოტოები გავრცელდა, რომლებზეც ის შენიღბულ ფორმაში, ტესტირების დროსაა (ფოტოებზე) ასახული. ახლახანს კი, ინტერნეტითვე გავრცელდა ინფორმაცია, რომლის წყაროც ის ინკოგნიტო პირია, რომელიც ირწმუნება, რომ სინგაპურში „ჯოტას“ წინასაპრემიერო პრეზენტაციას დაესწრო, რომელზეც ახალი ავტომობილის ტექნიკური ინფორმაცია გამჟღავნდა.

ამ ინფორმაციის მიხედვით, ახალი „გამძვინვარებული ხარი“ (ლამბორგინის ემბლემა) 6.5-ლიტრიანი V12 ძრავითაა აღჭურვილი რომელიც მინიმუმ 700 ცხენის ძალას და 680 ნიუტონმეტრს იძლევა. ამასთან, ძრავის ბრუნთა რიცხვების მაქსიმალური მაჩვენებელი 8 250 ბრუნია წუთში. ძრავთან ერთდსკოიანი ქუროს მეშვეობით, 7-საფეხურიანი რობოტიზებული კოლოფია შეწყვილებული, რომელშიც საფეხურების შეცვლა 50 მილიწამში ხორციელდება.

რა თქმა უნდა, ამ ავტომობილზე „ლამბო“ იმ ტექნოლოგიების უმეტესობასაც გამოიყენებს, რომლებითაც „სესტო ელემენტო“ შექმნა. მათ შორის მთავარი კი კარბონის კომპოზიტის ფორმირებაა, რაც ამ შესანიშნავი მასალის ფართოდ გამოყენების საშუალებას იძლევა. კერძოდ, კარბონისგანაა დამზადებული მონოკოკური შასი, რისი წყალობითაც, ის „მურსიელაგოს“ შასიზე 229 კილოგრამით მსუბუქი და დაახლოებით 70 პროცენტით მტკიცეა.

იმავე წყაროს ინფორმაციით, ავტომობილს ბრწყინვალე დინამიკური მახასიათებლები აქვს: ადგილიდან 100 კმ/სთ-ის აკრეფა „ჯოტას“ 2.9 წამში შეუძლია, მისი მაქსიმალური სიჩქარე კი 350 კმ/სთ-ია.

სავარაუდოდ, ამ ახალი ავტომობილის მსოფლიო პრემიერა ჟენევის საავტომობილო შოუზე გაიმართება.

ადიო ”მურსიელაგო”

Addio Murciélago: Lamborghini Celebrates End of V12 Supercar's Production

5 ნოემბერი

ძნელი დასაჯერებელია, მაგრამ ავტომობილი, რომლის შეძენასაც ძლიერნი ამა ქვეყნისა კვლავაც ცდილობენ, აღარ გამოვა - ”ლამბორგინიმ” გადაწყვიტა, რომ თავისი ფლაგმანის, სუპერ ავტომობილ ”მურსიელაგოს წარმოება შეწყვიტოს. და ამის მიზეზი ისაა, რომ ავტომობილი უკვე საკმაოდ მოძველდა.

ცხრა წელი გავიდა მას შემდეგ, რაც იტალიურმა კომპანიამ ”მურსიელაგოს” წარმოება დაიწყო. და აი, ამ სახელის მატარებელი ბოლო ავტომობილი, რიგითი ნომრით 4099, საზეიმოდ გააცილეს სანტ’აგატა ბოლონეზეში მდებარე ფაბრიკიდან. მის შემცვლელს (სახელად ჯოტას) მერმისს, ჟენევის ავტო შოუზე ვიხილავთ და ალბათ, ”გამძვინვარებული ხარები” მასზე შეკვეთების მიღებასაც ჟენევაში დაიწყებენ. ”მურსიელაგოს” წარმოების შეწყვეტიდან, ”ჯოტას” წარმოების დაწყებამდე პერიოდში კი კომპანია თავისი საწარმოს გადაიარაღებას ჩაატარებს - სხვა თუ არაფერი, ამ ავტომობილი აწყობისას, არაერთი ახალი ტექნოლოგიის გამოყენება მოუწევთ...

ავტომობილს, რომლის რიგითი ნომერიც არის 4099, შვეიცარელ მყიდველს ეკუთვნის, რომელსაც სამუდამოდ შეუძლია იამაყოს იმით, რომ ამ შესანიშნავი მოდელის ბოლო მესაკუთრე გახდა, მოდელისა, რომელიც თუნდაც ათი წლის შემდეგაც ბევრ თავის კონკურენტს მისცემს ფორას.

ბოლო ”მურსიელაგო” არის ამ ავტომობილის მოდიფიკაცია ”LP 670-4 სუპერველოჩე”, რომელიც სტანდარტულ ვერსიაზე 100 კილოგრამით მსუბუქია და რომელსაც V12 ძრავი 670 ცხენის ძალით ამარაგებს. ავტომობილი ფორთოხლის ფერშია გაწყობილი, რომელსაც კომპანიაში ”არანჩო ატლასი” უწოდეს. ადგილიდან 100 კმ/სთ-მდე კატაპულტირებისთვის, მას 3.2 წამი ჰყოფნის, მისი მაქსიმალური სიჩქარე კი 342 კმ/სთ-ია.

”მურსიელაგო” ”ლამბორგინის” ისტორიაში ერთ-ერთი ყველაზე გაყიდვადი ავტომობილია. შედარებისთვის, იტალიური კომპანია პოპულარულ მოდლ ”დიაბლოს” 11 წელი აწარმოებდა და სულ 2900 ცალი დაამზადა. ისე კი, ”მურსიელაგოზე” პოპულარული მასზე პატარა მოდელი ”გალიარდოა”, რომელსაც ”ლამბო” 2003 წლიდან აწარმოებს და უკვე 10 000 ცალზე მეტი აქვს გაყიდული.

”თითქმის ათი წელია, მოდელი ”მურსიელაგო” ჩვენი ბრენდის გვირგვინია და მას ბაზარზე უზარმაზარი წარმატება ჰქონდა. ეს ავტომობილი ჩვენი კომპანიის უბერებელი ფასეულობების განსახიერებაა და მას წარმოუდგენელი წარმატება ჰქონდა”, - ბოლო ”მურსიელაგოს” გამოშვებასთან დაკავშირებულ საზეიმო ცერემონიაზე განაცხადა კომპანიის შეფმა მარტინ ვინკელმანმა.

”ბეემვემ” კონცეპტუალური ”ვიჟნ ეფიციენტდაინემიქსის” წარმოება გადაწყვიტა

BMW Vision Efficient Dynamics Concept Headed for Production

5 ნოემბერი

”ბეემვემ” ოფიციალურად დაადასტურა, რომ კონცეპტუალურ ჰიბრიდულ მოდელ ”ვიჟნ ეფიციენტდაინემიქსის” სერიული წარმოება გადაწყვიტა. ბავარიულმა კომპანიამ ეს ავტომოვილი პირველად შარშან, ფრანკფურტის საერთაშორისო შოუზე წარადგინა.

ლაიპციგში გამართულ სპეციალურ პრესკონფერენციაზე, ეს ინფორმაცია ”ბეემვეს” დირექტორთა საბჭოს წევრმა, კლაუს დრეგერმა გააკეთა, ვინც ახალი პროექტების განყოფილებას ხელმძღვანელობს. მისი განცხადბით, ახალ ავტომობილს ”ბეემვეს” ევროპელი დილერები 2013 წლის ოქტომბერში მიიღებენ.

”ამ ეტაპზე, ამ ჰიბრიდული სპორტული ავტომობილის შემუშავების ადრეულ სტადიაზე ვართ. ჯერ საბოლოოდ დადგენილი არ გვაქვს, მას რა ტიპის ძალური დანადგარით აღვჭურვავთ. რამდენიმე სხვადასხვა ტიპის ძრავს შორის ვარჩევთ. გვინდა, არჩევანი იმაზე შევაჩეროთ, რომელიც ბევრი ბაზრისთვის ყველაზე მისაღები იქნება. არაა გამორიცხული, რომ ჰიბრიდულ სისტემაში, დიზელის აგრეგატი ბენზინისამ შეცვალოს”, - ამბობს დრეგერი.

ის განმარტავს, რომ ბენზინის ძრავი უფრო მისაღები ამერიკის და აზიის ქვეყნების ბაზრებისთვის იქნება, სადაც დიზელზე მეტად, სეორედ ბენზინის აგრეგატებს აფასებენ. მისივე თქმით, ახალი ავტომობილი ”ბეემვეს” სამოდელო გამის უმაღლეს საფეხურს დაიკავებს. ტექნოლოგიური თვალსაზრისით კი ყველაზე ინოვაციური იქნება - ახალი ჰიბრიდული დანადგარის გარდა, მას აეროდინამიკაც წვრილმანებამდე დახვეწილი ექნება.

დრეგერის ამ განცხადების მიუხედავად, ”ვიჟნ ეფიციენტდაინემიქსის” პირველი საცდელი ეგზემპლარი მაინც ჰიბრიდული სისტემით აღიჭურვება, რომლითაც ის ფრანკფურტში გაგვაცნეს. მასში დიზელის 1.5-ლიტრიანი სამცილინდრიანი ძრავი, რომლის სიმძლავრეც 163 ცხენის ძალაა, დამხმარე როლს შეასრულებს. მასთან უნისონში ორი ელექტროძრავი მუშაობს, რომლებიც წინა და უკანა ღერძებს ცალ-ცალკე ემსახურებიან. თითოეულის სიმძლავრე 93 ცხენის ძალაა. ავტომობილი სრულამძრავიანი კი იქნება, თუმცა ბავარიელები მის ისეთ ვერსიასაც გამოუშვებენ, რომელსაც წამყვანი მხოლოდ უკანა ბორბლები ექნება. ამ შემთხვევაში, ჰიბრიდულ სისტემაში მხოლოდ ერთი ელექტროძრავი შევა.

”ბეემვეს” მიერ გამოქვეყნებული მონაცემებით, ავტომობილს, რომლის შასისა და ძარის წარმოებაშიც ფართოდ გამოიყენებენ კარბონის კომპოზიტს, შესანიშნავი დინამიკური მონაცემები ექნება. კერძოდ, სამძრავიანი ვერსია ადგილიდან 100 კმ/სთ სიჩქარის აკრეფას დაახლოებით 4 წამში შეძლებს, მისი მაქსიმალური სიჩქარე კი ხელოვნურად შეიზღუდება და 250 კმ/სთ იქნება.

ჰიბრიდულ ავტომობილში წამყვანი ელექტროძრავებია, შიდაწვის ძრავი კი დამხმარე ფუნქციას ასრულებს და მისი დანიშნულება მხოლოდ მასთან დაკავშირებული ელექტრო გენერატორის მოძრაობაში მოყვანაა. ლითიუმ-იონურ აკუმულატორებში დაგროვილი ენრგია მხოლოდ 50 კილომეტრის გასავლელადაა საკმარისი, კომბინირებული ციკლით მუშაობისას კი სვლის სიშორე 700 კილომეტრამდე იზრდება. ამ დროს, ყოველი 100 კილომეტრის გასავლელად, ჰიბრიდული აგრეგატი დაახლოებით 4 ლიტრ საწვავს მოიხმარს (საწვავის ავზის მოცულობა 24 ლიტრია). ამ დროს, ყოველ კილომეტრზე, ავტომობილი ატმოსფეროს მხოლოდ 99 გრამი ნაშირორჟანგით დააბინძურებს. სახლის საყოფაცხოვრებო ქსელიდან აკუმულატორების სრული დამუხტვისთვის კი ორსაათნახევარიც საკმრისია.

დრეგერს ჰიბრიდული სპორტული ავტომობილის ფასი არ დაუსახელებია. სამაგიეროდ, მან განაცხადა, რომ ახალი ტექნოლოგიები ძალიან ძვირი ჯდება, რაც მის ფასში აუცილებლად აისახება. ინტერნეტით გავრცელებული ინფორმაციით, გერმანიაში ახალი ავტომობილის ფასი 125-175 ათასი ევროს ფარგლებში მოექცევა.

”მაზდა” როტორულძრავიან RX-9-ს გამოუშვებს

Mazda to Make Rotary-Engined RX-9

5 ნოემბერი

იაპონური კომპანია ”მაზდა” მსოფლიოში ერთადერთი დიდი ავტომწარმოებელია, რომელიც როტორულ (ვანკელის ტიპის) ძრავებს სერიულად ამზადებს. მაგრამ ამჟამად, ასეთი ძრავით ის არცერთ ავტომობილს არ უშვებს. სამაგიეროდ, მისი საინჟინრო შტაბი ამთავრებს მუშაობას ახალ როტორულ აგრეგატზე, რომლითაც მალე სრულიად ახალი მოდელი - RX-9 (ფოტოზე) აღიჭურვება.

ინგლისურ გამოცემა ”ავტოქართან” საუბრისას, ”მაზდას” ინკოგნიტო წარმომადგენელი ამბობს, რომ ”მაზდა” აღარ აპირებს იმ შეცდომის გამეორებას, რომელიც RX-8-სთან დაკავშირებით დაუშვა, როცა არჩევანი ოთხკარიან ძარაზე შეაჩერა. უკვე გადაწყვეტილია, რომ ახალი კუპე ორკარიანი იქნება.

RX-9-ს შასის ბევრ ელემენტს გაცილებით პატარა როდსტერი MX-5 გაუზიარებს, რისი წყალობითაც, ახალი ავტომობილის წონა 1250 კილოგრამი იქნება. ეს საკმაოდ ცოტაა, თუ გავითვალისწინებთ, რომ ახალი ძრავის სიმძლავრე 300 ცხენის ძალაზე მეტი იქნება. ძრავს, სახელად 16X, ელექტროძრავიანი დამჭირხნი მოემსახურება. მისი მუშა მოცულობა, RX-8-ს ძრავზე გაცილებით მეტია, თუმცა მასზე ეკონომიური უნდა იყოს და გაცილებით სუფთა გამონაბოლქვიც უნდა ჰქონდეს.

სხვათა შორის, RX-8-ს წარმოება იმიტომაც შეწყდა, რომ მისი ორროტორიანი ძრავი გაზრდილი აპეტიტით გამოირჩევა და ვერც გამონაბოლქვზე ევროპულ მკაცრ სტანდარტებს (ევრო5) შეესაბამება. სხვათა შორის, ”მაზდა” ახალი სპორტული ავტომობილის წყალბადზე მომუშავე ვერსიის წარმოების შესაძლებლობასაც განიხილავს, ასეთ ავტომობილს კი ნულოვანი გამონაბოლქვი ექნება.

”პიაჯო” პატარა ავტომობილს გამოუშვებს

Piaggio prepares low-polluting car for Asia, Europe

4 ნოემბერი

სკუტერების მწარმოებელ იტალიურ კომპანია ”პიაჯოს” ჯუჯა ავტომობილების წარმოების დაწყება აქვს გადაწყვეტილი. კომპანიის შეფი რობერტო კოლანინო აცხადებს, რომ ასეთი ავტომობილი, რომელშიც მხოლოდ სამი ადგილი იქნება, უკვე შემუშავების სტადიაშია. ამასთან, ის როგორც აზიის განვითარებად ქვეყნებში, ასევე ევროპაშიც გაიყიდება.

სკუტერ ”ვესპას” მწარმოებლის მიზანი, ეკონომიური და გარემოს ნაკლებად დამაბინძურებელი ავტომობილის წარმოებაა. უკვე ცნობილია, რომ ის ბაზარზე სამი წლის შემდეგ გამოჩნდება. თუმცა, ჯერ შერჩეული არაა მისი წარმოების ადგილი. სამაგიეროდ, გადაწყვეტილია, რომ ის ჩვეულებრივის გარდა, ჰიბრიდული და ელექტრული ძალური დანადგარითაც აღიჭურვება.

”პიაჯოს” ავტომობილს, რომელსაც სახელი ჯერაც არ აქვს და რომელიც იტალიურმა კომპანიამ მოტოციკლების მილანურ გამოფენაზე წარადგინა, NT3-ად მოიხსენიებენ. ის ძალიან პატარაა და შესაბამისად, სალონიც შედარებით უცნაურად აქვს მოწყობილი. კერძოდ, მძღოლის სავარძელი ცენტრშია მოთავსებული, ორი სავარძელი კი მის უკან მდებარეობს.

კოლანინოს თქმით, ავტომობილს პირველ რიგში, ინდური და ვიეტნამური ბაზრებისთვის გამოუშვებენ. სხვათა შორის, სწორედ ამ ქვეყნებში აწარმოებს მისი კომპანია სკუტერებს (ინდოეთში სამბორბლიან ეიპს, ვიეტნამში კი - ორიან ვესპას), რომლებიც იქ ძალიან პოპულარულია. ამასთან, კოლანინო ამბობს, რომ თავისი ავტომობილით, ”პიაჯო”, არ აპირებს აზიაში ”ტატა ნანოსთან”, ევროპაში კი ”სმარტთან” კონკურენციას.

პირველ რიგში, ”პიაჯო” ბენზინის ძრავიან ავტომობილს გამოუშვებს, რომელსაც 0.20-0.30 ლიტრი მუშა მოცულობის მქონე ძრავით აღჭურვავენ, რომლის მეშვეობითაც, NT3 მაქსიმუმ 60 კმ/სთ სიჩქარეს განავითარებს. ჰიბრიდულ ვერსიაზე, ელექტრომოტორთან ერთად, 0.30-ლიტრიანი ძრავი იმუშავებს.

კოლანინოს თქმით, ჯუჯა ავტომობილი აზიის და ევროპის მეგაპოლისებისთვის იქნება განკუთვნილი, სადაც მაღალ სიჩქარეზე ნაკლები მოთხოვნაა და ყურადღება ეკონომიურობას და გარემოზე ზრუნვას ექცევა. ამასთან, ის იმედოვნებს, რომ ინდოეთში ამ ავტომობილზე ძალიან დიდი მოთხოვნილება იქნება.

კონკურს 2011 წლის საუკეთესო ავტომობილის ფინალისტები

2011 Car of the Year: 7 Finalists Announced

3 ნოემბერი

დასკვით ეტაპზე გადავიდა ტრადიციული კონკურსი ევროპის წლის საუკეთესო ავტომობილი, რომელმაც ძველი კონტინენტის 2011 წლის საუკეთესო ავტომობილის ვინაობა უნდა გაარკვიოს. ახლახანს ჟიურიმ 41 ახალი ავტომობილიდან ის 7 აირჩია, რომლებიც საუკეთესოს სახელისთვის იბრძოლებენ.

როგორც ყოველთვის, ფინალისტებს შორის ისეთი ავტომობილებიც მოხვდა, რომლებსაც დასკვნით ეტაპზე ბევრი არავინ ელოდა. თუმცა, ასეთ კონკურსებში რომ შემთხვევითი გამარჯვებულები არ არსებობენ, ეს გასულმა ხუთმა ათწლეულმაც უჩვენა.

სამაგიეროდ, ფინალში ვე მოხვდა ისეთი შესანიშნავი ავტომობილები, როგორებიცაა ”აუდის” ლუქს სედანი A8 და ოთხკარიანი კუპე A7 სპორტბეკი, ”ბეემვეს” მე-5 სერიის სედანი და უგზოობის X3, ”იაგუარის XJ და ”მერსედს ბენცის” ოთხკარიანი კუპე CLS. თუმცა, ისიც ცნობილია, რომ დიდი ზომის მანქანები ამ ტიპის კონკურსებს ევროპაში იშვიათად იგებენ.

საუკეთესოთა შორის საუკეთესოს სახელს ევროპის საავტომობილო საზოგადოება 29 ნოემბერს გაიგებს, მანამდე კი შესანიშნავ შვიდეულს თვალი გადავავლოთ და იქნებ, წინასწარ ისიც გამოვიცნოთ, თუ ვის აღიარებენ საუკეთესოდ ჟიურიში შემავალი ჟურნალისტები. მაშ ასე, კონკურს 2011 წლის საუკეთესო ავტომობილის (COTY) წოდებაზე წარდგენილნი არიან (ალფაბეტის მიხედვით)...

ალფა რომეო ჯულიეტა

მილანური კომპანია კრიზისშია, მაგრამ მისი ავტომობილები COTY-ს ფინალში მაინც ხვდებიან. ამჯერად, ეს პატივი ადრე პოპულარული და კარგა ხანს მივიწყებული, ახლა კი გაცოცხლებული სახელის მტარებელ ავტომობილს ერგო. ”ჯულიეტა” ნომინანტობას მარტო მისი შესანიშნავი გარეგნობის გამო იმსახურებდა. ეგეც რომ არა, მან ახლახანს ევროპული სტანდარტით (EURONCAP) ხუთვარსკვლავიანი შეფასება დაიმსახურა. ამ ჰეჩბეკისთვის ბევრი ძრავია გათვალისწინებული, მათ შორის კი ”ჯულიეტას” ის ვერსია გამოირჩევა, რომელიც 1.8-ლიტრიანი ტურბო ძრავითაა (სიმძლავრე 235 ცხენის ძალა) აღჭურვილი.

სიტროენ C3/DS3

ამ ავტომობილის ძიერი მხარეც მისი დახვეწილი გარეგნობაა, თუმცა, რა თქმა უნდა, ის ”ალფა რომეოს” ამ მხრივ ვერ შეეჯიბრება. სამაგიეროდ, ფრანგული ჰეჩბეკი უკეთესი ინტერიერით და მრავალფეროვანი ეკიპირებით გამოირჩევა. ძრავების მხრივაც, ორმაგ შევრონს ბევრი ვერ შეედრება. სპეციალურ აღნიშვნას იმსახურებს კომპანია ”ცენიტის” წარმოების საქარე შუშა. როგორც ჟიური შეფასებაშია ხაზგასმული, ეს შუშა მძღოლის მხედველობის არეს აუმჯობესებს.

დაჩია დასტერი

ვინ იფიქრებდა, რომ ერთ დროს კომუნისტური რუმინეთის სიმბოლოდ ქცეულ ავტომწარმოებელ ”დაჩიას” ოდესმე ევროპული ავტოინდუსტრიის ელიტაში ვიხილავდით... თუმცა, ამაში გასაკვირი არაფერია, ეს მარკა ხომ ახლა ”რენოს” ეკუთვნის, რომელმაც ის თავისი იაფფასიანი ავტომობილების მწარმოებლად აქცია და ერთობ მოგებულიც დარჩა. ჯერ იყო ჰეჩბეკი/სედანი ”ლოგანი”, ახლა კი უგზოობის ”დასტერის” ჯერია.

ესეც იაფთა სეგმენტის წარმომადგენელი და ევროპაში ყველაზე ხელმისაწვდომი უგზოობის ავტომობილია. რაც მთავარია, ტყუილად სულაც არ მიეკუთვნება უგზოობის კლასს - შესანიშნავი გამავლობა აქვს და ინტერიერიც იმაზე უკეთესი კომფორტულობით გამოირჩევა, ვიდრე მისგან მოსალოდნელი იყო. განსაკუთრებით კარგია ”დასტერის” ის ვერსია, რომელიც 1.5-ლიტრიანი 85-ცხენისძალიანი დიზელითაა აღჭურვილი.

რა თქმა უნდა, ”დაჩიას” ფინალში არავინ ელოდა, მაგრამ დრო შეიცვალა...

ფორდ C-მაქს/გრანდ C-მაქსი

საბაზისო C-მაქსს იმის გამო აკრიტიკებდნნ, რომ მას შვიდ სავარძელი არ ჰქონდა. ჰოდა, ცისფერ ოვალში ეს პრობლემა მარტივად მოაგვარეს - პლატფორმა დააგრძელეს და სალონში სავარძლების მესამე რიგისთვის ადგილიც გამოჩნდა. შესაბამიად, ამ მოდიფიკაციას სახელში გრანდ დაემატა. უფრო მთავარი კი ისაა, რომ ამ ავტომობილ(ებ)ს ახალი, სერია ეკობუსტის ძრავები აქვს, რომლებიც საკმარისი სიმძლავრით და მომენტით და, რაც მთავარია, ეკონომიურობით გამოირჩევა. ძრავებიდან ყველაზე მძლავრი 180 ცხენის ძალას გამოიმუშავებს.

ნისან ლიფი

ამ ავტომობილით, ავტოინდუსტრიაში რევოლუცია იწყება და ამ საქმეში ერთ-ერთი პიონერი ”ნისანია” თავის ელექტრულ ჰეჩბეკ ”ლიფით”. რა თქმა უნდა, ამ და მის მსგავს ავტომობილებს უახლოეს წლებში, პოლიტიკური მხარდაჭერა გარანტირებული აქვთ, რადგან განვითარებული ქვეყნების მთავრობები ცდილობენ, რომ მათმა მოსახლეობამ, რაც შეიძლება, მეტი ეკოლოგიურად სუფთა ავტომობილი შეიძინოს.

რამდენადაც ”ლიფის” სვლის სიშორე 160 კილომეტრზე მეტია, რაც იმას ნიშნავს, რომ ამ ავტომობილს ევროპის და არამხოლოდ ევროპის მოსახლეობის უმეტესობა ყოველდღიურად, ზედმეტი დამუხტვის გარეშე გარეშე გამოიყენებს. ავტომობილი 110-ცხენისძალიანი ელექტროძრავითაა აღჭურვილი, რაც ამ ტიპის მანქანისთვის სრულიად საკმარისია.

თავისუფლად შეიძლება ითქვას, რომ ”ნისან ლიფი” საუკეთესოდ აღიარების ერთ-ერთი მთავარი პრეტენდენტია.

ოპელ/ვოქსოლ მერივა

წინა მერივა ძალიან წარმატებული ავტომობილი იყო და ბუნებრივია, ”ჯენერალ მოტორსის” გერმანულ-ბრიტანულმა შტომ, ამ წარმატების გამეორება სცადა, რაც ძალიან კარგად გამოუვიდა. წინამორბედთან შედარებით, ახალი ”მერივა” უფო დიდია - ის უფრო ზორბა პლატფორმაზე ააგეს. შესაბამისად, გაიზარდა ინტერიერის მოცულობა და კომფორტულობა.

ახალ მერივას ერთი დამახასიათებელი თვისება აქვს - მისი წინა და უკანა კარებები ერთმანეთის საპირისპირო მიმართულებით იღება. ამის საშუალებას კი ის ფაქტი იძლევა, რომ უკანა კარებები უკანა საყრდენზეა ჩამოკიდული. ამგვარად, მნიშვნელოვნადაა გაადვილებული მანქანაში ჩაჯდომა და იქიდან გადმოსვლა.

რა თქმა უნდა, მყიდველს არჩევანის გაკეთება ძრავების ფართო გამაში შეუძია. აგრეგატებს შორის კი განსაკუთრებით მძლავრი და ეკონომიური დიზელის აგრეგატები გამოირჩევა.

ვოლვო S60/V60

ჩინელთა ხელში, ”ვოლვო” დიდ განახლებას იწყებს და ამის სიმბოლოდ შეიძლება ეს მშვენიერი ავტომობილი ჩაითვალოს, რომელსაც ეგრეთ წოდებული IKEA-ს დიზაინი გამოარჩევს. მისი წინამორბედსგან განსხვავებით, ახალ S60-ს თავისუფლად შეუძლია მე-3 სერიის ”ბეემვესთან” და C-კლასის ”მერსედესთან” კონკურენცია, რაშიც თუნდაც სოლიდური გაბარიტები (სიგრძე 4.63 მეტრი) დაეხმარება.

ახალგაზრდა მყიდველს უთუოდ უფრო დააინტერესებს ამ სედანის ის ვერსია, რომელიც 3.0-ლიტრიანი ძრავითაა აღჭურვილი. უფროსი თაობის მყიდველს კი შვედური კომპანია 4 და 5-ცილინდრიანი დიზელისძრავიანი ვერსიებით მოხიბლავს. და, რა თქმა უნდა, ყოველთვის უნდა გვახსოვდს, რომ შვედური კომპანიის ავტომობილები უსაფრთხოების უმაღლესი სტანდარტებით გამოირჩევს.

***

რა თქმა უნდა, ამ შვიდეულში ყველა ავტომობილს აქვს ის თვისება, რომლის გამოც ის შეიძლება საუკეთესოდ დასახელებას იმსახურებს, თუმცა ყველაზე გამორჩეულებიც არიან. მაგალითად, ”ალფა რომეო ჯულიეტა”. და მაინც, ალბათ გამარჯვების ყველაზე მეტი შანსი ”ნისანის” ელექტრომობილს ექნება, რადგან ამ აღიარებით, ელექტრომობილების აღიარებაც მოხდება, ეს კი ევროპის სახელმწიფოების უმეტესობას ყველაზე მეტად აწყობს.

თუმცა, გამარჯვებულს მაინც ჟიურის დამოუკიდებელი წევრები ასახელებენ, რომლებიც პოლიტიკური ინტერესით კი არა, საკუთარი ემოციებითა და გემოვნებით იხელმძღვანელებენ. ამ მხრივ კი ”ჯულიას” ბადალი არ უნდა ჰყავდეს...

გერმანელებმა რეკორდული ტევადობის აკუმულატორი შექმნეს

3 ნოემბერი

მირკო ჰანემანი (სურათზე, მანქანიდან გადმოდის) 27 წლის ფიზიკოსია, დამთავრებული აქვს ილმენაუს ტექნიკური უნივერსიტეტი

..............................

მსოფლიო ავტოინდუსტრია მალე ელექტრომობილების წარმოებას მასობრივად დაიწყებს. თუმცა ელექტრონული რევოლუცია საკმაოდ სერიოზულ პრობლემას აწყდება და ეს პრობლემა იმაში მდგომარეობს, რომ ჯერ არ შემუშავებულა საკმაოდ ტევადი აკუმულატორები. ამასთან, ენერგიის შენახვის ეს საშუალება მეტისმეტად ძვირიც ჯდება.

თუმცა, მალე შეიძლება ყველაფერი შეიცვალოს. ყოველ შემთხვევაში, ორმა გერმანულმა, ნაკლებად ცნობილმა კომპანიამ, ამ მიმართულებით პირველი სერიოზული ნაბიჯი უკვე გადადგა - მათ მიერ ელექტრომობილად გადაკეთებულმა ”აუდ A2-მა” მიუნხენიდან ბერლინამდე აკუმულატორების ერთი დამუხტვით მიაღწია.

ბერლინის მერიამ, კომპანია ”DBM ენერჯის” 380 ათასი ევრო გამოუყო

..............................

რეკორდსმენ ავტომობილს ”ლეკერ მობილი” ჰქვია და ის კომპანია ”ლეკერ ენერჯიმ” და ”DBM ენერჯიმ” შექმნეს. პროექტის ავტორები ირწმუნებიან, რომ მათ შექმნეს აკუმულატორი, რომელიც ჩვეულებრივ ლითიუმ-იონურ აკუმულატორებზე ტევადიცაა, კომპაქტურიც, მძლავრიც, იაფიც და გაცილებით მეტი მარგი ქმედების კოეფიციენტითაც გამოირჩევა. შესაძლოა, ზემოთ ნახსენებ გარბენამდე, ეს ყველაფერი ძნელი დასაჯერებელი იყო, მაგრამ ფაქტი სახეზეა - ამ აკუმულატორებით აღჭურვილმა ავტომობილმა შეუჩერებლად 605 კილომეტრი განვლო.

გარბენი ბრანდენბურგის ჭიშკართან დასრულდა, სადაც მის მონაწილეებს უამრავი ჟურნალისტი ელოდა. მანქანა გაჩერდა, იქიდან ”DBM ენერჯის” აღმასრულებელი დირექტორი მირკო ჰანემანი გადმოვიდა და გაიხუმრა: ”თუ ვინმეს თავისი აიფონის დამუხტვა სურს, შეგიძლიათ, ჩვენი მანქანის აკუმულატორით ისარგებლოთ”. ამის თქმის საფუძველი კი მას მართლაც ჰქონდა - როგორც გარბენის მომსახურე ინჟინრებმა განაცხადეს, ”ლეკერ მობილის” აკუმულატორებში ენერგიის 18 პროცენტი კიდევ დარჩენილი იყო.

”ლეკერ მობილზე” დაყენებული აკუმულატორების ტევადობა 115 კილოვატსაათია. ექსპერიმენტული გარბენის დროს, ელექტრომობილმა 605 კილომეტრზე 94.3 კილოვატი ენერგია დახარჯა. საშუალო ხარჯი კი კილომეტრზე 156 ვატისაათშია. ისიც გასათვალისწინებელია, რომ გარბენის დროს, ჰანემანს სალონში გამათბობელი ჰქონდა ჩართული...

..............................

ახვათა შორის, იაპონიის ელექტრომობილების კლუბის სპეციალისტების მიერ, ელექტრომობილად გადაკეთებულმა ”დაიჰაცუმ”, ცოტა ხნის წინ, აკუმულატორების ერთი დამუხტვით, 1003 კილომეტრის გავლა შეძლო. მაგრამ ის გარბენი ჩაკეტილ წრეზე ჩატარდა, რომელზეც ელექტრომობილის საშუალო სიჩქარე 40 კმ/სთ იყო. ”ლეკერ მობილმა” კი 605 კილომეტრი 88 კმ/სთ საშუალო სიჩქარით გაიარა.

საერთო სარგებლობის გზებზე, ”დაიჰაცუს” ყველაზე შორეული გარბენი 555 კილომეტრია. ასე რომ, გერმანული ელექტრომობილი უფრო შორსმავალი გამოდის. ესეც რომ არა, პატარა იაპონურ მანქანაში, აკუმულატორებმა ძალიან დიდი ადგილი დაიკავა. ”ლეკერ მობილში” კი ხელუხლებლად დარჩა არამხოლოდ სალონი, საბარგულიც კი.

”DBM ენერჯის” ელემენტები ლითიუმ-მეტალ-პოლიმერული აკუმულატორების ტიპს მიეკუთვნება. ასეთი ელემენტები პირველად 1990-იან წლებში შექმნეს და მათს სრულყოფაზე ერთდროულად რამდენიმე კომპანია მუშაობდა. მათგან ზოგიერთმა კვლევები შეწყვიტა, ზოგი კი ამ ტიპის აკუმულატორებს მცირე რაოდენობით აწარმოებს კიდეც.

მონათესავე ლითიუმ-იონური (LI) აკუმულატორებისგან ლითიუმ-მეტალ-პოლიმერული (LMP) იმით განსხვავდება, ლითიუმს მეტალის სახით იყენებს. LI-აკუმულატორებში კი ლითიუმი ან ოქსიდის, ან ფოსფატის, ან კიდევ ნახშირბადოვანი მასალის შიგნით, იონების სახით გამოიყენება. გარდა ამისა, LMP-ელემენტებს მყარი ელექტროლიტი აქვს.

ექსპერიმენტისთვის ”აუდი A2-ის” შერჩევა რამდენიმე ფაქტორმა განაპირობა: ჯერ ერთი, ეს ავტომობილი ტონაზე ნაკლებს იწონის. მეორეც, შესანიშნავი აეროდინამიკა აქვს. ყოველივე კი ენერგიის ნაკლებ ხარჯს განაპირობებს

..............................

სხვათა შორის, იყო პერიოდი, როდესაც მეცნიერები LMP ტიპის ელემენტებზე მუშაობის შეწყვეტას აპირებდნენ. ამის მიზეზი კი ის გარემოება იყო, რომ ექსპერიმენტების დროს, ელემენტების ნორმალური მუშაობა მხოლოდ 60 გრადუს ტემპერატურაზე ხერხდებოდა. ამ ტემპერატურული რეჟიმის მუდმივად შენარჩუნება კი კონტროლის და გადამწოდების რთული სისტემის გამართულ მუშაობას საჭიროებდა. მნიშვნელოვანი იყო უსაფრთხოების საკითხიც.

ამასთან, LMP ელემენტები ხანგრძლივი მუშაობითაც არ გამოირჩეოდა - თავიდან მისი სამუშაო რესურსი დამუხტვა-განმუხტვის მხოლოდ 100-200 ციკლს უძლებდა. ელექტრომობილებში კი ისეთი აკუმულატორების გამოყენებას აქვს აზრი, რომლებიც მინიმუმ 1000 ციკლს მაინც გაუძლებენ.

”DBM ენერჯი” 2009 წელს ჩამოყალიბდა და თავიდანვე მიზნდ LMP ელემენტების სრულყოფა დაისახა. და, როგორც ჰანემანი ირწმუნება, ყველა სირთულე გადალახა, რის შემდეგაც აკუმულატორები სატრანსპორტი საშუალებებზე გამოყენებისთვის ვარგისი გახდა. ყოველ შემთხვევაში, მისი ნათქვამის სისწორეს წარმატებული გარბენი ადასტურებს.

გერმანულმა კომპანიამ მის მიერ შემუშავებულ ტექნოლოგიას ”კოლიბრი ალფაპოლიმერი” შეარქვა. ოღონდ, რა თქმა უნდა, მასზე დაწვრილებით არაფერს ყვება. სამაგიეროდ, ირწმუნება, რომ მის მიერ შემუშავებული ელემენტების თვითაალება გამორიცხულია. ის სახიფათო არც პირდაპირი დაჯახების დროსაა. და, რაც მთავარია, ის ერთობ დიდ ტემპერატურულ დიაპაზონში (ცელსიუსით -40-დან +100 გრადუსამდე) მუშაობს.

ესეც არაა ყველაფერი - ჰანემანი ამბობს, რომ მისი კომპანიის მიერ შემუშავებული ელემენტები, ლითიუმ-იონურთან შედარებით, გაცილებით მცირე რაოდენობით ლითიუმ შეიცავს. LMP-ს შემდგენლობაში არც ძვირადღირებული კობალტის მინარევები შედის, ისინი უფრო მსუბუქებიცაა და იაფიც. დაბოლოს, მათი მარგი ქმედების კოეფიციენტი 97 პროცენტია!

და, კიდევ ერთი სასიამოვნო და მეტად მნიშვნელოვანი ფაქტი, რაც LMP ელემენტებს ავტომობილებისათვის სასურველს ხდის: მათი სრული დამუხტვა სულ რაღაც, 6 წუთშია შესაძლებელი. სხვათა შორის, დასამუხტად ამაზე მცირე დრო მხოლოდ იაპონურ კომპანია ”ტოშიბას” მიერ შემუშავებულ ელემენტ SciB-ს სჭირდება, რომლის წარმოება და ელექტრომობილებზე გამოყენებაც მალე დაიწყება.

ჯერჯერობით, ჰანემანი არაფერს ამბობს მისი კომპანიის მიერ შემუშავებული აკუმულატორების ფასზე. ბევრი რამ იმაზე იქნება დამოკიდებული, დაიწყება თუ არა მისი მასობრივად წარმოება. თუ ეს მოხერხდა, მაშინ ფასი დაბალი იქნბეა და კონკურენციას იაპონურ აკუმულატორებს გაუწევს. თეორიულად, LMP აკუმულატორების ფასი, თანამედროვე ლითიუმ-იონურისაზე თითქმის ორჯერ ნაკლები უნდა იყოს.

გერმანელი ბიზნსმენი იმედოვნებს, რომ თავისი პროდუქტით, დიდ ავტომწარმოებლების ყურადღებას მიიქცევს. სხვათა შორის, მას შესთავაზეს, რომ თავისი აკუმულატორი საცდელად ინვალიდის სავარძელზე დაეყენებინა, თუმცა მან ამაზე უარი განაცხადა იმ მოტივით, რომ ასეთი ექსპერიმენტი მეტისმეტად მოკრძალებული იქნებოდა და საზგადოების ყურადღებას ვერ მიიქცევდა.

კითხვაზე, როდის შეუძლია LMP აკუმულატორების მასობრივი წარმოების დაწყება, ჰანემანის პასუხი ოპტიმისტური და ლაკონურია - ”თუნდაც დღეს”...

ოთხთა კავშირის შეთავაზება ავტომობილების მყიდველებს

1 ნოემბერი

ჩვენი ქვეყნის ეკონომიკა რომ კვლავ დაადგა აღმავლობის გზას, ამის დასტური თუნდაც ბანკების გააქტიურებაა, რომლებიც თანდათან ისევ ამრავალფეროვნებენ შეთავაზებებს და სხვადასხვა მეთოდებს მიმართავენ, რათა მათ ხელთ არსებულ ფულს სწორი მიმართულება მისცენ.

ბიზნესის ერთ-ერთი მსხვილი სფერო, სადაც კრედიტების გაცემა განსაკუთრებით მომგებიანია, ავტობიზნესია მთელი თავისი ინფრასტრუქტურით. სწორედ ამის გამო, ბანკმა ”რესპუბლიკამ”, მულტიბრენდულ ”იბერია ბიზნეს ჯგუფთან”, კომპანია ”ვისოლთან” და სადაზღვევო კომპანია ”იმედი ელ-თან” ერთად, თავის კლიენტურას ახალი შეღავათიანი და საკმაოდ ხელსაყრელი პროდუქტი შესთავაზა.

ესაა ავტოგანვადების გრანდიოზული, სამთვიანი აქცია, რომლითაც აქციის მონაწილენი, მომხმარებლებს ”აუდის”, ”შკოდას”, ”ფოლკსვაგენის”, ”პეჟოს”, ”რენოს”, ”ნისანის”, ”მიცუბიშისა” და ”კიას” ავტომობილების შეღავათიანი პირობებით შეძენას სთავაზობენ.

პირებს, რომლებიც აქციის პერიოდში ”იბერია ბიზნეს ჯგუფის” ავტომობილების შეძენას გადაწყვეტენ, შემდეგი პირობებით ისარგებლებენ: განვადების წლიური საპროცენტო განაკვეთები 0-დან იწყება და ისინი დამოკიდებულია მყიდველის თანამონაწილეობასა და განვადების ვადებზე. თანამონაწილეობისა და განვადების ვადის ოპტიმალურად შერჩევის შემთხვევაში, კლიენტს 0%, 1%, 2% და მეტი საპროცენტო განაკვეთით ისარგებლებს. ამასთან, მხოლოდ ”კიას” მოდელებისთვის, განვადების მაქსიმალური პროცენტი 12-ია.

აუცილებელი არაა მყიდველის თანამონაწილეობა - ავტომობილის შესაძენად საჭირო მთლიანი თანხის გამოყოფას ბანკი უზრუნველყოფს. ამასთან, თუ კლიენტს სასურველი ავტომობილის შესაძენად საჭირო თანხის 30% აქვს, ამ შემთხვევაში, განვადების დასამტკიცებლად, პირადობის მოწმობაც საკმარისი იქნება.

საერთაშორისო სადაზღგვევო კომპანია ”იმედი ელ” ავტომობილების მყიდველებს საჩუქრად შეძენილი ავტომობილის ერთწლიან უფასო დაზღვევას სთავაზობს. ცნობისათვის, დაზღვევის ერთწლიანი პაკეტის ღირებულება 1 500 დოლარია. დაზღვეული იქნება როგორც ავტომობილი, ასევე საჭესთან მჯდომი მძღოლის პასუხისმგებლობა მესამე პირის მიმართ.

გარდა ამისა, აქციის პერიოდში, პირველ 20 მყიდველს, კომპანია ”ვისოლი” საჩუქრად 50 ლიტრი საწვავის ტალონს უფასოდ გადასცემს.

რაც მთავარია, ”იბერია ბიზნეს ჯგუფი” მყიდველს ავტომობილების დიდ არჩევანს სთავაზობს, რომლებზეც აქციის პერიოდში, საქართველოში ყველაზე გრძელვადიანი საგარანტიო პირობები ვრცელდება. მყიდველს ასევე შეუძლია სისტემა ტრეიდ-ინით სარგებლობა. ანუ, დილერს ჩააბარებს თავის ძველ ავტომობილს და შოურუმიდან ახალ ავტომობილს შეარჩევს. ძველ ავტომობილს გამოცდილი სპეციალისტები შეაფასებენ, ძველსა და ახალს შორის სხვაობას კი ბანკი ”რესპუბლიკა” დააფინანსებს.

„ჩერიოტ როუდსტერი“ – „ბეემვეს“ კონცეპტუალური ანტიკური მეომარი

BMW Chariot Roadster Concept

31 ოქტომბერი

ვინ იტყვის, რა კავშირი შეიძლება არსებობდეს გერმანულ საავტომობილო კომპანიასა და ანტიკური ხანის ბერძენ მეომრებს შორის? რა თქმა უნდა, არანაირი, მაგრამ ისინი ირიბად უნგრელმა დიზაინერმა მატე ბართამ დააკავშირა. მან შეიმუშავა კონცეპტუალური ავტომობილი სახელად „ჩერიოტ როუდსტერ“, რომელიც, როგორც თავად ამბობს, ანტიკური საომარი ეტლის შთაგონებით შექმნა.

ვენი, ვიდი, ვიცი - კეისრის ეს გამოთქმა ნიშნავს: მიველ, ვნახე, დავამარცხე. ბართას შემთხვევაში, ამ გამოთქმის შემდეგნაირად ფორმულირება შეიძლება: ვნახე, შევქმენი და... გაგრძელება ალბათ არ იქნება. მაგრამ ფაქტია, რომ უნგრელ დიზაინერს თავისი კონცეპციის შემუშავების იდეა მას შემდეგ მოუვიდა, რაც ანტიკურ საომარ ეტლებს ათვალიერებდა.

ბართას თქმით, მისი კონცეპტუალურ ავტომობილის დიზაინში ბევრი ისეთი ელემენტია, რომლებიც ბერძენ ანტიკურ მეომარს, მის ეკიპირებას და საბრძოლო შეიარაღებას გაგახსენებთ. მართლაც, დააკვირდით: უკანა ბორბალი და მისი ფრთა ხომ საბრძოლო ორბორბლიანი ეტლის გვერდხედს ჰგავს. წინა ფრთა კი, რომელიც „თავის“ ბორბალს მთლიანად ფარავს და ავტომობილს თითქმის მთელ სიგრძეზე გაუყვება, უზარმაზარ ფარს, ან ცხენის დამცავ ჯავშანს მოგვაგონებს. თვითონ მეეტლე-მეომარი და მისი შუბი, ან მშვილდი არ ჩანს, მაგრამ ამას რა მნიშვნელობა აქვს. მთავარია, რომ ავტომობილის სილუეტში საბრძოლო ეტლის სილუეტი გამოირჩევა.

როგორც ბართა განმარტავს, თუ მის ავტომობილს ახლოდან დაათვალიერებთ, ანტიკურ ბერძენ მეომართან უფრო მეტ მსგავსებას შენიშნავთ. შესაძლოა, შეედავოთ, მაგრამ ფაქტია, რომ მისი კონცეპტუალური ავტომობილი ძალიან ეფექტურია. თუმცა, ისიც ფაქტია, რომ მის „საბრძოლო ეტლს“ ვერ უპოვნით „ბეემვესთვის“ დამახასიათებელი სარადიატორე ბადის მსგავს ფორმებს.

რა თქმა უნდა, მსგავსი ავტომობილის დამზადება ბავარიელებს ფიქრადაც არ მოუვათ. ბართა არც იმას ამბობს, თუ რითაა მისი ავტომობილი აღჭურვილი. სავარაუდოდ, ის არჩევანს ეკოლოგიურად სუფთა ძალურ დანადგარზე შეაჩერებდა. თუმცა, ეს არც გაუკეთებია. უბრალოდ, მან საკუთარი მხოლოდ დიზაინერული ოსტატობა გვიჩვენა.

მაგრამ ვინ იცის, შესაძლოა, ერთჯერად პროექტებზე სპეციალიზებულმა რომელიმე პატარა ფირმამ ამ კონცეპციის თუნდაც რეალურ მოდელში განხორციელება, ან თუნდაც ერთეულების წარმოება გადაწყვიტოს...

„რალის მებრძოლის“ პრემიერა ლას ვეგასში გაიმართება

Production Rally Fighter to Debut at SEMA 2010

31 ოქტომბერი

ამერიკულმა კომპანია „ლოკალ მოტორსმა“ ლას ვეგასის სპეციალური ეკიპირების ასოციაციის შარშანდელ გამოფენაზე (SEMA) სპორტული კონცეპტუალური ავტომობილი, სახელად „რალი ფაითერი“ (რალის მებრძოლი) წარმოადგინა. ამ ავტომობილმა იმდენად დიდი დაინტერესება გამოიწვია, რომ კომპანიამ მისი რეალური ვერსიის შექმნა გადაწყვიტა მისი ოთხი ეგზემპლარი ისევ ლას ვეგასის შოუსთვის მოამზადა.

მისი სახელიც გვეუბნება - ავტომობილი რალის რბოლებისთვისაა შექმნილი. მისი მზიდი ელემენტი ფოლადის მილებისგან შეკრული მოცულობითი ჩარჩოა, რომელზეც სპეციალური, უგზოობის საკიდარია დამაგრებული. საკიდარს დიდი სვლის მქონე (50 სანტიმეტრი) და იმავდროულად, საკმაოდ ხისტი დრეკადი სისტემა აქვს. რა თქმა უნდა, ავტომობილი მძლავრი სამუხრუჭე სისტემითაა აღჭურვილი.

„რალის მებრძოლის“ სიგრძე 4.800 მეტრი, სიგანე 2.057 მეტრი, სიმაღლე 1.759 მეტრი, ბორბლებს შორის ბაზა 2.921 მეტრი, წინა და უკანა ბორბლების კვალი კი 1.765 მეტრია. ამ ავტომობილის ძარის ბევრი ელემენტი - წინა და უკანა ნაწილები, ზღურბლი და სახურავი, კარბონის კომპოზიტისგანაა დამზადებული. გარდა ამისა, ძარა ვინილის აფსკითაა დაფარული, რაც საღებავის საჭიროებას გამორიცხავს და ასე, ავტომობილი წონაში 5 კილოგრამს იგებს. სულ კი, „რალი ფაითერის“ წონა 1451 კილოგრამია.

ახლა ყველაზე საინტერესოს შესახებაც: „რალის მებრძოლი“ 6.2-ლიტრიანი V8 ძრავითაა აღჭურვილი, რომელიც 430 ცხენის ძალას და 574 ნიუტონმეტრ მომენტს იძლევა. ძრავთან ავტომატური (საფეხურების რაოდენობა დაზუსტებული არაა) კოლოფია დაკავშირებული, რომელიც გადამუშავებულ მაბრუნ მომენტს უკანა (რატომღაც, არა ყველას) წამყვან ბორბლებს აწვდის.

კომპანია აცხადებს, რომ ნებისმიერ მყიდველს შეუძლია, „რალი ფაითერის“ ძარა და შასი თავისი სურვილის შესაბამისად შეცვალოს და ავტომობილი ასე შეუკვეთოს. უფრო მეტიც, ნებისმიერ მყიდველს, „ლოკალ მოტორსის“ პარტნიორობის შესაძლებლობა აქვს. ეს იმ შემთხვევაში მოხდება, თუ ის თავის მიერ კონსტრუქციაში შეტანილ ცვლილებებს სხვა მყიდველსაც შესთავაზებს. რა თქმა უნდა, ამ შემთხვევაში, მოგების ნაწილსაც მიიღებს.

ჯერჯერობით, „რალი ფაითერის“ ზუსტი ფასი არ გამოცხადებულა. სავარაუდოდ, ეს მონსტრი 50 000 დოლარზე მეტი ეღირება. ამასთან, სულ 99 დოლარის დეპოზიტია საკმარისი იმისათვის, კომპანიამ მასზე შეკვეთა მიიღოს და თქვენთვის ავტომობილის მომზადებას შეუდგეს.

”ასტონ მარტინი” უგზოობის ”ლაგონდას” მაინც გამოუშვებს

Aston Martin CEO Gives Green Light to Lagonda

30 ოქტომბერი

ეს უკვე კურიოზს ჰგავს - ”ასტონ მარტინმა” საბოლოოდ გადაწყვიტა, რომ უგზოობის კონცეპტუალურ მოდელ ”ლაგონდას”, რომელიც ჯერ კიდევ ორი თვის წინ, დასავიწყებლად გაიმეტა, მწვანე შუქი აუნთო. ამის შესახებ თავად კომპანიის შეფმა ულრიხ ბეცმა განაცხადა და დასძინა, რომ ავტომობილი ”მერსედეს ბენცის” უგზოობის მოდელ GL-ის ბაზაზე შეიქმნება.

პარიზის საავტომობილო შოუზე გავრცელდა დაუდასტურებელი ინფორმაცია იმის შესახებ, რომ ”ასტონ მარტინის” საწარმოო პროგრამაში შემდეგი ახალი ავტომობილი, ოთხკარიან კუპე ”რეპიდის” ბაზაზე შექმნილი სედანი იქნებოდა. ბეცს არ უარუყვია, რომ მისი კომპანია სედანის წარმოებას აპირებს. ამასთან დასძინა რომ სუპერ ავტომობილი ”ვან-77” მხოლოდ 22 ცალი დამზადდება და არა 77 ცალი, როგორც ადრე იგეგმებოდა.

შარშან, ჟენევის საავტომობილო შოუზე, ინგლისურმა კომპანიამ ყველა გააოცა, როდესაც უგზოობის ”ლაგონდას” საბურველი ახადა. მნახველთა უმეტესობა, მათ შორის ჟურნალისტებიც, ნანახით გაწბილებულები დარჩნენ. ბევრმა ისიც თქვა, ამ მახინჯი მანქანის გამოშვებით, ”ასტონი” თავის ავტორიტეტს შებღალავსო. ამგვარმა ლაპარაკმა ის შედეგი გამოიღო, რომ ”ასტონ მარტინის” თანამფლობელმა დევიდ რიჩარდსმა პროექტ ”ლაგონდას” შეჩერების გადაწყვეტილება მიიღო.

მაგრამ შემდეგ კომპანიის მარკეტოლოგებმა კვლევა ჩაატარეს, რომელმაც გამოავლინა, რომ მახინჯი ”ლაგონდაც” კი, ძალიან პოპულარული იქნება ისეთი ქვეყნების ბაზრებზე, როგორებიცაა ჩინეთი, რუსეთი და ახლო აღმოსავლეთის ქვეყნები. და, რიჩარდსის გადაწყვეტილების შეცვლაც სწორედ მარკეტოლოგების ვერდიქტმა განაპირობა.

რაც შეეხება ”მერსედესთან” პარტნიორობას, გასაკვირი არც ამაშია რამე. ჯერ ერთი, ”ასტონ მარტინი” და გერმანული კომპანია პარტნიორები არიან. მეორეც, კონცეპტუალური ”ლაგონდა” სწორედ ”მერსედეს GL-ის” ბაზაზე დამზადდა. თუმცა, ბეცი აცხადებს, რომ შტუტგარტელებთან პარტნიორობის მიუხედავად, უგზოობის მოდელის ნაწილების და კომპონენტების უმეტესობას თავად ”ასტონი” დაამზადებს, რათა თავისი ავტომობილების უნიკალურობა შეინარჩუნოს.

”ვოლვო” საწვავის ფიჭურ ელემენტებს შეიმუშავებს

Volvo C30 EV

30 ოქტომბერი

იმ კომპანიების რიცხვს, რომლებიც თავიანთი ელექტრომობილებისთვის, ენერგიის დამატებით წყაროდ ფიჭური ელემენტების გამოყენებას აპირებენ, მალე ”ვოლვოც” შეუერთდება. კომპანიამ, რომელიც ცოტა ხნის წინ, ”ფორდმა” ჩინელებს მიჰყიდა, ახლახანს შვედეთის ენერგეტიკის სამინისტროსთან ხელშეკრულება გააფორმა, რომლის მიხედვითაც, ეს უკანასკნელი ავტომწარმოებელს საწვავის ფიჭური ელემენტის შემუშავებაში დაეხმარება.

ასეთი ელემენტების შემუშავებას ”ვოლვო” 2012 წლისთვის დაასრულებს, რის შემდეგაც, ელექტრომობილ C30-ის ბაზაზე, ორი საცდელი პროტოტიპი დამზადდება და მათი საგზაო გამოცდები დაიწყება.

ახალ ძალურ დანადგარში, წყალბადის მისაღებად, ჩვეულებრივ ბენზინს გამოიყენებენ. თავისუფალი წყალბადი ფიჭური ელემენტების მთავარი ენერგომატარებელია. ამ ელემენტებში მიმდინარე ქიმიური რეაქციების დროს, წყალბადსა და ჟანგბადს შორის მიმდინარე პროცესებისას, წარმოიქმნება ელექტროდენი, რომელიც აკუმულატორებს დამუხტავს.

უნდა ითქვას, რომ წყალბადის მისაღებად ბენზინის გამოყენებას დადებითთან ერთად, უარყოფითი ეფექტიც აქვს. დადებითი ისაა, რომ საჭირო არ იქნება ავტომობილით თავისუფალი წყალბადის ტარება. უარყოფითი კი ისაა, რომ ბენზინისგან წყალბადის მიღების თანაპროდუქტი ნახშირჟანგია. სხვათა შორის, როდესაც ფიჭურ ელემენტებში თავისუფალ წყალბადს იყენებენ, ავტომობილი ნარჩენის სახით მხოლოდ სუფთა წყალს გამოჰყოფს. ბენზინის შემთხვევაში კი მას გამონაბოლქვიც ექნება. თუმცა, ”ვოლვოს” სპეციალისტები ირწმუნებიან, რომ ამ შემთხვევაში გამონაბოლქვი უმნიშვნელო იქნება.

ცნობისათვის, C30-ის ბაზაზე დამზადებული ელექტრომობილი ”ვოლვომ” შარშან გვიჩვენა. ამ მანქანას 111-ცხენისძალიანი ელექტროძრავი ამოძრავებს, რომლის დახმარებითაც, ადგილიდან 100 კმ/სთ-მდე აჩქარებას ის 10.5 წამს ანდომებს, მაქსიმალური სიჩქარე კი სულ რაღაც 130 კმ/სთ-ია. ამ ელექტრომობილის სვლის სიშორე 150 კილომეტრს აღწევს, ფიჭური ელემენტების წყალობით კი ეს მაჩვენებელი 400 კილომეტრამდე გაიზრდება.

”აბარტი” საკუთარ პლატფორმას შეიმუშავებს

Abarth

30 ოქტომბერი

იტალიური კომპანია ”აბარტი”, რომელიც ”ფიატის” ჯგუფში შედის, უარყოფს ხმებს იმის შესახებ, რომ თითქოს, საკუთარი სპორტული მოდელის საწარმოებლად, ავსტრიული KTM-ის ექსტრემალურ სპორტულ ავტომობილ X-ბოქსის პლატფორმის გამოყენებას აპირებს. უფრო მეტიც, როგორც ბლოგ ”ავტობლოგის” ესპანური ვერსია იუწყება, ”აბარტის” სპეციალისტები ახალ პლატფორმას თავადვე შეიმუშავებენ.

სხვათა შორის, ადრე იყო ლაპარაკი იმაზე, რომ ”აბარტი” თავისი პლატფორმის შემუშავების ნაცვლად, ”ლოტუსის” იმ პლატფორმის გამოყენებას გეგმავდა, რომელზეც ინგლისური კომპანიის პოპულარული მოდელი ”ელისია” ბაზირებული. მაგრამ იტალიურ კომპანიაში აღნიშნულ პლატფორმას, რომელსაც ”ლოტუსის” გარდა, კიდევ რამდენიმე კომპანია, მათ შორის, ელექტრომობილების მწარმოებელი ”ტესლა” იყენებს, მოძველებული უწოდეს.

ბარემ ამ გამონათქვამის ნამდვილი მიზეზი განვმარტოთ - ”ლოტუსმა” ”ელისის” პლატფორმა რამდენიმე წლის წინ კი შეიმუშავა, მაგრამ ის ახლაც არ შეიძლება მოძველებულად ჩაითვალოს და თამამად შეიძლება ითქვას, რომ აქტუალობას კიდევ რამდენიმე წელი შეინარჩუნებს. ”აბარტის” მიერ მისი დაწუნება კი იმ ფაქტს შეიძლება მიეწეროს, რომ ეს კომპანია ”ფიატის” იმ ოჯახის წევრია, რომელიც თავის ბრენდ ”ფერარით” ამაყობს. ამ უკანასკნელს კი ”ლოტუსი” წლების განმავლობაში, ფორმულა 1-შიც და საგზაო ავტომობილების სეგმენტშიც უწევდა კონკურენციას.

რაც შეეხება KTM-ის პლატფორმას, ”აბარტი” მისი გამოყენების შესაძლებლობას განიხილავდა. ესაა კარბონის კომპოზიტისგან დამზადებული მონოკოკი, რომელსაც ავსტრიული კომპანია თავის იტალიურ არშემდგარ პარტნიორს სრულად დაკომპლექტებულს სთავაზობდა. ამ პლატფორმაზე კი ”აბარტი” თავის მიერ შემუშავებულ სპორტულ ძარას (ტარგას ტიპისას), ძრავს და ტრანსმისიას, ასევე სალონს დაამაგრებდა.

”ავტობლოგი” არაფერს ამბობს ამ თითქმის შემდგარი გარიგების ჩაშლის მიზეზების შესახებ. მაგრამ ადვილი სავარაუდოა, რომ ”აბარტმა” თავი ავსტიული პლატფორმის სიძვირის გამო შეიკავა. სიძვირეს კი კარბონის კომპოზიტი განაპირობებს. ამასთან, ეს ავანგარდული მასალა, რომელსაც ფართოდ იყენებენ ფორმულა 1-ში, სერიულ წარმოებაში კარგად გამოცდილი არაა.

”ავტობლოგი” ბევრს არც ”აბარტის” საკუთარი პლატფორმის კონსტრუქციის შესახებ გვეუბნება. ცნობილია მხოლოდ ის, რომ მას წამყვანი უკანა ბორბლები ექნება და აღიჭურვება ”ფიატის” 1.4-ლიტრიანი ბენზინის ძრავით (სერია მულტიეარ), რომელიც 170 ცხენის ძალას იძლევა. ძრავს ორდისკოიანი ქურის დახმარებით, 5-საფეხურიანი რობოტიზებული კოლოფი შეუწყვილდება.

სავარაუდოდ, ”აბარტი” საკუთარი როდსტერის წარმოებას 2013 წელს დაიწყებს და მას დაახლოებით 30 000 ევროს ფასად გაჰყიდის.

”ფოლკსვაგენის” პროექტი მიმო - ძრავი შუაში და ადრენალინი

Volkswagen's new 'MiMo' sports car architecture

ბრიტანული გამოცემა ”ქარ” იუწყება, რომ საავტომობილო ჯგუფმა ”ფოლკსვაგენმა” მწვანე შუქი აუნთო პროექტ მიმო-ს, რომელიც სრულიად ახალი, შუაძრავიანი არქიტექტურის შემუშავებას ითვალისწინებს. მიმო-ც გერმანულად სწორედ ასე იშიფრება - მიტელმოტორ, ანუ შუაძრავიანი.

ის ფაქტი, რომ ვოლფსბურგელებმა ტიპიური სპორტული პლატფორმის შემუშავება გადაწყვიტეს, იმის მანიშნებელია, რომ მათ ”ფოლკსვაგენის”, ”პორშეს” და ”აუდის” მარკებით, ამ ტიპის სპორტული ავტომობილების წარმოება აქვთ გადაწყვეტილი. ამასთან, გამორიცხული არც ისაა, რომ მომავალში ამავე პლატფორმით ”შკოდამ” და ”სეატმაც” ისარგებლონ.

ახალი პლატფორმის შემუშავების საქმეში, წამყვანი როლი ”პორშეს” მიენიჭება, რომელიც სხვადასხვა მიზეზთა გამო, იურიდიულად ჯერაც არაა სრულად ინტეგრირებული ”ფოლკსვაგენის” ჯგუფში. შტუტგარტულ კომპანიას შუა და უკანაძრავიანი სპორტული ავტომობილების წარმოების დიდი გამოცდილება აქვს და ბუნებრივია, ვოლფსბურგში ამ გამოცდილების გამოყენება სურთ.

არცთუ დიდი ხნის წინ, ”პორშეს” შეფმა მათიას მიულერმა განაცხადა, რომ მისი კომპანია თავისი საწარმოო პროგრამის კიდევ უფრო გაფართოებას აპირებს. ჯერ ერთი, იგეგმება მომცრო ზომის უგზოობის მოდელის წარმოების დაწყება. გარდა ამისა, შემუშავების პროცესშია ახალი შუაძრავიანი ავტომობილი, რომელიც ”პორშეს” გამაში, მოდელ 911-სა და 918 სპაიდერს შორის არსებულ ნიშას დაიკავებს. კიდევ ერთი ავტომობილი, რომლის წარმოებასაც ”პორშე” გეგმავს, არის მცირე ზომის სპორტქარი, რომელიც ”ბოქსსტერზე” დაბალ საფეხურს დაიკავებს და შტუტგარტელთა ყველაზე იაფფასიანი ავტომობილი იქნება.

ყველა ამ ავტომობილისთვის განკუთვნილ პლატფორმას ”აუდიც” გამოიყენებს. ინგოლშტადტელების პირველი შუაძრავიანი მოდელის სახელი იქნება R5, რომელსაც დეტროიტში ნაჩვენები კონცეპტუალური E-ტრონის (სურათზე) მოტივებზე დაამზადებენ. ეს ავტომობილი ორ პოპულარულ სპორტულ მოდელს - TT-სა და R8-ს შორის არსებულ ნიშას შეავსებს. ”აუდის” პირველი შუამოტორიანი ავტომობილი ბაზარზე 2014 წელს გამოვა. პირველად კუპესძარიანი ვერსიის გაყიდვები დაიწყება, შემდეგ კი მას ღიაძარიანი მოდიფიკაციაც დაემატება.